Tuesday, November 30, 2021

இலங்கைத் தமிழர்களுக்கு அதிகாரப் பகிர்வு : கருணாநிதியுடன் சிதம்பரம் ஆலோசனை

08chidambaram.jpgஇலங் கையில் தமிழர்களுக்கு அதிகாரப் பகிர்வு வழங்குவது குறித்து சென்னையில் முதல்வர் கருணாநிதியும், உள்துறை அமைச்சர் ப.சிதம்பரமும் நேற்று ஆலோசனை நடத்தியுள்ளதாக இந்தியச்செய்திகள் தெரிவிக்கின்றன. கருணாநிதியை அவரது கோபாலபுரம் இல்லத்தில் நேற்று மாலை ப.சிதம்பரம் சந்தித்துக் கலந்துரையாடிய போது இருவரும் இலங்கைப் பிரச்சினை உள்ளிட்டவை குறித்து ஆலோசனை நடத்தினர்.

அந்த ஆலோசனை முடிந்த பின்னர் செய்தியாளர்களிடம் ப.சிதம்பரம் பேசுகையில்,

“மத்திய அமைச்சரவை அமைந்த பிறகு, உள்துறை மந்திரியாக பொறுப்பேற்றுக் கொண்டதற்கு பின் இப்போது தான் முதன் முதலாக முதலமைச்சரைச் சந்திக்கிறேன். நாட்டிலுள்ள பாதுகாப்பு நிலை, இலங்கைத் தமிழர் பிரச்சினையில் நாம் அடுத்து மேற்கொள்ள வேண்டிய நடவடிக்கைகள், அங்கு இடம்பெயர்ந்து அகதிகளாக இருக்கும் தமிழர்களுக்கு எந்த வகையில் உதவிகளை செய்வது, எந்த வகையில் மறுவாழ்வு அளிப்பது, அவர்களுக்கு அரசியல் அதிகாரப் பகிர்வில் என்ன செய்வது என்பதைப் பற்றியெல்லாம் முதலமைச்சரிடம் யோசனை கேட்டேன்.

அமைச்சரவை கூட்டத்திலும், குழுக் கூட்டத்திலும் இவ்விடயங்கள் விவாதத்திற்கு வரும்போது தெரிவிப்பேன். இலங்கைத் தமிழர்களை உடனடியாக பத்திரமான இடங்களிலே குடியமர்த்த வேண்டும். அவரவர்களுடைய இடங்களுக்கு அவர்கள் பத்திரமாக அனுப்பி வைக்கப்பட வேண்டும். வீடிழந்த மக்களுக்கு அதற்கான ஏற்பாடுகளை செய்து தர வேண்டும். இலங்கை அரசு அதற்கான பணிகளிலே உடனடியாக ஈடுபட வேண்டும்.

இந்திய அரசைப் பொறுத்தவரையில் அதிக அளவுக்கு நிதிஉதவி வழங்குவதாக அறிவித்திருக்கின்றது. அந்தத் தொகை முறையாக செலவழிக்கப்பட வேண்டும். மேலும் இலங்கை அரசு தமிழர்களுக்குத் தரவேண்டிய அதிகாரப் பங்கீடுகள் குறித்தும் முடிவெடுக்க வேண்டும்” என்றார்.

இந்தியாவுக்குப் போக வேண்டாம் என அமெரிக்கா தனது நாட்டு குடிமக்களுக்கு எச்சரித்துள்ளது குறித்து கேட்கப்பட்ட கேள்விக்குப் பதிலளித்த ப.சிதம்பரம்,  “அமெரிக்கா, இந்தியா செல்லும் தனது நாட்டு சுற்றுலா பயணிகளை எச்சரித்ததாக முதலில் நினைத்தோம். நேற்று அவர்கள் அதை விளக்கியிருக்கிறார்கள். எச்சரிக்கை அல்ல, ஆலோசனை என்று சொல்லியிருக்கிறார்கள். சுற்றுலா பயணிகள் அச்சப்பட வேண்டிய அவசியமில்லை. உலகில் பல நாடுகளை விட இந்தியா பத்திரமான நாடு.

உளவுத்துறை மூலமாக தீவிரவாதிகள் பற்றி தகவல்கள் வருகின்றன. தீவிரவாதி மதனி பற்றி தகவல் வந்து டெல்லி பொலிஸார் அவரைக் கைது செய்திருக்கிறார்கள். அதற்காக அவர்களைப் பாராட்ட வேண்டும். தீவிரவாதிகள் பற்றி வருகின்ற தகவல்களை அந்தந்த மாநில அரசுகளுடன் பகிர்ந்து கொள்கிறோம். அப்படி பகிர்ந்து கொள்ளும்போது அந்த மாநில காவல்துறை அதிகாரிகள் தேவையான முன்னெச்சரிக்கை நடவடிக்கை எடுக்கிறார்கள். அது அவர்களுடைய கடமை. அதிலே நாம் தலையிடக் கூடாது” என அமைச்சர் சிதம்பரம் ஊடகவியலாளிடம் தெரிவித்தார். 

Show More
Leave a Reply

Your email address will not be published. Required fields are marked *