தேசம்

அரசாங்கத்திடம் இருக்கும் வடக்கு மக்களுக்கு சொந்தமான காணிகள் அனைத்தையும் மீண்டும் அந்த மக்களுக்கு வழங்குவோம் என ஜனாதிபதி அநுரகுமார திசாநாயக்க உறுதியளித்துள்ளார்.

அத்துடன் சட்டமா அதிபரின் ஆலோசனைகளுக்கமைய அரசியல் கைதிகளை விரைவில் விடுதலை செய்வோம் எனவும் ஜனாதிபதி வாக்குறுதியளித்துள்ளார்.

வவுனியாவில்  இன்று (10) மாலை இடம்பெற்ற தேசிய மக்கள் சக்தியின் நாடாளுமன்றத் தேர்தலுக்கான பிரசாரக் கூட்டத்தில் கலந்துகொண்டு உரையாற்றும் போதே ஜனாதிபதி இவ்வாறு குறிப்பிட்டார்.

இங்கு தொடர்ந்து உரையாற்றிய அவர், ”முன்னாள் ஜனாதிபதி ரணில் விக்ரமசிங்க கடந்த தேர்தலில் பிரச்சாரத்திற்காக இந்த மாவட்டத்துக்கு வந்தார். வன்னி மக்கள் ஓரளவு வாக்கை அவருக்கு வழங்கியிருந்தனர்.

இந்த தேர்தலில் அவர் வருவாரா? அதேபோல எதிர்க்கட்சி தலைவர் சஜித் பிரேமதாசவும் வந்தார். இந்த தேர்தலுக்கு அவர் இங்கு வருவாரா? வரவில்லை. ஏன்? அவர்கள் அவர்களது வெற்றிக்காக மாத்திரமே தேர்தலில் நின்றார்கள்.

ஜனாதிபதித் தேர்தலில் வன்னியில் எமக்கு வீழ்ந்த 21 ஆயிரம் வாக்குகளும் எமது வெற்றிக்கு பாரிய ஒரு பங்களிப்பையும் சக்தியையும் வழங்கியிருந்தது.

வடக்கு மக்களுக்கு சொந்தமான காணிகள் பாதுகாப்பு காரணங்களுக்காக அரசாங்கத்திடம் இருக்கிறது. அந்தக்காணிகள் அனைத்தையும் மீண்டும் அந்த மக்களுக்கு நாங்கள் வழங்குவோம். எங்களுக்குத் தெரியும் இங்கு யுத்தம் ஒன்று நடந்தது பல்வேறு அநீதிகளுக்கு முகம்கொடுத்தோம்.

இன்று அரசியல் கைதிகள் உள்ளனர். அவர்களை சட்டமா அதிபரின் ஆலோசனைகளுக்கு அமைய விரைவில் விடுதலை செய்வோம் என்று வாக்குறுதியளிக்கிறேன். இது சமத்துவமான ஒற்றுமையான ஆட்சி. இதனை தென்பகுதி எதிர்க்காது.

ஆனால் அன்று அப்படி அல்ல வடக்கில் இவ்வாறு ஒன்று நடந்தால் தென்பகுதி அதற்கு எதிராக இருந்தது. எங்களை பிரித்து அரசியல் செய்தார்கள். நாங்கள் இன்று அனைவரும் ஒன்றாக இருக்கிறோம்.

வடக்கின் மீன்வளத்தை பெரிய அளவில் வேறு நாடுகள் வந்து சூறையாடுகின்றன. எமது மீன்வளம் அழியும்வாறாக அதனை செய்கின்றனர். நாங்கள் அரசு என்ற வகையில் எமது கடற்றொழிலாளர்களின் உரிமைக்காக வடக்கில் வாழும் கடற்றொழிலாளர்களின் பாதுகாப்புக்காக அனைத்து நடவடிக்கைகளையும் எடுப்போம்.

சூரியஒளி இன்று மதிப்பு வாய்ந்துள்ளது. அது எமது சக்தி. அதனை துண்டு துண்டாக விற்பதற்கு நாங்கள் ஒருபோதும் இடமளிக்கமாட்டோம். இந்த ஒப்பந்தங்களை எல்லாம் நாங்கள் மீளாய்வு செய்யவேண்டும். இந்த வளங்களை நாட்டினதும் மக்களினதும் எதிர்காலத்திற்காக பயன்படுத்த வேண்டும்.

கேரள கஞ்சா, உட்பட போதைப்பொருள் பிரச்சினை இங்கு இருக்கிறது. அவற்றை தடுக்க வேண்டும். எனவே புதிய ஒரு நிலைக்கு இந்த நாட்டை அழைத்துச் செல்லவேண்டும்.

அத்துடன் எமது முதலாவது வரவுசெலவுத்திட்டத்தில் அரச ஊழியர்களுக்கான சம்பள அதிகரிப்பு நிச்சயம் இருக்கும்“ என தெரிவித்தார்.

எதிர்வரும் நாடாளுமன்றத் தேர்தலில் வாக்களிப்பதில் இருந்து விலகியிருப்பதையோ அல்லது செல்லாத வாக்களிப்பதையோ தவிர்த்து, உரிய முறையில் வாக்களிக்குமாறு தேர்தல்கள் ஆணைக்குழுவின் முன்னாள் தலைவர் மஹிந்த தேசப்பிரிய, வாக்காளர்களை வலியுறுத்தியுள்ளார்.

நேற்றைய தினம் (09) இடம்பெற்ற ஊடகவியலாளர் சந்திப்பில் கலந்து கொண்டு கருத்து தெரிவித்த அவர்,

வாக்கு எமது உரிமை, எமது சக்தி, எமது குரல், அது எமது நாட்டின் எதிர்காலத்தை வடிவமைக்கின்றது.

இந்த உரிமையை நாம் பயன்படுத்த வேண்டும் என்பதை வலியுறுத்தினார்.

லெபனான்  மீது இஸ்ரேல்  நடத்திய வான்வழித் தாக்குதல்களில் பல குழந்தைகள் உட்பட குறைந்தது 40 பேர் கொல்லப்பட்டதாக லெபனான் அதிகாரிகள் தெரிவித்துள்ளனர்.

லெபனான் தலைநகர் பெய்ரூட்டின் தெற்கு புறநகர் பகுதிகளில் இஸ்ரேல் நேற்றையதினம்  கடுமையாக குண்டுவீசி தாக்கியது. கடந்த வெள்ளிக் கிழமையில் இருந்து கடலோர நகரமான டயரில் குறைந்தது ஏழு பேர் கொல்லப்பட்டனர் என்று லெபனான் சுகாதார அமைச்சகம் தெரிவித்துள்ளது.

முன்னதாக இந்த நகரில் இருக்கும் பொதுமக்கள் வெளியேற வேண்டும் என்று இஸ்ரேலிய இராணுவம் உத்தரவிட்டு இருந்தது. எனினும், வெள்ளிக்கிழமை தாக்குதல் குறித்து இஸ்ரேல் இராணுவம் சார்பில் எந்த உத்தரவும் வெளியிடப்படவில்லை.

உயிரிழந்தவர்களில் இரண்டு குழந்தைகள் இடம்பெற்றுள்ளதாக லெபனான் சார்பில் தெரிவிக்கப்பட்டுள்ளது. தாக்குதல் நடந்த பகுதிகளில் மீட்புப் பணிகள் நடைபெற்று வருகின்றன.

தாக்குதலுக்குப் பிறகு மீட்கப்பட்ட மற்ற உடல் பாகங்களை அடையாளம் காண டி.என்.ஏ. சோதனை செய்யப்பட உள்ளதாக தெரிவிக்கப்பட்டுள்ளது.

நேற்று (சனிக்கிழமை) மற்ற நகரங்களில் நடந்த தாக்குதல்களில் 13 பேர் கொல்லப்பட்டனர். இதில் ஹிஸ்புல்லா மற்றும் அதன் கூட்டு அமைப்புகளைச் சேர்ந்த ஏழு மருத்துவர்கள் உள்ளடங்குகிறார்கள். இதே போல் வரலாற்று நகரமான பால்பெக்கைச் சுற்றியுள்ள கிழக்கு சமவெளிகளில் நடத்தப்பட்ட இஸ்ரேலிய தாக்குதல்களில் குறைந்தது 20 பேர் கொல்லப்பட்டனர்.

லெபனானில் கடந்த ஆண்டு இஸ்ரேலிய தாக்குதல்களில் குறைந்தது 3136 பேர் கொல்லப்பட்டனர். மேலும் 13, 979 பேர் காயமடைந்துள்ளனர். இதில் 619 பேர் பெண்கள் மற்றும் 194 குழந்தைகள் அடங்குவதாக தெரிவிக்கப்பட்டுள்ளது.

கொழும்பில் பலர் இணைந்து மேற்கொண்ட நிதி மோசடியை கணிணி குற்ற விசாரணை பிரிவினர் கண்டுபிடித்துள்ளதுடன் 59 பேரை கைதுசெய்துள்ளனர்.

நிதிமோசடி திட்டத்திற்கு தலைமைதாங்கிய இருவர் உட்பட 59 பேர் கைதுசெய்யப்பட்டுள்ளனர் என அதிகாரிகள் தெரிவித்துள்ளனர்.

இவர்கள் வெளிநாட்டவர்களை இலக்குவைத்து இந்த மோசடியில் ஈடுபட்டதுடன் சுமார் 300 மில்லியன் ரூபாய்க்கு மேல் மோசடி செய்துள்ளனர்.

இலங்கையை சேர்ந்த வேவ்டெக் என்ற நிறுவனம் வெளிநாட்டவர்களிடம் பணமோசடியில் ஈடுபட்டுள்ளது என சிஐடியினரிடம் தென்கொரிய தூதரகம் வியாழக்கிழமை முறைப்பாடு செய்திருந்தது.

வர்த்தகமுயற்சி என்ற பெயரில் தென்கொரியாவை சேர்ந்த ஒருவரிடம் 300 மில்லியன் மோசடி செய்துள்ளனர் என தென்கொரிய தூதரகம் தனது முறைப்பாட்டில் தெரிவித்திருந்தது.

வர்த்தக முயற்சியொன்றில் முதலீடு செய்வதாக தெரிவித்து தென்கொரிய பிரஜையொருவரிடமிருந்து ஒருமில்லியன் அமெரிக்க டொலர்களிற்கு மேல் பெற்றுக்கொண்டவர்கள் பின்னர் அதனை திருப்பிக்கொடுக்கவில்லை என தென்கொரிய தூதரகம் தெரிவித்திருந்தது.

இதனை தொடர்ந்து விசாரணைகளை மேற்கொண்ட சிஐடியின் சிசிஐடி பிரிவினர் கொழும்பு ஹவெலொக் வீதியில் ஆடம்பர தொடர்மாடியொன்றிலிருந்து மேற்கொள்ளப்படும் மோசடி குறித்து கண்டுபிடித்தனர்.

நேற்று மேற்கொள்ளப்பட்ட சோதனை நடவடிக்கையின் போது 57 பேர் இலங்கையர்கள் உட்பட 59 பேர் கைதுசெய்யப்பட்டுள்ளனர்.

கைதுசெய்யப்பட்டவர்களில் 27 பேர் பெண்கள் அவர்களில் இருவர் கர்ப்பிணிகள் என பொலிஸார் தெரிவித்துள்ளனர்.

கைதுசெய்யப்பட்டவர்கள் ஐந்துமொழிகளில் பேசும் திறமை மிக்கவர்கள் என தெரிவித்துள்ள பொலிஸார் இதன் பின்னர் பெண் சட்டத்தரணியொருவரும் இந்த நடவடிக்கைகளிற்கு முகாமையாளராக செயற்பட்டு வந்த ஒருவரும் கைதுசெய்யப்பட்டுள்ளனர் என தெரிவித்துள்ளனர்.

கைதுசெய்யபட்ட ஊழியர்கள் தங்களிற்கு ஐடி தொழிலில் வேலைவாய்ப்பு என தெரிவித்தே வேலைக்கு சேர்த்தார்கள் ஆனால் தங்களை வேலைக்கு சேர்ப்பதற்கு முன்னர் ஜப்பானிய கொரிய ஜேர்மனிய மொழிகளில் தங்களிற்கு திறமையுள்ளதா என்றே பரிசோதித்தார்கள் என குறிப்பிட்டுள்ளனர்.

இவர்கள் தங்கள் ஆடம்பர அலுவலகத்திற்கு 9 மில்லியன் செலுத்திவந்துள்ளமை தெரியவந்துள்ளது.

தங்களுடைய பிரச்சினைகளையே அறியாதவர்கள் எப்படி மக்களுடைய பிரச்சினைகளை தீர்க்கப் போகின்றார்கள்? கலைஞர் ஆய்வாளர் மாவடி ஏஆர் சிறிதரனுடன் உரையாடல்

சண்டே லீடர் ஆசிரியர் லசந்த விக்கிரமதுங்க, ரக்பிவீரர் வாசிம் தாஜூதீன் படுகொலைகள் குறித்து விசாரணைகளை மேற்கொள்வேன் என ஜனாதிபதி  அனுரகுமாரதிசநாயக்க உறுதியளித்துள்ளார்.

லசந்தவிக்கிரமதுங்க வாசிம்தாஸ்ரீஜூதீன் பிரகீத் எக்னலிகொட விவகாரங்கள் குறித்து விசாரணை செய்து அதற்கு காரணமானவர்களை அரசாங்கம் நீதியின் முன் நிறுத்தும் என அவர் தெரிவித்துள்ளார்.

தம்புள்ளையில் தேர்தல் பேரணியில் உரையாற்றுகையில் இதனை தெரிவித்துள்ள அவர் அரசியல் அதிகாரம் படைத்தவர்களால் அப்பாவி மக்கள் கொல்லப்படும் யுகத்தை முடிவிற்கு கொண்டுவருவோம் என தெரிவித்துள்ளார்.

அனைவரினதும் உயிர்களும் பெறுமதியானவை என அவர் தெரிவித்துள்ளார்.

இந்த நிலையில் சுன்னாகம் சம்பவத்துடன் தொடர்புடைய இரு பொலிஸார் பணி இடை நீக்கம் – தேசிய மக்கள் சக்தி வேட்பாளர் Dr. சிறிபவானந்தராஜா பொலிஸ் மாஅதிபருடன் தொடர்பு கொண்டு உடன் நடவடிக்கை.

நேற்றைய தினம் சுன்னாகம் பகுதியில் அமைதியின்மைக்கு காரணமான இரு பொலிஸ் உத்தியோகத்தர்கள், மக்கள் மீது மது போதையில் வந்தோர் காட்டுமிராண்டி தனமாக நடந்து கொண்ட குற்றச்சாட்டை தேசிய மக்கள் சக்தி வேட்பாளர் Dr. சிறிபவானந்தராஜா அவர்கள் உடனடியாக பொலிஸ் மா அதிபரின் கவனத்துக்கும் கட்சி மேலிடத்துக்கும் கொண்டு சென்றார். உடனடியாக சம்பந்தப்பட்ட உத்தியோகத்தர்கள் மீது நடவடிக்கை எடுக்க வலியுறுத்தியும் இருந்தார்.

அவரின் வேண்டுகோளுக்கிணங்க, இரு பொலீஸ் உத்தியோகத்தர்கள் உடனடியாக பதவி இடைநிறுத்தப்பட்டுள்ளதுடன், யாழ்ப்பணத்தில் இருந்து மேலதிக விசாரணைகாக, உயர் மட்ட அறிவுறுத்தலுக்கு அமைய, மேலதிக பொலிஸார் சுன்னாகத்துக்கு அனுப்பப்பட்டுள்ளனர்.

இது தொடர்பாக கருத்து தெரிவித்த, தேசிய மக்கள் சக்தி வேட்பாளர் Dr. சிறிபவானந்தராஜா மக்களுக்கான நீதியை பெற்றுத் தருவதில் தேசிய மக்கள் சக்தி ஒரு போதும் பின்னிற்காது என்றும், மேலதிக விசாரணைகளின் பின் தொடர்புபட்ட அனைவரும் தண்டிக்கப்படுவார்கள் என்றும் தெரிவித்தார்.

அதுவரை மக்களை அமைதி காக்கவும் வேண்டினார். இந்த தேர்தல் காலத்தில் இப்படியான சம்பவங்களை வைத்து சில அரசியல் கட்சிகள் குளிர்காய முற்படுவது வெட்கக்கேடானது என்றும் தெரிவித்தார்.

குழந்தைகளுக்கு முறையான கல்வியை வழங்குவதன் ஊடாக இந்த நாட்டில் வறுமையை இல்லாதொழிக்கும் சீர்திருத்தங்களை நடைமுறைப்படுத்தவுள்ளதாக ஜனாதிபதி அநுர குமார திசாநாயக்க தெரிவித்துள்ளார்.

குருநாகலில் இடம்பெற்ற மக்கள் சந்திப்பின் போதே ஜனாதிபதி இதனைத் தெரிவித்தார்.

தொடர்ந்து கருத்து தெரிவித்த ஜனாதிபதி அநுர குமார திசாநாயக்க,

“கடந்த ஜனாதிபதி தேர்தலில் தந்தையிடமிருந்து மகனுக்கு அதிகாரம் செல்லும் என எதிர்பார்க்கப்பட்டது. அரசாங்கத்தை வைத்திருந்த ஜனாதிபதி, மாமாவிடமிருந்து மகனுக்கு அதிகாரத்தை எதிர்பார்த்தார். ஆனால் இந்நாட்டு மக்கள் செப்டம்பர் 21 அன்று அந்த ஊழல் மற்றும் நாசகார குடும்பங்கள் அனைத்தையும் தோற்கடித்து சாதாரண மக்களுக்கு அதிகாரத்தை மாற்றினர். அந்த ஊழல்வாதிகள் கனவிலும் நினைத்திருக்க மாட்டார்கள் தங்களது வாழ்நாள் காலத்தில் இவ்வாறானதொரு சம்பவமொன்று நடக்கும் என்று, எவ்வாறாயினும், மீண்டும் அவர்களின் கைகளுக்கு அதிகாரம் மாற்றப்படாது என்பதை நினைவில் கொள்ளுங்கள்.

நமது அரசின் மிக முக்கியமான திட்டம் கிராமப்புற வறுமையை ஒழிப்பதாகும். நல்ல கல்வியையும் அறிவையும் அரசால் வழங்க முடியுமானால், அந்த குடும்பம் ஏழைக் குழந்தையைப் படிக்க வைத்து அவர்களின் வறுமையில் இருந்து மீண்டு வருவர். ஆனால் அந்தக் குடும்பம் ஏழ்மையானதாகவும், குழந்தை படிக்காதவராகவும் இருந்தால், அந்தக் குடும்பம் ஏழ்மையானது, இது சுழற்சி வறுமையின் நெருக்கடியாகும். எனவே, கல்வியில் ஒரு பெரிய சீர்திருத்தத்தை நாங்கள் கொண்டு வந்துள்ளோம், இதன் மூலம் ஒவ்வொரு குழந்தையும் பாடசாலையை விட்டு வெளியேறும் வகையில் எதிர்காலத்திற்கான கல்வி அல்லது தொழில்முறை பாதையில் வர வேண்டும்.

ஜனாதிபதி தேர்தலில் எமக்கு வாக்களிக்காதவர்கள் இருந்தனர். சிலருக்கு சிறு சந்தேகம் இருந்தது. அவநம்பிக்கை ஏற்பட்டது. தயக்கம் இருந்தது. ஆனால் இப்போது… தோழர்கள் என்று அழைக்கிறார்கள்… அப்போது எங்களுக்கு வாக்களிக்காதவர்கள்தான் தற்போது தேர்தல் பணியின் போது அதிக அளவில் உதவுகிறார்கள்.“ என தெரிவித்தார்.