அருண்மொழி

அருண்மொழி

20 ஆயிரத்தை தாண்டியது இலங்கை கொரோனா தொற்றாளர்களின் எண்ணிக்கை  !

நேற்றைய தினம் திவுலபிட்டிய – பேலியகொட கொத்தணியில் 391 பேர் அடையாளம் காணப்பட்டனர்.

கொரோனா தொற்றாளர்களாக அடையாளம் காணப்பட்ட நபர்களுடன் நெருங்கிய தொடர்பு கொண்டவர்களே இவ்வாறு அடையாளம் காணப்பட்டுள்ளனர்.

இதன்படி, திவுலபிட்டிய – பேலியகொட கொத்தணியில் தொற்றாளர்களின் எண்ணிக்கை 16 ஆயிரத்து 643 ஆக உயர்ந்துள்ளது.

ஐக்கிய அரபு இராச்சியத்திலிருந்து 04 பேர், கட்டார் – தோஹாவிலிருந்து 03 பேர், சீனாவிலிருந்து ஒருவர் மற்றும் ரஷ்யாவிலிருந்து ஒருவர் ஆகியோர் இவ்வாறு கொரோனா தொற்றாளராக அடையாளம் காணப்பட்டுள்ளனர்.

அதன்படி, இலங்கையில் கொரோனா தொற்றாளர்களின் மொத்த எண்ணிக்கை 20 ஆயிரத்து 171ஆக உயர்ந்துள்ளது.

நாட்டில் கொரோனா தொற்றால் மேலும் 479 பேர் நேற்றைய தினம் குணமடைந்தனர். அத்துடன் நாட்டில் கொரோனா தொற்றுக்குள்ளாகிக் குணமடைந்தவர்களின் மொத்த எண்ணிக்கை 14 ஆயிரத்து 69 ஆக அதிகரித்துள்ளது.

தற்போது வைத்தியசாலைகளில் மற்றும் சிகிச்சை மையங்களில் 6 ஆயிரத்து 15 பேர் சிகிச்சை பெற்று வருகின்றனர்.

இதேவேளை, கொரோனா சந்தேகத்தில் 456 பேர் வைத்திய கண்காணிப்பில் வைக்கப்பட்டுள்ளனர்.

மேலும் கொரோனா தொற்றால் நேற்றையதினம் நால்வர் உயிரிழந்துள்ளனர்.

இதற்கமைய, 2 ஆண்கள் மற்றும் 2 பெண்கள் உயிரிழந்துள்ளனர்.

கொழும்பு 15 பிரதேசத்தை சேர்ந்த 70 வயதுடைய பெண் ஒருவரும், கொழும்பு 12 பிரதேசத்தை ​சேர்ந்த 53 வயதுடைய ஆண் ஒருவரும், பொரளை பிரதேசத்தை சேர்ந்த 84 வயதுடைய பெண் ஒருவரும் மற்றும் கொழும்பு 10 பிரதேசத்தை சேர்ந்த 75 வயதுடைய ஆண் ஒருவரும் இவ்வாறு உயிரிழந்துள்ளதாக சுகாதார சேவைகள் பணிப்பாளர் நாயகம் நாலக களுவெவ தெரிவித்துள்ளார்.

இந்த நான்கு இறப்புக்களுடன் கொரோனா இலங்கை உயிரிழப்பு நிலவரம் 87 ஆக அதிகரித்துள்ளது.

 

இலங்கையில் புதிய இரண்டு அமைச்சுக்களுக்கான வர்த்தமானி அறிவித்தல் வெளியீடு! 

பொதுமக்கள் பாதுகாப்பு மற்றும் தொழில்நுட்பம் ஆகிய இரண்டு புதிய அமைச்சுகள், ஜனாதிபதியினால் வர்த்தமானி ஊடாக அறிவிக்கப்பட்டுள்ளன.

இலங்கை அரசாங்கத்தின் அமைச்சரவையில் எதிர்வரும் ஜனவரி மாதம் முதல் சில மாற்றங்கள் ஏற்படும் என அரசாங்கத் தரப்பினரால் தெரிவிக்கப்பட்டிருந்தது.

இந்த நிலையில், பொதுமக்கள் பாதுகாப்பு மற்றும் தொழில்நுட்பம் ஆகிய இரண்டு புதிய அமைச்சுகள், ஜனாதிபதியினால் வர்த்தமானி ஊடாக அறிவிக்கப்பட்டுள்ளன.

இதற்கமைய, இலங்கையில் அமைச்சரவை அமைச்சர்களின் எண்ணிக்கை 30 ஆக அதிகரித்துள்ளது.

இதேநேரம், மேலும் சில அமைச்சுகளின் விடயதானங்களிலும் மாற்றம் ஏற்படுத்தப்பட்டுள்ளது.புதிய வர்த்தமானி அறிவித்தலின் பிரகாரம், ஜனாதிபதி செயலகத்தின் கீழ் கிழக்கு மாகாணத்தில் தொல்பொருள் மரபுரிமைகளை முகாமைத்துவம் செய்வதற்கான ஜனாதிபதி செயலணி செயற்படவுள்ளது.

இதுவரையில், ஜனாதிபதி செயலகத்தின் கீழிருந்த இலங்கை தொலைத்தொடர்புகள் ஒழுங்குபடுத்தல் ஆணைக் குழு மற்றும் அதனுடன் இணைந்த நிறுவனங்கள், சிறிலங்கா ரெலிகொம் மற்றும் அதன் நிர்வாக நிறுவனங்கள் புதிதாக நியமிக்கப்பட்டுள்ள தொழில்நுட்ப அமைச்சின் கீழ் உள்வாங்கப்பட்டுள்ளன.

இதேவேளை, இதுவரையில் பாதுகாப்பு இராஜாங்க அமைச்சரின் கீழிருந்த பொலிஸ் திணைக்களம் மற்றும் பாதுகாப்பு அமைச்சின் கீழிருந்த சிவில் பாதுகாப்பு திணைக்களம் என்பன புதிய வர்த்தமானி அறிவித்தலின் பிரகாரம் உருவாக்கப்பட்டுள்ள புதிய அமைச்சான பொதுமக்கள் பாதுகாப்பு அமைச்சின் கீழ் கொண்டு வரப்பட்டுள்ளன.

“இரட்டை குடியுரிமை உடையவர்கள் தேர்தலில் போட்டியிட முடியும் என்பதால் தமிழீழ விடுதலைப் புலிகள் அமைப்பைச் சேர்ந்த புலம்பெயர் ஆதரவாளர்களுக்கும் தேர்தலில் போட்டியிட்டு வெற்றிப் பெறுவதற்கான வாய்ப்பு உள்ளது” – பாராளுமன்ற உறுப்பினர் மரிக்கார்.

“இரட்டை குடியுரிமை உடையவர்கள் தேர்தலில் போட்டியிட முடியும் என்பதால் தமிழீழ விடுதலைப் புலிகள் அமைப்பைச் சேர்ந்த புலம்பெயர் ஆதரவாளர்களுக்கும் தேர்தலில் போட்டியிட்டு வெற்றிப் பெறுவதற்கான வாய்ப்பு உள்ளது” ஐக்கிய மக்கள் சக்தியின் நாடாளுமன்ற உறுப்பினர் எஸ்.எம்.மரிக்கார் தெரிவித்துள்ளார்

ஐக்கிய மக்கள் சக்தியின் தலைமையகத்தில் நேற்று [22.11.2020] ஞாயிற்றுக்கிழமை இடம்பெற்ற ஊடகவியலாளர் சந்திப்பில் இவ்வாறு மரிக்கார் குறிப்பிட்டுள்ளார்.

அவர் மேலும் கூறியதாவது,

20 ஆவது அரசியலமைப்பு திருத்தத்தின் ஊடாக இரட்டை குடியுரிமை உள்ளவர்கள் தேர்தலில் போட்டியிட முடியும் என்ற சட்டமூலம் கொண்டுவரப்படவுள்ளது. ஸ்ரீலங்கா பொதுஜன பெரமுனவின் ஸ்தாபகர் பசில் ராஜபக்ஷவுக்கு பாராளுமன்ற அதிகாரத்தை பெற்றுக் கொடுக்கும் நோக்கிலே இந்த சட்டமூலம் கொண்டுவரப்படவுள்ளது.

இந்நிலையில் பசில் ராஜபக்ஷவுக்கு எவ்வளவு துணிச்சல் இருந்தால் அமெரிக்க பிரஜாவுரிமையை கைவிடாமல், அரசியலமைப்பு திருத்தத்தின் மூலம் நாடாளுமன்ற உறுப்புரிமையை பெற்றுக் கொள்ள தீர்மானித்திருப்பார்.

முன்னாள் பிரதமர் ரணில் விக்கிரமசிங்க இரட்டை குடியுரிமை பெற்றிருந்த ஒருவரை மத்திய வங்கியின் ஆளுனராக நியமித்ததன் காரணமாகவே மத்திய வங்கி பிணைமுறி மோசடிகளின் போது அவருக்கு எதிராக நடவடிக்கை எடுக்க முடியாத நிலைமை ஏற்பட்டுள்ளது.

மத்திய வங்கியின் முன்னாள் ஆளுனர் அர்ஜூன் மகேந்திரன் தற்போது சிங்கப்பூரிலே இருக்கின்றார். இந்த நிலைமைகள் ஏற்படாமல் இருப்பதற்காகவே இரட்டை குடியுரிமை பெற்றவர்கள் தேர்தலில் போட்டியிட முடியாது என்ற சட்டம் 19 ஆவது அரசியலமைப்பு திருத்தத்தின் ஊடாக நிறைவேற்றப்படடது.

இதேவேளை இரட்டை குடியுரிமை உடையவர்கள் தேர்தலில் போட்டியிட முடியும் என்ற சட்டம் நிறைவேற்றப்பட்டால், தமிழீழ விடுதலைப் புலிகள் அமைப்பைச் சேர்ந்த புலம்பெயர் அமைப்பினர் தேர்தலில் போட்டியிட்டு , தமிழ் மக்களின் வாக்குகளை பெற்றுக் கொண்டு வெற்றிப் பெறுவதற்கான வாய்ப்பும் உள்ளது.

இவர்கள் இவ்வாறு தேர்தலை வெற்றிக் கொண்டு நாட்டுக்குள் பிரிவினையை ஏற்படுத்திச் சென்றுவிட்டால்  யாரிடம் அது தொடர்பில் கேள்வி எழுப்புவது. இதனால் தான் தமிழ் மக்கள் தேசிய கூட்டணியின் தலைவர் சி.வி. விக்கினேஸ்வருனும் பாராளுமன்றத்தில் அவ்வாறு உரையாற்றியுள்ளார் போன்று தோன்றுகின்றது.தேசப்பற்றாளர்கள் என்று அடையாம் காட்டிக் கொள்ளும் ராஜபக்ஷர்களின் செயற்பாடுகள் இவ்வாறே அமையப் பெற்றுள்ளது” எனவும் கூறி தன்னுடைய கருத்தை வெளியிட்டுள்ளார் மரிக்கார்.ko

“இலங்கையில் இடம்பெற்ற இனப்படுகொலையை தடுக்க ஐக்கியநாடுகள் சபை தவறிவிட்டது “- உறுதியளிக்கப்பட்ட நிலத்தில் ஒபாமா குற்றச்சாட்டு !

“பனிப்போரின் இடை நடுவில் பாதுகாப்புச் சபை உறுப்பு நாடுகளிடையிலான பிளவுகளால் ஒருமித்த கருத்தை அடைவதற்கான வாய்ப்புகள் அரிதாக இருந்தன. அதனால் சோவியத் ஒன்றியத்தின் டாங்கிகள் ஹங்கேரிக்குள் நகர்ந்தன. ஐ. நா. கைகட்டி பார்த்து நின்றது. அமெரிக்க விமானங்கள் வியட்நாம் கிராமங்களில் நேபாம் குண்டுகளைப் போட்டன.”

“பனிப்போருக்குப் பின்னரும் ஐ. நா. பாதுகாப்புச் சபையில் நீடித்த பிளவுகள் பிரச்சினைகளைத் தீர்க்கும் ஐ. நாவின் திறனை கொண்டு நடத்தின.

“சோமாலியா போன்ற தோல்வி கண்ட அரசுகளை மீளக்கட்டியமைப்பதற்கோ அல்லது இலங்கை போன்ற நாடுகளில் இனரீதியான படுகொலைகளைத் தடுப்பதற்கோ ஐ. நாவின் உறுப்பு நாடுகளிடையே வழி முறைகளோ அன்றி கூட்டு விருப்பமோ இருக்கவில்லை” – என்று முன்னாள் அதிபர் ஒபாமா தனது நூலில் சுட்டிக்காட்டியிருக்கிறார்.

இலங்கை “இனப்படுகொலை” என்பதை ஒபாமா “ethnic slaughter” என்ற ஆங்கில வார்த்தையிலேயே குறிப்பிட்டிருக்கிறார்

உலக நெருக்கடிகளின் போது ஐக்கிய நாடுகள் சபையின் நடவடிக்கைகள், தீர்மானங்களை விமர்சிக்கும் அத்தியாயங்களில் இலங்கைத் தமிழர் படுகொலைகளை ஒபாமா சுட்டிக்காட்டியிருப்பது உலக அளவில் பெரும் கவனத்தைப் பெற்றுள்ளது.

தனது பதவிக்காலத்தின் முதல் ஐந்து ஆண்டுகால அனுபவங்களை விவரிக்கும் அவரது நூலின் 768 பக்கங்கள் கொண்ட முதற்பாகம் ஆங்கிலத்திலும் வேறு 24 மொழிகளிலும் அச்சிடப்பட்டு கடந்த செவ்வாயன்று வெளியாகியது.

சமகால உலகத் தலைவர்கள் பற்றிய தனது எண்ணங்கள், தனது பதவிக்காலத்தில் பூகோள அரசியல் குறித்து எடுக்கப்பட்ட முக்கிய தீர்மானங்கள், சொந்த வாழ்க்கைப் பின்னணி எனப் பல தகவல்களை பதிவு உள்ளடக்கிய அந்த நூலில், தென்னாசிய அரசியல் மையமான இலங்கை குறித்தும் அதன் இறுதிப் போர் பற்றியும் ஒபாமா என்ன கூறப்போகிறார் என்று நூல் வெளியாகுவதற்கு முன்பிருந்தே பெரும் எதிர்பார்ப்பு நிலவி வந்தது.

இலங்கையில் தமிழ் மக்கள் வகைதொகையின்றிக் கொன்றொழிக்கப்பட்ட இறுதி யுத்த காலப்பகுதியில் அமெரிக்க அதிபராகப் பதவியில் இருந்த ஒபாமா, வன்னியில் பாதுகாப்பு வலயங்களுக்குள் கனரக பீரங்கிகள் மற்றும் ஷெல் தாக்குதல்களை தவிர்க்குமாறு அப்போதைய அதிபர் மஹிந்த ராஜபக்ஷவிடம் கேட்டிருந்தமையும் குறிப்பிடத்தக்கது.

“புலிகளால் விரட்டப்பட்டு அகதியான போதும் கூட பிச்சை எடுக்கவேண்டிய அவசியமிருக்கவில்லை” – ஜனாதிபதி ஆணைக்குழு முன்னிலையில் ரிஷாட் பதியுதீன்.

உயிர்த்தஞாயிறு தாக்குதல் குறித்து விசாரணைகளை மேற்கொண்டுள்ள ஜனாதிபதி ஆணைக்குழு முன்னிலையில் சாட்சியமளிக்கையில் முன்னாள் அமைச்சர் ரிஷாட்பதியுதீன் ‘இலங்கையில் தீவிரவாதத்தை பரப்புவதற்கு பலம்பொருந்திய நாடுகள் சில மேற்கொணட சதிமுயற்சியே ஏப்பிரல் 21 தாக்குதல் என  தெரிவித்துள்ளார்.

மேலும் ஆணைக்குழுவினரால் பல கேள்விகள் ரிஷாட்பதியுதீனிடம் கேட்கப்பட்டன.

கேள்வி :- துருக்கியில் தடைசெய்யப்பட்ட எவ்.ஈ.டி.ஓ என்ற அமைப்பு இலங்கையில் தடை செய்யப்பட்டமை குறித்த விசாரணைகளில் தலையிட்டீர்களா..?

பதில் :-  பதிலளிக்கும் போது ரிசாத் பதியுதீன் ‘அந்த குற்றச்சாட்டு உண்மையில்லை. எனக்கு அந்த அமைப்பை சேர்ந்தவர்களுடன் எந்த தொடர்பும் இல்லை’ என தெரிவித்துள்ளதுடன் விசாரணைகளில் தான் தலையிடவில்லை எனவும் குறிப்பிட்டுள்ளார்.

கேள்வி :- கனடாவில் உள்ள ரிசாத் பதியுதீனின் சகோதரியின் வீட்டினை தற்கொலை குண்டுதாரிகள் பயன்படுத்தியமை குறித்து அறிந்திருக்கின்றீர்களா?

பதில்:- “நான் அதனை அறிந்திருக்கவில்லை எனவும் உயிர்த்த ஞாயிறு தாக்குதலின் பின்னரே அதனை அறிந்ததாகவும் குறிப்பிட்டுள்ளார்.
குறிப்பிட்ட வீட்டிற்கு தான் விஜயம் மேற்கொள்ளவில்லை எனவும் அவர் தெரிவித்துள்ளார்.

கேள்வி :- உங்கள் தம்பி எப்போதாவது கைதுசெய்யப்பட்டாரா?

பதில் :- உயிர்த்த ஞாயிறு தாக்குதல் தொடர்பான விசாரணையின் போது அவர் கைதுசெய்யப்பட்டார். சினமன் கிரான்டில் தாக்குதலை மேற்கொண்டவர் எனது சகோதரரிற்கு ஏழு தொலைபேசி அழைப்புகளை விடுத்துள்ளார், என்பதை ஊடகங்கள் மூலம அறிந்தேன் ” என ரிசாத் பதியுதீன் தெரிவித்துள்ளார்.
இதன் பின்னர் நான் எனது சகோதரரிடம் இன்சாவினை ஏன் அவர் தொடர்புகொண்டார் என கேட்டதற்கு அரசாங்கம் செப்பு ஏற்றுமதியை இரத்துசெய்தமையால் அவருக்கு ஏற்பட்ட பாதிப்பு குறித்தே பேச்சுக்களை மேற்கொண்டதாக எனது சகோதாரர் தெரிவித்தார் எனவும் குறிப்பிட்டுள்ளார்.

கேள்வி :- நீங்கள் மறைமுகமாக இன்சாவ் சகோதரர்களிற்கு ஆதரவளித்துள்ளீர்களா?

 

பதில்:- நான் இந்த குற்றச்சாட்டை முழுமையாக நிராகரிக்கின்றேன்,இன்சாவ் சகோதரர்களிற்கு நான் உதவவேயில்லை என தெரிவித்துள்ளார்.

கேள்வி :- விடுதலைப்புலிகள் வடக்கிலிருந்து வெளியேற்றிய பின்னர் ஐந்து வருடங்கள் முகாமில் அகதியாக வாழ்ந்ததாக தெரிவிக்கின்றீர்கள்-நீங்கள் எப்படி அரசியலிற்கு வந்தீர்கள்? செல்வந்தராக மாறினீர்கள்? என ஆணைக்குழுவின் நீதிபதியொருவர் ரிசாத்பதியுதீனிடம் கேள்வி எழுப்பியுள்ளார்.
இதற்கு பதிலளித்துள்ள ரிசாத் பதியுதீன் நான் அகதியாகிவிட்டதால் பிச்சை எடுக்கவேண்டிய அவசியமிருக்கவில்லை,என்னால் வர்த்தகத்தில் ஈடுபட முடியும் என குறிப்பிட்டுள்ளார்.

நீங்கள் உங்கள் அமைச்சு பதவிகளை பயன்படுத்தி இவ்வளவு சொத்தினை சேர்த்தீர்களா? உங்கள் குடும்பத்தினையும் , வர்த்தகத்தினையும் முன்னேற்றினீர்களா? என்ற கேள்விக்கு ரிசாத்பதியுதீன் நான் எந்த வர்த்தகத்தினை முன்னேற்றுவதற்கு எனது அமைச்சு பதவியை பயன்படுத்தவில்லை என குறிப்பிட்டுள்ளார்.

“விமல் வீரவன்சவுக்கு மண்டையில் முடியிருந்தாலும் மூளை இல்லை” – மனோகணேசன் காட்டம் !

“விமல் வீரவன்சவுக்கு மண்டையில் முடியிருந்தாலும் மூளை இல்லை” என தமிழ் முற்போக்குக் கூட்டணியின் தலைவரும் கொழும்பு மாவட்ட நாடாளுமன்ற உறுப்பினருமான மனோ கணேசன் தெரிவித்தார்.

எதிர்க்கட்சித் தலைவர் அலுவலகத்தில் இன்று(11.22.2020) நடைபெற்ற ஊடகவியலாளர் சந்திப்பில் உரையாற்றுகையிலேயே அவர் மேற்கண்டவாறு கூறினார்.

இது தொடர்பில் அவர் மேலும் கூறியவை வருமாறு:-

“கொழும்பு மாவட்டத்தில் வாழும் மக்கள் பல்வேறு இன்னல்களை எதிர்கொண்டு வருகின்றனர். எவராவது மரணித்தால் சவப்பெட்டி வாங்குவதற்குக் கூட திண்டாட வேண்டியுள்ளது. அவர்கள் இவ்வாறு துன்பப்படுகையில் மக்களை இழிவுபடுத்தும் வகையில் விமல்வீரவங்ச கருத்து வெளியிடுகின்றார்.

விமல் வீரவன்சவின் வீட்டிலுள்ள நாயை பராமரிப்பதற்குக் கூட மாதமொன்றுக்கு 5 ஆயிரம் ரூபா செலவிடப்படுகின்றது என சமூக வலைத்தளங்களில் தகவல்கள் வெளியிடப்பட்டுள்ளன. ஆனால், கொரோனா தாக்கத்தால் பாதிக்கப்பட்டுள்ள மக்களை இழிவுபடுத்தும் வகையில் அவர் கருத்து வெளியிடுகின்றார்.

விமல் வீரவன்சவுக்கு மண்டையில் முடியிருந்தாலும் மூளை இல்லை. அந்தத் துரோகி கட்சிக்கு மட்டுமல்ல கொழும்பு மாவட்ட மக்களுக்கும் இன்று துரோகம் இழைத்துள்ளார். கொழும்பு மாநகர சபைக்கு சைக்கிளில் வந்த அவர் கட்சியைக் காட்டிக்கொடுத்துவிட்டு இன்று கோடீஸ்வரர் ஆகியுள்ளார். அடுத்த பொதுத்தேர்தலில் கொழும்பு மாவட்ட மக்கள் விமலுக்குத் தக்க பாடத்தை புகட்டுவார்கள்” – எனவும் குறிப்பிட்டுள்ளார் மனோகணேசன்.

பிரேஸிலில் கறுப்பினத்தவர் அடித்துப்படுகொலை – கொலைக்கு நீதி கேட்டு அதிகரிக்கும் மக்கள் போராட்டம் !

தெற்கு பிரேசிலில் உள்ள போர்ட்டோ அலெக்ரே நகரத்தில் உள்ள பல்பொருள் அங்காடியில், கருப்பினத்தவரான ஜோவோ அல்பெர்டோ(வயது 40) என்ற நபர் அங்குள்ள பாதுகாவலர்களால் அடித்துக் கொல்லப்பட்டார். பல்பொருள் அங்காடியின் வாகன நிறுத்துமிடத்தில் நடந்த இந்த சம்பவத்தில் கருப்பினத்தவரான ஜோவோ அல்பெர்டோவை ஒரு பாதுகாவலர் பிடித்துக்கொள்ள மற்றொரு பாதுகாவலர் அவரின் முகத்தில் கடுமையாக தாக்கினார்.
கருப்பினத்தவர் பல்பொருள் அங்காடி பாதுகாவலர்களால் அடித்து கொலை - பிரேசிலில் தொடரும் போராட்டம் || Tamil News Protests in Brazil after security guards beat black man to death
இந்த தாக்குதலில் ஜோவோ அல்பெர்டோ சம்பவ இடத்திலேயே உயிரிழந்தார். பல்பொருள் அங்காடியில் வேலை செய்துவந்த பெண் ஊழியரை
ஜோவோ அல்பெர்டோ தாக்கியதாகவும், அந்த பெண் ஊழியர் கடை பாதுகாவலர்களுக்கு தகவல் கொடுத்ததையடுத்து, கடை ஊழியர்கள் இருவர் அல்பெர்டோவை தாக்கியதாக தகவல் வெளியாகியுள்ளது. ஜோவோ அல்பெர்டோவை பாதுகாவலர்கள் தாக்குவதை அங்கு நின்றுகொண்டிருந்த ஒரு பெண் தனது செல்போனில் வீடியோவாக எடுத்துள்ளார். அந்த வீடியோ பிரேசில் உள்ளூர் ஊடகங்களில் ஒளிபரப்பப்பட்டது. மேலும், சமூகவலைதளத்திலும் வைரலானது.
இதையடுத்து, கருப்பினத்தவர் மரணத்திற்கு நீதிகேட்டு பிரேசிலின் பல்வேறு நகரங்களில் போராட்டங்கள் நடைபெற்று வருகிறது. சம்பவம் நடைபெற்ற பல்பொருள் அங்காடிக்குள் நுழைந்த போராட்டக்காரர்கள் அங்கிருந்த பொருட்களை அடித்து நொறுக்கினர். மேலும், நகரின் முக்கிய பகுதிகளில் பேரணியும் நடத்தி வருகின்றனர்.
WIN NEWS INDIA
இதற்கிடையில், ஜோவோ மீது தாக்குதல் நடத்திய பல்பொருள் அங்காடி ஊழியர்கள் 2 பேரையும் போலீசார் கைது செய்துள்ளனர். பிரான்சை தலைமையிடமாக கொண்ட அந்த பல்பொருள் அங்காடி நிறுவனம் தனது அங்காடியில் பணியாற்றிய அந்த 2 ஊழியர்களையும் நீக்கியுள்ளது.  ஜோவோ கொலைக்கு கண்டனம் தெரிவித்து பிரேசிலில் போராட்டம் தீவிரமடைந்து வருவதால் போலீசார், ராணுவம் என பாதுகாப்பு படையினர் குவிக்கப்பட்டுள்ளனர். இதனால், பிரேசிலில் பரபரப்பான சூழல் நிலவி வருகிறது.
அண்மையில் ஐக்கிய அமெரிக்காவில் ஜோர்ஜ்ப்ளைட் என்னும் கறுப்பினத்தவர் அந்நாட்டு பொலிஸாரால் அடித்துக்கொலை செய்யப்பட்டமை உலக அளவில் பாரிய அதிர்வலைகளை ஏற்படுத்தியிருந்தமை குறிப்பிடத்தக்கது.

பாராளுமன்ற உறுப்பினர்களின் உணவு செலவுக்காக 50 லட்சம் ரூபாய் ஒதுக்கீடு செய்தமைக்காக பாராளுமன்றத்தை தீயிட்டு கொளுத்திய மக்கள் !

மத்திய அமெரிக்க நாடுகளில் கவுதமாலாவும் ஒன்று. அந்நாட்டின் ஜனாதிபதி அலிஜான்ட்ரோ ஜியாம்மாட்டி. கொரோனா வைரஸ், புயல், கனமழை என பல்வேறு பேரிடர்களால் கவுதமாலா பெரும் இன்னலை சந்தித்து வருகிறது. அந்நாட்டில் ஊழல் பெரும் பிரச்சனையாக நிலவி வருகிறது.
இந்நிலையில், 2021-ம் ஆண்டுக்கான நாட்டின் வரவு-செலவுத் தொகையில் பாராளுமன்ற உறுப்பினர்களின் உணவு செலவுக்காக மட்டும் 50 லட்சம் ரூபாய் ஒதுக்கீடு செய்வதற்கு பாராளுமன்ற உறுப்பினர்கள் ஒப்புதல் அளித்தனர். அதேவேளை நாட்டின் கல்வி மற்றும் சுகாதாரத்திற்கு ஒதுக்கப்படும் பட்ஜெட் தொகையும், கொரோனாவை கட்டுப்படுத்துவதற்காக எடுக்கப்படும் நடவடிக்கைகளுக்கு ஒதுக்கப்படும் பட்ஜெட் தொகையும் மிகப்பெரிய அளவில் குறைக்கப்பட்டது. இந்த விவகாரம் நாடு முழுவதும் பெரும் அதிர்வலைகளை ஏற்படுத்தியது.
இதையடுத்து, ஜனாதிபதி அலிஜான்ட்ரோ ஜியாம்மாட்டி, துணை ஜனாதிபதி காஷ்டிலோ மற்றும் பாராளுமன்ற உறுப்பினர்களை கண்டித்து கவுதமாலாவில் போராட்டங்கள் வெடித்தது. ஆயிரக்கணக்கானோர் நாட்டின் முக்கிய பகுதிகளில் திரண்டு அரசுக்கு எதிராக போராட்டத்தில் ஈடுபட்டு வருகின்றனர். இந்நிலையில், தலைநகர் கவுத்தமாலா சிட்டியில் அமைந்துள்ள நாட்டின் பாராளுமன்றம் கட்டிடத்தின் முன் இன்று ஆயிரக்கணக்கான போராட்டகாரர்கள் திரண்டனர்.
சுகாதாரம், கல்விக்கு தொகையை குறைத்ததை கண்டித்து ஜனாதிபதி அலிஜான்ட்ரோ ஜியாம்மாட்டி, துணை ஜனாதிபதி காஷ்டிலோ மற்றும் பாராளுமன்ற உறுப்பினர்களுக்கு எதிராக போராட்டக்காரர்கள் கோஷங்களை எழுப்பினர். மேலும், பாராளுமன்ற  கட்டிடத்திற்குள் அதிரடியாக நுழைந்த போராட்டக்காரர்கள் பாராளுமன்றத்தை தீவைத்து கொளுத்தி தங்கள் எதிர்ப்பை வெளிப்படுத்தினர்.
போராட்டங்கள் தீவிரமடைந்து வரும் நிலையில் துணை ஜனாதிபதி காஷ்டிலோ தான் பதவியில் இருந்து ராஜினாமா செய்வதாக அறிவித்துள்ளார். ஆனால், ஜனாதிபதி ஜியாம்மாட்டி ராஜினாமா செய்வது தொடர்பாக எந்த அறிவிப்பும் வெளியிடவில்லை.

“என்னை தோற்கடிப்பதற்காக பெரிய மருத்துவநிறுவனங்களும் , செய்தி ஊடகங்களும் செயற்பட்டன” – ட்ரம்ப் குற்றச்சாட்டு !

“என்னை தோற்கடிப்பதற்காக பெரிய மருத்துவநிறுவனங்களும் , செய்தி ஊடகங்களும் செயற்பட்டன” என்ற குற்றச்சாட்டை டொனால்ட்ட்ரம்ப் முன்வைத்துள்ளார்.

உலகளவில் பெரும் எதிர்பார்ப்புகளை ஏற்படுத்திய அமெரிக்க ஜனாதிபதி தேர்தல் கடந்த 3-ந் திகதி நடந்தது. இதில் ஜனநாயக கட்சி வேட்பாளராக போட்டியிட்ட ஜோ பைடன், குடியரசு கட்சி வேட்பாளரும் தற்போதைய ஜனாதிபதியுமான டொனால்டு டிரம்பை வீழ்த்தி அபார வெற்றி பெற்றார். 270 தேர்தல் சபை வாக்குகளை பெற்றாலே வெற்றி என்கிற நிலையில், ஜோ பைடன் 306 வாக்குகளை பெற்றார். டிரம்புக்கு 232 ஓட்டுகளே கிடைத்தது.

ஆனால் டிரம்ப் இன்னும் தனது தோல்வியை ஒப்புக்கொள்ளாமல், ஜனாதிபதி தேர்தலில் மோசடி நடந்துள்ளதாக குற்றம் சாட்டி வருகிறார். அந்த வகையில் நேற்று முன்தினம் வாஷிங்டன் வெள்ளை மாளிகையில் நிருபர்களுக்கு அவர் பேட்டி அளித்தபோது, தனக்கு எதிராக முன்னணி மருந்து நிறுவனங்கள் கோடிக்கணக்கில் செலவு செய்ததாக புதிய குற்றச்சாட்டை சுமத்தினார்.

இதன் போது  அவர் மேலும் கூறியதாவது:-

பெரிய மருந்து நிறுவனங்கள் எனக்கு எதிராக செயல்பட்டுள்ளன. எனக்கு எதிரான விளம்பரங்களுக்காக அவை கோடிக்கணக்கில் செலவு செய்துள்ளன. நான்தான் இந்த தேர்தலில் வெற்றி பெற்றேன். கிட்டத்தட்ட 7 கோடியே 40 லட்சம் வாக்குகளை நாங்கள் கண்டுபிடிப்போம். எங்களுக்கு எதிராக மருந்து கம்பெனிகள் செயல்பட்டன. ஊடகங்கள் எங்களுக்கு எதிராக இயங்கின. எங்களுக்கு எதிராக நேர்மையற்ற செயல்கள் நிறைய நடந்தன. இதுபோன்று நான் பார்த்ததே இல்லை” என கூறியுள்ளார் ட்ரம்ப்.

அதைத் தொடர்ந்து அமெரிக்க மக்களுக்கு மருந்துச்சீட்டுகளின் பேரில் வழங்கக்கூடிய மருந்துகளின் விலைகளை குறைப்பதற்கான விதிகளையும் அவர் அறிவித்தார். அப்போது அவர் கூறும்போது, “இதன் மூலம் நோயாளிகள் பலன் பெறுவார்கள். அவர்கள் மருந்துகளுக்கு அதிக விலை கொடுத்தார்கள். 51 ஆண்டுகளில் முதல் முறையாக மருந்துகளின் விலையை நாங்கள் குறைத்துள்ளோம். இதன் மூலம் 30 முதல் 50 சதவீதம் வரையில் மருந்து விலை குறையும்” என குறிப்பிட்டுள்ளார் ட்ரம்ப்.

“இல்லங்களின் வாசல்களில் தீப ஒளியை ஏற்றி மாவீரர் தினத்தை அஞ்சலியுங்கள்” – தமிழ்த் தேசியக் கட்சிகள் வேண்டுகோள் !

கொரோனா வைரஸ் பெருந்தொற்றுக்கு மத்தியில் ஓரிடத்தில் திரண்டு அஞ்சலி செலுத்துவது இம்முறை சாத்தியமில்லாத நிலையில், வீட்டு வாசல்களில் தீபங்களை ஏற்றி மாவீரர்களை நினைவுகூர அழைப்பு விடுப்பது என்று தமிழ்த் தேசியக் கட்சிகள் கூட்டாகத் தீர்மானித்துள்ளன.
தமிழ்த் தேசியக் கட்சிகளின் பிரதிநிதிகளுக்கும் மாவீரர் துயிலும் இல்லங்கள் சார்ந்த நினைவேந்தல் ஏற்பாட்டுக் குழுவினருக்கும் இடையிலான சந்திப்பு வடக்கு மாகாண சபை அவைத் தலைவர் சி.வி.கே.சிவஞானத்தின் அலுவலகத்தில் நேற்று (21.11.2020) நடைபெற்றது.
இலங்கைத் தமிழரசுக் கட்சியின் சார்பில் சி.வி.கே.சிவஞானம், ஈ.சரவணபவன், சி.வி.விக்னேஸ்வரன் தலைமையிலான தமிழ் மக்கள் தேசியக் கூட்டணியின் சார்பில் முன்னாள் நாடாளுமன்ற உறுப்பினர் சுரேஷ் பிரேமச்சந்திரன், ரெலோ சார்பில் முன்னாள் வடக்கு மாகாண சபை உறுப்பினர் விந்தன் கனகரத்தினம் மற்றும் தீவகம் சாட்டி மாவீரர் துயிலும் இல்ல நினைவேந்தல் ஏற்பாட்டுக் குழு சார்பில் மாணிக்கவாசகர் இளம்பிறையன், கருணாகரன் குணாளன், தனூபன், வடமராட்சி மாவீரர் துயிலும் இல்லம் சார்பில் வேந்தன் (ஜனநாயகப் போராளிகள் கட்சியின் செயலாளர்) உட்படப் பலர் இந்தக் கலந்துரையாடலில் கலந்துகொண்டனர் .
பயங்கரவாதத் தடைச் சட்டம் மற்றும் கொரோனாத் தனிமைப்படுத்தல் சட்டம் ஆகியவற்றைக் காரணம் காட்டி நீதிமன்றங்களின் ஊடாக மாவீரர் நினைவேந்தல் நிகழ்வுகளுக்குத் தடையை அரசு ஏற்படுத்தி வரும் நிலையில் எவ்வாறான அணுகுமுறையைக் கடைப்பிடிப்பது என இதன்போது ஆராயப்பட்டது.
இதன் முடிவில் நவம்பர் 27ம் திகதி அனைத்து இல்லங்களின் வாசல்களிலும் தீப ஒளியை ஏற்றுமாறு தமிழ் மக்களிடம் வேண்டுகோள் விடுப்பது எனவும், மக்களின் அச்சத்தைப் போக்கும் விதமாக ஊடகங்கள் மூலமாகத் தெளிவுபடுத்தல்களை மேற்கொள்ள வேண்டும் எனவும் இதன்போது கருத்துக் கூறப்பட்டது.