16

இலங்கையில் வடக்கு, கிழக்கு தமிழருக்கு என தனித்துவமான நடனக்கலை ஒன்று இருக்கிறது. தென்மோடி, வடமோடி என அக்கலை அமைகிறது. எமது நடனக்கலை எது என்பதை நமது அறிஞர்கள் ஆய்வு செய்ய வேண்டும் என்று கிழக்கு மாகாணக்கல்வி அமைச்சின் ஆலோசகராகப் பதவியேற்றுள்ள சுந்தரம் திவகலாலா தெரிவித்தார்.

இணைந்த வடக்கு, கிழக்கு மாகாணக்கல்வி அமைச்சின் செயலாளராகப் பணிபுரிந்து பின்பு ஜேர்மன் நாட்டு ஜிரிஇஸட் நிறுவனக் கல்வி அலகின் நிபுணத்துவ ஆலோசகராகப் பணிபுரிந்த சுந்தரம் திவகலாலா, புதிய பதவியை ஏற்றபின், கடந்த சனிக்கிழமை திருகோணமலை சென்.மேரிஸ் கல்லூரியில் திருகோணமலை இராஜரெட்ணம் நடனாலயத்தின் 18 ஆவது ஆண்டு நிறைவாக நடத்தப்பட்ட அபிநய சாதனா நாட்டிய விழாவில் பிரதம அதிதியாகக் கலந்துகொண்டு பேசினார். அவர் மேலும் கூறுகையில்;

உலகில் வாழும் 770 இலட்சம் தமிழ் மக்களின் ஜீவநாதமான கலையாக பரதநாட்டியம் விளங்குகின்றது. கிறிஸ்துவுக்கு முற்பட்ட காலத்தில் பரதம் சமயம் சார்ந்த கருவியாக அடையாளம் காணப்பட்டது. இந்தியாவில் பரதம் செழித்து வளர்வதற்கு பல விற்பன்னர்கள் காரணமாக இருந்தார்கள், இருந்து வருகின்றார்கள். எமது இனம் எதனைச் செய்யினும் அதிலே ஒரு பாண்டித்தியம் இருக்க வேண்டும். பரதம் தமிழ் மக்களின் பொக்கிஷமாகும். இந்தியாவிலிருந்து எமக்கு கிடைத்தது. எமக்கென்றொரு தனித்துவம் இருக்க வேண்டும்.

இலங்கைத் தமிழராகிய எமக்கு வடக்கு, கிழக்கிலே தென்மோடி, வடமோடி மற்றும் கிராமிய நடனங்கள், காத்தவராயன் கூத்து என இருக்கிறது. இலங்கைத் தமிழர்களுக்கென தனி நடனக்கலை பற்றி எமது அறிஞர்கள் ஆய்வுசெய்ய வேண்டும்’ என்றார். கௌரவ அதிதியாகப் பங்குபற்றிய கிழக்கு மாகாணக் கல்விப் பணிப்பாளர் சி. தண்டாயுதபாணி பேசும்போது;  “நகரத்தில் அழகான அரங்கில் குழந்தைகளின் நேர்த்தியான அற்புதமான நடன நிகழ்வுகளை நாம் ரசிக்கிறோம், அனுபவிக்கின்றோம். இவ்வாறான சூழல், வாய்ப்பு எம் பிரதேசத்தின் ஏனைய பகுதிகளில் வாழும் எமது குழந்தைகளுக்கு இருக்கிறதா? இது எனது உள்ளத்தை நெருடுகிறது.

“மூதூர் இலங்கைத் துறைமுகத்துவாரம் பாடசாலை 2006 அனர்த்தத்தில் இடம்பெயர்ந்தது. மக்கள் மீளக்குடியமர்த்தப்பட்ட பின்னர் அப்பாடசாலை 2007 இல் மீண்டும் இயங்க ஆரம்பித்தது. அப்பாடசாலையின் பரிசளிப்பு விழாவில் நான் கலந்துகொண்டேன். அவ்விழாவில் இடம்பெற்ற கலை நிகழ்வுகளில் அம்மாணவர்கள் பங்குபற்றினார்கள். நகர மாணவரின் அளவுக்கு கிராமப்புற மாணவரின் ஆற்றல் அமையவில்லை. அவர்களுக்குள் புதைந்து இருக்கும் ஆற்றலை வெளிப்படுத்தும் வாய்ப்பும் அவர்களுக்கு அங்கு இல்லை. பூநகர் திருவள்ளுவர் பாடசாலை பரிசளிப்பு நிகழ்வுக்கு சென்றிருந்தேன். கூரையின்றி பாடசாலையின் வகுப்பறைகள், பாதுகாப்பான அறை பாடசாலையில் இல்லை. ஆனால், நிகழ்வில் பிள்ளைகள் ஆடினார்கள், பாடினார்கள், கலையின் மெருகை அக்குழந்தைகளுக்குக் கொடுக்க முடியுமா? என்பதை பெரியோர்கள் சிந்தித்துப் பார்க்க வேண்டும்’ என்றார். மூத்த கலைஞர்கள், பெரியோர்கள் கௌரவிப்பு நிகழ்வு இடம்பெற்றது. அதிதிகளும் கௌரவிக்கப்பட்டனர். பின்னர் கலை நிகழ்வுகள் இடம்பெற்றன.

ஜேர்மேனிய தூதுவர், மறைந்த-சண்டேலீடர் ஆங்கில வார ஏட்டின் பிரதம ஆசிரியர் லசந்த விக்கிரமதுங்கவின் இறுதிக் கிரியைகளில் தெரிவித்த கருத்துக்கள் குறித்து,இலங்கைவெளியுறவு அமைச்சு தமது அதிருப்தியை வெளியிட்டுள்ளது. வெளியுறவுத்துறை செயலர் பாலித கோஹன இந்த அதிருப்தியை வெளியிட்டுள்ளார்.

கடந்த திங்கட்கிழமை இடம்பெற்ற லசந்த விக்கிரமதுங்கவின் இறுதிக் கிரியைகளில் பங்கேற்ற ஜேர்மேனிய தூதுவர், ஜர்கன் ரெத்,”இன்று ஒருவர் மௌனித்துள்ளார். இவ்வாறான சம்பவங்கள் பற்றி ஏற்கனவே அரசுடன் பேசியிருக்க வேண்டும். இவ்வாறான சம்பவங்கள் பற்றிய எமது செயற்பாடுகள் தாமதமாகி விட்டன. இன்று மனிதத்துவத்தின் பெரும் உண்மைக் குரலை நாம் இழந்துவிட்டோம் எனகுறிப்பிட்டிருந்தார். இந்த நிலையிலேயே இலங்கையின் வெளியுறவு செயலாளர் தமது அதிருப்தியை வெளியிட்டுள்ளார்.

அமெரிக்க, கொரிய நிதியுதவியுடன் அடுத்த வருடத்தில் ஒரு இலட்சம் பேருக்குத் தொழிற் பயிற்சிகளை வழங்க தொழிற் பயிற்சி அமைச்சு நடவடிக்கை எடுத்துள்ளதாக அமைச்சர் பியசேன கமகே தெரிவித்தார். இதன்போது வடக்கு, கிழக்கு மீட்கப்பட்ட பகுதிகளிலுள்ள இளைஞர், யுவதிகளுக்கு முன்னுரிமையளிப்பதுடன் புலி சந்தேக நபர்களென தடுத்து வைக்கப்பட்டுள்ளோருக்கும் தொழிற் பயிற்சிகள் வழங்கப்படுமெனவும் அமைச்சர் தெரிவித்தார்.

தற்போது இவ்வாறு அம்பேபுஸ்ஸ, பல்லேகல, பூசா முகாம்களில் தடுத்து வைக்கப்பட்டுள்ளோருக்கும் தொழிற் பயிற்சிகள் வழங்கப்பட்டு வருவதாகத் தெரிவித்த அமைச்சர், தொழிற் பயிற்சிகளை வழங்குவதற்கான நிதியுதவிகளை அமெரிக்கா, கொரியா போன்ற நாடுகள் வழங்கி வருவதாகவும் தெரிவித்தார்.

அரசாங்கத்தின் அபிவிருத்தி நடவடிக்கைகள் சம்பந்தமாக தகவல், ஊடக அமைச்சில் நேற்று நடைபெற்ற செய்தியாளர் மாநாட்டில் கலந்து கொண்டு திறனபிவிருந்தி, தொழிற் பயிற்சி அமைச்சின் மூலம் மேற்கொள்ளப்பட்டு வரும் செயற்திட்டங்கள் தொடர்பாக விளக்கமளிக்கும் போதே அமைச்சர் இவ்வாறு தெரிவித்தார்.

அமைச்சர் தமதுரையில் மேலும் தெரிவித்ததாவது :- வேலைவாய்ப்பில்லாப் பிரச்சினைக்குத் தீர்வு காண்பதில் அரசாங்கம் முனைப்புடன் செயற்பட்டு வருகிறது. இதனடிப்படையில் வாழ்க் கைத்தொழிற் பயிற்சி அமைச்சு நாடளாவிய ரீதியில் பல்வேறு செயற்றிட்டங்களை முன்னெடுத்துள்ளது. இதன் பயனாக இவ்வருடம் 60,000 பேருக்கு தொழிற் பயிற்சிகள் வழங்கப் படவுள்ளன. அடுத்த வருடத்தில் ஒரு இலட்சம் பேருக்குத் தொழிற் பயிற்சி வழங்குவதே அரசாங்கத்தின் நோக்கமாகும். அரச துறையில் மட்டுமன்றி தனியார் துறையிலும் தொழில் வாய்ப்பைப் பெற்றுக்கொள்ளும் வகையில் அமைச்சு தொழிற் பயிற்சிகளை வழங்குவதுடன் உள் நாட்டிலும் வெளிநாட்டிலும் அங்கீகாரம் பெறும் வகையிலான சான்றிதழ்களையும் பயிற்சியின் முடிவில் வழங்கி வருகின்றது.

தொழிற் பயிற்சி மற்றும் தொழில் நுட்ப நிறுவனங்களில் தற்போது டிப்ளோமா சான்றி தழுக்கான பயிற்சிகள் இடம்பெறுகின்றன. உயர் டிப்ளோமா மற்றும் பட்டதாரி பட்டப் படிப்புகளை மேற்கொள்ளும் வகையில் தொழில் மற்றும் தொழில்நுட்பப் பல்கலைக் கழகமொன்றைத் திறக்கவும் நடவடிக்கை மேற்கொள்ளப்பட்டுள்ளது. கிழக்கு மாகாணம் உட்பட சுனாமியினால் பாதிக்கப்பட்ட பகுதிகளில் பாதிக்கப்பட்ட தொழிற் பயிற்சி நிலையங்களைப் புனரமைக்க அமெரிக்கா உட்பட பல நாடுகள் 1125 மில்லியன் ரூபாவை வழங்கியுள்ளதாகவும் அமைச்சர் மேலும் தெரிவித்தார்.

வடக்கில் விடுதலைப் புலிகளால் அமைக்கப்பட்டிருந்த தேசத்தை உறுதியாக நின்று போராடிக் கைப்பற்றிய இராணுவத்தினரை எதிர்காலங்களில் இடம்பெறவுள்ள தேர்தல்களில் நிறுத்த ஜனாதிபதி மகிந்த ராஜபக்ஷ விருப்பம் தெரிவித்துள்ளார். ஜனாதிபதியின் இந்த விருப்பத்தை சுகாதார அமைச்சர் நிமல் சிறிபால டி சில்வா கடந்த வாரம் குருநாகல் மக்களுக்கு முதன்முதலில் அறிவித்துள்ளார். அங்கு இடம்பெற்ற ஐக்கிய மக்கள் சுதந்திர கூட்டமைப்பின் வக்கீல்கள் சங்கத்துடனான சந்திப்பிலேயே அமைச்சர் இதனைத் தெரிவித்தார்.

ஜனாதிபதியின் மேற்படி முடிவு பற்றி அமைச்சர் மேலும் தெரிவிக்கையில்; இன்று நாட்டின் பாதுகாப்பிற்காகவும் நாட்டின் இறைமையை காப்பாற்றுவதற்காகவும் நேர்மையாக போராடும் வீரர்களை அரசியலில் பங்கேற்க வைக்க ஜனாதிபதி விரும்புகிறார் எதிர்காலத்தில் இடம்பெறும் அனைத்துத் தேர்தல்களிலும் இராணுவத்தில் பணிபுரிந்த அதிகாரிகள் வேட்பாளர்களாக நிறுத்தப்படுவதுடன் அவர்கள் அரசியலில் உற்சாகத்துடன் பங்குபற்றுவதற்கும் ஊக்கமளிக்கப்படுவர்.

அத்துடன் இந்த இராணுவ அதிகாரிகளை அரசியலில் பிரவேசிக்குமாறு ஜனாதிபதி கேட்டுள்ளார். மேலும் நாட்டு மக்களுக்கு நேர்மையாக பாதுகாப்பளித்து வரும் இவ்வீரர்களை அரசியலில் பங்குபற்ற செய்ய எடுக்கப்பட்ட முடிவு வரவேற்கத்தக்கதாகும். அத்துடன் வடமேல் மாகாணத்தில் இராணுவ வீரர்கள் நிச்சயம் அதிகளவான வாக்குகளைப் பெறுவர் எனவும் அங்கு இராணுவத்தினருக்கு சிறந்த வரவேற்புள்ளதெனவும் தெரிவித்தார்.

தைப்பொங்கல் பண்டிகையையொட்டி ‘பிரஜா சக்தி’ அமைப்பு ஏற்பாடு செய்துள்ள ‘அரச பொங்கல் விழா’ இன்று ஜனாதிபதி மஹிந்த ராஜபக்ஷவின் தலைமையில் காலை 10.00 மணிக்கு கண்டி ஜனாதிபதி செயலகத்தில் நடைபெறவுள்ளது.

அமைச்சர் ஆறுமுகன் தொண்டமான் உட்பட சிரேஷ்ட அமைச்சர்கள், மத்திய மாகாணத்தை பிரதிநிதித்துவப்படுத்தும் அரசியல்வாதிகள், முக்கியஸ்தர்கள், மாகாண அமைச்சர்கள் பலரும் இப்பொங்கல் விழாவில் கலந்துகொள்ளவுள்ளதாக ஜனாதிபதி செயலகம் தெரிவித்தது. அமைச்சர் தொண்டமானால் வழி நடத்தப்படும் ‘பிரஜா சக்தி’ அமைப்பு இவ்விழாவுக்கான விரிவான ஏற்பாடுகளை மேற்கொண்டுள்ளதுடன் மலையகத்தின் பாரம்பரிய கலை, கலாசார நிகழ்வுகளும் இப்பொங்கல் விழாவில் இடம் பெறவுள்ளன.

அரசாங்கத்துக்கு அபகீர்த்தி ஏற்படுத்தக் கூடிய விதத்தில் செயற்படும் சக்திகளை சட்டத்தின் பிடிக்குள் கொண்டுவர உரிய நடவடிக்கைகளை எடுக்குமாறு ஜனாதிபதி மகிந்த ராஜபக்ஷ பாதுகாப்புதரப்புக்கு உத்தரவிட்டுள்ளார். பயங்கரவாதத்தை தோற்கடிக்கும் இறுதிக் கட்டத்துக்கு படைத்தரப்பு முன்னேறிக்கொண்டிருக்கும் நிலையில் சில தீய சக்திகள் அரசுக்கு அபகீர்த்தியை ஏற்படுத்தும் சதித்திட்டத்தை மேற்கொண்டுள்ளதாகச் சுட்டிகாட்டியிருக்கும் ஜனாதிபதி எத்தகைய சவால்களுக்கும் முகங்கொடுக்ககூடிய பலம் அரசுக்கு இருப்பதாகவும் தெரிவித்திருக்கிறார்.

செவ்வாய்க்கிழமை இரவு அலரிமாளிகையில் இடம்பெற்ற நாட்டிலுள்ள சட்டதரணிகளுடனான சந்திப்பின் போதே ஜனாதிபதி மேற்கண்ட தகவல்களை வெளியிட்டிருக்கின்றனர். ஆயிரத்துக்கும் மேற்பட்ட சட்டத்தரணிகள் செவ்வாய்யிரவு ஜனாதிபதியைச் சந்தித்து பயங்கரவாதத்தை முற்றாக ஒழித்து நாட்டில் சமாதானத்தையும் அபிவிருத்தியையும் கட்டியெழுப்புவதற்கு ஜனாதிபதி எடுத்துவரும் முயற்சிகளை பாராட்டியதோடு இதற்குக் கட்சி இன வேறுபாடுகளலின்றி அனைவரும் ஒத்துழைக்க வேண்டுமென்ற கோரிக்கையையும் விடுத்துள்ளது.

போரின் தீர்க்கமான கட்டத்துக்கு வந்துள்ள நிலையில் யுத்தத்தை மலினப்படுத்தி அரசாங்கத்துக்கு அபகீர்த்தியை ஏற்படுத்தும் விதத்தில் அண்மைக்காலமாக ஊடகநிறுவனங்கள் தாக்கப்படுவதும் ஊடகவியலாளர்கள் அச்சுறுத்தப்பட்டு தாக்கப்பட்டுமுள்ளனர். இறுதியாக சிரேஷ்ட ஊடகவியலாளரும் , சட்டதரணியுமான லசந்த விக்கிரமதுங்க படுகொலை செய்யப்பட்டுள்ளார். இவை அனைத்துக்குமே அரசு மீதே குற்றச்சாட்டு சுமத்தப்பட்டுள்ளது. அரசுக்கு உள்ளூர் மட்டத்திலும் சர்வதேச ரீதியிலும் அபகீர்த்தியை ஏற்படுத்துவதே இந்த சதிகாரிகளின் திட்டமாகும். இதனை அரசு கடுமையாகக் கண்டிக்கிறது.  இத்தகைய மிலேச்சத்தனமான படுகொலையைச் செய்தவர்களை கண்டு பிடித்து நாட்டு மக்களுக்கு பகிரங்கப் படுத்துவோம். ஊடக நிறுவனம் தீவைப்பு ,லசந்த விக்கிரமதுங்க படுகொலை என்பன தொடர்பில் பாரபட்சமற்ற விசாரணை நடத்தி குற்றவாளிகளை விரைவில் கண்டு பிடிக்குமாறு நான் பாதுகாப்புத் தரப்புக்கு பணிப்புரை விடுத்துளேன். அரசாங்கம் ஜனநாயக விரோதச் செயலிலீடுபடவில்லை. அதேபோன்று இனிமேல் ஜனநாயகத்துக்கு கலங்கம் ஏமற்பட இடமளிக்கப்படவும்மாட்டாது. இவ்விடயத்தில் அரசு காத்திரமான நடவடிக்கைகளை எடுக்கதீர்மானித்துள்ளது எனவும் ஜனாதிபதி ராஜபக்ஷ சட்டத்தரணிகள் மத்தியில் தெரிவித்துள்ளார்.

கிளிநொச்சியை அரசு வெற்றிகொண்டபின் எதிர்க்கட்சியினரின் பிரசாரத்துக்கு எதுவுமில்லாத நிலையிலேயே சிரச மீது தாக்குதல் நடத்தப்பட்டதுடன் லசந்தவும் கொல்லப்பட்டார். அரசுக்கு எவ்வித இலாபமும் இல்லாத இச் சம்பவங்களுடன் தொடர்புடைய குற்றவாளிகள் நீதியின் முன் நிறுத்தப் படுவார்களென அமைச்சர் ராஜித சேனாரட்ன தெரிவித்தார். மகாவலி கேந்திர நிலையத்தில்  செவ்வாய்க்கிழமை இடம்பெற்ற ஊடகவியலாளர் மகாநாட்டில் கலந்துகொண்டு பேசுகையிலேயே அவர் மேற்கண்டவாறு தெரிவித்தார்.

அவர் மேலும் பேசுகையில்; “அரசாங்கம் கிளிநொச்சியை வெற்றிகொண்டுள்ள நிலையில் எதிர்க்கட்சியினர் சிரச ஊடகம் மற்றும் சண்டே லீடர் பிரதம ஆசிரியர் லசந்த மீதான தாக்குதல் தொடர்பில் அரசு மீது குற்றம் சுமத்துவதை ஏற்க முடியாது. அரசு படிப்படியாக வெற்றி ஈட்டி வருகின்ற நிலையில் இதனை சகிக்க முடியாமலே எம்மீது குற்றம் சுமத்துகின்றனர். சிரச மற்றும் லசந்த மீதான தாக்குதல்தாரிகளை அரசாங்கம் நீதியின் முன்நிறுத்தி உண்மையை தெரியப்படுத்தும். இவை தொடர்பில் உரிய விசாரணையை மேற்கொள்ளுமாறு ஜனாதிபதி உத்தரவிட்டுள்ளார். ஜனாதிபதி, லசந்தவின் நெருங்கிய நண்பர். லசந்த தனது திருமணத்துக்கு ஜனாதிபதிக்கு அழைப்பு விடுத்திருந்தார். பாதுகாப்பு காரணங்களுக்காக ஜனாதிபதி வரமுடியாது என தெரிவித்ததுடன் அவரது பாரியார் சகிதம் விருந்துக்கு வருமாறு லசந்தவை அழைத்துள்ளார். இதேபோல் லசந்த நோய்வாய்ப்பட்ட சமயம் ஜனாதிபதி தனது தனிப்பட்ட வைத்தியரை அனுப்பி சிகிச்சையளித்துள்ளார். லசந்தவுடன் ஜனாதிபதி இணைந்து பணியாற்றியுள்ளார். இவ்வாறு லசந்தவுக்கும் ஜனாதிபதிக்கும் நெருக்கமான உறவு இருந்த நிலையில் எதிர்க்கட்சியினர் பொய் குற்றச்சாட்டுகளை சுமத்துகின்றனர்.

இவ்வாறு வீணான குற்றங்களை சுமத்தி புலிகளுக்கு சக்தியளிக்க வேண்டாம். ரணில் விக்கிரமசிங்க இருக்கின்ற சமயமே பிரேமதாஸ கொலை செய்யப்பட்டார். புலிகள் தோல்வியில் இருக்கும் சமயம் சதி வேலைகளில் ஈடுபடுவர். மகேஸ்வரன் மீதான தாக்குதல் தொடர்பிலும் அரசு மீது பழிபோடப்பட்டது. அமைச்சரான நான் ஜனாதிபதியை சந்திப்பதை விட அதிகமாக மகேஸ்வரன் சந்திப்பார். இதனை நான் மகேஸ்வரனிடமே கேட்டுள்ளேன். கிளிநொச்சிக்கு பின்னர் எதிர்க்கட்சியினர் பேசுவதற்கு எதுவும் இல்லாத நிலையிருந்தது. கடந்த ஆறாம் திகதி பாராளுமன்றத்தில் அவசரகாலச் சட்டம் விவாதத்துக்கு எடுக்கப்படவிருந்த சமயம் சிரச தாக்கப்பட்டது. அதுபோல் 8 ஆம் திகதி அரசு மீது நம்பிக்கையில்லா விவாதம் நடைபெறவிருந்த சமயம் லசந்த சொல்லப்பட்டார்.

இவை அரசின் இலாபத்துக்காக இடம்பெற்றதா அல்லது வேறுயாருடைதோ இலாபத்துக்காக இடம்பெற்றதா என்பதை இதன் மூலம் அறிந்து கொள்ளலாம். இத்தாக்குதலால் அரசுக்கும் ஜனாதிபதிக்கும் எந்த இலாபமும் இல்லை. விசாரணை நடைபெற்று வருகின்ற நிலையில் குற்றவாளிகள் சட்டத்தின் முன் நிறுத்தப்படுவர். லசந்த தாக்குதல் தொடர்பில் மங்கள சமரவீர மற்றும் சந்திரிகா ஆகியோர் அரசுக்கு எதிராக கருத்து தெரிவித்துள்ளனர். ஐக்கிய தேசிய கட்சியின் ஆட்சியின் போதே ரிச்சர்ட் டி சொய்ஸா கொலை இடம்பெற்றது. அப்போது ரணில் விக்கிரம சிங்க அரசிலிருந்தார். சந்திரிகா ஆட்சியில் அவருக்கு நெருக்கமாகவிருந்த மங்கள சமரவீர அமைச்சராக விருந்த போதே லசந்த இரு முறை தாக்கப்பட்டார். ரோகண குமார படுகொலை செய்யப்பட்டார். இவர்களின் தலைமையிலேயே இவை இடம்பெற்றன. மங்கள சமரவீரவே ஊடக மாபியாவென தெரிவித்த நிலையில் இப்போது ஊடக சுதந்திரம் இல்லையென கூறுகின்றார். வெட்கமில்லாது இப்போது கதைக்கின்றனர். தோல்வியுற்று இறுதிக் கட்டத்திலுள்ள புலிகளுக்காக இவர்கள் சதி செய்கின்றனர்’.

கல்வி அமைச்சின் செயலாளர் நிமால் பண்டாரவை சேவையில் இருந்து இடைநிறுத்துமாறு, ஜனாதிபதி புலனாய்வுப் பிரிவினர் சிபார்சு செய்துள்ள நிலையில், இது குறித்து விசாரணை நடத்தவென ஜனாதிபதி விசேட குழுவொன்றை நியமித்துள்ளார். வட மேல் மாகாண சபை செயலகப் பிரிவுக்குட்பட்ட பகுதியில் இடம்பெற்ற மோசடி தொடர்பாகவே, நிமால் பண்டாரவை சேவையில் இருந்து இடைநிறுத்துமாறு புலனாய்வு பிரிவு சிபார்சை தெரிவித்திருந்தது.

காணி விவகாரம் தொடர்பில், அரசாங்கத்தின் ஒரு தொகைப் பணத்தை கல்வி அமைச்சின் செயலாளர் மோசடி செய்ய முயன்ற குற்றச்சாட்டு தொடர்பாகவே, ஜனாதிபதியின் புலனாய்வுப் பிரிவினர் விசாரணைகளை மேற்கொண்டு வந்ததாக ஜனாதிபதி செயலக வட்டாரங்கள் தெரிவித்தன. பண்டார, வட மேல் மாகாண சபையின் செயலாளராக இருந்த காலத்தில், அரசாங்கத்தின் 10.25 மில்லியன் ரூபா பணத்தை அவர் மோசடி செய்ய முயற்சிகளை மேற்கொண்டதாகவும் ஜனாதிபதி செயலக வட்டாரங்கள் தெரிவித்தன. அதேசமயம் இந்த நிலத்தை கைமாற்றிய விவகாரத்தில் சம்பந்தப்பட்டுள்ள ஏனைய அதிகாரிகளுக்கு எதிராகவும் ஒழுக்காற்று நடவடிக்கை எடுப்பதற்கும் ஜனாதிபதி புலனாய்வுப் பிரிவு சிபார்சு செய்துள்ளது.

முறைகேடுகள் இடம்பெற்றதாகக் கூறப்படும் வட மேல் மாகாண சபையின் கட்டுப்பாட்டின் கீழ் உள்ள ஹெரலியவல தொழிற்சாலை தொகுதியை விஸ்தரிப்பதற்கான அஸ்வத்துவத்த நில கொள்வனவு தொடர்பில் இடம்பெற்றுள்ள முறைகேடுகள் தொடர்பாகவே,ஜனாதிபதி புலனாய்வுப் பிரிவினர் விசாரணைகளை ஆரம்பித்துள்ளனர். இந்த நிலத்துக்கான பெறுமதியை அரச மதிப்பீட்டாளர்கள் 10 மில்லியன் ரூபாவாக கணிப்பிட்டுள்ள நிலையில், இக் காணியை 20.25 மில்லியன் ரூபாவுக்கு கொள்வனவு செய்ய நிமால் பண்டார முயற்சிகளை மேற்கொண்டமையும் விசாரணையின் போது தெரிய வந்துள்ளது. அரச மதிப்பீட்டாளரின் அறிக்கை கிடைக்கும்வரை இந்த காணி விவகாரத்தை இடைநிறுத்தி வைத்துள்ளதாகவும் புலனாய்வு பிரிவினர் தெரிவித்தனர். இக் காணி விவகாரம் தொடர்பான கணக்காய்வுகளின்போதும், நிதி மோசடி இடம்பெற்றுள்ளமை உறுதிப்படுத்தப்பட்டுள்ளது.

இலங்கையில் போர் நிறுத்தத்தை வலியுறுத்தி சென்னை மறைமலை நகரில் விடுதலைச் சிறுத்தைகள் உண்ணாவிரதம் இருக்கும் நிலையில் கோவை மாவட்ட ஆட்சியர் அலுவலகம் முன் (15)  தீக்குளிக்க முயன்ற பெரியார் தி.க.வை சேர்ந்த 3 பேர் கைது செய்யப்பட்டனர்.

பரபரப்புக்கு பெயர்போன கோவை மாவட்ட ஆட்சியர் அலுவலகம் முன் (15) காலை தீக்குளிப்போம் என்று பெரியார் திராவிடர் கழகத்தை சேர்ந்த சிலர் அறிவித்து இருந்தனர். இதனால் முன்னெச்சரிக்கை நடவடிக்கையாக கமிஷனர் கே.சி.மஹாலி உத்தரவின் பேரில் துணை கமிஷனர் ராஜேந்திரன், உதவி கமிஷனர்கள், சுந்தரவடிவேல், பழனிசாமி, ஆகியோர் மேற்பார்வையில் இன்ஸ்பெக்டர் சவுந்தர் ராஜன் தலைமையில் 50-க்கும் மேற்பட்ட காவலர்கள் கோவை மாவட்ட ஆட்சியர் அலுவலகம் முன், உள்பகுதியில் பாதுகாப்புக்காக நிறுத்தப்பட்டு இருந்தனர். அதோடு தீயை அணைக்கும் கருவிகளையும் கொண்டு வந்து தயார் நிலையில் வைக்கப்பட்டு இருந்தது. மதியம் 12.40 மணியளவில் 3 திசைகளில் இருந்து 3 பேர் மாவட்ட ஆட்சியர் அலுவலகம் முன் வந்து கையில் இருந்த மண்ணெண்ணையை உடலில் ஊற்றி தீக்குளிக்க முயன்றனர்.

இதை பார்த்த காவலர்கள் ஓடிச்சென்று அவர்கள் 3 பேரையும் தடுத்து நிறுத்தினர். அப்போது அவர்கள் இலங்கையில் ஈழத்தமிழர்கள் தாக்கப்படுவதை உடனே நிறுத்த வேண்டும். இலங்கையில் போர் நிறுத்தம் செய்ய இந்திய அரசு வற்புறுத்த வேண்டும் என்று ஆவேசமாக முழக்கமிட்டனர்.

இதையடுத்து தீக்குளிக்க முயன்ற 3 பேரையும் காவலர்கள் கைது செய்தனர். அவர்களது விபரம் :- பெரியார் ஜெகன் (30),ஈரோடு மாவட்ட பெரியார் திராவிடர் கழக இளைஞர் அணி செயலாளர், சம்பூகன் என்ற சண்முகம் ,.பெரியார் தி.க. திருப்பூர் நகர செயலாளர். கோபிநாத் (26), திருப்பூர் பெரியார் திராவிடர்கழகம்.. கைதான 3 பேரும் பந்தயச்சாலை காவல் நிலையத்துக்கு கொண்டு செல்லப்பட்டுள்ளனர்.

அமெரிக்காவின் முன்னாள் அதிபர் ஆப்ரகாம் லிங்கன் பயன்படுத்திய பைபிளை வைத்தே பராக் ஒபாமா பதவியேற்கவுள்ளார். ஆப்ரகாம் லிங்கன் அதிபராகப் பதவியேற்றுக் கொண்ட பின்னர் எவ்வித மதிய உணவு சாப்பிட்டாரோ அதே போல தானும் சாப்பிட ஒபாமா முடிவெடுத்துள்ளார். ஆப்ரகாம் லிங்கனின் வழியை பின்பற்றி வருபவர் பராக் ஒபாமா. இதனால் அவரது வழியிலேயே தானும் பதவியேற்றுக்கொள்ள முடிவெடுத்துள்ளார்.

அமெரிக்காவின் புதிய அதிபராகத் தேர்வாகியுள்ள ஒபாமா வரும் 20ம் திகதி முறைப்படி பதவியேற்றுக் கொள்ளவுள்ளார். பதவியேற்பு விழா மிகப் பிரமாண்டமாக நடைபெறவுள்ளது. இதில் பல்வேறு நாடுகளைச் சேர்ந்த தலைவர்களும் கலந்துகொண்டு சிறப்பிக்கவுள்ளனர். பதவியேற்றுக் கொண்ட பின்னர் ஒபாமா தனது மதிய உணவை நாடாளுமன்ற குழுவினருடன் சேர்ந்து சாப்பிட உள்ளார். இந்த விருந்து நிகழ்ச்சியில் அமெரிக்காவின் துணை அதிபர், அவரது குடும்பத்தார். உச்ச நீதிமன்ற நீதிபதிகள், அமைச்சர்கள், நாடாளுமன்ற உறுப்பினர்கள் உட்பட 200க்கும் மேலான முக்கிய பிரமுகர்கள் கலந்து கொள்ளவுள்ளனர்.

இந்நிலையில் ஒபாமா தனது குடும்பத்தாருடன் ஆப்ரகாம் லிங்கனின் நினைவிடத்துக்கு ஞாயிற்றுக்கிழமை சென்று அஞ்சலி செலுத்தினார். அப்போது செய்தியாளர்களிடம் கூறுகையில் :- என்னை கவர்ந்த மாபெரும் தலைவர் ஆப்ரகாம் லிங்கன் என்று பெருமிதத்துடன் கூறினார்.