ameen

Tuesday, November 30, 2021

ameen

ரிஸானாவின் உயிர் காக்க இராஜதந்திர முயற்சிகள் துரிதம்

சவூதி அரேபியாவில் மரண தண்டனைக்கு உள்ளாகியிருக்கும் ரிசானா நபீக்கின் உயிரைக் காப்பாற்றுவதற்காக இராஜதந்திர ரீதியிலான அனைத்து நடவடிக்கைகளையும் மேற்கொண்டு வருவதாக வெளிவிவகார அமைச்சின் தொடர்பாடல் பணிப்பாளர் பந்துல ஜயசேகர தெரிவித்தார்.

உத்தியோகப்பற்றற்ற முறையில் பல்வேறு விதமான தகவல்கள் வெளியாகின்றபோதிலும், ரிசானாவைக் காப்பாற்ற அரசாங்கம் தொடர்ச்சியான இராஜதந்திர நடவடிக்கைகளை மேற்கொள்வதாக ஜயசேகர தெரிவித்தார்.

றிசானாவுக்கு மன்னிப்பளித்து விடுதலை செய்ய நடவடிக்கை எடுக்குமாறு ஜனாதிபதி மஹிந்த ராஜபக்ஷ சவூதி அரேபிய மன்னருக்குக் கருணை மனுவொன்றை ஏற்கனவே அனுப்பி வைத்துள்ளார். இதனையடுத்து, குறித்த வீட்டுரிமையா ளர்களுடன் பேச்சுவார்த்தை நடத்துமாறு மன்னர் தமது அதிகாரிகளுக்குப் பணிப்புரை வழங்கியிருப்பதாக உத்தியோகப்பற்றற்ற தகவல்கள் தெரிவிக்கின்றன. எனினும் சவூதி அரேபிய அரசிடமிருந்து இன்னும் உத்தியோகபூர்வமான பதில் எதுவும் கிடைக்கப் பெறவில்லையென்று வெளிவிவார அமைச்சின் பேச்சாளர் கூறினார்.

முன்னைநாள் பிரதமர் அமைதிப்படையை அனுப்பியது போன்று ஓர் படையை இந்தியா அனுப்பி தமிழ் இனத்துக்கு உயிர்ப் பாதுகாப்பையும் நில உரிமையையும் பெற்றுத் தரவேண்டும் – ஈ.என்.டி.எல்.எப்.

13,14 ஆம் திகதிகளில் ஈ.என்.டி.எல்.எப். யினரால் பெங்களுர் நகரில் நடைபெற்ற ஈழத் தமிழர் சிறப்பு மாநாடுபற்றிய விபரம்:-

   ஈழ தேசிய ஜனநாயக விடுதலை முன்னணி (ஈ.என்.டி.எல்.எப்.) 2009, 2010 ஆகிய இந்த இரண்டு ஆண்டுகளில் சர்வதேச ஈழத் தமிழர்கள் அடங்கிய மாநாடு ஒன்றினை நடத்துவதற்கு நான்கு தடவைகள் தமிழக அரசிடம் அனுமதி கோரியது. ஓவ்வொரு முறையும் ஏதாவது காரணங்கள் கூறி ஈழத் தமிழர்கள் நடத்தும் அந்த மாநாட்டினை தடுத்தது தமிழக அரசு. இறுதியாக பல்லாவரத்தில் ஓர் திருமண மண்டபத்தைப் பதிவு செய்து அனுமதி கோரியபோது போக்கு வரத்து நெரிசல் ஏற்படும் என்று அனுமதி மறுக்கப்பட்டது.

   ஈழத் தமிழர்கள் ஒன்று கூடி தங்களது உரிமைகளை வென்றெடுக்க எதிர்காலத்தில் என்ன செய்ய வேண்டும் என்று தீர்மானிக்கவே அந்த மாநாடு கூட்டப்படவிருந்தது. அனுமதி கோரிய கடிதத்தில் இதுபற்றி விளக்கமாகக் குறிப்பிட்டுத்தான் அனுமதி கோரினோம். ஈழத் தமிழர்கள் தங்களது எதிர்காலம் பற்றித் தீர்மானிக்கும் உரிமை மறுக்கப்பட்டதுதான் அவற்றின் மறுப்புக்கு உள்ளார்த்தமாகும். இதன் பின்னர் மத்திய அரசுடன் கதைத்து அதே சர்வதேச மாநாட்டினை டெல்லியில் நடத்துவதற்கு நாம் அனுமதி கோரினோம், அனுமதி வழங்கப்பட்டது. 12,13 -02 -2010 சனி, ஞாயிறு ஆகிய திகதிகளில் அனுமதி வழங்கப்பட்டது.

   அனுமதி 10 நாட்களில் மத்திய உள்துறை அமைச்சர் திரு. பசிதம்பரம் அவர்கள் ஓர் அறிவிப்பினை வெளியிட்டார், அதில் இலங்கை, பாகிஸ்தான், பங்ளாதேஸ் மற்றும் ஈரான் நாட்டவர் இநதியாவில் மாநாடு நடத்தினால் 90 நாட்களுக்கு முன்னராக உள்துறை அமைச்சகத்திடமிருந்து அனுமதி பெற வேண்டும் என்று அறிவித்தார். நிறுத்தப்பட்டது மாசி மாதத்து மாநாடு. இதில் தமிழக அரசியலின் பின்னணி இருந்தது என்று நாம் கருதினோம்.

   இதன் பின்னர் நாம் வெளிநாடுகளிலிருந்து பிரதிநிதிகளை அழைப்பதில்லை என்றும் இந்தியாவில் அகதிகளாக இருக்கும் ஈழத்தமிழர்கள் அனைவரையும் அழைத்து எதிர்காலம் பற்றித் தீர்மானிக்கலாம் என்று முடிவெடுத்தோம். சர்வதேச ஈழத் தமிழர்களது மாநாட்டில் சுமார் எண்பது தமிழ் அறிஞர்கள் அனைத்து நாடுகளிலிருந்தும் பங்குபெறுவதற்கு தங்களது விருப்பத்தைத் தெரிவித்திருந்தனர். அவர்களது பெயர் விபரங்களை நாம் முன்னரே மத்திய அரசிடம் சமர்ப்பித்திருந்தோம். இருந்தும் மறைமுக காரணங்களால் மறுக்கப்பட்டது ஈழத் தமிழர்களுக்குப் பின்னடைவுதான்.

   எனவேதான் இந்தியாவில் இருக்கும் ஈழத் தமிழர்கள் ஒன்று கூடித் தீர்மானிப்பது என்று 13,14 -11 -2010 சனி, ஞாயிறு ஆகிய இரண்டு திகதிகளில் மாநாட்டினை நடத்தினோம். இந்த இரண்டு நாள் சிறப்பு மாநாட்டில் 500 அங்கத்தினர் கலந்து கொண்டனர் இப்படிக் கலந்து கொண்டவர்களில் 250 பேர் கடந்த இருபது ஆண்டுகளாக தமிழகத்து முகாம்களில் வாழ்ந்து வருபவர்களின் பிரதிநிதிகள், இயக்க உறுப்பினர்கள் 150 பேர் ஏனையோர் எந்த அரச உதவியும், அங்கீகாரமும் இல்லாமல் முகாம்களுக்கு வெளியில் வாழ்பவர்கள்.

   இந்த மூன்று பகுதியினரும் தங்களது 20 ஆண்டுகால தமிழக வாழ்வு பற்றியும் தங்களது அடிமை நிலைப்பற்றியும் தெளிவாக எடுத்துரைத்தனர். அவர்கள் கூறிய பல வேதனைகளில் ஒன்றை மட்டும் இங்கே தருகிறோம். முகாமில் இருக்கும் ஈழத்து அடிமைகள் முகாமை விட்டு வெளியில் செல்வதென்றால் காலை ஆறுமணிக்குச் சென்று மாலை ஆறு மணிக்கு மீண்டும் திரும்பி வந்துவிட வேண்டும். வெளியில் செல்லும் போது கையொப்பமிட்டுச் செல்ல வேண்டும், திரும்பி வரும்போதும் கையொப்பம் இட வேண்டும்.

   ஒரு நாள் ஒரு நபர் கையொப்பம் இடாமல் வேலைக்குச் சென்று விட்டார். மீண்டும் மாலையில் திரும்பிய போது கியூ பிரிவு அதிகாரி அங்கே வந்தார். ஏதற்குக் கையொப்பம் போடாமல்ச் சென்றாய்? ஏன்றார், அவரோ பதில் சொல்ல முடியாமல் நின்றார், உடனே அந்த அதிகாரி அந்த ஈழத் தமிழரை முழந்தாள் இட்டு நிற்கும்படி உத்தரவிட்டார். அவரும் பயந்து முழங்காலில் நின்றார். பலர் முன்நிலையிலும் வைத்து அவரது கன்னங்களில் மாறி மாறி அறைந்தார் அந்த அதிகாரி. இதை அவர் விபரிக்கையில் அவரது கண்களிலிருந்து நீர் பெருகியது. இதற்காகவா நாம் இந்தியாவுக்கு அகதிகளாக வந்தோம், அன்றே தற்கொலை செய்திருக்கலாம் என்று தோன்றியதாம் அவருக்கு, அப்படிச் செய்தால் அவரது இரண்டு குழந்தைகளும் அனாதையாகிவிடுவர் என்று இன்னும் அந்த அவமானத்துடன் அலைகிறார்” என்றார் வந்திருந்த பிரதிநிதி.

   இது அடிமை வாழ்க்கையா இல்லையா? எத்தனை ஆண்டுகள்? ஏறக்குறைய 27ஆண்டுகள் எங்கள் இனம் அடிமையாக தமிழகத்தில் வாழ்கின்றனர். அகதி ஒருவருக்கு குறைந்தபட்ச உரிமை என்றுகூட எதனையும் அவர்கள் கோர முடியாது. தனது குடும்பம் பற்றிய முடிவைக்கூட ஒரு அகதி தீர்மானிக்க முடியாது.

   விடுதலை கிடைக்கும் என்று இத்தனை ஆண்டுகள் இவர்களது கொடுமைகளைத் தாங்கிக் கொண்டிருந்தனர் எங்கள் அகதிகள். இந்தியாவிலிருக்கும் அகதிகள் அடிமை வாழ்வை அனுபவித்துவிட்டு மீண்டும் சிங்களவரிடத்து அடிமைகளாகச் செல்ல வேண்டிய சூழல் ஏற்பட்டுள்ளது. பிறநாடுகளில் வாழும் தமிழர்களுக்கு இப்படி ஓர் நிலை ஏற்படாது, ஆனால் இந்தியாவில் இருக்கும் அகதிகள் வாழ்வுதான் கேள்விக்குறியாகிவிட்டது.

   எனவேதான் இந்தியாவைக் கோருகிறோம் நீங்கள் அளித்த வாக்குறிதியை நிறைவேற்றிக் கொடுங்கள் என்று. அதற்காக நடத்தப்பட்டதுதான் இந்த இரண்டு நாள் மாநாடு. இந்தச் சிறப்புக் கூட்டத்துக்கு தலைமை தாங்கியவர் திரு. தயாபரன் அவர்கள், ஈ.என்.டி.எல்.எப். தலைவர் உயர்திரு. ஞா.ஞானசேகரன் அவர்கள் சுமார் நான்குமணி நேரம் உரையாற்றினார்கள். அந்த உரை பின்னர் தளத்தில் ஒலி வழியாகக் கேட்கலாம். மேலும் திரு. மங்களராஜா அவர்கள், திரு. தம்பி தோழர் அவர்கள், திரு. நாதன் அவர்கள் சிறப்புரையாற்றினார்கள், திரு. வசீகரன் அவர்கள் நிகழ்ச்சிகளை தொகுத்து வழங்கினார்கள்.

   முகாமில் வாழ்ந்துவரும் மக்களின் பிரதிநிதிகளும், முகாமுக்கு வெளியில் வாழ்ந்துவரும் மக்களின் பிரதிநிதிகளும் உரையாற்றினர். இந்த மாநாட்டின் மூலம் ஈழத் தமிழருக்கான நாட்டுப்பண் ஒன்று முன்மொழியப்பட்டது. அந்தப் பாடலில் சில திருத்தங்கள் பிரதிநிதிகளால் தெரிவிக்கப்பட்டதனால் அந்தப் பாடல் மீண்டும் பதிவு செய்யப்பட்டு வலைதளத்திலும் விரைவில் ஒலிபரப்பப்படும் என்று தெரிவித்துக்கொள்கிறோம்.

   ஈழத் தமிழரின் இந்தச் சிறப்பு மாநாட்டினை நடத்துவதற்கு அனுமதியளித்த கர்நாடக மக்களுக்கும், கர்நாடக அரசுக்கும், கர்நாடக காவல்துறையினருக்கும் எங்களது மனமார்ந்த நன்றியினை ஈழத் தமிழர்கள் சார்பாக தெரிவித்துக்கொள்கிறோம்.

   அரசியல் பிரிவு

   ஈழ தேசிய ஜனநாயக விடுதலை முன்னணி

   (ஈ.என்.டி.எல்.எப்.) 16-11-2010

2010ஆம் ஆண்டு நவம்பர் திங்கள் 13 மற்றும் 14ம் நாட்களில் பெங்களுரில் நடைபெற்ற இரண்டு நாள் சிறப்புக் கூட்டத்தில் ஏகமனதாய் நிறைவேற்றப்பட்ட தீர்மானங்கள்.

   (01) ஈழ தேசிய ஜனநாயக விடுதலை முன்னணி (ஈ.என்.டி.எல்.எப்.)யினர் இந்தியாவின் வளர்ச்சிக்கும் ஒருமைப்பாட்டுக்கும் எதிரானவர்கள் அல்ல. பலதரப்பினரும் எதிர்த்தவேளை இந்திய-இலங்கை ஒப்பந்தத்தை இறுதிவரை ஆதரித்துச் செயற்பட்டது ஈ.என்.டி.எல்.எப். இயக்கம். மறைந்த பாரதப் பிரதமர் இராஜீவ்காந்தி அவர்களது வாக்குறுதியை ஏற்று மாநில அரசொன்றை ஏற்படுத்துவதற்காக 1700க்கும் மேற்பட்ட கட்சி உறுப்பினர்களை இழந்துள்ளது ஈ.என்.டி.எல்.எப். ஆதலால் இன்றைய நிலையில் எங்களது ஈழத்தமிழ் இனத்தை சிங்கள எதிரிகளிடமிருந்து காப்பாற்ற வேண்டும் என்று இந்தியாவிடம் கோரும் உரிமை எங்களுக்கு உண்டு.

   (02) சிங்கள ஆட்சியாளர் தமிழ் இனத்தவரை வாழவைக்கப் போகிறார்கள், உரிமைகள் வழங்கப் போகிறார்கள் என்று கூறுவதும், எதிர்பார்ப்பதும் வீனான கற்பனையாகும். தமிழ் இனத்தை அழிப்பதுதான் பௌத்த சிங்கள இனத்தவரின் கொள்கையாகும். இதனைத் தடுத்து நிறுத்தத்தான் இந்தியா 1987ல் இலங்கை விடயத்தில் தலையிட்டது. 50,000 துருப்புகளை வைத்துக் கொண்டு தமிழருக்கு உரிமை பெற்றுக் கொடுக்க முடியாமல் திரும்பியது இந்தியா. சிங்களத் தலைமை ஓர் நயவஞ்சகமான தலைமை, அவர்களை நம்பி எந்த ஒப்பந்தமும் செய்ய முடியாது. எனவே இந்தியா ஈழத் தமிழரையும் அவர்களது உரிமைகளையும் காப்பாற்ற வேண்டும் என்று கேட்டுக்கொள்வதுடன், முன்னைநாள் பிரதமர் அமைதிப்படையை அனுப்பியது போன்று ஓர் படையை அனுப்பி தமிழ் இனத்துக்கு உயிர்ப் பாதுகாப்பையும் நில உரிமையையும் பெற்றுத் தரவேண்டும் என்று ஈழ தேசிய ஜனநாயக விடுதலை முன்னணி (ஈ.என்.டி.எல்.எப்.) ன் சார்பாக கேட்டுக்கொள்கிறோம்.

   (03) 1987ஆம் ஆண்டு ஈழத் தமிழ் மக்களுக்கு வாக்குறுதி அளித்ததன்படி வடக்கு மற்றும் கிழக்கு மாகாணங்கள் இணைந்த அனைத்து அதிகாரங்களும் உள்ளடக்கிய மாநிலம் ஒன்றினை ஈழத் தமிழ் மக்களுக்கு அமைத்துக் கொடுக்க வேண்டும் என இந்திய அரசை வேண்டிக்கொள்கிறோம்.

   (04) இந்தியாவையும் ஈழத் தமிழ் மக்களையும் சிறிலங்கா அரசு பல தடவைகள் ஏமாற்றியுள்ளது. மறுவாழ்வு, மறு கட்டமைப்பு என்று கூறி சிறிலங்கா அரசு சிங்கள மக்களைத் தமிழர் பகுதிகளில் குடியேற்றி வருகிறது. இதனை இந்தியா உடனடியாகத் தடுத்து நிறுத்த வேண்டும் என இந்திய அரசை வேண்டிக்கொள்கிறோம்.

   (05) பிரித்தானியரிடமிருந்து விடுபட்ட 1948ஆம் ஆண்டுக்குப் பின்னர், தமிழரது பூர்விக நிலங்களில் சிங்கள அரசால் குடியமர்த்தப்பட்ட சிங்களக் குடியேற்றங்கள் அனைத்தையும் முற்றாக அகற்ற வேண்டும்.

   (06) புத்த பிக்குகள் ஈழத்தமிழருக்குச் சொந்தமான பூர்விகப் பகுதிகளில் எங்கெங்கு அரசமரங்கள் இருக்கின்றனவோ அவற்றின் கீழே பொளத்த மதத்தைப் பரப்ப அரசின் பலத்த ஆதரவோடு புத்தர் கோவில்களைக் கட்டி வருகின்றார்கள். அவ்வாறு கட்டும் சட்டத்திற்குப் புறம்பான செயலைத் தடுத்த நிறுத்த வேண்டும் எனவும், ஏற்கனவே கட்டப்பட்ட புத்தர் கோவில்களை இடித்து அகற்ற வேண்டும் என்றும் இந்திய அரசைக் கேட்டுக்கொள்கிறோம்.

   (07) 2009ஆம் ஆண்டு ஈழத்தில் நடைபெற்றது பயங்கரவாத எதிர்நடவடிக்கை அல்ல, சிங்கள இனத்தவரின் தமிழ் இன அழிப்பு நடவடிக்கைதான் அங்கு நடைபெற்றது. பயங்கரவாதம் என்று உலகுக்குக் காண்பித்த சிங்கள அரசு செய்தது இனப்படுகொலைதான். இதனை விசாரிப்பதற்கு மிகப்பெரிய சக்திவாய்ந்த ஜனநாயக நாடான இந்தியா முயற்சிகள் மேற்கொள்ள வேண்டும். இந்திய மக்கள் இதனை கண்டிப்பாக வரவேற்பார்கள். எந்த நாடும் தனது சொந்த மக்கள் மீது இவ்விதம் குண்டுகள் வீசி அழித்தது கிடையாது. அங்கு நடைபெற்றது எதிர் நாட்டின் மீது படையெடுப்புத்தான், எனவே நடத்தப்பட்ட படுகொலைகள் விசாரிக்கப்படுவதற்கு இந்தியா முன்மொழிய வேண்டும் என்று கேட்டுக்கொள்ளப்படுகிறது.

   (08) ஈழத் தமிழரது பிரச்சினைகள் தீர்க்கப்பட்டு அவர்கள் ஈழத்துக்குத் திரும்பும் வரை, தமிழகத்தில் உள்ள அகதி முகாம்களை பராமரிக்கும் பொறுப்பினை மத்திய அரசு நேரடியாக ஏற்றுக்கொள்ள வேண்டும். சுதந்திரம் கேட்ட எங்கள் மக்கள் தமிழக பொலிசாரால், குறிப்பாக கியூ பிரிவினரால் முகாம்களுக்குள் அடிமைகள் ஆக்கப்பட்டுள்ளனர். அவர்களிடமிருந்து எங்கள் மக்களை மத்திய அரசு மீட்டுத் தர வேண்டும். தீபெத்திய அகதிகளுக்கு வழங்கிய உரிமைகள் போன்று ஈழத் தமிழ் மக்களுக்கும், அவர்கள் நாடு திரும்பும் வரை வழங்க வேண்டும் என்று கேட்டுக்கொள்கிறோம். இவ்விதமான ஓர் தீர்வொன்றினை ஏற்படுத்திக்கொடுக்கும் வரை இந்தியாவில் இருக்கும் ஈழத்து அகதிகள் யாரையும் திருப்பி அனுப்பக்கூடாது என்று இந்தியாவைக் கேட்டுக்கொள்கிறோம்.

   (09) வடக்குக் கிழக்குக் கடல் பகுதிகளில் மீன் பிடிக்கும் உரிமை தமிழர்களுக்கு மட்டுமே உண்டு. வடக்கு-கிழக்குக் கரையோரப் பகுதிகளில் குடியமர்த்தப்பட்ட சிங்கள மீனவர் குடியிருப்புகளை அகற்ற வேண்டும்.

   (10) மேற்படி கோரிக்கைகள் அனைத்தும் சாத்தியம் இல்லை என்று இந்தியா கருதினால், சிறிலங்கா அரசு தமிழர் மீது யுத்தம் புரிவதற்கு நிதி உதவி வழங்குவதற்காக, “நன்கொடை நாடுகள்” என்று (DONORS COUNTRIES) ஓர் அமைப்பை ஏற்படுத்தி போர்க்கருவிகள் வாங்குவதற்கு பெருமளவு பணஉதவி செய்தனர் அதேபோன்று தமிழ் இனத்தின் பிரச்சினைகளைத் தீர்த்து உரிமைகளைப் பெற்றுக்கொடுக்க, தமிழர்கள் அகதிகளாக வாழும் நாடுகள் அனைத்தையும் இணைந்த அமைப்பொன்றினை ஏற்படுத்த வேண்டும். “சமாதான நாடுகள்” என்ற அமைப்பின் மூலம் எங்கள் இனத்தின் பிரச்சினைகளை ஆராய்ந்து உண்மைகளைக் கண்டறிந்து நிரந்தரத் தீர்வொன்றினை ஏற்படுத்தித் தரவேண்டும் என்றும் இந்தியாவைக் கேட்டுக்கொள்கிறோம்.

மேற்படி தீர்மானங்கள் அனைத்தும் இந்த சிறப்புக் கூட்டத்தில் ஒரே மனதாக தீர்மானிக்கப்பட்டன.

யுத்த சூனிய வலயமாக வன்னியில் எந்தவொரு இடமும் இருந்ததில்லை – தயா மாஸ்டர் சாட்சியம்

thayamaster.jpgவன்னி யில் யுத்த சூனிய வலயம் என்று எந்தவொரு இடமும் இருந்திருக்கவில்லையென நல்லிணக்க ஆணைக்குழுவிடம் சுட்டிக்காட்டிய தயா மாஸ்டர், மோதல் வன்னியில் உக்கிரமடைந்திருந்தபோது இராணுவத்திடம் சரணடைந்த பொதுமக்களை இராணுவத்தினர் எவ்வாறு நடத்தினர் என்பது குறித்துக் கருத்துக் கூற முடியாதெனவும் தெரிவித்தார். ஊர்காவற்றுறை புனித அந்தோனியார் தேவாலயத்தில் கற்றுக்கொண்ட பாடங்களும் மற்றும் நல்லிணக்க ஆணைக்குழுவின் விசாரணைகள் நடைபெற்றபோது சாட்சியமளிக்கையிலேயே முன்னாள் விடுதலைப்புலிகளின் ஊடகத்துறை பேச்சாளரான தயா மாஸ்டர் இவ்வாறு தெரிவித்தார்.

ஆணைக்குழு முன் தயாமாஸ்டர் தொடர்ந்து சாட்சியமளிக்கையில் விடுதலைப்புலிகளின் அரசியல்துறை ஊடகப்பிரிவிற்குப் பொறுப்பாளராக நான் கடமையாற்றியுள்ளேன். விடுதலைப்புலிகளுக்கும் அரசுக்குமிடையிலான யுத்த நிறுத்த உடன்படிக்கை முறிவடைந்த நிலையில், நான் விடுதலைப்புலிகள் அமைப்பிலிருந்து வெளியேற முயற்சித்துள்ளேன். சமாதான உடன்படிக்கையின் முறிவும் புறக்கணிப்பும் துன்பப்படும் மக்களின் பிரச்சினைகள் மேலும் அதிகரித்தமை போன்றவற்றாலேயே நான் விடுதலைப்புலிகள் அமைப்பிலிருந்து விலகத் தீர்மானித்தேன். போர் மிகவும் உக்கிரமடைந்திருந்த நிலையில் பல பொதுமக்கள் கொல்லப் பட்டிருந்தனர். இருதரப்புக்கும் இடையில் மக்கள் சிக்கியிருந்தனர். இவ்வாறிருந்த மக்களைப் போலவே நானும் எனது குடும்பமும் மரணத்தின் விளிம்புவரை சென்றிருந்தோம்.குறித்த சில பகுதிகளில் தான் போர் நடைபெற்றன. வரையறுத்துக் கூற முடியாது. போரின் பரிமாணங்கள் பரந்தவையாக இருந்தன.என்ன செய்வதென்று தெரியாமல் மக்கள் திணறிக் கொண்டிருந்தனர்.நாளுக்கு நாள் மரணிப்போரின் எண்ணிக்கை அதிகரித்துக் கொண்டே சென்றது. இந்நிலையில், பொருத்தமான முறையில் தம்மை பாதுகாத்துக்கொள்ளும் வழிமுறையையே ஒவ்வொருவரும் தேடிச் சென்றனர் என்பதுதான் உண்மை.

அன்றைய காலகட்டத்தை என்னால் மறக்க முடியாது. யுத்தத்தால் கொல்லப்பட்ட பல ஆயிரக்கணக்கான உயிர்களுக்காக நானும் வருந்துகின்றேன். இந்த உயிரிழப்புகள் தேவையற்றவை. யுத்தம் தீவிரமடைந்தபோது சமாதானத்தை விரும்பிய விடுதலைப்புலிகளின் மூத்த உறுப்பினர்கள் சிலரும் புலமையாளர்கள் சிலரும் சமாதானத்தை ஏற்படுத்துமாறு வலியுறுத்தி விடுதலைப்புலிகளின் ஆலோசகர் பாலகுமாரன் ஊடாக தலைவர் வே.பிரபாகரனுக்கு கடிதம் ஒன்றை அனுப்பினோம். ஆனால், அதற்கு ஏமாற்றமே கிடைத்த நிலையில் போர் மிகவும் உச்ச நிலைக்கு அடைந்துவிட்டது. இவ்வாறான நிலையில், உயிரிழப்புகளும் கட்டுமான சேதங்களும் அதிகரித்த நிலையில் அரசுடன் இணைவதால் சமாதானமாக வாழலாம் என எண்ணிய பலரில் நானும் ஒருவன்.

 இந்நிலையில்தான் 2009 ஏப்ரல் 28 ஆம் திகதி நானும் ஜோர்ஜ் மாஸ்டரும் சரணடைந்தோம். மக்களுடன் மக்களாக நாமும் இராணுவத்திடம் சரணடையும்போது எம்மை மக்களிடமிருந்து வேறாக்கிய இராணுவத்தினர் எம்மை நன்றாகவே நடத்தினர். ஆனால், சரணடைந்த மக்களை இராணுவத்தினர் எவ்வாறு நடத்தினர் என்று கருத்துக்கூற முடியாது. தற்போது நான் பிணையில் விடுவிக்கப்பட்டுள்ளேன். மோதலின் போது அதிக இரத்தம் உயிர் சொத்துக்கள் இழக்கப்பட்டுள்ளன. பல ஆயிரக்கணக்கான பெண்கள் தங்கள் கணவன்மாரின் உறவினர்களின் தகவல் அறியாமல் உள்ளனர். அங்கலாய்ப்பும் போரின் வடுக்களும்தான் இன்று மிச்சமாய் இருக்கின்றன. பரஸ்பரம், நம்பிக்கை இன்மையும் மற்றவர்களை அவர்களின் நிலையிலிருந்து புரிந்து கொள்ளாமையுமே இவ்வளவு அழிவுக்கும் காரணமாகும்.

இந்த சமாதானச்சூழல் சாத்தியமற்றுப்போனது. நீண்டதும் அதிக இழப்புமிக்கதுமான போர் முடிவுக்கு வந்துள்ளது. இன்று பல முன்னாள் போராளிகள் புனர்வாழ்வு பெற்று சமூகத்துடன் இணைந்துள்ளனர். எஞ்சியவர்களும் விரைவில் விடுவிக்கப்படுவார்கள் என நான் நம்புகின்றேன்.முன்னாள் போராளிகள் தொடர்பாக சமூகத்தில் ஒரு தவறான கண்ணோட்டம் இருந்து வருகின்றது. வேலைவாய்ப்பு வழங்குவதில் கூட பாரபட்சம் காட்டப்படுகின்றது. இந்த நிலை மாற்றப்பட வேண்டும். தெரிந்தோ,தெரியாமலோ புலிகள் இயக்கத்தில் இணைந்தும் ஆதரவு வழங்கியும் நீண்டகாலமாகத் தடுப்புக்காவலில் உள்ளவர்களின் விசாரணைகள் துரிதப்படுத்தப்பட்டு விரைவில் அவர்கள் விடுதலை செய்யப்பட வேண்டும். மேலும், யுத்த காலத்திலும் யுத்தத்தின் முன்னரும் காணாமல் போனவர்கள் தொடர்பில் இந்த ஆணைக்குழு அதிக அக்கறை காட்ட வேண்டும்.இடம்பெயர்ந்து மீளக்குடியமர்ந்து வரும் வன்னி மக்களின் இயல்பு வாழ்க்கைக்கும் நடவடிக்கையெடுக்க வேண்டும். மீள்கட்டுமானங்களை இழந்தவர்களின் வாழ்வாதார மேம்பாட்டுக்கான உதவிகளை அதிகளவில் மேற்கொள்ள வேண்டும்.

போர் நடைபெற்ற பிரதேசங்களில் இயல்பு நிலையை மீட்பதற்கு அரசு மேற்கொண்டு வரும் நடவடிக்கைகளுக்கு எனது பாராட்டுக்கள். இவற்றின் அடிப்படையில் நீண்டகால நிலையான சமாதானத்துக்கான பரிந்துரையை ஆணைக்குழு இறுதி அறிக்கையில் வலியுறுத்த வேண்டும். 1987,1990,1995,2000 ஆகிய ஆண்டுகளில் சமாதானத்திற்கும் நல்லிணக்கத்திற்கும் கிடைத்த சந்தர்ப்பங்களை புலிகள் சரியாகப் பயன்படுத்தியிருந்தால் இவ்வாறான அனர்த்தங்களை தவிர்த்திருக்கலாம். முன்னர் நடைபெற்ற ஆணைக்குழுக்கள் தொடர்பாக மக்களிடம் தவறான அபிப்பிராயம் இருந்து வருகின்றது. அது மீண்டும் தொடராமல் பார்த்துக்கொள்ள வேண்டும் எனத் தெரிவித்தார். இந்நிலையில், ஆணைக்குழு உறுப்பினர்களால் எழுப்பப்பட்ட கேள்விகளுக்குப் பதிலளித்த தயாமாஸ்டர்;

1972 தொடக்கம் இறுதிக்கட்டப் போர் (2009 மே) வரை 30 ஆயிரத்திற்கும் அதிகமான விடுதலைப்புலி உறுப்பினர்கள் கொல்லப்பட்டதாக பதிவு உண்டு. புதுமாத்தளன், பொக்கணை ஆகிய இரு சிறு இடங்களுக்குள் பெருமளவான மக்கள் அடங்க வேண்டியிருந்தது. இந்த நிலையில் புலிகளும் அங்கிருந்து தாக்குதல் மேற்கொண்டனர். இராணுவமும் பதில் தாக்குதல் நடத்தியது. ஆனால், புலிகள் மக்களை இராணுவக் கட்டுப்பாட்டுக்குள் செல்ல அனுமதித்திருந்தால் உயிரிழப்புகளைத் தவிர்த்திருக்கலாம். அத்துடன், மோதல் தவிர்ப்பு பகுதி என்று எந்தவொரு இடமும் வன்னியில் அமுலில் இருக்கவில்லை. அத்துடன், இராணுவத்தினால் அறிவிக்கப்பட்ட மோதல் தவிர்ப்பு வலயத்தினை யுத்தத்தில் ஈடுபட்ட விடுதலைப்புலிகளும் இராணுவத்தினரும் மதிக்கவில்லை.

போர் நிறைவடைந்து முன்னாள் புலிகள்,ஆதரவு வழங்கியோர், சந்தேகத்தின் பேரில் கைது செய்யப்பட்டவர்களை விடுவிக்க அரசு நடவடிக்கையெடுக்க வேண்டும். போராட்டம் உருவாவதற்கு அரசியல் பிரச்சினையே காரணமாக இருந்தது. அத்துடன், வட்டுக்கோட்டை தீர்மானத்தின்படி தனிநாட்டுக் கோரிக்கையை தந்தை செல்வா தரப்பினர் தொடராத நிலையிலேயே ஆயுதம் ஏந்திப் போராட வேண்டிய அவசியம் ஏற்பட்டதாக வே.பிரபாகரன் என்னிடம் பல தடவை கூறினார். அத்துடன், அடிப்படைப் பிரச்சினைகளுக்கு சமாதான முறையில் உடனடியாகத் தீர்வு வழங்க வேண்டும் எனத் தெரிவித்தார்.

தினக்குரல் 15.11.2010

11 இலட்சம் மரக்கன்றுகள் 11 நிமிடங்களில் இன்று நடுகை

ஜனாதிபதி மஹிந்த ராஜபக்ஷவின் பிறந்த தினம் மற்றும் இரண்டாவது பதவியேற்பை முன்னிட்டு ‘தேசத்துக்கு நிழல்’ எனும் தேசிய மரம் நடுகைத் திட்டம் இன்று நாடு முழுவதும் நடைபெறுகிறது. வடக்கு, கிழக்கு உட்பட நாட்டின் அனைத்துப் பகுதிகளிலுமுள்ள அரசாங்கத் திணைக்களங்கள், பாடசாலைகள், உள்ளூராட்சி சபைகள் உட்பட அனைத்து இடங்களிலும் 11 நிமிடங்களில் 11 இலட்சம் மரங்கள் நடப்படவுள்ளன. இன்று முற்பகல் 10.07 மணியிலிருந்து 10.18 மணி வரையிலான 11 நிமிடங்களிலேயே 11 இலட்சம் மரங்களும் நடப்படவுள்ளன.

எனினும், இத் தேசிய திட்டத்திற்கு நாடளாவிய ரீதியில் பெரும் ஆதரவு கிடைத்திருப்பதால் இன்று 20 இலட்சம் மரக் கன்றுகளை நடுவதற்கான ஏற்பாடுகள் செய்யப்பட்டுள்ளதாக சுற்றாடல் வளத்துறை அமைச்சு தெரிவித்துள்ளது. வழமையான மரம் நடுகைத் திட்டங்களைப் போலல்லாது ‘தேசத்துக்கு நிழல்’ எனும் இந்தத் தேசிய மரம் நடுகைத் திட்டத்தைக் கின்னஸ் சாதனையாகப் பதிவு செய்வதற்கும் சுற்றாடல் வளத்துறை அமைச்சு நடவடிக்கை எடுக்கவுள்ளது.

அலுவலகங்களில் மாத்திரமன்றி வீடுகளிலும் குறைந்தது ஒரு மரத்தையாவது நடுவதற்கு முன்வர வேண்டுமெனக் கோரிக்கை விடுக்கப்பட்டுள்ளது.

முல்லைத்தீவு மாவட்டத்தில் ரூ. 50 கோடியில் அபிவிருத்தி

முல்லைத்தீவு மாவட்டத்தில் ஐம்பது கோடி ரூபா செலவில் உள்ளூராட்சி மற்றும் உட்கட்டமைப்பு தொடர்பான பல்வேறு பாரிய அபிவிருத்திப் பணிகள் முன்னெடுக் கப்பட்டு வருவதாக வட மாகாண ஆளுநர் மேஜர் ஜெனரல் ஜீ.ஏ. சந்திரசிறி தெரிவித்தார்.

யுத்தத்தின் போது கடுமையாக பாதிக்கப்பட்ட முல்லைத்தீவு மாவட்டத்தில் வெகு விரைவில் முழுமையான சிவில் நிர்வாகத்தை ஏற்படுத்தும் பொருட்டும், மக்களுக்குத் தேவையான சகல வசதிகளையும் பெற்றுக் கொடுக்கும் வகையிலும் இந்த நடவடிக்கை எடுக்கப்பட்டுள்ளதாக அவர் மேலும் தெரிவித்தார்.

முல்லைத்தீவு மாவட்டத்திலுள்ள 115 உள்ளூர் வீதிகளை புனரமைக்கும் திட்டத் திற்கு 393 மில்லியன் ரூபாவும், பிரதேச சபைகளை நிர்மாணிப்பதற்கான ஒன்பது கட்டுமான பணிகளுக்கு 71 மில்லியன் ரூபாவும், ஏனைய நிர்மாண பணிகளுக்கு 36 மில்லியன் ரூபாவும் ஒதுக்கீடு செய்துள் ளதாக முல்லைத்தீவு மாவட்டத்திற்கான பிராந்திய உள்ளூராட்சி உதவி ஆணையாளர் கே.உதயராஜா தெரிவித்தார்.

வடக்கின் வசந்தம், வட மாகாணத்துக்கான அவசர புனரமைப்பு திட்டம் ஆகியவற்றின் ஊடாக வட மாகாண சபை இந்த அபிவிருத்தித் திட்டங்களை முன் னெடுத்து வருவதாக அவர் மேலும் தெரிவித்தார்.

இத்திட்டத்தின் கீழ் முல்லைத்தீவு மாவட்டத்திலுள்ள 115 உள்ளூர் வீதிகள் முழுமையாக புனரமைக்கப்படவுள்ளதுடன் புதுக்குடியிருப்பு, துணுக்காய், கரைத்துறைப்பற்றும் மற்றும் பாண்டியன் குளம் ஆகிய நான்கு பிரதேச சபைகளுக்கான அலுவலகங்களும், செம்மாலை கொக்கிளாய் பிரதேசத்திற்கான உப பிரதேச சபை அலுவலகங்களும் புதிதாக நிர்மாணிக்கப்படவுள்ளன.

ஆசிய விளையாட்டுப் போட்டி நேற்று கோலாகல ஆரம்பம்

asia.jpg16ஆவது ஆசிய விளையாட்டுப் போட்டிகளின் ஆரம்ப விழா நேற்று 12ம் திகதி வெள்ளிக்கிழமை மிகவும் கோலாகலமாக ஆரம்பித்து வைக்கப்பட்டது. எனினும் உதைபந்து போட்டிகள் கடந்த 07ஆம் திகதியே ஆரம்பிக்கப்பட்டுவிட்டன. விளையாட்டுப் போட்டிகளில் நீர் விளையாட்டுகள், வீதி சைக்கிள் ஓட்டப் போட்டிகள், டன்ஸி ஸ்போட்ஸ், ஜிம்நாஸ்டிக், ஜூடோ, குறி பார்த்து சுடல், பாரம் தூக்கும் போட்டிகள் மற்றும் வூஷ¤ போட்டிகள் என்பன இன்று ஆரம்பமாகின்றன.

15 ஆவது ஆசிய விளையாட்டுப் போட்டி 2006 ஆம் ஆண்டிலே கட்டார் நாட்டின் தோஹா நகரில் நடைபெற்றது. அந்தப் போட்டிகளில் வழமைபோல் சீனா 124 தங்கம், 70 வெள்ளி மற்றும் 49 வெண்கலப் பதக்கங்களுடன் முதலிடம் பெற்றதுடன், தென் கொரியா 44 தங்கம், 39 வெள்ளியும், 70 வெண்கலப் பதக்கங்களுடன் இரண்டாம் இடத்தினையும், யப்பான் 43 தங்கம், 51 வெள்ளி மற்றும் 57 வெண்கலப் பதக்கங்களுடன் மூன்றாம் இடத்தையும் பெற்றுக்கொண்டன.

இலங்கைக்கு ஒரு வெள்ளிப் பதக்கமும், வெண்கலப் பதக்கங்கள் இரண்டும் கிடைத்தன. 36 நாடுகள் பங்குபற்றிய இந்த போட்டியில் இலங்கைக்கு 32 ஆவது இடம் கிடைத்தது.

ஆசிய நாடுகளிடையே நடைபெறும் பிரதான விளையாட்டுப் போட்டியான ஆசிய விளையாட்டுப் போட்டிகள் 16 ஆவது முறையாக இம்மாதம் 12ம் திகதி முதல் 27ம் திகதி வரையில் சீனாவின் குவென்ஷ¤ நகரில் நடைபெறுகின்றது. இந்த விளையாட்டுப் போட்டிகளில் 47 நாடுகளைச் சேர்ந்த 42 விளையாட்டுப் போட்டிகளில் பத்தாயிரத்திற்கும் அதிகமான வீரர்கள் கலந்துகொள்ள உள்ளதாக சீனாவிலிருந்து கிடைக்கும் தகவல்கள் குறிப்பிடுகின்றன. இலங்கை சார்பாக இம்முறை 22 நிகழ்ச்சிகளில் 138 வீரர்கள் கலந்துகொள்வதுடன், 29 அதிகாரிகளும் பங்கேற்கவுள்ளனர்.

விளையாட்டுப் போட்டிக்காக குவென்ஷ¤ நகரில் நிர்மாணிக்கப்பட்டுள்ள விளையாட்டு கிராமமானது, 2.73 சதுர கிலோ மீட்டர் பரப்பினைக் கொண்டுள்ளது. விளையாட்டு வீரர்கள், அதிகாரிகள் அடங்கலாக 14000 பேருக்கு அதில் தங்குமிட வசதியுண்டென ஏற்பாட்டாளர்கள் குறிப்பிடுகின்றனர். ஊடகவியலாளர்கள், தொழில்நுட்ப அதிகாரிகள் மற்றும் அதிகாரிகள் உள்ளிட்ட விளையாட்டு வீரர்களுக்கு மேலதிகமாக 14000 பேர் அன்றாட கடமையில் ஈடுபடுவார்களென ஏற்பாட்டாளர்கள் குறிப்பிடுகின்றனர்.

ஜனாதிபதியின் பதவியேற்பு – கொழும்பு 01, 02, 03, 04 இல் விசேட விடுமுறை தினம்

தேசிய நிகழ்வாக நடத்தப்படும் ஜனாதிபதியின் பதவியேற்பு ஆரம்ப வைபவம் நடைபெறும் நவம்பர் 19 ஆம் திகதியன்று கொழும்பு 01, 02, 03, 04 ஆகிய பகுதிகளிலுள்ள தனியார் துறை அலுவலகங்களுக்கும் கொடுப்ப னவுடன் கூடிய விடுமுறை வழங்குமாறு தொழில் உறவுகள் அமைச்சர் காமினி லொக்குகே வேண்டுகோள் விடுத்துள்ளார்.

ஜனாதிபதியின் இரண்டாவது பதவியேற்பு நிகழ்வு தேசிய நிகழ்வாக கொழும்பு காலி முகத்திடலுக்கு முன்னாலுள்ள ஜனாதிபதியின் செயலக வளவில் எதிர்வரும் 19 ஆம் திகதி நடைபெறவுள்ளது. அன்றைய தினம் கொழும்பு 01 கோட்டை, கொழும்பு 02, யூனியன் பிளேஸ், கொம்பனித்தெரு, கொழும்பு 03 கொள்ளுப்பிட்டி, கொழும்பு 04 பம்பலப்பிட்டி பகுதிகளிள் அமைந்துள்ள அனைத்து அரசாங்க அலுவலகங்கள், மற்றும் பாடசாலைகளை மூடுவதற்கும் அரசாங்கம் தீர்மானித்துள்ளது.

எனவே ஜனாதிபதியின் பதவியேற்பு ஆரம்ப வைபவம் தேசிய அலுவலக நிகழ்வாக இருப்பதனாலும், அன்றைய தினம் ஏற்படக்கூடிய போக்குவரத்துத் தடங்கலைக் கருத்தில் கொண்டு மேற்குறிப்பிட்ட பிரதேசங்களில் அமைந்துள்ள தனியார் துறை தாபனங்களின் பணியாளர்களுக்கு 19 ஆம் திகதியன்று கொடுப்பனவுடன் கூடிய லீவினை வழங்குமாறு உரிய தொழில்தருநர்களை தயவுடன் கேட்டுக்கொள்கின்றேன் என்றும் அமைச்சர் காமினி லொக்குகே கேட்டுக்கொண்டுள்ளார்.

அரசுடன் இணைந்து செயற்பாடு – மு. காவின் தீர்மானத்திற்கு அதியுயர் பீடம் அங்கீகாரம்

ஸ்ரீ லங்கா முஸ்லிம் காங்கிரஸ் அரசாங்கத்துடன் முழுமையாக இணைந்து செயற்படவுள்ளதாக அக்கட்சியின் தவிசாளர் பாராளுமன்ற உறுப்பினர் பசீர் சேகு தாவூத் தெரிவித்துள்ளார். ஜனாதிபதி மஹிந்த ராஜபக்ஷவின் அழைப்பை ஏற்று நடத்தப்பட்ட பேச்சுவார்த்தையினை யடுத்து அரசாங்கத்துடன் இணைந்து செயற்படுவதற்கு எடுத்த தீர்மானத்தினை கட்சியின் அதியுயர் பீடம் அங்கீகரித்துள்ளதாகவும் அவர் கூறினார்.

கடந்த 10 ஆம் திகதி ஜனாதிபதியுடன் கட்சியின் தலைவர் றவூப் ஹக்கீம் தலைமையில் இது தொடர்பான பேச்சுவார்த்தை இடம் பெற்றது. இதையடுத்து 11 ஆம் திகதி கட்சியின் அதியுயர் பீடம் கூடியது. இதன் போது இவ் விடயம் விரிவாக ஆராயப்பட்டது. எதிர்வரும் 16 ஆம் திகதி பாராளுமன்றத்தில் தலைவர் றவூப் ஹக்கீம் தனது உரையின் போது இதனை அறிவிக்கவுள்ளார் என்றார்.

எழுத்து மூல சாட்சியங்களை சமர்ப்பிக்கும் கால எல்லை நீடிப்பு

கற்றறிந்த பாடங்கள் நல்லிணக்கம் பற்றிய ஆணைக்குழுவிற்கு எழுத்துமூல சாட்சியங்களைச் சமர்ப்பிப்பதற்கான காலஎல்லை டிசம்பர் 31ஆம் திகதி வரை நீடிக்கப்பட்டுள்ளது. குறிப்பிட்ட கால எல்லைக்கு முன்னர் எந்தவொரு தனிநபரோ அல்லது அமைப்புக்களோ தாமாக முன்வந்து சாட்சியமளிக்க வேண்டுமென அந்த ஆணைக்குழு தெரிவித்துள்ளது. எழுத்துமூல மாக முன்வைக்கப்படும் சாட்சியங்கள் நன்கு ஆராயப்படுமென்றும், அதன் பின்னரே இறுதி அறிக்கை வெளியிடப்படும் என்றும் தெரிவிக்கப்படுகிறது.

மோதல்களால் நேரடியாகப் பாதிக்கப்பட்ட பிரதேசங்களில் பெரும் எண்ணிக்கையிலான மக்கள் ஆணைக்குழு முன்னிலையில் சாட்சியமளித்துள்ளனர். மோதல்களால் பாதிக்கப்பட்ட மக்கள் சாட்சியமளிப்பதற்கு கூடுதல் சந்தர்ப்பம் வழங்க ஆணைக்குழு நடவடிக்கை எடுத்துள்ளது. ஆணைக்குழுவின் அமர்வு நேற்று யாழ்ப்பாணத்தில் ஆரம்பமானது. விரைவில் அம்பாறை, திருகோணமலையில் அமர்வு நடைபெறவுள்ளது.

வடக்கிலுள்ள 9 நீதிமன்றங்களை புனரமைக்க ரூ. 890 மில்லியன்

ஆசிய அபிவிருத்தி வங்கியின் 890 மில்லியன் ரூபா கடனுதவியுடன் வடக்கிலுள்ள ஒன்பது நீதிமன்றங்களை மீளமைக்க அமைச்சரவை அனுமதி வழங்கியது. இதன்படி, பருத்தித்துறை, முல்லைத்தீவு, மன்னார், கிளிநொச்சி, வேலணை, மாங்குளம், சாவகச்சேரி, மல்லாகம் மற்றும் ஊர்காவற்துறை நீதிமன்றங்களுக்கு புதிதாக கட்டடங்கள் அமைக்கவும் புனரமைக்கவும் நடவடிக்கை எடுக்கப்படும்.

ஆசிய அபிவிருத்தி வங்கியின் ‘கெயா’ திட்டத்தின் கீழ் 150 மில்லியன் அமெரிக்க டொலர்கள் வழங்கப்பட உள்ளதோடு அதன் ஒரு பகுதியாகவே இந்த கடனுதவி வழங்கப்பட்டுள்ளது. இதேவேளை, ஊர்காவற்துறையில் 150 மில்லியன் ரூபா செலவில் நீதிபதிகளுக்கான உத்தியோகபூர்வ வாசஸ்தலமும் நிர்மாணிக்கப்படும்.