20

பரந்தன் – முல்லைத்தீவு ஏ-35 வீதியில் அமைந்துள்ள வெள்ளமுள்ள வாய்க்கால் பாலத்தை பாதுகாப்புப் படையினர் அண்மித்துள்ளதாக இராணுவப் பேச்சாளர் பிரிகேடியர் உதய நாணயக்கார தெரிவித்தார். வெள்ளமுள்ள வாய்க்கால் பாலத்திற்கு 700 தொடக்கம் 800 மீற்றர் தொலைவில் இராணுவத்தின் 53வது மற்றும் 58வது படைப் பிரிவினர் நிலை கொண்டுள்ளதாக அவர் மேலும் தெரிவித்தார்.

பாதுகாப்பு வலயத்திற்கான ஒரு பிரதான பாதையை அமைத்து புலிகளின் பிடியில் சிக்கியுள்ள அப்பாவி பொது மக்களை பாதுகாப்பாக வெளியேற்றுவதே படையினரின் நோக்கம் என பாதுகாப்பு அமைச்சு தெரிவிக்கிறது.

இலங்கையைச் சேர்ந்த 5400 பேருக்கு இவ்வருட இறுதிக்குள் கொரியாவில் வேலை வாய்ப்பினை வழங்க அந்நாட்டு அரசாங்கம் இணக்கம் தெரிவித்திருப்பதாக வெளிநாட்டு வேலை வாய்ப்பு பணியகத்தின் பேச்சாளர் எஸ். போபிட்டிய தெரிவித்தார்.

வேலையாட்கள் கோரி, கொரிய அரசாங்கத்தினால் 15 நாடுகளுக்கு வெளியிடப்பட்ட ‘கோட்டா’ முறையின் கீழ் இலங்கை இம்முறை மூன்றாம் இடத்தைத் தட்டிப்பிடித்துள்ளது. இது நாட்டுக்குக் கிடைத்த பெரும் கீர்த்தியும், வெற்றியுமாகுமென வெளிநாட்டு வேலைவாய்ப்பு ஊக்குவிப்பு நலன்புரி அமைச்சர் கெஹெலிய ரம்புக்வெல்ல சுட்டிக்காட்டியிருப்பதாகவும் அவர் தெரிவித்தார்.

ஏப்ரல் மூன்றாம் திகதி முதல் டிசம்பர் 31ம் திகதிக்குட்பட்ட காலப் பகுதிக்குள் 15 நாடுகளிலிருந்து 59 ஆயிரம் பேருக்கு தொழில்வாய்ப்பினை வழங்க கொரிய அரசாங்கம் தீர்மானித்துள்ளது. வேலையாட்கள் கோரி, கொரிய அரசாங்கத்தினால் வெளியிடப்பட்டிருக்கும் ‘கோட்டா’ வில் மூன்றாம் இடத்தை எய்தியிருக்கும் இலங்கையிலிருந்து 5 ஆயிரத்து 400 பேருக்கு இவ்வருட இறுதிக்குள் கொரியாவில் தொழில் வாய்ப்புக்கள் வழங்கப்படவுள்ளன.

முதலாம் இடத்தில் வியட்நாமும் இரண்டாம் இடத்தில் பிலிப்பைன்சும் இருப்பதாகவும் அமைச்சின் பேச்சாளர் மேலும் கூறினார். கொரியாவுக்கு அண்மையில் விஜயம் மேற்கொண்டிருந்த வெளிநாட்டு வேலைவாய்ப்பு ஊக்குவிப்பு நலன்புரியமைச்சர் கெஹெலிய ரம்புக்வெல்ல அந்நாட்டின் வேலைவாய்ப்பு அமைச்சர் மற்றும் அதனுடன் தொடர்புடைய உயர்மட்ட அதிகாரிகளுடன் பேச்சு நடத்தியிருந்தார்.

இலங்கையிலிருந்து கொரியா வரும் தொழிலாளிகள் பெற்றிருக்கும் விசேட பயிற்சி முறைகள் மற்றும் அவர்களுடைய திறமைகள் காரணமாக அந்நாட்டில் அவர்களுக்கு பெரும் கிராக்கி ஏற்பட்டிருப்பதாக இச்சந்திப்பின் போது கொரிய அமைச்சரினால் தெரிவிக்கப்பட்டுள்ளது.

இதனடிப்படையிலேயே கடந்த வருடம் இருந்த ஸ்தானத்திலிருந்து முன்னேறி இலங்கை இம்முறை மூன்றாம் இடத்தை அடைந்துள்ளது எனவும் அவர் குறிப்பிட்டார். கொரியா செல்வதற்காக வெளிநாட்டு வேலைவாய்ப்புப் பணியகத்தினால் ஏற்கனவே 7 ஆயிரம் பேர் தெரிவு செய்யப்பட்டுள்ளனர்.

கூடுமானவரையில் இவர்களனைவரையும் இவ்வருட இறுதிக்குள் கொரியா அனுப்பி வைப்பதற்கான முயற்சிகளை மேற்கொள்வோம் எனவும் அமைச்சர் கெஹெலிய நம்பிக்கை தெரிவித்துள்ளார்.

வெளிநாட்டு வேலைவாய்ப்பு பணியகத்தின் தலைவர் கிங்ஸ்லி ரணவக்க தற்போது கொரியாவில் இது தொடர்பான பேச்சுவார்த்தையில் ஈடுபட்டு வருவதாகவும் அமைச்சின் பேச்சாளர் கூறினார். இதேவேளை கொரியா செல்ல விருப்போருக்கு மேலும் விசேட பயிற்சி முறைகளை வழங்குவது குறித்து அமைச்சு ஆராய்ந்து வருவதாகவும் அவர் குறிப்பிட்டார்.

வவுனியா பொது வைத்தியசாலை சவச்சாலையில் வைக்கப்பட்டிருந்த அடையாளம் காணப்பட்டு உறவினர்களினால் பொறுப்பேற்காததும், அடையாளம் காணப்படாததுமான 56 உடல்கள் அரச செலவில் நேற்று முன்தினம் சனிக்கிழமை மாலை 6.30 மணியளவில் அடக்கம் செய்யப்பட்டது.

மாவட்ட நீதிவானின் அனுமதியுடன் உடல்கள் பூந்தோட்டம் பொதுமயானத்திற்கு எடுத்துச் செல்லப்பட்டு கனரக இயந்திரம் மூலம் குழி தோண்டப்பட்டு அடக்கம் செய்யப்பட்டது என பொது வைத்தியசாலை சட்ட வைத்திய அதிகாரி தெரிவித்தார்.

சுமார் இரண்டு வாரத்திற்கு மேலாக இந்த சடலங்கள் சவச்சாலையில் வைக்கப்பட்டிருந்தது.

முல்லைத்தீவு, புதுமாத்தளன் பிரதேசத்திலிருந்து 4 இலட்சத்து 90 ஆயிரம் துப்பாக்கி ரவைகள் உட்பட அதிசக்திவாய்ந்த வெடிபொருட்கள் மற்றும் பெருந்தொகையான ஆயுதங்களை பாதுகாப்புப் படையினர் மீட்டெடுத்துள்ளதாக இராணுவப் பேச்சாளர் பிரிகேடியர் உதய நாணயக்கார தெரிவித்தார்.

புலிகளிடமிருந்து விடுவிக்கப்பட்ட பிரதேசங்களில் பாரிய தேடுதல்களை மேற்கொண்டுவரும் படையினர் ஒரே இடத்திலிருந்து 4 இலட்சத்திற்கு மேற்பட்ட ரவைகள் உட்பட பெருந்தொகையான ஆயுதங்களை மீட்டெடுத்துள்ளமை இதுவே முதற்தடவையாகும் என்று அவர் மேலும் தெரிவித்தார்.

இதேவேளை, முதலியார் கட்டுக்குளம் பிரதேசத்திலிருந்து எட்டு இலகு ரக விமானக் குண்டுகள் உட்பட 650 ரி-56 ரக துப்பாக்கி ரவைகளையும் படையினர் மீட்டெடுத்துள்ளதாக அவர் மேலும் சுட்டிக்காட்டினார். புதுமாத்தளன், புதுக்குடியிருப்பு, அம்பகாமம், ஒலுமடு மற்றும் முதலியார் குளம் பிரதேசங்களில் படையினர் தொடர்ந்தும் தேடுதல்களை மேற்கொண்டு வருகின்றனர்.

இராணுவத்தின் 58வது படைப் பிரிவின் கட்டளைத் தளபதி பிரிகேடியர் சவேந்திர சில்வா தலைமையிலான படையினர் புதுமாத்தளன் பிரதேசத்தில் மேற்கொண்ட பாரிய தேடுதல்களின்போது 130 மி.மீ. ரக கனரக பீரங்கி ரவுண்ட்கள் 10, எஸ்.ஏ-14 ரக ஏவுகணைகள் 2, 12.7 ரக பீரங்கிக் குழல்கள் 2, தற்கொலை அங்கிகள் 3, ரி-56 ரக துப்பாக்கிகள் 3, அதிசக்தி வாய்ந்த கிளேமோர் குண்டுகள் 2, அதிசக்தி வாய்ந்த வெடிமருந்துகள் பொருத்தப்பட்ட 60 மி.மீ. ரக குண்டுகள் 14, 60 மி.மீ. ரக புகைக் குண்டுகள் 7, பாவிக் கப்பட்ட ஏவுகணையின் வெற்றுக் கூடு 1, கைக்குண்டுகள் 14, ஆர்.பி.ஜி குண்டுகள் 23, ரி-56 ரக துப்பாக்கி ரவைகள் 250, 5.56 ரக துப்பாக்கி ரவைகள் 4 இலட்சத்து 90 ஆயிரம் (490,000), இயந்திரத் துப்பாக்கிகள் 2, அமுக்கவெடி 1, சார்ஜ் பேக்ஸ் 11, இயந்திரத் துப்பாக்கிக்கு பயன்படுத்தப்படும் ரவைகள் 500, தொலைத் தொடர்பு கருவிகள் 3, பவுச்சர்ஸ் 3 என்பவற்றை ஒரே இடத்திலிருந்து மீட்டெடுத்துள்ளனர். இதேவேளை இராணுவத்தின் மூன்றாம் படையணியினர் முதலியார் குளத்தில் வைத்து எட்டு இலகுரக விமானக் குண்டுகள் மற்றும் 650 ரி-56 ரக அம்யூனிசன்களையும் மீட்டுள்ளனர்.

இதேவேளை, படையணியினர் அம்பலகாமம் பகுதியில் நடத்திய தேடுதல்களின்போது இரண்டு ரி-56 தோட்டாக்கள், ஒரு 81 மில்லிமீற்றர் குண்டு, 37 ரி-56 ரவைகள், ஹெல்மட் 3 ஆகியவற்றையும் மீட்டுள்ளனர் என்றும் பிரிகேடியர் மேலும் தெரிவித்தார்.

இலங்கையின் வடக்கில் ஏற்பட்டுவரும் உக்கிர மோதல்கள் குறித்து தனது ஆழ்ந்த கவலையை வெளியிட்டுள்ள பிரித்தானிய அரசு, அங்கே சிவிலியன்களின் பாதுகாப்பினை உறுதிப்படுத்த உடனடி யுத்தநிறுத்தமொன்று ஏற்படவேண்டுமென்று மீண்டும் வலியுறுத்தியிருக்கிறது.

இலங்கையில் போர் நிறுத்தம் வர வேண்டும் என்று பிரிட்டிஷ் அரசாங்கத்தோடு சேர்ந்து அமெரிக்கா பிரான்ஸ் உள்ளிட்ட பிற நாடுகளும் கோரிவருகின்றன என்றும் ஐ.நா.மன்றமும் அதற்கான முயற்சிகளில் ஈடுபட்டுவருகிறது என்று பிரிட்டிஷ் வெளியுறவு அமைச்சரால் சனிக்கிழமை இரவு வெளியிட்ட அறிக்கையில் தெரிவிக்கப்பட்டுள்ளது.

யுத்தப் பிரதேசங்களில் சிக்குண்டுள்ள மக்களை விடுவிக்கும் நோக்கில் இலங்கை அரசுடனும் விடுதலைப் புலிகளுடனும் உடன்பாடொன்றை எட்டும் முயற்சியில் ஐக்கிய நாடுகள் ஸ்தாபனம் தற்போது ஈடுபட்டுள்ளது என்று குறிப்பிடும் அந்த அறிக்கை, இது தொடர்பில் இலங்கைக்கு பயணம் மேற்கொண்டிருந்த ஐ.நா. தலைமை செயலரின் விசேட பிரதிநிதி விஜய் நம்பியார், தனது பயணம் குறித்த அறிக்கை ஒன்றை ஐ.நா.மன்றப் பாதுகாப்பு சபையில் விரைவில் சமர்ப்பிக்க வேண்டும் என்று கோரியுள்ளது.

இலங்கை குறித்து விவாதிக்க டேஸ் பிரவுண் அமெரிக்கா செல்கிறார்

இலங்கை தொடர்பில் ஐ.நா.மன்றத்தில் விவாதிக்க பிரிட்டிஷ் பிரதமரின் இலங்கைக்கான விசேட பிரதிநிதி டேஸ் பிரவுண் நியூயார்க் செல்வதாகவும் அந்த அறிக்கை கூறுகிறது.  இலங்கையில் சமாதானம் ஏற்பட தன்னாலான சகல முயற்சிகளையும் பிரிட்டன் மேற்கொள்ளும் என்றும் அந்த அறிக்கையில் தெரிவிக்கப்பட்டுள்ளது.

மன்னார் மாவட்டத்தில் கடந்த 09 மாதங்களுக்கு மேலாக கையடக்கத் தொலைபேசி மற்றும் இலங்கை ரெலிகொம் நிறுவனத்தினால் வழங்கப்பட்ட சி.டி.எம்.ஏ. தொலைபேசி போன்றவற்றின் செயற்பாடுகள் திடீரென இடை நிறுத்தம் செய்யப்பட்டிருந்தது.  இந்தச் செயற்பாட்டினால் மன்னார் மாவட்ட பாவனையாளர்கள் பல்லாயிரக்கணக்கானோர் பாதிக்கப்பட்டிருந்தனர். இந்த நிலையில் கடந்த 9 மாதங்களுக்கு மேலாக இடை நிறுத்தம் செய்யப்பட்டிருந்த மொபிட்டெல் கையடக்கத் தொலைபேசிச் சேவையின் இணைப்புக்கள் திடீரென வெள்ளிக்கிழமை மதியம் 12 மணியளவில் வழங்கப்பட்டிருந்தது.

இதன் போது பாவனையாளர்கள் தொலைபேசிச் சேவையை பெற்றுக் கொண்டனர். மொபிட்டெல் இணைப்பின் மீள் நிரப்பும் அட்டைகள் பல ஆயிரக்கணக்கான ரூபாவுக்கு மொத்தமாகவும் சில்லறையாகவும் விற்பனை நிலையங்களில் விற்பனை செய்யப்பட்டிருந்தது.

இந்த நிலையில் மீண்டும் சனிக்கிழமை காலை 8 மணியளவில் தொலைபேசி இணைப்புகள் நிறுத்தப்பட்டது. இந்தச் செயற்பாட்டினால் மன்னார் மாவட்ட பாவனையாளர்கள் பெரிதும் ஏமாற்றத்திற்குட் படுத்தப்பட்டுள்ளமை குறிப்பிடத்தக்கது.

அரசாங்கம் கொண்டு வந்துள்ள உத்தேச உள்ளூராட்சித் தேர்தல் திருத்தச் சட்டமூலம் மீதான விவாதத்தைத் தொடர்ந்து நடத்துவதற்காக கிழக்கு மாகாணசபையின் விசேட அமர்வு முன்னர் அறிவிக்கப்பட்டபடி இன்று திங்கட்கிழமை (ஏப்ரல் 20 ) நடைபெறாது என்று அறிவிக்கப்பட்டுள்ளது. இச்சட்ட மூலம் மீதான விவாதத்தை நடத்துவதற்காக மே மாதம் 12 ஆம் திகதியே கிழக்கு மாகாண சபையின் விசேட அமர்வு கூட்டப்படவிருப்பதாக மாகாணசபை செயலாளர் கு. தியாகலிங்கம் சனிக்கிழமை தெரிவித்தார்.

உள்ளூராட்சித் தேர்தல் திருத்தச் சட்டமூலம் மீதான ஒருநாள் விவாதம் வெள்ளிக்கிழமை காலை முதல் மாலை வரை கிழக்கு மாகாணசபையின் விசேட அமர்வில் இடம்பெற்றது. விவாத முடிவில் முதலமைச்சர் சிவநேசதுரை சந்திரகாந்தனின் பேச்சை அடுத்து சட்டமூலத்தை ஏற்பதில்லை என்று சபை ஏகமனதான முடிவை எடுக்கக்கூடும் என்ற எதிர்பார்ப்புக்கு மத்தியில் கடைசி நிமிட திருப்பத்தின் காரணமாக சபையின் கூட்டத்தை ஏப்ரல் 20 வரை ஒத்திவைப்பதாக சபையில் தவிசாளர் அறிவித்தார். இந்த நிலையில் கிழக்கு மாகாண சபையின் விசேட அமர்வு மே 12 ஆம் திகதியே நடக்கும் என்றும் அப்போது திருத்தச் சட்டமூலம் மீதான விவாதம் நடக்கும் என்றும் தற்போது அறிவிக்கப்பட்டுள்ளது

நாட்டின் பல்வேறு பகுதிகளிலும் நிலவிவரும் உஷ்ணமான காலநிலை இன்னும் சில தினங்களுக்கு நீடிக்குமென காலநிலை அவதான நிலையம் தெரிவித்தது.

இலங்கைக்கு நேரே சூரியன் உச்சம் கொடுத்தனாலும் காற்றின் திசை மாறியதன் காரணமுமாகவே கடந்த சில திங்களாக நாட்டின் பல்வேறு பாகங்களிலும் உஷ்ணமான காலநிலை நிலவி வருகிறது.

இன்னும் ஓரிரு தினங்களில் மத்திய, சப்ரகமுவ, ஊவா மற்றும் தென் பிராந்தியங்களில் மாலை வேளைகளில் இடைக்கிடை மழை பெய்யும் எனவும் இதனோடு உஷ்ணமான காலநிலை குறைவடையும் எனவும் காலநிலை அவதான நிலையம் கூறியது. மே மாதத்திலும் நாட்டின் பல்வேறு பகுதிகளிலும் இடைக்கிடை மழை பெய்யும் எனவும் அறிவிக்கப்படுகிறது.

முல்லைத் தீவில் பாதுகாப்பு வலயப் பகுதியில் உணவுத் தட்டுப்பாடு ஏற்பட்டுள்ளதாக மாவட்ட மேலதிக அரச அதிபர் பா.பார்த்தீபன் தெரிவித்துள்ளதுடன்  நாளை கப்பல் மூலம் அனுப்பப்படவுள்ள உணவு மூலம் நிலைமையை ஓரளவு சமாளிக்க முடியுமெனவும் அவர் தெரிவித்தார். முல்லைத்தீவு அரச கட்டுப்பாடற்ற பாதுகாப்பு வலயத்தினுள் உணவுப் பொருட்களுக்கு தட்டுப்பாடு நிலவுவதனால் இடம்பெயர்ந்துள்ள மக்கள் பாரிய சிக்கலை எதிர்கொண்டுள்ளனர்.

இங்கு சீனி ஒரு கிலோ 2,500 ரூபாவாகவும் தேங்காய் ரூபா 1,400 க்கும் விற்கப்படுகின்றது. இதேவேளை ஒரு கிலோ செத்தல் மிளகாய் 12,000 ரூபாவாக விற்கப்படுகின்றது.

குறிப்பாக அத்தியாவசிய உணவுப் பொருட்களான அரிசி ஒரு கிலோ 400 ரூபாவுக்கு விற்கப்படும் அதேநேரம் குழந்தைகளுக்கான பால்மா 2,200 ரூபாவுக்கு விற்கப்படுகின்றது. நாளை செவ்வாய்க்கிழமை இங்கு உணவு அனுப்புவதற்காக திருகோணமலையில் கப்பலில் உணவு ஏற்றப்படுகின்றது. இம்முறை 1,000 முதல் 1,100 மெற்றிக் தொன் உணவுப் பொருள் அனுப்பப்படுமென தெரியவருகின்றது.

இதன் மூலம் இங்குள்ள உணவுத் தட்டுப்பாட்டை ஓரளவு சமாளிக்கலாம். மண்ணெண்ணை இங்கு இல்லை. இங்குள்ள மக்கள் மலசலகூடம், நீர் பிரச்சினைகளை எதிர்கொண்டுள்ளதாகவும் அவர் மேலும் தெரிவித்தார். இதேவேளை, வெள்ளிக்கிழமை கிறீன் ஓசன் கப்பல் மூலம் 466 பேர் மேலதிக சிகிச்சைக்காக புல்மோட்டைக்கு அழைத்துவரப்பட்ட நிலையில் சனிக்கிழமையும் சுமார் 500 பேர் மேலதிக சிகிச்சைக்காக எடுத்துச் செல்லப்பட்டுள்ளதாகவும் அவர் தெரிவித்தார்

புத்தாண்டினை முன்னிட்டு அரசாங்கத்தினால் அறிவிக்கப்பட்ட 48 மணித்தியால தற்காலிக போர்நிறுத்தத்தினை நீடிக்குமாறு வெளிநாட்டு பிரதிநிதிகள் என்னிடம் கேட்டுக்கொள்கின்றனரே தவிர ஒரு மணித்தியாலத்திற்கு போர்நிறுத்தத்தை கடைப்பிடிக்குமாறு பிரபாகரனிடம் கோரிக்கை விடுப்பதில்லை, பிரபாகரனை ஒரு மணித்தியாலத்திற்கேனும் போர்நிறுத்தம் செய்யுமாறு சர்வதேச சமூகம் வலியுறுத்த முடியுமா? என்று ஜனாதிபதி மஹிந்த ராஜபக்ஷ சவால் விடுத்துள்ளார்.

சர்வதேச யுத்த கொள்கைகளை நாம் மீறியுள்ளதாக குற்றஞ்சாட்டி எங்களை சர்வதேச யுத்த நீதிமன்றத்தின் மின்சார நாற்காலியில் அமரவைப்பதற்கு முயற்சிகளை சிலர் மேற்கொண்டுவருக்கின்றனர் எனினும் தாய் நாட்டிற்காக நான் கழுத்தையும் கொடுப்பதற்கு தயாராக இருக்கின்றேன் என்றும் அவர் சொன்னார்.

அலரிமாளிகையில் நடைபெற்ற ஒன்றுக்கூடலில் ஆயுர்வேத நிபுணர்கள் ,சமாதான நீதவான்கள், விவசாய அமைப்புகளின் பிரதிநிதிகள் முன்னிலையில் உரையாற்றும் போதே அவர் மேற்கண்டவாறு தெரிவித்தார். 

எமது நாட்டை வேறு தேசங்களுக்கு அடிமைப்படுத்தவோ நிபந்தனைகளுக்கு கட்டுப்படவோ ஒருபோதும் முடியாது

எமது நாட்டை வேறு தேசங்களுக்கு அடிமைப்படுத்தவோ அவற்றின் நிபந்தனைகளுக்கு கட்டுப்படவோ முடியாது என்று ஜனாதிபதி மஹிந்த ராஜபக்ஷ நேற்றுத் தெரிவித்தார்.

ஐக்கிய மக்கள் சுதந்திர முன்னணியின் வெற்றிலைச் சின்னத்தை அமோக வெற்றி பெறச் செய்து நாட்டைப் பாதுகாக்க முன்வருமாறும் ஜனாதிபதி மஹிந்த ராஜபக்ஷ இளைஞர் சமுதாயத்தினருக்கு அழைப்பு விடுத்தார். மேல் மாகாண ஐ.ம.சு.மு மற்றும் ஸ்ரீலங்கா சுதந்திரக் கட்சியைச் சேர்ந்த இளைஞர், யுவதிகளுக்கான கூட்டம் அலரிமாளிகையில் நேற்று மாலை நடை பெற்றது. இக் கூட்டத்தில் பிரதம அதிதியாகக் கலந்து கொண்டு உரையாற்றும் போதே ஜனாதிபதி மஹிந்த ராஜபக்ஷ மேற்கண்டவாறு குறிப்பிட்டார்.

இக் கூட்டத்தில் ஜனாதிபதி மஹிந்த ராஜபக்ஷ தொடர்ந்தும் உரையாற்றுகையில், உங்களைப் போன்ற மூன்று இளைஞர்களின் தந்தையாக இருந்து உங்கள் முன் உரையாற்றுவதில் பெருமைப்படுகின்றேன். உங்கள் மத்தியில் இருக்கும் துடிப்பையும், எதையாவது புதிதாக செய்யவேண்டு மென்ற ஆர்வத்தையும் நானறிவேன். 

இந்நாட்டின் எதிர் காலத்தைப் பொறுப்பெடுக்கவிருப்பவர்கள் நீங்களே, உங்களைப் போன்ற பருவத்தை நானும் கடந்து வந்திருக்கிறேன். மிகவும் குறைந்த வயதில் பாராளுமன்ற உறுப்பினரானேன்.

தாய் நாட்டின் மீது பற்றுள்ள இளம் சமுதாயத்தினரே புலிகளுக்கு எழுதிக் கொடுக்கப்பட்டிருந்த வடக்கையும், கிழக்கையும் விடுவித்திருக்கின்றனர்.

நாட்டின் இளம் சமுதாயத்தினர் நாட்டின் மீது கொண்டுள்ள அன்பை அண்மையில் கிளிநொச்சிக்கு சென்ற சமயம் நான் புரிந்துகொண்டேன். திருமலை கடற்படை முகாமிலும், விமானப்படை முகாமிலும் நடைபெற்ற வைபவங்களில் கலந்துகொண்ட வேளையிலும் இதனை நான் அறிந்துகொண்டேன்.

இலட்சக்கணக்கான இளைஞர்கள் பாதுகாப்பு படையில் இணைவது வேறு தொழில்களில் ஈடுபட முடியாமல் அல்ல. மாறாகத் தாய் நாட்டின் மீது கொண்டிருக்கும் பற்று காரணமாகவே அவர்கள் இவ்வாறு இணைகின்றனர்.

இளம் சமுதாயத்தினருக்கு நல்லதொரு நாட்டையும், சமுதாயத்தையும் உருவாக்கிக் கொடுப்பது எமது பொறுப்பாகும்.

அவர்களது எதிர்பார்ப்புக்கள் இனம்காணப்பட்டுள்ளன. அவற்றை நிறைவேற்றுவதற்கும் பல நடவடிக்கைகள் மேற்கொள்ளப்பட்டுள்ளன. மதுபானத்திற்கு முற்றுப்புள்ளி என்ற திட்டத்தின் மூலம் நல்லொழுக்கமுள்ள சமுதாயம் கட்டியெழுப்பப்பட்டிருக்கிறது.

நாட்டு மக்கள் அனைவரும் அச்சமும், சந்தேகமுமின்றி வாழக்கூடிய சூழலை ஏற்படுத்திக் கொடுப்பது எனது நோக்கமாகும் என்றார்.