22

“ஈழத் தமிழர்கள் விடயத்தில் தன்னுடைய பொறுப்பில் இருந்து நழுவியிருந்த நிலையில் தமிழர்கள் மீதான இனவழிப்புக்கு ஐக்கியநாடுகள் சபையும்  காரணம்”  என ஈழத் தமிழர் சுயாட்சிக் கழகத்தின் செயலாளர் நாயகம் அனந்தி சசிதரன் தெரிவித்துள்ளார்.

இந்நிலையில், தமிழர்கள் விடயத்தில் ஐ.நா.வில் கொண்டுவரப்படும் பிரேரணைகள் தமிழர்களுக்கு நீதி தரவேண்டுமே தவிர, இலங்கையை செல்லமாக அணுகும் நிலைப்பாடு இருக்கக் கூடாது என அவர் குறிப்பிட்டுள்ளார்.

யாழ்ப்பாணத்தில், தமிழ் தேசியக் கட்சிகள் இணைந்து நேற்று (22.02.2021) இடம்பெற்ற கூட்டத்தின் பின்னர், ஊடகவியலாளர்களின் கேள்விகளுக்குப் பதிலளிக்கும்போதே அவர் இவ்வாறு குறிப்பிட்டார்.

ஊடகவியலாளர் – ஜெனீவா கூட்டத்தொடர் ஆரம்பமாகவிருக்கின்ற நிலையில், தமிழர் பிரதிநிதிகளாக இருக்கின்ற நீங்கள் இந்தக் கூட்டத்தில் கலந்துகொள்ளக்கூடிய சந்தர்ப்பம் இருக்கிறதா? அவ்வாறு கலந்துகொள்ளாதுவிடின், இந்தப் பிரச்சினையை சர்வதேசம் எவ்வாறு அணுக வேண்டும் என நினைக்கின்றீர்கள் ? 

இதற்குப் பதிலளித்த அவர், “இம்முறை கொரோனா தொற்று நிலைமை காரணமாக, விமானப் போக்குவரத்தில் இடையூறுகள் இருப்பதுடன் விமானப் பயணத்துக்கான செலவுகளும் அதிகரித்திருக்கின்றன.

ஐக்கிய நாடுகளினுடைய வேலைத் திட்டத்தைக் கடந்த காலங்களில், மாகாண சபை உறுப்பினராகவோ, மாகாண அமைச்சராகவோ இருந்த காலப்பகுதியில், ஏதோவொரு வழியில் விமானச் சீட்டுக்களை எடுப்பதற்கான வேலையைச் செய்திருந்தோம். இப்போழுது இதற்காக பொது நிதியொன்றை ஏற்பாடு செய்வதன் ஊடாகத்தான் நாங்கள் அங்கு செல்லக்கூடியதாக இருக்கும்.

ஆனால், நாடாளுமன்ற உறுப்பினர்களாக இருப்பவர்களுக்கு விசா எடுப்பதிலும் பிரச்சினை இல்லை, விமானச் சீட்டு எடுப்பதிலும் பிரச்சினை இல்லையென்று நான் நினைக்கின்றேன். எம்.கே.சிவாஜிலிங்கம் மற்றும் என்னைப் போன்றவர்கள் இந்தப் பயணத்தைச் செய்வதென்பதை நெருக்கடியான நிலையாகப் பார்க்கின்றோம்.

அதேநேரம், இப்பொழுது ஐக்கிய நாடுகளுடைய தீர்மானம் வந்துள்ள நிலையில், ஏற்கனவே கடந்த காலங்களில் வந்த தீர்மானத்தைவிட இதுவொரு மோசமான தீர்மானமாகப் பார்க்கின்றோம்.

ஏனென்றால், யுத்தம் முடிவடைந்து 11 வருடங்கள் கடந்துள்ள நிலையில், நாங்கள் போரின் சாட்சியாகப் போய் எத்தனைமுறை பேசியும்கூட, எங்களுடைய குரல்களை இதுவரையும் செவிமடுத்ததாகத் தெரியவில்லை. ஒரு மென்போக்காக இந்தப் பிரச்சினையைக் கையாண்டிருப்பதாக நாங்கள் பார்க்கின்றோம்.

இந்த இடத்தில், ஐக்கிய நாடுகள் சபையையும் குற்றஞ் சாட்டுகின்றோம். காலம் தாழ்த்தப்பட்ட நீதியென்பது ஈழத்தமிழர்களுக்கு ஒரு மறுக்கப்பட்ட நீதியாகும்.

ஏனென்றால், யுத்தம் நடந்துகொண்டிருந்த வேளையில், இலங்கை விடயத்தில் அல்லது ஈழத் தமிழர்களுடைய விடயத்தில் தலையிடவேண்டிய ஐக்கிய நாடுகள் சபையானது, தன்னுடைய பொறுப்பில் இருந்து நழுவியதுடன் தமிழர்கள் இனவழிப்புக்கு ஆளாவதற்கு ஐக்கிய நாடுகள் சபையும் காரணமாக இருந்திருக்கின்றது.

எனவே, இப்பொழுது வந்திருக்கின்ற தீர்மானத்தைப் பார்த்தால் அதில் ஒன்றுமே இல்லை. தமிழ் மக்கள் ஒரு தேசிய இனம் என்ற வரையறைக்குள்ளும் வரவில்லை. தமிழ் மக்களுக்கு இனவழிப்பு நடந்ததும் வரவில்லை.

இன்றைக்கு பூகோள நலன் சார்ந்து, இலங்கை அரசை சீனா தனது ஆதிக்கத்துக்குள் கொண்டுவருவதைத் தடுப்பதற்காக, தமிழர்களைப் பயன்படுத்தி, தாங்கள் அவர்களுக்கு ஒரு எச்சரிக்கை விடுப்பதுபோன்று செய்திகள் காட்டப்படுகின்றன. இதுதவிர ஐக்கிய நாடுகள் சபையின் பிரேரணையில் எந்த முன்னேற்றமும் இல்லை. மிகவும் மென்போக்காக, ஒரு செல்லமாக அணுகியிருப்பதை நாங்கள் எங்கள் மொழியில் சொல்லிக் கூடியதாக இருக்கிறது.

இதேவேளை, சூம் நிகழ்ச்சியின் ஊடாக நாங்கள் பக்க அறைக் கூட்டங்களோ அல்லது நேரடியாகவோ ஜெனீவா தரப்பினருடன் பேச முடிந்தால் அந்த வாய்ப்பைப் பயன்படுத்திக் கொள்வோம்.

நிச்சயமாக இம்முறையும் ஜெனீவாவுக்குப் போறதுக்குப் பார்க்கின்றோம். என்றாலும் கொரோனா பிரச்சினை தடையாக இருக்கின்றது.

நாடாளுமன்ற உறுப்பினர்களுக்கு விசா நடைமுறையும் சரி, பயணச் சீட்டு நடைமுறைகளும் சரி தடையில்லாமல் இருக்கும். அதேபோல இந்தக் கொவிட்-19 இற்கான தடுப்பூசியைப் பெற்றுக் கொள்வதற்கான சூழலும் அவர்களுக்கு உருவாக்கப்பட்டுள்ளது, இந்நிலையில், அவர்கள் ஜெனீவா சென்றுவருவது பெரிய சவாலாக இருக்காது என்று நினைக்கின்றேன்” என்று குறிப்பிட்டுள்ளார்.

“இலங்கை சுயாதீனமான நாடே தவிர இந்தியாவின் மாநிலங்களில் ஒன்றாக கருத முடியாது” என அமைச்சர் சரத் வீரசேகர தெரிவித்துள்ளார்.

தென்னிலங்கை ஊடகமொன்றுக்கு அவர் அளித்த நேர்காணலிலேயே இவ்வாறு தெரிவித்தார்.

இது தொடர்பில் அவர் மேலும் தெரிவிக்கையில்,

இந்தியாவின் அழுத்தம் காரணமாகவே எம்மீது 13 ஆம் திருத்தம் திணிக்கப்பட்டு மாகாணசபை முறைமைகள் உருவாக்கப்பட்டன. எமக்கு உண்மையில் அவசியமற்ற ஒரு முறைமையாகவே இதனை பார்க்கிறோம். ஒரே நாடு ஒரே சட்டம் என்பதே அரசாங்கத்தின் கொள்கையாகும்.

அவ்வாறு இருக்கையில் ஒன்பது மாகாணங்களுக்கு ஒன்பது சட்டங்களை நடைமுறைப்படுத்த அனுமதிக்க முடியுமா? மாகாணசபை முறைமையை நீக்குவதே எமது நோக்கமாகும்.

இந்தியாவின் திணிப்புகள் எமக்கு அவசியமில்லை. இலங்கை சுயாதீனமான நாடே தவிர இந்தியாவின் மாநிலங்களில் ஒன்றாக கருத முடியாது.

எனவே எமது உள்ளக விடயங்களில் தலையிடும் உரிமை இந்தியாவிற்கு இல்லை.

இப்போதும் புதிய அரசியல் அமைப்பு உருவாக்கம் குறித்து ஆராயப்படுகின்றது. அதில் மாற்றங்கள் அவசியம் என்ற நிலைப்பாட்டில் நாம் உள்ளோம் என அவர் மேலும் தெரிவித்துள்ளார்.

அண்மையில் இந்திய அமைச்சர் அமித்ஷா பா.ஜ.க கட்சியினை இலங்கையில் விஸ்திகரிப்பதற்கான நோக்கம் உள்ளதாக குறிப்பிட்டிருந்த போது “அக்கட்சியின் கொள்கைகள் தமிழ்தேசிய கூட்டமைப்பு ஊடாக இலங்கையில் வளர்ச்சியடையலாம் என சரத்வீரசேகர கூறியிருந்தமையும் நோக்கத்தக்கது.

43 தீவிரவாத அமைப்புகளை தடை செய்வது தொடர்பில் அரசாங்கம் கவனம் செலுத்திவருவதாக தென்னிலங்கை ஊடகமொன்று தெரிவித்துள்ளது.

அனைத்து இலங்கை சலாபி கவுன்சில், இலங்கை தவ்ஹீத் ஜமாஅத் மற்றும் அனைத்து இலங்கை தவ்ஹீத் ஜமாஅத் ஆகியவை தடைப்பட்டியலில் அடங்கும் என்று கூறப்படுகிறது.

புலனாய்வுத்தகவல்கள் மற்றும் அறிக்கைகளின் அடிப்படையில் இந்த தடைகள் விதிக்கப்பட உள்ளதாக தெரிவிக்கப்பட்டுள்ளது.

பாதுகாப்புப் படைகள் நீண்ட காலமாக இந்த அமைப்புகளின் மீது ஒரு கண் வைத்திருக்கின்றன, மேலும் அவர்களின் தீவிரவாத போதனைகள் மற்றும் சித்தாந்தங்கள் தேசிய பாதுகாப்புக்கு கடுமையான அச்சுறுத்தலை ஏற்படுத்துகின்றன என்பதை சுட்டிக்காட்டியுள்ளன.

“இலங்கையில் தமிழ் அகதிகள் சமத்துவம் கௌரவம் சமாதானம் ஆகியவற்றுடன் வாழ்வதை உறுதி செய்வது குறித்து இந்திய மத்திய அரசாங்கம் அர்ப்பணிப்புடன் உள்ளது” என இந்திய பாதுகாப்பு அமைச்சர் ராஜ்நாத் சிங் தெரிவித்துள்ளார்.

சேலத்தில் இடம்பெற்ற பாரதிய ஜனதா கட்சியின் இளைஞர் அணியின் மாநாட்டில் உரையாற்றுகையில் இதனை அவர் தெரிவித்துள்ளார்.

இது தொடர்பில் அவர் மேலும் தெரிவித்ததாவது,

ராஜராஜசோழன் ராஜேந்திர சோழன் போன்றவர்களின் மண்ணிற்கு வருவது குறித்து பெருமிதம் அடைவதாக ராஜ்நாத் சிங் தெரிவித்துள்ளார்.

முன்னாள் பிரதமர் அடல்பிஹாரி வாஜ்பாய் அப்துல்கலாமை ஜனாதிபதியாக்கினார் என தெரிவித்துள்ள ராஜ்நாத் சிங் அது தமிழ்நாட்டை கௌரவப்படுத்தும் நடவடிக்கையில்லையா? என கேள்வி எழுப்பியுள்ளார்.

1974 இல் காங்கிரஸ் அரசாங்கம் கச்சதீவை இலங்கையிடம் கையளித்தவேளை வாஜ்பாய் அதனை கண்டித்தார் என குறிப்பிட்டுள்ள அவர் அதற்கு எதிராக வாஜ்பாய் நீதிமன்றம் சென்றார் எனவும் குறிப்பிட்டுள்ளார்.

தமிழ்நாட்டின் மகள் புரட்சி தலைவி அம்மாவே முதலாவது வாஜ்பாய் அரசாங்கத்தை முழுமனதோடு ஆதரித்தவர் என்பதை மறக்க முடியாது எனவும் அவர் தெரிவித்துள்ளார். வாஜ்பாய் போன்று இந்திய பிரதமருக்கும் தமிழ்நாட்டுடன் விசேட உறவுள்ளது என குறிப்பிட்டுள்ள அவர் இலங்கையில் தமிழ் அகதிகளை வலுப்படுத்தும் நடவடிக்கைகளில் மோடி தொடர்ச்சியாக ஈடுபட்டு வந்துள்ளார் எனவும் குறிப்பிட்டுள்ளார்.

2015 இல் பிரதமரான பின்னர் மோடி யாழ்ப்பாணத்திற்கு சென்றுள்ளார். யாழ்ப்பாணம் சென்ற ஒரேயொரு பிரதமர் அவர் உள்நாட்டு யுத்தம் காரணமாக வீடுகளை இழந்த சகோதர சகோதரிகளிற்கு நாங்கள் வீடுகளை வழங்கியுள்ளோம் எனவும் ராஜ்நாத் சிங் தெரிவித்துள்ளார்.