செய்திகள்

Thursday, December 9, 2021

செய்திகள்

செய்திகள்

கிளிநொச்சியை படையினர் கைப்பற்றியமை சமாதானத்தை விரும்புபவர்களுக்கு கிடைத்த மாபெரும் வெற்றி – கிழக்கு முதலமைச்சர் சி. சந்திரகாந்தன்

cm.jpgவரலாற்று முக்கியத்துவம் வாய்ந்த இடமாக விளங்கிய கிளிநொச்சியை படையினர் கைப்பற்றி இருப்பதானது பயங்கரவாதம் ஒழிக்கப்பட்டு சமாதானம், ஜனநாயகம் என்பன ஏற்படுத்தப்பட வேண்டும் என விரும்புகின்ற அனைவருக்குமே கிடைத்த ஓர் மாபெரும் வெற்றியாகும் என கிழக்கு மாகாண முதலமைச்சர் சிவநேசதுரை சந்திரகாந்தன் தெரிவித்தார். கடந்த ஞாயிற்றுக்கிழமை முதலமைச்சரின் மட்டக்களப்பு அலுவலகம் பத்திரிகைகளுக்கு விடுத்த செய்திக் குறிப்பிலேயே மேற்கண்டவாறு முதலமைச்சர் சி. சந்திரகாந்தனால் தெரிவிக்கப்பட்டுள்ளது.

அவ்வறிக்கையில் மேலும் தெரிவிக்கப்பட்டிருப்பதாவது; இந்த வெற்றியினூடாக வட பகுதிக்குள் குறிப்பாக பயங்கரவாதிகளின் கட்டுப்பாட்டு எல்லைக்குள் சிக்கித் தவிக்கின்ற அப்பாவி பொதுமக்கள் மற்றும் இளைஞர், யுவதிகளையும் மீட்டு அவர்களுக்கு புனர்வாழ்வு அளிக்கப்படுகின்ற போது இவ்வெற்றியானது தமிழ் மக்கள் மத்தியில் பெரும் வரவேற்பை பெற்றுக்கொள்ளும் என்பதில் எதுவித ஐயமுமில்லை. கிழக்கைப் போன்றே வடக்கிலும் ஒரு ஜனநாயக சூழல் ஏற்படுத்தப்பட வேண்டும். அதற்காக எஞ்சியிருக்கின்ற பயங்கரவாதம் முற்றுமுழுதாக ஒழிக்கப்பட வேண்டும். இவ்வாறு பயங்கரவாதம் ஒழிக்கப்படுவதனூடாக கிழக்கு மக்களைப் போன்று வடபகுதி மக்களும் ஓர் ஜனநாயகப் பாதைக்கு வந்து தங்களுக்கான பலமான அரசியல் இருப்பை ஏற்படுத்திக்கொள்ள முடியும்.

அண்மைக் காலமாக இராணுவ முன்னேற்றங்களை வைத்துப் பார்க்கின்றபோது இப்பாரிய வெற்றியானது சமாதான விரும்பிகள் எல்லோராலும் எதிர்பார்க்கப்பட்ட ஒன்றாகும். உண்மையிலேயே இலங்கையின் இறைமைக்குட்பட்ட எந்த ஓர் நிலப்பிரதேசத்திலும் இருக்கின்ற பயங்கரவாதம் முற்று முழுதாக ஒழிக்கப்படுகின்ற அதேவேளை, மீண்டும் ஒருமுறை பயங்கரவாதமானது துளிர்விடுவதற்கு யாருமே அனுமதியளிக்கக்கூடாது, பயங்கரவாதத்தின் கொடூரங்களுக்கு பலியாவது அப்பாவி பொதுமக்களும், அரச உடைமைகளுமே. ஜனாதிபதியின் வழிகாட்டலில் படையினர் ஈட்டியிருக்கின்ற இந்தப் பாரிய வெற்றியினூடாக ஏற்படவிருக்கின்ற அனுகூலங்களை முழுமையாக பாதிக்கப்பட்ட மக்கள் அனுபவிக்க வேண்டும். இப்பயங்கரவாதத்தின் பிடியில் சிக்குண்ட மக்களை மீட்டெடுத்து ஜனநாயக முறையில் வாழ்வதற்கான சகல நடவடிக்கைகளும் மேற்கொள்ளப்படுகின்றபோது அந்த மக்கள் நிம்மதியுடன் வாழ்கின்ற நிலை தோற்றுவிக்கப்படும் என கிழக்கு முதலமைச்சர் தெரிவித்துள்ளார்.

அரசிலிருந்து விலகியபின் எதிரியைப் போன்று தன்னைப் பார்ப்பதாக கரு ஜயசூரிய கவலை

sl-parlimant.jpgஅரசிலிருந்து விலகிய பின்னர் அரசிலுள்ளவர்கள் தன்னை ஒரு எதிரியைப் போல் கருதுவதாக விசனம் தெரிவித்த ஐ.தே.க. பிரதித் தலைவரும் எம்.பி.யுமான கரு ஜயசூரிய, அரசிலிருக்கும் போது வீரர்களைப் போலும் அரசை விட்டு விலகியவுடன் பகைவர்களைப் போலும் கருதும் கொள்கையொன்று அரசிடம் காணப்படுவதாகவும் தெரிவித்தார். சிரச ஊடகம் மீதான தாக்குதல் திட்டத்தை பொரளையிலுள்ள ஒரு வீட்டுத் தொகுதியில் வைத்து ஐ.தே.க.எம்.பி.க்களான கரு ஜயசூரியவும் ரவிகருணா நாயக்கவும் பாதாளக் குழுவினருடன் இணைந்து உருவாக்கியதாக செவ்வாய்க்கிழமை அமைச்சர் மஹிந்தானந்த அளுத்கமகே பாராளுமன்றத்தில் தெரிவித்த குற்றச்சாட்டு தொடர்பாக புதன்கிழமை பாராளுமன்றத்தில் விஷேட அறிக்கையொன்றை விடுத்து உரையாற்றுகையிலேயே இவ்வாறு தெரிவித்த கரு ஜயசூரிய மேலும் கூறியதாவது;

சிரச ஊடக நிறுவனம் மீது நடத்தப்பட்ட தாக்குதலுடன் என்னையும் ரவி எம்.பி.யையும் தொடர்புபடுத்தி அமைச்சர் மஹிந்தானந்த அளுத்கமமே குற்றஞ்சாட்டினார். நாங்கள் பாதாளக் குழுவினருடன் இணைந்து பொரளையில் வைத்து சதித்திட்டம் தீட்டியதாக கூறினார். சுகவீனமடைந்திருந்த நேசன் பத்திரிகையின் நிறைவேற்று அதிகாரி கிஷாந்த குரேவை பொரளையிலுள்ள வீட்டுத் தொகுதியொன்றிலுள்ள அவரின் வீட்டுக்கு சென்று நான் பார்வையிட்டேன். அப்போது அங்கு ரவி எம்.பி.யும் ஏற்கனவே வந்திருந்தார்.

நாங்கள் இருவரும் அங்கு எதிர்பாராத விதமாகவே சந்தித்தோம். அத்துடன், நான் பாதாளக் குழுவினருடன் தொடர்பு வைத்திருப்பவனும் அல்ல. அதேவேளை, யார் யாருக்கு பாதாள உலகக் குழுக்களுடன் தொடர்பென்பது எனக்குத் தெரியும். ஒரு நோயாளியை பார்க்கச் செல்வதற்குக் கூட இந்த நாட்டில் ஒரு மனிதனுக்கு உரிமையில்லையா? நான் அந்த வீட்டுக்கு சென்று வந்த பின்னர் அந்த வீட்டுக்கு பொலிஸார் சென்று விசாரணை நடத்தியுள்ளனர். எதிர்க்கட்சி உறுப்பினர்களின் நடமாட்டங்கள் தீவிரமாக கண்காணிக்கப்படுகின்றன. எம்மை பின் தொடர்கின்றனர். இது ஒரு அச்சுறுத்தலை ஏற்படுத்தும் விடயம். நான் அரசிலிருந்து விலகிய பின்னர் என்னை எதிரியைப் போல் பார்க்கின்றனர். அரசிலிருக்கும் போது வீரர்களாக போற்றப்படுபவர்கள் அரசிலிருந்து விலகியவுடன் பகைவர்களாகப் பார்க்கப்படுகின்றனர். இதை ஒரு கொள்கையாகவே அரசு வைத்துள்ளது.

இது அரசுக்கு குறுகிய கால நன்மைகளைக் கொடுக்கலாம். ஆனால், நீண்டகால பலன் விரோதமாகவே அமையும். மக்கள் இந்த நாட்டில் நல்லாட்சியையே எதிர்பார்க்கின்றனர். இவ்வாறான அச்சுறுத்தல் மிகுந்த ஆட்சியை மக்கள் ஏற்கவில்லை. நானும் 7 வருடங்கள் இராணுவ சீருடையை அணிந்தவன். எமக்கும் இந்த நாட்டின் மீது பற்றுள்ளது.பயங்கரவாதத்தை அழிக்கவேண்டுமென்பதில் எமக்கு மாறுபட்ட கருத்தில்லை. இராணுவ வெற்றிகளுக்கு நாம் தலை வணங்குகிறோம். சிரச மீதான தாக்குதலை நான் அருவருப்புடனேயே பார்க்கின்றேன். அதேபோன்று, எதிர்க்கட்சியினரை பின் தொடர்தல், கண்காணித்தல், அச்சுறுத்தல் போன்ற விடயங்களையும் வெறுக்கின்றேன். எனவே, இவை தொடர்பில் அரசு உரிய நடவடிக்கையெடுக்க வேண்டுமென எதிர்பார்க்கின்றேன்.

அநீதி, சர்வாதிகாரத்திற்கு எதிராக கிளர்ந்தெழ எதிரணித் தலைவர்கள் அழைப்பு

unp-reli.jpgஅராஜக ஆட்சி, அரச பயங்கரவாதத்துக்கு எதிராக மக்கள் சக்தி எழுச்சிபெற வேண்டுமெனவும் பேரழிவிலிருந்து நாட்டை மீட்டெடுக்க அனைத்து சக்திகளும் ஒரணியில் அணிதிரவேண்டுமெனவும் எதிரணித்தலைவர்கள் கூட்டாக அழைப்பு விடுத்தனர். ஐக்கிய தேசியக்கட்சி தலைமையில் ஒன்றிணைந்துள்ள ஸ்ரீலங்கா சுதந்திரக்கட்சி மக்கள் பிரிவு, ஸ்ரீலங்கா முஸ்லிம் காங்கிரஸ், ஜனநாயக மக்கள் முன்னணி, இடதுசாரி முன்னணி உள்ளிட்ட எதிரணிகளின் கூட்டமைப்பு நேற்று முன்தினம் தலைநகர் கொழும்பில் நடத்திய ”பொறுத்தது போதும்”  எனும் கருப்பொருளிலான எதிர்ப்பு ஆர்ப்பாட்டப் பேரணியில் கலந்து கொண்டு பேசுகையில் எதிர்க்கட்சித்தலைவர் ரணில் விக்கிரமசிங்க, மங்கள சமரவீர, ரவூப் ஹக்கீம், மனோ கணேசன், கலாநிதி விக்கிரமபாகு கருணாரட்ன ஆகியோர் நாட்டு மக்களுக்கு இந்த அழைப்பை விடுத்தனர்

எதிர்ப்புக்கூட்டம் 4 மணிக்கு ஆரம்பித்து ஒரு மணிநேரம் மட்டுமே இடம் பெற்றது. அதன் பின்னரே ஹைட்பாக்கிலிருந்து லிப்டன் சுற்றுவட்டம் வரை ஆர்ப்பாட்ட ஊர்வலம் இடம் பெற்றது ஊர்வலம் காரணமாக லிப்டன் சுற்றுவட்டம், யூனியன் பிளேஸ்,ரி.பி.ஜாயா மாவத்தை, பீன்ஸ் வீதி ஆகிய பாதைகளில் சுமார் ஒரு மணிநேரம் வரை போக்குவரத்துகள் தடைப்பட்டன. ஊர்வலத்தில் கலந்து கொண்டோர் லிப்ரன் சுற்றுவட்டத்தில் நிலத்தில் அமர்ந்து எதிர்ப்புக் கோஷங்களை எழுப்பிய பின்னர் கூட்டம் கலைந்தது.

எதிர்ப்புக் கூட்டத்தில் பிரதான உரையாற்றிய எதிர்க்கட்சித்தலைவர் ரணில் விக்கிரமசிங்க தமதுரையில் தெரிவித்ததாவது; நாட்டில் இன்று ஜனநாயகத்திற்கு பெரும் அச்சுறுத்தல் ஏற்பட்டுள்ளது. மக்களின் அடிப்படை உரிமைகள் பறிக்கப்பட்டுள்ளன. ஊடகத்துறை மீது தாக்குதல்களை மேற்கொள்ளுமளவுக்கு அரச பயங்கரவாதம் தலைவிரித்தாடத் தொடங்கியுள்ளது. நாட்டில் அநீதி அரசோச்சுகின்றது . அரசாங்கமே நீதிமன்றத்தை அவமதிக்கின்றது. மக்கள் பிரதிநிதிகளான பாராளுமன்ற உறுப்பினர்களுக்கு பாராளுமன்றத்துக்குக்கூட போக முடியாத விதத்தில் ஆளும் தரப்பினர் குழப்பம் விளைவிக்கின்றனர். ஊடக சுதந்திரம் முற்றாக மறுக்கப்பட்டுள்ளது.

எம்.ரி.வி., சிரச தொலைக்காட்சி நிலையம், அரசின் ஒத்துழைப்புடனேயே தீவைக்கப்பட்டுள்ளது. இதற்கு எம்மிடம் போதிய அத்தாட்சி கிடைத்துள்ளது. அண்மைக்காலமாக அமைச்சர்களான டலஸ் அழகப்பெருமவும் சம்பிக்கரணவக்கவும் தொடர்ச்சியாக புலிகளின் ரி.வி. என்று கடுமையாக விமர்சித்து வருகின்றனர். எம்.ரி.வி.நிலையத்துக்குள்ளிருந்து 81/2 கிலோ எடை கொண்ட கிளைமோர் குண்டும் கண்டுபிடிக்கப்பட்டுள்ளது. தாக்குதலுடன் தொடர்புபட்டவர்கள் பற்றிய விபரங்கள் கிடைத்துள்ளன. விரைவில் அவற்றை பகிரங்கப்படுத்துவோம் . ராஜபக்ஷ அரசு யுத்தத்தை காட்டி நாட்டுமக்களை ஏமாற்றிக்கொண்டிருக்கின்றது.யுத்தத்தை வைத்துக்கொண்டு நாட்டை அராஜகத்தின் பக்கம் கொண்டு செல்ல அனுமதிக்க முடியாது. நாம் பொறுமைகாத்தது போதும் நாட்டை தொடர்ந்து அழிவு நிலைக்குக் கொண்டு செல்ல இடமளிக்கக் கூடாது. இன, மத, மொழி, கட்சி பேதங்களை மறந்து தேசத்தையும், மக்களையும் காப்பாற்ற அனைவரும் ஒன்றிணைந்து போராடமுன்வரவேண்டும். இந்தப் போராட்டம் மக்கள் எழுச்சிப் போராட்டமாக நாடு தழுவிய மட்டத்தில் முன்கொண்டு செல்லப்படும். அரச பயங்கரவாதத்தையும் அராஜகத்தையும் ஒழித்துக்கட்டி ராஜபக்ஷ குடும்ப ஆட்சியை விரட்டியடிக்கும் வரை நாம் இனிமேல் ஓயப்போவதில்லை என ரணில் விக்கிரமசிங்க சூளுரைத்தார

இஸ்ரேலிய பொருட்களை பகிஷ்கரிக்குமாறு ஜம்இய்யதுல் உலமா சபை வேண்டுகோள்

gaasa.jpgஇஸ்ரேலர்களின் மனிதாபிமானமற்ற குரூரமான தாக்குதல்களுக்கு முகம் கொடுத்திருக்கும் பலஸ்தீன மக்களுக்கு ஆதரவு நல்கும் வகையில் இஸ்ரேலிய உற்பத்திகளைப் பகிஷ்கரிக்குமாறு அகில இலங்கை ஜம்இய்யதுல் உலமா சபை வேண்டும் கோள்விடுத்துள்ளது. உலமா சபையின் உதவிப் பொதுச் செயலாளர் மெளலவி எம்.எஸ்.எம். தாஸிம் கையெழுத்திட்டு விடுத்திருக்கும் அறிக்கையிலேயே இந்த வேண்டுகோள் விடுக்கப்பட்டிருக்கப்பட்டிருக்கிறது.

அதேநேரம், பலஸ்தீன மக்களின் இன்றைய அவல நிலைய தொடர்பாக  வெள்ளிக் கிழமை ஜும்ஆ பிரசங்கங்களை நிகழ்த்துமாறும் சகல உலமாக்களையும் உலமா சபை அறிவுறுத்தியுள்ளது. உலமா சபை விடுத்துள்ள அறிக்கை வருமாறு,

பலஸ்தீனர்கள் மீதான தாக்குதலை நாம் வன்மையாகக் கண்டிப்பதோடு, இதனை உடன் நிறுத்த ஆவண செய்யுமாறு உலக நாடுகளையும், சம்பந்தப்பட்ட நிறுவனங்களையும் வேண்டிக் கொள்கின்றோம். பலஸ்தீனர்கள் ஒரு ஜீவமரணப் போருக்கு தள்ளப்பட்டுள்ள இந்த நிர்க்கதியான நிலையில் சர்வதேச முஸ்லிம்கள் மட்டுமன்றி முஸ்லிமல்லாதோரும் குரல் கொடுக்கின்றனர்.

இந்தப் பின்னணியில், அகில இலங்கை ஜம்இய்யத்துல் உலமாவின் தலைமையகத்தில் 04.01. 2009ம் திகதி ஞாயிற்றுக்கிழமை மாலை, அதன் தலைவர் அஷ்-ஷைக் முப்ஃதி எம். ஐ. எம். றிஸ்வி தலைமையில் நடைபெற்ற, நாட்டின் பல முஸ்லிம் இயக்கங்களினதும், அரச சார்பற்ற நிறுவனங்களினதும் பிரதிநிதிகளுடனான “பலஸ்தீன முஸ்லிம்களின் அவலநிலை” தொடர்பான, அவசர ஆலோசனைக் கூட்டத்தைத் தொடர்ந்து, அகில இலங்கை ஜம்இய்யத்துல் உலமா பின்வரும் தீர்மானங்களை எடுத்தது.

01. 09.01.2009ம் திகதி வெள்ளிக் கிழமை நாடளாவிய ரீதியில் நாட்டின் அனைத்து ஜும்ஆ மஸ்ஜித்களிலும் கதீப்மார்கள் தமது குத்பாப் பேருரைகளை “பலஸ்தின் மக்களின் இன்றைய அவலநிலை”யை மையப்படுத்தியே நிகழ்த்த ஒழுங்குகளை மேற்கொள்ளுமாறும், விசேடமாக வெள்ளிக்கிழமையில் துஆக்கள் அங்கீகரிக்கப்படும் நேரமாக இருப்பதால் அனைவரும் அதிகமதிகமாக துஆக்களில் ஈடுபடுமாறும் கேட்டுக் கொள்கிறது.

02. ஜவேளைத் தொழுகைகளுக்குப் பின்னர் குனூத் நாஸிலாவை அமுல்படுத்துமாறும், அதிகமதிகமாக பலஸ்தீன மக்களின் விடுதலைக்காக துஆக்களில் ஈடுபடுமாறு வேண்டுகோள்.

03. இந்த அத்துமீறல்களுக்கும், அநீதிகளுக்கும் எதிராக அகில இலங்கை ஜம்இய்யத்துல் உலமாவின் தலைமையில், எதிர்வரும் 09.01.2009 ஆம் திகதி வெள்ளிக்கிழமை அஸர் தொழுகையைத் தொடர்ந்து, இலங்கை முஸ்லிம்களின் ஒருமித்த கண்டனத்தை வெளிப்படுத்துவதற்காக பிரமாண்டமானதொரு கூட்டத்தை கொழும்பு சாஹிராக் கல்லூரி வளாகத்தில் நடாத்துவது எனவும், நாட்டின் பல பாகங்களிலும் உள்ள முஸ்லிம்கள் இதுவிடயத்தில் தங்களது எதிர்ப்பையும், கண்டனத்தையும் தெரிவிக்குமாறும், அவ்வமயம், ஷரீஆவின் வரையறைகளைப் பேணியும், யாருக்கும், பொதுச் சொத்துக்களுக்கும் எதுவித இடையூறும் விளைவிக்காமலும் மிகவும் அவதானமாக நடந்து கொள்ளுமாறும் முஸ்லிம் சமூகத்தை வேண்டிக் கொள்கிறது.

04. உலகை அடக்கியாள விரும்பும் யூதக் கும்பல்களின் அட்டகாசத்தை அடக்கும் வண்ணம் அவர்களை பொருளாதார ரீதியிலும், வேறு எந்த வழிகளிலெல்லாம் பலவீனமடையச் செய்ய முடியுமோ அவ்வழிகளைக் கையாள்தல் வேண்டும். அதன் முதற்படியாக இஸ்ரேலுக்கும், உலகில் பலபாகங்களிலும் வாழும் யூத இரத்த வெறிக் காட்டேரிகளுக்கும் செல்வத்தை தேடிக் கொடுக்கும் அனைத்து நாடுகளினதும் உற்பத்திப் பொருட்களையும், உற்பத்தி நிறுவனங்களையும் நாட்டு முஸ்லிம் சமுகம் பகிஷ்கரிக்க வேண்டும் எனவும் அகில இலங்கை ஜம்இய்யத்துல் உலமா வேண்டிக் கொள்கிறது.

துரித விசாரணைக்கு அரசாங்கம் பணிப்பு; நற்பெயருக்கு களங்கம் ஏற்படுத்துவதற்கு சதி

laksman-yaappa.jpg“சண்டே லீடர்” பத்திரிகையின் பிரதம ஆசிரியர் லசந்தவிக்கிரமதுங்க சுட்டுப் படுகொலை செய்யப்பட்டுள்ள சம்பவத்தை அரசாங்கம் வன்மையாகக் கண்டித்துள்ளது. தகவல், ஊடகத்துறை அமைச்சர்களான அனுரபிரிய தர்ஷணயாப்பா, லக்ஷ்மன் யாப்பா அபேவர்தன ஆகியோர் இக் கண்டனத்தை நேற்று வெளியிட்டனர். அமைச்சரவை முடிவுகளை அறிவிக்கும் வாராந்த செய்தியாளர் மாநாடு அரசாங்க தகவல் திணைக்களத்தில் நேற்று நடைபெற்ற போது, இச் சம்பவத்தை அரசாங்கம் வன்மையாகக் கண்டிப்பதாக இரு அமைச்சர்களும் குறிப்பிட்டனர்.

இது தொடர்பாக அமைச்சர்கள் மேலும் குறிப்பிடுகையில், சண்டே லீடர் பத்திரிகையின் பிரதம ஆசிரியரான லசந்த விக்கிரமதுங்க ஜனாதிபதியுடனும், அரசாங்கத்துடனும் நல்லுறவைப் பேணி வந்தார். அவர், அவரது திருமண வைபவத்திற்கு அழைத்திருந்த முக்கியஸ்தர்களில் ஜனாதிபதியே பிரதானமானவர். அரசாங்கத்திற்கும், அவருக்குமிடையில் தனிப்பட்ட முறையில் எதுவிதமான பிரச்சினையுமே கிடையாது. இப்படுகொலைச் சம்பவத்தை நாம் வன்மையாகக் கண்டிக்கிறோம்.

இச் சம்பவத்தில் தொடர்புள்ளவர்களை தேடிக் கைது செய்து சட்டத்தின் முன் ஆஜர்படுத்துவதற்குத் தேவையான சகல நடவடிக்கைகளும் எடுக்கப்பட்டுள்ளன. பொலிஸாருக்கு தேவையான அறிவுறுத்தல்களும் வழங்கப்பட்டுள்ளன.

புனிதத் தலமான தலதா மாளிகையின் புகைப்படத்தை தேர்தல் சுவரொட்டிக்குப் பயன்படுத்துவது முறையாகுமா?

vote.jpgமத்திய மாகாண சபைத் தேர்தலில் போட்டியிடும் வேட்பாளர்களில் ஒருவரான தலதா மாளிகையின் முன்னாள் தியவதன நிலமே நிரஞ்சன் விஜயரட்ன (ஐ. தே. க.) அவரது புகைப்படத்துடன் கண்டி ஸ்ரீ தலதா மாளிகையின் படத்தையும் புனித தந்தசின்னப் பேழையையும் இணைத்து சுவரொட்டிகள் தயாரிக்கப்பட்டிருப்பதை மல்வத்தை பீடாதிபதி திப்பட்டுவாவே ஸ்ரீ சுமங்கல தேரர் கண்டித்தார்.

முன்னாள் பிரதி பாதுகாப்பு அமைச்சர் ஜெனரல் அனுருத்த ரத்வத்தை அவரது புதல்வரும் மத்திய மாகாண சபைத் தேர்தலில் ஐ. ம. சு. கூட்டமைப்பு சார்பில் போட்டியிடும் லொகான் ரத்வத்தை ஆகிய இருவரும் (முதலாம் திகதி) மல்வத்தை பீடாதிபதியை அவரது வாசஸ்தலத்திற்குச் சென்று ஆசீர்வாதம் பெறச் சென்ற வேளையிலேயே மகாநாயக்கர் மேற்கண்டவாறு அதிருப்தி தெரிவித்தார். அங்கு அவர் மேலும் தெரிவித்ததாவது :- தலதா மாளிகையையும் புனித தந்த சின்னப் பேழையையும் தமது அரசியல் நடவடிக்கைகளுக்காக தலதா மாளிகையின் நிலமேயாக இருந்தமைக்காக அவற்றைப் பிரயோகிக்க இயலாது. இந்தச் சுவரொட்டிகள் மலசல கூடங்கள் உட்பட பல இடங்களில் ஒட்டப்படுகின்றன. இந்தச் செயலானது பெளத்த சமயத்திற்கு அபகீர்த்தியை ஏற்படுத்துவதாகவே அமையும் எனக் கருதலாம்.

எனவே இந்த நடவடிக்கை உடனடியாக நிறுத்தப்பட வேண்டுமென அவர் அவ்விருவரிடமும் எடுத்துக்காட்டினார். இதேபோன்று அஸ்கிரிய பீடாதிபதி உடுகம ஸ்ரீ புத்தரக்கித்த தேரரும் ஐ. தே. கட்சி மாகாண சபை வேட்பாளரைக் குறைகூறியிருக்கிறார்.

பதிவு செய்யப்படாத நிதி நிறுவனங்களை முடக்க மத்திய வங்கி எடுத்துள்ள நடவடிக்கை என்ன? – ஜே.வி.பி. சபையில் கேள்வி.

sl-parlimant.jpg“கோல் டன் கீ’ கடனட்டை நிறுவனம் தொடர்பாக ஜே.வி.பி.யின் பாராளுமன்ற குழுத்தலைவரான அநுரகுமார திஸாநாயக்க எழுப்பிய கேள்வியால் புதன்கிழமை சபையில் பெரும் சர்ச்சை ஏற்பட்டது. பாராளுமன்றத்தில் நேற்று முன்தினம் விசேட அறிக்கையொன்றை விடுத்து பேசிய அநுரகுமார திஸாநாயக்க பதிவு செய்யப்படாத நிதி நிறுவனங்களின் செயற்பாடுகளை நிறுத்த மத்திய வங்கி எடுத்திருக்கும் நடவடிக்கை என்ன? கோல்டன் கீ கடனட்டை நிறுவனத்தின் வைப்பீட்டாளர்கள் மற்றும் ஊழியர்கள் தொடர்பாக அரசாங்கம் எடுக்கும் நடவடிக்கை என்ன? போன்ற கேள்விகளை எழுப்பியிருந்தார். கேட்கப்பட்ட கேள்விகள் தொடர்பாக அரசாங்கம் உரிய நடவடிக்கைகளை மேற்கொண்டிருப்பதாக சுட்டிக் காட்டி பிரதி நிதியமைச்சர் கேள்விக்கு சுருக்கமான பதிலை வழங்கியதுடன், விரிவான பதிலை அறிக்கையாக சபைக்கு ஆற்றுப் படுத்துவதாகவும் கூறினார்.

இதேநேரம், பிரதி நிதியமைச்சரிடம் மீண்டுமொரு விளக்கத்தை கோரிய அநுரகுமார திஸாநாயக்க எம்.பி., “நிதி நிறுவனங்களில் மோசடி ஏற்பட்டு மூடி விட்ட பின்னர், அந்த நிறுவனங்கள் பதிவு செய்யப்பட்டதொன்றல்லவென மத்திய வங்கி கூறுகிறது. ஏற்கனவே சக்வித்தி மோசடியின் போது மத்திய வங்கி இதையே கூறியது. தற்போது, கோல்டன் கீ கடனட்டை நிறுவனம் மூடப்பட்டதும் இதையே மத்திய வங்கி கூறுகிறது. 2006 ஆம் ஆண்டில் பொது நிறுவனங்கள் பற்றிய பாராளுமன்றக் குழுவின் அறிக்கை சமர்ப்பிக்கப்பட்ட போதே, பதிவு செய்யப்படாத நிதி நிறுவனங்கள் பற்றி ஆராய்ந்து அறிக்கை சமர்ப்பிக்க மத்திய வங்கியின் ஆளுநரான அஜித் நிவாட் கப்ரால் 2 மாதகால அவகாசம் கோறியிருந்தார். ஆனால் இதுவரை அவ்வாறான அறிக்கை எதுவும் சமர்ப்பிக்கப்படவில்லை’ என்று சுட்டிக்காட்டினார்.

எனவே, கோல்டன் கீ விவகாரத்தில், வைப்பீட்டாளர்களும் அந்த நிறுவனத்தின் ஊழியர்களும் அத்துடன் வங்கியாளர்களும் பாதிக்கப்பட்டிருப்பதால் இந்த விடயம் தொடர்பில் மத்திய வங்கி மற்றும் அரசாங்கத்தால் எடுக்கப்பட்டிருக்கும் நடவடிக்கைகள் என்னவென்று அது பற்றிய பதிலை மட்டும் சபைக்கு தெரிவிக்குமாறு பிரதி நிதியமைச்சரிடம் கோரினார். இதற்கு பதிலளிக்கும் வகையில் பேசிய பிரதி நிதியமைச்சர் ரஞ்சித் சியம்பலாப்பிட்டிய, தான் ஏற்கனவே பதிலை சபைக்கு சமர்ப்பித்து விட்டதாகக் கூறியதுடன் மத்திய வங்கியால் பதிவு செய்யப்பட்ட நிதி நிறுவனங்களின் பெயர் விபரங்கள் வெளியிடப் பட்டதன் மூலம், ஏனையவை பதிவு செய்யப்படாத நிறுவனங்களாகவே பொருள்படுமென சுட்டிக் காட்டினார். பதிவு செய்யப்படாத நிறுவனங்களின் பெயர் விபரங்களை வெளியிட சென்று, அதில் ஏதாவதொரு பதிவு செய்யப்படாத நிறுவனத்தின் பெயர் உள்வாங்கப்படவில்லையெனில் அந்த நிறுவனம் பதிவு செய்த நிறுவனமாக அர்த்தப்படுத்தப்பட்டு விடுமென்று பிரதி அமைச்சர் சியம்பலாபிட்டிய தெரிவித்தார். எனினும் அந்த பதிலில் திருப்திப் படாத அநுரகுமார திஸாநாயக்க, கோல்டன் கீ விவகாரம் தொடர்பாக எடுக்கப்பட்டிருக்கும் நடவடிக்கைகள் என்னவென்பதை மட்டும் பதிலாக தருமாறு கோரினார்.

‘காஸா தாக்குதல்’ பதவியேற்கமுன் ஒபாமா இஸ்ரேலுக்கு அளித்துள்ள பரிசு. – சவாஹிரி

israeli-aircraft.jpgஅமெ ரிக்காவின் புதிய ஜனாதிபதி பராக் ஒபாமா இஸ்ரேலின் நண்பரென்றும் காஸா மீதான தாக்குதலை நிறுத்த முயற்சிக்கமாட்டாரெனவும் அல்-கைதாவின் இரண்டாம் மட்டத்தலைவர் அய்மன் அல்ஸவாஹிரி தெரிவித்துள்ளார். இவரின் உரையடங்கிய ஒலிநாடா அல் கைதாவின் இணையத்தளத்தில் வெளியானது. காஸா மீதான தாக்குதல் நடத்தப்பட்ட பின்னர் அல்-கைதாவால் வெளியிடப்பட்ட முதல் ஒலி நாடா இதுவாகும்.

அல்-கைதாவின் இரண்டாம் மட்டத் தலைவர் அய்மன் ஸவாஹிரி இதில் அமெரிக்கா இஸ்ரேல் மற்றும் எகிப்திய ஜனாதிபதி ஹொஸ்னி முபாரக் ஆகியோரைக் கடுமையாக விமர்சித்துள்ளார். அந்த ஒலி நாடாவில் தெரிவிக்கப்பட்டதாவது :- பராக் ஒபாமா அமெரிக்காவின் வெளிநாட்டுக் கொள்கைகளை மாற்றுவார். முஸ்லிம்களுக்கு சாதகமாக நடந்துகொள்வார் என்ற எதிர்பார்ப்பெல்லாம் போலியானது. ஒபாமா எப்போதும் இஸ்ரேலின் நண்பர். காஸா தாக்குதல் அவர் இஸ்ரேலுக்குக் வழங்கியுள்ள பரிசு.

காஸா மக்களையும், குழந்தைகளையும் இஸ்ரேலின் தாக்குதலிலிருந்து காப்பாற்ற அவர் முன்வரமாட்டார். இஹ்வால் முஸ்லிம்களை அடக்கியாள நினைக்கும் எகிப்திய ஜனாதிபதி முஸ்லிம்களின் ஒட்டு மொத்த துரோகி இஸ்ரேலின் கொலைகளுக்கான விளைவுகளை டெல்அவிவ் விரைவில் எதிர்கொள்ளுமெனவும் அவ்வுரை யிலே ஸவாஹிரி கூறியுள்ளார். அரபு ஆட்சியாளர்களையும் அல்-கைதா சாடியுள்ளது. பலஸ்தீனச் சிறுவர்கள், குழந்தைகள் முதியோர்கள் கொல்லப்படுவதானது உலகெங்குமுள்ள யூதர்களைக் கொலை செய்யப்படவுள்ளதை நியாயப்படுத்தியுள்ளதாக காஸாவை ஆளும் ஹமாஸ் தெரிவித்துள்ளதும் தெரிந்தது.

கிளிநொச்சி வீழ்ச்சி தற்காலிகமானதே. மீண்டும் எங்களிடமே கிளிநொச்சி வந்து சேரும் – பா.நடேசன் நம்பிக்கை

nadesan.jpgஇது தொடர்பாக புலிகள் ஆதரவு தமிழ்நெட் இணையதளத்திற்கு அவர் அளித்துள்ள பேட்டியில், கிளிநொச்சியில்தான் வரலாற்றுச் சிறப்பு வாய்ந்த தோல்விகளைத் தழுவியுள்ளது இலங்கை ராணுவம். எனவே மீண்டும் கிளிநொச்சி எங்களிடமே வந்து சேரும். அந்த நம்பிக்கை எங்களுக்கு உள்ளது. உலக நாடுகளின் ஆயுத பலத்தோடு இலங்கை ராணுவம் எங்களுடன் மோதி வருகிறது. ஆனால் மக்களின் ஆதரவுடன் மட்டும் நாங்கள் போராடி வருகிறோம். எனவே இந்தப் போரில் எங்களுக்கே இறுதி வெற்றி கிடைக்கும் என்ற நம்பிக்கை எங்களுக்கு பலமாக உள்ளது.ஈழத்தமிழர்கள் யாருமற்ற அனாதைகள் அல்ல. அவர்களுக்கு துன்பம் ஏற்படும் போது 7 கோடி தமிழர்கள் தமிழ் நாட்டில் இருந்து குரல் கொடுப்பார்கள்.

கிளிநொச்சியை ராணுவம் பிடித்துள்ளதை விடுதலைப்புலிகளுக்கு ஏற்பட்ட பின்னடைவாக நாங்கள் பார்க்கவில்லை. போரில் இழப்புகளை குறைப்பதற்காக பின் வாங்கி செல்வது என்பது ஒரு தந்திரம். தமிழ் இனத்தை பூண்டோடு அழிக்கவே இலங்கை அரசு நினைக்கிறது.  கிளிநொச்சியில் உள்ள மக்கள் இப்போது வன்னி பகுதியில் பாதுகாப்பான இடத்துக்கு இடம் பெயர்ந்துள்ளனர். இழந்த பகுதிகளை விடுதலைப் புலிகள் மீண்டும் கைப்பற்றுவார்கள்.

இலங்கை அரசுக்கு இந்தியா ராணுவ உதவிக ளை நிறுத்தி எங்கள் மக்களின் விடுதலைப் போராட்டத்தை அங்கீகரிக்க வேண்டும். புலிகள் மீதான தடையை நீக்க வேண்டும். உலக தமிழினம் ஒன்றுபட்டு எங்கள் விடுதலைப் போராட்டத்துக்கு ஆதரவு அளிக்க வேண்டும். தமிழ் மக்களிடமிருந்து எங்களை அன்னியப்படுத்தி விடலாம் என இலங்கை அரசு நினைக்கிறது. ஆனால் இது வெற்றி பெறாது. ஊடுறுவல் படையின் ஏஜென்டுகள் மற்றும் பொம்மை மனிதர்களின் முயற்சிகள் பலிக்காது.இலங்கை ஆட்சியாளர்களின் அடக்குமுறையிலிருந்து தமிழ் மக்களை மட்டுமல்லாது சிங்கள மக்களையும் கூட நாங்கள் காத்துள்ளோம். சிங்கள மக்களுக்காவும்தான் நாங்கள் குரல் கொடுத்து வருகிறோம் என்றார் அவர்.

இந்திய விமானம் ஊடுருவியதாக வெளியான செய்தி பொய் – பிரதமர்

air.jpgகிளி நொச்சியை படையினர் கைப்பற்றும் போது இந்திய விமானங்கள் இலங்கை வான்பரப்புக்குள் அத்துமீறி நுழைந்து நோட்டம்விட்டதாக வெளிவந்துள்ள செய்தியை பிரதமர் ரத்னசிறி விக்கிரமநாயக்கா மறுத்தார். பாராளுமன்றத்தில் நேற்று ஜே.வி.பி. பாராளுமன்ற உறுப்பினர் அனுரகுமார திஸாநாயக்க பிரதமரிடம் மேற்படி விடயம் தொடர்பான கேள்வியொன்றை கேட்டார்.

இந்திய விமானங்கள் கிளிநொச்சி வான்பரப்புக்குள் பறந்தவாறு நோட்டம்விட்டதாக செய்திகள் வெளியாகியுள்ளன. இவ்வாறு இலங்கை வான்பரப்புக்குள் இந்திய உளவு விமானங்களுக்கு வருவதற்கு அனுமதித்தது யார்? இவ்வாறான செய்தி பற்றி விளக்கமளிக்க முடியுமா என அனுரகுமார திஸாநாயக்க எம். பி. கேள்வி எழுப்பினார்.

பிரதமர் இதற்கு பதிலளிக்க வேண்டும் எனவும் கேட்டுக் கொண்டார்.

பதிலளிப்பதற்காக எழுந்த பிரதமர் ரத்னசிறி விக்கிரம நாயக்க “பொய்யான செய்தி” எனக் கூறிவிட்டு அமர்ந்தார்.