18

அண்மையில் நமது விடுதலைப் போராட்டம் எதிர்கொண்ட பெரும் பின்னடைவினைக் கருத்தில் கொண்டும், சமகால அனைத்துலக சூழல், பிராந்திய நெருக்குவாரம், தமிழீழ சமூகத்தினுள் நிலவும் அகப்புற சூழல்கள் என்பனவற்றினை கவனத்தில் எடுத்தும் அடுத்துவரும் காலங்களில் தமிழீழ மக்களின் தேசிய விடுதலைக்கான போரினை பிரதானமாக அரசியல், இராஜதந்திர வழிமுறை ஊடான அழுத்தங்களுடன் முன்னெடுப்பதே சாத்தியமானதும், வலுவானதுமாகும் என நாம் கருதுவதாக தமிழீழ விடுதலைப் புலிகளின் அனைத்துலக உறவுகளுக்கான செயலகத்தின் பொறுப்பாளர் செல்வராஜா பத்மநாதன் தெரிவித்துள்ளார்.

இது தொடர்பாக தமிழீழ விடுதலைப் புலிகளின் அனைத்துலக உறவுகளுக்கான செயலகத்தின் இணையத்தளத்தில் இன்று சனிக்கிழமை அவர் எழுதியுள்ள வலைப்பதிவில் மேலும் தெரிவித்துள்ளதாவது:

தற்போதைய சிக்கல் நிறைந்த காலகட்டத்தினை எவ்வாறு எதிர்கொள்ளப் போகிறோம் என்பதனை இந்த வாரம் நோக்கலாம் எனக் கடந்த வாரம் குறிப்பிட்டிருந்தேன். இக் காலகட்டத்தினை எவ்வாறு எதிர் கொள்ளப்போகிறோம் என்பது தொடர்பாக சிந்திப்பதற்கு தாயகத்தின் தற்போதைய நிலைமை குறித்த தகவல்களும் விபரங்களும் முக்கியமானவை.

தற்போது தமிழர் தாயகத்தின் பல்வேறு பகுதிகளில் இராணுவ ஆக்கிரமிப்பு மிகவும் மூர்க்கமான முறையில் சிங்கள தேசியவாத அரசினால் முன்னெடுக்கப்படுகின்றது. வன்னி மண்ணிலிருந்து சுமார் மூன்று இலட்சத்திற்கு மேற்பட்ட மக்கள் அவர்களின் பாரம்பரிய வாழ்விடங்களிலிருந்து பிய்த்தெடுக்கப்பட்டு அனைத்துலகத்தின் கண்காணிப்புக்கு அப்பால் சிங்கள இராணுவத்தின் தடுப்பு முகாம்களுக்குள் தனிமைப்படுத்தப்பட்டுள்ளனர்.

முள்ளு வேலிக்குள் மக்கள்

இதனை விட மேலும் மூன்று லட்சம் மக்கள் ஏனைய தமிழர் பிரதேசங்களில் இடம்பெயர்ந்த மக்களாக வாழ்ந்து வருகின்றனர். ஒட்டுமொத்தமாக ஆறு லட்சத்திற்கும் அதிகமான மக்கள் தமது வாழ்விடங்களை இழந்து மிகுந்த துயருடன் அல்லலுற்று வாழ்கின்றனர்.

மேலும், 10 ஆயிரத்துக்கும் அதிகமான விடுதலைப் போராளிகள் அனைத்துலக சட்டங்களுக்கு முரணாக இலங்கை அரசினால் தடுத்து வைக்கப்பட்டும், தனிமைப்படுத்தப்பட்டும், சித்திரவதைகளுக்கு உட்பட்டும் வருகின்றனர்.

வடக்கு – கிழக்கு தமிழர் தாயகப்பகுதிகளில் மக்களின் ஜனநாயக உரிமைகளும், மனித உரிமைகளும் மறுக்கப்பட்டு வருகின்றது. கொல்லப்பட்ட மற்றும் பாதிக்கப்பட்ட மக்கள் எதுவித நீதி கோரும் உரிமைகளும் அற்று அநாதரவாகவுள்ளனர்.

வறுமையும், மோசமான வாழ்க்கைச் சூழலும்

மக்களின் பொருளாதார, கல்வி மற்றும் பிற வாய்ப்புக்கள் மிக மோசமாகப் பாதிக்கப்பட்டுள்ளது. உடனடி நிவாரணங்கள், மத்திய கால மற்றும் நீண்டகால திட்டங்கள் எதுவுமற்ற சூழல் நிலவுகின்றது. இது வறுமையையும், மோசமான வாழ்க்கைச் சூழலையும் தமிழ் மக்களிற்கு ஏற்படுத்துகின்றது.

இதேவேளையில் தமிழீழ மக்கள் அடைந்துள்ள மனிதப் பேரவலத்தினையும் எதிர்கொண்டுள்ள மனிதாபிமான நெருக்கடிகளினையும் முன்வைத்து அனைத்துலகத்திடம் பெருமளவில் வெளிநாட்டு வளங்களினையும் உதவிகளினையும் திரட்டுவதில் இலங்கை அரசு கொள்கையளவில் வெற்றி பெற்று வருகிறது.

அந்த வளத்தினைக் கொண்டு புனர்வாழ்வு புனரமைப்பு செயற்பாடுகளினை முன்னெடுப்பதாக கூறுவதன் மூலம் தமிழ்மக்களின் நலன்களில் சிங்கள அரசு மிகுந்த அக்கறை கொண்டிருப்பது போல் காட்டித்தான் மேற்கொண்ட தமிழின அழிப்பு பழியிலிருந்து தப்பித்துக்கொள்ளவும் வழிதேடுகின்றது.

தனது இராணுவ ஆளணியினரால் கட்டுப்படுத்தப்படும் சிவில் நிர்வாக இயந்திரத்தின் கீழ் மீள்கட்டமைப்பும் அபிவிருத்தியும் என்ற பெயரில் தமிழ்மக்களின் பாரம்பரிய தாயகத்தின் இனத்துவ சமநிலையினை சிங்கள மக்களின் பெரும்பான்மைக்கு சார்பாக மாற்ற சிங்கள அரசு முனைகிறது.

தமிழ் மக்களின் சமூக பொருளாதாரக் கட்டமைப்பினை தற்சார்பு நிலையற்றதும் இலங்கையின் தென்பகுதியினால் கட்டுப்படுத்தக்கூடியதுமான தங்கி வாழும் பொருளாதாரமாக மாற்றுவதற்குரிய திட்டங்களினையும் சிங்கள அரசு முன்நகர்த்தியுள்ளது.

தமிழ்மக்களின் அரசியல் சமூக பொருளாதார இருப்பினையும் தற்சார்பு நிலையினையும் நிர்மூலமாக்குவதில் சிங்கள அரசு குறியாகவுள்ளது.

இது மட்டுமன்றி இலங்கை அரசு தமிழ்த் தேசிய இனத்தின் தனித்துவத்தினை நிராகரித்து ஒரு நாடு, ஒரு மக்கள் என்ற கோட்பாட்டின் அடிப்படையில் தமிழீழ மக்களை சிங்கள ஆதிக்கத்துக்குள் சிறைப்பிடிக்கவும் பார்க்கிறது.

தமிழ்த் தேசிய இனம் தனது தேசிய இன பண்பாட்டு அடையாளங்களைப் பாதுகாத்து, தேசிய தனித்துவத்தினைப் பேணிக் கொள்வதற்கே போராட வேண்டிய நிலை உருவாகி வருகிறது.

இத்தகைய ஒரு சூழலில், நாம் எவற்றையும் நமது தாயகத்தின், நமது தாயக மக்களின் இன்றைய யதார்த்த நிலையிலிருந்து சிந்திக்க தொடங்குவதுதான் நேர்மையானதும் சரியானதுமாகும்.

தாயகத்தின் தற்போதைய நிலையில், இலங்கை அரசின் தடுப்பு முகாம்களில் தடுத்து வைக்கப்பட்டிருக்கும் மக்கள் போராளிகளின் பாதுகாப்பை உறுதிப்படுத்தல், அவர்களது நலன்களைப் பேணுதல், மக்களைத் தத்தமது வாழ்விடங்ககளில் இயன்றளவு விரைவாக குடியமரச் செய்தல், மக்கள் தமது இயல்பு வாழ்விற்குத் திருப்புவதற்கு ஆதரவாகவும் ஆதாரமாகவும் செயற்படுதல், போரில் தமது அவயங்களை இழந்து அங்கவீனமாகி நிற்கும் நமது மக்களுக்கும் போராளிகளுக்கும் புதுவாழ்வளித்தல் போன்ற அடிப்படை புனர்வாழ்வு வேலைத்திட்டங்களை தமிழர் நலன் என்ற நோக்கு நிலையிலிருந்து எவ்வாறு கையாளப் போகிறோம் என்கின்ற மனிதாபிமான விடயங்கள் முதற்கொண்டு தமிழர் தேசியம், தாயகம், சுயநிர்ணயம் என்ற அடிப்படைக் கோட்பாடுகளின் அடிப்படையில் தமிழீழ மக்களின் அரசியல் வேட்கைகளை வென்றெடுத்தல் என்பது வரையாக நாம் கடந்து செல்ல வேண்டிய பாதை மிக நீண்டதும் சவால்கள் நிறைந்ததுமாகும்.

இத்தகைய ஒரு சிக்கலான ஒரு காலகட்டத்தில், மக்களின் தற்போதைய கடினமான வாழ்க்கை நிலையை முன்னிறுத்தியும், அண்மையில் நமது விடுதலைப் போராட்டம் எதிர்கொண்ட பெரும் பின்னடைவினைக் கருத்தில் கொண்டும், சமகால அனைத்துலக சூழல், பிராந்திய நெருக்குவாரம், தமிழீழ சமூகத்தினுள் நிலவும் அகப்புற சூழல்கள் என்பனவற்றினை கவனத்தில் எடுத்தும் அடுத்துவரும் காலங்களில் தமிழீழ மக்களின் தேசிய விடுதலைக்கான போரினை பிரதானமாக அரசியல், இராஜதந்திர வழிமுறை ஊடான அழுத்தங்களுடன் முன்னெடுப்பதே சாத்தியமானதும், வலுவானதுமாகும் என நாம் கருதுகிறோம்.

இந்த அடிப்படையில், முள்ளிவாய்க்காலில் வைத்து நமது தலைவர் எடுத்த தீர்மானத்திற்கு அமைய ஆயுதங்கள் மௌனிக்கப்பட்டு, நமது விடுதலை இலட்சியத்தினை வென்றெடுப்பதற்கான அடுத்தகட்டப் பயணம் அரசியல், இராஜதந்திர வழிமுறைகளுக்கூடாகத் தொடரும் என்கின்ற நிலைப்பாட்டினை விடுதலைப் புலிகள் இயக்கம் எடுத்துள்ளது.

இது நமது அடுத்தகட்டப் போராட்டம் குறித்த முக்கியமான ஒரு அரசியல் நிலைப்பாடு.

ஏனைய விடயங்கள் குறித்து நாம் அடுத்த வாரம் (25.07.2009) நோக்குவோம்.

என்னுடன் நீங்கள் பகிர்ந்து கொள்ள விரும்பும் கருத்துக்களை கீழ்க்காணும் மின்னஞ்சல் முகவரிக்கு அனுப்பி வையுங்கள்.

இவற்றில் பொருத்தமானவற்றைப் இப்பகுதியில் பிரசுரிக்கவும் நான் விரும்புகிறேன். உங்கள் கருத்துக்கள் பிரசுரிக்கப்படுவதனைத் தாங்கள் விரும்பாவிடின் அதனையும் குறிப்பிடுங்கள்.

உங்கள் கருத்துக்களை அனுப்பி வைக்க வேண்டிய மின்னஞ்சல் முகவரி: ltte.ir@gmail.com

நன்றி. மீண்டும் நாம் அடுத்த வாரம் சந்திப்போம்.

என்றும் அன்புடன்
கே.பி.
இவ்வாறு அதில் தெரிவிக்கப்பட்டுள்ளது.

வடக்கில் யுத்தம் காரணமாக இடம்பெயர்ந்த மக்கள் தங்கள் சொந்த இடங்களில் மீள் குடியேறுவதற்கு 40 லட்சத்திற்கும் அதிகமான ஸ்டேர்லிங் பவுண் உதவியை வழங்க பிரித்தானிய அரசு தீர்மானித்துள்ளதாக இலங்கைக்கான பிரித்தானிய உயர் ஸ்தானிகர் பீட்டர் ஹேய்ஸ் தெரிவித்தார்.

“கிழக்கின் பாதுகாப்பு நிலைமை தற்போது நல்ல நிலைக்கு திரும்பிக் கொண்டிருக்கின்றது. சோதனைச் சாவடிகள் குறைந்துள்ளது. இதன் காரணமாக மக்கள் அன்றாட நடவடிக்கைகளில் சுமுகமாக ஈடுபடக் கூடிய சூழ்நிலை காணப்படுவதுடன் மக்கள் மத்தியல் ஒரு நம்பிக்கையும் காணப்படுகின்றது” என தனது கிழக்கு மாகாண விஜயம் தொடர்பாக அவர் கருத்து வெளியிட்டுள்ளார்.

அவர் தொடர்ந்தும், “நாட்டில் இடம் பெற்று வரும் மனித உரிமை மீறல்கள் ஊடகங்கள் மீதான அழுத்தங்கள் ,ஊடகவியலாளர்கள் மற்றும் மனித உரிமை ஆர்வலர்கள் துன்பங்களுக்கு உள்ளாதல் தொடர்பாக பிரித்தானிய அரசாங்கம் கொண்டுள்ள நிலைப்பாட்டில் எவ்வித மாற்றமும் இல்லை.

தமிழ் மக்கள் மத்தியில் அரசு தொடர்பான நம்பிக்கை, அதிகாரத்தில் உள்ளவர்களை விமர்சிக்கும் சுதந்திரம் என்பனவற்றை உறுதிப்படுத்துவதன் மூலம் மனித உரிமைகள் மற்றும் ஊடக சுதந்திரம் என்பன இருப்பதான உணர்வை ஏற்படுத்த வேண்டியது அவசியம். இது தொடர்பாக ஜனாதிபதி அவ்வப்போது பேசி வருவதை நான் கௌரவிக்கின்றேன்.

பயங்கரவாதம், மோதல் நிலைமை தற்போது முற்றுப் பெற்றுள்ள நிலையில் உல்லாசப் பயணிகளின் வருகை அதிகரிக்கக் கூடிய வாய்ப்புகள் உள்ளன. அது மட்டுமல்ல பிரித்தானிய முதலீட்டாளர்கள் இங்கு வந்து முதலீடு செய்வதற்கான வாய்ப்புக்களும் உள்ளன” என்று தெரிவித்தார்.

சர்வதேச செஞ்சிலுவைச் சங்கம் கிழக்கு மாகாணத்தில் மக்களுக்கான தனது சேவையை நேற்றுடன் முடித்துக் கொண்டுள்ளது. இலங்கை அரசாங்கம் சர்வதேச செஞ்சிலுவைச் சங்கத்தின் பணியை மட்டுப்படுத்துமாறு கேட்டுக் கொண்டதற்கிணங்க கிழக்கு மாகாணத்திலுள்ள அலுவலகங்களை மூடிவிடத் தீர்மானித்திருந்தது.

இதன் பிரகாரம் மட்டக்களப்பு, திருகோணமலை ஆகிய பிராந்திய காரியாலயங்களையும், மூதூர் மற்றும் அக்கரைப்பற்று உப அலுவலகங்களையும் இம்மாதத்துடன் மூடி விட்டு கிழக்கிலிருந்து வெளியேறத் தீர்மானித்துள்ளது. நேற்று முதல் மக்களுக்கான சேவைகளை முடிவுக்குக் கொண்டு வந்துள்ளதாக சங்கத்தின் திருகோணமலை மாவட்ட பிராந்திய செயலகம் உத்தியோகபூர்வமாக அறிவித்துள்ளது.

அடுத்த வாரம் கிழக்கு மாகாணத்தில் பணியாற்றும் சகல அலுவலகங்களும் மூடப்பட்டு விடும் என எதிர்பார்க்கப்படுகின்றது. 1990ஆம் ஆண்டு முதல் கிழக்கு மாகாணத்தில் செயல்பட்டு வந்த சர்வதேச செஞ்சிலுவைச் சங்கம் உறவினர்களுடனான தொடர்புகளை ஏற்படுத்துதல், மருத்துவ சேவை, கப்பல் பயணத்திற்கான வழித்துணை உட்பட பல்வேறு வகையில் மக்களுக்கான சேவைகளை வழங்கி வந்தமை குறிப்பிடத்தக்கது.

டெங்கு காய்ச்சலைப் பரப்பும் நுளம்புகளின் பெருக்கத்தைக் கட்டுப்படுத்துவதற்கு கியூபா நாட்டில் பயன்படுத்தப்படும் பக்டீரியா நுண்ணங்கியை இலங்கையிலும் பாவிப்பதற்குத் தேவையான நிபுணத்துவ சேவையை வழங்குவதற்கு அந்நாட்டு மருத்துவ நிபுணர்கள் இருவர் இன்று சனிக்கிழமை கொழும்புக்கு வருகை தருகின்றனர்.

இம்மருத்துவ நிபுணர்களுடன் கலந்துரையாடியதும் டெங்குக் காய்ச்சலைப் பரப்பும் நுளம்புகளின் பெருக்கத்தைக் கட்டுப்படுத்துவதற்குரிய பக்டீரியா நுண்ணங்கியை இலங்கைக்குக் கொண்டு வருவதற்குத் துரித நடவடிக்கை எடுக்கப்படும் என்று சுகாதாரப் பராமரிப்பு, போஷாக்குத் துறை அமைச்சின் செயலாளர் டாக்டர் அத்துல கஹந்த லியனகே நேற்றுத் தெரிவித்தார்.

அமைச்சின் கேட்போர் கூடத்தில் நடைபெற்ற செய்தியாளர் மாநாட்டிற்குத் தலைமை தாங்கி உரையாற்றும் போதே அவர் மேற்கண்டவாறு குறிப்பிட்டார். இது தொடர்பாக அவர் மேலும் குறிப்பிடுகையில், டெங்கு காய்ச்சலைப் பரப்பும் நுளம்புகளின் பெருக்கத்தைக் கட்டுப்படுத்துவதற்கு கியூபா நாட்டில் பி. ரி. ஐ. என்ற பக்டீரியா பயன்படுத்தப்படுகின்றது. இதன் மூலமான பயன்கள் தாக்கங்கள் குறித்து இலங்கை வரும் கியூபா நாட்டு மருத்துவ நிபுணர்களுடன் விரிவாகக் கலந்துரையாடப்படும். அக்கலந்துரையாடலை அடிப்படையாகக் கொண்டு குறித்த பக்டீரியாவைத் துரிதமாக இலங்கைக்குக் கொண்டு வருவது குறித்து முடிவு எடுக்கப்படும் என்றார்.

இதேவேளை, சுகாதார பராமரிப்பு, போஷாக்குத் துறை அமைச்சின் பொது சுகாதார சேவைகள் பிரதிப் பணிப்பாளர் நாயகம் டாக்டர் பாலித மஹீபால குறிப்பிடுகையில், இவ்வருடத்தின் ஜனவரி மாதம் முதல் ஜுலை மாதம் 14 ஆம் திகதி வரையும் டெங்கு காய்ச்சலுக்கு 17 ஆயிரத்து 860 பேர் உள்ளாகியுள்ளனர். இக்காய்ச்சல் காரணமாக இற்றைவரையும் 175 பேர் உயிரிழந்துள்ளனர்.

இவ்வருடத்தில் ஜூன் மாதத்தில் தான் இந்நாட்டில் அதிகளவானோர் டெங்கு காய்ச்சலுக்கு உள்ளனவர்களாக இனம் காணப்பட்டனர் என்றாலும் இப்போது இக்காய்ச்சலுக்கு உள்ளாவோரின் எண்ணிக்கையில் வீழ்ச்சியை அவதானிக்க முடிகின்றது. ஜூன் மாதத்தில் 6979 பேர் டெங்கு காய்ச்சலுக்கு உள்ளானவர்களாக இனம் காணப்பட்ட போதிலும், இம்மாதத்தின் முதல் 14 நாட்களிலும் 1904 பேரே இக்காய்ச்சலுக்கு உள்ளானவர்களாக இனம் காணப்பட்டிருக்கின்றனர்.

இக்காய்ச்சல் கொழும்பு, கண்டி, கம்பஹா, கேகாலை, களுத்துறை, குருநாகல், இரத்தினபுரி, மாத்தளை, ஹம்பாந்தோட்டை, மட்டக்களப்பு, அம்பாறை ஆகிய மாவட்டங்களிலேயே தீவிர நிலையில் காணப்படுகின்றது. இக்காய்ச்சலை கட்டுப்படுத்துவதற்குத் தேவையான நடவடிக்கைகளை அமைச்சு விரிவான அடிப்படையில் முன்னெடுத்து வருகின்றது என்றார்.

புதிய இன்புளுவென்ஸா ஏ(ஏச் 1 என் 1) என்கிற பன்றிக் காய்ச்சலுக்கு உள்ளானவர்களாக இலங்கையில் 40 பேர் இனம் காணப்பட்டுள்ளனர் என்று சுகாதாரப் பராமரிப்பு, போஷாக்குத் துறை அமைச்சின் பொது சுகாதார சேவைகள் பிரதிப் பணிப்பாளர் நாயகம் டாக்டர் பாலித மஹீபால நேற்றுத் தெரிவித்தார். இக்காய்ச்சலுக்கு உள்ளானவர்களாக இந்நாட்டில் இனம் காணப்பட்டுள்ள சகலரும் வெளிநாடுகளிலிருந்து இலங்கைக்கு வருகை தந்தவர்கள் என்றும் அவர் குறிப்பிட்டார்.

இக்காய்ச்சலுக்கு உள்ளானவர்களாக இனம் காணப்பட்டிருப்பவர்கள் அவுஸ்திரேலியா, பிரித்தானியா, அமெரிக்கா, ஹொங்கொங், சவூதிஅரேபியா ஆகிய நாடுகளிலிருந்து வருகை தந்தவர்கள் எனவும் அவர் கூறினார். இது தொடர்பாக அவர் மேலும் குறிப்பிடுகையில் :-

இக்காய்ச்சலுக்கு உள்ளானவர்களாக அவுஸ்திரேலியாவிலிருந்து வருகை தந்த 28 பேரும், பிரித்தானியாவிலிருந்து வருகை தந்த 5 பேரும், அமெரிக்காவிலிருந்து வந்த 4 பேரும், ஹொங்கொங்கிலிருந்து வந்த இருவரும், சவூதி அரேபியாவிலிருந்து வந்த ஒருவரும் இவ்வாறு அடையாளம் காணப்பட்டுள்ளனர்.

மருத்துவ ஆராய்ச்சி நிலையம் இவர்கள் இக்காய்ச்சலுக்கு உள்ளானவர்கள் என்பதை உறுதிப்படுத்தியுள்ளது. கட்டுநாயக்க சர்வதேச விமான நிலையத்தின் ஊடாக இலங்கைக்குள் வருகை தரும் சகல பயணிகளும் தேர்மல் ஸ்கேனரில் பரிசோதனைக்கு உட்படுத்தப்படுகின்றனர். இப்பரிசோதனை மூலம் காய்ச்சலுக்கு உள்ளாகி இருப்பவர்கள் இனம்காணப்பட்டதும் மேலதிக பரிசோதனைக்கு உட்படுத்தப்பட்டு, தொற்று நோய்கள் தவிர்ப்பு ஆஸ்பத்திரிக்குச் சிகிச்சைக்காக அனுப்பப்படுகின்றனர்.

கட்டுநாயக்க சர்வதேச விமான நிலையத்திற்கு தினமும் ஆறாயிரம் பயணிகள் வந்து செல்லுகின்றனர். இங்கு புதிய இன்புளுவென்ஸா பரிசோதனையில் டாக்டர்களும், பொது சுகாதார பரிசோதகர்களும் 24 மணி நேரமும் பணியில் ஈடுபட்டுள்ளனர். இக்காய்ச்சலை முழுமையாகக் குணப்படுத்த முடியும். இதற்குத் தேவையான மருந்துகள் எம்மிடம் கையிருப்பில் உள்ளன என்றார். இக்காய்ச்சலுக்கு உலகம் முழுவதும் ஒரு இலட்சத்து 90 ஆயிரத்து 708 பேர் உள்ளாகியுள்ளனர். இவர்களில் 546 பேர் உயிரிழந்துள்ளனர். இக்காய்ச்சல் 143 நாடுகளில் காணப்படுகின்றது என்று உலக சுகாதார ஸ்தாபனத்தின் இலங்கை வதிவிடப் பிரதிநிதி கூறினார்.

அதிக எண்ணிக்கையிலான இலங்கைத் தமிழர்கள் சுவிட்சர்லாந்தில் புகலிடம் கோரியுள்ளதாக சுவிட்சர்லாந்தின் மத்திய குடிவரவுத் திணைக்களம் தகவல் வெளியிட்டுள்ளது

முதல் அரையாண்டு காலப்பகுதியில் சுவிட்சர்லாந்தில் புகலிடம் கோரியவர்களில் இலங்கையர்கள் இரண்டாம் நிலையில் இருப்பதாகத் தெரிவிக்கப்படுகின்றது இரண்டாவது அதிகபடியான புகலிடம் கோரல் விண்ணப்பங்கள் இலங்கையர்களிடம் கிடைக்கப் பெற்றுள்ளதாக மத்திய குடிவரவுத் திணைக்களம் குறிப்பிட்டுள்ளது

2009ம் ஆண்டின் முதல் காலாண்டு பகுதியில் 8400 பேர் புகலிடம் கோரியுள்ளனர் கடந்த வருடத்துடன் ஒப்பீடு செய்யும் போது இந்த எண்ணிக்கை 40வீத உயர்வைக் காட்டுவதாகத் தெரிவிக்கப்படுகின்றது எரித்திரியாவிலிருந்தே அதிக எண்ணிக்கையிலான புகலிடம் கோரியோர் பதிவு செய்யப்பட்டுள்ளனர். இலங்கை. நைஜீரியா. ஈராக். மற்றும் சோமாலியா ஆகிய நாடுகள் முறையாக இரண்டாம் மூன்றாம் நான்காம். மற்றும் ஜந்தாம். இடங்களை வகிப்பதாகத் தெரிவிக்கப்படுகின்றது

நைஜீரியர்களினால் விண்ணப்பிக்கப்பட்ட புகலிடம் கோரல் மனுக்களில் 73 வீதமானவை நிராகரிக்கப்பட்டுள்ளதாக குறிப்பிடப்படுகிறது

வன்னி தடுப்பு முகாம்களில் வசித்து வரும் தமிழ் மக்களின் வாழ்வியலை முன்னேற்றும் நடவடிக்கையாக ஸ்ருட்காட்டில் ஒரு மகாநாடு என்றபோது பொதுவாகவே இம்மாதிரியான நடவடிக்கைகளுக்கு எதிர்ப்பு இருக்கும் எனவே இந்த மகாநாடு சம்பந்தமாக எனக்கும் பல கேள்விகள் எழுந்து மறைந்தது. ஆனால் இந்த மகாநாட்டு ஏற்பாட்டாளர்கள் எல்லாம் புலிப் பாஸிஸ எதிர்ப்பாளர்கள் ஆவர். எனவே பத்தரை மாற்று தங்கத்தை உரசிப் பார்ப்பது தகுமா? அனாவசியமாக புலி முத்திரை குத்தவும் வாய்ப்புள்ளது.

யார் இந்த 21 நபர்கள். நானும் விசாரித்த வண்ணமே இருக்கிறேன். பதில் இன்றுவரை கிடைக்கவில்லை. சரி! இவர்கள் எவ்வாறு தெரிவு செய்யப்பட்டனர்? இவர்களாக போனார்களா? அல்லது தெரிந்தெடுக்கப்பட்டு அழைக்கப்பட்டார்களா? போய் வந்தவர்கள் கண்டு பிடித்தவை என்ன? ஒரு கூட்டு அறிக்கை (21நபர்) விடப்பட்டதா?

இவர்களாகப் போனால் 70 நபர்களிடம் (அதுவும் எவ்வாறு தெரிவு செய்யப்பட்டது என தெரியவில்லை) அதற்கான அங்கீகாரத்தை கோருவது நியாயமல்ல என லாஜிக்காக பேசும் இவர்களுக்கு புரியாததல்ல. சரி அரசு தேர்ந்தெடுத்து அழைத்தால் என்ன அடிப்படையில் அரசு அழைக்கின்றது என விசாரித்தார்களா? அல்லது இவ்வாறு அரசின் விருந்தாளிகளாக செல்வது தம்மேல் நம்பிக்கையீனத்தை உருவாக்கும் என்பதை அறியாதவர்களா? தமது கண்டு பிடிப்புக்களை மக்கள் ஏற்க மாட்டார்கள் என்பது புரியாதவர்களா?

மனிதநேயம் என்ற குறிக்கோளுடன் மக்கள் சேவையாற்ற களம் இறங்கிய இவர்கள் இலங்கை அரசின் மேலும் அதன் படையின் மேலும் தமிழ் மக்கள் கேட்கும் கேள்விகள் பற்றி விசாரித்தார்களா?

1)முகாம்களில் இருப்போரின் எண்ணிக்கையும் அவர்களின் விபரமும் தேவை ஏற்படின் இதை இணையங்களில் வெளியிடுவது – இதன் மூலம் காணாமல் போவது மற்றும் வெளிநாடுகளிலும் உள்நாட்டிலும் உள்ள உறவினர்கள் தமது சொந்தங்களின் நிலை பற்றி அறிந்து கொள்ள முடியும்.

2)போரின் போது மனித உரிமை மீறல்கள் பற்றிய விசாரணை – இலங்கை அரசின் கருத்துப்படி சர்வதேசம் இலங்கை அரசிற்கு எதிராக தொழிற்படுவதாகவும் ஏனெனில் மேற்கத்தைய நாடுகள் இலங்கை முற்போக்கு அரசிற்கு எதிராக கங்கணம் கட்டி வேலை செய்வதாக கூறுகின்றது. ஏற்றுக் கொள்கிறோம். அப்படியாயின் இளைப்பாறிய நீதிபதி வி.ஆர். கிருஸ்ண அய்யர் போன்ற சமூக நன்மதிப்பு பெற்றவர்களைக் கொண்டு விசாரணை மேற்கொள்ளலாம்.

3)முகாங்களின் வசதி பற்றி- 21 நபர் கொமிற்றி எல்லா முகாம்களுக்கும் சென்றதா? அதிகாரிகள் அற்ற நிலையில் யாரிடமாவது விசாரித்தீர்களா? அப்படி இருப்பினும் முகாம்களில் இருப்போர் உண்மையான கஸ்டங்களை பயமின்றி கூறுவார்கள் என நினைக்கின்றீர்களா?

4)இடம்பெயர்ந்த வன்னி மக்களை மீள்குடியேற்றம் செய்வது – இதற்கான தடைகள் என்ன? எவ்வளவு காலம் தேவை? எவ்வாறு விரைவாக குடியேற்றலாம்? முக்கியமாக கூறப்படுவது மிதி வெடிகளைப் பற்றியே. மிகத்திட்டமிட்டு பகுதி பகுதியாக செய்தால் கடந்த இரண்டு மாதமாக நிறைய மக்கள் குடியிருப்புள்ள இடங்களை துப்பரவு செய்திருக்க முடியும். நாம் உறுதியாக நம்புகின்றோம் அரசிடம் வேறு மறைமுகத்திட்டம் இருக்கின்றது என. இந்த சந்தேகம் உங்களுக்கு வரவில்லையா?

5)இந்த முகாம்களுக்கு மேஜர் சந்திரசிறி நியமிக்கப்பட்டதும் மேலும் வடகிழக்கு மாகாணங்கள் இராணுவ மயப்படுவதும் உங்களுக்குப் புரியாததா? மிகச்சிறந்த சிங்கள சிவில் சேவையாளர் விமல் அமரசேகர (முன்னாள் யாழ். அரச அதிபர்) போன்றவர்களைக் கொண்ட சிவில் நிர்வாகத்தை உருவாக்குவது பற்றி நீங்கள் பேசவில்லையா?

6)சிங்கள, தமிழ், முஸ்லிம் நல் சக்திகளைக் கொண்ட சில கண்காணிப்பு குழுக்களை அரசின் ஏற்பாட்டுடன் செய்து முகாம்களின் நிலைபற்றி கவனம் எடுப்பது என்றெல்லாம் நிறைய விடயங்கள் உள்ளது.

சிவில் சேவையுடன் சம்பந்தப்படாத எனக்கே இவ்வளவு கேள்விகளும் யோசனைகளும் இருக்கும் போது அறிஞர் குழுவில் உள்ள உங்களுக்கு எவ்வளவு கேள்விகள் எழுந்திருக்கும்? இவைகள் பற்றி நீங்கள் கேட்டிருந்தீர்களா? பதில் கிடைத்ததா?

மூன்று லட்சம் மக்களை முகாம்களில் வைத்துப் பார்ப்பது இலகுவான விடயமல்ல என்பது எமக்கு தெரியும். அதற்காக அவர்களை துன்பத்திற்குள்ளாக்குவது முறையாகுமா? அதை விடுத்து மக்கள் நன்றாக இருக்கிறார்கள் எனக் கூறுவது…….?சிங்கள முற்போக்கு சக்திகளே (வாசுதேவ நாணயக்கார) அங்கு பிரச்சினை உள்ளது எனக் கூறும்போது நீங்கள் இங்கிருந்து சென்று நற்சான்றிதழ் கொடுப்பது நல்லதல்ல. மேலும் முப்பது வருடங்களுக்கு மேலாக இங்கிருக்கும் உங்களுக்கு, இலங்கையில் இருந்து வரும் புலி எதிர்ப்பாளர்களை மாத்திரம் சந்திக்கும் உங்களுக்கு, அங்கு சாதாரண மக்கள் படும்பாடு புரியுமா? அல்லது உங்களது நெருங்கிய உறவினர்கள் (இங்கும் அங்கும்) உங்களது இந்த நிலைப்பாட்டை ஆதரிக்கிறார்களா?

புலிகளின் கட்டுப்பாட்டுப் பகுதியான வன்னியில் இருந்து வந்த இந்த அகதி மக்களை அரசு சந்தேகக் கண்ணுடன் பார்ப்பது ஓரளவிற்கு ஏற்கப்படக் கூடியது என்ற காரணத்தை நீங்களும் நாங்களும் ஏற்றுக்கொள்ளும் அதே வேளையில், பிரபாகரனுக்கு விசுவாசத்தை காட்டுவதற்காக ஏராளம் கொலைகள் புரிந்த, கொலைகள் மாத்திரம் புரிந்த கருணா போன்றோரும் அரசிலும் அதற்கு நெருக்கமாயும் இருப்பது பற்றி விரல் நுனியில் எல்லா விபரங்களையும் வைத்திருக்கும் பசில் ராஜபக்சேவிடம் வினவினீர்களா?

உங்களது (21 பேர்) இலங்கை விஜயம் வன்னி மக்களின் நலன்சார்ந்தது மாத்திரமா? உங்களில் எத்தனை பேர் வன்னிப் பிரதேசத்துடன் தொடர்புடையவர்கள்? இனப் பிரச்சனையின் ஒரு பகுதிதான் இந்த வன்னி அவலம் என்பது உங்களுக்கு புரியாததா? காயங்களின் ஒரு பகுதியை குணமாக்குவது சரிப்படும் என நினைக்கிறீர்களா?

நிபந்தனை அற்ற ஆதரவு எங்கு கொண்டு போய் விடும் என்பதை நமது கண்களின் முன்னாலேயே புலிகள் செய்து காட்டினார்கள். (எந்தக் கேள்வியும் இன்றி மக்கள் புலிகளை ஆதரித்து விட்டு இன்று நடுத்தெருவில் நிற்கிறார்கள்) எனவே மக்கள் நலன் சார்ந்து ஆதரவு கொடுப்பது தவறல்ல. ஆனால் மனதில் சந்தேகக் கண்ணுடன் ஆதரவு தருவது சரியாகுமா? புலிகள் இருந்த போது புலிக்கு எதிரான அரசின் நடவடிக்கைகளுக்கு ஆதரவு தருவதின் அளவுகோல் வேறு. இப்போது இதற்கான அளவுகோல் வேறு என்பது உங்களுக்குப் புரியாததல்ல! யதார்த்ததத்தின் அடிப்படையில் புலிக்கெதிரான போரில் உயர் பாதுகாப்பு வலயம் மீன்பிடித்தடை போன்ற மனித உரிமை மீறல்கள் கண்டும் காணாமலும் விடப்பட்டன. ஏற்றுக் கொள்கிறோம். ஆனால் புலிகள் அழிக்கப்பட்ட பின்னும் மனித உரிமை மீறல்களை ஒரு போதும் அனுமதிக்க முடியாது. ஏனெனில் இலங்கை அரசுகளின் கடந்த காலங்கள் அப்படியானவை என்பது உங்களுக்கு புரியாதவை அல்ல.

இனப்பிரச்சினைக்குரிய தீர்வை கண்டு பிடிப்பதில் தொடர்ச்சியாக வந்த அரசுகள் விட்ட பிழைகளை பாஸிஸ புலிகளின் தவறுகளைக் கொண்டு மூடி மறைக்கக் கூடியதாக இருந்ததை நீங்கள் அறிவீர்கள். மேலும் எவ்வளவு காலம் தீர்வை கண்டுபிடிக்கத் தேவை என்பதை உங்களால் (21பேர்) அறிய முடிந்ததா? அறிஞர் குழுவில் பெரும்பான்மை அறிக்கை என ஒன்று சில வருடங்களுக்கு முன்பு வெளியாக நாங்களும் நீங்களும் வாயைப் பிளந்து நின்றது உங்களுக்கு மறந்து போய்விட்டதா? அடிக்கடி திஸ்ஸ விதாரண இதோ முடித்து விடுவோம், இன்னும் கொஞ்சம் இருக்கிறது என அறிக்கை விடுவது உங்கள் நினைவுக்கு வரவில்லையா?

இன, மத ரீதியாக ஒடுக்கப்படும் மக்களுக்கு புலி செய்த பாவங்கள் போதும். தயவு செய்து நீங்களும் அவர்களுக்கு மேலதிக துன்பத்தைக் கொடுக்காதீர்கள்! வடக்கு, கிழக்கு மக்கள் என்ன விரும்புகிறார்கள் என்பதை இன்னும் உங்களுக்கு விளங்க முடியவில்லை எனில், நீங்கள் கூறியது மாதிரி மக்கள் உங்களை தூக்கி எறிந்து விடுவார்கள் என்பதைப் புரிந்துகொள்ளுங்கள்.

95இல் இருந்து இலங்கை அரசின் கட்டுப்பாட்டில் இருக்கும் யாழ் குடாநாட்டு மக்கள் போர் முடிந்து இரண்டு மாதங்களாகியும் நாட்டின் வேறு பகுதிக்கு போவதற்கு இராணுவத்தின் அனுமதி கோரி நிற்பது வெட்கப்பட வேண்டிய விடயம். அத்தோடு தமது அவசர தேவைகளுக்கு தலைநகர் கொழும்பிற்கு வருவதற்கு விமானப் பயணத்தையே இன்னமும் நம்பி இருக்க வேண்டியுள்ளது. அதேபோல் வெளிநாடுகளில் இருந்து செல்ல இருப்பவர்களும் இதே நிலையிலேயே உள்ளதோடு உள்ளுர், வெளிநாட்டு மக்கள் அந்தப் பயணங்களுக்குரிய கட்டணங்களை கேட்டு தலையில் கைவைத்தபடி உள்ளார்கள். எவ்வாறு புலி கடந்த காலங்களில் பொது மக்களின் பணத்தை பகற் கொள்ளையடித்ததோ அதே பாணியில் இன்றும் அவை நடைபெறுவதாக குமுறுகின்றனர் என்பதையெல்லாம் புரிந்து கொண்டு கடந்த காலங்களில் புலி எதிர்ப்பு போராட்டத்தில் உங்களுக்கு தோள் கொடுத்த எங்களுக்கு தமிழ் மக்களுக்கு எதிரான நிலையை நீங்கள் எடுப்பதன் மூலம் எங்கள் உறவுகளின் முன்னால் எம்மை அவமானப்படுத்தி விடாதீர்கள் என கோருகின்றோம்.

வவுனியாவிலுள்ள நலன்புரி நிலையங்களிலும், நிவாரணக் கிராமங்களிலும் அதிக உயிரிழப்புக்கள் இடம்பெறுவதாகக் கூறி இலங்கையின் நற்பெயருக்குக் களங்கம் ஏற்படுத்த சில வெளிநாட்டு ஊடகங்கள் முயற்சி செய்வதாகச் சுகாதாரப் பராமரிப்பு, போஷாக்குத்துறை அமைச்சின் செயலாளர் டாக்டர் அத்துல கஹந்தலியனகே நேற்றுத் தெரிவித்தார்.

வவுனியாவிலுள்ள நிவாரணக் கிராமங்களிலும், நலன்புரி நிலையங்களிலும் வாரமொன்றுக்கு 1400 பேர் உயிரிழந்ததாக லண்டன் ரைம்ஸ் மற்றும் ரெலிகிராப் பத்திரிகைகள் வெளியிட்ட செய்திகளில் எவ்வித உண்மையுமே இல்லை என்று இச்செய்தியாளர் மாநாட்டில் பங்கு பற்றிய உலக சுகாதார ஸ்தாபனத்தின் இலங்கை வதிவிடப் பிரதிநிதி டாக்டர் பிர்தெளஸி மேத்தா கூறினார்.

சுகாதாரப் பராமரிப்பு, போஷாக்குத் துறை அமைச்சின் கேட்போர் கூடத்தில் நடைபெற்ற இச்செய்தியாளர் மாநாட்டில் டாக்டர் அத்துல கஹந்த லியனகே இது தொடர்பாக மேலும் கூறுகையில், வவுனியாவிலுள்ள நிவாரணக் கிராமங்களிலும், நலன்புரி நிலையங்களிலும் அதிக உயிரிழப்புக்கள் இடம்பெறுவதாகக் குறிப்பிட்டு லண்டன் ரைம்ஸ் மற்றும் ரெலிகிராப் பத்திரிகைகள் செய்தி வெளியிட்டுள்ளன.

அதுவும் ஜூலை மாதம் 10ம் திகதி முதலான ஒருவார காலத்தில் 1400 பேர் இவ்வாறு உயிரிழந்ததாகக் குறிப்பிடப்பட்டிருக்கின்றது.

இந்த நலன்புரி நிலையங்களிலும், நிவாரணக் கிராமங்களிலும் இடம்பெறுகின்ற சகல உயிரிழப்புக்களையும் பொலிஸ் நிலையங்களில் பதிவு செய்யுமாறு குறிப்பிட்டிருக்கின்றோம். இம்மரணங்கள் தொடர்பான விசாரணைகளை மேற்கொள்ளவென பிரதம சட்ட வைத்திய அதிகாரியை இணைப்பாளராக நியமித்துள்ளோம்.

இந்த அடிப்படையில் ஜூன் மாதம் 15ம் திகதி முதல் ஜுலை மாதம் 14ம் திகதி வரையும் இக்கிராமங்களில் 163 பேர் தான் உயிரிழந்துள்ளனர். இதுவே பொலிஸ் பதிவாகும். இதன்படி இக்கிராமங்களில் தினமும் 5.62 சதவீதமான மரணங்கள் தான் இடம்பெறுகின்றன.

இதன்படி லண்டன் ரைம்ஸ் மற்றும் ரெலிகிராப் பத்திரிகைகள் திரிபுபடுத்தப்பட்ட செய்திகளை வெளியிட்டு இலங்கையின் நற்பெயருக்குக் களங்கம் ஏற்படுத்தவும், அரசாங்கம் இடம்பெயர்ந்துள்ள மக்களுக்கு அளித்துவரும் சிறந்த சுகாதார சேவைக்குச் சேறுபூசவுமே முயற்சி செய்கின்றன. அப்பத்திரிகைகள் வெளியிட்டுள்ள செய்தியை நாம் முழுமையாக மறுக்கின்றோம். சர்வதேச பிரமாணங்களுக்கு அமைய வவுனியாவுக்கு இடம்பெயர்ந்திருக்கும் 2 இலட்சத்து 65 ஆயிரம் மக்கள் மத்தியில் 6.6 சதவீதத்திற்கும் 13.2 சதவீதத்திற்குமிடைப்பட்ட வீதத்தில் தான் உயிரிழப்புக்கள் நிகழ வேண்டும். ஆனால் அங்கு 5.6 சதவீத உயிரிழப்புக்களே நிகழுகின்றன. ஆகவே எமது சுகாதார சேவைகள் சிறப்பாக இருப்பதற்கு இது நல்ல எடுத்துக் காட்டு என்றார்.

இச்செய்தியாளர் மாநாட்டில் பிரதம சட்ட மருத்துவ அதிகாரி டாக்டர் ஆனந்த சமரசேகர குறிப்பிடுகையில், வவுனியாவுக்கு இடம்பெயர்ந்திருக்கும் மக்கள் புலிகளின் பிடியில் பல வருடங்கள் இருந்தவர்கள், அதனால் அவர்கள் அனேகர் தீவிர போஷாக்கின்மைக்கு உள்ளாகியுள்ளனர். இவர்களுக்குத் தொற்று நோய்களின் தாக்கம் ஏற்படுவது மிகவும் இலகுவாகும். அதனால் தான் இந்நிவாரணக் கிராமங்களில் இடம்பெறும் மரணங்கள் தொடர்பாக உடனுக்குடன் அமைச்சுக்கு அறிய கொடுப்பதற்கு ஏற்பாடுகள் செய்யப்பட்டிருக்கின்றது என்றார்.

நாட்டின்  மேற்கு, மத்திய, சபரகமுக பிரதேசங்களிலும் காலி மற்றும் மாத்தறை மாவட்டங்களிலும் இன்று  அடிக்கடி மழை பெய்யக்கூடிய சீரற்ற கால நிலை காணப்படும் என வானிலை அவதான நிலைய பிரதி இயக்குநர் எஸ். ஆர். ஜயசேகர தெரிவித்தார்.

இப்பிரதேசங்களில் இன்னும் சில தினங்களுக்கு இதே கால நிலை தொடரும் எனவும் இடைக்கிடை பலத்த காற்று வீசும் எனவும் அவர் மேலும் கூறினார்

தேசிய வீடமைப்பு அபிவிருத்தி அதிகார சபையால் ஊவா மாகாணத்தில் நடைமுறைப்படுத்திய வீடமைப்பு அபிவிருத்தி வேலைத் திட்டத்தினூடாக 6500 குடும்பங்களுக்கு வீடமைப்பு வசதி செய்துகொடுக்க முடிந்துள்ளது. இந்த வேலைத்திட்டத்திற்காக அரசாங்கத்தால் செலவு செய்த மொத்த தொகை 171 மில்லியன் ரூபாவாகுமென வீடமைப்பு அபிவிருத்தி அதிகார சபை அறிவித்துள்ளது.

இவ்வேலைத்திட்டத்தின் கீழ் பதுளை மாவட்டத்தில் மாத்திரம் 4244 வீடுகள் நிர்மாணிக்கப்பட்டுள்ளதுடன், இதற்காக வீடமைப்புக் கடனாக 51 மில்லியன் ரூபாவும் வீடமைப்பு உதவியாக 05 மில்லியன் ரூபாவும் பெருந்தோட்ட வீடமைப்புக்காக 35 மில்லியன் ரூபாவும் செலவிடப்பட்டுள்ளது.

ஊவா மாகாண வீடமைப்பு அபிவிருத்தி வேலைத்திட்டத்திற்கு சமாந்தரமாக மொனராகலை மாவட்டத்தில் 2200 குடும்பங்களுக்கு மூன்று வருட காலத்தில் வீட்டு வசதிகளைச் செய்துகொடுக்க தேசிய வீடமைப்பு அபிவிருத்தி அதிகார சபை வழி செய்துள்ளதுடன், அக்குடும்பங்களுக்காக வீடமைப்புக் கடனாக மொத்தம் 50.4 மி. ரூபா வழங்கப்படுள்ளது.

மொனராகலை மாவட்டத்தில் வறிய குடும்பங்களுக்காக நடைமுறைப்படுத்திய வீடமைப்பு உதவியாக 5.5 மில்லியன் ரூபா செலவு செய்துள்ளதுடன், பெருந்தோட்ட வீடமைப்புக்காக வெளியார் பங்களிப்பாக 25 மில்லியன் ரூபாவை செலவிட்டுள்ளது.

இவ்வரசாங்கம் பதவிக்கு வந்தது முதல் மஹிந்த சிந்தனை தேசிய கொள்கையின் கீழ் நடைமுறைப்படுத்திய ஜனசெவன தேசிய வீடமைப்பு திட்டத்திற்கேற்ப தேசிய வீடமைப்பு அபிவிருத்தி அதிகார சபையால் ஊவா மாகாணத்தில் நடைமுறைப்படுத்திய மிக முக்கியமான வேலைத்திட்டம் கமநெகும வேலைத்திட்டமாகும். இவ்வேலைத் திட்டத்தின் கீழ் 03 வருடங்களுக்குள் கமநெகும வேலைத் திட்டத்தினூடாக ஊவா மாகாணத்தில் 1800 குடும்பங்களுக்கு வீடமைப்பு வசதி செய்து கொடுக்கப்பட்டள்ளதுடன், அவற்றுள் 890 பதுளை மாவட்டத்திலாகும். மேலும் 810 குடும்பங்கள் மொனராகலை மாவட்டத்தைச் சேர்ந்தவர்களுக்காகும்.

ஊவா மாகாணத்தில் நடைமுறைப்படுத்திய வீடமைப்பு அபிவிருத்தி வேலைத்திட்டத்தில் விசேட கவனம் செலுத்தப்பட்டது நிலையானதொரு வீட்டை நிர்மாணித்துக் கொள்ள எதிர்பார்க்கும் குடும்பங்களுக்கு நிரந்தரமான கூரையைப் பெற்றுக்கொடுக்க பங்களிப்புச் செய்யும் நடவடிக்கையாகும். இவ்வேலைத்திட்டமானது பதுளை, மொனராகலை ஆகிய மாவட்டங்களில் நடைமுறைப்படுத்தப்பட்டதுடன், 3800 குடும்பங்களுக்கு கூரைக்கான தகரங்கள் வழங்கப்பட்டன.

இதன்படி பதுளை மாவட்டத்தில் 38000க்குமதிகமான கூரைத் தகரங்கள் வழங்கப்பட்டதுடன், மொனராகலை மாவட்டத்தில் 5200 கூரைத் தகரங்கள் வழங்கப்பட்ட தோடு, இதற்காகச் செலவிடப்பட்ட மொத்த தொகை 43 மில்லியன் ரூபாவாகும்.