உள்நாட்டுச் செய்திகள்

Sunday, January 23, 2022

உள்நாட்டுச் செய்திகள்

“மின்சார விநியோகம் தொடர்பான கடந்தகால செயற்பாடுகளுக்கு என்னால் பொறுப்புக்கூற முடியாது எனினும் எதிர்கால செயற்பாடுகள் ஒவ்வொன்றுக்கும் என்னால் பொறுப்பு கூற முடியும்” – பாராளுமன்றில் அமைச்சர் டளஸ் அழகப்பெரும !

“மின்சார விநியோகம் தொடர்பான கடந்தகால செயற்பாடுகளுக்கு என்னால் பொறுப்புக்கூற முடியாது எனினும் எதிர்கால செயற்பாடுகள் ஒவ்வொன்றுக்கும் என்னால் பொறுப்பு கூற முடியும்”  என அமைச்சர் டளஸ் அழகப்பெரும பாராளுமன்றத்தில் தெரிவித்துள்ளார்.

எரிபொருள் மூலம் மேற்கொள்ளப்படும் மின் உற்பத்திக்கு பெரும் செலவு ஏற்படுவதால் 2025 ஆம் ஆண்டுக்குள் தற்போது 32 வீதமாக உள்ள அத்தகைய உற்பத்தியை 05 வீதமாக குறைப்பதற்கும் நடவடிக்கை எடுக்கப்பட்டுள்ளதாகவும் அவர் தெரிவித்தார்.

கடந்த 2015 தொடக்கம் 2019 வரையான கால கட்டங்களில் மின்சார சபைக்கு பில்லியன் கணக்கில் நட்டம் ஏற்பட்டுள்ளதாகவும் அவற்றை நிவர்த்தி செய்து இலாபம் ஈட்டும் வகையில் மின்சார சபையை பலப்படுத்துவதற்கு நடவடிக்கை மேற்கொள்ளப்படுமென்றும் அவர் தெரிவித்தார்.

பாராளுமன்றத்தில் நேற்று (08.10.2020) வாய்மூல விடைக்கான வினாக்கள் வேளையில் சமிந்த விஜேசிறி எம்.பி.எழுப்பிய கேள்வி ஒன்றுக்கு பதிலளிக்கையிலேயே அமைச்சர் இவ்வாறு தெரிவித்தார். இது தொடர்பில் அமைச்சர் மேலும் தெரிவிக்கையில்; மின்சாரம் உற்பத்தி செய்யப்பட்டு அவை பயன்பாட்டுக்கு எடுக்கப்படும் வரை 8 வீதமான மின்சாரம் வீண் விரயமாக்கப்பட்டுள்ளது.அவற்றை நிவர்த்தி செய்வதற்கு நடவடிக்கை எடுக்கப்படும்.

அதேவேளை கெரவலப்பிட்டிய மின் உற்பத்தி நிலையத்தில் இயற்கை எரிவாயு மூலம் 300 மெகாவாட் மின்சாரத்தை உற்பத்தி செய்வதற்கும் நடவடிக்கை எடுக்கப்பட்டுள்ளது. அதற்கான அனுமதியை அமைச்சரவை வழங்கியுள்ளது.

நிலக்கரி கொள்வனவில் கடந்த காலங்களில் மோசடி ஏற்பட்டுள்ளமை தொடர்பில் நேற்று முன்தினம் குழுவில் விரிவாக ஆராயப்பட்டது. அது தொடர்பில் சம்பந்தப்பட்ட நிறுவனத்தின் தலைவர் மற்றும் உயரதிகாரிகள் எதிராக சட்ட நடவடிக்கை எடுப்பதற்கும் கோப் குழு தீர்மானித்துள்ளது. கடந்த அரசாங்கத்தில் காலத்தில் புதிதாக மின் உற்பத்தி நிலையங்களை உருவாக்காமையே மின்சார சபை நட்டம் ஏற்படுவதற்கு முக்கிய காரணமாகும்.

அதேவேளை மின் இணைப்புக்கான விநியோக பாதைகள் சுத்திகரிப்பு, மற்றும் மின்சார இணைப்பு வழங்குதல் இணைப்பை துண்டித்தல் போன்ற நடவடிக்கைகளுக்கு கடந்த காலங்களில் வெளியாரே நியமிக்கப்பட்டனர். மின்சார சபை அதற்காக பெரும் செலவை எதிர்நோக்கியது. அதனால் மின்சார சபை ஊழியர்களும் பெரும் பாதிப்புக்குள்ளாகியுள்ளனர்.

எவ்வாறாயினும் கடந்தகால செயற்பாடுகளுக்கு என்னால் பொறுப்புக்கூற முடியாது எனினும் எதிர்கால செயற்பாடுகள் ஒவ்வொன்றுக்கும் என்னால் பொறுப்பு கூற முடியும் என்றும் அவர் மேலும் தெரிவித்தார்.

“இலங்கைத்தீவில் தமிழ் மக்கள் ஏற்றுக்கொள்ளும் நிலைத்து நிற்கக் கூடிய அரசியல் தீர்வை எட்டுவதற்கு பொறுப்புக்கூறும் கடப்பாடு இந்தியாவிற்கு உள்ளது ” – பாராளுமன்றில் கஜேந்திரகுமார் பொன்னம்பலம் !

“இலங்கைத்தீவில் தமிழ் மக்கள் ஏற்றுக்கொள்ளும் நிலைத்து நிற்கக் கூடிய அரசியல் தீர்வை எட்டுவதற்கு பொறுப்புக்கூறும் கடப்பாடு இந்தியாவிற்கு உள்ளது ” என தமிழ்த் தேசிய மக்கள் முன்னணியின் தலைவரும் யாழ்.மாவட்ட பாராளுமன்ற உறுப்பினருமான கஜேந்திரகுமார் பொன்னம்பலம் தெரிவித்தார்.

பாராளுமன்றத்தில் நேற்று (08.10.2020) உரையாற்றும்போதே அவர் மேற்கண்டவாறு கூறினார்.

அவர் பாராளுமன்றத்தில் மேலும் தெரிவித்ததாவது:-

“தமிழ் மக்களைப் பொறுத்தவரையிலே அவர்கள் சம்பந்தப்பட்ட மிக முக்கியமான சர்வதேச உடன்படிக்கைகளில் ஒன்று இந்தியாவுக்கும் இலங்கைக்கும் இடையில் கைச்சாத்திடப்பட்ட இந்திய – இலங்கை உடன்படிக்கையாகும். தமிழ் மக்களின் தேசியப் பிரச்சனைக்குத் தீர்வு காண்பதே இந்த உடன்படிக்கையின் முக்கிய குறிக்கோளாக அமைந்திருந்தது.

தமிழ் மக்கள் இந்த உடன்படிக்கையின் ஒரு தரப்பினராக இணைத்துக்கொள்ளப்படாதது இந்த உடன்படிக்கையின் மாபெரும் குறைபாடாக இருக்கிறது. தமிழ் மக்கள் இந்த உடன்படிக்கையின் ஒரு தரப்பாக தவிர்க்கப்பட்டதால் தமிழ் மக்களின் சார்பில் இந்த உடன்படிக்கையில் கைச்சாத்திட்ட இந்தியாவுக்கு இந்த உடன்படிக்கை முழுமையாக அமுலாக்கப்படுவதை உறுதிப்படுத்துவதற்கான மேலதிகமான ஒரு கடப்பாடு உள்ளது. ஆனால், உண்மை நிலவரமோ வேறு.

அன்று உடன்படிக்கையில் கைச்சாத்திட்ட இலங்கை அரசோ அந்த உடன்படிக்கையையும், அதில் அடங்கிய சரத்துக்களையும் தான் அமுலாக்குவதாகக் கூறிக்கொண்டு அரசமைப்பின் 13ஆவது திருத்தத்தையும், மாகாண சபைகள் சட்டத்தையும் அறிமுகப்படுத்தியது.

இந்தச் சட்டங்கள் நாடாளுமன்றத்தில் சமர்ப்பிக்கப்பட இருந்தபோது, அப்போதிருந்த முதன்மையான தமிழ்க் கட்சியான தமிழர் விடுதலைக் கூட்டணி அப்போதைய இந்தியப் பிரதமர் ராஜிவ் காந்திக்கு கடிதம் ஒன்றை அனுப்பியிருந்தது. 1987ஆம் ஆண்டு ஒக்டோபர் மாதம் 28ஆம் திகதி சிவசிதம்பரம், அமிர்தலிங்கம் ஆகியோருடன் இச்சபையில் அங்கம் வகிக்கும் சம்பந்தனும் கையொப்பமிட்டு அனுப்பிய அந்தக் கடிதத்தில் கீழ்க்கண்டவாறு குறிப்பிடப்பட்டிருக்கின்றது.

‘இந்திய நிபுணர்களின் பங்குபற்றுதலின்றி இந்தச் சட்டமூலம் வரையப்பட்டு நம் மீது திணிக்கும் முயற்சிகள் மேற்கொள்ளப்படுகின்றன. இந்தச் சட்ட முன்வரைபை பகிரங்கப்படுவதற்கு முன் இந்திய அரசிடம் அதன் பிரதி சமர்ப்பிக்கப்படும் என்றே தமிழர் விடுதலைக்கு கூட்டணி எதிர்பார்த்திருந்தது. இவ்வாறு நடைபெறாது என நாம் கருதுவதால் 1987ஆம் ஆண்டு செப்டெம்பர் மாதம் 29ஆம் திகதி ஜனாதிபதி ஜயவர்தனவை நாம் சந்தித்து இந்தியாவுக்குத் தெரியப்படுத்தாமலே இந்தச் சட்டமூலம் அரச வர்த்தமானியில் பிரசுரிக்கப்பட்டுள்ளமையிட்டு நாம் கவலையடைகின்றோம் எனத் தெரிவித்தோம்.

இது இந்தியாவை ஒரு தரப்பாக மதிக்காமல் நடத்துவதாக மாத்திரமன்றி, இந்த ஒப்பந்தத்தில் உள்ள பந்தி 2.15ஐ மீறுவதாகவும் அமைந்துள்ளது’ – அந்தக் கடிதத்தில் குறிப்பிடப்பட்டிருக்கின்றது.

அக்கடிதத்தின் முடிவில், ‘இக்காரணங்களுக்காக தமிழ் மக்கள் திருப்தியடையும் வகையில் இவ்விடயங்களுக்குத் தீர்வு காணப்படாமல் , மேற்படி சட்டமூலங்களை இப்போதுள்ள வடிவத்தில் நாடாளுமன்றத்தில் சமர்ப்பிக்க வேண்டாம் என ஜனாதிபதி ஜயவர்தனவை வற்புறுத்துமாறு தயவாகக் கேட்டுக்கொள்கிறோம்’ எனவும் குறிப்பிட்டப்பட்டிருந்தது.

ஆகவே, இந்திய – இலங்கை உடன்படிக்கைக்கும் 13ஆவது திருத்தச் சட்டத்துக்கும் இடையில் பாரிய இடைவெளி காணப்படுகின்றது. நாம் 13ஆவது திருத்தச் சட்டத்தை நிராகரிக்கின்றோம். தமிழ் மக்களின் தேசியப் பிரச்சினைக்குத் தீர்வு காணும் விடயத்தில் இது ஓர் ஆரம்பப்புள்ளியாகக் கூட அமையவில்லை என்ற காரணத்தினாலேயே நாம் 13ஆவது திருத்தச் சட்டத்தை நிராகரிக்கின்றோம்.

தமிழ் மக்கள் 13ஆவது திருத்தச் சட்டத்தை ஏற்றுக்கொள்ளவில்லை என்பதைக் காரணம் காட்டி இந்த ஒப்பந்தத்தை கிழித்தெறிவதற்கு இதனை ஒரு சந்தர்ப்பமாக ஆளும்தரப்பினரும், ஐனாதிபதியும், பிரதமரும் நினைக்கலாம். ஆனால், அது ஒருபோதும் நடக்கப் போவதில்லை. ஏனெனில், இந்திய – இலங்கை உடன்படிக்கையும் 13ஆவது திருத்தச் சட்டமும் முற்றிலும் வேறுவேறானவை. அப்போதைய அரசு இந்திய – இலங்கை உடன்படிக்கையை தன்னிச்சையாக வியாக்கியானப்படுத்தியதன் விளைவே 13ஆவது திருத்தச் சட்டம்.

ஆகவே, அரசமைப்பின் 13ஆவது திருத்தச் சட்டத்தை தமிழ்த் தேசிய இனப்பிரச்சினைக்கான தீர்வுக்கான தொடக்கப் புள்ளியாகவேனும் நாங்கள் ஏற்றுக்கொள்ளாவிடினும், நாங்கள் அந்தச் சட்டத்தை நிராகரிக்கின்றோமே தவிர இலங்கை – இந்திய உடன்படிக்கையை நிராகரிக்கவில்லை. மாறாக இந்த உடன்படிக்கையின் சரத்துக்களின்படி தமிழர் தேசத்தை அங்கீகரித்து அந்த ஒப்பந்தத்தை முழுமையாக நிறைவேற்றி அதனடிப்படையில் இந்தத் தீவில் தமிழ் மக்கள் ஏற்றுக்கொள்ளும் நிலைத்து நிற்கக் கூடிய அரசியல் தீர்வை எட்டுவதற்கு இந்தியா பொறுப்புக்கூறும் கடப்பாடு உடையது என்பதை வலியுறுத்துகின்றோம்” எனவும் அவர் மேலும் தெரிவித்தார்

கிளிநொச்சியில் மூன்று வெவ்வேறு தாக்குதல் முயற்சியில் ஈடுபட முயற்சித்த ஆவா குழுவினர் கைது !

கிளிநொச்சியில் மூன்று வெவ்வேறு தாக்குதல் முயற்சியில் ஈடுபட முயற்சித்த ஆவா குழுவினர் நேற்று முன்தினம் (07.10.2020) கைது செய்யப்பட்டுள்ளனர். குறித்த சந்தேக நபர்கள் நேற்று (08.10.2020) கிளிநொச்சி மாவட்ட நீதவான் நீதிமன்றில் முற்படுத்தப்பட்ட நிலையில் அவர்களை 14 நாள் தடுப்பு காவலில் வைக்க மன்று உத்தரவிட்டுள்ளது.

கிளிநொச்சி அரச புலனாய்வு பிரிவிற்கு கிடைத்த தகவலிற்கு அமைவாக பொலிஸ் விசேட அதிரடிப்படையினரால் மேற்கொள்ளப்பட்ட சுற்றிவளைப்பு நடவடிக்கையின் போது நால்வர் கைது செய்யப்பட்டுள்ளதாக பொலிசார் தெரிவிக்கின்றனர்.

குறித்த நபர்களிடமிருந்து நான்கு வாள்களும் மீட்கப்பட்டுள்ளது. கிளிநொச்சி மாவட்டத்தில் வட்டக்கச்சி மற்றும் முல்லைத்தீவு மாவட்டத்தின் மல்லாவி, வள்ளிபுனம் ஆகிய பகுதிகளில் குடும்பஸ்தர்கள் சிலரை தாக்குவதற்கு திட்டமிடப்பட்டு வருகை தந்திருந்த நிலையில் குறித்த நபர்கள் கைது செய்யப்பட்டுள்ளதாக பொலிசார் தெரிவிக்கின்றனர்.

அன்றைய தினம் குறித்த நபர்கள் கைது செய்யப்படாதிருந்தால் திட்டமிட்டபடி தாக்குதல் மேற்கொள்ளப்பட்டிருக்கும் எனவும், குறித்த தாக்குதல் முயற்சி கிளிநொச்சி அரச புலனாய்வு பிரிவினரால் தடுத்து நிறுத்தப்பட்டுள்ளதாகவும் மேலும் தெரிவிக்கப்படுகின்றது.

கைதானவர்கள் கிளிநொச்சியை சேர்ந்த வட்டக்கச்சி, பரந்தன், செல்வாநகர் பகுதிகளை சேர்ந்தவர்கள் எனவும், மெலதிக விசாரணைகள் இடம்பெற்று வருவதாகவும் பொலிசார் மேலும் தெரிவித்துள்ளனர்.

யாழ்.பல்கலைகழகத்தில் மாணவர்கள் – விரிவுரையாளர்களிடையே கலேபரம் – விரிவுரையாளர்களும் காவலாளிகளும் தாங்களை தாக்கியதாக மாணவர்கள் குற்றச்சாட்டு !

இன்றைய தினம் மாலை பல்கலைகழக மாணவர்கள் சிலருக்கிடையில் தர்க்கம் இடம்பெற்றுள்ளது. யாழ்.பல்கலைக்கழக 2ம் வருட, 3ம் வருட மாணவர்களுக்கிடையில் இடம்பெற்ற தர்க்கம் தொடர்பாக யாழ்.பல்கலைக்கழக துணைவேந்தரிடம் தொிவித்து தர்க்கத்தை சுமுகமாக தீர்ப்பதற்காக முயற்சித்தபோது துணைவேந்தர், விரிவுரையாளர்கள் சிலர் மற்றும் காவலாளி ஆகியோர் இணைந்து தம் மீது தாக்குதல் நடத்தியதாக மாணவர்கள் தரப்பில் குற்றஞ்சாட்டப்படுவதுடன், துணைவேந்தர் தாக்குதல் நடாத்தி கழுத்தில் தனக்கு காயம் ஏற்பட்டதாக கூறி மாணவன் கழுத்தில் காயத்தையும் காண்பித்தார்.

இதேவேளை குறித்த சம்பவம் தொடர்பில் பல்கலைக்கழக வாயிலில் போராட்டம் நடத்தும் மாணவர்கள் ஊடகங்களுக்கு கருத்து தொிவிக்கையில்

“பல்கலைக்கழகத்திற்குள் அதிரடிப்படை மற்றும் பொலிஸாரை இறக்கி அடிப்போம், சுடுவோம் என துணைவேந்தர் அச்சுறுத்தியதாகவும், அதற்கான வீடியோ ஆதாரம் தங்களிடம் உள்ளதாகவும் கூறியிருக்கின்றனர்.

மேலும் விரிவுரையாளர்கள் பரீட்சையில் புள்ளியிட மாட்டோம் எனவும், பல்கலைக்கழகத்தில் இருந்து வெளியேற்றுவோம் என அச்சுறுத்தியதாக கூறும் மாணவர்கள் பல்கலைக்கழக துணைவேந்தருக்கும், காவலாளிக்கும், விரிவுரையாளர்களுக்கும் மாணவர்களை அடிப்பதற்கான உரிமையை யார் கொடுத்தது? காட்டுமிராண்டிகள்போல் மாணவர்களுடன் நடந்து கொண்டவர்களுக்கு தண்டணை வழங்கப்படவேண்டும் என மாணவர்கள் கேட்டுக் கொண்டனர்.

சம்பவத்தையடுத்து யாழ்.பல்கலைக்கழக சுற்றாடலில் பொலிஸார் குவிக்கப்பட்டனர்.

நாளை மாலை 3 மணியளவில் பல்கலைக்கழக உத்தியோகத்தர்கள் தவிர்ந்த பல்கலைக்கழக பேரவை உறுப்பினர்கள் மூலம் இன்று நடைபெற்ற சம்பவம் தொடர்பில் விசாரணை நடாத்துவதாக பல்கலைக்கழக துணைவேந்தர் சிறீசற்குணராஜா உறுதியளித்ததன் பிரகாரம் மாணவர்களின் போராட்டம் சற்றுமுன்னர் கைவிடப்பட்டுள்ளமையும் குறிப்பிடத்தக்கது.

கொரோனா மூன்றாம் பரவலுக்கு நடுவிலும் சீனாவில் இருந்து இலங்கைக்கு வரும் தூதுக்குழு தொடர்பில் நாடளுமன்றத்தில் வலுத்த விவாதம்..!

இலங்கை வருகை தரும்  சீன தூதுக்குழு எந்தவித தனிமைப்படுத்தலுக்கும் உற்படுத்தப்படாது நாட்டிற்குள் வருவது குறித்து பிரதான எதிர்க்கட்சியினர் சபையில் கேள்வி எழுப்பியுள்ளார். இன்றைய நாடாளுமன்ற அமர்வில் இது பெரிய விவாதமாக வளர்ந்து கொண்டே சென்றுள்ளது.

வெளிநாட்டு உடன்படிக்கைகள் குறித்த விவாதம் இன்று பாராளுமன்றத்தில் இடம்பெற்ற வேளையில் உரையாற்றிய பிராந்திய ஒத்துழைப்பு இராஜாங்க அமைச்சர் தாரக பாலசூரிய,  “சீன தூதுக்குழுவொன்று இலங்கை வந்துள்ளமை தொடர்பிலும் கேள்விகள் எழுப்பப்படுகின்றன. ஆனால் கொரோனா பரவுகின்றது என கூறிக்கொண்டு நாட்டின் முதலீடுகள், சுற்றுலாத்துறை எதனையும் மேற்கொள்ளாது நாட்டினை முடக்கி வைத்துக்கொண்டு எவ்வளவு காலத்திற்கு இருக்க முடியும். அடுத்த ஆண்டில் வைரஸ் தடுப்பு ஊசி அறிமுகப்படுத்துவதாக கூறுகின்றனர், தற்செயலாக தடுப்பூசி கண்டறியப்படாது போனால் இவ்வாறே முடங்கிக்கொண்டு இருக்கவா? முடியும். எனவே இந்த விடயத்தில் புத்திசாலித்தனமாக சிந்திக்க வேண்டும். இப்போது சீன தூதுவர்கள் வந்துள்ளனர், விரைவில் அமெரிக்க தூதுக்குழுவொன்றும் வரவுள்ளனர்” என்றார்.

இதன்போது ஒழுங்குப்பிரச்சினை தொடர்பாக எழுப்பிய எதிர்க்கட்சி உறுப்பினர் ஹர்ஷ டி சில்வா, “அப்படியென்றால் இவர்கள் ஏயார் பபிள்  முறைமையின் படி வரவழைக்கப்படுவதென்றால் இவர்களுக்கு பி.சி.ஆர் பரிசோதனைகள் செய்யாது, தனிமைப்படுத்தலுக்கு உற்படுத்தப்படாது வரவழைப்பது போன்ற முறைமை தானே அது” என அவர் கேள்வி எழுப்பிய போது அதற்கு  ”அப்படி அல்ல, குறித்த நாட்டில் பி.சி.ஆர் பரிசோதனை செய்யப்படும், பின்னர் அவர்கள் சமூக இடைவெளிகளை பேணும் விதமாக வரவழைக்கப்பட்டு இங்கு அவர்கள் தங்குமிடங்களில் அதேபோன்று சமூக இடைவெளிகளை கடைப்பிடிப்பதும், அப்படியே அவர்களை மீண்டும் அனுப்பி வைப்பதும் போன்ற ஒரு முறைமையாகும்” என்ற பதில் முன்வைக்கப்பட்டது.

தொடர்ந்தும் கேள்வியெழுப்பிய ஹர்ஷ டி சில்வா “ இவ்வாறு தனிமைப்படுத்தப்படாத நபர்களை ஜனாதிபதியும் பிரதமரும் சந்தித்துவிட்டார்களா” எனக் கேள்வியெழுப்பினார்.

அதற்கு பதலளித்த அமைச்சர் பவித்ரா வன்னியாராச்சி “ அவ்வாறு வருபவர்கள் எம்முடன் செய்துகொண்ட உடன்படிக்கையின் பிரகாரம், அவர்கள் சீனாவிலேயே பி.சி.ஆர் பரிசோதனைகளை செய்து வரவேண்டும். இலங்கைக்கு வந்த பின்னர் நாம் அவர்களுக்கு பி.சி.ஆர்.பரிசோதனை செய்வோம் என்பதாகும். ஆகவே இரண்டு நாடுகளிலும் பி.சி.ஆர். பரிசோதனை செய்யப்படும்“ என பதிலளித்தார்.

தொடர்ந்தும் கேள்வியெழுப்பிய ஹர்ஷ டி சில்வா எனக்கு தெரிந்துகொள்ள வேண்டியது என்னவென்றால், இலங்கைக்கு வரும் சகல பிரஜைகளிடமும் பி.சி.ஆர் பரிசோதனை செய்யப்படுமா? – அனைவரும் தனிமைப்படுத்தலுக்கு உட்படுத்தப்படுவார்களா ? ” எனக் கேள்வியெழுப்பினார்.

அதற்கு பதலளித்த அமைச்சர் பவித்ரா வன்னியாராச்சி “இலங்கைக்கு வரும் சகலரிடமும் பி.சி.ஆர் பரிசோதனை செய்யப்படும். தனியார் வைத்தியசாலை அல்லது அரசாங்கம் என ஏதோ ஒரு விதத்தில் பரிசோதனைக்கு உற்படுத்தப்படும் – “ என பதிலளித்தார்.

தொடர்ந்து கேள்வியெழுப்பிய ஹர்ஷ டி சில்வா “ஆனால் இந்த சீனக் குழுவை தனிமைப்படுத்தவில்லை அப்படித்தானே?“ எனக்கேட்டார்.

தற்கு பதலளித்த அமைச்சர் பவித்ரா வன்னியாராச்சி  “முரண்பாடுகளை ஏற்படுத்தும் விதத்தில் கேள்விகளை முன்வைக்க  வேண்டாம், இவர்களை தனிமைப்படுத்தலுக்கு உட்படுத்துவதில்லை, ஒரு நாள் சந்திப்பிற்காக இவர்கள் வருகின்றனர். சீன கொமியுனிச கட்சியின் உயர் மட்ட அதிகாரி ஒருவரே இந்த குழுவுடன்  வருகின்றார். அவர்கள் எவ்வளவு பலமானவர்கள் என்பது உங்களுக்கு தெரியும், அவர்களை தனிமைப்படுத்தளுக்கு உற்படுத்துவது சரியானதா? என்ற கேள்வி உள்ளது’ என சமாளித்துக்கொண்டிருந்த வேளையில் இடையில் குறுக்கிட்ட இராஜாங்க அமைச்சர் தாரக பாலசூரிய  “ஹர்ஷ அவர்களே!  நான்தான் அவர்களை அழைத்துவர செல்கின்றேன். அவர்களை சந்திக்க எவ்வாறு செயற்பட வேண்டும் என்ற அறிவுரையும் உள்ளது. நான் அவர்களை சந்தித்த பின்னர் பாராளுமன்றத்திற்கு வரும் வேளையில் பி.சி.ஆர் பரிசோதனை மேற்கொண்டே வருவேன்” என கூறி விவாதத்துக்கு முற்றுப்புள்ளி வைத்தார்.

மட்டக்களப்பு மாவட்ட கால்நடை வளர்ப்பாளர்களுக்கு ஏற்படும் பிரச்சனைகள் குறித்து இராஜாங்க அமைச்சர் சமல் ராஜபக்சவுடன் இரா.சாணக்கியன் கலந்துரையாடல் !

மட்டக்களப்பு மாவட்ட கால்நடை வளர்ப்பாளர்களுக்கு ஏற்படும் பிரச்சனைகள் குறித்தும், இதனால் ஏற்படக்கூடிய தமிழ் சிங்கள இன முரண்பாடுகள் குறித்தும் இராஜாங்க அமைச்சர் சமல் ராஜபக்சவின் கவனத்திற்கு தமிழ் தேசியக் கூட்டமைப்பின் நாடாளுமன்ற உறுப்பினர் இரா.சாணக்கியன் கொண்டு சென்றுள்ளார்.

நேற்று(புதன்கிழமை) அமைச்சர் சமல் ராஜபக்சவினை சந்தித்த இரா.சாணக்கியன் மகாவலி பி வலய அபிவிருத்தி திட்டங்கள் நடைபெற்று வரும் மட்டக்களப்பு மாவட்ட எல்லை பகுதிகளில் அம்பாறை மாவட்டத்தைச் சேர்ந்த பௌத்த பிக்கு தலைமையிலான குழுவினர் அத்து மீறி காணிகளை அபகரித்து விவசாய செய்கையில் ஈடுபடுவதற்கான முயற்சிகளில் ஈடுபட்டு வருவது குறித்து தெரிவித்தார்

அத்துடன், அதனால் மட்டக்களப்பு மாவட்ட கால்நடை வளர்ப்பாளர்களுக்கு ஏற்படும் பிரச்சனைகள் குறித்தும், இதனால் ஏற்படக்கூடிய தமிழ் சிங்கள இன முரண்பாடுகள் குறித்தும் அமைச்சரின் கவனத்திற்கு கொண்டு வந்ததுடன் இதன் பின்னணியில் கிழக்கு மாகாண ஆளுநர் இருப்பதையும் சுட்டி காட்டியிருந்தார்.

இதனை கேட்டறிந்த அமைச்சர் சம்பந்தப்பட்ட அதிகாரிகளை அழைத்து கூட்டம் ஒன்றை நடாத்தி நடவடிக்கை எடுப்பதாகவும் அது குறித்து முடிவுகளை விரைவில் அறிவிப்பதாக இரா.சாணக்கியனிடம் உறுதிமொழி வழங்கியுள்ளார்.

“தெல்லிப்பளை புற்றுநோய் வைத்தியசாலையைச் சீராக இயக்க மத்திய அரசு நிதி உதவி வழங்க வேண்டும்” – நாடாளுமன்றில் கஜேந்திரகுமார் பொன்னம்பலம் வேண்டுகோள்!

“தெல்லிப்பளை புற்றுநோய் வைத்தியசாலையைச் சீராக இயக்க மத்திய அரசு நிதி உதவி வழங்க வேண்டும்” என தமிழ்த் தேசிய மக்கள் முன்னணியின் தலைவரும் யாழ்.மாவட்ட நாடாளுமன்ற உறுப்பினருமான கஜேந்திரகுமார் பொன்னம்பலம் சபையில் வலியுறுத்தினார்.

நாட்டைக் கட்டியெழுப்புதல் வரி, பொருளாதார சேவைகள் வரி, துறைமுக விமான நிலைய அபிவிருத்தி அறவீட்டுச் சட்டமூலம் ஒதுக்கீட்டுச் சட்டத்தின் கீழான ஐந்து பிரேரணைகள் மீதான விவாதத்தின்போது பேசும்போதே அவா் மேற்கண்டவாறு கூறினார்.

அதேவேளை அங்கு தொடர்ந்தும் கருத்து தெரிவித்த அவர்

“கொரோனா வைரஸ் தொற்றானது அதிதீவிரமாக பரவும் இந்த வேளையில் அதனைக் கட்டுப்படுத்த அரசு எடுத்துவரும் நடவடிக்கைகளுக்கு ஒத்துழைப்பு வழங்க வேண்டிய தேவை உள்ளமையை நாம் உணர்கின்றோம். கொரோனா வைரஸ் பிரச்சினையின் பின்னணியுடன் பார்க்கும்போது அபிவிருத்தி என்னும் விடயத்தில் சுகாதார முற்னேற்றம் என்பது அதிகூடிய முக்கியத்துவம் பெறுகின்றது. அந்த வகையில் சுகாதாரத்தை மேம்படுத்தலின் முக்கியத்துவம் கருதி நான் முக்கிய விடயம் ஒன்றினை பதிவு செய்ய விரும்புகின்றேன்.

கொரோனா வைரஸ் தாக்கத்தால் இலகுவாகப் பாதிக்கப்படக் கூடியவர்களாகப் புற்றுநோயாளர்களும் உள்ளனர். கடந்த கால போர் காரணமாக குண்டுத் தாக்குதல்களினால் ஏற்பட்ட இரசாயன தாக்கங்களினால் புற்றுநோயால் பாதிக்கப்பட்டுள்ளவர்களின் எண்ணிக்கை வடக்கு மாகாணத்தில் மிக அதிகமாக உள்ளது. அவ்வாறு புற்றுநோயால் பாதிக்கப்பட்டவர்களுக்கு சிகிச்சையளிக்கும் நிலையமாக உள்ள தெல்லிப்பளை புற்றுநோய் வைத்தியசாலை தொடர்பில் குறிப்பிட விரும்புகின்றேன்.

தெல்லிப்பளை வைத்தியசாலையில் புற்றுநோய் பிரிவை உருவாக்குவதற்கு எனது குடும்பத்தின் பங்களிப்பு கூடுதலாக இருந்தது. புற்றுநோய் பிரிவுக்குரிய கட்டடம் மற்றும் அதற்குரிய கோபோல்ற் இயந்திரத்தினையும் எமது குடும்பம் வழங்கியிருந்தது.

குறித்த புற்றுநோய் சிகிச்சைப் பிரிவு போரின் முன்னரும், பின்னரும் யாழ்ப்பாணம் மற்றும் வடக்கு மாகாணத்தில் மட்டுமல்ல அதற்கு அப்பாலுள்ள மக்களும் சிகிச்சை பெறும் நிலையமாக விளங்கியது. மகரகம போன்ற தொலை தூரங்களிலுள்ள வைத்தியசாலைகளுக்குச் செல்ல வசதியற்ற பெருந்தொகையான நோயாளர்களுக்கு சிகிச்சையளிக்கும் சேவையை இந்த வைத்தியசாலை வழங்கி வந்துள்ளது.

இந்தநிலையில், வடக்கு மாகாண சபையின் கீழ் இயங்கும் இந்த புற்றுநோய் சிகிச்சைப் பிரிவு முழுமையாக இயங்குதவதற்குத் தேவையான ஆளணிவளம் 2018 ஆம் ஆண்டு உருவாக்கப்பட்டது. ஆனாலும் ,அந்தப் பதவிகளுக்கான ஆட்கள் நியமிக்கப்படவில்லை.

மாறாக மத்திய அரசின் கீழ் இயங்கும் யாழ்.போதனா வைத்தியசாலைக்கு அந்த ஆளணியை நியமித்து அவர்களை தெல்லிப்பளை புற்றுநோய் சிகிச்சைப் பிரிவில் பணியாற்ற அனுமதித்தனர். இந்தச் செயற்பாட்டின் காரணமாக மத்திய அரசின் கீழ் கடமையாற்றும் வைத்திய அதிகாரிகள் மாகாண அமைச்சின் கீழ் இயங்கும் வைத்தியசாலையில் வேலை செய்யும் நிலை ஏற்பட்டது. இதனால் குழப்ப நிலைகள் உருவாகியது. இவ்வாறான முரண்பாடுகளால் நோயாளர்கள் மோசமாகப் பாதிக்கப்படும் நிலை தொடர்கின்றது.

இது மட்டுமன்றி தெல்லிப்பளை வைத்திசாலையில் கோபோல்ற் இயந்திரம் மற்றும் லீனியர் அச்சிலறேற்ரர் இயந்திரம் ஆகியன உள்ளன. அதனால் ஏனைய மாகாணங்களிலுள்ள மாகாண புற்றுநோய் வைத்தியசாலைகளை விடவும் கூடுதலான நிதிச் செலவு ஏற்படுகின்றது. எனினும், அந்த நிதித் தேவையை மாகாண அரசால் ஈடுசெய்ய முடியாதுள்ளது. மாகாண அரசின் கீழுள்ள இந்த வைத்தியசாலைக்குத் தேவையான செலவுகளை ஈடுசெய்வதற்குத் தேவையான நிதியை மத்திய அரசு வழங்குவதில்லை.

ஒரு புறத்தில் மாகாண நிர்வாகத்தின் கீழுள்ள மேற்படி புற்றுநோய் சிகிச்சை பிரிவை நிர்வகிப்பதற்குத் தேவையான நிதியை வழங்காது மறுபுறத்தில் இந்த அந்தப் பிரிவை மத்திய அரசின் கீழ் கொண்டுவந்தால் அதனை அபிவிருத்தி செய்ய முடியும் என்று கூறி அதனை மத்தியின் கீழ் கொண்டு செல்ல அரசு முயற்சிக்கின்றது.

ஆனால், இந்தப் புற்றுநோய் சிகிச்சைப் பிரிவை மத்திய அரசின் நிர்வாகத்தின் கீழ் கொண்டு செல்வது பொருத்தமற்றது.

குறிப்பாக புற்றுநோய் சிகிச்சைப் பிரிவையும், உளநல சிகிச்சைப் பிரிவையும் மத்தியின் கீழ் கொண்டு செல்வதற்கு அரசு முயற்சிக்கின்றது. இவ்வாறு இவை இரண்டையும் மத்தியின் கீழ கொண்டு செல்வதன் மூலம் நிர்வாக ரீதியான சிக்கல்கள் மேலும் உக்கிரமடையும். எனவே, அநாவசியமான பிரச்சினைகளை உருவாக்காமல் அதுவும் கொரோனா வைரஸ் நெருக்கடியுள்ள இக்கால கட்டத்தில் புற்றுநோயால் பாதிக்கப்பட்டுள்ளவர்களின் நலன்களை கருத்தில் கொண்டு குறித்த புற்றுநோய் சிகிச்சைப் பிரிவானது தொடர்ந்தும் மாகாண நிர்வாகத்தின் கீழ் இருக்கக் கூடியதாக அதற்குத் தேவையான ஆளணி மற்றும் நிதி வசதிகளை வழங்கி அதன் சேவையை மேம்படுத்த அரசு உடன் நடவடிக்கை எடுக்க வேண்டும் எனக் கேட்டுக் கொள்கின்றேன்” எனவும் அவர் தனது உரையில் மேலும் தெரிவித்தார் .

இலங்கையின் 16 மாவட்டங்களில் கொரோனா நோயாளிகள் !

நாட்டில் தற்போது வரை 16 மாவட்டங்களில் கொரோனா வைரஸால் பாதிக்கப்பட்டவர்கள் கண்டுபிடிக்கப்பட்டுள்ளதாக இராணுவத் தளபதி சவேந்திர சில்வா தெரிவித்துள்ளார்.

மினுவங்கொடை ஆடைத் தொழிற்சாலைப் பணியாளர்களுடன் நெருங்கிய தொடர்புகொண்டவர்களே இவ்வாறு அடையாளம் காணப்பட்டுள்ளனர் என அவர் மேலும் தெரிவித்துள்ளார். கம்பஹா – மினுவங்கொடை பிரன்டிக்ஸ் ஆடைத் தொழிற்சாலையில் பணிபுரிந்த மேலும் 200 பேர் வைத்தியசாலையில் அனுமதிக்கப்படுவார்கள் அல்லது தனிமைப்படுத்தப்படுவார்கள் எனவும் அவர் தெரிவித்துள்ளார்.

தமிழ்தேசிய கூட்டமைப்பின் புதிய தலைவராக மீண்டும் இரா.சம்பந்தன் தெரிவு !

தமிழ்த் தேசியக் கூட்டமைப்பின் தலைவராக இரா.சம்பந்தன் தொடர்ந்தும் இருப்பாரென கூட்டமைப்பின் நாடாளுமன்றக் குழு ஏகமனதாகத் தீர்மானித்துள்ளது.

நேற்றைய தினம்(07.10.2020) இடம்பெற்றிருந்த தமிழ்த் தேசியக் கூட்டமைப்பின் நாடாளுமன்ற குழுக்கூட்டத்தின் போதே இந்த தீர்மானம் எடுக்கப்பட்டுள்ளது. மிபேச்சாளர் பதவிக்கு எஸ்.சிறீதரன், செல்வம் அடைக்கலநாதன் ஆகியோரது பெயர்கள் பிரேரரிக்கப்பட்ட நிலையில், முரண்பாடுகள் ஏற்பட்டமை காரணமாக பேச்சாளர் தெரிவு நேற்றைய தினம் நடைபெறவில்லை என கூறப்படுகின்றது.

பேச்சாளர் தெரிவு காலவரையறையின்றி ஒத்திவைக்கப் பட்டிருப்பதால் எம்.ஏ.சுமந்திரனே அதுவரை தொடர்ந்தும் பேச்சாளராகச் செயற்படுவார் என கூறப்படுகின்றது.

எனினும், கூட்டத்தின் ஆரம்பத்திலேயே சுமந்திரன் தனது பேச்சாளர் பதவியினை இராஜினாமா செய்திருந்ததாக தகவல்கள் வெளியாகியுள்ளமைக் குறிப்பிடத்தக்கது.

“மலையகத்தில் பல்கலைக்கழகம் ஒன்று அமைக்கப்படாமையால் மாணவர்களும், பெற்றோரும் பல்வேறு அசௌகரியங்களை சந்தித்து வருகின்றனர்” – நாடாளுமன்றில் அரவிந்தகுமார் !

“மலையகத்தில் பல்கலைக்கழகம் என்பது இதுவரை பகல் கனவாகவே உள்ளது. மலையகத்தில் பல்கலைக்கழகம் ஒன்று அமைக்கப்படாமையால் மாணவர்களும், பெற்றோரும் பல்வேறு அசௌகரியங்களை சந்தித்து வருகின்றனர்” என பாராளுமன்ற உறுப்பினர் அரவிந்தகுமார் தெரிவித்துள்ளார்.

நேற்று (07.09.2020) பல்கலைக்கழக அனுமதி சம்பந்தமான சபை ஒத்திவைப்பு வேளை பிரேரணை மீதான விவாதம் இடம்பெற்றது.

இதன்போது உரையாற்றிய போதே அரவிந்தகுமார் இதனை கூறினார்.

“இளைஞர், யுவதிகளுக்கான பட்டப்படிப்பு காலம் தொடர்ந்தும் நீடிக்கப்படுவதால் அவர்களின் கற்றலுக்கான காலம் வீணடிக்கப்படுகின்றது. இந்த நிலைமை நாட்டுக்கு ஆரோக்கியமான சூழலை ஏற்படுத்தாது. ஆகவே இதனை குறைப்பதற்கு ஆக்கபூர்வமான நடவடிக்கை எடுக்கப்பட வேண்டும்.

மலையகத்தை பொறுத்தவரை இந்த பிரச்சினை வித்தியாசமானது. அதாவது பிள்ளைகளை கற்பிப்பதற்கு பெற்றோர் அதிக சிரத்தை எடுக்கின்றனர். அதனைவிட வளப்பற்றாக்குறை, ஆசிரியர்களின் குறைப்பாடு, ஆசிரியர் உதவியாளர்களின் நியமனத்தில் உள்ள இழுபறி என பல பிரச்சினைகள் உள்ளன.

குறிப்பாக பதுளை மாவட்டத்தில் தொழில் இல்லாத பிரச்சினை, பெற்றோரின் வருமான பிரச்சினை இவ்வாறான பல பிரச்சினைகள் மாணவர்களின் கல்வியில் பெருந்தாக்கத்தை செலுத்துகின்றன. பதுளை மாவட்டத்தில் தமிழ் மாணவர்கள் சாதாரண தரத்தில் சிறப்பான பெறுபேறுகளை பெற்றாலும் மாணவர்களுக்கு விஞ்ஞானம், கணிதம் ஆகிய பிரிவுகளில் கல்வியை தொடர்ந்து சிறந்த பெறுபேறுகளை பெற முடியாமல் உள்ளது. இதற்கு ஆசிரியர்கள் பற்றாக்குறையே காரணம்.

ஒரே நாடு ஒரே சட்டம் என்று சொன்னாலும் கூட பதுளையில் சிறந்த பெறுபேறுகளை பெற்ற மாணவர்களுக்கு நுவரெலியா மாவட்டத்தில் அனுமதி மறுக்கப்படுகின்றது. இது ஒரு அடிப்படை மனித உரிமை மீறலுடன் சம்பந்தப்பட்ட பிரச்சினையாகும். ஆகவே கல்வியமைச்சர் இது குறித்து கவனம் செலுத்த வேண்டும். அதேபோல் மலையகத்தில் பல்கலைக்கழகம் ஒன்று இல்லாமை பாறிய குறையாக உள்ளது. ஆட்சிக்கு வரும் ஒவ்வொரு அரசாங்கங்களும் இது குறித்த உறுதி மொழி வழங்கப்பட்டாலும். இதுவரை மலையகத்தில் பல்கலைக்கழகம் என்பது பகல் கனவாகவே உள்ளது.

தற்போதைய நிலையில் வேறு மாகாண பல்கலைகழகங்களுக்கு பிள்ளைகளை அனுப்பி வைப்பதில் பெற்றோர் பாரிய பொருளாதார சிக்கல்களை சந்தித்து வருகின்றனர். அதேபோல் வேறு பல்கலைக்கழகங்களில் மலையக மாணவர்கள் கல்வி பயின்றாலும் அவர்களின் இடைவிலகல் அதிகம். ஆகவே இவ்வாறான நிலைமையை நிவர்த்திக்க அரசாங்கம் விரைந்து செயற்பட வேண்டும்´ என்றார்.