September

பொது மக்களின் நன்மைக்காக அர்ப்பணிப்புடன் செயற்படும் பிரஜைகளை உருவாக்குவதே உயர் கல்வியின் முக்கிய நோக்கமாக அமைய வேண்டுமென ஜனாதிபதி மஹிந்த ராஜபக்ஷ தெரிவித்தார்.

உயர் கல்வியைப் பெற்றுக்கொள்ளும் உரிமை நாட்டின் சிறு பகுதியினருக்கு மட்டும் மட்டுப்படுத்தப்படக் கூடாது என தெரிவித்த ஜனாதிபதி சகல மாணவர்களுக்கும் அந்த உரிமை பெற்றுக்கொடுக்கப்பட வேண்டியதெனவும் தெரிவித்தார்.

கொழும்பு பண்டாரநாயக்க சர்வதேச மாநாட்டு மண்டபத்தில் நேற்று இடம்பெற்ற கொழும்பு பல்கலைக்கழக பட்டமளிப்பு விழாவில் பிரதம அதிதியாகக் கலந்துகொண்டு உரையாற்றுகையிலேயே ஜனாதிபதி இவ்வாறு தெரிவித்தார்.

சிரேஷ்ட அமைச்சர்கள் கல்விமான்கள், முக்கியஸ்தர்கள் பலரும் கலந்துகொண்ட இந்நிகழ்வில் ஜனாதிபதி மேலும் தெரிவித்ததாவது :-பட்டம் பெறுவதற்காக பல்கலைக்கழகத்துக்குள் பிரவேசிக்கும் சகல மாணவர்களுக்கும் சமூகப் பொறுப்பு உண்டு என்பதை எவரும் மறந்துவிடக் கூடாது. பல்கலைக்கழக மாணவர்கள் கோரிக்கைக்கும், அழுத்தத்துக்கும் ஆர்ப்பாட்டங்களுக்கும் தம்மை உள்ளாக்கிக் கொள்பவர்கள் அல்லர். அவர்கள் தமக்குரிய சமூக பொறுப்பினை உணர்ந்து செயற்பட வேண்டியது அவசியம்.

சிறந்த முன்னுதாரணமானவர்களாக அவர்கள் பல்கலைக்கழகத்திலும் சமூகத்திலும் விளங்க வேண்டும். அத்துடன் தாய்நாட்டின் மீதும் சுற்றுச் சூழல் மீதும் நாட்டின் பொருளாதாரத்தின் மீதும் சிறந்த தெளிவைப் பெற்றுக்கொண்டிருத்தல் அவசியம்.

அதேபோன்று பட்டதாரிகள் ஆங்கில மொழித் தேர்ச்சி போன்று தகவல் தொழில்நுட்ப அறிவை வளர்த்துக்கொள்வதிலும் கவனம் செலுத்துவது அதிகரிக்கப்பட வேண்டும். பொது மனித நலன்கள் தொடர்பில் அர்ப்பணிப்புடன் செயற்படுபவராக பட்டதாரிகள் உருவாக்கப்படுவது அவசியமெனவும் ஜனாதிபதி மேலும் தெரிவித்தார்.

சீன கடற்பரப்பில் உருவாகியுள்ள சூறாவளி காரணமாகவே இலங்கையில் காற்றின் வேகம் அதிகரித்திருப்பதாக வானிலை அவதான நிலையத்தின் வானிலையாளர் சமிந்த டி சில்வா நேற்றுத் தெரிவித்தார்.

இந்த நாட்களில் இலங்கையின் கிழக்கு, தென் கிழக்கு, மற்றும் மன்னார் குடா கடற்பரப்புக்களில் மீன்பிடியில் ஈடுபடும் மீனவர்கள் மிகுந்த முன்னெச்சரிக்கையோடு நடந்துகொள்ள வேண்டும் என்றும் அவர் கேட்டுக்கொண்டார்.

இது தொடர்பாக அவர் மேலும் கூறுகையில் :-
சீனாவுக்கு அருகில் கடற் பரப்பில் சூறாவளி ஏற்பட்டிருக்கின்றது. இதன் காரணத்தினால் இந்த நாட்களில் இலங்கைக்கு தென்மேற்காக காற்று வீசுகின்றது. மணித்தியாலயத்திற்கு 40 – 50 கிலோ மீட்டர் வேகத்தில் வீசுகின்ற காற்று சில சமயம் 60 – 70 கிலோ மீட்டர் வரையும் அதிகரிக்க முடியும்.

அதனால் கிழக்கு, தென் கிழக்கு மற்றும் மன்னார் குடாவில் மீன்பிடிப்பவர்கள் மிகுந்த முன்னெச்சரிக்கையோடு நடந்துகொள்ள வேண்டும். இந்த நிலைமை அடுத்துவரும் இரண்டொரு தினங்களுக்கு நீடிக்க முடியும் என்றார்.

அமெரிக் காவில் நடைபெற்று வரும் யு.எஸ். ஓபன் டென்னிஸ் போட்டிகளில் உலகின் முதல் நிலை வீரரான ரோஜர் பெடரர் (சுவிட்சர்லாந்து) 3-ஆவது சுற்றில் லேடன் ஹெவிட்டை (ஆஸ்திரேலியா) வீழ்த்தி அடுத்த சுற்றுக்கு முன்னேறினார்.

நேற்று நடைபெற்ற போட்டியில், பெடரர் 4-6, 6-3, 7-5, 6-4, என்ற செட் கணக்கில் ஹெவிட்டை வீழ்த்தி வெற்றி பெற்றார்.

4ஆம் நிலை வீரரான ஜோகோவிக், ஜெசி ரைட்டனை (அமெரிக்கா) 6-7, (2-7), 6-3, 7-6 (7-2), 6-4 என்ற செட்களில் தோற்கடித்தார்.

மற்ற ஆட்டங்களில் பெர்னாண்டோ (ஸ்பெயின்), சோடர்லிங் (சுவீடன்), நிகோலாய் (ரஷியா) ஆகியோர் வென்று 4-வது சுற்றில் நுழைந்தனர். 

ஆப்கானிஸ்தானில் இடம்பெற்றதாகக் கூறப்படும் வாக்கு மோசடிகள் குறித்து நடத்தப்பட்ட விசாரணைகளைத் தொடர்ந்து அந்நாட்டு தேர்தல் அதிகாரிகள் நானூற்று நாற்பத்து ஏழு வாக்குச்சாவடிகளுக்கான முடிவுகளை ரத்து செய்துள்ளனர்.

கடந்த மாதத்தில் இடம்பெற்ற அதிபர் தேர்தல்களையடுத்து, நாட்டின் சுமார் 28 ஆயிரம் வாக்களிப்பு நிலையங்களில் பெருமளவிலான வாக்கு மோசடிகள் இடம்பெற்றுள்ளதாக இரண்டாயிரத்துக்கும் அதிகமான முறைப்பாடுகள் தேர்தல் ஆணையத்துக்கு கிடைத்துள்ளன.

இதுவரை எண்ணப்பட்டுள்ள மூன்றில் இரண்டு பங்கு வாக்குகளின்படி, அதிபர் ஹமீத் கர்சாய் 49 வீதத்தை எட்டிய வாக்கு வித்தியாசத்தில் முன்னிலையில் உள்ளார். அவருக்கு அடுத்தபடியாக, போட்டி வேட்பாளரான முன்னாள் வெளிவிவகார அமைச்சர் அப்துல்லா அப்துல்லா 32 வீதமான வாக்குகளைப் பெற்றுள்ளார்.

271 கிராம் எடையுள்ள ஹெரோயின் போதை பொருள் வைத்திருந்த பாகிஸ்தான் பிரஜைகள் இருவர் உட்பட ஆறு பேரை போதைவஸ்து தடுப்புப் பிரிவு பொலிஸார் கைது செய்துள்ளனர்.

இலங்கைக்கு ஹெரோயினை கடத்தி வந்த இரு பாகிஸ்தான் பிரஜைகளை கொள்ளுப்பிட்டி பிரதேசத்தில் வைத்தும், அதற்கு ஒத்துழைப்பு வழங்கிய இலங்கையர்கள் நால்வரை கொம்பனித்தெருவில் வைத்தும் கடந்த 4ம் திகதி பொலிஸார் கைது செய்துள்ளதாக பொலிஸ் ஊடகப் பேச்சாளர், சிரேஷ்ட பிரதிப் பொலிஸ் மா அதிபர் நிமல் மெதிவக தெரிவித்தார்.

கைது செய்யப்பட்ட ஆறு பேரிடம் மேற்கொள்ளப்பட்ட சோதனையின் போது மொத்தமாக 271 கிராம் எடையுள்ள ஹெரோயினை மீட்டெடுத்துள்ளனர். இந்தச் சம்பவம் தொடர்பாக மேலும் தெரிய வருவதாவது :-பாகிஸ்தான் கராச்சியைச் சேர்ந்த மொஹம்மட் ரபீக் மொஹம்மட் அஹமட், ரம்சான் மொஹம்மட் அப்துல் கரீப் ஆகிய இருவரையும் கொள்ளுப்பிட்டி பிரதேசத்தில் வைத்து போதைவஸ்து தடுப்புப் பிரிவு பொலிஸார் கைதுசெய்து கடுமையான விசாரணைக்கு ட்படுத்தியுள்ளனர்.

அஹமட் என்பவரிடமிருந்து 97 கிராம் ஹெரோயினையும், கரீம் என்பவரிடமிருந்து 91 கிராம் ஹெரோயினையும் பொலிஸார் கைப்பற்றியுள்ளனர். இவர்கள் இருவரும் வழங்கிய தகவல்களை அடுத்து கொம்பனித்தெரு பிரதேசத்திலிருந்து நான்கு இலங்கையர்களை கைது செய்துள்ளனர். இவர்கள் ஒவ்வொருவரிடமிருந்தும் 50, 10, 12, 09 கிராம் எடையுள்ள ஹெரோயின்கள் கைப்பற்றப்பட்டுள்ளன.

பாகிஸ்தான் பிரஜையான மொஹம்மட் ரபீக் மொஹம்மட் அஹமத் என்பவர் 2008ம் ஆண்டு நவம்பர் மாதம் தொடக்கம் இதுவரை 11 தடவைகள் இலங்கைக்கு வருகை தந்துள்ளார் என்றும் ரம்சான் மொஹம்மட் அப்துல் கரீம் என்பவர் 2008ம் ஆண்டு நவம்பர் முதல் இதுவரை ஆறு தடவைகள் இலங்கைக்கு வருகை தந்துள்ளார் என்றும் ஆரம்ப விசாரணைகளிலிருந்து தெரியவந்துள்ளது.

இலங்கையில் வருடா வருடம் மரணமடைவோரின் 71 சதவீதமானோர் தொற்றா நோய்களால் உயிரிழப்பதாக ஆய்வுகள் மூலம் தெரிய வந்துள்ளது. சுகாதாரப் பராமரிப்பு, போஷாக்குத் துறை அமைச்சு நடத்திய ஆய்விலேயே இந்தத் தகவல் வெளியாகியுள்ளது.

இவ்வாறு உயிரிழப்போரின் 35 சதவீதமானோர் இருதய நோய்களாலும், 20 சதவீதமானோர் நீரிழிவு நோயை அடிப்படையாகக் கொண்ட பாதிப்புகளாலும், 6 சதவீதமானோர் சிறுநீரக நோய்களாலும் மரணமடைவதும் இந்த ஆய்வின் மூலம் கண்டறியப்பட்டிருக்கின்றது.

இதேநேரம் கொழும்பு மாநகரிலுள்ள நாலாம், ஐந்தாம் வகுப்புகளைச் சேர்ந்த பாடசாலை மாணவர்/ மாணவியர் மத்தியில் நடத்திய ஆய்வின்படி 14 சதவீதமானோர் உடல் பருமன் அதிகரிப்புக்கு உள்ளாகியுள்ளனர். இப்படியானவர்கள் இளம் வயதில் நீரிழிவு நோய்க்கும், அது தொடர்பான பாதிப்புகளுக்கும் உள்ளாவதும் தெரிய வந்திருக்கின்றது.

தமிழீழ விடுதலைப் புலிகள் இயக்கம் பலவீனமடைந்து அரச படைகளால் தோற்கடிக்கப்பட்டமைக்கு அந்த அமைப்பிலிருந்து தாங்கள் வெளியேறியமையே பிரதான காரணம் என கிழக்கு மாகாண முதலமைச்சர் சிவநேசத்துரை சந்திரகாந்தன் (பிள்ளையான்) தெவித்தார்.

தான் மற்றும் கருணா அம்மான் போன்ற முக்கிய போராளிகள் இயக்கத்திலிருந்து விலகியமை விடுதலைப் புலிகள் இயக்கத்தை நேரடியாகவே பலவீனப்படுத்தியது எனவும் அவர் குறிப்பிட்டார். கொழும்பு வந்திருந்த கிழக்கு மாகாண முதலமைச்சர் வீரகேசரி வார வெளியீட்டுக்கு அளித்த பேட்டியிலேயே இதனைத் தெரிவித்தார். மேலும் அவர் தெரிக்கையில்,

“யுத்த நிறுத்த காலத்தில் இடம்பெற்ற சமாதானப் பேச்சுவார்த்தைகளின் போது தமிழீழ விடுதலைப் புலிகள் கலந்து கொண்டிருந்தாலும் தமிழீழக் கோரிக்கையை அவர்கள் கைவிடவில்லை.

இதன் காரணமாக அந்த அமைப்பின் போக்கில் அதிருப்தியுற்ற நாம் வெளியேறினோம். இதனை ஒரு பிளவு என்றே கூறலாம். இதன் பிளவானது புலிகள் அமைப்பில் ஆட்கள் சேருவதனை அல்லது சேர்க்கப்படுவதனை வெகுவாகப் பாதித்தது.

நாம் இயக்கத்தை விட்டு வெளியேறிய பின்னர் கிழக்கு மாகாணத்திலிருந்து எவரும் புலிகள் அமைப்பில் சேரவில்லை. இது புலிகள் அமைப்பை ஆட்பலரீதியாக கடுமையாகப் பாதித்தது.

இதனை நன்கறிந்து கொண்ட அரசாங்கம் சந்தர்ப்பத்தை சாதகமாக பயன்படுத்தி புலிகளை அழித்து இலகுவாக அவர்களை வெற்றி கொண்டது” என்றார் 

அமெரிக்க ஓபன் டென்னிஸ் போட்டிகளில் ஆடவர் பிரிவில் அமெரிக்காவின் ஆன்டி ரோட்டிக், மகளிர் பிரிவில் ரஷ்யாவின் மரியா ஷரபோவா ஆகியோர் புதுமுக வீரர்-வீராங்கனையிடம் தோல்வியடைந்து வெளியேறினர்.

உலகின் 13-ஆம் நிலை வீராங்கனையான பெட்ரோவா (ரஷியா) 6-4, 6-1 என்ற கணக்கில் சீனாவின் செங்கை வென்றார்.

6-ஆம் நிலை வீராங்கனை சுவெட்லானா குஸ்னெட்சோவா (ரஷியா) 7-5, 6-1 என்ற கணக்கில் சக நாட்டு வீராங்கனையான ஷகார் பீரை தோற்கடித்து 4-வது சுற்றில் நுழைந்தார்.

உலகின் 29ஆவது இடத்தில் இருப்பவரும் ரஷ்யாவின் பிரபல வீராங்கனையுமான மரியா ஷரபோவா, புதுமுக வீராங்கனையான அமெரிக்காவின் மெலின் ஒடின்-யிடம் 3-6, 6-4, 7-5 என்ற கணக்கில் அதிர்ச்சி தோல்வியடைந்து வெளியேறினார்.

இதேபோல 5-ஆம் நிலை வீரரான ஆன்டி ரோட்டிக்கும் 3-வது சுற்றில் அதிர்ச்சிகரமாக தோற்றார்.

அமெரிக்காவை சேர்ந்த புதுமுக வீரர் ஜான் இஸ்னொ 7-6, 6-3, 3-6, 5-7, 7-6 (7-5) என்ற செட் கணக்கில் கடுமையாகப் போராடி சக நாட்டை சேர்ந்த ரோட்டிக்கை வீழ்த்தினார்.

பாகிஸ்தான் கடற்படைக் கப்பலான “சுல்பிகார்’  இன்னும் சில தினங்களில் நல்லெண்ண விஜயமொன்றை மேற்கொண்டு இலங்கைக்கு வரவுள்ளதாக பாகிஸ்தான் தூதரக பேச்சாளர் ஒருவர் தெரிவித்துள்ளார்.
 
நட்புறவான இவ்விரு நாடுகளினதும் கடற்படைகளின் நெருக்கமான செயற்பாட்டுக்கு இவ்விஜயம் வாய்ப்பாக அமையும் எனவும் அப்பேச்சாளர் தெரிவித்துள்ளார்.

பிராந்திய நாடுகளுக்கான இத்தகைய விஜயம் வழக்கமானதொன்றாகும். ஆனால் அவசரகால சவால்கள், பாதுகாப்பு பலப்படுத்தல் மற்றும் தேசிய நலன்கள் போன்றவற்றின் காரணமாக இத்தகைய விஜயங்கள் அதிகரித்துள்ளன என பாகிஸ்தான் தூதரகம் விடுத்துள்ள செய்திக் குறிப்பொன்றில் தெவிக்கப்பட்டுள்ளது

பன்றி காய்ச்சல் நோய்க்கு நேற்று மட்டும் சுமார் 9 பேர் இறந்துள்ளனர். இவர்களில் கர்நாடகாவை சேர்ந்தவர்கள் 6 பேர். இதையடுத்து பலியானவர்களின் எண்ணிக்கை 125 ஆக உயர்ந்துள்ளது.

இது குறித்து கர்நாடக மாநில சுகாதார துறை அதிகாரியும், பன்றி காய்ச்சல் தடுப்பு நடவடிக்க பிரிவின் தலைவர் வாசுதேவ் மூர்த்தி கூறுகையில்,கடந்த 24 மணி நேரத்தில் கர்நாடகாவில் 6 பேர் பன்றி காய்ச்சலுக்கு பலியாகி இருக்கின்றனர். அவர்கள் அனைவருக்கும் பன்றி காய்ச்சல் இருந்தது உறுதி செய்யப்பட்டுள்ளது. கடைசியாக இறந்த பெண்ணுக்கு 38 வயது என்றார். இதையடுத்து இந்தியா முழுவதும் சாவு எண்ணிக்கை 125 ஆக உயர்ந்துள்ளது. அதிகபட்சமாக மகாராஷ்டிராவில் 59, கர்நாடகாவில் 41 பேர் இறந்துள்ளனர். அதாவது, இந்த இரு மாநிலங்களில் மட்டும் 100 பேர் இறந்துள்ளனர்.