September

தேசிய நதிகளை இணைப்பது சுற்று சூழலுக்கு ஆபத்தானது என்று ராகுல் காந்தி கூறியிருப்பதற்கு மதிமுக பொதுச் செயலாளர் வைகேவும், இந்திய கம்யூனிஸ்ட் கட்சியின் மாநிலச் செயலாளர் தா.பாண்டியனும் கடும் கண்டனம் தெரிவித்துள்ளனர். சென்னையில் நிருபர்களிடம் பேசிய காங்கிரஸ்  பொதுச் செயலாளர் ராகுல்காந்தியிடம் தேசிய நதிகளை இணைக்கும் திட்டம், பேப்பரில் மட்டும்தான் உள்ளது. இந்தத் திட்டத்தை செயல்படுத்த எந்த ஒரு முயற்சியும் எடுக்கப்படவில்லையே? என்று நிருபர்கள் கேட்டனர்.

அதற்கு அவர் பதிலளிக்கையில், தேசிய நதிகளை இணைப்பது என்பது மிகப் பெரிய அழிவை ஏற்படுத்தும் யோசனையாகும் என்பது எனது தனிப்பட்ட கருத்து. இது இந்த நாட்டின் சுற்றுப்புற சூழலை மிகவும் ஆபத்தான பாதைக்கு கொண்டு செல்லும் திட்டமாகும். இந்தத் திட்டத்தை தனிப்பட்ட முறையில் நான் ஆதரிக்க மாட்டேன். இயற்கை மிகவும் பலம் வாய்ந்தது. அதற்கு முரணான பெரிய காரியங்களை செயல்படுத்துவது நல்லதல்ல என்றார்.

ஆனால், உங்கள் கூட்டணியில் உள்ள முதல்வர் கருணாநிதி , இத் திட்டத்தை வலியுறுத்துகிறாரே என்று சுட்டிக் காட்டியபோது, இது எனது தனிப்பட்ட கருத்து என்று பதிலளித்தார் ராகுல். மேலும் நீர்ப்பாசனத்துக்காக உள்ளூர் நதிகளை இணைப்பது தவறல்ல. ஆனால் தேசிய அளவில் பெரிய நதிகளை இணைப்பது ஆபத்தானது என்றார்.

ராகுலின் இந்தக் கருத்துக்கு தா.பாண்டியன் கடும் கண்டனம் தெரிவித்துள்ளார். புதுக்கோட்டையில் இன்று நிருபர்களிடம் பேசிய அவர், தேசிய நதிகளை இணைப்பது மிக அவசியமானது. பல நிபுணர்களும் ஆய்வு செய்து தான் தேசிய நதிகளை இணைக்கலாம் என்று கூறியுள்ளனர். நதிகள் இணைப்பு பல நாடுகளிலும் வெற்றிகரமாக செயல்படுத்தப்பட்டுள்ளது. இந்த விஷயத்தில் ராகுல் காந்தி அறியாமையால் பேசுகிறார் என்றார்.

வரலாறு தெரியாத ராகுல்-வை‌கோ:

ராகுலின் பேச்சு மதிமுக பொதுச் செயலாளர் வைகோவும் கண்டனம்  தெரிவித்துள்ளார். சென்னையில் செய்தியாளர்களிடம் பேசிய வைகோ,
நதி நீர் இணைப்புத் திட்டம் என்பது நேரு காலத்திலேயே துவங்கப்பட்டது; முன்னாள் பிரதமர் இந்திரா காலத்திலும் இதற்கான முயற்சிகள் மேற்கொள்ளப்பட்டன. வரலாறு தெரியாமல் பேசும் ராகுலின் பேச்சு வேடிக்கையாக உள்ளது. இலங்கை தமிழர்களை காக்க மத்திய அரசு நடவடிக்கை எடுத்திருப்பதாக ராகுல் கூறியது முற்றிலும் தவறான தகவல் என்றார்.

தென்னா பிரிக்க ஓட்டப் பந்தய வீரங்கனையான காஸ்டர் செமென்யா சூழ்ந்துள்ள அவரது பாலினம் குறித்த சர்ச்சை, அருவருக்கத்தக்க வகையிலும் தார்மீகமற்ற முறையிலும் கையாளப்பட்டுள்ளது என்று தென்னாபிரிக்க விளையாட்டுத்துறை அமைச்சர் கூறியுள்ளார்.

தடகள சம்மேளனங்களின் சர்வதேச அமைப்பின் உத்தரவின் பேரில் நடத்தப்பட்ட சோதனைகள், பெர்லின் சர்வதேச தடகளப் போட்டிகளில் தங்கம் வென்ற செமென்யாவின் உடலுக்குள் ஆண் விரைகள் இருப்பதையும், அவருக்கு சூலகம் இல்லாதிருப்பதையும் காண்பிப்பதாக ஆஸ்திரேலிய ஊடகங்களில் வெளியான செய்திகள் கூறுகின்றன.  ஆனால், இது தொடர்பாக தென்னாபிரிக்காவுக்கு எந்தவிதமான தகவலும் இதுவரை தெரிவிக்கப்படவில்லை என்று தென்னாபிரிக்க அமைச்சர் மக்கென்கெஸி கூறியுள்ளார்.

தோட்டத் தொழிலாளர்களின் ஒத்துழையாமைப் போராட்டம் பத்தாவது நாளாக நேற்றும் தொடர்ந்தது. பெருந்தோட்டப் பகுதிகளில் ஒத்துழையாமைப் போராட்டம் வெற்றிகரமாக முன்னெடுக்கப்பட்டு வருவதாகவும் சில இடங்களில் பெண்கள் வீதியில் இறங்கி ஆர்ப்பாட்டத்தில் ஈடுபட்டதாகவும், சில இடங்களில் கூட்டுப்பிரார்த்தனைகளும், பூஜை வழிபாடுகளும் நடைபெற்றதாகவும் எமது செய்தியாளர்கள் தெரிவித்தனர்.

இதனிடையே தோட்டத் தொழிலாளர்களின் ஒரு நாள் சம்பளத்தை 500 ரூபாவாக அதிகரிப்பு தொடர்பாக முதலாளிமார் சம்மேளனத்திற்கும் தொழிற்சங்கக் கூட்டமைப்புக்கும் இடையே நேற்று முன்தினம் நடைபெற்ற பேச்சுவார்த்தை எதுவித இணக்கப்பாடும் எட்டாத நிலையில் முடிவடைந்தது. இந்நிலையில், எட்டாவது தடவையாக நேற்று முற்பகல் 11.00 மணிக்கு ஆரம்பமாக இருந்த பேச்சுவார்த்தை மாலை 3.30 மணிக்கே ஆரம்பமானதாகவும் பேச்சுவார்த்தை தொடர்வதாகவும் பிரதியமைச்சர் முத்து சிவலிங்கம் தெரிவித்தார்.

பெருந்தோட்டப் பகுதிகளில் தொழிலாளர்களின் ஒத்துழையாமைப் போராட்டம் மிகவும் அமைதியான முறையில் தொடர்ந்து நடைபெற்று வருகிறது. தொழிலாளர்கள் இப்போராட்டத்திற்கு பூரண ஒத்துழைப்பை வழங்கி வருவதாகவும், போராட்டம் வெற்றிபெற வேண்டுமென கோயில்களில் பிரார்த்தனைகளில் ஈடுபட்டு வருவதாகவும் அவர் மேலும் தெரிவித்தார்.

பெருந்தோட்டத் தொழிலாளர்களின் சம்பள உயர்வு தொடர்பாக முதலாளிமார் சம்மேளனத்திற்கும் தொழிற்சங்கக் கூட்டமைப்புக்கும் இடையே இரண்டு வருடங்களுக்கு ஒரு தடவை செய்து கொள்ளப்படுகிறது. தொழிலாளர்களின் சம்பளம் உட்பட அவர்களின் சேமநலன்கள் தொடர்பாக செய்து கொள்ளப்படும் இவ் ஒப்பந்தம் புதுப்பிக்கப்படுவதுடன் சம்பள உயர்வும் வழங்கப்பட்டு வருகிறது.

கடந்த மார்ச் மாதத்துடன் காலாவதியான இந்த கூட்டு ஒப்பந்தத்தை புதுப்பிக்கவும் தொழிலாளர்களுக்கு நியாயமான சம்பள உயர்வைப் பெற்றுக்கொடுக்கவும் முதலாளிமார் சம்மேளனத்துடன் பேச்சுவார்த்தையை ஆரம்பித்தோம். ஆரம்ப கட்டப் பேச்சுகளில் அவர்கள் முதலாம் ஆண்டில் 330 ரூபாவும், இரண்டாம் ஆண்டில் 360 ரூபாவையும் தருவதாகத் தெரிவித்தனர். எனினும் எமது கோரிக்கைக்கு முதலாளிமார் சம்மேளனம் இணங்காமல் இருப்பதால் ஒத்துழையாமை போராட்டத்தைத் தொடர்ந்து முன்னெடுத்து வருவதாக இ. தே. தோட்டத் தொழிலாளர் சங்கத்தின் பொதுச் செயலாளர் கே. வேலாயுதம் தெரிவித்தார்.

சர்வாதி காரி ஹிட்லர் பெண் ஒருவருடன் பாலியல் நடவடிக்கைகளில் ஈடுபடுவதை சித்திரிக்கும் புதிய ஜேர்மனிய எயிட்ஸ் விளம்பரம் ஒன்று, ஐரோப்பா எங்கும் பெரும் சர்ச்சையை ஏற்படுத்தியுள்ளது. அத்துடன் மேற்படி விளம்பரமானது ஜோசப் ஸ்டாலின், சதாம் ஹுசைன் ஆகியோர் பாலியல் நடவடிக்கையில் ஈடுபடுவதை சித்திரிக்கும் காட்சிகளையும் உள்ளடக்கியுள்ளது.

இந் நிலையில் இன ரீதியான வெறுப்புணர்வை பிரதிபலிக்கும் இந்த விளம்பரத்துக்கு ஐரோப்பா எங்குமுள்ள ‘எயிட்ஸ்’ விழிப்புணர்வு தொண்டர் ஸ்தாபனங்கள் கடும் கண்டனம் தெரிவித்துள்ளன. ‘எயிட்ஸ் என்பது ஒரு மக்கள் கொலையாளி’ என்ற தலைப்பில் ஆங்கிலம் ஜேர்மன், மற்றும் ஸ்பானிய மொழிகளில் தயாரிக்கப்பட்டுள்ள இந்த விளம்பரம், எதிர்வரும் வாரம் தொலைக்காட்சிகளில் காண்பிக்கப்படவுள்ளது.

இந்த விளம்பரமானது எயிட்ஸ் நோயால் பாதிக்கப்பட்டவர்களின் உணர்வுகளை அலட்சியப்படுத்துவதாக உள்ளதாகவும் தமக்கு எயிட்ஸ் நோய் உள்ளதா என பரிசோதிப்பதற்கு வெட்கப்பட்டு பின்வாங்கும் நிலையை மக்கள் மத்தியில் தோற்றுவிப்பதாக உள்ளதாகவும் பிரித்தானியாவை அடிப்படையாக கொண்டு செயற்பட்டு வரும் எயிட்ஸ் விழிப்புணர்வு தொண்டர் ஸ்தாபனமான ‘ரெரன்ஸ் ஹைக்கின் டிரஸ்ட்’ குற்றஞ்சாட்டியுள்ளது.

இது தொடர்பில் மேற்படி விளம்பரத்தை தயாரித்த டாஸ் கொமிட்டி முகவர் நிலையத்தின் ஆக்க பணிப்பாளர் டிர்க் சில்ஸ் விபரிக்கையில், “இந்த விளம்பரமானது மக்களை அதிர்ச்சியடையச் செய்து ‘எயிட்ஸ் எச்சரிக்கை’ தொடர்பில் அவர்களது கவனத்தைத் திசை திருப்புவதை நோக்காகக் கொண்டுள்ளது” எனத் தெரிவித்தார்.

ராஜீவ் காந்தி கொலை வழக்கில் கடந்த 18 வருடங்களாக சிறைத் தண்டனை அனுபவித்து வரும் நளினி,  பாதிக்கப்பட்ட குடும்பமே மன்னித்துள்ள நிலையில், தன்னை விடுதலை செய்ய வேண்டும் எனக் கோரி சென்னை உயர்நீதிமன்றில் மனு தாக்கல் செய்துள்ளார். நளினி தாக்கல் செய்துள்ள மனுவில் கூறி இருப்பதாவது:

ராஜீவ் காந்தி கொலை வழக்கில் ஆயுள் தண்டனை கைதியாக வேலூர் பெண்கள் சிறையில் அடைக்கப்பட்டுள்ளேன். கடந்த 18 வருடமாக நான் சிறையில் உள்ளேன்.

இதற்கிடையே 14 ஆண்டுகள் முடிந்த பிறகு ஆயுள் தண்டனை கைதியான என்னை விடுதலை செய்யவேண்டும் என்று சென்னை உயர்நீதிமன்றில்  வழக்கு தொடர்ந்தேன். ஆனால் எனது விடுதலை குறித்து மறு ஆய்வு செய்யும்படி ஆலோசனை வாரியத்திற்கு உயர்நீதிமன்றம் உத்தரவிட்டது.

மேலும் ஆயுள் கைதிகளுக்கான ஆலோசனை வாரியத்தை மறுசீரமைப்பு செய்யும்படி உத்தரவிட்டது. இந்த உத்தரவு பிறப்பித்து ஒரு வருடமாகியும் எந்த நடவடிக்கையும் எடுக்கப்பட வில்லை. என்னை விடுதலை செய்யவும் இல்லை. நான் ஏற்கனவே சோனியாகாந்திக்கு இது குறித்து கோரிக்கை மனு அனுப்பியுள்ளேன்.

இதற்கிடையே ராஜீவ்காந்தியின் மகள் பிரியங்கா என்னை வேலூர் சிறையில் நேரில் சந்தித்தார். அப்போது நடந்த சம்பவங்களை மறந்து என்னை மன்னித்து விட்டதாக கூறினார். பாதிக்கப்பட்ட குடும்பமே என்னை மன்னித்துள்ள நிலையில் விடுதலை செய்ய மறுக்கின்றனர்.  43 வயதான எனக்கு 18 ஆண்டுகள் சிறை வாழ்க்கை கழிந்து விட்டது. எனவே ஆலோசனை வாரியம் நியமிக்க வேண்டும் என்ற நீதிமன்ற உத்தரவை அமுல் படுத்த வேண்டும். என்னை முன் கூட்டியே விடுதலை செய்ய வேண்டும் என்று நளினி தனது மனுவில் கூறியுள்ளார்.

இந்த மனு மீதான விசாரணை எதிர்வரும் 14 ம் திகதி திங்கட்கிழமை நடைபெறவுள்ளது

எதிர்க் கட்சியின் தலைவர் ரணில் விக்கிரமசிங்கவின் தலைமையில் எதிர்வரும் ஒரு மாதத்திற்குள் எதிர்க்கட்சி கூட்டமைப்பு அமைக்கப்படவுள்ளதாக ஸ்ரீலங்கா சுதந்திர கட்சியின் மக்கள் பிரிவு ஏற்பாட்டாளர் மங்கள சமரவீர தெரிவித்துள்ளார்.  இந்த கூட்டமைப்பே அடுத்த பொதுத்தேர்தலில் போட்டியிடும் என அவர் குறிப்பிட்டுள்ளார். தற்போதைய அரசாங்கத்தை தோற்கடிக்கும் நோக்கிலேயே இந்த கூட்டமைப்பு உருவாக்கப்படவுள்ளதாக அவர் குறிப்பிட்டுள்ளார்.

இதேவேளை, ஜே வி பி இந்த கூட்டமைப்புக்குள் இணைத்துக்கொள்ளப்படமாட்டாது என அவர் தெரிவித்துள்ளார். இதே மங்கள சமரவீர 2000 ஆம் ஆண்டுக் காலப்பகுதியில் ஜனாதிபதி சந்திரிகாவுடன் ஜே.வி.பி கூட்டு சேர்வதற்கு முன்னிலை வகித்தார் என்பது குறிப்பிடத்தக்கது.  

சனல் 4 தொலைக்காட்சி புலிகளுக்கு ஆதரவாக செயற்பட்டதுடன் சீ.என்.என்., பி.பி. சி. மற்றும் அல் ஜசீரா ஊடகங்களின் ஊடகவியலாளர்கள் புலிகளிடமிருந்து பணம் பெற்றுள்ளமை இன்று வெளியாகி இருக்கின்றது என்று அமைச்சர் மஹிந்த அமரவீர நேற்று சபையில் தெவித்தார். பாராளுமன்றத்தில் நேற்று வெள்ளிக்கிழமை கொண்டு வரப்பட்ட “”சனல் 4” தொலைக்காட்சி விவகாரம் தொடர்பான சபை ஒத்திவைப்பு வேளை பிரேரணையை வழிமொழிந்து உரையாற்றுகையிலேயே அமைச்சர் இவ்வாறு தெவித்தார்.

அவர் இங்கு மேலும் கூறுகையில், “”சனல் 4” வீடியோ காட்சி தொடர்பிலான அனைத்து கட்ட நடவடிக்கைகளையும் அரசாங்கம் மேற்கொண்டு வருகின்றது. தமிழீழ விடுதலைப் புலிகளுக்காக குரல் கொடுத்திருக்கும் அந்தத் தொலைக்காட்சியில் வெளிப்படுத்தப்பட்ட காட்சிகள் உண்மையற்றதும் போலித் தயாரிப்புகளால் ஆனதுமாகும்.

பயங்கரவாதத்தை முறியடிக்கும் வகையில் இடம்பெற்ற இறுதிக் கட்டப் போரை தடுப்பதற்கும் அதன் மூலம் பிரபாகரனை பாதுகாப்பதற்கும் சர்வதேசம் பல்வேறு முயற்சிகளை மேற்கொண்டது. தற்போது பயங்கரவாதம் முறியடிக்கப்பட்டுள்ள நிலையில் இம்மாதியான போலித் தயாரிப்புகளை வெளிப்படுத்தி அரசுக்கு களங்கத்தை விளைவிக்க முற்பட்டிருக்கின்றது. இது உண்மைக்குப் புறம்பானது என்பதை நிரூபித்துக் காட்டிய பின்னரும் அதன் பொறுப்பை குறித்த நிறுவனம் ஏற்க மறுக்கின்றது.

குறித்த வீடியோ காட்சி “”சனல் 4” நிறுவனத்துக்கு கிடைக்கப் பெற்றதாலேயே ஒளிபரப்பியதாக அந்த நிறுவனம் கூறுகின்றது. ஆனால், அது எங்கிருந்து கிடைக்கப் பெற்றது என்ற தகவலை வெளியிட மறுக்கின்றது.  குறிப்பிட்ட வீடியோ காட்சியில் சுடப்படுபவர் சிங்களத்தில் பேசுகின்ற அதேவேளை துப்பாக்கிதாரியாக சித்தரிக்கப்பட்டிருப்பவர் தமிழில் பேசுகிறார். இது போன்ற பல்வேறு குழப்பங்கள் அதில் அடங்கியுள்ளன. இந்தக் காட்சி பொய்யென நிரூபிக்கப்பட்டதன் பின்னர் அந் நிறுவனத்தின் நம்பிக்கை இழக்கப்பட்டுள்ளது.

“”சனல் 4” இன் முயற்சியானது ஜனாதிபதி மஹிந்த ராஜபக்ஷவின் முப்படைத் தளபதிகளும் யுத்தக் குற்றவாளிகள் என்று சித்தரிப்பதற்கானதாகும் என்றார்.

இந்தி யாவின் உத்திரப் பிரதேச மாநில முதல்வர் மாயாவதி மற்றும் அவருடைய முன்னோடிகளாக கருதப்படும் தாழ்த்தப்பட்ட மக்களின் நலனுக்காக போராடிய தலைவர்களின் சிலைகளை அமைக்கும் பணியை மாநில அரசாங்கம் நிறுத்த வேண்டுமென இந்தியாவின் உச்ச நீதிமன்றம் உத்தரவிட்டுள்ளது. சிலைகள் அமைக்கப்பட்டுவரும் நினைவகங்களில் கட்டிடப் பணிகள் இன்று வெள்ளிக்கிழமை மாலையோடு நிறுத்தப்பட வேண்டும் என நீதிமன்றம் தெரிவித்தது.

கட்டிடப்பணி நிறுத்தப்படும் என்று கடந்த செவ்வாய்க்கிழமை அன்று மாநில அரசாங்கம் உத்திரவாதம் வழங்கியிருந்தும் பணி நிறுத்தப்பட்டிருக்கவில்லை என்று நீதிமன்றம் தெரிவித்திருந்தது. தலித் சமூகத்தை சேர்ந்தவரான முதல்வர் மாயாவதி, தற்பெருமைக்காக அளவுக்கதிகமாக செலவுசெய்து சிலைகளை அமைக்கிறார் என்று விமர்சகர்கள் கூறுகின்றனர்.

விசா விண்ணப்பங்களை கையாள்வதில் அரசியல் பாரபட்சம் காண்பிக்கப்படுவதாக அண்மையில் பத்திரிகைகளில் வெளியான செய்திகளுக்கு பதிலளிக்கு முகமாக பிரிட்டிஷ் பதில் உயர்ஸ்தானிகர் மார்க் கூசிங் பத்திரிகை அறிக்கை ஒன்றை வெளியிட்டுள்ளார்.

இந்த அறிக்கையில் எந்தவொரு சம்பவம் குறித்தோ அரசியல் பாரபட்ச குற்றச்சாட்டுபற்றியோ நேரடியாக எதுவும் குறிப்பிடப்படாத போதிலும், பதவியிலிருந்து விலகும் வெளிவிவகாரச் செயலாளர் கலாநிதி பாலித கோஹனவுக்கு கொழும்பிலுள்ள பிரிட்டிஷ் உயர் ஸ்தானிகராலயம் விசா வழங்க மறுத்துவிட்டது என்ற செய்தி வெளியான மறுநாளே இந்த பத்திரிகை அறிக்கை வெளியிடப்பட்டுள்ளமை குறிப்பிடத்தக்கது. பிரிட்டிஷ் உயர்ஸ்தானிகராலயம் வெளியிட்டுள்ள அறிக்கையில் மேலும் தெரிவிக்கப்பட்டுள்ளதாவது:

எங்கள் விசா வழங்கல் நடைமுறைகளில் பாரபட்சம் காண்பிக்கப்படுவதாகத் தெரிவிக்கப்பட்டுள்ள கருத்துக்கள் எதுவித ஆதாரமும் அற்றவை. தனிப்பட்ட விசா விண்ணப்பங்கள் குறித்து நாங்கள் கருத்துத் தெரிவிப்பதில்லை. ஆனால், பல விண்ணப்பங்கள் குறித்து வெளியான விபரங்கள் முற்றுமுழுதாகத் தவறானவை. இலங்கையிலிருந்து வருவோரை பிரிட்டன் வரவேற்கிறது. ஒரு மாதத்தில் 1,000 க்கும் அதிகமான இலங்கையர்கள் பிரிட்டனுக்கு விஜயம் செய்ய நாம் விசாக்களை வழங்குகிறோம். கொழும்பில் சமர்ப்பிக்கப்படும் விண்ணப்பங்களில் பெரும்பாலானவற்றுக்கு நாம் விசா வழங்குகிறோம். இலங்கையிலிருந்தும் ஏனைய நாடுகளிலிருந்தும் விசா கோரி விண்ணப்பிக்கும் சிரேஷ்ட அரசியல்வாதிகளுக்கும் உத்தியோகத்தர்களுக்கும் நாம் துரிதமாகவே விசாக்களை வழங்குகிறோம். பிரிட்டிஷ் குடிவரவு விதிகளுக்கு அமையவே நாம் இந்த விசாக்களை வழங்குகிறோம். அதாவது, உதாரணமாக, தனிப்பட்ட விஜயங்களுக்கு இலவச விசாக்களை எம்மால் வழங்கமுடியாது. முக்கிய புள்ளிகளின் சகல விஜயங்களையும் பொறுத்த வரையில், சுமுகமான சேவையை உறுதிப்படுத்தும் முயற்சியில், உயர்ஸ்தானிகராலயம் வெளிவிவகார அமைச்சுடன் நெருங்கி செயற்படுகிறது. இந்த ஒத்துழைப்பை மேலும் தொடரவே நாம் விரும்புகிறோம்.

விசா வழங்கல் நடைமுறை:

இலங்கை விசாக்களுக்கான தற்போதைய நடைமுறை நேரங்கள்:

மாணவர்கள்: 10 வேலை நாட்கள் குடியமர்வு அல்லாதவை (ஏனையவை) : 10 வேலை நாட்கள் குடியமர்வு: 42 வேலை நாட்கள் விண்ணப்பதாரர்கள் அவர்களது விண்ணப்பங்களை பூர்த்திசெய்து, குறிப்பாக விசா அதிகமாக கோரப்படும் காலங்களில் விசாக்களை விநியோகிக்க போதிய அளவு கால அவகாசத்தை எமக்கு வழங்கவேண்டும். பிரயாணம் செய்யத் திட்டமிட்டுள்ள தினத்திற்கு 3 மாதங்கள் வரை முன்னதாகவே விண்ணப்பத்தை சமர்ப்பிப்பது உசிதமானது என்று தெரிவிக்கப்பட்டுள்ளது.

புதிய தேசிய போக்குவரத்துக் கொள்கையொன்றை அடுத்த வாரம் அமைச்சரவையில் சமர்ப்பிக்கவுள்ளதாக பயணிகள் போக்குவரத்து அமைச்சர் லசந்த அழகியவன்ன பாராளுமன்றத்தில் தெரிவித்தார்.

பாராளுமன்றத்தில் நேற்று இதுதொடர்பில் கருத்துத் தெரிவித்த அமைச்சர், அமைச்சரவையின் அங்கீகாரத்துடன் அதனைப் பாராளுமன்றத்திற்குக் கொண்டு வந்து நிறைவேற்றவும் நடவடிக்கை எடுக்கப்படுமென தெரிவித்தார்.

பாராளுமன்றம் நேற்றுக்காலை 9.30 மணிக்கு சபாநாயகர் டபிள்யூ. ஜே. எம். லொக்குபண்டாரவின் தலைமையில் கூடியது. வழமையான நடவடிக்கைகளுக்குப்பின் வாய் மூல விடைக்கான வினாக்கள் வேளையின் போது ஜே. வி. பி. எம். பி. ரணவீர பதிரண எழுப்பிய கேள்வியொன்றுக்குப் பதிலளிக்கும் போதே அமைச்சர் இதனைத் தெரிவித்தார்.

அமைச்சர் இதுதொடர்பில் மேலும் தெரிவிக்கையில்:- மேல் மாகாணத்தில் வாகன நெரிசல்களைத் தவிர்ப்பதற்காக ‘சிட்டிலிங்’ சேவை எனும் பஸ் சேவையொன்று ஆரம்பிக்கப்பட்டுள்ளது. இதன் முதற்கட்டமாக காலி வீதியூடாக கொழும்புக்குள் பிரவேசிக்கும் தனியார் வாகனங்கள் மொரட்டுவையில் தமது வாகனங்களை நிறுத்திவிட்டு அங்கிருந்து எமது பஸ் சேவையை உபயோகப்படுத்த முடியும்.

முச்சக்கரவண்டி சேவை தொடர்பில் எடுத்துள்ள பிரச்சினைகளுக்குத் தீர்வு காணும்வகையில் அதற்கான தனியான நிறுவனமொன்றை அமைத்து செயற்படுவது அவசியம். தற்போது நாடளாவிய ரீதியில் நான்கு இலட்சத்து இருபதினாயிரம் முச்சக்கரவண்டிகள் உள்ளன. இதற்கு முறையான நிர்வாகம் ஒன்று தேவை எனவும் அமைச்சர் தெரிவித்தார்.