17

நாட்டின் பல பகுதிகளில் கனத்த மழை பெய்துவருவதனால் வெள்ள அபாயம் ஏற்பட்டுள்ளதாக அறிவிக்கப்பட்டுள்ளது.

குறிப்பாக இரத்தினபுரி, காலி, மற்றும் களுத்துறை மாவட்டங்களில் வெள்ளம் அதிகரித்துவருவதாக அனர்த்த முகாமைத்துவ மத்திய நிலையம்  அறிவித்துள்ளது. களுகங்கையின் நீர் மட்டம் வேகமாக அதிகரித்து வருவதாகவும் அறிவிக்கப்பட்டுள்ளது. நேற்று மாலை 6:00 மணிக்கு 3 அடிகள் அதிகரித்த நீர் மட்டம் இரவு 11:00 மணிக்கு 18 அடிகள் அதிகரித்தமை அவதானிக்கப்பட்டுள்ளது. இதன் காரணமாக குகுலே கங்கை தேக்கத்தின் கதவுகள் திறந்துவிடப்பட்டுள்ளன.

காலி மாவட்டத்தில் தாழ்ந்த நிலப்பிரதேசங்கள் வெள்ளத்தால் மூடப்பட்டுள்ளதாகவும் இப்பகுதியில் தொடர்ந்தும் மழை பெய்தால் மண்சரிவு ஏற்படும் அபாயம் எதிர்நோக்கப்படுவதாகவும் அறிவிக்கப்பட்டுள்ளது.

100 மீ., ஓட்டத்தில் ஜமைக்காவின் மின்னல் வீரர் உசைன் போல்ட் புதிய உலக சாதனை படைத்துள்ளார். இவர் 9.58 வினாடிகளில் வந்து தனது பழைய சாதனை முறியடித்துள்ளார்.

ஜெர்மனி தலைநகர் பெர்லினில் நேற்று உலக தடகள சாம்பியன்ஷிப் தொடர் நடந்தது. இதில் நடந்த ஆண்களுக்கான 100 மீ., ஓட்டத்தில் மின்னல் வீரர் என்று தடகள ரசிகர்களால் அழைக்கப்படும் ஜமைக்காவின் உசைன் போல்ட், அவரது போட்டியாளர்களாக கருதப்படும் ஜமைக்காவின் அசெபா பாவெல், அமெரிக்காவின் டைசன் கே உள்ளிட்ட முன்னணி வீரர்கள் பங்கேற்றனர்.

கடந்த பீஜிங் ஒலிம்பிக்கில் 9.69 வினாடிகளில் புதிய உலக சாதனை படைத்து தங்கம் வென்ற போல்ட் நேற்றும் அசத்தினார். அவர் 9.58 வினாடிகளில் போட்டி தூரத்தை கடந்து தனது உலக சாதனையை தானே முறியடித்தார்.

டைசன் கே (9.71 வினாடி) வெள்ளியும், அசெபா பாவெல் (9.84 வினாடி) வெண்கலமும் கைப்பற்றினர்.

பங்களா தேசத்துக்கு எதிரான ஒரு நாள் போட்டியில் ஜிம்பாப்வே வீரர் சார்லஸ் கவன்ட்ரி 194 ஓட்டங்கள் எடுத்து பாகிஸ்தான் வீரர் சையத் அன்வரின் உலக சாதனையை சமன் செய்தார். இப்போட்டியில் பங்களாதேசம் 4 விக்கெட் வித்தியாசத்தில் வென்று தொடரை கைப்பற்றியது.

ஜிம்பாப்வே சென்றுள்ள பங்களாதேச அணி ஐந்து போட்டிகள் கொண்ட ஒரு நாள் தொடரில் விளையாடியது. முதல் மூன்று போட்டிகள் முடிவில் வங்கதேசம் 2-1 என முன்னிலை பெற்றது. இந்நிலையில் நான்காவது போட்டி நேற்று புலவாயோ நகரில் நடந்தது.

இதில் ஜிம்பாப்வே முதலில் பேட் செய்தது. ஆரம்ப வீரர் வெர்மூலன் 5 ஒட்டங்களுக்கு ஆட்டமிழந்தார். இதையடுத்து மூன்றாவது வீரராக சார்லஸ் கவன்ட்ரி வந்தார். அதிரடியாக துடுப்பாட்டம் செய்த இவர் வரிசையாக சிக்சர்களும், பவுண்டரிகளுமாக விளாசினார். இவருக்கு மட்சிகின்யெரி (37 ) ஓரளவு ஒத்துழைப்பு கொடுத்தார்.

மற்ற வீரர்கள் சொல்லி கொள்ளும்படி துடுப்பெடுத்து ஆடவில்லை. என்றாலும் கவன்ட்ரி தொடர்ந்து துடுப்பெடுத்தாடி  7 சிக்சர், 16 பவுண்டரி உட்பட 156 பந்தில் 194 ஒட்டங்கள் எடுத்து,  இறுதி வரை ஆட்டமிழக்காமல் இருந்தார்.

இதன்மூலம் ஒரு நாள் போட்டிகளில் அதிக ரன் எடுத்த வீரர் என்ற பாகிஸ்தான் வீரர் சையத் அன்வரின் 12 ஆண்டு கால சாதனையை சமன் செய்தார்.

இதையடுத்து ஜிம்பாப்வே 50 ஓவரி்ல் 8 விக்கெட் இழப்புக்கு 312 ஓட்டங்கள் எடுத்தது.

கடின இலக்கை நோக்கி துடுப்பாட்டம்  செய்த பங்களாதேச அணிக்கு தமிம் இக்பால் சிறந்த ஆரம்பத்தை வழங்கினார். இவர் 154 ஒட்டங்கள்  எடுத்து அணியை வெற்றி பாதை நோக்கி அழைத்து சென்றார். சித்திக் 38, ஹசன் 35, மகமூத்துல்லாஹ் 21 ஓட்டங்கள் எடுத்தனர்.

பங்களாதேசம் 47.5 ஓவரில் 6 விக்கெட் இழப்புக்கு 313 ஓட்டங்கள் எடுத்து 4 விக்கெட் வித்தியாசத்தில் வென்றது. இதையடுத்து பங்களாதேசம் 3-1 என தொடரை கைப்பற்றியது.

மாங் குளத்திலிருந்து கிளிநொச்சி, முல்லைத்தீவு மற்றும் ஓட்டுசுட்டான் வரை யான 100 கிலோ மீட்டர் தூர பிரதேசத்துக்கு தேசிய மின்சார கட்டமைப்பினூடாக மின்சார வசதி அளிக்க நடவடிக்கை எடுத்துள்ளதாக மின்சக்தி எரிசக்தி அமைச்சு கூறியது.

இதற்காக 300 மில்லியன் ரூபா செலவில் மாங்குளம் – கிளிநொச்சி, மாங்குளம் – முல்லைத்தீவு மற்றும் மாங்குளம் – ஓட்டு சுட்டானுக்கிடையில் மின் கோபுரங்கள் அமைக்கும் பணிகள் ஆரம்பிக்கப்பட்டுள்ளதாகவும் அறிவிக்கப்படுகிறது.  இந்தப் பணிகள் 2 மாதத்தினுள் பூர்த்தி செய்யப்படவுள்ளது.

வடக்கிலுள்ள சகல கிராமங்களுக்கும் 2 வருடங்களுக்குள் மின்சார வசதி அளிக்க நடவடிக்கை எடுக்கப்பட்டுள்ளது. வவுனியா – கிளிநொச்சி ஊடாக சுன்னாகம் வரை 132 கிலோ வோர்ட் மின் விநியோகத் திட்ட மொன்றும் ஆரம்பிக்கப்பட்டுள்ளது. இதற்கு ஜப்பான் ஜெய்கா நிறுவனம் நிதி உதவி வழங்கியுள்ளது.

வவுனியாவிலிருந்து ஓமந்தையூடாக மாங் குளம் வரை 3 மின்மாற்றி கோபுரங்கள் அமைக்கவும் மாங்குளத்திலிருந்து 30 கிலோ மீட்டர் தூரத்திற்கு மின் இணைப்பு வழங்கவும் மின்சார சபை நடவடிக்கை எடுத்துள்ளதாகவும் அமைச்சு கூறியது.

இதேவேளை வீதி விளக்குகள் அமைக்கவும் சேதமடைந்த மின் கட்டமைப்புகளை மறுசீரமைக்கவும் நடவடிக்கை எடுக்கப்பட்டுள்ள தாகவும் அறிவிக்கப்படுகிறது.

வடக்கின் மூன்று மாவட்டங்களில் புதிதாக 280 மீன் விற்பனை நிலையங்களை அமைக்க மீன்பிடித் துறை மற்றும் நீரியல்வள அமைச்சு நடவடிக்கை எடுத்துள்ளது. இத்திட்டத்தை செயல்முறைப்படுத்துவதற்காக அமைச்சு 30 மில்லியன் ரூபா நிதியை ஒதுக்கியிருப்பதாக அமைச்சின் செயலாளர் ஜி. பியசேன தெரிவித்தார்.

யாப்பாணம், மன்னார் மற்றும் முல்லைத்தீவு ஆகிய மாவட்டங்களிலேயே இம்மீன் விற்பனை நிலையங்களை அமைக்கும் பணிகள் துரிதப்படுத்தப்பட்டுள்ளன.

வடக்கு மீன்பிடி ‘சீசன்’ ஆரம்பிக்கப்படவுள்ள நிலையில், வட மாகாண மீனவர்களை ஊக்குவிக்கும் வகையில் இம் மீன் விற்பனை நிலையங்களை அமைக்குமாறு மீன்பிடித் துறை அமைச்சர் பீலிக்ஸ் பெரேரா வழங்கிய பணிப்புரைக்கமையவே இச்செயற்திட்டங்கள் நடைமுறைப்படுத்தப்பட்டு வருவதாகவும் அமைச்சின் செயலாளர் கூறினார். வடக்கின் வசந்தம் திட்டத்தின் கீழ் இலங்கை மீன்பிடிக் கூட்டுத்தாபனம் வட மாகாணத்தில் உள்ள மீன்பிடி கூட்டுறவுச் சங்கங்களுடன் இணைந்து அந்தந்த மாவட்டத்துக்கான மீன்பிடி உதவிப் பணிப்பாளர்களின் வழிகாட்டலுடன் இம்மீன் விற்பனை நிலையங்களை அமைத்து வருகின்றன.

இடம்பெயர்ந்துள்ள மக்களனைவரும் மீளக்கூடியமர்த்தப்பட்ட பின்னரும் இம்மீன் விற்பனை நிலையங்கள் நிரந்தரமாக செயற்படுமென தெரிவித்த அமைச்சின் செயலாளர், இவ்விற்பனை நிலையங்களின் எண்ணிக்கையை அதிகரிக்க அமைச்சு பின்னர் நடவடிக்கை எடுக்குமெனவும் கூறினார்.

இதேவேளை வடக்கில் பிடிக்கப்படும் மீன்களில் அம்மாகாணத்தின் நுகர்வுத் தேவை போக எஞ்சியவை கொழும்பு உள்ளிட்ட ஏனைய மாவட்டங்களில் விநியோகிப்பதற்கான நடவடிக்கை முன்னெடுக்கப்படு மெனவும் அமைச்சின் செயலாளர் குறிப்பிட்டார்.

சீகிரிய குன்றை பார்வையிடச் சென்ற உல்லாசப் பிரயாணிகளை குளவிகள் கொட்டியதில் சுமார் 70 பேர் காயமடைந்துள்ளனர். இந்த சம்பவம் நேற்று முன்தினம் (15) நடைபெற்றதாக பொலிஸார் கூறினர்.

காயமடைந்த சுமார் 34 பேர் தொடர்ந்து சிகிரிய ஆஸ்பத்திரியில் அனுமதிக்கப்பட்டுள்ளதாக அறிவிக்கப்படுகிறது.

சிகிரிய குன்றின் மேல் இருந்த பார்வையாளர்களை திடீரென குளவி கொட்டியுள்ளது. இது தொடர்பாக உடனடியாக பாதுகாப்பு தரப்பிற்கு அறிவிக்கப்பட்டது. இதன்படி விமானப் படையினர் ஸ்தலத்துக்கு விரைந்து காயமடைந்த மக்களை பாதுகாப்பான இடங்களுக்கு அழைத்துச் சென்றனர். இதற்கு முன்னரும் பல தடவைகள் சிகிரியாவுக்கு வந்த பார்வையாளர்களை குளவி கொட்டியமை குறிப்பிடத்தக்கது.

வட மாகாணத்தில் செய்கை பண்ணப்படாத அனைத்து விளை நிலங்களையும் விளைச்சல் மிகுந்த பகுதியாக மாற்றுவதற்கான திட்டம் விரைவில் நடைமுறைப்படுத்தப்படவுள்ளதாக வடமாகாண ஆளுநர் மேஜர் ஜெனரல் ஜீ.ஏ.சந்திரசிறி தெரிவித்தார்.

முதற்கட்டமாக யாழ் குடாநாட்டில் வடமராட்சி, தென்மராட்சி உட்பட அனைத்து பகுதிகளிமுலுள்ள விளை நிலங்கள், தரிசு நிலங்கள் தொடர்பான கணக்கெடுப்பொன்றை நடத்தவுள்ளதாகவும், கமநல சேவைகள் திணைக்களத்தின் உதவியுடன் செய்கைகளை மேற்கொள்ளவுள்ளதாகவும் குறிப்பிட்டார்.

தென்மராட்சி பகுதியில் சுமார் 4700 ஏக்கர் விளை நிலம் செய்கை பண்ணப்படாமலுள்ளது என இனங்காணப்பட்டுள்ளது.

வடபகுதியிலுள்ள விவசாயிகள் தமது விளை நிலங்கள் குறித்த தகவல்களை யாழ் அரச அதிபரிடம் சமர்பிக்க வேண்டும் என்றும் வடமாகாண ஆளுநர் கேட்டுக் கொண்டார்.

விளை நிலங்களின் உரிமையாளர்களின் பங்களிப்புடன் கமநல சேவைகள் திணைக்களத்தின் உதவியுடன் அனைத்து விளை நிலங்களும் செய்கை பண்ணப்படும், உரிமையாளர்கள் அல்லாத காணிகள், தரிசு நிலங்கள் கமநல சேவைகள் திணைக்களத்தினாலேயே செய்கை பண்ணப்படும்.

வறண்ட பகுதில் செய்கை பண்ணக்கூடிய மரமுந்திரி போன்ற உப பயிர்களையும் வடமராட்சி பகுதியில் செய்கை பண்ணவும் திட்டமிடப்பட்டுள்ளதாக வடமாகாண ஆளுநர் மேஜர் ஜெனரல் ஜீ.ஏ.சந்திரசிறி தெரிவித்தார்.

இலங் கையின் வடக்கே தொடர்ந்து பெய்து வரும் கனமழை காரணமாக வவுனியா மனிக்பாம் இடைத்தங்கல் முகாமில் தங்க வைக்கப்பட்டுள்ள மக்கள் இன்னும் சிரமங்களை அனுபவித்து வருவதாகத் தெரிவிக்கப்படுகின்றது.

திடீரென பெய்யத் தொடங்கியுள்ள மழை காரணமாக 21 ஆயிரம் பேர் முதலில் பாதிக்கப்பட்டதாகவும் தற்போது நிலைமைகள் கட்டுப்பாட்டினுள் வந்துள்ளதாகவும் அதிகாரிகள் தரப்பில் தெரிவிக்கப்படுகின்றது.

ஆயினும் மழையினால் ஏற்பட்டுள்ள சிரமங்கள் இன்னும் குறையவில்லை என்றே இடைத்தங்கல் முகாம்களில் இருந்து கிடைக்கும் தகவல்கள் தெரிவிக்கின்றன என நேற்றைய பீ.பீ.ஸி செய்தியரங்கத்தில் தெரிவிக்கப்பட்டது

அநுராதபுர மாவட்டத்தின் கடந்த சில தினங்களாக மாலை வேளையில் மழைபெய்ய ஆரம்பித்துள்ளது. கடந்த 13ம் திகதி மாலை ஆரம்பித்த மழை தொடர்ந்தும் மாலை வேளையில் இடிமின்னலுடன் பெய்து வருகிறது.

கடும் காற்றுடன் கூடிய மழை சில இடங்களில் பெய்ததால் பாதிப்புகளும் ஏற்பட்டுள்ளன. அநுராதபுரம் நிவந்தக சேத்திய விகாரைப் பகுதியிலுள்ள மரங்கள் உடைந்து வீழ்ந்ததால் மின் கம்பிகளுக்கும் சேதம் ஏற்பட்டது. இதனால் இவ்வீதி ஊடான போக்குவரத்தும் சில மணித்தியாலங்கள் பாதிக்கப்பட்டன.

தந்திரிமலை பகுதியிலுள்ள குடாஹல் மில்லவெவ, மஹஹல்மில்லவெவ கிராமங்களில் கடும் காற்றினால் பதினைந்து வீடுகள் பலத்த சேதங்களுக்கு உள்ளாகியுள்ளன. மேலும் சுமார் இருபது வீடுகள் சிறு சேதங்களுக்கு உட்பட்டன. உடன்ஸ்தலத்துக்கு விரைந்த பெருந்தெருக்கள் பிரதி அமைச்சர் டப்ளிவ் பீ. ஏக்கநாயக்க மற்றும் மத்திய நுவரகம பகுதியில் பிரதேச செயலாளர் ஜீ.ஏ. கித்சிரி ஆகியோர் சேதமடைந்த வீடுகளைப் பார்வையிட்டதுடன், இவர்களுக்கான நஷ்ட ஈடுகளை வெகு விரைவில் பெற்றுத்தருவதாக வாக்களித்துள்ளனர்.

இது இவ்வாறிருக்க இப்பிரதேச விவசாயிகளுக்கு மகிழ்ச்சியை அளித்துள்ளது. இம்மழையினைத் தொடர்ந்து ரஜரட்ட பகுதி விவசாயிகள் மத்தியில் பீதியை ஏற்படுத்திய காட்டு யானைகளின் தொல்லையும் வெகுவாகக் குறைவடைந்துள்ளதாக பிரதேசவாசிகள் தெரிவிக்கின்றனர்

வவுனியா நிவாரணக் கிராமங்களில் வெள்ளம் வடிந்தோடி வருவதால் நிலைமை வழமைக்குத் திரும்பி வருவதாக மீள்குடியேற்றம் மற்றும் அனர்த்த நிவாரண சேவைகள் அமைச்சர் ரிசாட் பதியுதீன் தெரிவித்தார்.

கூடாரங்களுக்குள் வெள்ளம் வந்தமையால் வேறு இடத்தில் தற்காலிகமாக குடியமர்த்தப்பட்டிருந்த 400 பேரும், நிலைமை வழமைக்கு திரும்பியதையடுத்து அவர்களுடைய கூடாரங்களுக்கு அழைத்துவரப்பட்டதாகவும் அமைச்சர் குறிப்பிட்டார்.

நேற்று முன்தினம் வவுனியாவில் ஓரளவு மழை பெய்ததை தொடர்ந்து நிவாரணக் கிராமங்களில் தங்க வைக்கப்பட்டிருந்த 400 பேர் உடனடியாக வேறொரு பாதுகாப்பான இடத்தில் மீளக்குடியமர்த்தப்பட்டதுடன், அவர்களுக்கான மாற்று ஏற்பாடுகளும் செய்து கொடுக்கப்பட்டிருந்தது.

வவுனியாவில் நேற்று முதல் நிலைமை ஓரளவு வழமைக்கு திரும்பியுள்ளது. இதேவேளை, யு.என்.எச்.சி.ஆர். மற்றும் யுனெப்ஸ் ஆகிய தன்னார்வு தொண்டு அமைப்புகள் ஏற்கனவே தாம் பொறுப்பு எடுத்துக்கொண்ட வகையில் கவழி நீர்கான் தொடர்பான செயற்திட்டங்களை நடைமுறைப்படுத்துவதில் ஏற்பட்ட காலதாமதமும் மழைநீர் தேங்குவதற்கு காரணமாகவிருந்தமையினால் அதனை நிறைவேற்றுவதற்கான வேலைகளை துரிதப்படுத்துமாறு அமைச்சர் ரிசாட் பதியுதீன் குறித்த நிறுவனங்களிடம் வேண்டுகோள் விடுத்துள்ளார்.

இதேவேளை எதிர்காலத்தில் பாரிய மழை பெய்யுமாயின் நிவாரணக் கிராமங்களில் தங்க வைக்கப்பட்டுள்ளோர்க்கு மாற்று வசதிகளை செய்வது தொடர்பான முன்னேற்பாடுகள் குறித்து வவுனியா மாவட்ட அரசாங்க அதிபர் திருமதி சார்ள்ஸ் தலைமையில் விசேட கூட்டங்களும் நடத்தப்பட்டுள்ளன.

இதன்போது மழையின் காரணமாக கூடாரங்கள், மலசலகூடங்கள் மற்றும் சமையல் நடவடிக்கைகளில் ஏற்படும் பாதிப்புகளை தவிர்ப்பதற்காக மாற்று நடவடிக்கைகளை முன்னெடுக்குமாறு அரசாங்க அதிபர், வலயங்களுக்குப் பொறுப்பான தளபதிகள், முகாமையாளர்கள் மற்றும் பாதுகாப்பு அதிகாரிகளுக்கு பணிப்புரை விடுத்துள்ளார்.