செய்திகள்

ஐந்து வாரங்கள் கூட தாக்குப் பிடிக்காத என்.பி.பி அமைச்சர்கள் – மௌனம் களைத்த என்.பி.பி அமைச்சர் !

அமைச்சர்களை நேரில் சந்திப்பதற்கு வாய்ப்பளிக்கவில்லை, அவர்கள் தொலைபேசியில் உரையாடுவதில்லை, ஊடக அறிக்கைகளை வெளியிடுவதில்லை, நேர்காணல்களை வழங்குவதில்லை என்ற குற்றச்சாட்டுகளின் எண்ணிக்கை அதிகரித்துச் செல்வதைக் காணக் கூடியதாக உள்ளது என சுகாதார மற்றும் வெகுசன ஊடக அமைச்சர் நளிந்த ஜயதிஸ்ஸ தெரிவித்துள்ளார். எவ்வாறான குற்றச்சாட்டுகள் முன்வைக்கப்பட்டாலும் இலங்கை அரசுக்கு ஓர் சிறந்த அடித்தளத்தை அமைக்கும் பணியை நிறைவேற்றுவதற்கு எமது அமைச்சரவை அயராது உழைத்து வருவதை நான் பொறுப்புடன் கூற கடமைப்பட்டுள்ளேன். என அமைச்சர் நளிந்த ஜயதிஸ்ஸ ஊடகங்களுக்கு கருத்து தெரிவிக்கும் போது தெரிவித்துள்ளார்.

இது தொடர்பில் மேலும் கருத்து தெரிவித்த அமைச்சர் நளிந்த ஜயதிஸ்ஸ, புதிய அமைச்சர்கள் கடமைகளை ஆரம்பித்து ஐந்து வாரங்கள் மாத்திரமே நிறைவு பெற்றுள்ளது. கடந்த அரசாங்கத்தில் இவ்வாறு அர்ப்பணிப்பின்றி முறையான ஆய்வுகளை மேற்கொள்ளாமல் தரவுகள் மற்றும் தகவல்கள் இன்றி, ஜனாதிபதி, பிரதமர் மற்றும் அமைச்சர்கள் போன்றோர் பதவிவகித்தமையாலும், தன்னிச்சையான முடிவுகளை மேற்கொண்டமையாலும் உருவாக்கிய நெருக்கடிகளுக்கு இந்நாட்டு மக்கள் முகங்கொடுத்து வருகின்றனர். இந்த ஐந்து வருட காலப்பகுதியில் நாட்டை முன்னேற்றாமல் ஏனைய அரசாங்கத்தைப் போல வேறு ஏதேனும் விடயங்களை மேற்கொள்ள முடியும். இவ்வாறான செயற்பாடுகள் மூலம் அரசாங்கத்தால் முன்னேறிச் செல்வது எளிதான விடயம். எனினும் நாடு ஒருபோதும் முன்னேறாது. நாம் அடித்தளத்திலிருந்து மேல் எழுந்து கொண்டிருக்கிறோம். என அவர் தெரிவித்துள்ளார்.

ஐபிசி பாஸ்கரனின் தடாலடி அறிவிப்பும் அரசியலுக்கான நகர்வும் !

“என்ன தொழில் தெரியுமோ, அந்த தொழிலுக்கு ஏற்ற வேலை நான் தாறேன்” என அழைப்பு விடுக்கின்றார் ஐபிசி பாஸ்கரன். இயக்கச்சியில் இயங்கும் றீச்சாவில் காப்பென்டர் வேலை, பிளம்பர் வேலை, வெல்டிங் வேலை, மேசன் வேலை போன்ற வேலைக்கு ஆட்கள் தேவை என்று கூறும் பாஸ்கரன் மற்றும் ராற்றோ ( Tattoo) குத்தவும் வேலைக்கு ஆட்கள் தேவை என்று குறிப்பிடுகிறார். ஆடு, மாடு, பன்றி மற்றும் கோழி வார்க்கவும், வாகனங்கள் ஓடவும், உணவகத்தில் வேலை, தீம் பார்க்கில் இருக்கின்ற விளையாட்டு இயந்திரங்களை இயக்கும் மெசின் ஒப்பிறேற்ரர்கள் என பல்வேறுபட்ட வேலைகளுக்கு ஆட்கள் தேவைப்படுவதாக காணொலி வெளியிட்டுள்ளார். அத்துடன் பல கவர்ச்சிகரமான சம்பளக் கொடுப்பனவுகளையும் அறிவித்துள்ளார். அதில் முக்கியானது நேர்மையாக 5 வருடங்கள் தன்னிடம் வேலை செய்தால் இரண்டு பரப்பு காணியில் வீடு கட்டித் தருவதாகவும் வாக்குறுதியளிக்கிறார். தூர இடங்களில் இருந்து வருபவர்களுக்கு ஆண் மற்றும் பெண் இருபாலருக்கும் தங்கும் விடுதியுடன் மூன்று நேர உணவுடன் வேலை கொடுப்பேன் என்கிறார். அத்துடன் ஏற்கனவே 110 பேர் றீச்சாவில் தங்கியிருந்து வேலை செய்கிறார்கள் என்றும் றீச்சாவில் சிறந்த பாதுகாப்பு ஏற்பாடு செய்யப்பட்டுள்ளதாகவும் உத்தரவாதம் அளிக்கின்றார்.

முக்கியமாக விஷேட தேவைகள் உடையவர்களுக்கு வேலைவாய்ப்பு வழங்க முடியும் என்றும் கூறுகிறார் பாஸ்கரன். கந்தையா பாஸ்கரனின் வேலைவாய்ப்பு அறிவுப்புக்கள் வரவேற்கத்தக்கது என்றாலும், அவர் தொழிலாளர் நலன்புரி சட்டங்களை மதித்து நடக்க வேண்டும் என்று தொழிற்சங்கவாதிகள் கூறுகின்றனர். குறைந்த சம்பளத்தில் கூடிய வேலைவாங்கல், தொழிலாளர்களின் விடுமுறை மற்றும் ஓய்வுநேரம், உடல், உள சுகாதாரம், பணிச்சுமை, மேலதிக வேலைக்கான படி மற்றும் பாதுகாப்பு போன்ற விடயங்களில் தொழிலாளர் சட்டங்களில் குறிப்பிடப்படும் விதிமுறைகளை கடைப்பிடிக்க வேண்டும் எனவும் சமூக சேவையாளர்கள் வலியுறுத்துகின்றனர். இந்த விடயத்தில் வட மாகாண ஆளுநர் மற்றும் கிளிநொச்சி பிரதேச சபை போன்றனவும் கண்காணிப்பில் ஈடுபட வேண்டும். ஐபிசி பாஸ்கரனின் இந்த வேலைவாய்ப்பு அறிவிப்புக்கள் அவரது வட மாகாண முதலமைச்சர் கனவை சாத்தியமாக்குமா? என்பதை எதிர்வரும் காலம் பதில் சொல்லும்.

வடக்கில் வேலை வாய்புக்கள் இல்லாமல் இல்லை. இருக்கின்ற வேலைகளை செய்வதற்கு இளைஞர் மற்றும் யுவதிகள் தயாராகவும் இல்லை. ஒருபக்கம் புலம்பெயர் நாடுகளிலிருந்து வரும் உதவிகளையே தமது வாழ்வாதாரமாக எதிர்பார்த்து வாழ்கிறார்கள். மறுபுறம் தாங்களும் வெளிநாடு செல்ல வேண்டும் என்று விரும்புகிறார்கள். யாழ்ப்பாணத்தை பொறுத்தவரை வேலைக்கு ஆட்கள் கிடைக்காமையால் வெளிமாவட்டங்களிலிருந்து வந்தும் ஏன் நேபாளத்திலிருந்தும் வந்து வேலை செய்வதாக கூறப்படுகிறது. குறிப்பாக யாழ்ப்பாணத்தில் இயங்கும் உணவகங்களில் தங்கும் விடுதிகளில் இந்நிலமையை காணக்கூடியதாக உள்ளது.

உண்டியல் குலுக்கி வாழாமல் உழைத்து வாழும் எதிர்காலத் தலைமுறையை உருவாக்கும் பொறுப்பு சமூகத்தின் தலையாய கடமையாகும்.

யாழுக்கு தண்ணீர் வழங்குவதை லண்டன் கற்பக விநாயகர் தடுப்பது ஏன்? லண்டன் கற்பக விநாயகர் ஆலயமும் அதன் அரசியலும் !

லண்டன் கற்பக விநாயகர் ஆலயம் குறிப்பாக அதன் தலைவர் எம் கோபாலகிருஷ்ணன், கற்பக விநாயகரை தமிழ் அரசியலோடு அதன் ஆரம்பம் முதல் இணைத்துள்ளார். சுன்னாகம் கிணறுகளில் கழிவு எண்ணெய் வந்ததற்குப் பின்னிருந்த ஊழல் மோசடியாளர்களான பொன் ஐங்கரநேசன், மாவை சேனாதிராசா, மற்றும் யாழுக்கு தண்ணீர் வழங்குவதைத் தடுக்கும் பா உ சிறிதரன் ஆகிய ஊழல் மோசடி அரசியல்வாதிகளை கற்பக விநாயகரின் திருவிழாக்களில் காணலாம். தமிழ் மக்களின் மட்டுமல்ல மனித குலத்தின் அடிப்படைத் தேவைகளான தண்ணீரில், தமிழ் மக்களின் பொது எதிரிகளாக கடந்த ஆட்சிக்காலங்களில் இருந்த பேரினவாத சக்திகளே கை வைக்கவில்லை. தாகத்திற்கு தண்ணீர் வழங்குவது என்பது மிகச் சிறந்த அறம். அந்தக் குடி தண்ணீரை யாழ்ப்பாண மக்களுக்கு வழங்க மறுத்து விலாங்கு மீன் போன்று அரசியல் செய்யும் சிறிதரன் கற்பக விநாயகர் ஆலயத்தில் கொண்டாடப்படுகின்றார். அவரோடு ஐங்கரநேசன் மற்றும் மாவை ஆகியோரும் கொண்டாடப்படுகின்றனர். கற்பக விநாயகரின் உண்டியல் பணமும் அர்ச்சனைப் பணமும் கூட யாழ் மக்களின் தாகத்துக்கு தண்ணீர் தர மறுக்கும் அரசியல்வாதிகளின் செயற்பாடுகளுக்கு பயன்படுத்தப்படுகின்றது.

தற்போது காஸாவில் இனப்படுகொலை செய்யும் இஸ்ரேலிய அரசு பாலஸ்தீனர்களின் தண்ணீர், உணவு, உறைவிடம் என எல்லாவற்றிலும் தன் கையை வைத்து ஒரு திட்டமிட்ட இனப்படுகொலையை எப்படிச் செய்யலாம் என்பதை வெளிப்படுத்தி நிற்கின்றது. இதற்கு மாறாக தமிழ் மக்கள் மத்தியில் அரசியல் தலைவர்களாக அறியப்படும் பா உ சிறிதரன், பொன் ஐங்கரநேசன், மாவை சேனாதிராசா போன்றவர்கள் தங்களுக்கு வாக்களித்த மக்களுக்கே முதுகில் குத்துகின்றனர். அவர்களின் மக்கள் விரோத அரசியல் நடவடிக்கைகளுக்கு லண்டன் கற்பக விநாயகர் ஆலயத்தின் வருமானம் பயன்படுத்தப்பட்டு வருகின்றது. கடந்த ஜனாதிபதித் தேர்தல் காலத்தில் கூட லண்டன் கற்பக விநாயகரின் தேர்த்திருவிழாவில் பா உ சிறிதரன் கலந்துகொண்டார். சிறிதரனுடைய அரசியலுக்கு நிதி வழங்குபவர்களில் லண்டன் கற்பக விநாயகர் ஆலயமும், அதன் தலைவர் எம் கோபாலகிருஷ்ணனும் ஐபிசி பாஸ்கரனும் முக்கியமானவர்கள்.

கிளிநொச்சி விவசாயிகளை யாழ்ப்பாணத்துக்கு தண்ணீர் கொண்டு செல்வதற்கு எதிராகத் தூண்டிவிட்டவர் பாராளுமன்ற உறுப்பினர் சிறிதரன். கிளிநொச்சி விவசாயிகளை வஞ்சித்து யாழ்ப்பாண மக்களுக்கு தண்ணீர் கேட்கவில்லை. இரணைமடு அணைக்கட்டை நான்கு அடிக்கு உயர்த்தி நீர்க்கொள்ளளவை அதிகரித்த பின்னரேயே மேலதிக நீரை யாழ் கொண்டு செல்ல கேட்கின்றனர். அதற்கு தமிழீழ விடுதலைப் புலிகளும் ஒப்புக்கொண்டிருந்தனர். தற்போது ஆண்டுதோறும் 20 மில்லியன் கனமீற்றர் தண்ணீர் இரணைமடுவில் இருந்து கடலுக்குள் விடப்படுகின்றது. ஆனால் யாழ் மக்களுக்கு ஆண்டுக்கு 10 மில்லியன் கன மீற்றர் தண்ணியே தேவைப்படுகின்றது என்றும் அதனை வழங்குவதால் கிளிநொச்சி மக்களுக்கோ விவசாயிகளுக்கோ எவ்வித பாதிப்பும் இல்லை என்கிறார் நீர் முகாமைத்துவ நிபுணர் கலாநிதி சுப்பிரமணியம் சிவகுமார். பா உ எஸ் சிறிதரன் மற்றும் பொன் ஐங்கரநேசன் போன்ற மோசடி அரசியல்வாதிகளும் அவர்களோடு கிளிநொச்சி நீர்த்திணைக்களத்தில் உள்ள அதிகாரிகளும் சேர்ந்தே இந்த மோசடியில் ஈடுபடுவதாக கலாநிதி எஸ் சிவகுமார் குற்றம்சாட்டுகின்றார். கடலுக்குள் செல்லும் தண்ணீரை யாழ் மக்களுக்கு குடிக்கக் கொடுக்க மறுப்பது மிகப்பெரிய அநீதி என்பதையும் அவர் சுட்டிக்காட்டினார்.

புலம்பெயர்ந்து வாழும் தமிழர்கள், யாழ் மக்களுக்கு சுத்தமான குடிநீர் கிடைப்பதற்கான பங்களிப்பை அவசரமாச் செய்ய வேண்டும். சம்பந்தப்பட்ட அரசியல் வாதிகளுக்கு அழுத்தங்கள் வழங்க வேண்டும் என்கிறார் ஜேர்மனியில் வாழ்கின்ற சுப்பிரமணியம் உதயஜோதி. இங்கு பிரதேசவாதம் பேசுவது அர்த்தமற்றது எனவும் யாழ்ப்பாண தரையமைப்பு தண்ணீரைத் தேக்கி வைக்கக்கூடிய தரையமைப்பு அல்ல என்றும் தெரிவிக்கும் அவர், யாழ்ப்பாணத்து கிணற்று நீரின் அடர்த்தி அதிகமாக இருப்பதை அங்குள்ள கிணற்று நீரைக் குடிப்பவர்கள் உணருவார்கள் எனவும் தெரிவித்தார். யாழ்ப்பாணக் கிணற்று நீரில் நைற்றஜன் அளவு அதிகம் இருப்பதையும் தற்போது இடநெருக்கடி காரணமாக கிணற்றுக்கும் மலசலகூடத்துக்கும் உள்ள நெருக்கம் காரணமாக மலசலகூடக் கிழிவுகள் கிணற்று நீரோடு கலப்பதன் ஆபத்தை காலஞ்சென்ற பேராசிரியர் நடராஜா சிவராஜா தன்னுடைய ஆய்வுக் கட்டுரைகளில் பதிவு செய்துள்ளார்.

இதன் காரணமாக யாழ்ப்பாணத்தில் நீரால் ஏற்படும் நோய்கள் அதிகரித்துள்ளதும் யாழ் மருத்துவர்களால் அடையாளம் காணப்பட்டு உள்ளது. சில மரணங்களும் இதன் காரணமாக ஏற்படுகின்றது. இது தொடர்பான சரியான ஆய்வுகள் மேற்கொள்ளப்பட்டால் இதன் பாராதூரமான நிலை வெளிவரும் என சமூக செயற்பாட்டாளர்கள் தெரிவிக்கின்றனர். அதனால் புலம்பெயர்ந்த நாடுகளில் உள்ளவர்கள் அரசியல்வாதிகளின் செயற்பாடுகளுக்கு உதவுகின்ற போது பொறுப்புடன் நடந்தது கொள்ள வேண்டும் எனத் தெரிவிக்கின்றனர். ஆலயங்களுக்குச் செல்லும் பக்தர்களும் தாங்கள் பொது நன்மைகருதிச் செலுத்தும் பணம் சரியான முறையில் செல்கின்றதா என்பதை உறுதிப்படுத்திக்கொள்ள வேண்டும். இதுதொடர்பில் லண்டன் கற்பக விநாயகர் ஆலயம் தனது கருத்தை வெளிப்படுத்தினால் அதனை பதிவு செய்ய தேசம்நெற் தயாராக உள்ளது.

அரசியல் கைதிகள் விடுதலை கோரி கையெழுத்து வேட்டை

முன்னாள் போராளிகள் நலன்புரிசங்கத்தின் ஏற்பாட்டில் அரசியல் கைதிகளை விடுதலை செய்வதற்கான கோரிக்கை மகஜருக்கு மக்களிடம் கையெழுத்து போராட்டம் நடைபெற்றது. அப்போது சர்வ மதத் தலைவர்களும் , சமூக அமைப்புக்களும் மற்றும் பொதுமக்களும் கையொப்பம் இட்டனர். ஆளும் அநுர தலைமையிலான அரசு தன்னுடய தேர்தலில் வாக்குறுதியாக வழங்கிய அ்ரசியல் கைதிகளை விடுதலையை உத்வேகப்படுத்தும்படியாகவே இப்போராட்டம் நடைபெற்றது.

வவுனியா மாவட்டத்தில் இயங்குகின்ற முன்னாள் போராளிகள் நலன்புரிச் சங்கத்தின் தலைவரான செ. அரவிந்தன் இந்த வருடம் மார்ச் 26 இல் பயங்கரவாத தடுப்பு புலனாய்வுப்பிரிவால் கைது செய்யப்பட்டு தடுத்து வைக்கப்பட்டுள்ளமையும் குறிப்பிடத்தக்கது.

பா.உ சிறிதரனின் தண்ணீர் மோசடி – கடலுக்கு தண்ணீர் போனாலும் பரவாயில்லை யாழ்ப்பாணத்துக்கு தண்ணீர் போக கூடாது.

இதுவரை வெளிவராத உண்மைகள்: பா உ எஸ் சிறிதரனின் தண்ணீர் மோசடியும் வீணடிக்கப்பட்ட திருப்பி அனுப்பப்பட்ட கோடிக்கண நிதியும்!

பா உ எஸ் சிறிதரனின் தண்ணீர் அரசியல் மோசடியால் 30 மில்லியன் அமெரிக்க டொலர்கள் வீணடிக்கப்பட்டுள்ளது என்றும் இன்னும் பல மில்லியன் நீர்வள அபிவிருத்திக்குப் பயன்படுத்தபடாமல் வீணடிக்கப்பட்டுவிட்டதாகவும் ஓய்வு பெற்ற பேராசிரியரும் வடக்கின் நீர் முகாமைத்துவத்தை முன்னெடுத்தவருமான கலாநிதி சிவகுமார் சுப்பிரமணியம் தேசம்நெற்றுக்கு இன்று தெரிவித்தார். இலங்கையில் உள்ள அரசியல் சட்டத்திற்குப் புறம்பாகவும் உணர்ச்சியூட்டும் ஏமாற்று அரசியலாலும் தமிழீழம் கேட்ட மக்களுக்குச் சேரவேண்டிய அபிவிருத்தி நிதி வீணடிக்கப்பட்டது. திருப்பி அனுப்பப்பட்டது என்கிறார் பொறியியல் கலாநிதி எஸ் சிவக்குமார்.

2010இல் பாராளுமன்ற உறுப்பினராகத் தெரிவு செய்யப்பட்ட பா உ சிறீதரன், இரணைமடு அணைக்கட்டை உயர்த்தி அதன் தண்ணீர் கொள்வனவை அதிகரித்து யாழ் மாவட்டத்துக்கு தண்ணீர் விநியோகம் மேற்கொள்ள உடன்பாடு எட்டப்பட்டு, 266 மில்லியன் அமெரிக்க டொலர் நிதியையும் ஆசிய அபிவிருத்தி வங்கி ஒதுக்கியது. இதற்கான வேலைத்திட்டங்கள் ஆரம்பிக்கப்பட்டு சில ஆண்டுகளில் குழாய்கள் பொருத்தப்பட்டு நீர் தாங்கிகளும் கட்டப்பட்டு விட்டது. இந்நிலையில் எல்லாவற்றுக்கும் உடன்பட்ட பா உ சிறிதரன் இறுதிக்கட்ட வேலைகள் முன்னெடுக்கப்பட்ட போது யாழ்ப்பாணத்துக்கு தண்ணீர் தரமாட்டோம் என்ற பிரச்சினையை முன்வைத்தார்.

கிளிநொச்சியில் உள்ள விவசாயிகளுக்கு தவறான தகவல்கள் வழங்கப்பட்டது. இந்த மோசடியில் நீர்ப்பாசனத் திணைக்களத்திலிருந்த அதிகாரிகளும் சம்பந்தப்பட்டு இருந்தனர். தங்களுடைய சொந்த நலன்களுக்காக உண்மைக்குப் புறம்பான தகவல்கள் கிளிநொச்சி விவசாயிகளுக்கு வழங்கப்பட்டு அவர்கள் தூண்டி விடப்பட்டனர்.

யாழ்ப்பாணத்துக்கு தண்ணீர் கொடுத்தால் கிளிநொச்சி விவசாயிகளுக்கு தண்ணீர் பற்றாக்குறை ஏற்படும் என உண்மைக்குப் புறம்பான தகவல்கள் வழங்கப்பட்டே விவசாயிகள் தூண்டிவிடப்பட்டதாக வடக்கின் ஆறுகள் குளங்கள் பற்றிய ஆய்வுகளை மேற்கொண்ட நீர்முகாமைத்துவ நிபணர் கலாநிதி எஸ் சிவகுமார் தெரிவித்தார். இரணை மடுக்குளத்தின் தண்ணீரை யாழ்பாணம் கொண்டுவருவதால் கிளிநொச்சி விவசாயிகளுக்கு எவ்வித பாதிப்பும் இல்லை எனத் தெரிவித்த கலாநிதி எஸ் சிவகுமார், வடக்கில் ஆண்டு தோறும் 200 மில்லியன் கனமீற்றர் அளவு மழைநீர் கடலைச் சென்றடைகின்றது என்றும் கிளிநொச்சி இரணைமடு பிரதேசத்திலிருந்து 20 மில்லியன் கனமீற்றர் அளவு நீர் ஆண்டுதோறும் கடலுக்குச் செல்வதாகவும் கலாநிதி எஸ் சிவகுமார் தெரிவித்தார். ஆனால் யாழ்ப்பாணத்து நீர்த் தேவைக்கு வெறும் 10 மில்லியன் கனமீற்றர் அளவு நீரே தேவைப்படுவதையும் கலாநிதி சிவகுமார் தெளிவுபடுத்தினார்.

தற்போது யாழில் வீடு வாங்கி நிரந்தரமாக குடும்பத்துடன் வாழும் எஸ் சிறீதரன் தனது வாக்கு வங்கியை மட்டும் கருத்தில் கொண்டு, இந்த தண்ணீர் மோசடியில் ஈடுபடுகின்றார். இது பற்றி பா உ இராமநாதன் அர்ச்சுனா கிளிநொச்சியில் நடைபெற்ற மாவட்ட ஒருங்கிணைப்புக் குழுக் கூட்டத்தில் சுட்டிக்காட்டியது முற்றிலும் உண்மை என்பதையும் கலாநிதி சிவகுமார் உறுதிப்படுத்தினார்.

விஞ்ஞான அறிவியல் அடிப்படையில் இரணைமடுக் குளத்திலிருந்து யாழ்ப்பாணத்துக்கு ஆண்டுக்கு 10 மில்லியன் கனமீற்றர் நீரைக் கொண்டு செல்வதால் கிளிநொச்சி விவசாயிகளுக்கு எவ்வித பாதிப்பும் வராது என்பதை அனுபவமிக்க நீர்முகாமைத்துவ நிபுணராக தன்னால் உறுதிப்படுத்த முடியும் என்றும் கலாநிதி சிவகுமார் தன்னுடைய நேர்காணலில் தெரிவித்தார்.

பலத்த கண்காணிப்புக்குள் விமான நிலையங்கள் – சட்டவிரோத உள்நுழைவுகளைத் தடுக்க அனுர ஆலோசனை

சட்டவிரோத உள்நுழைவுகள் மற்றும் வெளியேறுதல்களைத் தடுக்க இலங்கை சுங்கத் திணைக்களம் மற்றும் விமான நிலையத்தில் நவீன கண்காணிப்பு பொறிமுறைகளை நிறுவதற்கு அதிகரிக்குமாறு ஜனாதிபதி அறிவுறுத்தியுள்ளார். குடிவரவு குடியகல்வு திணைக்களம், இலங்கை சுங்கம் மற்றும் விமான நிலையம் மற்றும் விமான போக்குவரத்து நிறுவனத்தின் தலைவர்களுடன் சனிக்கிழமை கலந்துரையாடல் இடம்பெற்றது. போதைப்பொருள் மற்றும் பிற சட்டவிரோத பொருட்கள் நாட்டிற்குள் நுழைவதைத் தடுப்பது, விமான நிலைய வளாகத்தில் ஊழல், மோசடி மற்றும் முறைகேடுகளைத் தடுப்பது மற்றும் சட்டவிரோதமாக நாட்டை விட்டு வெளியேறுவதைத் தடுப்பது குறித்த விடயங்கள் இதில் கலந்துரையாடப்பட்டன.

இதன்போதே மூன்று நிறுவனங்களிலும் கூட்டு கமரா அமைப்பு மற்றும் மையப்படுத்தப்பட்ட கண்காணிப்பு அறையை நிறுவுமாறு ஜனாதிபதி அறிவுறுத்தினார். மேலும், தற்போதுள்ள ஸ்கேனிங் இயந்திரங்களுக்குப் பதிலாக மேம்படுத்தப்பட்ட நவீன ஸ்கேனிங் இயந்திரங்களைப் பயன்படுத்தி இந்த நிறுவனங்களில் ஆட்கடத்தலைத் தடுப்பதற்கு நடைமுறையான புதிய செயல்முறையை ஆரம்பிக்க வேண்டும் எனவும் தெரிவித்துள்ளார். அண்மைக்காலங்களில் விமான நிலையங்களில் சட்டவிரோத செயல்களில் ஈடுபடுவோர் அதிகமாக கைதுசெய்யப்பட்டு வருகின்றனர் என்பது குறிப்பிடத்தக்கது.

அரச சேவைத்துறைக்கு எதிரான சுனாமி உருவாகும் அமைச்சர் லால் காந்த எச்சரிக்கை !

அரச சேவைத்துறைக்கு எதிராக பல புகார்கள் வந்துகொண்டிருப்பதாகத் தெரிவித்த விவசாய அமைச்சர் லால் காந்த, இதனை சேவைத்துறைக்கு எதிரான சுனாமியாக என்னால் மாற்ற முடியும் எனவும் எச்சரித்துள்ளார். ஜனாதிபதி அநுராவும் சேவைத்துறையில் உள்ளவர்கள் மக்களின் பிரச்சினைகளைத் தீர்ப்பதற்கான நடவடிக்கைகளை எடுத்தால், தான் அவர்களின் பக்கம் நிற்பேன் எனவும் அல்லாவிட்டால் சம்பந்தப்பட்டவர்களுக்கு எதிராக உறுதியான நடவடிக்கை எடுக்கப்படும் எனவும் தெரிவித்தார். சுங்கத் திணைக்கள அதிகாரிகள் சீராக நடந்துகொள்வதன் அவசியத்தையும் அவர் அண்மையில் வலியுறுத்தி இருந்தமை குறிப்பிடத்தக்கது.

ரச அதிகாரிகள் மீதான காட்டத்தை மக்களும் சமூக வலைத்தளங்களில் பதிவிட்டுவருவதுடன், அவர்களே ஊடகச் சந்திப்புகளை ஏற்பாடு செய்து, தங்களுக்கு ஏற்பட்ட அநீதிகளை வெளிப்படுத்தி வருகின்றனர். வட மாகாண ஆளுநர் நா வேதநாயகன் வடக்கில் உள்ள சில அதிகாரிகளை வைத்துக் கொண்டு மக்களுக்கு சேவைகளை வழங்குவதில் உள்ள கஸ்டத்தை அண்மையில் வெளிப்படுத்தி இருந்தார். பாராளுமன்ற உறுப்பினர் இராமநாதன் அர்ச்சுனா நடந்து முடிந்த இரு மாவட்ட அபிவிருத்திச் சபைக் கூட்டத்திலும் அரச அதிகாரிகளை கேள்விக்கு உட்படுத்தி வாக்குவாதத்தில் ஈடுபட்டமை எல்லோரும் அறிந்ததே. பொதுமக்கள் பலரும் பா உ அர்சுனாவின் நடவடிக்கைகளை வரவேற்று கருத்து வெளியிட்டு வருகின்றனர். பா உ அர்ச்சுனா தனக்கு பல குற்றச்சாட்டுகள் தபாலில் வருவதையும் தனது சமூக வலைப்பதிவில் வெளியிட்டு இருந்தார். பிரதி அமைச்சர் அருண் ஹேமச்சந்திரா, கடல்தொழில் தொழில் அமைச்சர் இராமலிங்கம் சந்திரசேகர் ஆகியோரும் சில அரச அலுவலர்கள் மக்களை நடாத்தும் விதம் தொடர்பில் அதிருப்தியை வெளியிட்டுள்ளனர்.

அரச உத்தியோகங்களுக்கு 7 லட்சம் பேரே தேவைப்படும் நிலையில் அது இரட்டிப்பாக 14 லட்சம் இருந்த போதும் மக்கள் சேவைகளைப் பயன்படுத்துவதில் பெரும் நெருக்கடிகளைச் சந்திக்கின்றனர். பெருமளவில் அலைக்களிக்கப்படுகின்றனர்.

தனியார் கல்விக்கும் இறுதிப் பரீட்சைக்கும் முற்றுப்புள்ளி வைக்கும் கல்விச் சீர்திருத்தம் வர வேண்டும் !

தனியார் கல்விக்கும் இறுதிப் பரீட்சைக்கும் முற்றுப்புள்ளி வைக்கும் கல்விச் சீர்திரத்தம் கொண்டுவரப்பட வேண்டும் என இலங்கை ஆசிரயர் சங்கம் கோரிக்கை வைத்துள்ளது. இலங்கை பிரித்தானியாவிலிருந்து 1948இல் சுதந்திரம் அடைந்த போதும் இன்றும் காலனித்துவ கல்விமுறையே இலங்கையில் உள்ளது. இலங்கை சுதத்திரம் அடைந்த பின் 1956இல் கொண்டுவரப்பட்ட ஆங்கிலத்துக்கு முன்னுரிமையற்ற கல்வி முறையால், இலங்கையில் தாய்மொழிகளான சிங்களமும் தமிழும் அபார வளர்ச்சியைக் கண்டன என இலங்கை முன்னாள் ராஜதந்திரி அய்யம்பிள்ளை தர்மகுலசிங்கம் தெரிவித்தார். தற்போதைய பரீட்சைகளை மட்டும் முன்னிலைப்படுத்தும் பிரித்தானியாவின் காலனித்துவ கல்வி முறையில் பாரிய மாற்றங்களை ஏற்படுத்த வேண்டும் என இலங்கை ஆசிரியர் சங்கம் கோரியுள்ளது.

தென் மாகாணங்களில் பாடசாலை ஆசிரியர்கள் தனியார் கல்விநிலையங்களில் கற்பிப்பதற்கு தடைவிதித்து சுற்றுநிருபம் அனுப்பி வைக்கப்பட்டது. யாழ்ப்பாணத்தில் தரம் ஒன்பது, ஒன்பதாம் வகுப்புக்கு கீழான மாணவர்களுக்கு தனியார் கல்வியை ஞாயிற்றுக் கிழமைகளில் நடத்தக் கூடாது என யாழ் மாவட்ட அரசாங்க அதிபர் மருதலிங்கம் பிரதீபன் அறிவித்துள்ளார்.

யாழில் மூன்று மாணவர்கள் உள்ள வீட்டில் தனியார் கல்விக்கு 50,000 ரூபாய் செலவிடப்படு வருவதாகவும் இலவசக் கல்வி என்பது பெயரளவில்தான் இருப்பதாகவும் முன்பள்ளிச் செயற்பாடுகளை முன்னெடுத்துவரும் என் சச்சிதானந்தன் தேசம்நெற்க்குத் தெரிவித்தார். இதனை உறுதிப்படுத்தும் வகையில் கருத்து வெளியிட்டுள்ள இலங்கை ஆசிரியர் சங்கம் சில குடும்பங்களில் அவர்களுடைய வருமானத்தின் 60 சதவீதம் தனியார் வகுப்புகளுக்குச் செலவிடப்படுவதாகத் தெரிவித்தார்.

இதுபற்றி கருத்து வெளியிட்ட வறணி ஆரம்பப் பள்ளி அதிபர் தனியார் கல்வி என்பது ஒரு கலாச்சாரமாகிவிட்டது என்றார்.