::யுத்த நிலவரம்

01.05.2009

மேன்மை தங்கிய மகிந்த ராஜபக்ஷ,
ஜனாதிபதி,
அலரி மாளிகை,
கொழும்பு – 03

மேன்மை தங்கிய ஜனாதிபதி அவர்கட்கு,

வன்னியில் எஞ்சியுள்ள இடம் பெயர்ந்தோரை காப்பாற்றுங்கள்

இலங்கை ஓர் தேசமாக தனது நாணயத்தைக் இழக்காது காப்பாற்றக் கூடிய வகையில் தங்களில் உடன் நடவடிக்கைக்காக நான் கவலையடையும் சில விடயங்களை முன்வைக்க விரும்புகிறேன். நாட்டில் பயங்கரவாதத்தை ஒழிக்கும் தங்கள் நடவடிக்கைகளுக்கு எனது உயிருக்கு பெரும் அச்சுறுததல் இருந்தும் கூட எனது முழு ஒத்துழைப்பை தங்களுக்கு நல்கி தங்களை தப்பாக என்றும் நான் வழி நடத்தவில்லை. நான் ஆதாரமற்று கேள்விப்படுவனவற்றையோ, அல்லது பிறர் கூறும் அனைத்தையுமோ முற்று முழுதாக நம்புகிறவன் அல்ல.

இன்றும் வன்னியில் அகப்பட்டுள்ளவர்களின் எண்ணிக்கை ஒன்றரை இலட்சத்துக்கு மேல் இருக்கின்றனர் என்று நம்பகமான செய்தி கிடைத்திருக்கின்ற போதும் நிச்சயமாக ஒரு இலட்சத்துக்கு மேற்பட்டவர்கள் இருக்கின்றனர் என்பதை நான் நம்புகின்றேன். முன்பு ஒரு சந்தர்பத்தில் எனது எண்ணிக்கை சரியானதென நிரூபணமானதை தாங்கள் மறந்திருக்கமாட்டீர்கள். துரதிஷ்டவசமாக விமானத்தாக்குதல் நிறுத்தப்பட்டுள்ள போதிலும் கடந்த மூன்று நாட்கள் தொடர்ந்து செல், ஆட்டிலறி தாக்குதல்கள் தொடர்கின்றன. அவற்றை உடன் நிறுத்தி அப்பாவி பொது மக்களை காப்பாற்றுங்கள்.

நான் சுட்டிக்காட்ட விரும்பும் ஒரு விடயம் யாதெனில் யுத்த நடவடிக்கைகள் பல இடம்பெயர்ந்தோரை கடும் பாதிப்புக்குள்ளாக்கும் அதேவேளையில் நலன்புரி நிலையங்களுக்கு தப்பி வந்துள்ளவர்களை பெரும் பயத்துக்கும் பீதிக்கும் உள்ளாக்குவதோடு அவர்களின் உறவுகள் பலர் இன்னும் வன்னியில் இருப்பதால் அவர்களுக்கு பெரும் பாதிப்புக்களையும் ஏற்படுத்தும். ஓவ்வொரு உயிரும் பெறுமதிமிக்கதால் அப்பாவி மக்களின் உயிர்களை என்ன விலை கொடுத்தேனும் பாதுகாக்க வேண்டிய பாரிய கடமை தங்களுக்குண்டு. நான் முன்பு தங்களுக்கு எழுதியது போல சில விடயங்கள் வெளியுலகுக்கு தெரியவரும் போது நம் நாடு சர்வதேச சமூகத்தால் பெரும் கண்டனத்துக்குள்ளாகும்.

வன்னியில் பெரும் உணவுத் தட்டுப்பாடு மக்கள் பட்டினியால் வாடுமளவுக்கு ஏற்பட்டுள்ளது. சித்திரை மாதம் 2ம் திகதி 1100 மெற்றிக் தொன் உணவு அங்கே அனுப்பப்பட்டதன் பின் 28ம், 29ம் திகதிகளில் தினம் 30 மெற்றிக் தொன் உணவே சென்றுள்ளது. இந்த இரு நாட்களிலும் அவர்களுக்கு தினம் கிடைத்துள்ள சீனி 1000 கிலோ கிறாம் மட்டுமே. ஆகவே தயது செய்து உடன் தேவைப்படும் உணவு, மருந்து வகைகளை அனுப்பி வைக்குமாறு சம்பந்தப்பட்ட அதிகாரிகளுக்கு உத்தரவு வழங்குமாறு கேட்டுக்கொள்கிறேன்.

இக் கடைசி நேரத்திலும் கூட நான் கூறும் ஆலோசனை தங்களுக்கு ஏற்புடையதாயின் அதை அமுல்ப்படுத்த முயற்சியுங்கள். எனது ஆலோசனை யாதெனில் அரசுக்கு ஏற்புடையதான ஓர் சர்வதேச அமைப்பை வன்னிக்கு அனுப்பி மக்களை விடுவிக்குமாறும், ஆயுதங்களுடன் சரணடைபவர்களுக்கு பொது மன்னிப்பு கொடுப்பதாகவும் கூறி அனுப்பி வையுங்கள். இதற்குத் தேவையான இருவார காலக்கெடுவும் கொடுக்கலாம். பொது மக்களை வெளியில் கொண்டுவர அத்தகையதோர் ஏற்பாடு செய்யத் தவறின் முடிவில் நாட்டின் நற்பெயரை நாசம் செய்யும் ஓர் பாரிய அனர்த்தம் தேசிய ரீதியில் ஏற்படவும் கூடும்

நன்றி

வீ. ஆனந்தசங்கரி
தலைவர் – த.வி.கூ

விடுவிக் கப்படாத பகுதியில் எஞ்சியிருக்கும் மக்களை வெளியேறுமாறு ஜனாதிபதி மஹிந்த ராஜபக்ஷ விடுத்த வேண்டு கோளடங்கிய துண்டுப் பிரசுரங்கள் வான் மார்க்கமாக மக்களுக்கு விநியோகிக்கப்பட்டுள்ளன. “புலிகளின் நடவடிக்கைகள் காரணமாக நீங்கள் தொடர்ச்சியான இன்னல்களுக்கு முகம் கொடுத்துள்ளதுடன், நீங்கள் மனிதக் கேடயங்களாகவும் வைக்கப்பட்டுள்ளீர்கள். எனவே, உங்கள் பாதுகாப்புக்காக அங்கிருந்து வெளியேறி வாருங்கள்” என ஜனாதிபதி விடுத்தவேண்டுகோள் அடங்கிய துண்டுப்பிரசுரங்கள் வான் மார்க்கமாக வீசப்பட்டுள்ளன.

புலிகளின் பிடியில் இருந்து இதுவரை 1,88,535 மக்கள் அரச கட்டுப்பாட்டிற்கு வந்துள்ளதாகவும் மற்றும் சர்வதேச செஞ்சிலுவை சங்கத்தின் வழித்துணையுடன் 12,393 பொதுமக்கள் கப்பல் மூலம் அழைத்து வரப்பட்டுள்ளதாக மனித உரிமைகள் அமைச்சர் மகிந்த சமரசிங்க தெரிவித்துள்ளார்.

வெளிநாட்டு பிரமுகர்களின் விஜயம் குறித்து ஊடகவியலாளர்களுக்கு விளக்கும் மாநாடு நேற்று (30.04.2009) ஜனாதிபதி அலுவலகத்தில் நடைபெறும் போதே அவர் இதனை தெரிவித்துள்ளார். இங்குள்ள மக்களின் தேவைகளை அரசாங்கம் நிறைவேற்றி வருகிறது. இடம் பெயாந்து வந்தமக்கள் முகாம்களில் தங்கவைக்கப்பட்டுள்ளதோடு மேலும் பல முகாம்கள் அமைக்கப்பட்டு வருவதாகவும் அவர் கூறினார்.

புலி உறுப்பினர்கள் 58 பேர் படையினரிடம் சரணடைந்துள்ளதாக பாதுகாப்பு ஊடக மத்தியநிலையம் தெரிவித்துள்ளது. 14 வயது தொடக்கம் 18 வயதையுடைய 38 ஆண்களும், 20 பெண்களும் அடங்குகின்றனர். இவர்கள் படையினரால் வவுனியா பொலிஸாரிடம் ஒப்படைக்கப்பட்டுள்ளனர். இவர்களை மருத்துவ பரிசோதனைக்கு உட்படுத்திய பொலிஸார் நீதிமன்றத்தில் ஒப்படைத்துள்ளனர். இவர்களை அம்பேபுஸ்ஸவில் உள்ள சீர்திருத்த நிலையத்திற்கு அனுப்பிவைக்குமாறு வவுனியா நீதிமன்றம் உத்தரவிட்டுள்ளது.

இடம் பெயர்ந்துள்ள மக்களின் உளப் பிரச்சினைகள் தீர்க்கப்பட வேண்டியிருப்பதால் அவர்கள் தங்க வைக்கப்பட்டுள்ள அகதி முகாம்களை பராமரிக்கும் பொறுப்பினை தங்களிடம் ஒப்படைக்குமாறு அரசாங்கத்திடம் ஜே.வி.பி. கோரிக்கை விடுத்துள்ளதுடன், அதற்கான பலமும் அனுபவமும் தங்களிடம் இருப்பதாகவும் அது சுட்டிக்காட்டியுள்ளது.

புலிகளின் தலைவர் பிரபாகரனையும் அவரது உறுப்பினர்களையும் முற்றாக அழிக்கும் வரை யுத்தத்தில் வெற்றிபெற்றுவிட்டதாக அரசு கூறமுடியாதெனவும் தெரிவித்துள்ள ஜே.வி.பி., அகதிமுகாம்களில் தங்கவைக்கப்பட்டுள்ள மக்களை அரசு தனது அரசியலுக்கு பயன்படுத்தக் கூடாதெனவும் வலியுறுத்தியுள்ளது.

கொழும்பு தேசிய நூலகத்தில் நேற்று வியாழக்கிழமை ஜே.வி.பி. நடத்திய ஊடகவியலாளர் மகாநாட்டில் அதன் பாராளுமன்ற குழுத் தலைவர் அநுரகுமார திஸாநாயக்க கலந்துகொண்டு பேசுகையிலேயே மேற்கண்டவாறு தெரிவித்தார். இது தொடர்பில் அவர் மேலும் கூறியதாவது;

அரச கட்டுப்பாட்டுப் பகுதிக்கு பெருமளவான தமிழ் மக்கள் இடம்பெயர்ந்து வந்துள்ள நிலையில் அவர்கள் முகாம்களில் தங்க வைக்கப்பட்டுள்ளனர். புலிகளிடமிருந்து அம்மக்களை எமது இராணுவத்தினர் மீட்டு பராமரித்து வருகின்றனர். இந்நிலையில், இம்மக்களின் தேவைகளை தொடர்ந்து அவர்களால் செய்வது சிரமமென்ற முறையில் அரசாங்கம் அம்மக்களின் அத்தியாவசிய தேவைகளை நிறைவேற்றி வருகின்றது. இதில் சிக்கலையும் அது எதிர்கொண்டுள்ளது.

இடம்பெயர்ந்துள்ள தமிழ் மக்களின் கண்ணுக்கெட்டிய அல்லது தெரிகின்ற பிரச்சினைகளை தேவைகளை நிறைவு செய்தால் போதாது. அவர்களது உளப்பிரச்சினைகளுக்கும் தீர்வு காணப்பட வேண்டும். இந்நிலையில் இதனை செய்வதற்கு சிறந்த முகாமைத்துவம் கொண்ட கட்டமைப்புத் தேவை. அதனை எமது செந்தாரகை நிவாரண இயக்கம் செய்யத் தயாராகவுள்ளது.

எனவே, இம்முகாம்களை அவ்வியக்கத்திடம் கையளிக்குமாறு நாம் கேட்கின்றோம். யுத்தத்தை வெற்றி கொள்வதற்கு இறுதிக் கட்டத்தில் உள்ளதாக அரசு கூறுகின்றது. உண்மையில் புலிகளின் தலைவரையும் அவர்களது உறுப்பினர்கள் அனைவரையும் அழிப்பதன் மூலமே யுத்த வெற்றியை ஈட்ட முடியுமே தவிர நிலப்பரப்பை விடுவிப்பதனால் வெற்றி வந்துவிடாது. இவ்வாறு தலைவரையும் உறுப்பினர்களையும் அழியாதுவிட்டால் அவர்கள் கெரில்லா வழிமுறைக்கு சென்றுவிடுவர்.

அரசாங்கம் மக்களுக்கு, சர்வதேச அழுத்தத்துக்கு கட்டுப்பட வில்லையென காட்ட சுவிடன் தூதுவரின் விஜயத்தை தடுத்ததாக காண்பித்தது. சுவிடனிலுள்ள இலங்கை தூதர், அவர் இதற்காக விஸா விண்ணப்பிக்கவில்லையென தெரிவிக்கின்ற அதேநேரத்தில் ஒரே நேரத்தில் பல தூதர்களை கவனிப்பது சிரமம், எனவே, வேறு ஒரு தடவை சந்தர்ப்பமளிப்பதாக அரசு தெரிவித்துள்ளது. இதனை பத்திரிகைகள் தெரிவித்தன. தாம் தேசப்பற்றாளர்களென காட்ட முற்படுகின்றனர்.  யுத்தத்தின் போது கனரக ஆயுதம் பாவிப்பதா இல்லையா என்பதை படை நடவடிக்கையை மேற்கொள்பவரான தளபதியே தீர்மானிப்பார். இந்நிலையில் கனரக ஆயுதம் பாவிக்கப்பட மாட்டாதென அரசு கூறுகின்றது. இவ்வாறு செல்வதற்கு சர்வதேச அழுத்தமே காரணம்.

“மனிதாபிமானம் இல்லாத வெற்றியானது வெற்றியாக இருக்க முடியாது’ என்று இலங்கைக்கு நேற்று முன்தினம் புதன்கிழமை வருகை தந்து திரும்பி சென்ற பிரிட்டிஷ் வெளிவிவகார அமைச்சர் டேவிட் மில்லிபான்டும் பிரான்ஸ் வெளிவிவகார அமைச்சர் பேர்னாட் குச்னரும் தெரிவித்துள்ளதுடன், இலங்கைக்கு இப்போது சர்வதேச நிவாரண உதவி ஏன் அவசரமாக தேவைப்படுகின்றது என்பதை தாங்கள் நேரடியாகப் பார்த்திருப்பதாகவும் தெரிவித்துள்ளனர். இந்த இரு அமைச்சர்களும் லண்டன் ரைம்ஸ் பத்திரிகைக்கு உடனடியாக தமது விஜயம் தொடர்பாக கட்டுரை ஒன்றை எழுதியுள்ளனர். அதனை அப்பத்திரிகை நேற்று வியாழக்கிழமை பிரசுரித்துள்ளது.

அதில் தெரிவிக்கப்பட்டிருப்பதாவது;

லண்டனிலும் பாரிஸிலும் வேறு பல இடங்களிலும் அண்மையில் இடம்பெற்ற ஆர்ப்பாட்டங்கள் இலங்கையின் நிலைமைகள் தொடர்பாக பொதுமக்கள் மத்தியில் பாரிய கவனத்தை ஈர்த்துள்ளது. ஆனால், இலங்கைத் தீவின் உள்நாட்டு யுத்தம் 28 வருடங்களாக இடம்பெற்றுக் கொண்டிருக்கிறது. அரசியல் ரீதியாகவும் பொருளாதார ரீதியாகவும் தாங்கள் ஓரங்கட்டப்பட்டிருப்பதாக வடக்கிலுள்ள சிறுபான்மைத் தமிழ்ச் சமூகம் நீண்ட காலமாக வாதாடி வருகின்றது.

1980 களின் ஆரம்பத்தில் தமிழீழ விடுதலைப் புலிகள் சுதந்திரமான தமிழ் இராச்சியத்திற்கான போராட்டத்தை ஆரம்பித்தார்கள். 1986 இல் வடக்கிலுள்ள யாழ்ப்பாணக் குடாநாட்டை அந்த அமைப்பு தமது முழுமையான கட்டுப்பாட்டில் வைத்திருந்தது. ஆனால், கடுமையான எதிர்ப்பு நடவடிக்கைகள் உள்நாட்டு யுத்தத்திற்கு இட்டுச் சென்றது. இறைமையுள்ள அர சாங்கம் கொலைகார பயங்கரவாத இயக்கத்திற்கு எதிராக நடவடிக்கையென திட்டவட்டமாக அறிவித்து இராணுவ பலத்தை பிரயோகித்தது. அரசாங்கத்தினால் சிறுபான்மையினம் துஷ்பிரயோகம் செய்யப்படுவதாக அவர்கள் எதிர்ப்புகளை வெளிப்படுத்தினர்.

மீண்டும் மீண்டும் எதிர்ப்புகள் மேற்கொள்ளப்பட்டு அரசியல் தீர்வுகள் ஸ்தம்பிதம் அடைந்தன. போராட்ட இறுதிக் கட்டத்தில் இலங்கை இருப்பதாக அரசாங்கம் இப்போது நம்புகின்றது. அதன் இராணுவ முன்னேற்றம் சந்தேகத்திற்கு இடமில்லாததாகும். விடுதலைப் புலிகளின் தலைமைத்துவம் சுருங்கி வரும் நிலப்பரப்பில், அதாவது ஒரு சில சதுர கிலோ மீற்றர் பரப்பளவுக்குள் அகப்பட்டுள்ளது. அதன் அளவு ஒருபுறம் இருக்க சுமார் 50 ஆயிரம் பொதுமக்கள் புலிகளிடம் உள்ளனர். ஏனையோர் அங்கிருந்து வெளியேறிக் கொண்டிருக்கின்றனர். சோதனை நிலையங்கள் மற்றும் முகாம்களுக்குள் அவர்கள் உள்ளனர்.

பொதுமக்களின் துன்பங்களும் உயிரிழப்புகளும் தொடர்ந்து கொண்டிருக்கின்றன. அரசியல் இணக்கப்பாட்டிற்கான எந்தவொரு சந்தர்ப்பமும் பின்னடைவைக் கண்டதாகவேயுள்ளது.

இலங்கைக்கு நேற்று நாம் (நேற்று முன்தினம்) மேற்கொண்ட விஜயத்திற்கான காரணம் மிக எளிதானதாகும். மோதலினால் இடம்பெயர்ந்த மற்றும் அங்கு சிக்கியிருக்கும் மக்கள் தொடர்பான காலம் கையை விட்டுச் சென்று கொண்டிருக்கின்றது. நாம் அங்கு சென்ற நோக்கமும் மிகச் சாதாரணமானதாகும். ஐ.நா., ஐரோப்பிய ஒன்றியம், ஜி8 என்பன அழைப்பு விடுத்த மனிதாபிமான நிவாரணம் தொடர்பாகவே நாம் அங்கு சென்றோம்.

வவுனியாவில் நிலைமையை நாம் நேரில் பார்த்தோம். இடம்பெயர்ந்த தமிழர்களைச் சந்தித்தோம். அத்துடன், பிரான்ஸின் தளவைத்தியசாலையொன்று அங்கு புதிதாக அமைக்கப்பட்டதையும் கண்டோம். ஒவ்வொரு தனி மனிதரினதும் துன்பகரமான கதைகளை நாம் கேட்டோம். தமது கட்டுப்பாட்டுப் பகுதிகளில் இருந்து பொதுமக்களைச் செல்ல வேண்டாம் என அவர்கள் புலிகளால் வற்புறுத்தப்பட்டிருந்தனர். குண்டுகளாலும் ஆட்லறிகளாலும் அங்கு இறந்தவர்களும் காயமடைந்தவர்களும் உள்ளனர். குடும்பங்கள் பிரிந்து விட்டன. தமது அன்புக்குரியவர்கள் குறித்து ஏதாவது செய்திகள் கிடைக்குமா என்று அநேகமானோர் எதிர்பார்த்துக் கொண்டிருக்கின்றனர். கடந்த காலம் தொடர்பான அச்சம், தங்களின் தற்போதைய நிலைமை தொடர்பான பீதி, எதிர்காலத்தில் என்ன நடக்குமோ என்ற பயம் அவர்கள் மத்தியில் காணப்படுகின்றது.

உடனடித் தேவைகள் குறித்து ஐ.நா.வும் ஐரோப்பிய ஒன்றியமும் உரத்தும் தெளிவாகவும் கூறியுள்ளன. முதலாவதாக இரு தரப்பும் மோதல் சூன்ய வலயம் (அது எதிரானதாக உருவாகியுள்ளது) என்று கூறப்படும் பகுதிகளிலுள்ள பொதுமக்களை பாதுகாப்பதற்கான செயற்பாடுகளில் ஈடுபட வேண்டும். இலங்கை அரசாங்கத்தை சில காலத்திற்கு யுத்த நிறுத்தத்தை மேற்கொள்ளுமாறு நாம் அழைப்பு விடுத்தோம். புலிகள் தமது கட்டுப்பாட்டுப் பகுதியிலிருந்தும் தமது கட்டுப்பாட்டிலுள்ள பொதுமக்களை வெளியேற்றுவதற்காகவும் இதற்கான கோரிக்கையை விடுத்தோம். சாத்தியமானளவு விரைவாக மோதல் பகுதியிலிருந்து பொதுமக்கள் ஐ.நா.வின் கண்காணிப்பின் கீழ் வெளியேறுவது தொடர்பாகவே சில காலத்துக்கு யுத்த நிறுத்தத்தை அறிவிக்குமாறு அழைப்பு விடுத்திருந்தோம்.

கனரக ஆயுதங்களைப் பயன்படுத்துவதை நிறுத்துவதென்ற இலங்கை அரசின் அறிவிப்பு பொதுமக்களைப் பாதுகாப்பது தொடர்பாக வரவேற்கத்தக்க படிமுறை ஒன்றாகும். இத்தகைய அறிவிப்புகள் கடந்த காலத்திலும் மேற்கொள்ளப்பட்டிருந்தன. இது அமுல்படுத்தப்பட வேண்டியதும் பேணப்பட வேண்டியதும் அவசியமானதாகும். மோதல் பகுதிக்கு மனிதாபிமான குழுவை அனுப்புவது தொடர்பான ஐ.நா. அரசாங்கத்துடன் உடன்பாட்டை எட்டியிருந்தது. அந்த உடன்பாடு அமுல்ப்படுத்தப்படவில்லை. அது நடைமுறைப்படுத்தப்படுவது அவசியமானதாகும்.

இரண்டாவதாகவுள்ள கவலையானது இடம்பெயர்ந்துள்ள மக்களுக்கு ஏற்படுத்தப்பட்டுள்ள வசதிகள் தொடர்பானதும் அவற்றின் நிலைபற்றியதானதாகும். ஐ.நா. நிவாரண நிறுவனங்கள், ஊடகங்கள் என்பன இங்கு செல்வதற்கு முழுமையான அனுமதி வழங்க மறுக்கப்பட்டிருக்கின்றது. இது மிகவும் தவறான நடவடிக்கையாகும். தப்பி வரும் பொதுமக்களை சோதனையிட அரசு விரும்புகின்றது மக்களுடன் விடுதலைப் புலிப் போராளிகள் நுழைந்து விடக் கூடாது என்பதை உறுதிப்படுத்திக் கொள்வதற்காக அரசாங்கம் இதனை செய்ய விரும்புகின்றது. அவ்வாறு வரும் புலிப் போராளிகள் தொடர்ந்தும் பயங்கரவாதப் போராட்டத்தில் ஈடுபடுவார்கள் என அரசு கருதுகின்றது. ஆனால், இந்த நடவடிக்கையில் வெளிப்ப?டத்தன்மை பேணப்பட வேண்டும் என்பது மிகவும் முக்கியமானதாகும். ஐ.நா. மற்றும் ஏனைய சர்வதேச நிறுவனங்களை சோதனை நடவடிக்கைகளின் சகல கட்டங்களிலும் அரசாங்கம் அனுமதிப்பது அவசியமாகும்.

மோதல் பகுதியிலிருந்து வெளிவரும் பொதுமக்களின் நிலைமைகள் தொடர்பாக அக்கறை செலுத்தப்பட வேண்டியது மிகவும் முக்கியமானதாகும். 2 இலட்சம் இடம்பெயர்ந்தவர்களுடன் நாடு திண்டாடுகின்றது. இவர்களில் பலர் காயமடைந்தவர்களும் மனநிலை பாதிக்கப்பட்டவர்களாகவும் முதியவர்களாகவும் குழந்தைகளாகவும் காணப்படுகின்றனர். கடந்த காலத்தில் இலங்கை அரசாங்கம் சர்வதேச உதவி வழங்கும் அமைப்புகள் நேரடியாக பணியில் ஈடுபடுவதற்கு அனுமதி மறுத்திருந்தது. ஆனால், ஒழுங்கான முறையில் நிர்ணயிக்கப்படாமலும் போதிய வளங்கள் இல்லாமையும் மனிதாபிமான உதவியை வழங்கும் முயற்சிகளில் ஒத்துழைப்பில்லாமல் இருப்பதானது அந்த மக்களின் துன்பத்தை மேலும் அதிகரிக்கவே வழி செய்யும்.

ஐ.நா. உதவிச் செயலாளர் நாயகம் ஜோன் ஹோம்ஸின் நடவடிக்கைகளுக்கு ஆதரவாகவே நாம் இலங்கைக்கு விஜயம் மேற்கொண்டோம். இடம்பெயர்ந்து தங்கியிருக்கும் முகாம்களுக்குள் சிறந்த மருத்துவ சேவைகள் இருப்பது அவசியம். உணவு, தங்கும் இடம் என்பன சிறப்பான முறையில் அமைய வேண்டும். பணம், மருந்து, தங்கும் இடம் போன்ற வசதிகளுக்காக பிரிட்டனும் பிரான்ஸும் தமது உறுதியான நிலைப்பாட்டை வெளிப்படுத்தியுள்ளனர். ஆனால், அவை ஒழுங்கான முறையில் சென்றடைவதற்கான தேவைகள் உள்ளது.

இறுதியாக இங்கு நாம் குறுகிய கால நடவடிக்கைகளிலேயே எமது கவனத்தைச் செலுத்தியிருக்கின்றோம். ஆனால், நீண்ட கால தேவைகளை நாம் அலட்சியப்படுத்த முடியாது. இலங்கை அரசாங்கம் மக்களால் தேர்ந்தெடுக்கப்பட்ட அரசாங்கமாகும். ஆதலால், ஐ.நா. உறுப்பினர்கள் எதிர்பார்க்கும் உயர்மட்ட தரத்தை அது கொண்டுள்ளது. அதேசமயம், அதன் கடப்பாடுகள் சர்வதேச மனிதாபிமான சட்டங்களுக்கு மதிப்பளிக்கப்படுவதாக அமைய வேண்டும். அதேவேளை, வன்முறையானது தமிழ் மக்களுக்கு பயனளிக்கப் போவதில்லை என்றும் வன்முறைகளைக் கைவிடுவதே முன்னேற்றத்திற்குக் கொண்டுவரும் என்பதும் நீண்ட காலமாக ஐரோப்பிய ஒன்றியும் கொண்டிருக்கும் நிலைப்பாடாகும் என்பதை புலிகளுக்குத் திரும்பத் திரும்பக் கூறுகின்றோம்.

எதிர்காலத்தில் ஒன்றாக வாழ்வதற்குரிய வழி முறைகளை இலங்கைச் சமூகங்கள் கண்டுகொள்ள வேண்டும். அதனை தனியாக இராணுவ வெற்றியினால் மட்டும் வென்றெடுக்க முடியாது. தமிழர்களின் எதிர்ப்புணர்வுகளுக்கு எண்ணெய் ஊற்றியதாக காணப்படுவது அரசியல் ரீதியாக அந்நியப்படுத்தப்பட்டிருப்பதாக காணப்படுவதும் மிக ஆழமாக வேரூன்றியிருக்கும் உணர்வாகும். தொடர்ந்து ஆட்சிக்கு வந்த இலங்கை அரசாங்கம் தொடர்பாக இந்த உணர்வு ஏற்பட்டுள்ளது. இதற்கு கண்ணியமான முறையிலும் தார்மிகக் கொள்கை அடிப்படையிலுமான அரசியல் நடவடிக்கைகள் மூலம் தீர்வு காணவேண்டும்.

இரு தரப்பு தொடர்பாகவும் நாம் எந்தவிதமான வேறுபட்ட உணர்வுகளையும் கொண்டிருக்கவில்லை. 3 தசாப்தங்களாக மேற்கொண்ட முயற்சிக்கு இப்போது வெற்றிகள் கிடைத்திருப்பதாக இலங்கை அரசாங்கம் நம்புகின்றது. ஆனால், அதிக எண்ணிக்கையான பொதுமக்களின் உயிர்களுக்கு விலை செலுத்தப்பட்டிருக்கின்றது. விடுதலைப் புலிகள் பயங்கரவாத அமைப்பாகும். அது தற்போது அப்பாவிப் பொதுமக்களை மனிதக் கேடயங்களாக வைத்திருக்கின்றது. இந்த நிலைவரத்தின் பாரதூரத் தன்மையை கருத்தில் கொண்டு பொதுமக்களின் துன்பத்தை நிறுத்துவதற்கான கடமை சர்வதேச சமூகத்திற்குள்ளது.

எங்களுக்கு இது என்ன தொடர்பு என்று மக்கள் எங்களைக் கேட்கலாம். ஐ.நா. பாதுகாப்புச் சபையின் உறுப்பினர்களாகிய நாம் இறைமையுள்ள அரசாங்கங்களும் சர்வதேச சமூகமும் பொதுமக்களைப் பாதுகாக்க வேண்டிய பொறுப்பிலிருந்தும் விலகிச் செல்ல முடியாது. இலங்கையின் பொதுமக்களைப் பாதுகாக்கும் விடயத்தில் தோல்வி கண்டிருப்பதையிட்டு எங்களுடன் இணைந்து அமெரிக்க வெளிவிவகார அமைச்சர் ஹிலாரி கிளின்டன் அதிர்ச்சியை வெளியிட்டுள்ளார்.

நேற்று முன்தினம் இலங்கை அரசாங்கத்திடம் எமது வேண்டுகோளை நேரடியாக விடுத்தோம். இலங்கை அரசாங்கம் வெற்றிகொண்ட தருணத்திலுள்ளது. இந்தத் தருணத்தில் அது மனிதாபிமானத்தை வெளிப்படுத்துவது அவசியம். அத்துடன், சமாதானத்தை வென்றெடுக்கும் வழிமுறைகளை வழியைக் கண்டறிய சுய ஆர்வம் காட்டுவதும் அவசியமானதாகும்.

வவுனியாவில் இடம்பெயர்ந்த மக்கள் தங்கியிருக்கும முகாம்களுக்கு வெளியாரோ, அமைப்புகளோ பிரவேசிக்க அனுமதி வழங்கப்படாது என்று தேசிய பாதுகாப்புக்கான ஊடக மத்திய நிலையப் பணிப்பாளர் நாயகம் லக்ஷ்மன் ஹுலுகல்ல நேற்று வியாழக்கிழமை அறிவித்திருக்கிறார். இது தொடர்பாக நேற்று விடுக்கப்பட்டுள்ள அறிக்கையில் தெரிவிக்கப்பட்டிருப்பதாவது;

20 ஏப்ரல் 2009 இல் 58 ஆவது படையணிப் பிரிவானது மனிதக் கேடயங்களாக அப்பாவிப் பொதுமக்களை பிடித்து வைத்திருந்த புலிப் பயங்கரவாதிகளை அழித்ததன் மூலம் குறிப்பிடத்தக்க வெற்றியை பெற்றுள்ளது. படையினரின் தீவிரமான முயற்சிகளை யடுத்து ஆயிரக்கணக்கான பொதுமக்கள் அரசகட்டுப்பாட்டுப் பகுதிக்கு வந்துள்ளனர். இந்தப் பொதுமக்களுக்கு பலவழிகளில் தனிப்பட்ட பலரும் அமைப்புகளும் உதவிக்கரம் நீட்டியுள்ளன. இந்த இடம்பெயர்ந்த மக்களின் நலன்களை உறுதிப்படுத்த அரசும் மேலதிகமான நடவடிக்கைகளை எடுத்துள்ளது. வவுனியா மெனிக்பாம் இடம்பெயர்ந்தோர் கிராமத்தில் திருப்திகரமான முறையில் நடவடிக்கைகள் முன்னெடுக்கப்படுகின்றன.

ஆதலால், தனிப்பட்டவர்களும் அமைப்புகளும் மெனிக்பாம் கிராமத்திற்கு செல்வதை தவிர்க்குமாறு பாதுகாப்பு, பொதுமக்கள் பாதுகாப்பு, சட்டம், ஒழுங்கு அமைச்சு வேண்டுகோள் விடுத்துள்ளது. பாதுகாப்பு அதிகாரிகள் பொதுமக்களின் நலனுக்காக மேற்கொண்டுவரும் பணிக்கு இடையூறு ஏற்படாமல் இருப்பதற்காக இக்கோரிக்கை விடுக்கப்படுகிறது.

பாதுகாப்பு அமைச்சிடம் தனிப்பட்டவர்கள் பலரும் அமைப்புகளும் அனுமதி கோரியுள்ளனர். வவுனியா மெனிக்பாம் கிராமத்துக்கு செல்ல அனுமதி கோரியுள்ளனர். ஆனால், வெளியாட்களினால் பல பிரச்சினைகள் ஏற்படுவதாகவும் தங்கள் பணியின் முன்னேற்றத்துக்கு இடையூறு ஏற்படுவதாகவும் முகாமில் பணிபுரியும் அதிகாரிகள் அமைச்சுக்கு அறிவித்துள்ளனர். இதனடிப்படையில் எந்தவொரு சூழ்நிலையிலும், மெனிக்பாமுக்கு வெளியாட்கள், அமைப்புகள் பிரவேசிக்க அனுமதி வழங்குவதில்லையென தீர்மானிக்கப்பட்டுள்ளது என்று தேசிய பாதுகாப்பிற்கான மத்திய ஊடக நிலையம் தெரிவித்துள்ளது.

வன்னியில் முன்னெடுக்கப்பட்டு வரும் இராணுவ நடவடிக்கைகள் காரணமாக சுமார் 7சதுர கிலோமீற்றர் நிலப்பரப்புக்குள் விடுதலைப் புலி உறுப்பினர்களை முடக்கியுள்ள படையினருக்கும் புலிகளுக்கும் இடையில் முல்லைத்தீவு வெள்ளமுள்ளிவாய்க்கால் பகுதியில் கடும் மோதல்கள் இடம்பெற்றுள்ளன என்று படைத்தரப்பு தெரிவிக்கினறது.

இரட்டை வாய்கல் தெற்கு பகுதியில் 7 சதுரக்க கி.மீ.பரப்புக்குள் எல்ரிரிஈயினரை முடக்கியுள்ள இராணுவத்தின் 58வது டிவிசன் படையினர் எல்ரிரிஈயினர் பதுங்கியுள்ள இடங்களை அண்மித்துள்ளதாகவும் எல்ரிரிஈயினர் கடைசி சண்டைக்கு எதிர்பார்த்திருப்பதாக பாதுகாப்பு அமைச்சு தெரிவிக்கின்றது.

58வது டிவிசன் படையினருக்கு பக்கமாக படை நடவடிக்கையில் ஈடுபட்டுவரும் 53வது டிவிசன் படையினர் முள்ளிவாய்கல் மேற்கு பகுதியில் எல்ரிரிஈ பயங்கரவாதிகளின் பிடியில் சிக்கியுள்ள 15,000 -20,000 வரையான சிவிலியன்களை மீட்கும் நடவடிக்கையை மேலும் தீவிரப்படுத்தியுள்ளனர்.

கரையமுள்ளிவாய்கல் பகுதியில் கண்ணிவெடிகளையும் அகற்றிக்கொன்டு பயங்கரவாதிகளின் பகுதிக்குள் இராணுவத்தினர் நுளைந்துள்ளனர்.இதன்போது 15 எல்ரிரிஈயினர் கொல்லப்பட்டுள்ளதுடன் 20க்கும் மேற்பட்டோர் காயமடைந்துள்ளதா பாதுகாப்பு அமைச்சு தெரிவிக்கின்றது.

புலிகளின் பிடியிலிருந்து தப்பி வந்தோருக்கு விநியோகிப்பதற்காக தெற்கில் பொது மக்களிடமிருந்து சேகரிக்கப்பட்ட அத்தியாவசியப் பொருட்கள் வவுனியா செட்டிக்குளத்தில் அமைக்கப்பட்டுள்ள இடைத்தங்கல் முகாம்களுக்கு தினமும் விமானங்கள் மூலம் கொண்டு செல்லப்படுகின்றன. இலங்கை விமானப் படையின் சரக்கு விமானங்கள் பல இந்தப் பணியில் ஈடுபடுத்தப்பட்டுள்ளதாக வவுனியாவிலுள்ள அரசாங்க தகவல் திணைக்களத்தின் செய்தியாளர்கள் தெரிவித்துள்ளனர்.

உலருணவுப் பொருட்கள்,  மருந்து வகைகள்,  குடிநீர்,  மற்றும் அத்தியாவசியப் பொருட்கள் இவ்வாறு விமானம் மூலம் வவுனியாவுக்கு அனுப்பி வைக்கப்படுவதாக அறிவிக்கப்பட்டுள்ளது.