September

மவுசகலை, கித்துள்கலை, யட்டியந்தோட்ட மற்றும் அவிசாவளை ஆகிய பகுதிகளில் கடந்த இரு நாட்களாக பெய்த கடும் மழை காரணமாக மவுசகலை அணைக்கட்டின் மதகு திறந்து விடப்பட்டுள்ளது.

மத்திய மாகாணத்தில் நிலவும் மோசமான காலநிலை காரணமாக வெள்ள அபாயம் உள்ளதாக அனர்த்த முகாமைத்துவ நிலையம் இன்று காலை எச்சரிக்கை விடுத்துள்ளது. மேற்படிப் பிரதேசங்களைச் சேர்ந்த மக்கள் அவதானமாக இருக்கும்படியும் வேண்டுகோள் விடுக்கப்பட்டுள்ளது.

உலக அளவில் பன்றிக் காய்ச்சலால் இதுவரை 2.5 லட்சம் பேர் பாதிக்கப்பட்டுள்ளனர் என, உலக சுகாதார நிறுவனம் தெரிவித்துள்ளது.

உலகம் முழுவதும் உள்ள பரிசோதனைக் கூடங்களில் மேற்கொள்ளப்பட்ட ஆய்வின் படி, 2.5 லட்சம் பேர் இந்த நோயால் பாதிக்கப்பட்டுள்ளதுடன் இதுவரை, 2,840 பேர் உயிரிழந்துள்ளதாக உலக சுகாதார நிறுவனத்தின் அதிகாரியான கிரிகோரி ஹர்டல் தெரிவித்துள்ளார்.

பன்றிக் காய்ச்சலுக்கு காரணமான வைரஸ் வேகமாக பரவி வருவதே இதற்கு முக்கிய காரணம். தெற்கு மற்றும் தென்கிழக்கு ஆசிய நாடுகளில் குறிப்பாக,  இந்தியா, வங்கதேசம், மியன்மர்,தாய்லாந்து, கம்போடியாää இலங்கை மற்றும் இந்தோனேசியாவில் அதிகமானோர் பாதிக்கப்பட்டுள்ளனர் என அவர் மேலும் குறிப்பிட்டுள்ளார்;.

வங்காள விரிகுடாவில் ஏற்பட்ட குறைந்த அளவிலான பவன அமுக்கத்தின் விளைவாக சில தினங்களாக மன்னாரில் கடும் சூறைகாற்று வீசி வருகின்றது.

இதனால் மன்னார் மக்களின் அன்றாட வேலைகள் பாதிக்கப்பட்டுள்ளது.இதன் விளைவாக அடிக்கடி மின் தடங்கல் ஏற்பட்டு வருகின்றது. மரங்கள் சரிந்து கிடக்கின்றன. தோட்டங்களில் உள்ள வாழை, முருங்கை மரங்கள் முறிந்து விழுந்துள்ளன. சூரைக்காற்றுடன் மண் புழுதியும் கிளம்புவதால் மக்கள் வீதிகளில் நடமாட முடியாத நிலையும் ஏற்பட்டுள்ளது

தமிழ்த் தேசியக் கூட்டமைப்பின் 7 பேர் கொண்ட உயர் மட்டக் குழு இன்று திங்கட்கிழமை மாலை 4.30 மணியளவில் ஜனாதிபதி மஹிந்த ராஜபக்ஷவை சந்திக்கவுள்ளது. இதன்போது பிரதானமான ஐந்து விடயங்கள் குறித்து கலந்துரையாடுவதென கூட்டமைப்பினர் முடிவு செய்துள்ளதாக தெரிவிக்கப்பட்டுள்ளது.  தமிழ்த் தேசியக் கூட்டமைப்பின் தலைவர் சம்பந்தன் தலைமையில் மாவை சேனாதிராஜா, சுரேஷ் பிரேமச்சந்திரன், ஸ்ரீகாந்தா, இமாம், தங்கேஸ்வரி மற்றும் சிவசக்தி ஆனந்தன் ஆகியோரே இன்று ஜனாதிபதியை சந்திக்கவுள்ளனர்.

இச்சந்திப்பின்போது வன்னி அகதிகளின் மீள் குடியமர்வுப் பிரச்சினைக்கு முதலிடம் அளிக்கப்படும் என்றும் இனப் பிரச்சினைத் தீர்வுக்கான இலங்கை அரசின் உத்தேசத் திட்டத்தை மேலும் காலதாமதப்படுத்தாமல் உடனடியாக முன்வைக்குமாறும் வலியுறுத்தப்படும் என்றும் தமிழத்தேசியக் கூட்டமைப்பு வட்டாரங்கள் தெரிவித்தன.

கிளிநொச்சி, முல்லைத்தீவு மாவட்டங்களில நிலக்கண்ணிவெடிகள் புதைக்கப்படாத இடங்களில் மக்களை பகுதி பகுதியாக மீள்குடியேற்றம் செய்யவேண்டும். அங்கு அவர்களுக்கு தற்காலிகமான இருப்பிடங்களை அமைத்துக் கொடுப்பதன் மூலமாக அம் மக்களுக்கு ஓரளவு நிம்மதி ஏற்படுத்தப்படும் என்றும் ஜனாதிபதியிடம் தமிழ்க் கூட்டமைப்பு வலியுறுத்தவுள்ளது.

வன்னி மக்களின் மீளக்குடியமர்வைத் துரிதப்படுத்துதல்,
1990 இல் யாழ்ப்பாணத்தில் இருந்து வெளியேற்றப்பட்ட முஸ்லிம் மக்களின் மீள் குடியேற்றம், சிறைச்சாலைகளில் உள்ள தமிழ் அரசியல் கைதிகளின் விவகாரம், வடக்குக் கிழக்கில் நடைபெற்றுவரும் அத்துமீறிய குடியேற்றம் வடக்குக் கிழக்கில் அதி உயர் பாதுகாப்பு வலயம் காரணமாக இடம்பெயர்ந்த மக்களை சொந்த இடங்களில் குடியமர்த்துவது ஜனாதிபதியுடனான சந்திப்பில் பிரதானமாக கலந்துரையாடுவதென நேற்று முன்தினம் நடைபெற்ற கூட்டமைப்பின் நாடாளுமன்ற உறுப்பினர்கள் கூட்டத்தில் முடிவு செய்யப்பட்டது தெரிந்ததே.

இதேவேளை, முகாம்களில் தடுத்து வைக்கப்பட்டிருக்கும் மக்களுக்கு ஒரு நபருக்கு ஒரு தடவையில் 20 லீற்றர் தண்ணீர் மட்டுமே வழங்கப்படுகிறது. அடுத்த 20 லீற்றர் தண்ணீரும் மூன்று நாட்களுக்குப் பின்னர், அதுவும் வரிசையில் நின்றே பெறவேண்டும். முகாம்களிலுள்ள பல்கலைக்கழக மாணவர்களுக்கு இதுவரை பல்கலை அனுமதி கிடைக்கவில்லை.

முகாம்களிலிருந்து வேறுபடுத்தப்பட்டிருக்கும் முன்னாள் போராளிகளுக்கு எந்தவித கல்விச் செயற்பாடுகளும் நிவர்த்தி செய்யப்படவில்லை போன்ற விடயங்கள் ஜனாதிபதியிடம் தமிழ்த் தேசியக் கூட்டமைப்பினரால் சுட்டிக்காட்டப்படும் என்றும் தெரிவிக்கப்படுகிறது.

இங்கி லாந்துக்கு எதிரான 2வது ஒருநாள் போட்டியில் ஆஸ்ட்ரேலிய அணி 39 ஓட்டங்கள் வித்தியாசத்தில் வெற்றி பெற்றுள்ளது. இதன் மூலம் 7 போட்டிகள் கொண்ட நாட்-வெஸ்ட் தொடரில் 2-0 என்ற போட்டிக் கணக்கில் ஆஸ்ட்ரேலியா முன்னிலை பெற்றுள்ளது.

இங்கிலாந்து- ஆஸ்திரேலிய கிரிக்கெட் அணிகள் இடையிலான 2-வது ஒரு நாள் போட்டி லண்டன் லார்ட்ஸ் மைதானத்தில் நேற்று நடந்தது. இதில் முதலில் பேட் செய்த ஆஸ்திரேலிய அணி நிர்ணயிக்கப்பட்ட 50 ஓவர்களில் 8 விக்கெட் இழப்புக்கு 249 ஓட்டங்கள் சேர்த்தது.

பெர்குசன் 55 ஓட்டங்களும், கேமரூன் ஒயிட் 42 ஓட்டங்களும், வாட்சன் 34 ஓட்டங்களும் எடுத்தனர். இறுதிகட்டத்தில் அதிரடியாக விளையாடிய மிட்செல் ஜான்சன் 23 பந்துகளில் 43 ஓட்டங்கள் எடுத்தார்.

வெற்றி பெற 250 ஓட்டங்கள் என்ற இலக்குடன் களமிறங்கிய இங்கிலாந்து அணிக்கு ஸ்டிராஸ் (47 ஓட்டங்கள்), ரவி போபரா (27 ஓட்டங்கள்) இணை முதல் விக்கெட்டுக்கு 74 ஓட்டங்கள் சேர்த்து சிறப்பான தொடக்கத்தை அமைத்துக் கொடுத்தது.

ஆனால் அடுத்து விளையாடிய வீரர்கள் ஆஸ்ட்ரேலிய பந்து வீச்சை எதிர்கொள்ள முடியாமல் சொற்ப ஓட்டங்களில் ஆட்டமிழந்ததால் இங்கிலாந்து அணி சரிவுக்குள்ளானது. காலிங்வுட் இறுதி வரை போராடியும் பலன் கிடைக்கவில்லை.

கடைசி விக்கெட்டாக காலிங்வுட் (56 ஓட்டங்கள்) பிரெட்லீ பந்து வீச்சில் போல்டு ஆக,  இங்கிலாந்து அணி 46.1 ஓவர்களில் 210 ஓட்டங்களுக்கு ஆல்-அவுட் ஆனது.  இதன்மூலம் 39 ஓட்டங்கள் வித்தியாசத்தில் ஆஸ்திரேலியா வெற்றி பெற்றது.

ஆஸ்ட்ரேலியா தரப்பில் பிரெட்லீ, பிராக்கன், ஜான்சன், வாட்சன் தலா 2 விக்கெட்டுகள் கைப்பற்றினர்.

இரு அணிகளுக்கும் இடையிலான 3-வது ஒரு நாள் போட்டி வரும் 9ஆம் தேதி நடக்கிறது.

பிலிப் பைன்ஸ் அருகே சுப்பர் பெர்ரி- 9 என்ற பயணிகள் படகு கடலில் மூழ்கியதில் அதில் பயணம் செய்த 968 பேரில் 58 பேரைக் காணவில்லை. 10 பேர் சடலமாக மீட்கப்பட்டுள்ளதுடன் 900 பேர் உயிருடன் மீட்கப்பட்டுள்ளனர். உயிரிழந்தவர்களின் எண்ணிக்கை 60ஐத் தாண்டும் என அஞ்சப்படுகிறது.

சாண்டோஸ் பகுதியில் இருந்து இலாய்லோ நோக்கி சுப்பர் பெர்ரி பயணிகள் படகு புறப்பட்டது. பயணிகள் மற்றும்; ஊழியர்கள் உள்பட ஆயிரம் பேர் இந்தக்கப்பலில் பயணித்தனர். பிலிப்பைன்ஸ் தலைநகர் மணிலா அருகே ஷாம்போங்கா அருகே (மணிலாவில் இருந்து 860 கி. மீட்டர் தொலைவில்) கப்பல் திடீரென மூழ்க துவங்கியது.

அதிகாலை நேரம் படகு மூழ்க ஆரம்பித்தது. உடன் படையினருக்கு தகவல் தெரிவிக்கப்பட்டது. இதனையடுத்து கடற்; படையினர்,  விமான படையினர், வர்த்தக கப்பல், மற்றும் மீனவர்கள் படகு உள்ளிட்டோர் சம்பவ இடத்திற்கு விரைந்தனர்.

உயிருக்கு போராடியவர்கள் மீட்கப்பட்டு கரைக்கு கொண்டு வரப்பட்டனர். 900 பேர் மீட்கப்பட்டுள்ளதாக செய்திகள் தெரிவிக்கின்றன. இந்த விபத்தில் இறந்த 10 உடல்கள் மட்டுமே மீட்கப்பட்டுள்ளன. ஏனையயோர் கடலில் மூழ்கி இருக்கலாம் என அஞ்சப்படுகிறது. 

ருகுணு குமாரி ரயில், தண்டவாளத்தை விட்டு விலகிச் சென்றதையடுத்து மாத்தறை – அகங்கம இடையிலான ரயில் சேவைகள் பாதிக்கப்பட்டுள்ளதாக ரயிவே கட்டுப்பாட்டுப் பகுதி தெரிவித்துள்ளது

தென் கிழக்காசியப் பிராந்திய நாடுகளின் சுகாதார அமைச்சர்கள் கலந்துகொள்ளும் 27ஆவது மாநாடு இன்று நேபாளத்தின் கத்மாண்டு நகரில் ஆரம்பமாகவுள்ளது. இரண்டு நாட்களுக்கு நடைபெறவுள்ள இந்த மாநாட்டில் கலந்துகொள்வதற்காக கடந்த வெள்ளிக்கிழமை அங்கு விஜயம் செய்த இலங்கையின் சுகாதார அமைச்சர் நிமல் சிறிபால டி சில்வா மாநாட்டில் விசேட உரையாற்றவுள்ளதாக உலக சுகாதார ஸ்தாபனம் தெரிவித்துள்ளது.

இதேவேளை,  நேபாளத்தில் நாளை ஆரம்பமாகவுள்ள உலக சுகாதார ஸ்தாபனத்தின் தென்கிழக்காசியப் பிராந்தியக் குழுவின் 62ஆவது அமர்விலும் அமைச்சர் நிமல் சிறிபால பங்கேற்கவுள்ளார். இந்த இரு நிகழ்வுகளினதும் இணை அங்குரார்ப்பண வைபவம் கத்மாண்டு நகரிலுள்ள சோல்ட்டீ க்ரவுன் ப்ளாஸா ஹோட்டலில் இன்று நடைபெறவுள்ளமை குறிப்பிடத்தக்கது. 

நாட்டில் தற்போது காற்றின் வேகம் சற்று அதிகரித்துள்ளதால்  கிழக்கு,  தென் கிழக்கு,  மற்றும் மன்னார் குடா கடற்பரப்புக்களில் மீன்பிடியில் ஈடுபடும் மீனவர்கள் மிகுந்த கவனத்துடன் செயற்படவேண்டுமென வானிலை அவதான நிலையம் எச்சரிக்கை விடுத்துள்ளது. சீன கடற்பரப்பில் உருவாகியுள்ள சுறாவளி காரணமாகவே இலங்கையில் காற்றின் வேகம் அதிகரித்திருப்பதாக வானிலை அவதான நிலையத்தின் வானிலையாளர் சமிந்த டி சில்வா தெரிவித்தார். இந்த நாட்களில் இலங்கைக்கு தென்மேற்காக காற்று வீசுகின்றது. மணித்தியாலயத்திற்கு 40 – 50 கிலோ மீட்டர் வேகத்தில் வீசுகின்ற காற்றின் வேகம்  சில சமயம் 60 – 70 கிலோ மீட்டர் வரையும் அதிகரிக்கக் கூடும்;.

அதனால் கிழக்கு,  தென் கிழக்கு மற்றும் மன்னார் குடாவில் மீன்பிடிப்பவர்கள் மிகுந்த முன்னெச்சரிக்கையோடு நடந்துகொள்ள வேண்டும். இந்த நிலைமை அடுத்துவரும் இரண்டொரு தினங்களுக்கு நீடிக்க முடியும் என மேலும் தெரிவித்தார்

சிறிலங்காவுக்கு ஆயுதங்களை விற்க வேண்டாம் என ஐரோப்பிய ஒன்றியம் தடை விதித்திருந்தபோதும் செக் குடியரசு நான்காம் கட்ட ஈழப் போரின் முக்கிய காலப் பகுதியில் சிறிலங்காவுக்கு ஆயுதங்களை விநியோகம் செய்தது எனத் தெரிவிக்கப்படுகின்றது. குறிப்பாக ரி-55 ரக டாங்கிகள் நாற்பதை அது வழங்கியுள்ளது. செக் குடியரசைச் சேர்ந்த ஆயுத விற்பனை முகவரான மிச்சல் சிமாஸ் இதனைத் தெரிவித்துள்ளார்.

வெளிப்படையான சண்டை நடைபெறும் இடங்களுக்கு ஆயுதங்களை விற்பனை செய்யக்கூடாது என ஐரோப்பிய ஒன்றியம் தடை விதித்துள்ளது. செக் குடியரசு ஒன்றியத்தின் உறுப்பு நாடாகையால் இந்தத் தடை அதற்கும் பொருந்தும். இதன் அடிப்படையில் சிறிலங்கா அரசுக்கும் அது ஆயுதங்களை விற்பனை செய்ய முடியாது.

ஆனாலும் இவற்றை எல்லாம் மீறி நான்காம் ஈழப் போர் கால கட்டத்தில் செக் குடியரசு சிறிலங்காவுக்கு வெளியே தெரியாமல் ஆயுதங்களை விற்பனை செய்தது என்பதை மிச்சல் சிமாஸ் உறுதிப்படுத்தினார்.

ஐரோப்பிய ஒன்றியத்தின் தடையை தமக்குச் சாதகமாகப் பயன்படுத்தி நோர்வே மற்றும் சுவீடன் நாடுகள் சிறிலங்காவுக்கான செக் குடியரசின் ஆயுத விற்பனையைத் தடுக்க முயற்சித்தன எனவும் அவர் குற்றம் சாட்டினார்.  அதிகரித்து வந்த அழுத்தம் காரணமாக இந்த ஆண்டு ஜனவரி மாதம் முதல் சிறிலங்காவுக்கு ஆயுதங்களை விற்பதற்கான அனுமதிகள் எவையும் வழங்கப்படவில்லை என்றும் அவர் குறிப்பிட்டார்.

விடுதலைப் புலிகள் அமைப்புக்கு தமது நாடு ஒருபோதும் ஆயுதங்களை விற்பனை செய்ததில்லை எனக் கூறிய அவர், மியான்மர் (பர்மா) அல்லது வடகொரியா போன்ற இரண்டாம் தரப்புக்கள் மூலமாக கொள்வனவுக் கட்டளைகளைச் சமர்ப்பித்து அவர்கள் ஆயுதங்களைப் பெற்றிருக்கலாம் எனவும் தெளிவுபடுத்தினார்.

விடுதலைப் புலிகளிடம் இருந்த செக் தயாரிப்பான இரு சிலின் ரக வானூர்திகள் குறித்துக் கேட்டதற்கு, அதன் தொடர் இலக்கங்களை வைத்து தாம் மேற்கொண்ட விசாரணையில் அவை முன்னர் கனடாவைச் சேர்ந்த வானூர்தி செலுத்துனர் பயிற்சிப் பள்ளி ஒன்றிடம் இருந்தவை என்பதைக் கண்டறிந்துள்ளனர் என்றார்.