July

Tuesday, August 3, 2021

July

வட கொரியா 4 ஏவுகணைகளை அடுத்தடுத்து ஏவி சோதனை

north-korea.jpgவட கொரியா நாடு கடந்த சில மாதங்களாக ஏவுகனைகளை விண்ணில ஏவி சோதனை நடத்தி வருகிறது. கடந்த ஏப்ரல் மாதம் அந்த நாடு சுமார் 3 ஆயிரத்து 200 கிலோ மீட்டர் தூரம் வரை சென்று தாக்கும் ஏவுகணையை ஏவி உலக நாடுகளை ஆச்சரியப்படுத்தியது. கடந்த மே மாதம் 25ம் திகதி வடகொரியா அணு ஆயுத ஏவுகணை சோதனையை வெற்றிகரமாக நடத்தியது.

இதற்கு பல நாடுகள் எதிர்ப்பு தெரிவித்தன. அதை கண்டு கொள்ளாத வட கொரியா அடுத்தடுத்து 4 தடவை அணு ஏவுகணைகளை விண்ணில் செலுத்தி சோதித்துப் பார்த்தது.  இதையடுத்து அணு ஏவுகணைகளை சோதித்துப் பார்க்க வடகொரியாவுக்கு தடை விதித்து ஐ. நா. சபை தீர்மானம் கொண்டு வந்தது.

இதையும் வடகொரியா கண்டு கொள்ளவில்லை. தொடர்ந்து ஏவுகணை ஆய்வில் அந்த நாடு ஈடு பட்டுள்ளது. நேற்று முன்தினம் திடீரென 4 குறுகிய தூர ஏவுகணைகளை வடகொரியா விண்ணில் ஏவியது. இந்த ஏவுகணைகள் சுமார் 100 கிலோ மீட்டர் தூரம் வரை பறந்து சென்று தாக்கும் சக்தி கொண்டவை.

இந்த சோதனை அண்டை நாடான தென்கொரியாவை அதிர்ச்சியில் ஆழ்த்தி உள்ளது.

அடுத்து நீண்ட தூர ஏவுகணையை வடகொரியா சோதித்துப் பார்க்க தயாராகி வருவதாக ஜப்பான் உளவுத் துறை கூறி யுள்ளது. தற்போது வட கொரியாவிடம் உள்ள ஏவுகணைகள் சுமார் 6,700 கிலோ மீட்டர் தூரம் வரை சென்று தாக்கக்கூடியவை. அடுத்த கட்டமாக 8 ஆயிரம் கிலோ மீட்டர் தூரம் வரை சென்று தாக்கும் அதி நவீன ஏவுகணையை வட கொரியா தயாரித்துள்ளதாக தெரிகிறது. அமெரிக்காவின் முக்கிய நகரங்களை இந்த ஏவுகணைகளால் தகர்க்க முடியும்.

புதுக்குடியிருப்பு பகுதியிலிருந்து பெருமளவில் தங்க நகைகள் கண்டெடுப்பு

இலங்கையின் வடக்கே விடுதலைப் புலிகளுக்கு எதிரான போரில் இராணுவம் வெற்றி பெற்ற பிறகு, புதுக்குடியிருப்பு பகுதியிலிருந்து 150 கிலோவுக்கும் அதிகமான தங்கமும், 800 க்கும் மேற்பட்ட தங்க வளையல்களும் கண்டெடுக்கப்பட்டுள்ளதாக இலங்கை இராணுவம் தெரிவிக்கிறது.

இந்த நகைகள் பொதுமக்களால் விடுதலைப் புலிகளிடம் அடமானம் வைக்கப்பட்டதாகவோ அல்லது வெளியேறும் மக்கள் மீண்டும் திரும்பி வருவதற்கான உத்திரவாதமாகவோ கொடுத்திருக்கலாம் என்று இராணுவப் பேச்சாளர் பிரிகேடியர் உதய நாணயக்கார தெரிவிக்கின்றார்.

புதுக்குடியிருப்பு பகுதியிலிருந்து கண்டெடுக்கப்பட்டுள்ள நகைகளை ஆவணப்படுத்தும் நடவடிக்கைகள் தற்போது நடைபெற்று வருவதாகவும், அந்தப் பணி முடிந்த பிறகு உரியவர்களை கண்டறிந்து உறுதி செய்யப்பட்டவுடன் நகைகளை அவர்களிடம் ஒப்படைப்பதற்கான நடவடிக்கை எடுக்கப்படும் என்றும் அவர் கூறுகிறார்.

கண்டெடுக்கப்பட்டுள்ள சில நகைகளில் அதன் உரிமையாளர் குறித்த குறிப்புகளும் இருந்தாலும், சிலவற்றில் எந்தவிதமான பதிவுக் குறிப்புகளும் இல்லை என்பதால் அது குறித்து எப்படி நடவடிக்கை எடுப்பது என்பது பற்றிய வழிமுறைகள் ஆராயப்பட்டு வருவதாகவும் இராணுவப் பேச்சாளர் கூறுகிறார்.

இந்த நகைகள் குறித்த பதிவுக் குறிப்புகளும் ஆவணங்களும் தயாரானவுடன், வவுனியாப் பகுதியில் இடம் பெயர்ந்த நிலையில் உள்ள மக்களிடையே இந்தச் செய்தி எடுத்துச் செல்லப்பட்டு உரிமையாளர்கள் அதை கோருவதற்கு வழி செய்யப்படும் என்றும் அவர் மேலும் தெரிவிக்கிறார்.

தற்போது புதுக்குடியிருப்பு பகுதியிலிருந்து கண்டெடுக்கப்பட்ட நகைகள் இராணுவத்தின் வசம் பாதுகாப்பாக இருக்கிறது என்றும் தேடுதல் நடவடிக்கைகள் மேலும் தொடர்கின்றன என்றும் அவர் கூறுகிறார்.

கிழக்கில் ஆயுதக்களைவு தீவிரம்: முதற்கட்டம் காத்தான்குடியில் பூர்த்தி – அடுத்தகட்ட களைவு ஏனைய பிரதேசங்களில்

kattankudy.jpgகிழக்கில் ஆயுதக் குழுக்களை நிராயுத பாணிகளாக்கும் நடவடிக்கைகளைப் படையினர் தீவிரப்படுத்தியுள்ளனர்.

இதற்கமைய காத்தான்குடி பகுதியிலுள்ள குழுக்கள் தமது ஆயுதங்களை நேற்று கையளித்ததாக கிழக்குப் பிரா ந்தியத்திற்குப் பொறுப்பான பிரதிப் பொலிஸ் மாஅதிபர் எடிசன் குணதிலக தெரிவித்தார். ஒப்படைக்காத குழுக்களை முற்றுகையிட்டு ஆயுதங்கள் பறிக்கப்படுமென்றும் பிரதிப் பொலிஸ் மாஅதிபர் தெரிவித்தார்.

காத்தான்குடி பிரதேசத்தில் உள்ள குழுக்கள் ஆயுதங்களை ஒப்படைக்கவென நேற்றுப் பிற்பகல் மூன்று மணி வரை கால அவகாசம் வழங்கப்பட்டிருந்தது. இதனையடு த்து, ரி 56 துப்பாக்கிள், ‘ஷொட்கன், ‘கல்கட்டாஸ்’ துப் பாக்கிகள் போன்றவற்றை பொலிஸார் சேகரித்துள்ளதாக பிரதிப் பொலிஸ் மா அதிபர் தெரிவித்தார்.

ஆயுதங்களை ஒப்படைக்கத் தவறுவோரைத் தேடி நடவடிக்கை எடுப்பதற்கும் தீர்மானிக்கப்பட்டுள்ளதாகவும் இதற்கு மேலும் அவகாசம் வழங்கப்படமாட்டாதென்றும் கிழக்கு டி.ஐ.ஜி. தெரிவித்தார். இதேநேரம், ஏறாவூர் உள்ளிட்ட பகுதிகளில் உள்ள குழுக்கள் ஆயுதங்களை ஒப் படைப்பதற்கு வேறு திகதிகள் பின்னர் அறிவிக்கப்படவுள்ளது.

முதற்கட்டமாக காத்தான்குடியில் ஆயுதக் களைவு மேற்கொள்ளப்படுவதாகத் தெரிவித்த பிரதிப் பொலிஸ் மாஅதிபர் குணதிலக, கிழக்கில் ஆயுதக் குழுக்களை நிராயுத பாணிகளாக்கும் நடவடிக்கை அடுத்து வரும் தினங்களில் தீவிரப்படுத்தப்படுமென்றும் தெரிவித்தார். கிழக்கில் முதன் முதலாக ரி.எம்.வி.பீ. அமைப்பினர் நான்கு மாதங்களுக்கு முன்னர் ஆயுதங்களைப் படையினரிடம் ஒப்படைத்திருந்தமை குறிப்பிடத்தக்கது.

மெனிக்பாம் பகுதியில் நிரந்தர கட்டுமானங்கள்?

வன்னியிலிருந்து இடம்பெயர்ந்திருக்கும் 3 இலட்சம் பேரில் 80 சதவீதமானோர் வருட இறுதிக்குள் மீளக்குடியமர்த்தப்படுவர் என்று உறுதிமொழி அளிக்கப்பட்டுள்ள போதும் இந்த அகதிகளுக்கு நிரந்தர முகாம்களையே வீடுகளாக நிர்மாணித்து வழங்கப்படவுள்ளதாக தோன்றுவதாக லண்டன் ரைம்ஸ் பத்திரிகை வெள்ளிக்கிழமை தெரிவித்துள்ளது.

மெனிக்பாம் பகுதியில் நிரந்தரமான கட்டிடங்கள் எழுப்பப்படுவதாக நிவாரணப் பணியாளர்கள் ரைம்ஸுக்கு கூறியுள்ளனர். மெனிக் பாமில் 6 வலயங்களில் 4 வலயங்களுக்கு தங்களால் மனிதாபிமானப் பணிகளை மேற்கொள்ளக்கூடியதாக இருப்பதாகவும் இரு வலயங்களுக்குச் செல்வது தடுக்கப்பட்டுள்ளதாகவும் இதில் சூன்ய வலயமென மர்மமான பெயர் சூட்டப்பட்டுள்ள பகுதியும் அடங்கும் என்றும் நிவாரணப் பணியாளர்கள் தெரிவித்துள்ளனர்.

இந்தப் பகுதிகளில் பணிபுரிய எமக்கு அனுமதியளிக்கப்படவில்லை என்று இலங்கையிலுள்ள “ரிலீவ்’ இன்ர நெஷனல் அமைப்பின் தலைவர் ராஜித ஜயசிங்க தெரிவித்துள்ளார். ஆனால், கட்டிடங்கள் எழுப்பப்படுவதை வெளியிலிருந்து பார்க்க முடியும் என்றும் அவர் கூறியுள்ளார். தலைநகர் கொழும்பிற்குப் பின்னர் இலங்கையின் இரண்டாவது பெரிய நகரமாக இந்தப்பகுதி உருவாகிவருவதாக சில நிவாரணப் பணியாளர்கள் கூறியுள்ளனர். பாடசாலைகள், ஆஸ்பத்திரிகள், வங்கிகள் என்று பாரிய நகரமாக உருவாகுவதாக கூறப்படுகிறது. இங்கு வங்கிகளில் அகதிகள் 100 கோடி ரூபாவுக்கும் மேலான பணத்தை வைப்பிலிட்டுள்ளனர்.

இந்த வலயங்களில் அரசாங்கம் நிரந்தர புகலிடங்களுக்கான வேலைகளை மேற்கொள்கின்றது. சீமெந்து தரைகள், மரக்கட்டமைப்புகள், இரும்புக் கூரைகள் என்பன அமைக்கப்படுகின்றன என்று உதவிப் பணியாளர் ஒருவர் கூறியுள்ளார். தன்னை அடையாளங் காட்டவேண்டாமென அவர் கேட்டுக்கொண்டதாக ரைம்ஸ் பத்திரிகை கூறியுள்ளது.

திருமலையில் சித்த வைத்திய போதனா வைத்தியசாலை

trincomalee-district.jpgதிருகோ ணமலையில் சித்த வைத்திய போதனா வைத்தியசாலை ஒன்றை அமைக்க சுதேச வைத்திய அமைச்சு நடவடிக்கை எடுத்துள்ளது.

கிழக்கு பல்கலைக்கழகத்தில் கல்வி பயிலும் மாணவர்களின் செல்முறைப் பயிற்சி நடவடிக்கைகளுக்கு உதவும் முகமாகவும் பிரதேச மக்களின் தேகாரோக்கியத்தை கருத்தில் கொண்டும் இந்த சித்த வைத்திய போதனா வைத்தியசாலை அமைக்கப்படுவதாக அமைச்சு அறிவித்துள்ளது.

இந்த வைத்தியசாலையின் வெளி நோயாளர் பிரிவை சுதேச வைத்திய அமைச்சர் திஸ்ஸ கரலியத்த நாளை 6 ஆம் திகதி  திறந்து வைப்பார் என சுதேச வைத்திய அமைச்சு அறிவித்துள்ளது

தப்பியோடி கைதான படையினருக்கு புனர்வாழ்வு அளிக்க வேண்டும் – ஐ.தே.க. வலியுறுத்தல்

தப்பியோடிய படையினரை கைது செய்து குற்றவாளிகளுடன் சிறையில் வைத்திருப்பது சிறந்தல்லவென ஐ.தே.கட்சியின் பாராளுமன்ற உறுப்பினர் தயாசிறி ஜயசேகர தெரிவித்ததுடன் அவர்களுக்கு புனர்வாழ்வளிக்கும் வேலைத்திட்டம் அவசியமெனவும் வலியுறுத்தினர்.

புலிகளுக்கு பொது மன்னிப்பு வழங்குவது குறித்து பேசப்படும் நிலையில் தப்பியோடி கைதான படையினருக்கும் அதனை வழங்கி சுமுக வாழ்க்கையை பெற்றுக் கொடுக்க முன்வர வேண்டுமெனவும் தெரிவித்தார். எதிர்க்கட்சித்தலைவரின் அலுவலகத்தில் வெள்ளிக்கிழமை இடம்பெற்ற ஊடகவியலாளர் மாகாநாட்டில் அவர் கலந்து கொண்டு பேசுகையிலேயே மேற்கண்டவாறு தெரிவித்தார்.

அவர் மேலும் பேசுகையில்;  படையிலிருந்து விடுமுறையைப் பெற்று மீண்டும் பணிக்கு திரும்பாத சுமார் 40 ஆயிரம் படையினர் உள்ளதாக அறிக்கைகள் தெரிவிக்கின்றன. இந்நிலையில் தப்பிச் சென்றுள்ளவர்களில் 4500 பேரளவில் கைது செய்யப்பட்டு குற்றச்செயல் புரிந்தவர்களுடன் தடுத்து வைக்கப்பட்டுள்ளனர்.

குடும்பப் பிரச்சினை, பணியின் போதான பிரச்சினை போன்ற காரணங்களால் இவர்கள் தவறிழைத்த போதும் படையில் சில வருடங்களாவது பணியாற்றியுள்ளனர். இந் நிலையில் கொலை, கொள்ளை போன்ற குற்றச் செயலுடன் தொடர்புடையவர்களுடன் இவர்கள் தடுத்து வைக்கப்படுவதானது சிறந்ததல்ல. அதாவது குற்றச் செயலுடன் தொடர்புடையவர்களுடன் இருந்து வெளியே வரும் போது இவர்களால் பிரச்சினையேற்படுவதற்கு வழிவகுக்கும். யுத்தம் முடிவடைந்துள்ள நிலையில் அதற்கு பயன்படுத்த முடியாதென்பதால் குற்றம் புரிந்தவர்களுடன் தடுத்து வைக்காது அவர்களுக்கு புனர்வாழ்வளிக்க வேண்டும். அல்லது தப்பியுள்ளவர்கள் சுமுகமாக வாழ இடமளிக்கப்பட வேண்டும். பொசன் மற்றும் வெசாக் தினங்களில் ஜனாதிபதி விடுதலை வழங்குவது போல் ஜனாதிபதி முப்படைகளின் தளபதியென்ற வகையில் இதனை செய்ய முன்வரவேண்டும். இது தொடர்பில் படைவீரரது குடும்பத்தினர் எம்முடன் கதைத்துள்ளனர்.

புலிகளுக்கு தற்போது பொது மன்னிப்பு குறித்து பேசுகின்ற நிலையில் படையினருக்கும் இதனை வழங்க வேண்டுமென நாம் கேட்கின்றோம்.

இலங்கையின் இன்றைய சமுதாயம் ஆங்கிலத்தில் பேசும் ஆற்றலை இழந்துள்ளது

schoolgirls-sri-lanka.jpgநூறாண் டுகளுக்கு மேலாக ஆங்கில ஆட்சியாளரின் நிர்வாகத்தின் கீழ் இருந்த இலங்கையின் இன்றைய சமுதாயம் ஆங்கிலத்தில் பேசும் திறனை இழந்து நிற்பதாக கிழக்கு மாகாணசபையின் பிரதம செயலாளர் வி.பி.பாலசிங்கம், திருகோணமலை வலயக்கல்வி அலுவலகம் நடத்திய புத்தாக்கக் கண்காட்சியின் முதல் நாள் நிகழ்வினைத் தொடக்கி வைத்துப் பேசும்போது குறிப்பிட்டார்.

ரஷ்யா மற்றும் சீனாவில் உயர் கல்வி பெறுவதற்காக செல்லும் நமது மாணவர்கள் அங்கு ரஷ்ய, சீன மொழிகளில் ஆறு மாதகால பயிற்சி பெற்ற பின்னரே உயர்கல்வியைத் தொடர முடிகின்றது. நமது நாட்டில் இருக்கும் போது ஆங்கில மொழியையும் கற்க ஏன் முன்வருகிறார்களில்லை. ஆங்கில மொழியை ஒவ்வொருவரும் கற்க வேண்டியது அவசியம் என்றும் பிரதம செயலாளர் பாலசிங்கம் கூறினார்.

கிழக்குப் பல்கலைக்கழக திருகோணமலை வளாகத்தின் முதல்வர் என். நகேந்திரகுமார் பேசும்போது;

உயர்கல்வி பெறும் மாணவர்கள் வர்த்தகம், கலை ஆகிய துறைகளில் அக்கறை காட்டுகிறார்களே தவிர, விஞ்ஞானத்துறையில் அக்கறை காட்டுகின்றார்கள் இல்லை. திருமலை வளாகத்தில் விஞ்ஞானத்துறைக் கல்விக்குரிய வசதிகள் அனைத்தும் உள்ளன. மாணவர் எண்ணிக்கைதான் குறைவு என்று கூறினார்.

மாகாணக் கல்வி அமைச்சின் செயலாளர் உபாலி வீரவர்தன பேசும்போது;

ஆசிரியர் பற்றாக்குறை பெரும்பாலும் நீக்கப்பட்டுள்ளது. ஆங்கிலம், விஞ்ஞானம், கணிதம் ஆகிய பாடங்களைப் போதிக்கும் ஆசிரியர்களுக்குத்தான் பற்றாக்குறை நிலவுகிறது. கணிதபாடம் போதிக்கும் ஆசிரியர்கள் தங்களிடம் கற்கும் மாணவர்களை குறைந்தது அப்பாடத்தில் சாதாரண சித்தி எடுக்கக்கூடியதாக பயிற்றுவிக்க வேண்டும். பாடங்களில் மாணவர்கள் சித்திபெறவில்லை என்ற நிலையை அப்பாடங்களைப் போதிக்கும் ஆசிரியர்கள் மாற்றியமைக்க வேண்டுமென்று கூறினார். வலயக்கல்விப் பணிப்பாளர் அ. விஜயானந்த மூர்த்தி தலைமை வகித்தார்.

சம்பள மீளாய்வு தொடர்பான விபரங்களை பேச்சுகளில் ஈடுபடுவோர் வெளியிட வேண்டும்

தோட்டத் தொழிலாளர்களின் சம்பள மீளாய்வு தொடர்பாக இதுவரை இடம்பெற்ற பேச்சுவார்த்தைகள் குறித்த விபரங்களை பேச்சுவார்த்தைகளில் ஈடுபடுகின்ற தரப்புகள் வெளியிட வேண்டும் என்று மலையக மக்கள் முன்னணியின் செயலாளர் விஜயகுமாரன் வேண்டுகோள் விடுத்துள்ளார்.

இது சம்பந்தமாக அவர் மேலும் தெரிவித்ததாவது; தோட்டத் தொழிலாளர்களின் சம்பள மீளாய்வு தொடர்பாக தோட்ட முதலாளிமார் சம்மேளனங்களும் கூட்டு ஒப்பந்தத்தில் கைச்சாத்திடுகின்ற தொழிற்சங்கங்களும் இதுவரை இடம்பெற்ற பேச்சுவார்த்தைகளின் விபரங்கள் குறித்து முறையாக அறிவிக்கவில்லை.

இது கூட்டு ஒப்பந்தத்தில் கைச்சாத்திடாத தொழிற்சங்கங்களுக்கிடையில் பலத்த சந்தேகத்தினை ஏற்படுத்தியுள்ளது. இதேவேளை, ஊவா மாகாணசபைத் தேர்தலைக் காரணம் காட்டி சம்பள மீளாய்வு தொடர்பான பேச்சுவார்த்தைகள் காலதாமதமாக்கப்படுவதை எவ்விதத்திலும் அனுமதிக்க முடியாது.

இவ்வாறானதொரு நிலையில் தோட்டத் தொழிலாளர்களின் சம்பள உயர்வு விடயத்தில் ஐக்கிய தேசியக் கட்சியின் தொழிற்சங்கமான இலங்கைத் தேசிய தோட்டத் தொழிலாளர் சங்கம் தோட்டத் தொழிலாளர்களின் நம்பிக்கையைப் பெறும் வகையில் பேச்சுவார்த்தையின் போது தொழிலாளர் சார்பாக செயற்படுவதற்கு ஐ.தே.க. நடவடிக்கை எடுக்க வேண்டும் என்று அவர் மேலும் தெரிவித்தார்.

முன்னாள் சிறுவர் போராளிகளின் புனர்வாழ்வை உறுதிப்படுத்துமாறு பான் கீ மூன் வலியுறுத்தல்

06bankimoon.jpgஆயுதக் குழுக்களிலிருந்து விடுவிக்கப்பட்ட சிறுவர்களின் பராமரிப்பு பாதுகாப்பு மற்றும் அவர்களை சமூகத்துடன் ஒருங்கிணைக்கும் செயல்திட்டங்களை உறுதிப்படுத்துமாறு இலங்கையிடம் ஐ.நா. செயலாளர் நாயகம் பான் கீ மூன் வலியுறுத்தியுள்ளார். இலங்கையின் ஆயுத மோதலும் சிறுவர்களும் என்பது பற்றிய அறிக்கையொன்றை பாதுகாப்பு சபைக்கு ஐ.நா. செயலாளர் நாயகம் பான் கீ மூன் சமர்ப்பித்துள்ளார். அந்த அறிக்கையில் 18 வயதுக்கு குறைந்த முன்னாள் சிறுவர் போராளிகளுக்கு பொருத்தமான உதவிகள் வழங்கப்பட வேண்டுமென கொழும்பை அவர் வலியுறுத்தியுள்ளார்.

ஐ.நா. மற்றும் ஏனைய தரப்பினரின் ஆதரவுடன் இலங்கை முன்னேற்றத்தை வென்றெடுக்க வேண்டுமென அந்த அறிக்கையில் வலியுறுத்தப்பட்டிருப்பதாக நியூயோர்க்கில் வியாழக் கிழமையன்று பான் கீ மூனின் பேச் சாளர் நிருபர்களிடம் தெரிவித்தார்.

ஆயுதக் குழுவிலிருந்து வெளியேறிய சகல சிறுவர்களினதும் அடையாளத்துவத்தை உறுதிப்படுத்த வேண்டும். அவர்களை விடுவிக்க வேண்டும், புனர்வாழ்வளிக்க வேண்டும்.

அவர்கள் சமூகங்கள் மத்தியில் ஒருங்கிணைவதற்கான ஏற்பாடுகளுக்கு முன்னுரிமை அளிக்கப்பட வேண்டும். சர்வதேச தரத்திற்கமைவாக இவை தொடர்பான நடவடிக்கைகளை அமுல்படுத்த வேண்டும்.

அத்துடன், மனிதாபிமானப் பணியாளர்கள் இடம்பெயர்ந்த மக்களுக்கு உதவிகளை வழங்க அரசு வசதிகளைச் செய்துகொடுக்க வேண்டும். குடும்பங்களிடமிருந்து பிரிக்கப்பட்ட சிறுவர்களுக்கு பொருத்தமான பராமரிப்பு பாதுகாப்பை உறுதிப்படுத்த வேண்டும். அத்துடன், இடம்பெயர்ந்த பிள்ளைகளின் போஷாக்கை அதிக உயர்ந்த பட்சத்துக்கு உறுதிப்படுத்த வேண்டும்.

அத்துடன் சிறுவர்களை படைக்கு திரட்டுவது தொடர்பாக எந்தவொரு பொறுமையையும் கடைப்பிடிக்கக் கூடாதெனவும் பான் கீ மூன் அரசாங்கத்தை வலியுறுத்தியுள்ளார்.

சந்தோசமான நாடுகளின் பட்டியலில் இலங்கைக்கு 22ம் இடம்

050709happy-country.jpgஉலகின் சந்தோசமான நாடுகளின் பட்டியலில் இலங்கைக்கு 22ம் இடம் வழங்கப்பட்டுள்ளது. திங்க டேங் என்ற புதிய பொருளாதார நிறுவகத்தனால் வெளியிடப்பட்டுள்ள இந்த தரவரிசைப்பட்டியலின் படி, உலகின் மிகவும் சந்தோசமான நாடாக கொஸ்டாரிகா தெரிவு செய்யப்பட்டுள்ளது.

இந்த பட்டியலில் முன்னிலை வகிக்கும் நாடுகள் பல, அபிவிருத்தி அடைந்து வரும் நாடுகளாக காணப்படுவதாகவும், அபிவிருத்தி அடைந்த நாடுகள் பெரும்பாலும் இடைநிலையிலேயே காணப்படுவதாகவும் தெரிவிக்கப்பட்டுள்ளது
.
இலங்கையில் அசாதாரண சூழ்நிலை நிலவுகின்ற போதும், சந்தோசமான நாடுகளின் பட்டியிலில் 22 ம் இடத்திற்கு தரப்படுத்தப்பட்டுள்ளமை வரவேற்கத்தக்கது என அந்த அமைப்பு வெளியிட்டுள்ள அறிக்கையில் குறிப்பிட்பட்டுள்ளது. அத்துடன், இந்த பட்டியலில் முதல் நான்கு இடங்களை பெற்ற நாடுகள் அபிவிருத்தி அடைந்து வரும் நாடுகள் என தெரிவிக்கப்பட்டுள்ளது.

இதேவேளை உலகின் வல்லரசுகளாக கணிக்கப்படும் பல நாடுகள் இந்த தரவரிசையில் பின்னத்தள்ளப்பட்டுள்ளன. இங்கிலாந்துக்கு இதில் 74ம் இடமும், அமெரக்காவிற்கு 114 ம் இடமும், கனடாவிற்கு 88 வது இடமும் வழங்கப்பட்டுள்ளது.

இந்த நிலைகள், அபிவிருத்தி அடைந்த நாடுகளில் பொருளாதார வளர்ச்சி காணப்பட்டாலும், அதனை அபிவிருத்தி செய்யும் நடவடிக்கைகள் மேற்கொள்ளப்பட்ட போதிலும், சந்தோசமாக வாழக் கூடிய சூழ்நிலை உருவாக்கப்படவில்லை என தெரிவிக்கப்பட்டுள்ளது. இந்த நிலையில் மோதல்களின் பின்னரும், அதனால் பாதிக்கப்பட்ட வடுக்கள் நிறைந்திருந்தாலும், இலங்கை 22ம் இடத்தில இருக்கின்றமை விசேடமான அம்சம் என தெரிவிக்கப்பட்டுள்ளது.