19

வவுனியா, மன்னார் மாவட்டங்களில் எதிர்வரும் 27ஆம் திகதி மாவீரர்களை நினைவேந்துவதற்கு நீதிமன்றங்களால் தடை விதிக்கப்பட்டுள்ளன. பயங்கரவாதத் தடைச் சட்டம் மற்றும் கொரோனா தனிமைப்படுத்தல் சட்டம் ஆகியவற்றைக் காரணம் காட்டி இரு மாவட்ட நீதிமன்றங்களிலும் காவல்துறை இன்று விடுத்த வேண்டுகோளுக்கு அமையவே இந்தத் தடை உத்தரவு பிறப்பிக்கப்பட்டுள்ளது.

“இலங்கையில் தமிழீழ விடுதலைப்புலிகள் இயக்கம் பயங்கரவாத அமைப்பாகத் தடை செய்யப்பட்டுள்ளது. பயங்கரவாத அமைப்பைக் கொண்டாடுவது அல்லது அதற்கு ஆதரவை வெளிப்படுத்தும் நிகழ்வுகளைத் தனியாகவோ, குழுவாகவோ ஒழுங்கமைப்பதும், பங்கேற்பதும் சட்டத்துக்குப் புறம்பானதாகும்.

மாவீரர் நாள் என்பது, தமிழீழ விடுதலைப் புலிகளால் கடைப்பிடிக்கப்பட்ட மரபுகளில் ஒன்று. விடுதலைப்புலிகள் இயக்கத்துக்குத் தடை விதிக்கப்பட்டுள்ள நிலையில் பயங்கரவாத தடைச் சட்டத்தின் கீழ் இத்தகைய நிகழ்வுகளை நடத்த அனுமதிக்கப்படாது. அதேவேளை, கொரோனா தனிமைப்படுத்தல் சட்டம் நாட்டில் தற்போது நடைமுறையில் இருக்கின்றபோது அதை மீறிப் பொது வெளியில் மக்கள் ஒன்றுகூடி நிகழ்வுகளை நடத்தவும் அனுமதிக்கப்படக்கூடாது” என வவுனியா, மன்னார் பொலிஸார் அந்தந்த மாவட்ட நீதிமன்றங்களில் சமர்ப்பித்துள்ள தடை உத்தரவு கோரிய மனுக்களில் தெரிவித்துள்ளமையும் குறிப்பிடத்தக்கது.

“நல்லாட்சி அரசை ஆட்சிக்கு கொண்டுவர தமிழ் மக்கள் பெருமளவில் பங்களித்தாலும் அவர்களுக்கு என்ன கிடைத்தது? ” என அமைச்சர் ரோஹித் அபேகுணவர்தன  பாராளுமன்றத்தில் கேள்வி எழுப்பியுள்ளார்.

வரவு செலவுத்திட்ட இரண்டாம் வாசிப்பு மீதான விவாதம் நேற்றைய தினம் இடம்பெற்றது. இதன் போது உரையாற்றுகையிலேயே அவர் இவ்வாறு குறிப்பிட்டுள்ளார்.

அவர் மேலும் குறிப்பிட்டதாவது,

“ஈழம் என்பதற்கு நான் ஒருபோதும் எதிர்ப்பு கிடையாது , தமிழீழத்திற்கே நான் எதிர்ப்பு. அதேபோன்று, இலங்கைக்கு தான் எதிர்ப்பு கிடையாது எனவும், ஆனால் சிங்கள இலங்கைக்கு நான் எதிர்ப்பு” என தேர்தல்கள் ஆணைக்குழுவின் தலைவர் மஹிந்த தேசபிரிய தெரிவித்துள்ளார்.

ஹிரு தொலைக்காட்சியில் ஒளிபரப்பான சலகுண நிகழ்ச்சியில் கலந்துக்கொண்டு கருத்து தெரிவித்த போதே அவர் இதனைக் குறிப்பிட்டுள்ளார். அந்த நிகழ்வில் ஈழம் என்ற பெயர் பிரிவினைவாதத்திற்காக பயன்படுத்தப்படுகின்றது என ஊடகவியலாளர் வினவிய போது அதற்கு பதிலளிக்கும் போதே மஹிந்த தேசபிரிய இவ்வாறு குறிப்பிட்டுள்ளார்.

அதில் பேசிய அவர்,

ஈழம் என்பதும் இலங்கை என்பதும் நாம் வாழும் இந்த முழுத் தீவுக்கும் உரித்தான பண்டைய தூய தமிழ்ப் பெயர்கள்தான். சங்ககாலத்திலேயே ஈழம் என்ற சொல் பயன்படுத்தப்பட்டிருக்கின்றதென்றால், ஈழம் தூய தமிழ்ச் சொல் தான் என்பதற்கு அதைவிட வேறு என்ன ஆதாரம் தேவையற்றது எனலாம்.

ஈழம் என்ற சொல்லுக்கு எந்தவிதத்திலும் தவறு கிடையாது

ஈழம் என்றால் இலங்கை என்பதை அனைவரும் அறிவார்கள். தேசிய கீதத்தின் தமிழாக்கத்தில் ஈழம் என்ற வசம் பயன்படுத்தப்பட்டுள்ளது. “ஈழ சிரோமணி” என இலங்கை தேசிய கீதத்தின் தமிழாக்கத்தில் குறிப்பிடப்பட்டுள்ளது. இலங்கைக்கு தமிழில் கூறப்படும் பெயர்களில் ஒன்றே ஈழம் ஆகும்.

லங்கா என சிங்களத்தில் பயன்படுத்தப்படும் பெயருக்கு ரத்ததீப என்ற பெயரும் சிங்களத்தில் பயன்படுத்தப்படுவது போன்றே தமிழில் ஈழம் என்ற சொல் பயன்படுத்தப்படுகின்றது.

பிரபாகரன் ஈழத்திற்காக போராட்டத்தை நடத்தவில்லை .தமிழீழத்திற்காகவே போராட்டங்களை அவர் நடத்தினார். ஈழம் என பயன்படுத்தப்படுவது, மிக மிக சரியான ஒன்று . ஈழம் என்ற வசனத்தை பயன்படுத்துவதில் எந்தவொரு தவறும் கிடையாது.

ஈழம் என்பதற்கு நான் ஒருபோதும் எதிர்ப்பு கிடையாது , தமிழீழத்திற்கே நான் எதிர்ப்பு. அதேபோன்று, இலங்கைக்கு நான் எதிர்ப்பு கிடையாது எனவும், ஆனால் சிங்கள இலங்கைக்கு தான் எதிர்ப்பு.

ஈழம் என்ற நாட்டை பிளவுப்படுத்தும் ஒரு பெயர் கிடையாது . ஈழம் என்ற பெயரை தவறாக வெளிப்படுத்தி, அதனை சமூகமயப்படுத்த முயற்சிக்க வேண்டாம் எனவும் கூறினார் மஹிந்த தேசபிரிய.

இதன் போது அப்துல் கலாம் கூறிய ஒரு விடயத்தையும் அவர் இதன்போது நினைவூட்டினார் மஹிந்த தேசபிரிய. “முதலாவதாக நான் இந்திய பிரஜை. பின்னரே  நான் தமிழகத்தைச் சேர்ந்த முஸ்லிம்” என அப்துல் கலாம் கூறியதையும் அவர் நினைவூட்டினார். ஈழம் என்ற பெயருக்கு எதிர்ப்பு தெரிவிப்பீர்களானால், இலங்கை என்ற பெயருக்கும் எதிர்ப்பு தெரிவிக்கப்பட வேண்டும்” என மஹிந்த தேசபிரிய கூறினார்.

“ஐக்கியநாடுகள் மனித உரிமை பேரவையின் தீர்மானத்திலிருந்து இலங்கை வெளியேறியுள்ளமை இன்னமும் கரிசனைக்குரிய விடயமாக உள்ளது” என ஐரோப்பிய ஒன்றியம் தெரிவித்துள்ளது.

இலங்கைக்கான ஐரோப்பிய ஒன்றிய தூதுக்குழு மற்றும் பிரான்ஸ், ஜேர்மனி, இத்தாலி, நெதர்லாந்து, ருமேனிய தூதரகங்கள் இணைந்து வெளியிட்டுள்ள அறிக்கையிலே இவ்வாறு தெரிவிக்கப்பட்டுள்ளது.

“கொவிட்-19 தொடர்ந்தும் பல சவால்களை உருவாக்கிவரும் நிலையில் நாங்கள் இலங்கை வெளிவிவகார அமைச்சர் உட்பட பல முக்கிய அதிகாரிகளுடன் உயர்மட்ட பேச்சுவார்த்தைகளை மேற்கொண்டோம். இந்த சந்திப்பின்போது இலங்கையின் நம்பகதன்மை மிக்க சகாக்கள் என்ற அடிப்படையில் இலங்கைக்கான எங்கள் நீண்ட கால ஆதரவை வெளியிட்டோம்” என ஐரோப்பிய ஒன்றியம் தெரிவித்துள்ளது.

தற்போதைய இறக்குமதி கட்டுப்பாடுகள் இலங்கை ஐரோப்பிய ஒன்றிய வர்த்தகங்களின் மீதும் நேரடி வெளிநாட்டு முதலீட்டின் மீதும் எதிர்மறையான தாக்கத்தை ஏற்படுத்தியுள்ளன எனவும் ஐரோப்பிய ஒன்றியம் தெரிவித்துள்ளது. இந்த ஏற்றுமதி கட்டுப்பாடுகள் பிராந்தியத்தின் பொருளாதார தளமாக மாறும் இலங்கையின் முயற்சிகளிற்கு பாதிப்பை ஏற்படுத்தும் இலங்கையின் ஏற்றுமதியிலும் எதிர்மறையான தாக்கத்தை ஏற்படுத்தும் எனவும் ஐரோப்பிய ஒன்றியம் தெரிவித்துள்ளது.

நீடித்த இறக்குமதி தடை சர்வதேச வர்த்தக அமைப்பின் விதிமுறைகளிற்கு முரணானது என்பதையும் சுட்டிக்காட்ட விரும்புகின்றோம் என ஐரோப்பிய ஒன்றியம் தெரிவித்துள்ளது. ஐக்கியநாடுகள் மனித உரிமை பேரவையின் தீர்மானத்திலிருந்து இலங்கை விலகியது தொடர்ந்தும் கவலைக்குரிய விடயமாக காணப்படுகின்றது” என ஐரோப்பிய ஒன்றியம் தெரிவித்துள்ளது.

பாடசாலைகளை மீண்டும் 23ஆம் திகதி திறப்பதற்கு உத்தேசிக்கப்பட்டுள்ளதாக கல்வி அமைச்சு அறிவித்துள்ளது.

கல்வி அமைச்சில் இன்றைய தினம் இடம்பெற்ற கலந்துரையாடலிலேயே இந்த முடிவு எடுக்கப்பட்டுள்ளது.

மேல் மாகாணத்தில் தனிமைப்படுத்தப்பட்டுள்ள பகுதிகளை தவிர்ந்த ஏனைய இடங்களில் பாடசாலைகளை வழமை போன்று ஆரம்பிக்கப்படவுள்ளதாக கல்வி அமைச்சர் பேராசிரியர் ஜி.எல்.பீரிஸ் தெரிவித்துள்ளார்.

இதேவேளை, 6ஆம் ஆண்டு தொடக்கம் 13 ஆம் ஆண்டு வரையான வகுப்புக்களே இடம்பெறும் என்றும் கல்வி அமைச்சு தெரிவித்துள்ளது.

இலங்கை பிரீமியர் லீக் டி20 போட்டியில் இருந்து பிரபல கிரிக்கெட் வீரர் கிறிஸ் கெயில் விலகியுள்ளார். முன்னதாகவே இந்தப்போட்டிகள் ஆரம்பமாகும் என எதிர்பார்க்கப்பட்ட போதிலும் கூட கொரோனா தொற்றுக் காரணமாக பிற்போடப்பட்ட இப்போட்டிகள் இம்மாதம் 27 ஆம் ஆரம்பிக்கப்படவுள்ளன.

இந்நிலையில் LPL போட்டியிலிருந்து பிரபல கிரிக்கெட் வீரர் கிறிஸ் கெயில் விலகியுள்ளார். கண்டி டஸ்கர்ஸ் அணியில் இடம்பெற்றிருந்த கெயில், சொந்தக் காரணங்களால் விலகுவதாக அறிவித்துள்ளார்.

அண்மையில் நடைபெற்ற IPL போட்டியில் பங்கேற்ற கெயில், பஞ்சாப் அணிக்காக 7 ஆட்டங்களில் விளையாடி 288 ஓட்டங்களை எடுத்தார்.

உலகக் கிண்ணக்  காற்பந்து தகுதிச்  சுற்று போட்டிகளில் பிரேஸில், ஆர்ஜென்டினா அணிகள் வெற்றி பெற்றன. 22ஆவது உலகக் கிண்ணக் காற்பந்துப்  போட்டி கத்தாரில் 2022ஆம் ஆண்டில் நவம்பர் மற்றும் டிசம்பர் மாதத்தில் நடைபெறவுள்ளது.

இதற்கான தென்அமெரிக்க கண்டத்துக்குரிய அணிகளுக்கான தகுதி சுற்று போட்டி பல்வேறு இடங்களில் நடந்து வருகிறது. இதில் பங்கேற்றுள்ள 10 அணிகளும் தங்களுக்குள் தலா 2 முறை மோத வேண்டும்.

லீக் சுற்று முடிவில் முதல் 4 இடங்களை பிடிக்கும் அணிகள் உலக கோப்பை போட்டிக்கு நேரடியாக தகுதி பெறும். 5ஆவது இடம் பிடிக்கும் அணி ‘பிளே-ஆப்’ சுற்று மூலம் வாய்ப்பை பெற முடியும்.

இந் நிலையில் உருகுவே தலைநகர் மோன்ட் வீடியோவில் நடந்த தகுதி சுற்று ஆட்டம் ஒன்றில் 5 முறை சம்பியனான பிரேஸில் அணி, 2 தடவை சம்பியனான உருகுவேயை எதிர்கொண்டது.குறித்த போட்டியில் பிரேஸில் அணி 2-0 என்ற கோல் கணக்கில் உருகுவேயை வீழ்த்தியது.

மற்றொரு போட்டியில்  முன்னாள் சம்பியனான ஆர்ஜென்டினா அணி, பெருவை அதன் சொந்த மண்ணில் சந்தித்தது. விறுவிறுப்பான இந்த ஆட்டத்தில் லயோனல் மெஸ்சி தலைமையிலான அர்ஜென்டினா 2-0 என்ற கோல் கணக்கில் பெருவை சாய்த்தது.