04

லண்டனின் கென்ட் மாகாணத்தில் உள்ள வீடொன்றில் இடம்பெற்ற வெடிப்பு சம்பவத்தில் ஏழுபேர் காயமடைந்துள்ளதாக தெரிவிக்கப்படுகிறது.

இவர்களில் இருவர் படுகாயமடைந்த நிலையில் லண்டனில் உள்ள வைத்தியசாலையில் அனுமதிக்கப்பட்டுள்ளனர். மற்றைய ஐவரும் வில்லியம் ஹார்வே வைத்தியசாலையில் அனுமதிக்கப்பட்டுள்ளனர்.

அத்துடன் இந்த வீட்டில் இருந்த பலர் மீட்கப்பட்டுள்ளனர். சம்பவம் இடம்பெற்ற இடத்திற்கு எவரும் செல்ல வேண்டாமென அறிவிக்கப்பட்டுள்ளது.

2020ஆம் ஆண்டு க.பொ.த. உயர்தரப் பரீட்சையில் சாவகச்சேரி இந்துக் கல்லூரி மாணவன் தனராஜ் சுந்தர்பவன் பௌதீக விஞ்ஞானப் பிரிவில் தேசிய மட்டத்தில் முதலிடத்தைப் பெற்றுள்ளார்.

அவரது இசட் புள்ளி 2.9422 ஆகும். அவர் தேசிய நிலையிலும் யாழ்ப்பாணம் மாவட்ட நிலையிலும் முதலிடம் பெற்று வரலாற்றுப் பதிவு செய்துள்ளார்.

2020ஆம் ஆண்டு க.பொ.த. உயர்தரப் பரீட்சை பெறுபேறுகள் இன்று வெளியிடப்பட்டன. அதனடிப்படையில் ஒரு லட்சத்து 94 ஆயித்து 297 மாணவர்கள் பல்கலைக்கழகங்களுக்கு அனுமதி பெறத் தகுதி பெற்றுள்ளனர்.

அதன்படி, புதிய பாடத்திட்டத்தின் கீழ் ஒரு லட்சத்து 78 ஆயி்த்து 337 மாணவர்களும் பழைய பாடத்திட்டத்தின் கீழ் 15 ஆயிரத்து 960 மாணவர்களும் பல்கலைக்கழகங்களுக்கு விண்ணப்பிக்க தகுதி பெற்றுள்ளனர் என்று பரீட்சைகள் திணைக்களம் தெரிவித்துள்ளது.

“தமிழ் மக்களின் பூர்வீக நிலங்களை ஆக்கிரமிக்கும் மகாவலி அபிவிருத்தி அதிகார சபைக்கு எதிராக எந்த வகையிலேனும் எங்களுடைய போராட்டங்கள் தொடரும்.” என இலங்கை தமிழரசு கட்சியின் தலைவர் மாவை சேனாதிராஜா தெரிவித்துள்ளார்.

முல்லைத்தீவு மாவட்டத்தில் உள்ள தமிழ் மக்களின் பூர்வீக நிலங்களை ஆக்கிரமிக்கும் மகாவலி அபிவிருத்தி அதிகார சபையின் செயற்பாடுகளுக்கு எதிர்ப்பு தெரிவிக்கும் வகையிலான கோரிக்கைகள் அடங்கிய மகஜர் வடமாகாண சபையின் முன்னாள் உறுப்பினர் துரைராசா ரவிகரனால் இன்றைய தினம் இலங்கை தமிழரசு கட்சியின் தலைவர் மாவை சேனாதிராஜாவிடம் கையளிக்கப்பட்டுள்ளது.

குறித்த மகஜரைப் பெற்றுக் கொண்ட பின்னர் ஊடகங்களுக்கு கருத்து வெளியிட்ட மாவை சேனாதிராஜா மேற்கண்டவாறு கூறியுள்ளார்.

இது தொடர்பில் அவர் மேலும் தெரிவித்துள்ளதாவது,

முல்லைத்தீவு மாவட்டத்தில் உள்ள தமிழ் மக்களின் பூர்வீக நிலங்களை ஆக்கிரமிக்கும் மகாவலி அபிவிருத்தி அதிகார சபையின் செயற்பாடுகள் தொடர்பில் இலங்கை அரசாங்கத்துடன் கலந்துரையாடல்களை மேற்கொள்ளவுள்ளளோம்.

கொரோனா அச்சுறுத்தலால் மக்களை ஒன்று திரட்டி போராட்டங்களை முன்னெடுக்க முடியாத நிலைமை காணப்படுகின்ற போதிலும் மகாவலி அபிவிருத்தி அதிகார சபைக்கு எதிராக எந்த வகையிலேனும் எங்களுடைய போராட்டங்கள் தொடரும்.

தமிழ்த் தேசியப் பரப்பில் தமிழ் இனத்தின் பெரும்பான்மைத்துவத்தை பாதுகாப்பதற்கான முயற்சிகளில் தொடர்ந்து ஈடுபடுவோம்.”  எனவும் அவர்  குறிப்பிட்டுள்ளார்.

இந்நிலையில் கொல்கத்தா அணி வீரர்கள் வருண் சக்கரவர்த்தி, சந்தீப் வாரியர், ஐதராபாத் அணி விர்த்திமான் சஹா, டெல்லி அணியின் அமித் மிஷ்ராவுக்கு கொரோனா பாதிப்பு ஏற்பட்டுள்ளது.

இதையடுத்து நடப்பு ஐ.பி.எல் 20-20 தொடர் தற்காலிகமாக ஒத்திவைக்கப்பட்டுள்ளதாக பிசிசிஐ துணைத்தலைவர் ராஜீவ் சுக்லா தெரிவித்துள்ளார்.

மே 30ந்தேதி வரை போட்டிகள் நடைபெறவிருந்த நிலையில் கொரோனா காரணமாக ஐபிஎல் போட்டிகள் காலவரையின்றி ஒத்திவைக்கப்பட்டுள்ளது.

ஐ.பி.எல் போட்டிகளுக்கான புதிய தேதிகள் விரைவில் அறிவிக்கப்படலாம் எனவும் தகவல் வெளியாகி உள்ளது.

“சட்டத்தரணி தொழிலிலேயே பொய் சொல்லாதவன் என்ற பெயர் எடுத்தவன் நான். ஆகவே அரசியலில் பொய் சொல்ல வேண்டிய எந்தத் தேவையும் எனக்கு கிடையாது. ”  என தமிழ் தேசிய கூட்டமைப்பின் ஊடகப் பேச்சாளரும் ஜனாதிபதி சட்டத்தரணியும் நாடாளுமன்ற உறுப்பினருமான எம்.ஏ.சுமந்திரன் தெரிவித்தார்.

மட்டக்களப்பு களுவாஞ்சிக்குடி பகுதியில் உள்ள தனியார் விடுதி ஒன்றில் விசேட செய்தியாளர் சந்திப்பில் கலந்து கொண்ட போதே அவர் மேற்கண்டவாறு தெரிவித்துள்ளார்.

அங்கு தொடர்ந்தும் கருத்துத் தெரிவித்த அவர்,

சட்டத்தரணி தொழிலிலேயே பொய் சொல்லாதவன் என்ற பெயர் எடுத்தவன் நான். ஆகவே அரசியலில் பொய் சொல்ல வேண்டிய எந்தத் தேவையும் எனக்கு கிடையாது. குறிப்பாக எதிரணியினர் இவ்வாறு கூறி திரிகின்றார்கள். ஜெனிவா தொடர்பாக பல இடங்களில் பல விளக்கங்களை கொடுத்திருக்கின்றேன்.

அதில் கேட்கப்பட்ட கேள்வி அனைத்திற்கும் பதில் கூறியுள்ளேன். ஆகவே எந்த இடத்திலும் எந்த பொய்யையும் ஒரு தடவை கூட நான் சொன்னது கிடையாது. மக்களுக்கு உண்மையான நிலைமையை கூறுவது என்பதால் பலருக்கு என்னை பிடிக்காமல் இருக்கின்றது. ஏனென்றால் சந்திரனை கொண்டு வருவோம், சூரியனை கொண்டு வருவோம் என மக்களுக்கு அவர்கள் தெரிவித்து வருகின்றனர்.

ஆனால் நான் அவ்வாறு இல்லை. இப்படி தான் என தெளிவு படுத்துகின்றேன். இவ்விடயம் தான் அவர்களுக்கு கசக்கின்றது என குறிப்பிட்டார்.

மேற்கு வங்கத்தில் ஆளும் கட்சியான திரிணாமுல் காங்கிரஸ், பாஜக மற்றும் கம்யூனிஸ்ட்-காங்கிரஸ் கூட்டணி இடையே மும்முனை போட்டி நிலவியது. 294 தொகுதிகளைக் கொண்ட மேற்கு வங்கத்தில், திரிணாமுல் காங்கிரஸ் கட்சி, 213 தொகுதிகளை கைப்பற்றியது.

இதன் மூலம் தனிப்பெரும்பான்மையுடன் அமையும் ஆட்சியில் தொடர்ந்து 3வது முறையாக மம்தா பானர்ஜி முதலமைச்சராக பதவியேற்க உள்ளார். எனினும், நந்திகிராம் தொகுதியில் போட்டியிட்ட மம்தா பானர்ஜி தோல்வியடைந்தார். அவரை எதிர்த்து போட்டியிட்ட சுவேந்து அதிகாரி, மம்தா பானர்ஜியை விட ஆயிரத்து 956 வாக்குகள் கூடுதலாக பெற்று வெற்றி பெற்றார்.

கடந்த 2016-ஆம் ஆண்டு 3 தொகுதிகளில் மட்டுமே வெற்றி பெற்றிருந்த பாஜக, தற்போது 77 தொகுதிகளை கைப்பற்றி எதிர்கட்சி அந்தஸ்தை பெற்றுள்ளது. கம்யூனிஸ்ட்-காங்கிரஸ் கூட்டணிக்கு ஒரு இடத்தில் கூட வெற்றி கிடைக்கவில்லை. தேர்தல் வெற்றி குறித்து பேசிய மம்தா பானர்ஜி, மேற்கு வங்கம் இந்தியாவை காப்பாற்றி விட்டதாக கூறினார். இதனிடையே, மம்தா பானர்ஜிக்கு வாழ்த்து தெரிவித்து, பிரதமர் நரேந்திரமோடி வெளியிட்டுள்ள டிவிட்டர் செய்தியில், மேற்கு வங்க மக்களின் தேவைகளைப் பூர்த்தி செய்ய மத்திய அரசு அனைத்து உதவிகளையும் செய்யும் என உறுதி அளித்துள்ளார்.

இதற்கிடையே மேற்கு வங்க முதலமைச்சராக மூன்றாவது முறையாக நாளை மம்தா பானர்ஜி பதவியேற்கிறார்.

27 வருட மண வாழ்க்‍கையை முறித்துக்‍கொள்வதாக மைக்‍ரோ சாஃப்ட் நிறுவனத்தை தோற்றுவித்தவர்களில் ஒருவரான பில்கேட்சும் அவரது மனைவி மெலிண்டா கேட்சும் அறிவித்துள்ளனர். ஆயினும் Bill and Melinda Gates அறக்‍கட்டளைக்‍காக இருவரும் ஒன்றாகத் தொடர்ந்து பணியாற்றுவோம் என்று தெரிவித்துள்ளனர்.

உலகளவில் மென்பொருள் தயாரிப்பில் முன்னிலை வகிக்‍கும் மைக்‍ரோ சாஃப்ட் நிறுவனத்தை உருவாக்‍கியவர்களில் ஒருவரான பில்கேட்ஸ், 27 ஆண்டுகளுக்‍கு முன்பு மெலிண்டாவை தனது வாழ்க்‍கை துணையாக ஏற்றுக்‍ கொண்டார். இவர்களுக்‍கு 3 குழந்தைகள் உள்ளனர்.

இந்நிலையில், 27 வருட மண வாழ்க்‍கையை முறித்துக்‍ கொள்வதாக அவர்கள் இருவரும் தெரிவித்துள்ளனர். இதுதொடர்பாக கூட்டாக அவர்கள் விடுத்துள்ள அறிக்‍கையில், நீண்ட சிந்தனைக்‍குப் பிறகு இந்த முடிவுக்‍கு வந்துள்ளதாக அவர்கள் தெரிவித்துள்ளனர். இனிமேலும் ஒன்றாக சேர்ந்திருக்‍க முடியாது என நம்புவதால், இவ்வாறு முடிவு செய்துள்ளதாக அவர்கள் குறிப்பிட்டுள்ளனர். ஆயினும், Bill and Melinda Gates அறக்‍கட்டளைக்‍காக தொடர்ந்து ஒன்றாக செயல்படுவோம் என்று தெரிவித்துள்ளனர்.

கர்நாடக மாநிலம் சாம்ராஜ் நகர், அரசு மருத்துவமனையில் சிகிச்சை பெற்று வந்த 23 கொரோனா நோயாளிகள் உட்பட 24 பேர்,ஓக்‍ஸிஜன் கிடைக்‍காததால், பரிதாபமாக உயிரிழந்தனர். ஆக்‍ஸிஜன் பற்றாக்‍குறை மரணங்கள் பல்வேறு இடங்களிலும் தொடர்ந்து நிகழ்வது, மக்‍களிடையே அச்சத்தையும் பீதியையும் அதிகரித்துள்ளது.

டெல்லி மருத்துவமனைகளுக்‍குத் தேவையான மருத்துவ ஆக்‍ஸிஜன் கிடைக்‍காததால், கங்காராம் மருத்துவமனை, Jaipur Golden மருத்துவமனை, Batra மருத்துவமனை ஆகிய 3 மருத்துவமனைகளில் 57 கொரோனா நோயாளிகள் கடந்த சில தினங்களில் உயிரிழந்தனர். இந்நிலையில், கர்நாடக மாநிலம் சாம்ராஜ் நகர் அரசு மருத்துவமனையில் சிகிச்சை பெற்று வந்த, கொரோனா நோயாளிகள் 23 பேர் உட்பட, 24 பேர், சிகிச்சைக்‍குத் தேவையான ஆக்‍ஸிஜன் கிடைக்‍காததால் இன்று உயிரிழந்தனர். இச்சம்பவம் அப்பகுதி மக்‍களிடையே பெரும் சோகத்தை ஏற்படுத்தியுள்ளது. உயிரிழந்த நோயாளிகளின் குடும்பத்தினரும், உறவினரும் கதறி அழுதபடி மருத்துவமனை வளாகத்தில் கூடியுள்ளனர். அரசு மருத்துவமனையின் அவல நிலையைக்‍ கண்டித்து, பொதுமக்‍களும் உயிரிழந்த நோயாளிகளின் உறவினர்களும் ஆர்ப்பாட்டம் நடத்தினார்கள். மைசூரிலிருந்து வரவேண்டிய ஆக்‍ஸிஜன் சிலிண்டர்கள் உரிய நேரத்தில் கிடைக்‍காததால், ஆக்‍ஸிஜன் பற்றாக்‍குறை ஏற்பட்டு, 24 பேர் உயிரிழந்துவிட்டதாக தகவல்கள் தெரிவிக்‍கின்றன.