அருண்மொழி

அருண்மொழி

சர்வதேச நாணய நிதியம் ஆபத்தானது.இலங்கையை விற்க நேரிடும் என எச்சரிக்கிறது ஜே.வி.பி !

சர்வதேச நாணய நிதியத்திற்கு சென்று, நாட்டை ஒருபோதும் மீட்டெடுக்க முடியாது என்று ஜே.வி.பியின் முன்னாள் நாடாளுமன்ற உறுப்பினர் பிமல் ரத்நாயக்க தெரிவித்துள்ளார்.

ஜே.வி.பியின் கூட்டமொன்றில் கலந்து கொண்டு உரையாற்றிய அவர், அங்கு மேலும் தெரிவிக்கையில்,

சர்வதேச நாணய நிதியத்திற்கு சென்று, மீண்டெழுந்த நாடுகள் உலகில் இல்லை.

1998 இல் இருந்து ஆர்ஜன்டீனா 9 தடவைகள் ஐ.எம்.எப்பிடம் கடன் பெற்றுள்ளது. இந்த 9 தடவைகளும் அந்நாடு கடுமையான நெருக்கடிகளுக்கு முகம் கொடுத்தது.

சர்வதேச நாணய நிதியத்திற்கு சென்று இலங்கை போன்ற சிறிய நாடுகளால் ஒருபோதும் மேலே வரமுடியாது.

கிறீஸ் எம்மை விட பல மடங்கு பெரிய நாடாகும். 13 வருடங்கள் ஐ.எம்.எப்பிற்கு சென்று, கடந்த வருடம் தான் அந்த நாட்டில் சிறியதொரு முன்னேற்றம் ஏற்பட்டது.

ஆனால், இந்தக் காலப்பகுதியில் நாட்டின் மின்சாரக் கட்டமைப்பு, நீர் சுத்திகரிப்பு நிறுவனங்கள், துறைமுகங்கள் என அனைத்தையும் கிறீஸ் விற்பனை செய்தது.
இதேபோன்று தான் இலங்கையிலும் ஏற்படும்.

இப்போதுள்ள ஆட்சியாளர்கள் இன்னும் இருந்தால் தனிநபர் கடன் தொகை இன்னமும் உயரும். கிறீஸ் நாட்டைப் போன்று, நாட்டின் ஏனைய சொத்துக்களையும் விற்பனை செய்யும் நிலைமை ஏற்படும்.

தனிநபர் வருமானத்தை விட தனிநபர் கடன்தொகை இன்று அதிகரித்துள்ளது. கோட்டா- ரணில்- ஹரின் போன்றோரை வைத்து நாட்டில் எதையும் செய்ய முடியாது. இவர்களால் மக்களை மீட்டெடுக்க முடியாது‘’ எனத் தெரிவித்தார்.

சிறுபோகத்திற்கான யூரியா உரம் பெறுவதற்கு இலங்கைக்கு கரம் கொடுக்கிறது உலக வங்கி!

எதிர்வரும் சிறு போகத்திற்கு யூரியா உரத்தை பெற்றுக் கொள்வதற்கு தேவையான நிதி உதவிகளை வழங்க உலக வங்கி இணக்கம் தெரிவித்துள்ளது.

இலங்கையிலுள்ள உலக வங்கி அலுவலகத்தின் பிரதிநிதிகளுக்கும் இடையில் விவசாய அமைச்சில் அண்மையில் இடம்பெற்ற கலந்துரையாடலின் போதே இந்த இணக்கப்பாடு எட்டப்பட்டதாக விவசாய அமைச்சரான மஹிந்த அமரவீர தெரிவித்தார்.

அமைச்சின் செயலாளர் எம்.பி.ஆர்.புஸ்பகுமார உட்பட பலர் இந்த கலந்துரையாடலில் கலந்துக் கொண்டனர்.

இம்முறை சிறு போக நெற்செய்கைக்குத் தேவையான இரசாயன உரங்களைப் பெற்றுக் கொள்வது தொடர்பில் இடம்பெற்ற கலந்துரையாடலின் போது உலக வங்கியின் பிரதிநிதிகள் உரிய நிதியுதவியை வழங்குவதற்கு இணக்கம் தெரிவித்துள்ளதாக அமைச்சர் தெரிவித்தார்.

எதிர்காலத்தில் நாட்டு மக்களுக்கு தட்டுப்பாடு இன்றி அரிசி வழங்கும் வேலைத்திட்டத்திற்கு உலக வங்கியினால் வழங்கப்படும் ஆதரவை பாராட்டுவதாக அமைச்சர் தெரிவித்தார்.

நெல் பயிர்ச்செய்கை மற்றும் ஏனைய பயிர்ச் செய்கைகளுக்கு தேவையான உரங்கள் மற்றும் விவசாய இரசாயனங்களை வழங்குவதற்கு உலக வங்கி போன்ற ஏனைய நிறுவனங்களுடன் கலந்துரையாடல்களை மேற்கொள்ள எதிர்பார்க்கப்படுவதாக அமைச்சர் மேலும் தெரிவித்தார்.

பொருளாதார நெருக்கடியால் அதிகரிக்கும் போசாக்கு குறைபாடு !

தற்போதைய பொருளாதார நெருக்கடியால் நாட்டில் நிலவும் உணவுப் பற்றாக்குறையால் குழந்தைகளின் போசாக்கு குறைபாடு வேகமாக அதிகரித்து வருவதாக லேடி ரிட்ஜ்வே மருத்துவமனையின் குழந்தை நல மருத்துவ ஆலோசகரான வைத்தியர் தீபால் பெரேரா தெரிவித்தார்.

முன்னெடுக்கப்பட்ட ஆய்வுக்கு அமைய 53 குழந்தைகளில் பதினொரு குழந்தைகள் ஊட்டச் சத்து குறைபாடுடன் இருப்பதாகவும், நான்கு குழந்தைகள் கடுமையான ஊட்டச்சத்துக் குறைபாட்டுடன் இருப்பதாக அவர் தெரிவித்தார்.

கொவிட்-19 நிலைமைக்குப் பின்னரும், தற்போதைய பொருளாதார நெருக்கடியாலும் குடும்பங்களின் வருமானம் குறைந்துள்ளது.

பிள்ளைகளுக்கு பெற்றோர்கள் தங்களால் இயன்றவரை ஆரோக்கியமான உணவை வழங்குமாறும், அத்துடன் இலைக் காய்கறிகள் மற்றும் தானிய வகைகளை வழங்குமாறும் அவர் பெற்றோர்களிடம் கேட்டுக்கொண்டார்.

 

அரசுக்கு எதிரான பல்கலைக்கழக மாணவர்களின் போராட்டத்துக்கு தடை விதிக்குமாறு பொலிஸார் கோரிக்கை!

கொழும்பில் பல்கலைக்கழக மாணவர்களின் ஆர்ப்பாட்டத்திற்கு தடை உத்தரவு பிறப்பிக்குமாறு பொலிஸார் விடுத்த கோரிக்கை நீதிமன்றத்தால் நிராகரிக்கப்பட்டுள்ளது.

கொழும்பு, விகாரமஹாதேவி பூங்காவிலிருந்து வார்ட் பிளேஸில் உள்ள பல்கலைக்கழக மானியங்கள் ஆணைக்குழு வரையான பாதைகளுக்குள் நுழைய ஆர்ப்பாட்டக்காரர்களுக்கு தடை உத்தரவு பிறப்பிக்குமாறு கறுவாத்தோட்டம் பொலிஸார் நீதிமன்றில் கோரிக்கை விடுத்திருந்தனர்.

இக்கோரிக்கையை நிராகரித்த கொழும்பு பிரதான நீதவான் நந்தன அமரசிங்க ஆர்ப்பாட்டக்காரர்கள் சட்டம் ஒழுங்கை மீறும் வகையில் செயற்பட்டால் குற்றவியல் நடைமுறைச் சட்டத்தின் 95ஆவது பிரிவின் கீழ் அவர்களுக்கு எதிராக வழக்குத் தொடர பொலிஸாருக்கு அதிகாரம் உள்ளதாக சுட்டிக்காட்டினார்.

11 வயது சிறுமியை பாலியல் துஷ்பிரயோகம் செய்த சிறுவர்கள் – பெண் பிள்ளைகளுக்கு பாதுகாப்பற்ற நாடாகும் இலங்கை..?

அம்பாறை அக்கரைப்பற்று பொலிஸ் பிரிவிலுள்ள அட்டாளைச்சேனை பிரதேசத்தில் 11 வயது சிறுமியை துஷ்பிரயோகம் செய்த 16 வயது சிறுவர் இருவரையும் 14 நாட்கள் விளக்கமறியலில் வைக்குமாறு அக்கரைப்பற்று நீதவான் நீதிமன்ற நீதவான் நேற்று (31) உத்தரவிட்டார்.

அட்டாளைச்சேனை பிரதேசத்திலுள்ள 11 வயதான சிறுமி ஒருவர் சம்பவதினமான கடந்த 23 ம் திகதி தனது குடும்பத்துடன் கடற்கரைக்குச் சென்றுள்ள நிலையில் இடைநடுவே குறித்த சிறுமியின் மூத்த சகோதரி வீடு செல்ல நேரிட்டமையினால், ஏனைய உறவினர்கள் கடற்கரையில் வீற்றிருக்க விளையாடிக் கொண்டிருந்த 11 வயதான சிறுமியை சகோதரியின் பாதுகாப்பிற்காக வீட்டுக்கு அனுப்பியுள்ளனர்.

தனது சகோதரியை வீட்டிற்கு கொண்டு சென்று விட்டுவிட்டு 11 வயதான சிறுமி தனிமையாக மீண்டும் கடற்கரைக்கு இரவு 10.30 மணிக்கு தனியாக திரும்பிக் கொண்டிருந்த போது வீதியின் இடைநடுவில் சிறுமியை இடைமறித்த இரு சிறுவர்களும் அவரின் வாயை கையினால் பொத்தி அருகில் உள்ள வீட்டிற்கு தூக்கி சென்று அங்கு ஒருவர் வெளியில் காவல் இருக்க மற்றையவர் அந்த சிறுமியை துஷ்பிரயோகம் செய்துள்ளார்.

பின்னர் வீட்டிற்குள் ஒருவர் உள்வரும் சத்தம் கேட்டு அந்த சிறுமியை மிரட்டி யாரிடமும் சொல்ல வேண்டாம், மீண்டும் கூப்பிட்டால் வர வேண்டும் என தெரிவித்து சிறுமியை மதிலுக்கு மேலால் தூக்கிப் போட்டுள்ளதாக பொலிசாரின் ஆரம்பகட்ட விசாரணையில் தெரியவந்துள்ளது.

இதனையடுத்து பாதிக்கப்பட்ட சிறுமியின் பெற்றோர் முறைப்பாடு செய்ததையடுத்து சிறுமியை வைத்தியசாலையில் அனுமதித்ததுடன் 16 வயதுடைய இரு சிறுவர்களையும் கைது செய்து அக்கரைப்பற்று நீதவான் நீதிமன்றத்தில் நேற்று (31) ஆஜர்படுத்திய நிலையில் இருவரையும் எதிர்வரும் 15 ம் திகதி வரை 14 நாட்களுக்கு விளக்கமறியலில் வைக்குமாறு நீதவான் உத்தரவிட்டார்.

……………………………………………………………………………………………………………………………………………………..

அண்மையில் 9வயது சிறுமி கடத்தி கொலை செய்யப்பட்ட சம்பவத்திலிருந்தே மீள முடியாதுள்ளது. இதற்குள் அடுத்தடுத்து பாலியல் துஷ்பிரயோகம் தொடர்பான சில தகவல்களை காணக்கிடைத்ததது. இந்த செய்திகளை கண்ட ஒரு வயதான தாய் கூறிய போது என்னுடைய பிள்ளைகளுக்கு பெண் குழந்தைகளே பிறக்க கூடாது என கூறியிருந்தார்.

உண்மையிலேயே நாம் வாழக்கூடிய இந்த சமூகம் அத்தனை பாதுகாப்பில்லாத பகுதியாக மாறிக்கொண்டிருக்கிறது என்பதே உண்மை. பாலியல் துஷ்பிரயோகம் தொடர்பான குற்றச்சாட்டுக்களில் பெரும்பாலான குற்றச்சாட்டுக்கள் உறவினர்களால் நடைபெற்றதாகவே அறிய முடிகிறது.பிள்ளைகளின் பாதுகாப்பை பெற்றோரை் உறுதி செய்வது அவசியமாகிறது.

பாடசாலைகளில் மட்டுமல்ல உங்கள் வீடுகளிலும் நல்ல தொடுகை – கெட்ட தொடுகைகள் பற்றி சிறுவர்களுக்கு விளக்கமளியுங்கள். கூடாத தொடுகைகளை உடனடியாக அடையாளப்படுத்தக்கூடிய வகையில் உங்கள் பிள்ளைகளுடன் நெருக்கமாக பழகுங்கள். மேலும் பிள்ளைகளை முடியுமானவரை தனியாக எந்த விடயங்களுக்கும் அனுப்ப முற்படாதீர்கள். இந்த சமூகம் அவ்வளவு பாதுகாப்பானதாக இல்லை என்பதே உண்மை.  உங்கள் பிள்ளைகளை நீங்களே பாதுகாத்துக்கொள்ள வேண்டும்.

அதே நேரம் பாலியல் துஷ்பிரயோகம் செய்த குற்றவாளி ஒருவர் போதைப்பொருள் பாவனையால் பாலியல் துஷ்பிரயோகம் செய்துவிட்டார் என்ற மூடத்தனமான கருத்துக்களை பரப்பிக்கொண்டிருக்காதீர்கள். அவர்களும் ஒரு வகையில் குற்றவாளிகளே. போதைப்பொருள் பாவனையில் தன்னுடைய சகோதரியையோ – தனது தாயையோ யாரும் பாலியல் துஷ்பிரயோகம் செய்ததாக பெரிதும் கேள்விப்பட்தில்லை. போதைவெறியில் சிறுமியை துஷ்பிரயோகம் செய்த 3 பிள்ளைகளின் தந்தை என்ற செய்தியை அண்மையில் கேள்விப்பட்டிருப்போம். போதையில் கூட தெளிவாக தங்களுடைய பிள்ளைகளை விட்டுவிட்டு யாரோ ஒருவருடைய பிள்ளைகளை அடையாளம் கண்டு துஷ்பிரயோகம் செய்யுமளவிற்கு அவர்கள் தெளிவாக தான் உள்ளார்கள். ஆகவே போதைப்பொருள் பாவனையை காரணம் சொல்லாதீர்கள். அது ஒரு காரணமே தவிர. குறித்த குற்றவாளியை உருவாக்கியது தொடர்பில் பெற்றோரும் – குற்றவாளியின் ஆசிரியர்களுமே பதில் சொல்ல வேண்டியவர்கள்.

உண்மையிலேயே தண்டனைகள் கடுமையாக்கப்படல் வேண்டும். இதற்கான சட்ட வரைபுகள் உருவாக்கப்பட்டு இறுக்கமாக கண்காணிக்கப்படல் வேண்டும். இது தவிர வீடுகளில் பெற்றோர் ஆண் பிள்ளைகளுக்கு,  பெண்களை மதிக்கவோ – தெய்வங்களாக கும்பிடுங்கள் என்றோ எல்லாம் சொல்லிக்கொடுக்க தேவையில்லை. ஆகக்குறைந்த மனிதாபிமானத்தையாவது பெற்றோர் சொல்லிக்கொடுக்க வேண்டும்.  பிள்ளைகள் செய்கின்ற பாலியல் துஷ்பிரயோகங்களுக்கு பின்னால் குற்றவாளிகளான – துஷ்பிரயோகத்தில் ஈடுபட்ட பிள்ளைகளை முறையாக வளரக்க தவறிய பெற்றோரை பிரதான குற்றவாளிகள்.

 

பாடசாலைகளும் முறையான வகையில் சுகாதார கல்வியையும் – பாலியல் கல்வியையும் முறையாக கற்பிக்க முன்வர வேண்டும். ஆண் – பெ் சமத்துவம் வீடுகளிலும் – பாடசாலைகளிலும் இயல்பான ஒரு விடயமாக மாற்றப்பட வேண்டும் . இந்த மாற்றங்கள் ஒவ்வொரு வீடுகிளிலிருந்தும் ஆரம்பிக்கப்பட வுண்டும் .அப்போது மட்டுமே பெண் பிள்ளைகளின் பாதுகாப்பும் சரி – சமூக பாதுகாப்பும் சரி உறுதிப்படுத்தப்படும்.

 

வெள்ளத்துக்கு மத்தியில் பரீட்சை எழுதிய மாணவர்கள் – விசாரணைகளை ஆரம்பிக்குமாறு அறிவுறுத்தல் !

கடந்த சில தினங்களாக பெய்து வரும் கடும் மழைக்கு மத்தியில் க.பொ.த சாதாரண தரப் பரீட்சைக்கு முகம்கொடுக்கும் மாணவர்களிள் புகைப்படங்கள் சில சமூக ஊடகங்களில் பகிரப்பட்டு வருகின்றன.

இது தொடர்பில் கல்வி அமைச்சு விசேட அறிக்கையொன்றை வெளியிட்டுள்ளது.

சம்பவம் தொடர்பில் விசாரணைகளை ஆரம்பிக்குமாறு பரீட்சைகள் திணைக்களத்தினால் பரீட்சைகள் ஆணையாளருக்கு அறிவிக்கப்பட்டுள்ளதாக அதில் குறிப்பிடப்பட்டுள்ளது.

அவ்வாறு சிரமங்களை முகங்கொடுத்த மாணவர்களுக்கு அந்த சந்தர்ப்பத்திலேயே சலுகைகள் வழங்கப்பட்டுள்ளதாக குறித்த அறிக்கையில் குறிப்பிடப்பட்டுள்ளது.

மலேசிய வேலைப் பயிற்சி மையத்தை நிறுவ மலேசியா – இலங்கை புரிந்துணர்வு ஒப்பந்தம் !

மலேசியாவில் வேலைவாய்ப்பினை இலக்காகக் கொண்டு ஒரு விசேட பயிற்சி மையத்தை விரைவாக நிறுவுவது தொடர்பில் மலேசிய வெளிநாட்டு வேலைவாய்ப்பு அமைச்சு மற்றும் இலங்கை தொழிலாளர் அமைச்சும் புரிந்துணர்வு ஒப்பந்தத்தில் கைசாத்திட்டுள்ளன.

தொழிலாளர் அமைச்சர் மனுஷ நாணயக்கார மற்றும் இலங்கை, மாலைதீவுக்கான மலேசிய உயர்ஸ்தானிகர் டான் யாங் தாய் ஆகியோருக்கு இடையில் அமைச்சில் இடம்பெற்ற விசேட சந்திப்பின் போதே இது கைச்சாத்திடப்பட்டுள்ளது.

2016ஆம் ஆண்டு அமைச்சர் நாணயக்கார வெளிநாட்டு வேலைவாய்ப்பு பிரதி அமைச்சராக இருந்த போது இரு நாடுகளுக்கும் இடையில் மலேசியப் பயிற்சி நிலையம் ஒன்றை நிறுவுவதற்கான புரிந்துணர்வு ஒப்பந்தம் கைச்சாத்திடப்பட்டது.

இக்கலந்துரையாடலில் அமைச்சர் மற்றும் உயர்ஸ்தானிகர் உடன்படிக்கையை மீள்பரிசீலனை செய்து உரிய காலத்தில் பயிற்சி நிலையமொன்றை அமைப்பதற்கு நடவடிக்கை எடுப்பதாக இணக்கம் தெரிவித்துள்ளனர்.

கொவிட் -19 தொற்றுநோய்க்குப் பின்னர் மலேசியா புலம்பெயர்ந்த தொழிலாளர்களுக்கு அதன் கதவுகளைத் திறந்தவுடன் இலங்கை தொழிலாளர்களுக்கு அதிக வேலைவாய்ப்புகளை உருவாக்குமாறு அமைச்சர் உயர் ஸ்தானிகரிடம் கோரிக்கை விடுத்தார்.

குறிப்பாக உற்பத்தித் துறை வேலைகளுக்கு அதிகளவிலான தொழிலாளர்களை அனுப்புவது குறித்தும், அவர்கள் தொடங்கவிருக்கும் மலேசியப் பயிற்சி மையம் மூலம் விசேட பயிற்சிகளை வழங்குவது தொடர்பிலும் இதன் போது கவனம் செலுத்தப்பட்டது.

மலேசிய தொழிலாளர்களுக்கு குறைந்த பட்ச சம்பளம் அறிமுகப்படுத்தப்பட்டுள்ளதாகவும், இலங்கை புலம்பெயர் தொழிலாளர்களின் வேலைவாய்ப்பு ஒப்பந்தத்தில் குறைந்த பட்ச சம்பளத்தை உள்ளடக்க முடியும் என மலேசிய உயர்ஸ்தானிகர் அமைச்சரிடம் தெரிவித்தார்.

மே 9 வன்முறை சம்பவங்களின் பின்னணியில் யார்..?

பாராளுமன்ற உறுப்பினர் ஜொன்ஸ்டன் பெர்ணான்டோ மற்றும் மஹிந்த கஹந்தகம உட்பட 4 பேர் சந்தேகநபர்களாக இனங்காணப்பட்டுள்ளதாக தெரிவிக்கப்படுகின்றது. கடந்த 9 ஆம் திகதி ஆர்ப்பாட்டக்காரர்கள் மீது தாக்குதல் நடத்திய சம்பவம் தொடர்பில் குறித்த நபர்கள் சந்தேக நபர்களாக இனங்காணப்பட்டுள்ளனர்.

இதேவேளை பாராளுமன்ற உறுப்பினர்களான சனத் நிஷாந்த மற்றும் மிலான் ஜயதிலக்க மற்றும் 11 சந்தேகநபர்களும் ஜூன் 8 ஆம் திகதி வரை விளக்கமறியலில் வைக்கப்பட்டுள்ளனர். கடந்த 9 ஆம் திகதி ஆர்ப்பாட்டக்காரர்கள் மீது தாக்குதல் நடத்திய சம்பவம் தொடர்பில் குற்றப் புலனாய்வுப் பிரிவினரால் சந்தேகத்தின் பேரில் இவர்கள் கைது செய்யப்பட்டிருந்தனர்.

சந்தேகநபர்கள் இன்று கொழும்பு கோட்டை நீதவான் நீதிமன்றில் முன்னிலைப்படுத்தப்பட்டனர்.

இதன்போது குற்றப் புலனாய்வுப் பிரிவினர், இலங்கை சட்டத்தரணிகள் சங்கம் மற்றும் பாதிக்கப்பட்ட தரப்பினரின் சட்டத்தரணிகள் ஆகியோர் முன்வைத்த சமர்ப்பணங்களை பரிசீலித்த நீதவான் இந்த உத்தரவை பிறப்பித்துள்ளார்.

துமிந்த சில்வா மீண்டும் கைது !

துமிந்த சில்வா ஸ்ரீ ஜயவர்தனபுர வைத்தியசாலையில் சிகிச்சை பெற்று வந்த நிலையில் கைது செய்யப்பட்டுள்ளதாக தெரிவிக்கப்படுகின்றது.

குற்றப் புலனாய்வுப் பிரிவினரால் அவர் கைது செய்யப்பட்டுள்ளதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் நிஹால் தல்துவ உறுதிப்படுத்தியுள்ளார்.

பாரத லக்ஷ்மன் பிரேமச்சந்திர கொலை தொடர்பில் மரண தண்டனை விதிக்கப்பட்ட துமிந்த சில்வாவிற்கு, ஜனாதிபதி வழங்கிய பொது மன்னிப்பை இடைநிறுத்தி உயர் நீதிமன்றம் இடைக்காலத் தடை உத்தரவு ஒன்றை நேற்று பிறப்பித்திருந்தது.

இதன்படி, துமிந்த சில்வாவை மீண்டும் சிறையில் வைக்குமாறு உயர் நீதிமன்றம் பிறப்பித்த உத்தரவில் குறிப்பிடப்பட்டிருந்தது.

இந்த உத்தரவை நடைமுறைப்படுத்த நடவடிக்கை எடுக்குமாறு குற்றப் புலனாய்வுப் பிரிவின் பணிப்பாளருக்கு உத்தரவிட்ட உயர் நீதிமன்றம், அதற்குத் தேவையான அறிவுறுத்தல்கள் மற்றும் உதவிகளை வழங்குமாறு சட்டமா அதிபருக்கு உத்தரவிட்டது.

மேலும் துமிந்த சில்வாவுக்கு வௌிநாட்டு பயண தடையும் விதித்து நீதிமன்றம் உத்தரவு பிறப்பித்திருந்தது.

வவுனியாவில் சிறுமி மரணத்துக்கான காரணம் என்ன..? – பிரேத பரிசோதனை முடிவு !

வவுனியா – கணேசபுரத்தில் கிணற்றிலிருந்து சடலமாக மீட்கப்பட்ட மாணவி நீரில் மூழ்கியதால் உயிரிழந்துள்ளமை பிரேத பரிசோதனையில் உறுதி செய்யப்பட்டுள்ளது.
 
வவுனியா பொது வைத்தியசாலையில் இன்று முன்னெடுக்கப்பட்ட பிரேத பரிசோதனையில் இந்த விடயம் உறுதி செய்யப்பட்டதாக பொலிஸார் தெரிவித்தனர்.
 
நேற்று முன்தினம் மாலை மேலதிக வகுப்பிற்கு சென்ற மாணவி வீடு திரும்பாததையடுத்து, உறவினர்கள் பொலிஸ் நிலையத்தில் முறைப்பாடு செய்திருந்தனர். இதனையடுத்து, பொலிஸாரினால் முன்னெடுக்கப்பட்ட தேடுதலின் போது மாணவியின் சடலம் கிணற்றில் இருந்து மீட்கப்பட்டமை குறிப்பிடத்தக்கது.
 
சம்பவம் தொடர்பில் நெளுக்குளம் பொலிஸார் மேலதிக விசாரணைகளை மேற்கொண்டு வருகின்றனர்.