June

Sunday, January 23, 2022

June

இங்கிலாந்துடனான முதலாவது ஒருநாள் ஆட்டத்தில் இலங்கை அணியின் 8 வீரர்கள் 10 க்கும் குறைவான ஓட்டங்கள் – தொடரும் தோல்வி !

சுற்றுலா இலங்கை மற்றும் இங்கிலாந்து அணிகளுக்கு இடையிலான முதலாவது ஒருநாள் போட்டி நேற்று நடைபெற்றது. ஏற்கனவே இருபதுக்கு இருபது தொடரை இங்கிலாந்து வெள்ளையடிப்பு செய்துள்ள நிலையில் இந்த தொடரில் ஆறுதலாக ஒரு வெற்றியை சரி பதிவு செய்ய இலங்கை அணி களமிறங்கியது.

போட்டியின் நாணய சுழற்சியில் வெற்றிப் பெற்ற இங்கிலாந்து அணி முதலில் துடுப்பெடுத்தாட இலங்கை அணிக்கு அழைப்பு விடுத்தது.

அதன்படி, முதலில் துடுப்பெடுத்தாடிய இலங்கை அணி 42.3 ஓவர்கள் நிறைவில் அனைத்து விக்கெட்டுக்களையும் இழந்து 185 ஓட்டங்களை மாத்திரமே பெற்றுக் கொண்டது. இலங்கை அணி சார்பில் அணித்தலைவர் குசல் ஜனித் பெரேரா அதிகபட்சமாக 71 ஓட்டங்களையும் னிந்து ஹசரங்க 54 ஓட்டங்களையும்  பெற்றுக் கொண்டனர். இது மட்டுமே குறிப்பிடக்கூடிய ஓட்டமாக அமைந்திருந்தது. ஏனைய இலங்கை அணியின் 8 வீரர்கள் 10 க்கும் குறைவான ஓட்டங்களுக்குள்ளேயே ஆட்டமிழந்து வௌியேறினர்.

இங்கிலாந்து அணி சார்பில் அதிரடி பந்து வீச்சில் ஈடுபட்ட கிரிஸ் வோகர் 4 விக்கெட்டுக்களையும், டேவிட் வில்லி 3 விக்கெட்டுக்களையும் அதிகபட்சமமாக வீழ்த்தினர்.

இந்நிலையில், பதிலுக்கு துடுப்பெடுத்தாடிய இங்கிலாந்து அணி 34.5 ஓவர்கள் நிறைவில் 5 விக்கெட்டுக்களை இழந்து வெற்றி இலக்கை அடைந்தது. அவ்வணி சார்பில் ஜோ ரூட் அதிகபட்சமாக 79 ஓட்டங்களைப் பெற்றுக் கொண்டார்.

பந்து வீச்சில் துஷ்மந்த சமீர மூன்று விக்கெட்டுக்களை இலங்கை அணி சார்பாக பெற்றுக் கொண்டார்.

இதன்படி  5 விக்கெட் வித்தியாசத்தில் இங்கிலாந்து அணி வெற்றிப் பெற்றுள்ளது.

இதற்கமைய முதலாவது ஒருநாள் போட்டியில் இங்கிலாந்து அணி வெற்றிப்பெற்று 1-0 என்ற கணக்கில் தொடரில் முன்னிலை பெற்றுள்ளது.

“பாராளுமன்றத்துக்குள் தமிழீழ விடுதலைப் புலிகளை நினைவுகூருதலை தடுக்க நடவடிக்கை எடுக்கப்பட வேண்டும்.” – ஹெகலிய ரம்புக்வெல்ல

“பாராளுமன்றத்துக்குள் தமிழீழ விடுதலைப் புலிகளை நினைவுகூருதலை தடுக்க நடவடிக்கை எடுக்கப்பட வேண்டும்.”  என அரசாங்கத்தின் அமைச்சரவை இணைப் பேச்சாளர் ஹெகலிய ரம்புக்வெல்ல தெரிவித்துள்ளார்.

விடுதலைப் புலிகளை நினைவு கூரிய குற்றச்சாட்டில் மட்டக்களப்பில் 9 பேர் கைதுசெய்யப்பட்டுள்ள நிலையில், ஏன் நாடாளுமன்றத்தில் விடுதலைப் புலிகளை நினைவுகூரும் செயற்பாடுகளுக்கு எதிராக நடவடிக்கை எடுக்கப்படுவதில்லை என கொழும்பில் இன்று இடம்பெற்ற ஊடக சந்திப்பில் அமைச்சரவை இணைப் பேச்சாளர் ஹெகலிய ரம்புக்வெல்லவிடம் கேள்வி எழுப்பட்டுள்ளது.

இதற்கு பதில் அளித்த அவர்,

தமிழீழ வீடுதலைப் புலிகள் அல்ல – யாராக இருந்தாலும் அவர்கள் தனிப்பட்ட ரீதியில் நினைவு நிகழ்வுகளை நடத்துவதில் எவ்வித பிரச்சினையுமில்லை. எனினும் பொதுவான நிகழ்வுகளை நடத்துவதில் பிரச்சினை காணப்படுகின்றது. நாட்டை பிளவுபடுத்தும் செயற்பாடுகளுக்கு அனுமதியளிக்க முடியாது. அவ்வாறு உறுதியளித்தே நாடாளுமன்ற உறுப்பினர்கள் சத்தியப்பிரமாணம் செய்கின்றனர். இந்த நிலையில் விடுதலைப் புலிகள் தொடர்பில் ஏதாவது கருத்துக்களை உறுப்பினர்கள் வெளிப்படுத்துவார்கள் எனின் சபாநாயகர் இது தொடர்பில் நடவடிக்கை எடுப்பார்.

ஆகவே கைது செய்யப்பட்ட ஒன்பது பேர் தொடர்பில் விசாரணைகள் இடம்பெற்றதன் பின்னரே தீர்மானம் மேற்கொள்ள முடியும்.

நாடாளுமன்றத்திற்கு வெளியே மேற்கொள்ளப்படும் சில விடயங்களுக்கு சட்ட ரீதியாக நடவடிக்கை எடுக்க முடியும், எனினும் அதே விடயத்திற்கு நாடாளுமன்றத்திற்குள் நடவடிக்கை எடுக்க முடியாது. அவ்வாறு அதில் மாற்றம் கொண்டுவர வேண்டுமெனின் நாடாளுமன்ற யாப்பினை மாற்றியமைக்க வேண்டும்.

அதற்கு ஏதாவது ஆலோசனைகள் இருந்தால் கூறுங்கள் நாம் அது தொடர்பில் அவதானம் செலுத்துகின்றோம் என்றார்.

“சீன காலனியாகிறதா அம்பாந்தோட்டை ..? ” – தேசிய பிக்கு முன்னணி கேள்வி !

“அம்பாந்தோட்டை மாவட்டத்தை சீன காலனித்துவத்தின் கீழ் கொண்டு வரும் முயற்சியா திஸ்ஸமஹராம வாவி புனரமைப்பு ஊடாக முன்னெடுக்கப்படுகிறது என்ற சந்தேகம் எழுந்துள்ளது.” என தேசிய பிக்கு முன்னணியின் பொதுச்செயலாளர் வகமுல்லே உதித தேரர் தெரிவித்தார்.

அவர் மேலும் குறிப்பிடுகையில்,

நாட்டில் ஒற்றையாட்சி முறைமையை உறுதிப்படுத்துவதாக குறிப்பிட்டுக் கொண்டு ஜனாதிபதி கோட்டாபய ராஜபக்ஷ ஆட்சியமைத்தார். ஒரு நாடு – ஒரு சட்டம் என்ற கொள்கை வெறும் பேச்சளவில் மாத்திரம் பின்பற்றப்படுகிறது. சீன நாட்டவர்கள் நாட்டின் பொது சட்டத்திற்கு அப்பாற்பட்டவர்களாக செயற்படுவதை காண முடிகிறது.

வரலாற்று சிறப்பு மிக்க திஸ்ஸமஹராம வாவியை புனரமைக்கும் பணிகளை சீன நாட்டவர்கள் முன்னெடுத்துள்ளார்கள். இந்த வாவியை புனரமைக்கும் திறமை தேசிய மட்டத்தில் உள்ள பொறியியலாளர்களுக்கு கிடையாதா? நாட்டின் மரபுரிமைகளை பிற நாட்டவர்கள் வசம் ஒப்படைப்பது பாரிய விளைவுகளை ஏற்படுத்தும்.

திஸ்ஸமஹராம வாவி புனரமைப்பில் ஈடுப்பட்ட சீன நாட்டவர்கள் அணிந்திருந்த ஆடை சீன நாட்டு இராணுவ சீருடையை ஒத்தது என குறிப்பிடப்பட்டது. இவ்விடயம் குறித்த அரசாங்கமும், சீன தூதரகமும் குறிப்பிடும் கருத்துக்கள் முன்னுக்கு பின் முரணானதாக காணப்படுகின்றது.

நாட்டின் பெரும்பாலான பகுதிகளில் சீன நாட்டவர்கள் அபிவிருத்தி பணிகளிலும், பாரம்பரிய கைத்தொழில் நடவடிக்கைகளிலும் ஈடுப்படுகிறார்கள். இதனை சாதாரணமாக கருத முடியாது. வரலாற்றில் இடம் பெற்ற சம்பவங்களை மீட்டிப்பார்த்துக் கொள்வது அவசிமாகும். அம்பாந்தோட்தோட்டை மாவட்டத்தை சீன காலணித்துவ ஆட்சியின் கீழ் கொண்டு வரும் முயற்சியா? திஸ்ஸமஹராம வாவி புனரமைப்பின் ஊடாக முன்னெடுக்கப்படுகிறது என்ற சந்தேகம் தோற்றம் பெற்றுள்ளது என்றார்.

இந்நிலையில் குறித்த பகுதியில் சீன இராணுவத்துக்கு எந்த தொடர்பும் கிடையாது என்பதை மேற்கொள்ளப்பட்ட விசாரணைகள் தெளிவாக எடுத்துக்காட்டுவதாகவும் அது குறித்த சீன நிறுவனத்தின் தொழிலாளர்களுக்காக வழங்கப்பட்ட ஆடை எனவும்  அமைச்சரவை பேச்சாளர் ஹெஹலியரமபுக்வெல குறிப்பிட்டிருந்தமை நோக்கத்தக்கது.

இலங்கையில் இன்றும் 1700க்குமு் அதிகமான கொரோனா தொற்றாளர்கள் அடையாளம் !

நாட்டில் மேலும் 389 பேருக்கு கொரோனா தொற்று உறுதிப்படுத்தப்பட்டுள்ளதாக இராணுவத் தளபதி ஜெனரல் சவேந்திர சில்வா தெரிவித்துள்ளார்.

இவ்வாறு அடையாளம் காணப்பட்டுள்ள இவர்கள் அனைவரும் புதுவருட கொவிட் கொத்தணியுடன் தொடர்புடையவர்கள் என அவர் மேலும் தெரிவித்தார்.

இதற்கமைய இன்றைய தினம் நாட்டில் இதுவரை 1,709 பேருக்கு கொரோனா தொற்று உறுதிப்படுத்தப்பட்டுள்ளது.

அதன்படி, இந்நாட்டு மொத்த கொவிட் தொற்றாளர்களின் எண்ணிக்கை 257,217 ஆக அதிகரித்துள்ளதாக அரசாங்க தகவல் திணைக்களம் குறிப்பிட்டுள்ளது.

கொரோனா வைரஸ் தொற்றில் இருந்து மேலும் 2 ஆயிரத்து 222 பேர் பூரணமாக குணமடைந்து இன்று (செவ்வாய்க்கிழமை) வீடுகளுக்கு திரும்பியுள்ளதாக சுகாதார அமைச்சு தெரிவித்துள்ளது. அத்துடன் இந்நாட்டு மொத்த கொவிட் தொற்றாளர்களில் 223,471 பேர் பூரணமாக குணமடைந்து வைத்தியசாலைகளில் இருந்து வௌியேறி உள்ளதாக சுகாதார அமைச்சு தெரிவித்துள்ளது.

மேலும் கொரோனா தொற்றுக்கு உள்ளாகி உயிரிழந்தோர் எண்ணிக்கை 3,030 ஆக அதிகரித்துள்ளது.

“69 மில்லியன் ரூபாய் செலவில் விசேட விமானத்தில் பாதுகாப்பாக இங்கிலாந்துக்கு அனுப்பிவைக்கப்பட்ட வீரர்களின் செயல் கோபமூட்டுகிறது.”  – இலங்கை கிரிக்கெட்டின் வைத்திய குழுவின் தலைவர்

பெரும் செலவில் பாதுகாப்பாக இங்கிலாந்துக்கு அனுப்பப்பட்ட வீரர்களின் நடத்தை குறித்து தான் வருத்தப்படுவதாக இலங்கை கிரிக்கெட்டின் வைத்திய குழுவின் தலைவர் சிரேஷ்ட பேராசிரியர் அர்ஜுன டி சில்வா தெரிவித்துள்ளார்.

இங்கிலாந்து சுற்றில் கலந்து கொண்ட குசல் மெந்திஸ், நிரோஷன் திக்வெல்ல மற்றும் தனுஷ்க குணதிலகவின் ஆகியோர் இங்கிலாந்தின் நடுவீதியில் தனிமைப்படுத்தல் விதிமுறைகளை மீறி சிகரட் பிடிப்பதற்காக ஒன்றாக நின்ற காணொளி ஒன்று வெளியாகி பெரும் பரபரப்பை ஏற்படுத்தியிருந்தது. பலரும் இது தொடர்பில் விமர்சனங்களை முன்வைத்திருந்தனர்.

இந்நிலையில் இது தொடர்பில் தனியார் ஊடகத்தின் நிகழ்ச்சியில் கலந்து கருத்து தெரிவித்த போதே அர்ஜுன டி சில்வா  இதனை தெரிவித்தார்.

அவர் மேலும் தெரிவிக்கையில் ,

இவர்கள் தங்கும் இடத்தில் கால்வாய் ஒன்று உள்ளது. யாரும் இல்லாத போது காலையிலோ அல்லது மாலையிலோ கால்வாய் வழியாக நடந்து செல்லலாம். ஆனால் அந்த பாதையில் ஒரு பாலம் உள்ளது. அந்த பாலத்தின் பக்கம் செல்லக்கூடாது என தெளிவாகக் கூறப்பட்டுள்ளது. குறித்த பாலத்தைக் கடந்ததும், நகர மையத்தை அடையலாம். வீரர்களுக்கு வெளியே சென்று உடற்பயிற்சி செய்ய அல்லது ஏதாவது செய்ய வாய்ப்பு வழங்கப்பட்டுள்ளது.

கடந்த காலத்தில், ஒரே ஒரு உடல் பயிற்சி நிபுணர் மட்டுமே இருந்தார். அணியில் எந்த வைத்தியரும் இருக்கவில்லை. இப்போது 24 மணி நேரமும் வைத்தியர் ஒருவர் உள்ளார். வைத்தியர் ஒருவர் இருக்கிறாரா என்று ஒருவர் என்னிடம் கேட்டார். வைத்தியருக்கு தெரியாது. ஏனென்றால், அவர்கள் இரவில் உறங்குகிறார்களா என்பதை பார்ப்பது வைத்தியரின் வேலை இல்லை. வௌியில் செல்ல முடியாது என்பது வீரர்களுக்கு தெளிவாக தெரியும்.

வீரர்களின் பாதுகாப்பிற்காக 69 மில்லியன் ரூபாய் செலவில் விசேட விமானத்தில் பாதுகாப்பாக அனுப்பி வைக்கப்பட்டனர். இந்திய அணியினருக்கு முன்னதாகவே இவர்களுக்கு தடுப்பூசி வழங்கப்பட்டுள்ளது. அதுதான் எனக்கு கவலையும் கோபமுமாக உள்ளது. நான் ஒருபோதும் வீரர்களை விமர்சிப்பதில்லை. நான் வீரர்களை நேசிக்கிறேன். ” என்றார்.

இங்கிலாந்தில் மீள அதிகரித்துள்ள கொரோனாத்தொற்று !

அதிகரித்து வரும் கொரோனா வைரஸ் தொற்று பரவலால் ஊரடங்கு தளர்வுகளை மேலும் ஒரு மாதத்திற்கு  இங்கிலாந்து அரசு தள்ளிவைத்துள்ளது.
இந்நிலையில், இங்கிலாந்தில் கடந்த 24 மணி நேரத்தில் 22,868 பேருக்கு கொரோனா தொற்று உறுதி செய்யப்பட்டுள்ளது. இதனால் அங்கு பாதிப்பு எண்ணிக்கை 47.55 லட்சத்தைக் கடந்துள்ளது.
மொத்தமாக கொரோனா வைரசால் அங்கு பலியானோர் எண்ணிக்கை 1,28,103 ஆக உள்ளது. மேலும் கொரோனாவில் இருந்து 43.19 லட்சம் பேர் குணமடைந்துள்ளனர் என அந்நாட்டு சுகாதாரத்துறை தெரிவித்துள்ளது.
இதே நேரம்  உலக அளவில் கொரோனாவால் பாதிப்பு அடைந்தோர் எண்ணிக்கை 18.21 கோடியைக் கடந்துள்ளது.

கொரோனா வைரஸ் பாதிப்பில் இருந்து 16.67 கோடிக்கும் அதிகமானோர் குணமடைந்துள்ளனர்.  மேலும், வைரஸ் தாக்குதலுக்கு இதுவரை 39.44 லட்சத்துக்கும் மேற்பட்டோர் உயிரிழந்துள்ளனர்.
வைரஸ் பரவியவர்களில் 1.15 கோடிக்கும் அதிகமானோர் சிகிச்சை பெற்று வருகின்றனர். 80 ஆயிரத்து 400-க்கும் அதிகமானோர் நிலைமை கவலைக்கிடமாக உள்ளது.

“பஷில் ராஜபக்ஷ நாடாளுமன்றம் வருவது தொடர்பில் எந்த தீர்மானமும் எட்டப்படவில்லை.” – கெஹலிய ரம்புக்வெல்ல

இலங்கை அரசியலில் தற்போது சூடுபிடிக்க ஆரம்பித்துள்ள பிரச்சினை பசில் ராஜபக்ஷவின் நாடாளுமன்றப்பிரவேசம் தொடர்பானதாகும்.  இது தொடர்பில் பல தரப்பினரும் தங்களுடைய கருத்துக்களை வெளியிட்டு வருகின்றனர்.

இந்நிலையில் , “பசில் ராஜபக்ஷ நாடாளுமன்ற உறுப்பினராக பதவியேற்பது மற்றும் அமைச்சராக கடமைகளை பொறுப்பேற்பது குறித்து இன்னும் ஒரு முடிவு எட்டப்படவில்லை.” என அரசாங்கம் அறிவித்துள்ளது.

இன்று (செவ்வாய்க்கிழமை) அமைச்சரவை முடிவுகளை அறிவிக்கும் ஊடக சந்திப்பிலேயே அமைச்சரவை பேச்சாளர் கெஹலிய ரம்புக்வெல்ல இதனை தெரிவித்தார்.

அவர் மேலும் தெரிவித்துள்ளதாவது,

அவர் நாடாளுமன்றதிற்கு நுழைவது தொடர்பான தீர்மானத்தை ஜனாதிபதி கோட்டாபய ராஜபக்ஷவே மேற்கொள்வார்.

அவ்வாறு முடிவு எட்டப்படும் சந்தர்ப்பத்தில் பசில் ராஜபக்ஷவின் நாடாளுமன்ற பிரவேசம் குறித்து அறிவிக்கப்படும் என அவர் குறிப்பிட்டார்.

ஸ்ரீலங்கா பொதுஜன பெரமுனவின் தேசிய அமைப்பாளர் பசில் ராஜபக்ஷ, நாடாளுமன்றத்திற்கு செல்வதற்கு 36 பின்வரிசை நாடாளுமன்ற உறுப்பினர்கள் ஆதரவு வழங்கியுள்ளதாக தகவல்கள் வெளியாகியுள்ளன.

எக்ஸ்பிரஸ்பேர்ள் கப்பல் தீவிபத்து – கரையொதுங்கிய 1000 தொன் பிளாஸ்டிக் கழிவுகள்!

அண்மையில் இலங்கையின் தெற்கு கடற்பரப்பில் எக்ஸ்ப்ரஸ் பேர்ல் கப்பல் பாரிய தீ விபத்துக்கு உள்ளாகியிருந்தது. இதனால் ஏற்பட்ட மாசுபாடுகள் தென் கடற்பரப்பை முழுமையாக பாதித்திருந்தது.

இந்நிலையில் தீ விபத்துக்கு உள்ளான எக்ஸ்ப்ரஸ் பேர்ல் கப்பலில் இருந்து 40 வீதமான பிளாஸ்டிக் கழிவுகள் மாத்திரமே கரையொதுங்கியுள்ளதாக சுற்றாடல் அமைச்சு அறிவித்துள்ளது.

ஏனைய 60 வீதமான பிளாஸ்டிக் கழிவுகள் தொடர்பாக உரிய தரவுகள் கிடைக்கவில்லை என சுற்றாடல் அமைச்சர் மஹிந்த அமரவீர குறிப்பிட்டார்.

கரையொதுங்கிய ஆயிரத்து 34 தொன் பிளாஸ்டிக் கழிவுகள் 44 கொள்கலன்களில் வத்தளை பகுதியிலுள்ள களஞ்சியசாலை ஒன்றில் களஞ்சியப்படுத்தப்பட்டுள்ளதாக அவர் கூறினார்.

கொரோனா இறப்புக்களுடன் போட்டி போடும் வீதிவிபத்து இறப்புக்கள் – சாரதிகளே அவதானம் !

நாடளாவிய ரீதியில் பதிவாகிய வீதி விபத்துகள் காரணமாக இன்று செவ்வாய்கிழமை காலை ஆறு மணியுடன் நிறைவடைந்த 24 மணித்தியாலத்திற்குள் 12 பேர் உயிரிழந்துள்ளனர். இதனால் சாரதிகள் தொடர்ந்தும் கவனத்துடன் செயற்பட வேண்டும் என பொலிஸ் பேச்சாளர் பதில் சிரேஷ்ட பிரதி பொலிஸ்மா அதிபர் அஜித்ரோஹண தெரிவித்தார்.

இது தொடர்பில் அவர் மேலும் கூறியதாவது,

நாடளாவிய ரீதியில் இன்று காலை(29.06.2021) ஆறு மணியுடன் நிறைவடைந்த 24 மணித்தியாலயத்திற்குள் வீதி விபத்துகள் காரணமாக 12 பேர் உயிரிழந்துள்ளர். அதற்கமைய, நேற்று இடம்பெற்ற விபத்துகளில் மாத்திரம் 8 பேர் உயிரிழந்துள்ளதுடன், இதற்கு முன்னர் இடம்பெற்ற விபத்துக்களில் சிக்கி காயமடைந்திருந்த 4 பேரும் உயிரிழந்துள்ளனர்.

இந்நிலையில் , இந்த விபத்துகளின் போது மோட்டார் சைக்கிளில் பயணித்த 8 பேர் உயிரிழந்துள்ளதுடன் , பாதசாரதிகள் 3 பேரும் , முச்சக்கர வண்டியில் பயணித்த பெண்ணொருவருமே இவ்வாறு உயிரிழந்துள்ளதாக பொலிஸார் அடையாளம் கண்டுள்ளனர்.

இதேவேளை , தற்போது வீதி விபத்துகளால் உயிரிழப்பவர்களின் எண்ணிக்கை 9 – 10 வரையில் அதிகரித்து வருவதை அவதானிக்க கூடியதாகவுள்ளது. அதற்கமைய காயமடைபவர்களின் எண்ணிக்கையும் அதிகரித்து செல்கின்றன.

இதனால் சாரதிகள் இது தொடர்பில் மேலும் கவனத்துடன் செயற்பட வேண்டும்.இந்நிலையில் நாட்டின் பல பகுதிகளிலும் மழையுடனான காலநிலை நிலவுவதால் மோட்டர் சைக்கிள் ஓட்டுனர்கள் மற்றும் ஏனைய வாகன சாரதிகள் மிகவும் கவனத்துடன் தங்களது வாகனங்களை செலுத்த வேண்டும் என தெரிவித்துள்ளார்.

“அடுத்த பத்து வாரங்கள் ஆபத்தானவை” – எச்சரிக்கை விடுத்துள்ள சுதர்சினி பெர்ணாண்டோபுள்ளே !

சுகாதார வழிகாட்டுதல்களை இறுக்கமாக பின்பற்றாவிட்டால் அடுத்த பத்து வாரங்களில் டெல்டா வைரஸ் இலங்கை முழுவதும் பரவும் என இராஜாங்க அமைச்சர் சுதர்சினி பெர்ணாண்டோபுள்ளே தெரிவித்துள்ளார்.
60வயதிற்கு மேற்பட்டவர்களே அல்பா டெல்டா வைரசினால் அதிகளவு பாதிக்கப்படுவார்கள் என அவர் தெரிவித்துள்ளார்.
இதன்காரணமாகவே முதியவர்களிற்கு தடுப்பூசியை வழங்குவதற்கு அரசாங்கம் முன்னுரிமை அளித்துள்ளது என அவர் தெரிவித்துள்ளார்.
நாட்டில் டெல்டா வைரஸ் பரவும் ஆபத்து குறித்து நிபுணர்கள் எச்சரித்துள்ளனர்.  இதுவரையில் 12 கர்ப்பிணிப்பெண்கள் கொரோனாவால் உயிரிழந்துள்ளனர் என என இராஜாங்க அமைச்சர் தெரிவித்துள்ளார்.