12

இந்தோனேஷியாவில் நேற்று காலை ஏற்பட்ட நிலநடுக்கத்தால் மக்கள் கடும் பீதியடைந்தனர்.

இந்தோனேஷியாவில் வடக்கு சுமத்ரா தீவின் தென்மேற்கு பகுதியில் உள்ள குனாங் சிடொலி பகுதியில் நேற்று காலை 8.59 மணியளவில் நிலநடுக்கம் ஏற்பட்டது.சுமார் 20 அடி ஆழத்தில் ஏற்பட்ட இந்த நிலநடுக்கம் ரிக்டர் அளவில் 5.2 ஆக பதிவாகியிருந்தது.

இதனால், வீடுகள் மற்றும் கட்டடங்கள் குலுங்கியதால் பொதுமக்கள் கடும் பீதியடைந்தனர்.எனினும் இதனால் ஏற்பட்ட சேதவிபரம் உடனடியாக தெரியவில்லை.

பயங்கரவாதத்தை இல்லாதொழிக்க அனைத்து தரப்பினரும் ஒத்துழைப்பு வழங்குவதனைப் போல் நாட்டில் அபிவிருத்தி நடவடிக்கைகளுக்கும் அனைத்து மக்களும் தமது இன, மத, குல, மொழி பேதங்களை மறந்து ஒத்துழைப்பு வழங்க வேண்டுமென்று பிரதமர் ரட்ணசிறி விக்கிரமநாயக்க கூறினார். ஹொரணை ஸ்ரீ.ல.சு. கட்சி காரியாலயத்தில் அண்மையில் நடைபெற்ற தேர்தல் பிரசாரக் கூட்டமொன்றில் கலந்துகொண்டு உரையாற்றும்போதே அவர் இதனைத் தெரிவித்தார்.

தொடர்ந்து உரையாற்றிய அவர் கூறியதாவது,

கடந்த 30 வருடமாக வட கிழக்கு பகுதியில் நிலை கொண்டிருந்த பயங்கரவாதத்தை அழித்து ஒழிக்கும் கால கட்டத்தில் நாம் இருக்கின்றோம். இந்த  பயங்கரவாதத்தை ஒழிக்க தென்பகுதியிலுள்ள அனைத்து தரப்பினரும் ஒத்துழைப்பு வழங்கினர்.

அதேபோல் நாட்டின் அபிவிருத்தியிலும் ஒத்துழைப்பு வழங்க முன்வர வேண்டும். நாட்டின் யுத்தத்தின் போதும் நாட்டின் அபிவிருத்தியின் போதும் மாகாணசபைகளும் உள்ளூராட்சி மன்றங்களும் பாரிய ஒத்துழைப்பை வழங்கின. அதேபோல் இவைகள் மத்திய அரசிற்கும் தமது ஒத்துழைப்பை வழங்க வேண்டும்.

வடக்கு யுத்தத்தை சுமார் 1/2 மணி நேரத்தில் முடித்து வெற்றி வாகை சூடலாம். ஆனால் அங்குள்ள மக்களை பாதுகாக்க வேண்டிய பாரிய பொறுப்பு அரசாங்கத்திற்கு உள்ளது. அதன் காரணமாகத்தான் இந்த யுத்தம் மெது மெதுவாக நடைபெறுகின்றது.

நாவலப்பிட்டி போதனா வைத்தியசாலையில் ஒன்பது நாள் ஆண் குழந்தையொன்றை கடத்திச் செல்ல முற்பட்டார் என்ற குற்றச்சாட்டில் கைதான பெண்ணை எதிர்வரும் 22 ஆம் திகதிவரை விளக்கமறியலில் வைக்குமாறு நாவலப்பிட்டி நீதிவான் லலித் ஏக்கநாயக்க வெள்ளிக்கிழமை உத்தரவிட்டார்.  இச்சம்பவம் குறித்து மேலும் தெரியவருவதாவது;

நாவலப்பிட்டி வைத்தியசாலையில் கடந்த 8 ஆம் திகதி அனுமதிக்கப்பட்ட அட்டன் டிக்கோயாவைச் சேர்ந்த 23 வயது பெண்ணொருவர் அங்கு பிரசவ வார்ட்டில் தங்கியிருந்த பெண்ணுடன் சிநேகிதம் வைத்துக்கொண்டார்.

இந்நிலையில் அப்பெண்ணின் 9 நாள் ஆண் குழந்தையை இவர் கடந்த 9 ஆம் திகதி கடத்திச் செல்ல முற்பட்டுள்ளார். குழந்தையின் தாயிடம் டாக்டர் அவரை அழைப்பதாகக் கூறி வெளியே அனுப்பிவிட்டே இவர் குழந்தையை கடத்திச் செல்ல முயன்றுள்ளார்.

அப்போது அங்குவந்த குழந்தையின் தாய் எழுப்பிய கூக்குரலையடுத்து உஷாரடைந்த வைத்தியசாலையின் பணியாளர்கள் குழந்தையைத் தூக்கிச் செல்ல முயன்ற பெண்ணைப் பிடித்து பொலிஸாரிடம் ஒப்படைத்தனர்.

இதையடுத்து, குறிப்பிட்ட பெண்ணை நேற்று வெள்ளிக்கிழமை நாவலப்பிட்டிப் பொலிஸார் நீதிமன்றத்தில் ஆஜர்படுத்திய போதே அவரை எதிர்வரும் 22 ஆம் திகதி வரை விளக்கமறியலில் வைக்குமாறு நீதிவான் உத்தரவிட்டார்.

மட்டக்களப்பு மாவட்டத்தில் கடந்த இரு தினங்களாக கடும் மழை பெய்து வருகின்றது. கடந்த 24 மணி நேரத்தில் 137 மில்லி மீற்றர் மழை பெய்துள்ளதாக மாவட்ட வானிலை அவதான நிலைய பொறுப்பதிகாரி கே. சூரியகுமார் தெரிவித்தார்.

மழை காரணமாக மாவட்டத்தின் பல பகுதிகளில் வெள்ள நீர் தேங்கியுள்ளது. புதிய காத்தான்குடி, பூம்புகார், களுதாவளை, வெல்லாவெளி உட்பட பல பகுதி களில் வெள்ள நீர் தேங்கியுள்ளது. பல இடங்களில் வீதிகள் வெள்ள நீரில் மூழ்கியுள்ளதால் போக்கு வரத்துச் சேவைகளும் பாதிக்கப்பட்டுள்ளன.

நாட்டின் தென் பகுதியிலுள்ள பெருந்தெருக்களை அபிவிருத்தி செய்யும் திட்டத்தின் கீழ் கொட்டாவ முதல் தொடங்கொட வரையிலான பாதையை விஸ்தரிப்பதற்கு அமைச்சரவை அங்கீகாரம் வழங்கியுள்ளது. இதற்கான பிரேரணையை பெருந்தெருக்கள் மற்றும் வீதி அபிவிருத்தி அமைச்சர் என்ற வகையில் ஜனாதிபதி மஹிந்த ராஜபக்ஷ சமர்ப்பித்திருந்தார். இத்திட்டத்துக்கு 20 பில்லியன் ரூபா ஒதுக்கப்பட்டுள்ளது.

தாய்லாந்தில் நேற்று சனிக்கிழமை, 11 ஏப்ரல் 2009   தொடங்குவதாக இருந்த இந்தியா – தென்கிழக்கு ஆசிய நாடுகளின் கூட்டமைப்பு மாநாடு, பாதுகாப்பு காரணங்களுக்காக ஒத்திவைக்கப்பட்டுள்ளது.

இந்தியா – தென்கிழக்கு ஆசிய நாடுகளின் கூட்டமைப்பு மாநாடு தாய்லாந்தில் உள்ள பட்டாயா நகரில் நேற்று தொடங்குவதாக இருந்தது. இதில் பங்கேற்பத்ற்காக இந்திய பிரதமர் மன்மோகன்சிங் சார்பாக மத்திய வர்த்தக துறை அமைச்சர் கமல்நாத் ஏற்கனவே தாய்லாந்து வந்துள்ளார்.

இந்நிலையில், தாய்லாந்தில் பிரதமர் அபிசித் விஜ்ஜாஜிவாவுக்கு எதிராக போராட்டங்கள் நடைபெற்று வருகின்றன.அவர் பதவி விலகும்படி வலியுறுத்தி ஆர்ப்பாட்டக்காரர்கள் தொடர்ந்து போராட்டத்தில் ஈடுபட்டு வருகின்றனர்.

இந்நிலையில் நேற்று சனிக்கிழமை, 11 ஏப்ரல் 2009   மாநாடு நடைபெறவிருந்த இடத்துக்கு முன்பு திரண்ட ஆயிரத்துக்கும் அதிகமான ஆர்ப்பாட்டக்காரர்கள், மாநாட்டு அரங்கத்தின் கண்ணாடி கதவுகளை அடித்து நொறுக்கினர். இதனால், பாதுகாப்பு காரணங்களுக்காக மாநாடு ரத்து செய்யப்படுவதாக தாய்லாந்து அரசு அறிவித்துள்ளது.

பருப்பு, சீனி உட்பட முக்கிய பாவனைப் பொருட்களுக்கு அரசு கட்டுப்பாட்டு உச்ச விலையை அறிவித்தபோதும் அக்கட்டுப்பாட்டு விலைகளுக்கும் குறைவாகவே சந்தையில் அப்பொருட்கள் விற்கப்படுகின்றன என வர்த்தக, சந்தை  அபிவிருத்தி,  கூட்டுறவு, மற்றும் பாவனையாளர் சேவைகள் அமைச்சர் பந்துல குணவர்தன தெரிவித்தார்

அமைச்சரவை முடிவுகளை அறிவிக்கும் வாராந்த ஊடகவியலாளர் சந்திப்பு இன்று காலை அரசாங்க தகவல் திணைக்களத்தில் நடைபெற்றபோதே அவர் இவ்வாறு கூறினார். இங்கு அமைச்சர் தொடாந்தும் கூறுகையில்,

கடந்த வருட புதுவருடத்தை விட இவ்வருடம் பாவனைப் பொருட்கள் மிகவும் குறைந்த விலையில் பாவனையாளர்களுக்கு கிடைக்க அரசாங்கம் நடவடிக்கை எடுத்துள்ளது. தேங்காய் எண்ணெய் ஒரு போத்தல் 100 ரூபாவாக நேற்று முதல் குறைக்கப்பட்டுள்ளது. தேங்காய் மற்றும் முட்டை என்பன விலை குறைந்துள்ளன.; போட்டி வர்த்தகத்துக்கு இடமளிக்கப்பட்டதே இதற்கான காரணமாகும்.

பாவனைப் பொருட்களின்  விலை அதிகம் வீழ்ச்சியடைவதால் உற்பத்தியாளர்கள் பாதிக்கப்படுகின்றனர். அவர்களைப் பாதுகாக்கும் பொறுப்பும் அரசாங்கத்து உண்டு. கட்டுப்பாட்டு விலை அறிவிக்கப்பட்ட பொருட்கள் பெக்கட்டுக்களில் அடைக்கப்பட்டு விற்பனை செய்யப்படும்போது அவற்றுக்கு கட்டுப்பாட்டு விலை செல்லுபடியாகாது என நீதிமன்றம் வழங்கியுள்ள தீர்ப்பை வைத்து சில் வர்த்தகர்கள் அப்பொருட்களை கூடுதல் விலைக்கு விற்கின்றனர் என முறைப்பாடுகள் கிடைத்துள்ளன. தனியார் திறந்த பொருளாதாரக் கொள்கையை முன்னாள் ஜனாதிபதி ஜே.ஆர் ஜெயவர்தன முதன்முதலாக அமுல்படுத்தினார். ஆனால் நாட்டுக்குப் பொருத்தமான  உண்மையான திறந்த பொருளாதாரக் கொள்கையை ஜனாதிபதி மஹிந்த ராஜபக்ஷ அறிமுகப்படுத்தியுள்ளார்

இதன் மூலம் அரசாங்கமும்  தனியார் துறையினரும் கூட்டுறவு மொத்த விற்பனை நிலையமும் பொதுவான நன்மைகளை அடைந்துகொள்ள வழி ஏற்பட்டுள்ளது என்றும் அமைச்சர் கூறினார்.

மேல் மாகாண சபைத் தேர்தல் தொடர்பாக இதுவரை 81 வன்முறைச் சம்பவங்கள் இடம்பெற்றுள்ளதாக தேர்தல் வன்முறைகளைக் கண்காணிப்பதற்கான நிலையம் தெரிவித்துள்ளது. வெள்ளிக்கிழமை மாலை 4 மணிவரையான காலப்பகுதியிலேயே இவ் எண்ணிக்கையான வன்முறைச் சம்பவங்கள் இடம்பெற்றுள்ளன.

இவ்விடயம் தொடர்பாக தேர்தல் வன்முறைகளைக் கண்காணிப்பதற்கான நிலையம் விடுத்துள்ள அறிக்கையில் மேலும் தெரிவிக்கப்பட்டுள்ளதாவது; மேல்மாகாண சபைத் தேர்தல் தொடர்பாக இதுவரை 28 பாரியளவிலான வன்முறைச் சம்பவங்களும் 53 சிறுவன்முறைச் சம்பவங்களும் இடம்பெற்றுள்ளன. அத்துடன், கடுவெல தேர்தல் தொகுதியிலேயே அதிகளவான வன்முறைச் சம்பவங்கள் பதிவாகியுள்ளன.

இதுவரை நடைபெற்ற வன்முறைகளில் ஒருவர் கொலை செய்யப்பட்டிருப்பதுடன் ஒருகொலை முயற்சியும் மேற்கொள்ளப்பட்டுள்ள அதேவேளை, 6 துப்பாக்கிச் சூட்டுச் சம்பவங்களும் இடம்பெற்றுள்ளன. மாவட்ட அடிப்படையில் கொழும்பில் 33 வன்முறைச் சம்பவங்களும் கம்பஹாவில் 25 வன்முறைச்சம்பவங்களும் களுத்துறையில் 23 வன்முறைச் சம்பவங்களும் இடம்பெற்றுள்ளன.

அத்துடன், கட்சி அடிப்படையில் ஐ.ம.சு. முன்னணிக்கு எதிராக 21 சம்பவங்களும், ஐ.தே.க.வுக்கு எதிராக 07 சம்பவங்களும் ஜே.வி.பி.க்கு எதிராக 01 சம்பவமும் ஏனைய கட்சிகளுக்கு எதிராக 52 சம்பவங்களும் இடம்பெற்றுள்ளதாகத் தெரிவிக்கப்பட்டுள்ளது.

நாட்டில் சட்டத்தையும், ஒழுங்கையும் நிலைநாட்டி மக்கள் அச்சமும் பீதியுமின்றி வாழக்கூடிய சூழ்நிலையை உறுதிப்படுத்துவதில் ஊடகங்களும் பக்க பலமாய் இருத்தல் அவசியமாகுமென்று மத்திய மாகாண பிரதி பொலிஸ் மா அதிபர் பூஜித ஜயசுந்தர குறிப்பிட்டார். கம்பளை பொலிஸ் பிரிவுக்குட்பட்ட பொலிஸ் அதிகாரிகள் கலந்து கொண்ட கூட்டமொன்று கம்பளை நகர சபை கேட்போர் கூடத்தில் நடைபெற்ற போதே அவர் இவ்வாறு தெரிவித்தார்.

அங்கு அவர் தொடர்ந்து உரையாற்றுகையில்; ஊடகங்கள் சக்தி வாய்ந்தவை, நாட்டின் நிர்வாகத்துறைசார் நிறை குறைகளை சுட்டிக் காட்டும் ஊடகவியலாளர்களின் பணி தேசியப் பணியாகும். ஊடகங்களுடன் நெருக்கமாக செயற்படுவதன் மூலம் எனது பணிகளை இலகுவில் முன்னெடுக்க வழிவகுக்கின்றது.

பொலிஸ் பணி கௌரவமானது. மக்களின் அங்கீகாரம் பெற்ற பணியாகும். இதனால், தான் பொது மக்கள் பொலிஸாரின் சிறு தவறைக் கூட ஏற்றுக் கொள்ள முன்வருவதில்லை.

பொலிஸ் பணியை வேதனத்தைக் கொண்டு மதிப்பிடக்கூடாது. நாம் புரியும் பணி பணத்தால் அளவிடக் கூடியதல்ல. மக்கள் சேவையால் திருப்தி காண வேண்டும். பொலிஸ் சேவையின் மீது மக்கள் தேவையுடையவர்களாக இருக்கின்றனர். எனவே, சில சேவைகளை பொலிஸாரால் மாத்திரமே மேற்கொள்ள முடியம். இதனை வேறு எவராலும் மேற்கொள்ள முடியாது என்றார். இதில் கம்பளை பொலிஸ் பிரிவு சிரேஷ்ட பொலிஸ் அதிகாரி ரஞ்சித் கஸ்தூரி ரட்ன மற்றும் கம்பளை, நாவலப்பிட்டி, புசல்லாவ, கலஹா, குருந்துவத்தை பொலிஸ் நிலைய பொறுப்பதிகாரிகளும் கலந்து கொண்டனர்.

இலங்கையில் முதலீடு செய்ய விரும்பும் முதலீட்டுக் கம்பனிகளுக்கு 50 வருட குத்தகை அடிப்படையில் காணிகளை ஒதுக்கிக்கொடுக்க அமைச்சரவை அங்கீகாரம் வழங்கியுள்ளது. இதற்கான பிரேரணையை முதலீட்டு அபிவிருத்தி அமைச்சர் குமார வெல்கம சமர்ப்பித்திருந்தார்.

ஒதுக்கப்படும் காணியில் 6 மாத காலங்களுக்குள் கைத்தொழில் முயற்சிக்கான கட்டிடங்கள் அமைக்கப்பட வேண்டும். இல்லையெனில் அக்காணிகளை மீளப் பெறும் அதிகாரமும் அமைச்சரவையால் வழங்கப்பட்டுள்ளது. இவ்வாறான கைத்தொழில் பேட்டைகள் ஏற்கனவே குருநாகல், புத்தளம்,  பொலன்நறுவை,  அம்பாறை,  திருகோணமலை, இரத்தினபுரி,  மாத்தளை,  கண்டி, காலி, மாத்தறை, ஹம்பந்தோட்டை, கொழும்பு மற்றும் கம்பஹா ஆகிய மாவட்டங்களில் அமைக்கப்பட்டுள்ளன.