::சர்வதேச விடயங்கள்

Friday, June 25, 2021

::சர்வதேச விடயங்கள்

சர்வதேச விடயங்கள் தொடர்பான செய்திகள் கட்டுரைகள்

ஒபாமாவுக்கு ஈரான் ஜனாதிபதி பதில்

அணு சக்தியை உற்பத்தி செய்வது ஈரானின் தார்மீக உரிமை. இந்த உரிமையை; விட்டு கொடுக்க தயாரில்லை என,  ஈரான் ஜனாதிபதி அகமது நிஜாத் தெரிவித்துள்ளார்.
 
ஈரான், அணு ஆயுதம் தயாரித்து வருவதாக அமெரிக்கா உள்ளிட்ட நாடுகள் அஞ்சுகின்றன. ஈரான் அணு ஆயுதம் தயாரிப்பதை கேள்விப்பட்ட மேற்கத்திய நாடுகள், அந்நாட்டின் மீது கடந்த 2006ம் ஆண்டு முதல் பொருளாதார தடை விதித்துள்ளன.
 
ஈரான் அணு ஆயுத தயாரிப்பை நிறுத்தி கொண்டால், அந்நாட்டின் மீது விதிக்கப்பட்டுள்ள பொருளாதார தடையை விலக்கி கொள்வது குறித்து பரிசீலிப்போம்; இல்லாவிட்டால் ஈரான் கடுமையான விளைவுகளை சந்திக்க வேண்டியிருக்கும் என, அமெரிக்க ஜனாதிபதி ஒபாமா எச்சரித்திருந்தார். அணு சக்தி உற்பத்தி என்பது ஈரானின் தார்மீக உரிமை. இந்த உரிமையை விட்டு கொடுக்க நாங்கள் தயாராக இல்லை. அமைதி பணிக்கு தான் அணு சக்தியை ஈரான் பயன்படுத்துகிறது.

மேற்கத்திய நாடுகள் பயப்படுவது போல் நாங்கள் அணு ஆயுதம் எதையும் தயாரிக்கவில்லை.அணு ஆயுத பரவல் தடை,  அமைதி பணிக்கு அணு சக்தி என்ற விஷயத்தில் மற்ற நாடுகளுடன் ஒத்துழைக்க தயாராக இருக்கிறோம்.

இந்த மாத இறுதியில் ஐ.நா., பொது சபையில் பேச வரும் போது,  அமெரிக்க அதிபர் ஒபாமாவுடன் ஒரே மேடையில் விவாதிக்க தயாராக இருக்கிறேன் என்று அகமது நிஜாத் மேலும் தெரிவித்துள்ளார்.

2008 ஆம் ஆண்டில் அதிக ஆயுத விற்பனை செய்த நாடு அமெரிக்கா

us-army.jpgகடந்த 2008 ஆம் ஆண்டில் உலகிலேயே அதிக ஆயுத விற்பனை செய்த நாடாக அமெரிக்காதான் என்று அமெரிக்க நாடாளுமன்ற குழு தாக்கல் செய்த அறிக்கை ஒன்றில் தெரிவிக்கப்பட்டுள்ளது.

” வளரும் நாடுகளுக்கான மரபு ஆயுத பரிமாற்றங்கள் ” என்ற தலைப்பின் கீழ் அமெரிக்கா கடந்த 2008 ஆம் ஆண்டு மேற்கொண்ட் ஆயுத விற்பனை குறித்து ஆய்வு செய்து, அமெரிக்க நாடாளுமன்ற குழு ஒன்று அறிக்கை தாக்கல் செய்துள்ளது.

அதில் மேற்கண்ட விவரம் இடம்பெற்றுள்ளதாகவும், உலகில் விற்பனையான மூன்றில் இரண்டு பங்கு ஆயுதங்களை அமெரிக்காவே விற்பனை செய்துள்ளதாகவும், ஏறக்குறைய 55.2 பில்லியன் டாலருக்கு இந்த் ஆயுத விற்பனை நடைபெற்றுள்ளதாகவும் நியூயார்க் டைம்ஸ் வெளியிட்டுள்ள செய்தியில் தெரிவிக்கப்பட்டுள்ளது.

மேலும் இந்தியா போன்ற நாடுகளில் இதுவரை ஆயுத விற்பனை செய்து வந்த ரஷ்யாவின் மார்க்கெட்டையும் அமெரிக்கா தற்போது பிடித்து விட்டதாகவும் அந்த அறிக்கையில் தெரிவிக்கப்பட்டுள்ளது.

ஆப்கானிஸ்தானில் பல வாக்குச்சாவடிகளின் முடிவுகள் ரத்து

ஆப்கானிஸ்தானில் இடம்பெற்றதாகக் கூறப்படும் வாக்கு மோசடிகள் குறித்து நடத்தப்பட்ட விசாரணைகளைத் தொடர்ந்து அந்நாட்டு தேர்தல் அதிகாரிகள் நானூற்று நாற்பத்து ஏழு வாக்குச்சாவடிகளுக்கான முடிவுகளை ரத்து செய்துள்ளனர்.

கடந்த மாதத்தில் இடம்பெற்ற அதிபர் தேர்தல்களையடுத்து, நாட்டின் சுமார் 28 ஆயிரம் வாக்களிப்பு நிலையங்களில் பெருமளவிலான வாக்கு மோசடிகள் இடம்பெற்றுள்ளதாக இரண்டாயிரத்துக்கும் அதிகமான முறைப்பாடுகள் தேர்தல் ஆணையத்துக்கு கிடைத்துள்ளன.

இதுவரை எண்ணப்பட்டுள்ள மூன்றில் இரண்டு பங்கு வாக்குகளின்படி, அதிபர் ஹமீத் கர்சாய் 49 வீதத்தை எட்டிய வாக்கு வித்தியாசத்தில் முன்னிலையில் உள்ளார். அவருக்கு அடுத்தபடியாக, போட்டி வேட்பாளரான முன்னாள் வெளிவிவகார அமைச்சர் அப்துல்லா அப்துல்லா 32 வீதமான வாக்குகளைப் பெற்றுள்ளார்.

காதலுக்காக கண்களில் தீ வைத்துக் கொண்ட காதலி

06-eye.jpgகாதலனை பார்க்காத முடியாத கண்கள் தேவையில்லை என்று கூறி காதலி ஒருவர் கண்களில் தீ வைத்துக் கொண்டார். படுகாயமடைந்த நிலையில் தற்போது மருத்துவமனையில் அனுமதிக்கப்பட்டுள்ளார்.

திண்டுக்கல் மாவட்டம், நத்தம், காந்திஜி நகரைச் சேர்ந்தவர் மேனகா (18). இவரும், இதே பகுதியைச் சேர்ந்த ஆறுமுகமும் (20) கடந்த ஓரு வருடமாக காதலித்து வந்துள்ளனர். ஆனால், இவர்களது காதலுக்கு பெற்றோர்கள் கடும் எதிர்ப்பு தெரிவித்தனர்.

மேலும், காதலன் ஆறுமுகத்தை பார்க்க மேனகாவுக்கு அவரது பெற்றோர்கள் தடை போட்டனர்.

இதனால், மனமுடைந்த மேனகா காதலனை சந்திக்க முடியாத தனது கண்கள் தனக்கு தேவையில்லை என்று கூறி தனது கண்ணில் தீ வைத்துக் கொண்டார்.

இதையடுத்து தீ, முகம், கைகள், மார்பு என பரவி படுகாயம் அடைந்தார் மேனகா. உயிருக்கு ஆபத்தான நிலையில் அவரை மதுரை அரசு மருத்துவமனையில் சிகிச்சைக்கு சேர்த்துள்ளனர். அங்கு தீவிர சிகிச்சை அளிக்கப்பட்டு வருகிறது.

ஜஸ்வந்த்சிங் புத்தகத்திற்கு மாநில அரசு விதித்த தடை குஜராத் மேல் மன்றால் நீக்கம்

ஜஸ்வந்த் சிங் புத்தகத்திற்கு குஜராத் முதல்வர் மோடி அரசு விதித்த தடையை அம்மாநில மேல் நீதிமன்றம் நீக்கியுள்ளது. தடை விதிக்கப்பட்டதில் சட்ட விதிமுறைகள் சரியாகப் பின்பற்றப்படவில்லை என்றும் கூறியுள்ளது.

பா. ஜ. மூத்த தலைவராக இருந்த ஜஸ்வந்த் சிங் சமீபத்தில், “ஜின்னா – இந்தியா, பிரிவினை, சுதந்திரம்” என்ற தலைப்பில் புத்தகம் ஒன்றை வெளியிட்டார். இதையடுத்து, கட்சியில் இருந்து நீக்கப்பட்டார். அவரது புத்தகத்திற்கு, குஜராத் முதல்வர் மோடி தலைமையிலான அரசு தடை விதித்தது.

இந்தத் தடையை எதிர்த்து, மணீஷி ஜானி, பிரகாஷ் ஷா ஆகியோர் குஜராத் மேல் நீதிமன்றில் மனுத் தாக்கல் செய்தனர். மனுவை, தலைமை நீதிபதி ராதாகிருஷ்ணன் தலைமையிலான மூன்று நீதிபதிகள் கொண்ட குழு விசாரித்தது.

குஜராத் அரசு விதித்த தடையை நீக்கிய நீதிபதிகள், தங்கள் உத்தரவில் கூறியதாவது:- ஜஸ்வந்த் சிங் புத்தகத்திற்கு தடை விதித்து அறிக்கை வெளியிட்டதில், உரிய சட்ட விதிமுறைகள் பின்பற்றப்படவில்லை. புத்தகத்தில் உள்ள விவரங்கள் தேசிய நலனுக்கு எதிரானவை மற்றும் மக்களை திசை திருப்புபவை எனக் கூறி, இந்திய தண்டனைச் சட்டம் பிரிவு 95 ன் கீழ் தடை விதிக்கப்பட்டுள்ளது.

இந்தத் தடை மூலம், ஒரு குடிமகனின் அடிப்படை உரிமை மீறப்பட்டுள்ளது. எந்த அடிப்படையில், புத்தகத்திற்கு தடை விதிக்கப்பட்டுள்ளது என்பதை அறிக்கையில் குறிப்பிடவில்லை. மேலும் புத்தகத்தை படிப்பதன் மூலம், எந்த வகையில் மாநிலத்தின் அமைதி பாதிக்கப்படும் என்பதையும் தெரிவிக்கவில்லை.

அதே நேரத்தில், புதிதாக ஒரு அறிக்கையை வெளியிட குஜராத் மாநில அரசு தீர்மானித்தால், அதற்கு தடையில்லை. இவ்வாறு நீதிபதிகள் உத்தரவில் கூறியுள்ளனர். தன் புத்தகத்திற்கு மோடி அரசு விதித்த தடையை குஜராத் மேல் நீதிமன்றம் நீக்கியுள்ளதை ஜஸ்வந்த் சிங் வரவேற்றுள்ளார். தீர்ப்பு, தனக்கு எழுச்சியை உண்டாக்கியுள்ளது என்றும் தெரிவித்துள்ளார். பாரதீய ஜனதாக் கட்சியின் ஆட்சியிலுள்ள ஏனைய மாநிலங்களில் இந்தப் புத்தகத்திற்குத் தடைவிதிக்கப்படவில்லை.

கேரள சாப்பாட்டு போட்டி – தொண்டையில் பாண் சிக்கி இளைஞர் உயிரிழப்பு

கேரளாவில் நடைபெற்ற சாப்பாட்டுப் போட்டியில் பங்கேற்ற இளைஞர் ஒருவர் தொண்டையில் பாண் சிக்கி மூச்சுத் திணறி இறந்துள்ளார்.

ஓணம் பண்டிகையையொ ட்டி கேரளாவில் பல்வேறு அமைப்புகள் சார்பில் விளையாட்டு போட்டிகள் உட்பட பல்வேறு போட்டிகள் நடப்பது வழக்கம். கோழிக்கோடு கொடுவள்ளி பகுதியில் உள்ள ஓர் இளைஞர் அமைப்பு சார்பில் சாப்பாடு போட்டி நடத்தப்பட்டது.

இந்த போட்டியில், 2 நிமிடத்தில் அதிக அளவில் பாண் சாப்பிடுபவருக்கு ரூ. 1,000 பரிசு வழங்கப்படும் என்று அறிவிக்கப்பட்டது. இதில் அப்பகுதியைச் சேர்ந்த சசி (35) என்பவர் உட்பட 15 பேர் கலந்து கொண்டனர். போட்டியைக் காண அந்த பகுதியைச் சேர்ந்த ஏராளமானவர்கள் திரண்டிருந்தனர்.

போட்டியில் பங்கேற்ற இளைஞர்கள் வேக வேகமாக சாப்பிட்டுக் கொண்டிருந்தனர். அப்போது திடீரென சசியின் தொண்டையில் பாண் சிக்கியது. இதில் மூச்சு திணறிய அவர் மயங்கி விழுந்தார். அவரை கோழிக்கோடு அரசு மருத்துவக் கல்லூரி மருத்துவமனைக்கு கொண்டு சென்றனர். ஆனால் சிகிச்சை பலனளிக்காமல் அவர் இறந்தார். இந்த சம்பவம் அப்பகுதியில் பெரும் சோகத்தை ஏற்படுத்தியது. இது குறித்து பொலிஸார் விசாரித்து வருகின்றனர்.

ஆந்திர முதல்வர் நியமனத்தில் இழுபறி; ரெட்டியின் மகனுக்கு 148 பேர் ஆதரவு

ராஜசேகர ரெட்டியின் உடல் அடக்கம் முடிந்த கையோடு அங்கு தற்போது முதல்வர் பதவியைப் பிடிக்கும் முயற்சிகள் சூடு பிடிக்கத் தொடங்கியுள்ளன. ராஜசேகர ரெட்டியின் மகன் ஜெகன் மோகன் ரெட்டிக்கு ஆதரவாக 148 எம். எல். ஏக்கள் அணி திரண்டுள்ளனர்.

ஆனால் அவசரப்பட்டு அடுத்த முதல்வரைத் தீர்மானிக்க விரும்பாமல் நிதானமாக முடிவெடுக்க காங்கிரஸ் மேலிடம் திட்டமிட் டுள்ளது.

உணர்ச்சிவசப்பட்டு முடிவெடுப் பதை விட ஆந்திர நலனுக்கும், கட்சிக்கும் உகந்த முடிவை எடுக்க ஆர்வமாக உள்ளதாம் காங்கிரஸ் தலைமை. தற்போது ஆந்திர நிலையை கட்சி மேலிடம் உன் னிப்பாக கவனித்து வருவதாகவும் தெரிவிக் கப்படுகின்றது. இதன் காரணமாகவே ரோசய்யாவை உடனடியாக இடைக்கால முதல்வராக கட்சி மேலிடம் அறிவித்து அவரை உடனடியாக பதவியேற்கவும் செய்தது. எனவே நிதானமாக அடுத்த முதல்வரைத் தேர்ந்தெடுக்க முடியும் என்பது காங்கிரஸின் எண்ணம்.

2004ம் ஆண்டு காங்கிரஸ் மீண்டும் ஆந்திராவில் ஆட்சியைப் பிடிக்கக் காரணமே ராஜசேகர ரெட்டியின் அணுகுமுறைதான்.

அதுவரை பல்வேறு கோஷ்டிகளாக பிளவுபட்டுப் போயிருந்த காங்கிரஸை ஒன்றுபடுத்தி அனைவரையும் ஓரணியில் நிற்க வைத்தவர் ராஜசேகர ரெட்டி. ஒரே கட்சி, ஒரே கோஷ்டி என்ற அளவுக்கு காங்கிரஸை ஆந்திராவில் கட்டுக் கோப்பான கட்சியாக கடினப்பட்டு மாற்றி வைத்திருந்தார் ரெட்டி. இப்போது அவரது வாரிசைத் தேர்வு செய்யும் போது கட்சிக்குள் குழப்பமாகி, மறுபடியும் கட்சியில் பூசல்கள் வெடித்து விடாமல் இருக்க வேண்டும் என காங்கிரஸ் தலைமை யோசிக்கிறதாம்.

இருப்பினும், இப்போதைக்கு ஜெகன் மோகன் ரெட்டியின் கரம் தான் கட்சியில் ஓங்கியிருப்பதாக தெரிகிறது. அவரைத் தவிர வேறு யாரும் தெளிவான, வலுவான தலைவராக தெரியவில்லை. அதேசமயம், ஜெகன் மோகன் ரெட்டிக்கு ஆதரவாக தீவிரமாக செயல்படுபவர்கள் இளம் எம்.பிக்கள், எம். எல். ஏக்கள்தான். அவர்களில் பெரும்பாலானோர் ராஜசேகர ரெட்டியால் அரசியல் அங்கீகாரம் தரப்பட்டவர்கள்.

மற்றபடி மூத்த தலைவர்களோ அல்லது மூத்த எம். எல். ஏ. எம். பியோ யாரும் ஜெகன் மோகன் ரெட்டிக்கு ஆதரவாக இவ்வளவு தீவிரமாக இல்லை என்றும் கூறப்படுகிறது. இதன் மூலம் ஜெகன் மோகன் ரெட்டிக்கு ஆந்திர காங்கிரஸ் முழு ஆதரவுடன் இல்லை என்பதும் தெளிவாகியுள்ளது. தற்போது ஜெகன் மோகன் ரெட்டிக்கு ஆதரவாக 36 அமைச்சர்கள் உட்பட 148 எம். எல். ஏக்களின் ஆதரவு இருப்பதாக கூறப்படுகிறது. இதைத் தெரிவித்து கட்சித் தலைமைக்கு கடிதம் அனுப்பப்பட்டுள்ளதாம்.

15 பேரை திருமணம் செய்து ஏமாற்றிய நெல்லை பெண் கைது

திருநெல்வேலியில் 15 வாலிபர்களை ஏமாற்றி திருமணம் செய்து, 50 பவுன் நகைகளை கொள்ளையடித்த இளம் பெண்ணை போலீசார் கைது செய்தனர்.  திருநெல்வேலி மற்றும் தாழையுத்து பகுதிகளில் மீனா என்ற இளம்பெண் ஆண்களை ஏமாற்றி திருமணம் செய்து கொண்டு அவர்களிடம் இருந்து நகை, பணத்தை பறித்து கொண்டு மாயமாகி விட்டார்.

மேலும் அவர் பல வீடுகளி்ல் வேலைக்கு சேர்ந்து உரி்மையாளர்களின் நம்பகத்தன்மையை பெற்று பிறகு அவர்கள் கண் அயரும் நேரத்தில் நகைகளை திருடி கொண்டு தலைமறைவாகியுள்ளார். இது தொடர்பாக அவர் மீது போலீஸில் 10 வழக்குகள் தொடரப்பட்டுள்ளன. இதையடுத்து மீனாவை கைது செய்ய மாநகர போலீஸ் கமிஷனர் குணசீலன், துணை கமிஷனர் அவினாஷ்குமார் ஆகியோர் உத்தரவின்பேரில் தனிப்படை அமைக்கப்பட்டது.

இந்நிலையில் நேற்று விஎம் சத்திரம் பேருந்து நிலையத்தில் மீனா நிற்பதாக போலீசாருக்கு தகவல் கிடைத்தது. இதையடுத்து அவர்கள் விரைந்து சென்று மீனாவை கைது செய்தனர். பின்னர் அவரிடம் விசாரணை மேற்கொண்டனார். அப்போது மீனா, மேலும் பல அதிர்ச்சிகரமான தகவல்களை தெரிவித்துள்ளார்.

அவர் போலீஸாரிடம் கூறுகையில், இதுவரை 15 வாலிபர்களை ஏமாற்றி திருமணம் செய்து கொண்டுள்ளேன். அவர்களிடம் இருந்து நகைகளை திருடி விற்று ஆடம்பரமாக செலவு செய்து வாழ்ந்தேன். தற்போது பணம் காலியானதை தொடர்ந்து விஎம் சத்திரத்தில் ஒரு வீட்டில் வேலைக்கு சேர வந்தேன் என்றார்.

போலீஸார் அந்த பெண்ணிடம் இருந்து 15 பவுன் நகையை மீட்டனர். மேலும், 35 பவுன் நகைகளை விரைவில் மீட்க இருப்பதாகவும் போலீஸார் தெரிவித்தனர்.

வைகோ, விஜயகாந்த், திருமா. புலிகளிடம் பணம் பெற்றனர்-சாமி

swamy1111.jpgவிடுதலைப் புலிகளிடம் இருந்து மதிமுக பொது செயலாளர் வைகோ, தேமுதிக தலைவர் விஜயகாந்த் மற்றும் விடுதலை சிறுத்தைகள் தலைவர் திருமாவளவன் உள்ளிட்ட 27 அரசியல் கட்சி தலைவர்கள் பணம் வாங்கியதாக ஐனதா கட்சி தலைவர் சுப்பிரமணிய சாமி கூறியுள்ளார். அவ்வப்போது சுப்ரமணிய சாமியும் செய்தியாளர்களைச் சந்தித்து பேட்டிகள் கொடுப்பது வழக்கம். அந்த ரீதியில், இன்று சென்னையில் அவர் செய்தியாளர்களைச் சந்தித்தார்.

அப்போது சாமி கூறுகையில்,  இந்தியாவில் இருக்கும் 27 அரசியல் கட்சிகளை சேர்ந்த தலைவர்கள் விடுதலை புலிகளிடம் இருந்து பணம் பெற்று இருப்பதற்கான ஆதாரங்கள் என்னிடம் உள்ளது. இது இலங்கையில் இருந்து ஆதாரப்பூர்வமாக கிடைத்துள்ளது.

அவர்களில் மதிமுக பொதுச்செயலாளர் வைகோ, தேமுதிக தலைவர் விஜயகாந்த் , மற்றும் விடுதலை சிறுத்தைகள் கட்சி தலைவர் திருமாவளவன்  ஆகியோரும் அடங்குவர். இது தொடர்பாக நடவடிக்கை எடுக்க வேண்டும் என பிரதமர் மன்மோகன் சிங்கிற்கு கடிதம் எழுதியுள்ளேன். அவர் நடவடிக்கை எடுக்காவிட்டால் நானே நீதிமன்றத்துக்கு சென்று இதை அம்பலப்படுத்துவேன் என்றார் சுப்பிரமணிய சாமி.

சர்வதேச நாணய நிதியம் சிம்பாப்வேக்கு கடன்

ro-mu.jpgகடந்த பத்து ஆண்டுகளில் முதல் முறையாக சர்வதேச நாணய நிதியம் சிம்பாவேவுக்கு கடன் வழங்கவுள்ளது.

சிம்பாப்வே தனது வெளிநாட்டு நாணயக் கையிருப்பில் மிகக் கடுமையான வீழ்ச்சியை எதிர்கொண்டுவரும் நிலையில் அதனை ஈடுகட்டும் நோக்கில் அந்நாட்டுக்கு 50 கோடி டாலர்கள் வழங்கப்படவுள்ளதாக பிபிசி அறிந்துள்ளது.

இந்தப் பணம் அந்நியச் செலாவணிக் கையிருப்புக்காக மட்டும் பயன்படுத்தப்பட வேண்டுமே ஒழிய வேறு திட்டங்களில் செலவழிக்கப்படக்கூடாது என்ற நிபந்தனையுடன் சர்வதேச நாணய நிதியம் கடன் தொகையை வழங்கபோவதாக பிபிசி செய்தியாளர் கூறுகிறார்.

சிம்பாப்வேயின் பொருளாதார நெருக்கடிக்கு அந்நாட்டின் மத்திய வங்கியில் நடந்த மோசமான நிதி நிர்வாகமும் ஒரு காரணம் என்று எமது செய்தியாளர் தெரிவிக்கிறார்.