01

புலிகளின் புலனாய்வு பிரிவு பொறுப்பாளர் பொட்டம்மான், அதன் இரண்டாம் நிலை பொறுப்பாளர் கபில் அம்மான் ஆகியோர் இராணுவப் புலனாய்வு பிரிவினரால் கைதுசெய்யப்பட்டு, தடுத்து வைக்கப்பட்டுள்ளதாக பரவிவரும் `செய்திகளில்` எந்த உண்மையில்லை என இராணுவத் தளபதி ஜெனரல் சரத் பொன்சேக்கா தெரிவித்துள்ளார்.

இலங் கையில் பணியாற்றிய நோர்வேயைச் சேர்ந்த தன்னார்வ தொண்டு நிறுவனமான ‘போரூட்’ என்ற நிறுவனத்தின் தலைவர் ரான்வி டிவிட்டின்ஸ் நாடு கடத்தப்பட்டுள்ளார். தமிழீழ விடுதலைப்புலிகளுடன் தொடர்புகளை கொண்டிருந்ததன் மூலம் இலங்கையில் இறைமைக்கு குந்தகம் விளைவித்தார் என்ற குற்றச்சாட்டின் பேரில் ரான்வி வெட்டேனஸ் என்ற இந்த நோர்வே பிரஜை நாடு கடத்தப்பட்டுள்ளார்.

தமிழீழ விடுதலைப் புலிகளுக்கு எதிராக கிடைக்கப் பெற்ற யுத்த வெற்றியை கொண்டாடும் வகையில் குறித்த தன்னார்வ தொண்டு நிறுவனத்தில் பறக்க விடப்பட்டிருந்த தேசிய கொடியை அகற்றுமாறு ரான்வி கோரியதாகத் தெரிவிக்கப்படுகிறது. அத்துடன். இலங்கை ஜனாதிபதியால் பிரகடனப்படுத்தப்பட்ட இராணுவ வெற்றியை குறிக்கும் விடுமுறை தினத்தில் போருட் நிறுவன பணியாளர்களுக்கு விடுமுறை வழங்க ரான்வி வெட்டேனஸ் மறுப்பு தெரிவித்தார் என்றும் குற்றம் சுமத்தப்பட்டுள்ளது

கள யதார்த்தத்தின் அடிப்படையிலும், மாற்றமடைந்து வரும் உலக அரசியல் ஒழுங்கினை கருத்திற்கொண்டும் துப்பாக்கிகளை மௌனிக்கச் செய்து வன்முறையற்ற வழிகள் ஊடாக போராட தமிழீழ விடுதலைப் புலிகள் உறுதி பூண்டுள்ளதாக தமிழீழ விடுதலைப் புலிகளின் அனைத்துலக உறவுகளுக்கான செயலகத்தின் பொறுப்பாளர் செல்வராஜா பத்மநாதன் தெரிவித்துள்ளார்.

இது தொடர்பாக அவர் விடுத்துள்ள அறிக்கையில் கூறியுள்ளதாவது: “சிறிலங்கா அரசாங்கமும் அதன் சிங்கள இராணுவ இயந்திரமும் தமிழீழ மக்கள் மீது ஏற்படுத்தியுள்ள மனிதப் பேரவலம் சுமார் மூன்று லட்சத்திற்கும் அதிகமான மக்களை அவர்களின் பாரம்பரிய வாழ்விடங்களில் இருந்து நிர்க்கதியாக்கி இடம்பெயர்த்து அனைத்துலகத்தின் கண்காணிப்புக்கு அப்பால் சிங்கள இராணுவத்தின் தடுப்பு முகாம்களுக்குள் தனிமைப்படுத்தி வைத்துள்ளது.

இந்நிலையில் கடந்த புதன்கிழமை (27.05.09) நடைபெற்ற ஐக்கிய நாடுகளின் மனித உரிமைகளுக்கான ஆணைக்குழு வன்னியில் இடம்பெற்ற தமிழ் மக்கள் மீதான படுகொலைகளுக்கு நியாயம் வழங்கத் தவறியமை குறித்து எமது விசனத்தையும் கண்டனத்தையும் தெரிவிக்கின்றோம். இராணுவ மேலாதிக்க நிலையின் ஊடாக தாயகத்து மக்களின் வாழ்வு உரிமையினைப் பறித்த சிறிலங்கா அரசாங்கம், தற்போது இராஜதந்திர வழிமுறைகளைக் கொண்டு உலக அரங்கில் நமது மக்கள்மீது போர்ப் பிரகடனம் செய்துள்ளது.

தனக்கு துணையாக அனைத்துலக சக்திகளுடன் இணைந்து இராஜதந்திர செயற்பாடுகளின் ஊடாக தமிழ் மக்களின் அரசியல் அபிலாசைகளை தகர்த்து எறிவதில் முனைப்பு கொண்டுள்ளது.  அதேவேளையில் தமிழீழ மக்கள் அடைந்துள்ள மனிதப் பேரவலத்தினையும், எதிர்கொண்டுள்ள மனிதாபிமான நெருக்கடிகளையும் முன்வைத்து அனைத்துலகத்திடம் பெருமளவில் வெளிநாட்டு வளங்களையும், உதவிகளையும் திரட்டுவதில் சிறிலங்கா கொள்கையளவில் வெற்றி பெற்றுள்ளது.

அந்த வளங்களைக்கொண்டு புனர்வாழ்வு, புனரமைப்பு செயற்பாடுகளை முன்னெடுப்பதன் மூலம் தமிழ் மக்களின் நலனில் சிங்கள அரசாங்கம் மிகுந்த அக்கறை கொண்டிருப்பதாக காட்டி தான் மேற்கொண்ட தமிழ் இன அழிப்பு பழியில் இருந்து தப்பித்துக்கொள்ளவும் வழி தேடுகின்றது. 

மலேசிய இளவரசரை மணம் புரிந்த இந்தோனேஷிய மாடல் அழகி, தம்மை இளவரசர் பாலியல் சித்ரவதை செய்ததாக புகார் கூறியுள்ளார். இந்தோனேஷியாவில் பிரபல மாடல் அழகியாக இருந்தவர் மனோகரா ஓடிலியா. அமெரிக்க-இந்தோனேஷிய அழகியான இவரை, மலேசியாவின் கேலன்டான் மாநிலத்தின் இளவரசர் முகமத் பக்ரி, அவரது அழகில் மயங்கி திருமணம் செய்து கொண்டார்.

இந்நிலையில், தம்மை திருமணம் செய்ததிலிருந்து தம்மை ஒரு பாலியல் அடிமையாக நடத்தி, சித்ரவதை செய்ததாக தமது கண்வரும், மலேசிய இளவரசருமான பக்ரி மீது ஓடிலியா பரபரப்பான குற்றச்சாற்றை கூறியுள்ளார். திருமணம் ஆன நாளிலிருந்து தம்மை அரண்மனையில் உள்ள படுக்கை அறையில் ஒரு கைதியை போன்று அடைத்து வைத்து, இளவரசர் தம்மை தினம் தோறும் பாலியல் சித்ரவதை செய்து வந்ததாக ஓடிலியா புகார் கூறியுள்ளார்.

தினமும் தம்மை அவதூறாக பேசி, கட்டாய பாலுறவுக்கு உட்படுத்தியதோடு, உடலில் பல இடங்களில் பிளேடை வைத்து கீறி சித்ரவதை செய்து வந்ததாகவும், அத்துடன் தினமும் போதை மருந்து ஊசியையும் போட்டு தம்மை ஒரு பாலியல் அடிமை போன்று நடத்தி வந்ததாகவும் இந்தோனேஷியா தப்பி வந்த ஓடிலியா,ஜகர்த்தாவில் செய்தியாளர்கள் கூட்டத்தில் தெரிவித்தார்.

தமது கணவரும், அவரது குடும்பத்தினரும் சிங்கப்பூருக்கு சுற்றுலா வந்தபோது தம்மையும் அழைத்து வந்ததாகவும், அப்போது ரகசியமாக சிங்கப்பூர் காவல் துறையினரை தொடர்பு கொண்டு அவர்களது உதவியுடன் தாம் ஜகர்த்தா தப்பி வந்ததாகவும் ஓடிலியா மேலும் கூறினார்.

தாம் இது தொடர்பாக இந்தோனேஷியா தூதரகத்தில் புகார் அளித்தும், அவர்கள் அதில் அலட்சியமாக இருந்ததாகவும் ஓடிலியா குற்றம்சாற்றினார். தமது கணவரிடமிருந்து விவகாரத்துக்கு விண்ணப்பித்துள்ளதாகவும், தமக்கு இழைக்கப்பட்ட கொடுமைகளுக்கு எதிராக சிங்கப்பூர் காவல் துறையிடம் புகார் அளிக்கப்போவதாகவும் ஓடிலியா மேலும் தெரிவித்தார்.

அகதிகள் என்ற போர்வையில் 300 முதல் 400 விடுதலைப் புலிகள் வரை தமிழகத்திற்குள் ஊடுருவியிருப்பதாகவும், எனவே சோனியா காந்தி மற்றும் ராகுல் காந்தி ஆகியோர் தமிழகத்திற்கு வருவதைத் தவிர்க்குமாறும் மத்திய உளவுத்துறை எச்சரித்துள்ளது. விடுதலைப் புலிகள் அமைப்பைச் சேர்ந்த கடை நிலைப் போராளிகளே இவ்வாறு ஊடுறுவியிருக்கலாம் எனவும், அகதிகள் முகாம்களில் இவர்கள் அகதிகள் போல தங்கியிருக்கலாம் எனவும் உளவுப் பிரிவு தகவல்கள் கூறுகின்றன. இந்தத் தகவலைத் தொடர்ந்து தமிழகம், கேரளா மற்றும் கர்நாடக மாநில கடலோரப் பகுதிகளில் தீவிர உஷார் நிலை அறிவிக்கப்பட்டுள்ளது.

அகதிகள் போர்வையில் புலிகள் ஊடுறுவியிருப்பதாக கூறப்படுவதைத் தொடர்ந்து தமிழகம் முழுவதும் உள்ள அகதிகள் முகாம்களில் போலீஸார் தீவிர சோதனை நடத்தி வருகின்றனர். முகாம்களில் சந்தேகத்திற்கு இடமான வகையில் யாரேனும் நடமாடுகிறார்களா என்பதும் கண்காணிக்கப்பட்டு வருகிறது. சந்தேகப்படும்படியான நடவடிக்கைகளைக் கொண்டவர்கள் பலத்த பாதுகாப்புடன் உள்ள முகாம்களுக்கு அனுப்பப்படுகின்றனர். மற்றவர்கள் மட்டுமே திறந்த வெளி முகாம்களில் தங்க அனுமதிக்கப்படுகின்றனர்.

இந்த நிலையற்ற நிலை காரணமாக, சோனியா காந்தி மற்றும் ராகுல் காந்தி ஆகிய இருவரும் இப்போதைக்கு தமிழகத்திற்கு வருவதைத் தவிர்க்குமாறும் உளவுப் பிரிவு அதிகாரிகள் அவர்களை எச்சரித்துள்ளனராம்.

நாடு முழுவதிலுமுள்ள அரசாங்கப் பாடசாலைகளுக்கு பட்டதாரி ஆசிரியர்களாகத் தெரிவு செய்யப்பட்டோருக்கு ஜனாதிபதி மஹிந்த ராஜபக்ஷ இன்று நியமனக் கடிதங்களைக் கையளித்தார். இது தொடர்பான வைபவம் இன்று காலை அலரி மாளிகையில் இடம்பெற்றது.

வடக்கு,  கிழக்கு மற்றும் மலையகம் உட்பட நாடு முழுவதிலுமுள்ள அரச பாடசாலைகளுக்கு 1500 பட்டதாரிகளை நியமிக்கும் திட்டத்தின் முதற்கட்டமாக இன்று 959பேருக்கு நியமனம் வழங்கப்பட்டதாக கல்வி அமைச்சு தெரிவித்துள்ளது. இலங்கை பரீட்சைத் திணைக்களத்தால் நடத்தப்பட்ட போட்டிப் பரீட்சையில் அதிக புள்ளிகளைப் பெற்ற பட்டதாரிகளுக்கே இந்நியமனம் வழங்கப்படுகின்றது. ஏனையோருக்கான நியமனம் விரைவில் வழங்கப்படும்.  ஜனாதிபதியின் பணிபுரைக்கு அமைய கல்வி அமைச்சர் சுசில் பிரேம் ஜயந்தவின் வழிகாட்டலுடனும் பிரதியமைச்சர் சச்சிதானந்தனின் ஒத்துழைப்புடனும் இந்நியமனம் வழங்கப்படுவதாகவும் அமைச்சு மேலும் குறிப்பிட்டுள்ளது. 

ஐரோப்பிய நாடாளுமன்ற வரலாற்றிலேயே முதல் முறையாக தமிழ்ப் பெண் ஒருவர் போட்டியிடுகிறார். அவருக்கான வெற்றி வாய்ப்புகள் அதிகமாக இருப்பதாக கூறப்படுகிறது. லண்டனில் வசித்து வருபவர் ஜனனி ஜனநாயகம். இலங்கையைச் சேர்ந்தவர். தமிழ்ப் பெண்ணான ஜனனி ஜனநாயகத்தின் குடும்பத்தினர் நீண்ட காலத்திற்கு முன்பு அகதிகளாக இங்கிலாந்து  சென்றனர். தற்போது அந்த நாட்டில் வசித்து வருகின்றனர்.

ஜனனி ஜனநாயகம் தற்போது ஐரோப்பிய நாடாளுமன்ற எம்.பி தேர்தலில் போட்டியிடுகிறார். எதிர்வரும் வியாழக்கிழமை இந்தத் தேர்தல்  நடைபெறுகிறது. லண்டனிலிருந்து எட்டு பேர் தேர்ந்தெடுக்கப்படவுள்ளனர். இங்கிலாந்தின் முக்கிய கட்சிகளின் வேட்பாளர்களுடன் சில சுயேச்சைகளும் களம் கண்டுள்ளனர். லண்டனிலிருந்து ஜனனி சுயேச்சையாகப் போட்டியிடுகிறார்.

இவர்களுடன் புலம் பெயர் தமிழர்களின் பேராதரவுடன் ஜனனி போட்டியிடுகிறார். ஐரோப்பிய பாராளுமன்றத் தேர்தலில் சுயேட்சை வேட்பாளராகக் களமிறங்கியுள்ள ஜனனி அவர்கள் வெற்றிபெற பிரித்தானிய தமிழர் பேரவை தமது வாழ்த்துக்களையும் ஆதரவினையும் தெரிவித்துள்ளது. அதேபோல பாரீஸில் இன்னொரு தமிழர் போட்டியிடுகிறார். இவர் புதுச்சேரியைச் சேர்ந்தவர். ஜனனி ஜனநாயகம் வெற்றி பெற்று எம்.பி ஆனால், ஐரோப்பிய நாடாளுமன்றத்தின் எம்.பியான முதல் தமிழர்  என்ற பெருமை அவருக்குக் கிடைக்கும் என்பது குறிப்பிடத்தக்கது.

பிரான்ஸ் நாட்டின் ஏர் பிரான்ஸ் நிறுவனத்திற்குச் சொந்தமான பயணிகள் விமானம் ஒன்று அட்லான்டிக் பெருங்கடல் மீது பறந்தபோது திடீரென மாயமாகி விட்டது. அது விபத்தில் சிக்கியிருக்கலாம் என அஞ்சப்படுகிறது. விமானத்தில் 228 பயணிகளும், ஊழியர்களும் இருந்தனர்.

அந்த விமானத்தில் 216 பயணிகளும், 12 ஊழியர்களும் இருந்ததாக ஏர் பிரான்ஸ் தெரிவித்துள்ளது. பிரேசில் நாட்டின் ரியோ டி ஜெனீரோ நகரிலிருந்து ஞாயிற்றுக்கிழமை கிளம்பிய இந்த விமானம் இன்று முற்பகல் பாரீஸ் வருவதாக இருந்தது.

ஆனால் வழியில் அட்லான்டிக் கடல் மீது விமானம் பறந்து கொண்டிருந்தபோது திடீரென ரேடார் பார்வையிலிருந்து அது மறைந்து விட்டது. இதையடுத்து பிரேசில் விமானப்படை உடனடியாக தேடுதல் பணியில் முடுக்கி விடப்பட்டது.

ஆனால் விமானம் குறித்த தகவல் இல்லை அந்த விமானம் கடலில் விழுந்து மூழ்கியிருக்கலாம் என அஞ்சப்படுகிறது.  இந்த சம்பவம் குறித்து பிரான்ஸ் அதிபர் நிக்கோலஸ் சர்கோஸி கவலையும், அதிர்ச்சியும் தெரிவித்துள்ளார்.

ஐக்கிய நாடுகளின் மனித உரிமை விவகாரங்களுக்கான ஆணையாளர் நாயகம் நவநீதம் பிள்ளை புலம்பெயர் மக்கள் மற்றும் சில நாடுகளின் அழுத்தங்கள் காரணமாகவே இலங்கைக்கு எதிராக யுத்த குற்ற விசாரணை செய்யப்பட வேண்டும் என்று கூறுகின்றார் என இடர்முகாமைத்துவ மற்றும் மனித உரிமை அமைச்சின் செயலாளரும் அரசாங்க சமாதான செயலகத்தின் பணிப்பாளருமான பேராசிரியர் ரஜீவ விஜேசிங்க தெரிவித்தார். ஆனால் பல நாடுகள் எமது நிலைப்பாட்டை புரிந்து கொண்டுள்ளன. ஜெனிவாவில் இடம்பெற்ற மனித உரிமை பேரவையின் அமர்வில் அதிகமான நாடுகள் எமக்கு ஆதரவளித்தன என்றும் அவர் குறிப்பிட்டார்.

ஐக்கிய நாடுகளின் மனித உரிமை விவகாரங்களுக்கான ஆணையாளர் நாயகம் நவநீதம் பிள்ளை தெரிவித்துவரும் கருத்துக்கள் தொடர்பில் வினவியபோதே அவர் மேற்கண்டவாறு கூறினார். இவ்விடயம் தொடர்பில் அவர் மேலும் கூறியதாவது: “ஐ.நாவின் மனித உரிமை விவகாரங்களுக்கான ஆணையாளர் நாயகம் நவநீதம் பிள்ளை இலங்கையில் யுத்தக் குற்றங்கள் தொடர்பில் சுயாதீன விசாரணை நடத்தப்படவேண்டும் என்று கூறி வருகின்றார். தனக்கு கிடைத்துள்ள தகவல்கள் தொடர்பிலேயே இவ்வாறு யுத்த குற்றங்கள் தொடர்பில் விசாரணை நடத்தப்படவேண்டும் என்று கோரி வருகின்றார்.

ஆனால் சில நாடுகள் மற்றும் புலம்பெயர் மக்களின் அழுத்தம் காரணமாகவே இவ்வாறு கோரிக்கை விடுக்கின்றார். இதேவேளை யுத்த குற்றம் தொடர்பில் விசாரணை நடத்தப்படவேண்டும் என்று நவநீதம் பிள்ளையின் அலுவலகத்தில் உள்ள அதிகாரி ஒருவர் கூறினால் உடனே நவநீதம் பிள்ளை கூறியதாக ஊடகங்கள் செய்தி வெளியிடுகின்றன. ஐக்கிய நாடுகளின் மனித உரிமை பேரவையில் அண்மையில் இடம்பெற்ற இலங்கை தொடர்பான விசேட பிரேரணையில் நாங்கள் வெற்றிபெற்றோம். ஜெனிவாவில் உள்ள இலங்கை தூதுவர் தயான் ஜயதிலக்க உள்ளிட்ட பலர் இவ்விடயத்தில் பாரிய சேவையாற்றியுள்ளனர். ஆனால் இலங்கை விவகாரம் தொடர்பில் எப்போதும் பிரேரணை கொண்டுவரப்பட முடியும். 48 உறுப்பு நாடுகளில் 16 நாடுகள் கையெழுத்திட்டால் மனித உரிமை பேரவையின் வழமையான அமர்வுகளில் இலங்கை தொடர்பில் விசேட பிரேரணையை கொண்டுவர முடியும். ஆனால் எவ்வாறான பிரேரணைகள் கொண்டுவரப்பட்டாலும் நாங்கள் அவற்றைத் தோற்கடிப்போம்.” இவ்வாறு அவர் கூறினார். 

கொழும்புப் பல்கலைக்கழகம் ராஜபக்ஷ சகோதரர்களுக்கு டாக்டர் பட்டத்தை வழங்கி கௌரவிக்கத் திட்டமிட்டுள்ளதாக சிங்களப் பத்திரிகையொன்றில் தெரிவிக்கப்பட்டுள்ளது.

ஜனாதிபதி மஹிந்த ராஜபக்ஷ மற்றும் பாதுகாப்புப் செயலாளர் கோதபாய ராஜபக்ஷ ஆகியோருக்கே இவ்வாறு டாக்டர் பட்டம் அளிக்கப்படவுள்ளது. கொழும்புப் பல்கலைக்கழகத்தின் துணை வேந்தர் ஷானிக்கா ஹிம்புரேகம விடுத்துள்ள ஊடக அறிக்கையில் இந்தத் தகவல் வெளியிடப்பட்டுள்ளது.

சர்வதேச ரீதியில் நாட்டின் நன்மதிப்பைப் பாதுகாக்கவும், இனங்களுக்கு இடையில் நல்லுணர்வை ஏற்படுத்தவும் ராஜபக்ஷ சகோதரர்கள் முழு மூச்சுடன் செயற்பட்டதாகவும், அதற்கு நன்றி பாராட்டும் வகையிலேயே அவர்களுக்கு டாக்டர் பட்டம் வழங்கப்படவுள்ளதாகவும் தெரிவிக்கப்படுகிறது.

பட்டமளிப்பு நடைபெறும் தினம் குறித்து இதுவரையில் தகவல்கள் வெளியாகவில்லை என்றும் அச்செய்தியில் தெரிவிக்கப்பட்டுள்ளது