07

மும்பையில் கடந்த 2003ம் ஆண்டு நடந்த இரட்டைக் குண்டு வெடிப்பு தொடர்பான வழக்கில் மரண தண்டனை விதிக்கப்பட்டுள்ளது.

கடந்த 2003ம் ஆண்டு மும்பையில் இரு இடங்களில் அடுத்தடுத்து குண்டுகள் வெடித்ததில் 54 பேர் கொல்லப்பட்டனர். இந்த வழக்கு மும்பை சிறப்பு நீதிமன்றத்தில் நடந்து வந்தது. வழக்கில் ஹனீஃப் சையது, அவரது மனைவி ஃபாமீதா, அஸ்ரத் அன்சாரி ஆகியோர் குற்றவாளிகள் என அறிவிக்கப்பட்டது.

இதையடுத்து, கடந்த 4ம் திகதி தண்டனை வழங்கப்படும் என அறிவிக்கப்பட்டிருந்தது. பின்னர் தண்டனை அறிவிப்பு ஒத்தி வைக்கப்பட்டது. நேற்று தண்டனைகளை வாசித்த நீதிபதிகள், குற்ற வாளிகள் மூவருக்கும் மரண தண்டனை வழங்கப்படுவதாக அறிவித்தனர். அவர்கள் அனைவருக்கும் லஷ்கர் இ. தொய்பா அமைப்புடன் தொடர்பு இருந்ததாக நிரூபிக்கப்பட்டுள்ளது

இலங் கையில் போர் உச்சக்கட்டத்தில் நடந்து கொண்டிருந்தபோது அதில் காயமடைந்த தமிழர்களுக்கு சிகிச்சையளிக்க 6 மாதங்களுக்கு முன் இந்திய ராணுவ டாக்டர்கள் குழு இலங்கைக்கு அனுப்பப்பட்டது.

அவர்கள் திருகோணமலை மாவட்டம் புல்மொட்டையில் தற்காலிக மருத்துவமனை அமைத்து சிகிச்சை அளித்து வந்தனர்.

பின்னர் இந்த மருத்துவமனை வவுனியா மாவட்டம் செட்டிகுளத்துக்கு மாற்றப்பட்டது. அங்குள்ள அகதி முகாமில் தங்கியிருந்த தமிழர்களுக்கு சிகிச்சை அளித்து வந்தனர். இந் நிலையில் தங்களது பணிகள் முடிந்துவிட்டதால் இப்போது இந்தக் குழு இந்தியா திரும்பவுள்ளதாக தெரிவிக்கப்படுகின்றது.

பாராளு மன்றத்தைப் பார்வை யிட வருகை தரும் மாணவ ர்களுக்கு இலவசமாக பால் வழங்கும் திட்டம் சபாநாயகர் டபிள்யு. ஜே. எம். லொக்கு பண்டார தலைமையில் நேற்று ஆரம்பித்து வைக்கப்பட்டது. தனியார் பால்மா கம்பனியொன்றின் அனுசரணையோடு இத்திட்டம் பாராளுமன்ற வளாகத்தில் ஆரம்பிக்கப்பட்டது. இதன் பின்னர் பாராளுமன்றத்தைப் பார்வையிட வருகை தரும் சகல மாணவ, மாணவியருக்கும் ஒரு கிளாஸ் பால் வழங்கப்படும்.

பாராளுமன்ற அமர்வுகள் நடைபெறும் தினங்களில் ஒரு தனியார் கம்பனியும் ஏனைய நாட்களில் மற்றொரு கம்பனியும் பாடசாலை மாணவ மாணவியருக்கு இலவசமாக பால் வழங்க முன் வந்திருப்பதாக இத்திட்டத்தை அங்குரார்ப்பணம் செய்து வைத்து உரையாற்றும்போது சபாநாயகர் கூறினார். இவ்வைபவத்தில் கல்வி அமைச்சர் சுசில் பிரேம ஜயந்த்தும் கலந்துகொண்டார்.

இலங் கையில் போரினால் பாதிக்கப்பட்டு முகாம்களில் தங்கியுள்ள தமிழர்களுக்கு தமிழக அரசின் 4வது கட்ட நிவாரணப் பொருட்கள் அடங்கிய கப்பல் கொழும்பு நோக்கி வருகிறது.

உணவு பொருட்கள், மளிகை, பிளாஸ்டிக் கேன்கள், செருப்புகள், குழந்தைகளுக்கான துணிகள், வேட்டி-சேலைகள் அடங்கிய ரூ.15 கோடி மதிப்புள்ள இந்த பொருட்களை எம்.சி.பி. ஆம்ஸ்டர்டாம் என்ற கப்பல் மூலம் நேற்று இலங்கைக்கு அனுப்பப்பட்டது. இந்தக் கப்பல் நேற்று காலை 11.50 மணிக்கு சென்னை துறைமுகத்திலிருந்து புறப்பட்டது. 8ம் தேதி இது கொழும்பு வந்தடையும்.

இந்த நிவாரணப் பொருட்கள் இங்குள்ள இந்திய தூதரகம் மூலம், ஐக்கிய நாடுகள் சபை அமைப்பினரால் வன்னிதமிழர்களுக்கு வழங்கப்படும்.

மத்திய மாகாண பாடசாலைகளில் கல்வி பயிலும் மாணவர்களினது பரீட்சை கட்டணங்களை இனிவரும் காலங்களில் மாகாண சபை மூலம் செலுத்த நடவடிக்கை எடுக்கப்படும் என மத்திய மாகாண முதலமைச்சரும் கல்வி அமைச்சருமான சரத் ஏக்கநாயக்க தெரிவித்தார்.

இந்நடவடிக்கையின் பொருட்டு மத்திய மாகாணத்திலுள்ள 1400 பாடசாலைகளினது மாணவர்கள் நன்மையடையவுள்ளதாகவும் அமைச்சர் மேலும் சுட்டிக்காட்டினார். மத்திய மாகாண சபையின் 5 வது அமர்வின் போது அமைச்சர்களினது அறிவித்தல் தொடர்பான உரையாடலின் போது முதலமைச்சர் மேற்கண்ட வாறு தெரிவித்தார். மத்திய மாகாண சபை சபையின் தலைவர் சாலிய பண்டார திசாநாயக்க தலைமையில் கடந்த 4ம் திகதி பல்லேகலையில் உள்ள மாகாண சபை மண்டபத்தில் கூடியது.

அமைச்சர் தொடர்ந்து அங்கு கூறுகையில்:- மத்திய மாகாண பாடசாலைகளில் கல்வி பயிலும் மாணவர்களினது பெற்றோர்களின் சுமையை ஓரளவேனும் குறைக்கும் வகையிலும் இன்னும் பல்வேறு நிலைமைகளின் நிமித்தம் இவ்வாறான நடவடிக்கையொன்றை மேற்கொள்ள தான் தீர்மானித்திருப்பதாக அவர் கூறினார்.

அரசியல் காலங்களில் வெளியிடப்படும் போஸ்டர் விவகாரங்களைப் போன்று பரீட்சை வினாத்தாள்களை அச்சிட்டு வெளியிட முடியாது. அரசியல் வேறு பாடசாலை, கல்வி முறைமை வேறு. தேர்தல் காலங்களில் வெளியிடப்படும் போஸ்டர்களில் எவ்வளவு எண்ணிக்கையான தொகைகள் அச்சடிக்கப்படுகின்றதோ அதற்காக செலுத்தப்படும் கட்டணங்களும் குறைக்கப்படுகின்றது.

அவ்வாறு நாம் பரீட்சை வினாத்தாள்களை அச்சடித்து வெளியிட முடியாது. மாறாக மாணவர்களினது பாடம் மற்றும் எண்ணிக்கைகளைப் பொறுத்து வரையறுக்கப்பட்ட ஒரு எண்ணிக்கையிலே நாம் இதனை மேற்கொள்ள வேண்டியுள்ளது.

சர்வதேச டெஸ்ட் தரவரிசைப் பட்டியலில், இலங்கை அணி மூன்றாவது இடத்துக்கு முன்னேறியுள்ளது. இந்திய அணி ஒரு இடம் பின்தங்கி நான்காவது இடத்தை பெற்றுள்ளது.  சர்வதேச கிரிக்கெட் சபை (ஐ.சி.சி.) டெஸ்ட் அணிகளுக்கான தரவரிசைப் பட்டியலை வெளியிட்டது. இதில், மூன்றாவது இடத்திலிருந்த இந்திய கிரிக்கெட் அணி (119 புள்ளிகள்) ஒரு இடம் பின்தங்கி 4 ஆவது இடத்தைப் பெற்றுள்ளது.

பாகிஸ்தானுக்கு எதிரான டெஸ்ட் தொடரை சமீபத்தில் கைப்பற்றி அசத்திய இலங்கை அணி, 119 புள்ளிகளுடன் மூன்றாவது இடத்துக்கு முன்னேறியுள்ளது. இந்தியா,இலங்கை அணிகள் ஒரே புள்ளிகள் பெற்றிருப்பினும், 0.01 “டெசிமல் ரேட்டிங்’ வேறுபாட்டில் இலங்கை அணி முன்னேற்றம் கண்டுள்ளது.

அவுஸ்திரேலிய அணி (124 புள்ளிகள்) முதலிடத்திலும், தென்னாபிரிக்கா (122 புள்ளிகள்) இரண்டாவது இடத்திலுமுள்ளன.  ஆஷஸ் தொடரின் கடைசி இரண்டு டெஸ்ட் போட்டிகளில், அவுஸ்திரேலிய அணி கட்டாயம் வெற்றி பெற்றாக வேண்டிய நிலையில் உள்ளது. தோற்கும் பட்சத்தில் 2003 ஆம் ஆண்டு முதல், முதலிடத்தில் இருந்துவரும் அவுஸ்திரேலியா தனது பெருமையை இழக்க நேரிடும்.

பத்து இலட்சம் ரூபாய் பெறுமதியான நகைகளுடன் இலங்கையிலிருந்து தப்பிச் செல்ல முற்பட்ட இந்திய பிரஜைகள் இருவரை பொலிஸார் கைது செய்துள்ளனர்.

கட்டுநாயக்க சர்வதேச விமான நிலையத்தில் விசேட பொலிஸ் குழுவொன்றினால் இவர்கள் இருவரும் கைது செய்யப்பட்டுள்ளதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் ரஞ்சித் குணசேகர தெரிவித்தார்.

கஹவத்தை பிரதேசத்தில் சாஸ்திரம் சொல்பவர்கள் என்ற போர்வையில் தங்கியிருந்து பெண்களை ஏமாற்றி அவர்களிடமிருந்து பெற்ற நகைகளுடன் தப்பிச் செல்ல முற்பட்ட இருவர்களே கைது செய்யப்பட்டுள்ளனர் என்று அவர் மேலும் தெரிவித்தார்.

இவர்கள் இருவரும் நாட்டின் ஏனைய பகுதிகளில் இது போன்ற மோசடிகளை செய்துள்ளனரா என்பது தொடர்பான விசாரணைகளை பொலிஸார் மேற்கொண்டு வருகின்றனர்.

பெல்மதுல்ல மஜிஸ்திரேட் முன்னிலையில் ஆஜர்படுத்தப்பட்ட இவர்கள் இருவரையும் எதிர்வரும் 17 ஆம் திகதி வரை விளக்கமறியலில் வைக்குமாறு உத்தரவிட்டுள்ளார்.