செய்திகள்

2008ஆம் ஆண்டு 5ஆம் ஆண்டு புலமைப்பரிசில் பரீட்சையில் சித்தியடைந்துள்ள தமிழ்மொழிமூல மாணவர்களுக்குரிய வெட்டுப்புள்ளிகளை கல்வி அமைச்சு வெளியிட்டுள்ளது.

இதன்படி, 2009ஆம் ஆண்டு 6ஆம் வகுப்புக்கு மாணவர்களை சேர்த்துக்கொள்ளக்கூடிய பாடசாலைகளும், அதற்கான வெட்டுப்புள்ளிகளும் வருமாறு:

ஆண்கள் பாடசாலைகள்

கொழும்பு-7 ரோயல் கல்லூரி – 152

கொழும்பு-7 டி. எஸ். சேனாநாயக்க கல்லூரி – 140

யாழ். இந்துக் கல்லூரி – 120

பம்பலப்பிட்டி, இந்துக் கல்லூரி – 114

மட்டக்களப்பு, புனித மைக்கல் கல்லூரி – 114

கல்முனை, சாஹிரா கல்லூரி – 114

பெண்கள் கல்லூரிகள்

பம்பலப்பிட்டி, முஸ்லிம் மகளிர் கல்லூரி – 134

கண்டி, பதியுதீன் மகளிர் மகா வித்தியாலயம் – 128

கொழும்பு, சென்ட் கிளாயர் கல்லூரி – 124

யாழ். வேம்படி மகளிர் கல்லூரி – 120

மட்டக்களப்பு, வின்சன்ட் உயர் கல்லூரி – 119

கல்முனை, மஹ்மூத் மகளிர் கல்லூரி – 118

கலவன் பாடசாலைகள்

மாவனல்லை, சாஹிரா முஸ்லிம் ம.ம.வித்தியாலயம் – 125

ஹட்டன், ஹைலண்ட் ம.ம. வித்தியாலயம் – 124

ஹபுகஸ்தலாவ, அல் மின்ஹாஜ் முஸ்லிம் ம.ம. வித்தியாலயம் – 123

மடவளை பஸார், மதீனா முஸ்லிம் ம.ம. வித்தியாலயம் – 122

தர்காடவுன், அளுத்கம வீதிய முஸ்லிம் மகளிர் கல்லூரி – 117

மாவனல்லை, பதுரியா முஸ்லிம் மஹா வித்தியாலயம் – 116

கெகுனுகொல்ல, முஸ்லிம் மஹா வித்தியாலயம் – 114

பஹமுன, சியம்பலாகஸ்கொட்டுவ மதீனா முஸ்லிம் மஹா வித்தியாலயம் – 113

போலிச் சான்றிதழ்களைச் சமர்ப்பித்து அரச நிறுவனங்களின் தொழில்வாய்ப்பைப் பெற்றுள்ளோர் சம்பந்தமாக அரசாங்கம் கவனமெடுத்துள்ளதுடன் அரச சேவை ஆணைக் குழு இது தொடர்பில் ஆராய்ந்து உரிய நடவடிக்கை எடுக்குமென ஆளும் கட்சியின் பிரதம கொரடா அமைச்சர் தினேஷ் குணவர்தன தெரிவித்தார்.

இதற்கு முன்னோடியாகவே கமத்தொழில் அபிவிருத்தி, கமநல சேவைகள் அமைச்சில் போலிச் சான்றிதழ்களைச் சமர்ப்பித்தவர்கள் தொடர்பில் உரிய நடவடிக்கை எடுக்கப்பட்டுள்ளதுடன் சம்பந்தப்பட்டவர்களை வேலை நீக்கம் செய்துள்ளதாகவும் அமைச்சர் தெரிவித்தார். பாராளுமன்றத்தில் (08) ஐக்கிய தேசியக் கட்சி எம்.பி ரஞ்சித் அலுவிஹார எழுப்பிய கேள்வியொன்றுக்குப் பதிலளித்த போதே அமைச்சர் இவ்வாறு தெரிவித்தார்.

பாராளுமன்றம் (09) காலை 9.30 மணிக்குச் சபாநாயகர் டபிள்யூ. ஜே. எம். லொக்குபண்டாரவின் தலைமையில் கூடியது. வழமையான நடவடிக்கைகளுக்குப் பின் வாய் மூல வினாக்கான விளக்கங்களுக்கான வேளையில் எழுப்பப்பட்ட கேள்விக்குப் பதிலளிக்கும் போதே அமைச்சர் இவ்வாறு தெரிவித்தார். கமத்தொழில் அபிவிருத்தி அமைச்சில் மேற்கொள்ளப்பட்ட நடவடிக்கை முன்னுதாரணமானது எனவும் அமைச்சர் தெரிவித்தார். இதேவேளை, அமைச்சில் பணிபுரிவோரின் தகைமைகளுக்கேற்ப அவர்களுக்கான பதவியுயர்வுகளும் வழங்கப்படுமெனவும் அமைச்சர் மேலும் தெரிவித்தார்.

மத்திய மாகாண சபைத் தேர்தல் பிரசாரத்திற்காக பயன்படுத்தப்படும் தமது பதாதைகள், சுவரொட்டிகளை அகற்றவுள்ளதாக ஐக்கிய மக்கள் சுதந்திர முன்னணியின் மத்திய மாகாண முதலமைச்சர் வேட்பாளரான சரத் ஏக்கநாயக்க அறிவித்துள்ளார்.  தேர்தல் ஒழுங்கு விதிகளுக்கு முரணான பிரசார நடைமுறைகளை கட்டுப்படுத்துவதற்கு முன்னோடி நடவடிக்கையாக தனது பதாதைகள், சுவரொட்டிகளை அகற்றவுள்ளதாக அவர் குறிப்பிட்டார்.

அத்துடன், தேர்தல் சட்டம் மற்றும் அதன் அறிவுறுத்தல்களுக்கு மதிப்பளிக்கும் வகையில், தனது புகைப்படங்கள், சுவரொட்டிகளை அகற்ற தீர்மானித்ததாகவும் அவர் தெரிவித்தார்.  இதேவேளை, சரத் ஏக்கநாயக்கவின் இந்த முன்னுதாரணமான செயற்பாட்டை தாம் பெரிதும் வரவேற்பதாக கண்டி பிரதி பொலிஸ் மா அதிபர் பூஜித ஜெயசுந்தர தெரிவித்துள்ளார். அத்துடன், மத்திய மாகாணத்தில் தேர்தல் பிரசாரத்துக்காக பயன்படுத்தப்படும் அனைத்து வேட்பாளர்களதும் சுவரொட்டிகள் பதாதைகளை அகற்றுமாறு அனைத்து பொலிஸ் நிலைய பொறுப்பதிகாரிகளுக்கும் அறிவுறுத்தியுள்ளதாகவும் பூஜித ஜெயசுந்தர தெரிவித்தார்.

தேர்தல் நடைமுறை தொடர்பாக அறிவிக்கப்பட்டுள்ள ஒழுங்கு விதிகளை அனைத்து வேட்பாளர்களும் கடைப்பிடிக்க வேண்டுமெனவும் அவர் தெரிவித்தார். வன்னியில் நடைபெற்றுவரும் போரை தேர்தல் பிரசாரத்துக்காக அரசு பயன்படுத்துவதாக எதிர்க்கட்சிகள் சுட்டிக்காட்டியுள்ள நிலையில் நடைபெறவுள்ள மாகாணசபைத் தேர்தலுக்கான பிரசாரங்கள் மிகவும் சூடுபிடித்துள்ளன. ஆளும் கட்சியின் சின்னத்தில் போட்டியிடும் தமிழ்க்கட்சிகளுக்கிடையே மோதல்கள் அதிகரித்துள்ள நிலையில், மத்திய மாகாணத்தில் தமிழ் பிரதிநிதித்துவத்தை பெறுவதற்கான வாய்ப்புகளும் அங்கு குறைவடைந்துள்ளதாக தெரிவிக்கப்படுகிறது.

வெளி விவகார அமைச்சர் பிரணாப் முகர்ஜியை விரைவில் இலங்கைக்கு அனுப்பிவைப்பேன் என்று இந்தியப் பிரதமர் மன்மோகன் சிங் தமிழக முதலமைச்சர் கருணாநிதியிடம் (07) புதன்கிழமை இரவு உறுதியளித்துள்ளார்.  வெளிநாடு வாழ் இந்தியர்களின் மாநாடு சென்னையில் ஆரம்பமானது. இம்மாநாட்டில் கலந்துகொள்வதற்காக சென்னைக்கு புதன்கிழமை இரவு வருகைதந்த இந்தியப் பிரதமரை கருணாநிதி சந்தித்துப் பேசினார்.

அச்சந்திப்பின் போதே முகர்ஜியை விரைவில் கொழும்புக்கு அனுப்பவுள்ளதாக மன்மோகன் சிங் உறுதியளித்திருப்பதாக தமிழக அரசு வெளியிட்டுள்ள அறிக்கையில் தெரிவிக்கப்பட்டுள்ளது.  மன்மோகன் சிங் கருணாநிதி சந்திப்பின்போது பல்வேறு விடயங்கள் குறித்து ஆராயப்பட்டதாகவும் இறுதியாக இலங்கைப் பிரச்சினை பற்றி பேசப்பட்டதாகவும் அப்போது ஏற்கனவே உறுதியளித்ததன் பிரகாரம் முகர்ஜி எப்போது இலங்கை செல்கிறார் என்று கருணாநிதி கேள்வி எழுப்பியதாகவும் தெரிவிக்கப்பட்டுள்ளது

இலங்கைத் தமிழர்களின் நிலமை குறித்து கருணாநிதி விரிவாக எடுத்துக் கூறியபோது, அவரின் உணர்வை புரிந்து கொள்வதாக கூறியிருக்கும் மன்மோகன் சிங் சாத்தியமான அளவுக்கு துரிதமாக முகர்ஜியை இலங்கைக்கு அனுப்பிவைக்கவிருப்பதாக உறுதியளித்தாக தமிழக அரசின் செய்திக்குறிப்பில் தெரிவிக்கப்பட்டுள்ளது.

இது இவ்வாறிருக்க இலங்கை அரசு விரும்பாமல் முகர்ஜியை கொழும்புக்கு அனுப்புவது சாத்தியமற்றது என்று தமிழக காங்கிரஸ் தலைவர் தங்கபாலு இந்தவார முற்பகுதியில் கூறியிருந்தார். அதேசமயம் முகர்ஜியை அனுப்ப சாக்குபோக்கு கூறுவதாக விஜய டி ராஜேந்தர் போன்ற தமிழக அரசியல்வாதிகள் மன்மோகன் சிங் அரசை கடுமையாக விமர்சித்திருந்தனர்.  இந்நிலையிலேயே கருணாநிதி தலைமையிலான தி.மு.க. அரசு இந்த அறிக்கையை விடுத்திருக்கிறது.
 

கடந்த மூன்று தினங்களாக அம்பாறை மாவட்டத்தில் பெய்துவரும் அடைமழை காரணமாக மாவட்டத்தின் மக்களின் இயல்பு வாழ்க்கை பாதிக்கப்பட்டுள்ளது. மாவட்டத்தின் தாழ்ந்த பிரதேசங்களில் வெள்ள அபாயம் ஏற்பட்டுள்ளது. அறுவடைக்குத் தயாரான நிலையிலிருந்த வேளான்மைகள் வெள்ளத்தில் மூழ்கியுள்ளன.

நேற்று வெள்ளிக்கிழமை தொடர்ச்சியாகப் பெய்த அடைமழை காரணமாக பல்வேறு சிரமங்களுக்கு முகம் கொடுக்க வேண்டி ஏற்பட்டது. அக்கரைப்பற்று, ஆலையடிவேம்பு, அட்டாளைச்சேனைப் பிரதேசத்தில் இவ் அடைமழை காரணமாக இயல்பு வாழ்க்கை பாதிக்கப்பட்டதோடு பாடசாலை மாணவர்கள், ஆசிரியர்கள் அரசாங்க உத்தியோகத்தர்கள், முதலியோர் பாடசாலை மற்றும் அலுவலகம் செல்வதில் கடும் அசெளகரியங்களுக்கு முகம் கொடுத்தனர். அறுவடைக்குத் தயாரான நிலையிலிருந்த ஆயிரக்கணக்கான ஏக்கர் வயல் நிலங்கள் நீரில் மூழ்கியுள்ளன. வீதிகள் யாவும் நீர் நிரம்பி போக்குவரத்து செய்ய முடியாதுள்ளது. மழை தொடர்கின்றது.

இம்முறை பெரும்போக அறுவடைப் பணிகள் அறுவடை இயந்திரங்களின் உதவியுடன் மேற்கொள்ளப்படவுள்ளன. இதற்குத் தேவையான புத்தம்புதிய அறுவடை இயந்திரங்கள் இந்தியா, சீனா போன்ற நாடுகளிலிருந்து இறக்குமதி செய்யப்பட்டுள்ளன. அம்பாறை மாவட்டத்தில் அறுவடைப் பணிகளுக்கு தேவையான மேலதிக இயந்திரங்களையும், தொழிலாளர்களையும், பிற மாவட்டங்களிலிருந்து பெறுவதற்கான நடவடிக்கைகளிலும் விவசாயிகள் ஈடுபட்டுள்ளனர்.

பெரும்போக விவசாயிகளுக்கு இம் முறை சிறந்த விளைச்சல் கிடைத்து வருகின்றது. அறுவடையின் மூலம் கிடைக்கும் நெல்லை தனியார் வியாபாரிகள் கொள்வனவு செய்து வருகின்றனர். பெரும்போக அறுவடைப் பணிகள் ஆரம்பித்ததையடுத்து நெல் மற்றும் அரிசி விலை வீழ்ச்சியடைந்துள்ளது.

இதேவேளை, நாவிதன் வெளி பிரதேசசெயலகப் பிரிவுக்குட்பட்ட சடயந்தலாவ கண்ட நெற் பயிர்கள் நீரின்றி கருகும் நிலையில் அந்த விவசாயிகளுக்கு இம் மழை மகிழ்ச்சியைக் கொடுத்துள்ளது. நேற் றைய தொடர் மழை காரணமாக கல்முனைக்குடி, சாய்ந்தமருது, பாண்டிருப்பு கிராமங் களில் உள்ள வீதிகள் நீரில் மூழ்கியுள்ளன. மற்றும் சுனாமி வீடமைப்பு நிர்மாணப் பணிகளும் மழையினால் ஸ்தம்பிதம் அடைந்துள்ளன.

விடு தலைப் புலிகளிடம் நாங்கள் பணம் வாங்கியதாக எந்த அரசியல்வாதியாவது நிரூபிக்க முடியுமா என சவால் விட்டுள்ளார் இயக்குநர் பாரதிராஜா. பாரதிராஜா தலைமையில் ராமேஸ்வரத்தில் இலங்கைத் தமிழர் ஆதரவுப் போராட்டம் தொடங்கிய பிறகு தமிழகத்தில் உணர்ச்சிமயமான பல காட்சிகள் அரங்கேறின. அதுவரை மௌனம் காத்தவர்கள் கூட பாரதிராஜாவுக்குப் பிறகுதான் வெளிப்படையாக இலங்கைத் தமிழருக்கு ஆதரவாகப் பேசத் தொடங்கினர்.

ஆனால் இங்குள்ள சில அரசியல்வாதிகள், பாரதிராஜாவும் மற்றவர்களும் புலிகளிடம் பணம் வாங்கிக் கொண்டுதான் இப்படி ஆதரவாகப் போராட்டங்கள் நடத்தி வருவதாகக் குற்றம்சாட்டினர். இதனால் கொதித்துப் போன பாரதிராஜா, நான் பணம் வாங்கியதாக எந்த அரசியல் தலைவராவது நிரூபிக்க முடி்யுமா? இதை நான் ஒரு சவாலாகவே விடுகிறேன். முடிந்தால் நிரூபித்துக் காட்டுங்கள் பார்க்கலாம் என்று ஆவேசமாகக் கூறியுள்ளார்.

முச் சக்கரவண்டி உரிமையாளர்களுக்கு எரிபொருள் மானியமாக அரசு வழங்க முன்வந்துள்ள 600 மில்லியன் ரூபாவையும் இராணுவத்தினருக்காக பயன்படுத்துமாறு முச்சக்கரவண்டி உரிமையாளர் சங்கம் ஜனாதிபதியிடம் தெரிவித்துள்ளதாக நிதியமைச்சர் ரஞ்சித் சியம்பலாப்பிட்டிய தெரிவித்தார்.

பாராளுமன்றத்தில்  புதன்கிழமை இடம்பெற்ற தேசத்தை கட்டியெழுப்புவதற்கான வரி அறவீட்டு பிரேரணையில் உரையாற்றுகையிலேயே இவ்வாறு தெரிவித்த அவர் மேலும் கூறியதாவது; முச்சக்கரவண்டி உரிமையாளர்களை அலரிமாளிகையில்  ஜனாதிபதி மஹிந்த ராஜபக்ஷ சந்தித்து மானியம் தொடர்பாக அறிவித்த போதே முச்சக்கரவண்டி உரிமையாளர் சங்கத்தினர் இவ்வாறு தெரிவித்தனர்.

முச்சக்கரவண்டி உரிமையாளர் சங்கத்தின் இந்தச் செயலை ஐ.தே.க.வினர் முன் மாதிரியாக பின்பற்றவேண்டும். பயங்கரவாதத்தை ஒழிப்பதற்காக முச்சக்கரவண்டி உரிமையாளர்கள் தமக்கான எரிபொருள் மானியத்தையே வழங்க முன்வந்துள்ள போது ஐ.தே.க.வினர் கிளிநொச்சியை மீட்ட வெற்றியைக் கொண்டாட எரிபொருள் விலையை குறைக்குமாறு கோருகின்றனர். முச்சக்கரவண்டி உரிமையாளர்களின் மானியத்தை திரும்பப்பெற ஜனாதிபதி விரும்பவில்லை. இராணுவத்தினருக்காக இந்த தியாகத்தை செய்ய விரும்பினால் விரும்பியவர்கள் அதனை வழங்கலாமென ஜனாதிபதி தெரிவித்துள்ளார்.

ஐ.தே.க.வினர் யுத்தம், பொருளாதாரம் ஆகிய இரு கோரிக்கைகளை முன்வைத்தே அரசுக்கெதிராக பிரசாரம் செய்தனர். இப்போது யுத்தத்தைப் பற்றி அவர்களால் பேசமுடியாது என்பதால் பொருளாதாரத்தைப் பற்றி கூச்சலிடுகின்றனர். முச்சக்கரவண்டி உரிமையாளர்களின் செயலை முன் மாதிரியாகக் கொண்டாவது ஐ.தே.க. திருந்த வேண்டும்.

மத்திய அரசும், தமிழக அரசும், இலங்கைத் தமிழர் விவகாரத்தில் இரட்டை வேடம் போடுகின்றன என்று பாஜக மாநிலத் தலைவர் இல.கணேசன் கூறியுள்ளார்.

இது குறித்து இல.கணேசன் வெளியிட்டுள்ள அறிக்கையில், இலங்கை தமிழர் பிரச்சனையில் மத்திய அரசும், தமிழக அரசும் இரட்டை வேடம் போடுகின்றன. தமிழக சட்டமன்றத்தில் நிறைவேற்றப்பட்ட போர் நிறுத்தத்தை கோரும் தீர்மானத்தை அமல்படுத்த தமிழக முதல்வர் நேரில் சென்று வலியுறுத்தியும் பிரதமர் மவுனம் சாதிக்கிறார். பிரணாப் முகர்ஜி கொழும்பு செல்வார் என அறிவித்து விட்டு இதுவரை செல்லாமல் இருப்பதும், அதை நியாயப்படுத்தி அமைச்சர் டி.ஆர்.பாலுவே அறிக்கை விடுவதும் திமுக மீது சந்தேகத்தை கிளப்புகின்றன.

தங்களது பதவியை தக்க வைத்துக் கொள்ளவும், ஸ்பெக்ட்ரம் ஊழல் குற்றச்சாட்டிலிருந்து தப்பித்துக் கொள்ளவும், சொத்துக்களை காப்பாற்றிக் கொள்ளவும் ஈழத் தமிழரின் உடமையை காவு கொடுக்க திமுக தயாராகிவிட்டது என்பதையே இந்த மெத்தனம் நிரூபிக்கிறது. அதேபோல சிங்கள ராணுவத்துக்கு ஆயுதமும், ஆலோசனைகளையும் பயிற்சியையும் இந்தியா தான் வழங்கி வருகிறது என்கிற குற்றச்சாட்டையும் மத்திய அரசு மறுக்கவில்லை.

சீனாவுடனும், பாகிஸ்தானுடனும் நாம் போரினை சந்தித்த போது இலங்கை அரசு நம்மை ஆதரிக்கவில்லை. ராணுவத் தீர்வு சாத்தியமல்ல என்று இந்தியா உட்பட உலக நாடுகள் எல்லாம் கருத்து சொல்லிய பிறகும் தீர்வு என்ன என்பதைச் சொல்லாமலேயே இனப்படுகொலை நடத்திக் கொண்டிருக்கும் சிங்கள அரசின் அரசே நடத்தும் பயங்கரவாதத்தை கண்டிக்கிறேன். மத்திய, மாநில அரசுகள் தங்களது இரட்டை வேடத்தை கலைத்துவிட்டு இலங்கையில் உடனடியாக போர் நிறுத்தத்தை அமல்படுத்தி பேச்சு வார்த்தை துவங்கிட இலங்கை அரசை வற்புறுத்த வேண்டும்.

மாறாக இலங்கை அரசு போரைத் தொடருமானால் இந்தியா தனது அணுகுமுறையை மறுபரிசீலனை செய்ய நேரிடும் என எச்சரிக்க வேண்டும். சம உரிமை இலங்கைத் தமிழரது பிறப்புரிமை என்பதை சுட்டிக் காட்டவும், இலங்கையில் உடனடியாக போர் நிறுத்தத்தை வலியுறுத்தியும் அப்பாவித் தமிழ் மக்கள் படுகொலை செய்யப்படுவதை தடுத்து நிறுத்தவும் மத்திய அரசை வற்புறுத்தி சென்னையில் 12.1.09 திங்கட்கிழமை காலை 9 மணி முதல் மாலை 5 மணி வரை உண்ணாவிரதம் எனது தலைமையில் நடைபெறும்.

இதற்கு தேசிய செயலாளர் சு.திருநாவுக்கரசர் முன்னிலை வகிப்பார். கட்சியின் அனைத்து முன்னணி நிர்வாகிகளும் இதில் கலந்து கொள்கின்றனர். இதன் காரணமாக சென்னையில் 9ம் தேதி பிஜேபி நடத்த திட்டமிட்டிருந்த ஆர்ப்பாட்டம் ஒத்தி வைக்கப்படுகிறது. தமிழகத்தில் சரக்குந்துகள் வேலை நிறுத்தம், வாகனங்களுக்கான எரி பொருளை நிரப்ப நீண்ட வரிசை, எரிபொருள் இருப்பு இல்லை என்கின்ற வாசக அட்டைகள் எரிபொருள் நிரப்பும் நிலையங்களில் தொங்குகின்றது. காரணம் எண்ணெய் வளத்துறையினர் வேலை நிறுத்தம் செய்துள்ளார்கள்.

நம்நாட்டின் பொருளாதாரத்தை தூக்கி நிறுத்திக் கொண்டிருக்கும் 9 நிறுவனங்களுக்கு நவரத்னா எனப் பெயர் சூட்டி அதற்கான விசேஷ விதிமுறைகளும் பின்பற்றப்பட்டது. அந்த நிறுவனங்கள்தான் அரசுக்கு கோடிக்கணக்கில் லாபம் ஈட்டி வருகிறது. அந்த லாபத்திற்கு நிர்வாகி கள் தொழிலாளர்கள் ஆகியோரும் காரணம் என்பதால் அந்த லாபத்தில் ஓரளவு அவர்களுக்கு ஊதியமாக வழங்கப்படுகிறது.ஆனால் அரசு சமீபத்தில் சம்பள சீர்திருத்தம் குறித்து கணக்கிடும் போது இந்த லாபம் ஈட்டும் நிறு வனங்களுடன் நஷ்டத்தையே சந்தித்துக் கொண்டிருக்கும் நிறுவனங்களையும் சமமாக்கி பரிந்துரைத்தது.

பொதுவாகவே சம்பள சீர்திருத்தம் என்றாலே ஏதேனும் கொஞ்சமாவது சம்பள உயர்வு இருக்கும் என எதிர் பார்ப்பது இயற்கை. விசித்திரமான முறையில் எண்ணெய் நிறுவனங்களில் பணிபுரியும் அதிகாரிகளுக்கு சம்பளம் குறைந்துள்ளது. பணிபுரிபவர்கள் மட்டுமல்ல, நிர்வாகமே கூட சம்பள உயர்வு வரும் என எதிர்பார்த்து முன்பணமாக ஒரு தொகையை தந்தது. மாறாக சம்பளம் குறைந்த தால் ஏற்கனவே நிர்வாகமே தந்த பணத்தை ஊழியர்கள் திரும்பக் கட்டும் நிலை ஏற்பட்டுள்ளது.

நாட்டின் பொருளாதாரத்தை கட்டிக் காக்கும் நிறுவனங்களின் அதிகாரி களுக்கு உரிய சம்பளம் வழங்கப் படுதல் அவசியம்; நியாயமும் கூட. மாறாக அவர்கள் வஞ்சிக்கப்படுவார் களானால் தனியார் துறை நிறுவனங் கள் அவர்களது திறமையை பயன் படுத்திக் கொள்ள அதிக சம்பளம் தர காத்துக் கிடக்கின்றன. இதைத்தான் அரசு சார்பான சில பெரியவர்கள் விரும்புகிறார்ளோ என நான் சந்தேகிக்கிறேன். தனியாரிடம் லஞ்சம் பெற்றுக் கொண்டு அரசின் பொதுத்துறை நிறுவனங்களை அழிக்க முயற்சிக்கும் சிலரது திட்டமோ என சந்தேகிக்கின்றேன்.

எனவே அரசு உடனடியாக போராடும் ஊழியர்களுடன் பேச்சு வார்த்தை நடத்தி உடனடியாக வேலை நிறுத்தத்தை முடிவுக்கு கொண்டு வர அரசு முயற்சிக்க வேண்டும். மாறாக வேலை நிறுத் தத்தை ஒடுக்க கடுமை தண்டனை வழங்கும் நடவடிக்கைகளை மேற் கொள்வதை வன்மையாக கண்டிக்கிறேன் என்றார்.

பாகிஸ் தான் தேசிய பாதுகாப்பு ஆலோசகர் மெஹ்மூட் அலி துர்ரானி பதவி நீக்கம் செய்யப்பட்டுள்ளார். மும்பாய் தாக்குதலையடுத்து இந்தியாவுக்கும் பாகிஸ்தானுக்குமிடையில் பதற்றம் உருவாகியுள்ள நிலையில் இவர் பதவி நீக்கம் செய்யப்பட்டிருக்கிறார். ஓய்வுபெற்ற இராணுவ ஜெனரலான துர்ரானியை பிரதமர் யூசுப் ராசா ஹிலானி பதவி நீக்கியதாக அறிவிக்கப்பட்டுள்ளது.

முக்கியமான கருத்துகளைத் தெரிவிக்கும் பொழுது உயர்மட்ட அரசியல் தலைவர்களுடன் கலந்தாலோசிக்காமல் கருத்து வெளியிட்டமைக்காகவே மெஹ்மூட் அலியைப் பணி நீக்கம் செய்துள்ளதாக பாகிஸ்தான் அறிவித்துள்ளது.

மும்பைத் தாக்குதல் தொடர்பில் கைது செய்யப்பட்ட அஜ்மல் பாகிஸ்தானைச் சேர்ந்தவரென இந்தியா தொடர்ந்தும் குற்றம் சாட்டி வருவதுடன் அதற்கான ஆதாரங்களையும் பாகிஸ்தானிடம் இந்தியா கையளித்துள்ளது.

ஆனால், இந்தியாவின் குற்றச்சாட்டுகளை நிராகரித்துள்ள பாகிஸ்தான், அஜ்மல் பாகிஸ்தானைச் சேர்ந்தவரல்லவெனவும் தெரிவித்து வருகின்றது.  இந்நிலையில், மும்பைத் தாக்குதல் தீவிரவாதி அஜ்மல் பாகிஸ்தானைச் சேர்ந்தவரென பாகிஸ்தான் தேசியப் பாதுகாப்பு ஆலோசகர் மெஹ்மூட் அலி துர்ரானி தெரிவித்த சில மணித்தியாலங்களின் பின்னர் அவர் பணி நீக்கம் செய்யப்பட்டுள்ளார்.

இதேவேளை, அஜ்மல் பாகிஸ்தானைச் சேர்ந்தவரென்று பாகிஸ்தானின் தகவல் அமைச்சர் செர்றி ரகுமானும் அறிவித்துள்ளார்.  இவ்விடயம் தொடர்பாக பாகிஸ்தானின் பாதுகாப்பு ஆலோசகர் மெஹ்மூட் அலி துர்ரானி தெரிவிக்கையில்;

மும்பைத் தாக்குலில் ஈடுபட்டதாகக் கூறப்படும் அஜ்மல் பற்றி பாகிஸ்தானின் சட்ட அமுலாக்க அதிகாரிகள் நடத்திய ஆரம்ப கட்ட விசாரணையில் அவர் பாகிஸ்தானைச் சேர்ந்தவர் தான் என்பது தெரிய வந்துள்ளது.

அவர் பாகிஸ்தானின் பஞ்சாப் மாநிலம் ஒகரா மாவட்டத்திலுள்ள பரித்கோட் கிராமத்தில் பிறந்தவர். அவரது பெற்றோர் அமீர் கசா இலாகி.

விசாரணை அதிகாரிகளிடம் அஜ்மலின் பெற்றோர் கூறும் போது, தங்கள் மகன் அஜ்மல் 4 வருடங்களுக்கு முன்பு வீட்டை விட்டுச் சென்று விட்டதாகவும் அதற்குப் பிறகு இடைப்பட்ட காலங்களில் சில தடவைகள் அவர் தங்களுடன் தொடர்பு கொண்டதாகவும் தெரிவித்துள்ளனர்.

மேலும், மும்பைத் தாக்குதலின் போது ஊடகங்களில் வெளியான புகைப்படங்கள் மூலம் அவரைத் தங்கள் மகன்தான் என்று அடையாளம் கண்டுகொண்டதாகவும் அஜ்மலின் பெற்றோர் கூறியிருக்கிறார்கள்.

இந்த விசாரணை அறிக்கையின் நகல்கள் உள்துறை அமைச்சகத்திடமும் பிரதமர் கிலானியிடமும் சமர்ப்பிக்கப்பட்டு இருக்கிறது. இது பற்றிய முறைப்படியான அறிவிப்பு இன்னும் சில நாட்களில் வெளியிடப்படும் என்று எதிர்பார்க்கப்படுகிறது.

மேலும் ஆரம்ப கட்ட விசாரணையில் மும்பையில் தீவிரவாதிகள் தங்களாகவே தாக்குதல் நடவடிக்கைகளில் ஈடுபட்டுள்ளார்கள் எனவும் பாகிஸ்தானின் பாதுகாப்பு அமைப்புக்கும் அவர்களுக்கும் எந்த விதத் தொடர்பும் இல்லை என்றும் தெரியவந்துள்ளதென தெரிவித்தார்.

இதேவேளை, அஜ்மல்கஸாப் பாகிஸ்தானை சேர்ந்தவர் தான் என்பதை பாதுகாப்பு அமைப்புகள் தனக்கு உறுதிப்படுத்தியுள்ளதாக துர்ரானி தெரிவித்துள்ளார்.

புலிகளின் மற்றுமொரு முக்கிய பிரதேசமாக விளங்கிய ஆனையிறவு பிரதேசத்தை இன்று மாலை  பாதுகாப்பு படையினர் கைப்பற்றி விட்டதாக ஜனாதிபதி தெரிவித்தார். முகமாலை மற்றும் கிளாலி பிரதேசங்களிலிருந்து முன்னேறி வந்த இராணுவத்தின் 53 வது மற்றும் 55 வது படைப்பிரிவினர் ஆனையிறவு பிரதேசத்தை தமது பூரண கட்டுப்பாட்டின் கீழ் கொண்டு வந்துள்ளதாக அவர் மேலும் தெரிவித்தார்.

இராணுவத்தின் 53 வது படைப்பிரிவின் கட்டளைத் தளபதி பிரிகேடியர் கமல் குணவர்தன தலைமையிலான படையினரும், 55 வது படைப்பிரிவின் கட்டளைத் தளபதி பிரிகேடியர் பிரசன்ன சில்வா தலைமையிலான படையினருமே ஆனையிரவு நகரையும் அதன் சுற்றுப்புறத்தையும் முழுமையாக கைப்பற்றியுள்ளதாக தெரியவருகிறது.

இதேவேளை, யாழ். – கண்டி ஏ-9 பிரதான வீதி படையினரின் பூரண கட்டுப்பாட்டின் கீழ் வந்துள்ளதாகவும் தெரிவிக்கப்படுகின்றது.  23 வருடங்களின் பின்பு யாழ். – கண்டி ஏ-9 பிரதான வீதி முழுவதும் படையினரின் கட்டுப்பாட்டின் கீழ் வந்த முதலாவது சந்தர்ப்பம் இதுவாகும் என்றும் தெரிவிக்கப்படுகின்றது.