14

14

ஒரு இறாத்தல் பாணின் விலை 1500 – டிசம்பரில் இன்னும் மோசமாகும் இலங்கை !

பணவீக்கம் தொடர்ந்தும் அதிகரித்தால், எதிர்வரும் டிசம்பர் மாதமளவில் ஒரு இறாத்தல் பாணின் விலை 1500 ரூபாவுக்கும் மேல் அதிகரிக்கும் என தேசிய கல்வி நிறுவகத்தின் பணிப்பாளர் சுனில் ஜயரத்ன தெரிவித்துள்ளார்.

அதேவேளை தற்போது 100 ரூபாவில் முச்சக்கர வண்டியில் செல்லும் பயணத்திற்கு, டிசம்பர் மாதம் 1790 ரூபா செலவாகும் எனவும் அவர் கூறியுள்ளார். ஆகவே அதிகரித்து வரும் நிலைமையை தடுக்க அனைவரும் இணைந்து செயற்பட வேண்டும் எனவும் தெரிவித்துள்ளார்.

இது தொடர்பில் தொடர்ந்தும் கருத்துத் தெரிவித்த அவர்,

அதீத பணவீக்கம் என்ற நிலைமையானது மிகவும் பயங்கரமானது. இதனால், கடந்த மார்ச் மாதம் பணவீக்கம் 18.2 வீதமாக இருந்ததுடன் ஏப்ரல் மாதம் 30 வீதமாக அதிகரித்தது. இந்த மாதம் 33.3 வீதமாக இருக்கின்றது. மாதாந்தம் பணவீக்கமானது 30 வீதம் என்ற கணக்கில் அதிகரித்தால், 100 ரூபாவுக்கு விற்பனை செய்யப்படும் பொருளின் விலை டிசம்பர் மாதத்தில் 1790 ரூபாக அதிகரிக்கும்.

பாணின் விலை டிசம்பர் மாதத்தில் 1790 ரூபாவாக அதிகரிக்கும். இதனால், என்ன நடக்கும்? இது அனைத்து செயற்பாடுகளுக்கும் பாதிப்பை ஏற்படுத்தும் எனவும் சுனில் ஜயரத்ன தெரிவித்துள்ளார்.

650 விக்கெட்களை வீழ்த்திய முதல் வேகப்பந்து வீச்சாளர் – ஜேம்ஸ் ஆண்டர்சன் சாதனை !

இங்கிலாந்து, நியூசிலாந்து அணிகள் இடையிலான 2-வது டெஸ்ட் கிரிக்கெட் போட்டி நாட்டிங்காமில் நடைபெற்று வருகிறது.

முதலில் துடுப்பெடுத்தாடிய   நியூசிலாந்து அணி முதல் இன்னிங்சில் 553 ஓட்டங்களுக்கு சகல விக்கெட்டுக்களையும் இழந்ததது. டேரில் மிட்செல் 190 ரன்னிலும், பிளெண்டல் 106 ரன்னிலும் ஆட்டமிழந்தனர். இங்கிலாந்து சார்பில் ஆண்டர்சன் 3 விக்கெட்டும், பிராட், பென் ஸ்டோக்ஸ், ஜாக் லீச் ஆகியோர் தலா 2 விக்கெட் வீழ்த்தினர்.

தொடர்ந்து ஆடிய இங்கிலாந்து அணி முதல் இன்னிங்சில் 539 ஓட்டங்களுக்கு சகல விக்கெட்டுக்களையும் இழந்ததது.  ஒல்லி போப் 145 ரன்னிலும், ஜோ ரூட் 176 ரன்னிலும் ஆட்டமிழந்தனர். நியூசிலாந்து சார்பில் போல்ட் 5 விக்கெட், பிரேஸ்வெல் 3 விக்கெட் வீழ்த்தினர்.

14 ஓட்டங்கள் முன்னிலை வகித்த நியூசிலாந்து 2வது இன்னிங்சில் 284 ரன்களில் ஆட்டமிழந்தது. இந்நிலையில், நியூசிலாந்து அணியின் டாம் லாதம் விக்கெட்டை வீழ்த்தியதன் மூலம் டெஸ்ட் கிரிக்கெட் போட்டிகளில் 650 விக்கெட்களை வீழ்த்திய முதல் வேகப்பந்து வீச்சாளர் என்ற பெருமையை ஜேம்ஸ் ஆண்டர்சன் பெற்றுள்ளார்.

அதிக விக்கெட்டுகளை வீழ்த்திய பந்துவீச்சாளர் பட்டியலில் ஆண்டர்சன் 3-வது இடத்தில் உள்ளார். முத்தையா முரளிதரன் 800 விக்கெட்டுகளுடன் முதலிடத்திலும், 708 விக்கெட்டுகளுடன் ஷேன் வார்ன் இரண்டாமிடத்திலும் உள்ளனர்.

சர்வாதிகாரம் ஒழியட்டும் கியூபாவில் மக்கள் போராட்டம் – அமெரிக்காவின் சதி என்கிறார் கியூப ஜனாதிபதி !

கியூபா அரசாங்கத்திற்கு எதிரான போராட்டங்களில் பங்கேற்றதற்காக 381 பேருக்கு  25 ஆண்டுகள் சிறைத்  தண்டனை விதித்துள்ளது. இவர்களில் 297 பேர் தேசத் துரோகம், பொதுக் குழப்பம், தாக்குதல் அல்லது கொள்ளை போன்ற குற்றச்சாட்டுகளை எதிர்கொண்டுள்ளனர்.

கம்யூனிஸ்ட் நாடான கியூபாவில் சுதந்திரம் வேண்டும். சர்வாதிகாரம் ஒழியட்டும்”, “விடுதலை வேண்டும்” “எங்களுக்குப் பயமில்லை. எங்களுக்கு மாற்றம் தேவை. சர்வாதிகாரம் இனி எங்களுக்கு வேண்டாம்,”  என கோஷமிட்டே நாடு முழுவதும் ஆயிரக்கணக்கானோர் ஆர்ப்பாட்டங்களில் ஈடுபட்டனர்.

கடுமையான பொருளாதார நெருக்கடிக்கு மத்தியில், விலைவாசி உயர்வு மற்றும் உணவு மற்றும் மருந்து பற்றாக்குறையை சுட்டிக்காட்டி இந்த மாபெரும் ஆர்ப்பாட்டம் இடம்பெற்றது.

தண்டனை விதிக்கப்பட்டவர்களில் “16 முதல் 18 வயதுடைய 16 இளைஞர்களும்” அடங்குவர் என்று அனைத்தின் அரச தரப்பு சட்டத்தரணி கூறியுள்ளார்.

மிகவும் அரிதான போராட்டத்தையடுத்து, கியூபா அதிபர் மிகுயேல் டையாஸ்-கேனல் நாட்டு மக்களுக்கு தொலைக்காட்சி மூலம் உரையாற்றினார். போராட்டங்களுக்கு அமெரிக்காவே காரணம் என அவர் குற்றம்சாட்டினார்.

1962-ஆம் ஆண்டில் இருந்து கியூபா மீது அமெரிக்கா விதித்திருக்கும் பொருளாதாரத் தடைகளை, “பொருளாதாரத்தை முடக்கும் கொள்கை” என்று அவர் சாடினார். நாட்டை வீழ்த்துவதற்காக அமெரிக்கா அமர்த்திய கூலிப்படையினர்தான் இந்தப் போராட்டக்காரர்கள் என்று கூறிய அவர், தனது ஆதரவாளர்கள் வீதிக்கு வந்து கியூப புரட்சியைப் பாதுகாக்க வேண்டும் என்றும் வலியுறுத்தினார்.

“புரட்சியாளர்களே! நீங்கள் வீதிக்கு வந்து போராட உங்களுக்கு உத்தரவிடப்பட்டுள்ளது” என்று அவர் அறிவித்தார்.

இலங்கையில் சிறுவர்களை அதிகமாக தாக்கும் இன்புளுவன்சா !

கொழும்பிலும் அதனை அண்டிய பிரதேசங்களிலும் தற்போது இன்புளுவன்சா (Influenza) நோயாளர்களின் எண்ணிக்கை அதிகரித்துவருவதாக சுகாதார பிரிவு தெரிவித்துள்ளது.
இது தொடர்பில் ஊடகங்களுக்கு கருத்து தெரிவித்த சிறுவர் நோய் தொடர்பான விசேட வைத்திய நிபுணர் டொக்டர் தீபால் பெரேரா,
குறிப்பாக சிறுவர்கள் மத்தியில் இந்நோய் பரவல் அதிகரித்துள்ளதாக தெரிவித்தார். காய்ச்சல், உடல்வலி, இருமல் மற்றும் சளி போன்றவை நோய்க்கான அடிப்படை அறிகுறிகளாகும் என டொக்டர் தீபால் பெரேரா சுட்டிக்காட்டினார்.
சிறுவர்கள் மத்தியில் இந்நோய் எளிதில் பரவக்கூடியது. இதனால் சிறுவர்கள மற்றும் பெரியவர்கள் தவறாமல் கைகளை கழுவ வேண்டும் என்றும் குறிப்பாக வகுப்பறைகள், மருத்துவமனைகள் மற்றும் பொது போக்குவரத்து சேவைகளைப் பயன்படுத்தும் போது முக கவசத்தை அணிவது மிக முக்கியமானது என்றும் டொக்டர் தீபால் பெரேரா கூறினார்.
காய்ச்சலால் பாதிக்கப்பட்டவர்களுக்கு அதிக அளவு இயற்கை திரவங்கள், பரிந்துரைக்கப்பட்ட பாராசிட்டமால் குளிசை வழங்கலாம் என்று தெரிவித்த அவர் இவ்வாறானவர்களுக்கு ஓய்வும் முக்கியமானது என்றும் தெரிவித்தார்.

அமெரிக்காவில் அதிகரிக்கும் துப்பாக்கி சூடு சம்பவங்கள் – மேலும் இருவர் பலி !

அமெரிக்காவில் துப்பாக்கி சூடு சம்பவங்கள் அடிக்கடி நடந்து வருகிறது. சமீபத்தில் டெக்சாஸ் மாகாணத்தில் உள்ள தொடக்க பள்ளியில் வாலிபர் நடத்திய துப்பாக்கி சூட்டில் 19 மாணவர்கள் உள்பட 22 பேர் பலியான சம்பவம் நாடு முழுவதும பெரும் அதிர்ச்சியை ஏற்படுத்தியது.

இதையடுத்து துப்பாக்கி கலாசாரத்துக்கு முடிவு கட்டுவதற்கான நடவடிக்கைகளை எடுக்க அரசு ஆயத்தமாகி வருகிறது. ஆனாலும் அமெரிக்காவில் துப்பாக்கி சூடு சம்பவங்கள் தொடர்ந்து நடந்தபடியே இருக்கிறது.

இந்த நிலையில் லாஸ் ஏஞ்சல்ஸ் நகரில் நடந்த துப்பாக்கி சூட்டில் 3 பேர் பலியானார்கள். லாஸ் ஏஞ்சல்சின் பாய்ல் ஹைட்ஸ் பகுதியில் உள்ள ஒரு கிடங்கில் விருந்து நிகழ்ச்சி நடந்தது. அங்கு திடீரென்று துப்பாக்கி சூடு நடத்தப்பட்டது. இதுகுறித்து தகவல் அறிந்ததும் போலீசார் சம்பவ இடத்துக்கு விரைந்து சென்றனர். அப்போது துப்பாக்கி சூட்டில் 2 பேர் உயிரிழந்தது தெரிய வந்தது.

படுகாயம் அடைந்த 5 பேரை மீட்டு ஆஸ்பத்திரியில் சேர்த்தனர். இதில் ஒருவர் சிகிச்சை பலனின்றி இறந்தார். துப்பாக்கி சூடு நடத்தப்பட்டதற்கான காரணம் குறித்தும், துப்பாக்கியால் சுட்டவர்கள் யார் என்பது குறித்தும் போலீசார் எந்த தகவலையும் வெளியிடவில்லை.

இலங்கையின் பொருளாதார நெருக்கடியை பயன்படுத்தி ஆதிக்கத்தை திணிக்க முயல்கிறதா மோடி தரப்பு..? – அதானி குழுமம் வெளியிட்டுள்ள அறிவிப்பு !

இந்தியப் பிரதமர் நரேந்திர மோடியின் அழுத்தத்தின் கீழ், ஜனாதிபதி கோட்டாபய ராஜபக்ஷ, அதானி நிறுவனத்திற்கு இலங்கையின் இரு மின்னுற்பத்தி திட்டங்களை வழங்கியதாக இலங்கை அதிகாரி ஒருவர் தெரிவித்த கருத்து ஏமாற்றமளிப்பதாக அதானி குழுமம் தெரிவித்துள்ளது.

இலங்கையில் முதலீடு செய்வதன் நோக்கம் மதிப்புமிக்க அண்டை நாடுகளின் தேவைகளை நிவர்த்தி செய்வதாகும் என அதானி குழுமத்தின் செய்தித் தொடர்பாளர் கூறியுள்ளதாக இந்திய ஊடகம் செய்தி வெளியிட்டுள்ளது.

அண்மையில், இலங்கையில் இரண்டு மின்னுற்பத்தி நிலையங்களை அமைப்பதற்கான ஒப்பந்தத்தை இந்தியாவின் அதானி குழுமத்துக்கு வழங்குவதற்கு தமக்கு அழுத்தம் கொடுக்கப்பட்டதாக ஜனாதிபதி தெரிவித்ததாக மின்சார சபையின் தலைவர் எம்.எம்.சீ.பெர்டினண்டோ, கோப் எனப்படும் பொதுமுயற்சிகள் பற்றிய குழுவில் தெரிவித்திருந்தார்.

இந்த கருத்து பெரும் சர்ச்சையை ஏற்படுத்தியுள்ள நிலையில்,எம்.எம்.சீ.பெர்டினண்டோ மன்னிப்பு கோரியிருந்ததுடன் தமது பதவி விலகல் கடிதத்தையும் எரிசக்தி அமைச்சரிடம் சமர்ப்பித்தார் என்பது குறிப்பிடத்தக்கது.

…………………………………

கோட்டாபாய ராஜபக்ஷவும் எம்.எம்.சீ.பெர்டினண்டோ தெரிவித்த “அதானி குழுமத்துக்கு மன்னார் காற்றாலை தொடர்பான உரிமத்தை வழங்குமாறு மோடியின் அழுத்தம் தொடர்பான கருத்தை மறுத்திருந்த போதும் கூட உயர்மட்ட அரசியல் விடயங்களை பேசும் போது நெருப்பில்லாமல் புகை வராது என்பதே உண்மை. அவ்வளவு பொறுப்பான பதவியிலுள்ள இலங்கை மின்சாரசபை தலைவர் எந்த ஒரு அழுத்தமும் இல்லாமல் மோடியின் இலங்கை மீதான ஆதிக்கம் தொடர்பில் கருத்து தெரிவிதிருக்க முடியாது.

ராஸபக்ஸக்கள் ஆட்சிக்கு வந்தது முதல் சீனாவுடன் காட்டிய நெருக்கமானது இந்தியாவை எந்தளவு தூரத்துக்கு அச்சப்படுத்தியது என்பதை இந்திய ஊடகங்களின் செய்திகள் தெளிவாக எடுத்துக்காட்டின. சீனா தொடர்பான அச்சம் காரணமாக இலங்கையின் பொருளாதார நெருக்கடியை பயன்படுத்தி இலங்கையை தனது முழுமையான ஆதிக்கத்துக்குள் கொண்டுவர இந்தியா முனைகிறது என்கின்றனர் அரசியல்விமர்சகர்கள்.

கீழைத்தேயத்தின் தானியக்களஞ்சியத்தை கடன் தேசமாக மாற்றிய இலங்கையின் தலைவர்கள் !

எதிர்கால நுகர்வுக்காக 100,000 மெட்ரிக் தொன் அரிசியை வழங்குமாறு இலங்கை பங்களாதேஷிடம் கோரிக்கை விடுத்துள்ளது.
வர்த்தக மற்றும் உணவு பாதுகாப்பு அமைச்சர் நளின் பெர்னாண்டோ மற்றும் பங்களாதேஷ் உயர்ஸ்தானிகருக்கு இடையில் கொழும்பில் இடம்பெற்ற சந்திப்பின் போதே இந்தக் கோரிக்கை விடுக்கப்பட்டுள்ளது.
நாட்டின் கைத்தொழில்களுக்கு தேவையான மூலப்பொருட்களை பெற்றுத்தருமாறும் அமைச்சர் கோரிக்கை விடுத்துள்ளதுடன் நட்பு நாடு என்ற ரீதியில் இயன்றளவு உதவிகள் வழங்கப்படும் எனவும் உயர்ஸ்தானிகர் தெரிவித்துள்ளார். வர்த்தகம் மற்றும் உணவுப் பாதுகாப்பு அமைச்சில் இந்தக் கலந்துரையாடல் நடைபெற்றது.
……………………………………..
கீழைத்தேயத்தின் தானியக்களஞ்சியம் என அரசர் காலங்களில் சிறப்பிக்கப்பட்ட தன்னிறைவு தேசமான இலங்கை இன்று ஒரு வேளை சோற்றுக்காக அருகிலுள்ள எல்லா நாடுகளிடமும் கையேந்துகின்ற நிலைக்கு தள்ளப்பட்டுள்ளது. இலங்கையில் விவசாயத்துக்கான எல்லா வளங்களுமே உள்ள நிலையில் ஆட்சியாளர்களின் முறையட்ட திட்டங்களாலும் கொள்கைகளாலும் இலங்கை இன்றைய இந்த விவசாய வீழ்ச்சியை எதிர்கொண்டுள்ளது.
உரப்பயன்பாடு தொடர்பில் தெளிவற்ற கொள்கைகளை மிக விறுவிறுப்பாக நடைமுறைப்படுத்தியமை, விவசாயிகளின் உற்பத்தி தொடர்பில் உத்தரவாத விலை ஒன்று நடைமுறையில் இல்லாமை, விவசாயிகளின் பிரச்சினைகளை கவனத்தில் எடுத்து நிவர்த்தி செய்யாமை என பல காரணங்களால் இன்றைய இந்த உணவுத்தட்டுப்பாடு ஏற்பட்டுள்ளது.
விவசாயத்துக்கு ஏற்ற வகையிலான நீர்ப்பாசன கட்டமைப்புக்கள் மன்னர் காலங்களில் அளவுக்கதிகமாகவே உருவாக்கப்பட்டுள்ள நிலையில் இதனை முறையாக பயன்படுத்த தவறிவிட்டனர் 2000க்கு பின்னர் பதவிக்கு வந்த ஜனாதிபதிகள்.
இப்போது கூட விவசாயத்தை மீண்டும் மேம்படுத்தி உணவு உற்பத்தியில்  தன்னிறைவை ஏற்படுத்த முயற்சிக்காத இலங்கையின் தலைவர்கள் தொடர்ந்தும் நெல்லை கடனாக பெறுவதிலேயே கவனம் செலுத்தகிகொண்டிருக்கின்றனர். இந்த முட்டாள் தனமான தலைவர்களே இலங்கையின் விவசாயப்பொருளாதாரத்தை அழித்தவர்கள் என்பஃதெ உண்மை.

விதி வலியது. அதாலேயே இலங்கை வங்குரோத்து நிலையில் என்கிறார் கஜேந்திரகுமார் பொன்னம்பலம் !

“தமிழ் தேசமும் சிங்கள தேசமும் சேர்ந்த நாடாக இலங்கை அங்கீகரிக்கப்பட்டு ஒரு முற்போக்கு பாதைக்கு இட்டுச்செல்வதற்கு சிங்கள தேசம் முன்வரவேண்டும்.” என தமிழ் தேசிய மக்கள் முன்னணியின் தலைவரும் யாழ். மாவட்ட பாராளுமன்ற உறுப்பினருமான கஜேந்திரகுமார் பொன்னம்பலம் தெரிவித்தார்.

மட்டக்களப்பு, படுவான்கரை பகுதியை உலுக்கிய மகிழடித்தீவு படுகொலையினை நினைவு தினம் இன்று (14) அனுஷ்டிக்கப்பட்டது.

1987 ஆம் ஆண்டு ஜனவரி 28 ஆம் திகதி இறால் வளர்ப்பு பண்ணையில் இடம்பெற்ற படுகொலையும், 1992 ஆம் ஆண்டு ஜூன் 12 ஆம் திகதி இடம்பெற்ற மகிழடித்தீவு படுகொலையும் சேர்த்து ஏறக்குறைய 180 பேர் படுகொலை செய்யப்பட்டிருந்தனர்.

இவர்களை நினைவுகூரும் வகையில் வருடாந்தம் இந்த நினைவு தினம் பல்வேறு அழுத்தங்களுக்கு மத்தியில் முன்னெடுக்கப்பட்டு வருகின்றது.

இன்றைய தினம் தமிழ் தேசிய மக்கள் முன்னணியின் ஏற்பாட்டில் படுகொலை செய்யப்பட்டவர்களின் உறவினர்களின் பங்களிப்புடன் நினைவேந்தல் நிகழ்வு நடைபெற்றது..

இதன்போது ஈகச்சுடர் ஏற்றப்பட்டு மலரஞ்சலி செலுத்தப்பட்டதை தொடர்ந்து அகவணக்கம் செலுத்தப்பட்டதுடன் நினைவுரை நடைபெற்றது.

இங்கு தொடர்ந்து உரையாற்றிய பாராளுமன்ற உறுப்பினர் கஜேந்திரகுமார் பொன்னம்பலம்,

தமிழ் தேசத்திற்குரிய நீதிக்கான போராட்டத்தினை தீவிரப்படுத்தியுள்ள இந்த சூழலில் தமிழினப் படுகொலை நடைபெற்ற இந்த வாரத்தில் இலங்கை அரசாங்கம் தனது நாட்டின் வங்குரோத்து தன்மையினை ஏற்றுக்கொள்ள வேண்டிய நிலைக்கு தள்ளப்பட்டுள்ளது.

தங்களது இனத்துக்கு மட்டும் தான் இந்த நாடு என நினைத்து தமிழினத்தை அடக்கியொடுக்கி அழிப்பதற்கு எடுத்த முயற்சியின் ஒட்டுமொத்த சுமைதான் ஒட்டு மொத்த பொருளாதாரத்தினையும் அழித்து வங்குரோத்து நிலைமைக்கு தள்ளப்பட்டுள்ளது. இன்றாவது சாதாரண சிங்கள அப்பாவி மக்கள் தங்களது தலைவர்கள் செய்த அநியாயங்களை இனவாத அடிப்படையில் தமிழ் மக்கள் மீது கட்டவிழ்த்துவிட்ட அநியாயங்களை இன அழிப்பினை சரியான வகையில் புரிந்து கொண்டுள்ளனர்.

இனவாதத்தினை காட்டி தனது சொந்த தேசத்தின் சொத்துகளை சூறையாடி தங்களது நலனைமட்டும் பேணிய தலைமைத்துவங்கள் 74 வது ஆண்டுக்கு பின்னர் அம்பலப்படுத்தப்பட்டுள்ளனர். இந்த உண்மையினை சாதாரண சிங்கள மக்கள் விளங்கிக்கொண்டு தமிழ் தேசத்தின் இருப்பினை அங்கீகரித்து, தமிழ் தேசமும் சிங்கள தேசமும் சேர்ந்த நாடாக இலங்கை அங்கீகரிக்கப்பட்டு ஒரு முற்போக்கு பாதைக்கு இட்டுச்செல்வதற்கு சிங்கள தேசம் முன்வரவேண்டும். அவ்வாறான ஒரு அடிப்படையான மாற்றம்வரும் போது தான் இந்த இலங்கை தீவின் முழுமை அடையக்கூடியதாகயிருக்கும்.

இலங்கை அரசு வங்குரோத்து நிலைமைக்கு தள்ளப்பட்டுள்ள இந்த சூழ்நிலையில் புலம்பெயர்ந்துள்ள தமிழ் மக்களின் உழைப்பு இலங்கை அரசின் உழைப்பினைவிட அதிகமாகவுள்ள நிலையில் நல்லிணக்கத்தினை ஏற்படுத்த தமிழ்தேசத்தின் இருப்பினை உறுதிப்படுத்தக்சுகூடிய வகையில் இலங்கையின் அமைவினை மாற்றியமைப்பதன் ஊடாக சிங்கள தேசமும் தமிழ் தேசமும் இணைந்து இந்த நாட்டினை ஆக்கபூர்வமான வகையில் கட்டியெழுப்புவதற்கு தமிழினம் தயாராகயிருக்கின்றது என்று கூறினார்.

………………………………………………………………………

தமிழ் மக்களை இப்படியான கஜேந்திரகுமார் போன்ற தலைவர்கள் தான் இன்னமும் முட்டாள்களாக்கி வைத்துக்கொண்டிருக்கிறார்கள். தமிழர்கள் மீதான அடக்குமுறைகள் எந்தகாலத்திலும் ஏற்றுக்கொள்ள முடியாதவை தான். அதற்காக தமிழர்களின் சாபம் நாட்டை இப்படி ஆக்கிவிட்டது எ்ன்பதெல்லாம் எந்த வகையிலான புரிதல் என்பதே தெரியவில்லை. இந்த பொருளாதார நெருக்கடியினால் சிங்கள மக்கள் படும் அதேயளவு துயரத்தை தமிழர்களும் தான் குறிப்பாக போரினால் பாதிக்கப்பட்ட வன்னி மக்கள் தான் இந்த பொருளாதார நெருக்கடியினாலும் சிதைந்து சின்னாபின்னமாகிக்கொண்டிருக்கிறார்கள். இவர்கள் சொல்வது போல் விதி வலியது தான் எனின் சிங்கள மக்களை மட்டும் தாக்க வேண்டியது தானே இந்த விதி.., மக்களை இன்னமும் முட்டாள்களாக்கி வைத்திருப்பதில் தமிழ்தேசிய தலைவர்களுக்கு அவ்வளவு அக்கறை.

நாட்டின் பொருளாதார நெருக்கடியை கவனித்து தமிழ் மக்களுடைய பொருளாதார தேவைக்காக என்ன செய்கிறார்கள் – செய்தார்கள் இந்த தமிழ்தேசிய தலைவர்கள்..? மக்களிடையே சுயதேவை உற்பத்தியை முன்னெடுக்க என்ன திட்டங்களை முன்மொழிந்துள்ளார்கள்..? எதுவுமேயில்லை. இந்த தமிழ்தேசியமும் இல்லாது விட்டால் இவர்களுக்கு ஒன்றுமே இல்லை என்பதே உண்மை.

இது போக முன்னணியினர் இன்னமும் போலித்தேசியம் பேசிக்கொண்டிருப்பதில் காலத்தை வீணடிக்கிறார்களே தவிர மக்களை அரசியல்மயப்படுத்த முனையவில்லை என்பதே வருத்தமான உண்மை. சட்டத்தரணி மணிவண்ணனை ஒதுக்கி விட்டு இவர்கள் செய்யும் அரசியலே இவர்களுடைய தராதரத்தையும் – தமிழ்தேசிய உணர்வையும் படம்பிடித்து காட்டுகின்றது. அரச தேர்தலை புறக்கணியுங்கள் என கூறிய இதே நபர்கள் தான் இன்று பாராளுமன்றிலும் அங்கத்துவம் பெற்றுள்ளார்கள்.

 

மக்கள் உணர்ச்சிவசப்படும் அரசிலயலுக்கு முக்கியத்துவம் கொடுக்காது சிந்தித்து செயற்படும் நிலைக்கு மாறவேண்டியதே இப்போதுள்ள ஒரே வழி. மக்கள் பிரச்சினைகளை வைத்து அரசியல் செய்யாத – மக்களுக்கான தலைவர்களை தேர்வு செய்வது அவசியமாகிறது.

தமிழ் மக்கள் சுதாகரிக்காது விட்டால் இதே நபர்கள் தான் தொடர்ந்தும் எங்களை ஏமாற்றிக்கொண்டிருக்கப்போகிறார்கள்.

 

விழித்துக்கொள்ளுங்கள் மக்களே..!

பால் உற்பத்தியை இரட்டிப்பாக்க அமெரிக்கா உதவி !

அமெரிக்க விவசாய திணைக்களத்தின் ‘முன்னேற்றத்திற்கான உணவு’ முயற்சியில் பங்குபெறும் இலங்கைப் பால் பண்ணையாளர்களின் பால் உற்பத்தியை இரட்டிப்பாக்குவதை நோக்கமாகக் கொண்ட 27 மில்லியன் அமெரிக்க டொலர் பெறுமதியான திட்டத்தில் இலங்கையின் விவசாயத் திணைக்களம் கைச்சாத்திட்டுள்ளது.
நேற்று இடம்பெற்ற இந்த நிகழ்வில் இலங்கைக்கான அமெரிக்கத் தூதுவர் ஜூலி சங் கலந்துகொண்டார்.
இலங்கையின் உணவுப் பாதுகாப்பு மற்றும் பொருளாதார வளர்ச்சிக்கு ஆதரவளிப்பதற்கான அமெரிக்காவின் தொடர்ச்சியான முயற்சிகளின் ஒரு பகுதியாக, 80,000 இலங்கையர்கள் இந்த திட்டத்தின் மூலம் இறுதியில் உதவிகளைப் பெறுவார்கள் என மதிப்பிடப்பட்டுள்ளது.
கொவிட் தொற்று உட்பட எதிர்பாராத தாமதங்களுக்குப் பின்னர் , அமெரிக்க தூதரகம் மற்றும் இலங்கை விவசாயத் திணைக்களம் இந்த கூட்டு ஒப்பந்தத்தை நேற்று இறுதி செய்துள்ளன.

அரச உத்தியோகத்தர்களுக்கு வெள்ளிக்கிழமை விடுமுறை – விவசாயம் செய்யுமாறு பணிப்பு !

நாட்டில் எதிர்வரும் வெள்ளிக்கிழமை முதல் அரச உத்தியோகத்தர்களுக்கு விடுமுறை வழங்கப்படும் என அறிவிக்கப்பட்டுள்ளது. இந்த விடயம் தொடர்பாக நேற்று (திங்கட்கிழமை) இடம்பெற்ற அமைச்சரவைக் கூட்டத்தில் முன்வைக்கப்பட்ட யோசனைக்கு ஒப்புதல் அளிக்கப்பட்டுள்ளது.
எவ்வாறிருப்பினும் சுகாதார, மின்சக்தி, எரிபொருள், பாதுகாப்பு, கல்வி மற்றும் இதர அத்தியாவசிய சேவைகள் அன்றையதினம் இயங்கும் என அமைச்சர் தினேஷ் குணவர்தன தெரிவித்துள்ளார்.
எதிர்வரும் 3 மாதங்களுக்கு இவ்வாறு அரசாங்க உத்தியோகத்தர்களுக்கு வாரத்தில் ஒருநாள் விடுமுறை வழங்குவதற்கு தீர்மானித்துள்ளதாக அவர் குறிப்பிட்டுள்ளார். அரச உத்தியோகத்தர்கள் விடுமுறையின் போது விவசாயம் மற்றும் பயிர்ச்செய்கையில் ஈடுபடுவதை ஊக்குவிக்கும் வகையில் இந்த நடவடிக்கை எடுக்கப்பட்டுள்ளது.
எதிர்காலத்தில் ஏற்படக்கூடிய உணவுப் பற்றாக்குறைக்கு தீர்வாக இந்த நடவடிக்கை எடுக்கப்பட்டுள்ளதாக அரசாங்கம் தெரிவித்துள்ளது. இது தொடர்பான பிரேரணை பொதுநிர்வாக, உள்நாட்டலுவல்கள் மற்றும் மாகாண சபை அமைச்சரினால் முன்வைக்கப்பட்டுள்ளது.
இதன்மூலம், நீர், மின்சாரம், சுகாதாரம், பாதுகாப்பு, கல்வி, போக்குவரத்து, துறைமுகம் மற்றும் விமான சேவைகள் போன்ற அத்தியாவசிய சேவைகளை வழங்கும் நிறுவனங்களைத் தவிர அனைத்து அரச நிறுவனங்களையும் அடுத்த 3 மாதங்களுக்கு வெள்ளிக்கிழமை மூடுவதற்கு அமைச்சரவை அனுமதி வழங்கியுள்ளது.
எரிபொருள் தட்டுப்பாடு காரணமாக ஏற்பட்டுள்ள போக்குவரத்து சிரமங்களையும் மின்சாரம் இல்லாத சந்தர்ப்பங்களில் அலுவலகங்களை நடத்துவதில் ஏற்படக்கூடிய சிரமங்களையும் கருத்திற்கொண்டு இந்த தீர்மானம் எட்டப்பட்டுள்ளது.