நியூசிலாந்து – பாகிஸ்தான் அணிகள் மோதும் 2-வது மற்றும் கடைசி டெஸ்ட் போட்டி கிறிஸ்ட்சர்ச் மைதானத்தில் நடந்தது. பாகிஸ்தான் முதல் இன்னிங்சில் 297 ஓட்டங்களை எடுத்தது. நியூசிலாந்து முதல் இன்னிங்சில் 6 இலக்குகள் இழப்புக்கு 659 ஓட்டங்களை குவித்து தன்னுடைய ஆட்டத்தை இடைநிறுத்தியது. நியூசிலாந்து சார்பில் தலைவர் வில்லியம்சன் இரட்டை சதமும் ( 238 ), ஹென்றி நிக்கோல்ஸ் 157 ஓட்டங்களும், மிச்சேல் 102 ஓட்டங“களும் பெற்றனர்.
362 ரன்கள் பின்தங்கிய நிலையில் 2-வது இன்னிங்சை ஆடிய பாகிஸ்தான் நேற்றைய 3-வது நாள் ஆட்டநேர முடிவில் 1 இலக்கு இழப்புக்கு 8 ஓட்டங்கள் எடுத்து இருந்தது.
இன்று 4-வது நாள் ஆட்டம் நடந்தது. பாகிஸ்தான் தொடர்ந்து ஆடியது. நியூசிலாந்து வீரர்களின் அபாரமான பந்து வீச்சால் பாகிஸ்தான் இலக்குகள் சரிந்தன. அந்த அணி 186 ஓட்டங்களுக்குள் சுருண்டது. இதனால் நியூசிலாந்து இன்னிங்ஸ் மற்றும் 176 ஓட்டங்கள் வித்தியாசத்தில் அபார வெற்றி பெற்றது.
அசார் அலி அதிகபட்சமாக தலா 37 ஓட்டங்களை எடுத்தார். கெய்ல் ஜேமிசன் 48 ஓட்டங்களை கொடுத்து 6 இலக்குகளை வீழ்த்தினார். போல்ட் 3 இலக்குகளையும், வில்லியம்சன் 1 இலக்கையும் எடுத்தனர்.
இந்த வெற்றி மூலம் நியூசிலாந்து அணி 2-0 என்ற கணக்கில் தொடரை கைப்பற்றியது. முதல் டெஸ்டில் அந்த அணி 101 ரன் வித்தியாசத்தில் வெற்றி பெற்று இருந்தது. ஏற்கனவே 20 ஓவர் தொடரையும் நியூசிலாந்து 2-1 என்ற கணக்கில் கைப்பற்றி இருந்தது. பாகிஸ்தான் அணி 2 தொடரை இழந்து ஏமாற்றம் அடைந்தது.
இந்த வெற்றி மூலம் நியூசிலாந்து அணி டெஸ்ட் தர வரிசையில் முதலாம் இடத்தை பிடித்தது. இதன்மூலம் டெஸ்ட் கிரிக்கெட் வரலாற்றில் முதல்முறையாக அந்த அணி முதல் இடத்தை பிடித்தது. நியூசிலாந்து அணி 118 புள்ளிகளுடன் முதல் இடத்திலும், ஆஸ்திரேலியா 116 புள்ளிகளுடன் 2-வது இடத்திலும், இந்தியா 114 புள்ளிகளுடன் 3-வது இடத்திலும் உள்ளன.
மேலும் ஐ.சி.சி. உலக டெஸ்ட் சாம்பியன் ஷிப் இறுதி போட்டியில் நுழையும் வாய்ப்பையும் நியூசிலாந்து பெறுகிறது.
