17

கால்வாயில் மீன் பிடிப்பது பாவம் என்று அறிவுரை கூறியதை அடுத்து 85 வயது பௌத்த துறவி ஒருவர் தடியால் அடித்து கொலைசெய்யப்பட்டதாக வெலிகம பொலிஸ் தலைமையகம் தெரிவித்துள்ளது.

இந்த தாக்குதல் 29 ஆம் திகதி நடந்துள்ளது. இதில் பாதிக்கப்பட்ட துறவி 16 நாட்களாக மாத்தறை பொது மருத்துவமனையில் சிகிச்சை பெற்று வந்துள்ளார்..

வெலிகம கொவியாபான கபுவத்த ஸ்ரீ விவேகாராம கோயிலின் தலைமை பதவியில் இருந்த தித்தகல்லே தேவானந்த தேரரே இதில் உயிரிழந்துள்ளார்.

தாக்குதல் நடத்திய சந்தேகத்தின் பேரில் ஐந்து இளைஞர்களை பொலிசார் கைது செய்துள்ளனர்.

குறித்த விகாரைக்குப் பின்னால் உள்ள மீன்களுக்கு அரிசி வீசும் பழக்கம் தேரருக்கு நீண்ட காலமாக இருந்து வருகிறது. 29 ஆம் திகதி அந்த இடத்தில் தங்கியிருந்த ஒரு இளைஞன் மீன்பிடிக்கத் தொடங்கியுள்ளார்.

அதை தேரர் தடுக்க முற்பட்ட போதே இவ்வனர்த்தம் ஏற்பட்டுள்ளது. சந்தேக நபர் மேலும் 5 பேருடன் வந்து துறவியைத் தாக்கியதாக பொலிசார் தெரிவித்தனர்.

“பாலஸ்தீன மக்களின் மாநில உரிமைக்கான நியாயமான உரிமையை உறுதிப்படுத்த வேண்டும் என்ற நிலைப்பாட்டை நான் எப்போதும் வைத்திருக்கிறேன்.” என  இலங்கை பிரதமர் மஹிந்த ராஜபக்ஷ  தெரிவித்துள்ளார்.

அண்மையில் இஸ்ரேலிய-பாலஸ்தீனிய பிரச்சினை பெரிதாக வெடிக்க ஆரம்பித்துள்ளது. இது தொடர்பில் குறிப்பிடும் போதே பிரதமர் மேற்கண்டவாறு கூறியுள்ளார்.

இஸ்ரேலிய-பாலஸ்தீனிய பிராந்தியத்திற்குள் வெடித்துள்ள மோதல் குறித்து ஆழ்ந்த அக்கறை கொண்டுள்ளேன்.

இது மோதலின் இருபுறமும் உள்ள மக்களுக்கு சொல்லப்படாத துன்பத்தை ஏற்படுத்தியுள்ளது. பல குழந்தைகளின் இறப்பு உட்பட, மக்களுக்கு அதிக தீங்கு மற்றும் துயரத்தை ஏற்படுத்தும் மோதலாகும். இது அண்டை பிராந்தியத்தில் பரவக்கூடிய சாத்தியக்கூறுகளைக் கொண்டுள்ளது, இதனால் ஒரு மோதலைத் தூண்டுகிறது, இது உலகம் முழுவதும் பேரழிவு விளைவுகளை ஏற்படுத்தும்.

பாலஸ்தீனியர்களின் கோரிக்கையை நீண்டகாலமாக தாம் ஆதரிப்பவராகவும், பாலஸ்தீனத்துடனான ஒற்றுமைக்கான இலங்கைக் குழுவின் ஸ்தாபகத் தலைவராகவும், பாலஸ்தீன மக்களின் மாநில உரிமைக்கான நியாயமான உரிமையை உறுதிப்படுத்த வேண்டும் என்ற நிலைப்பாட்டை நான் எப்போதும் வைத்திருக்கிறேன்.

பாலஸ்தீனத்தின் நியாயமான மற்றும் முக்கியமான கேள்விக்கு தீர்வு காண, பாலஸ்தீனிய மற்றும் இஸ்ரேலிய மக்களின் பாதுகாப்பு கவலைகளை அங்கீகரிப்பது கட்டாயமாகும்.

இஸ்ரேல் மற்றும் பாலஸ்தீன மக்கள் சமாதானம், பாதுகாப்பு மற்றும் பரஸ்பர அங்கீகாரத்தின் பக்கபலமாக இலங்கை தனது நிலைப்பாட்டில் நிற்கிறது என்றும், அனைத்து விடயங்களும் பேச்சுவார்த்தைகளின் மூலம் நிரந்தரமாக தீர்க்கப்பட வேண்டும்.

இஸ்ரேலிய-பாலஸ்தீனியப் பகுதி புனித நிலம் என்பது எனது உண்மையான நம்பிக்கை, இது உலகெங்கிலும் உள்ள பல மதங்களைச் சேர்ந்தவர்களுக்கும், மனிதகுலத்திற்கும் புனிதமானது. எனவே, இரு தரப்பினரும் கட்டுப்பாட்டை கடைப்பிடிக்க நான் மனதார கேட்டுக்கொள்கிறேன். போர் நிறுத்தத்திற்கான பேச்சுவார்த்தைகளைத் தொடங்குங்கள்.” என பிரதமர் மகிந்த ராஜபக்ஷ கூறினார்.

யாழ்.பல்கலைக் கழகத்தைச் சுற்றி படையினர் மற்றும் பொலிஸார் குவிக்கப்பட்டிருப்பதாக அங்கிருந்து கிடைக்கும் தகவல்கள் தெரிவிக்கின்றன.

பல்கலையில் சில மாணவர்கள் நினைவேந்தலில் ஈடுபடலாம் என புலனாய்வுத் தகவல்கள் கிடைத்திருப்பதனால் படையினர் குறித்த நடவடிக்கையை எடுத்துள்ளனர்.

மேலும் இதன் காரணமாக அந்தப் பகுதியில் பதற்றமான சூழ்நிலை காணப்படுகிறது.

நாட்டில் எழுந்துள்ள கொரோனா தொற்று நிலமைகளை அடுத்து, இம்மாதத் தொடக்கத்தில் இருந்து, நாட்டில் உள்ள சகல பல்கலைக்கழகங்களினதும் கல்வி நடவடிக்கைகள் இடை நிறுத்தப்பட்டுள்ளது. யாழ்ப்பாணப் பல்கலைக்கழகத்திலும் அத்தியாவசியப் பரீட்சை செயற்பாடுகள், ஆய்வு நடவடிக்கைகள் தவிர மாணவர்கள் உள் நுழைவு தடுக்கப்பட்டிருந்தது. ஆயினும் நிர்வாக நடவடிக்கைகள் தொடர்ந்தும் இடம்பெற்று வருகிறது.

எனினும் பல்கலைக்கழகத்தினுள் மாணவர்கள் சிலர் நாளை 18 ஆம் திகதி நினைவேந்தல் நிகழ்வு ஒன்றை செய்வதற்குத் தயாராகி உள்ளதாகத் தமக்குத் தகவல் கிடைத்திருப்பதனால், தீவிர கண்காணிப்புக்கு உட்படுத்தப்பட்டுள்ளதுடன், பல்கலைக்கழகத்தைச் சுற்றி இராணுவத்தினரும் குவிக்கப்பட்டுள்ளனர்.

தீவிர கண்காணிப்பை மீறிச் செயற்படுவோர் மீது சட்ட நடவடிக்கைகள் மேற்கொள்ளப்படும் எனவும் பொலிஸ் தரப்பினால் தெரிவிக்கப்பட்டுள்ளதாக அறிய வருகிறது.

(படம் – கோப்புப்படம்)

“தமிழர்களை போலவே அநியாயமாக உயிரிழந்த சிங்கள -முஸ்லிம் மக்களும் ஒரே நாளில் நினைவு கூரப்பட ஒரு பொதுவான பொறிமுறை உருவாக்கப்பட வேண்டும்.” என ஜனநாயக போராளிகள் கட்சியின் சார்பில் க. துளசி வெளியிட்டுள்ள அறிக்கையில் தெரிவிக்கப்பட்டுள்ளது.

அவ் அறிக்கையில் மேலும் தெரிவிக்கப்பட்டுள்ளதாவது,

கடந்த காலங்களில் தெற்கில் உருவாகிய சமூக மாற்றத்திற்கான போராட்டத்தை நசுக்குவதில் தனது வக்கிரமான இராணுவமேலாண்மையை கையாண்ட அப்போதைய இலங்கை அரசு அதில் வெற்றி கண்டிருந்தது. அந்த வெற்றி என்பது மானிட குலத்திற்கெதிரான மிலேச்சத்தனமான படுகொலைகளின் வெற்றியாகவே பார்க்கப்பட வேண்டும்.

தனது அரசையும் இருப்பையும் தக்கவைப்பதற்காக பல ஆயிரம் சிங்கள இளையோர்களையும் புத்திஜீவிகளையும் படுகொலைசெய்த இந்த இராணுவ சிந்தனைவாதம் காலப்போக்கில் தமிழ் சமூகத்தையும் பீடித்துக்கொண்டது. தெற்கின் இராணுவ மனோபாவத்தை எதிர்கொள்ள கூடியதாக தமிழினம் தமது அரசியல், உயிர்வாழ்வதற்கான உரிமைகளை வெற்றிகொள்ளும் பொறிமுறையாக இராணுவ இயற்பியலின் மீது நம்பிக்கைகொள்ள தள்ளப்பட்டனர்.அதுவே அன்றைய காலத்தின் தமிழ் இளைஞர்களின் ஒரே ஒரு முடிவாகவும் இருந்தது. இதன் தொடர்சியும் அதன் முடிவும் பல இலச்சக்கணக்கான உயிர்களையும் உடைமைகளையும் அழித்திருக்கின்றது. பல இலச்சக்கணக்கான தமிழ்மக்கள் தமது பூர்வீக வாழ்விடங்களில் இருந்து வேரோடு  வெளியேற்றப்பட்டு பல்வேறு நாடுகளில் தஞ்சமடையவும் காரணமானது.

தமிழர்களை போலவே இலங்கை மண்ணில் அநியாயமாக உயிரிழந்த சிங்கள -முஸ்லிம் மக்களும் ஒரே நாளில் நினைவு கூரப்பட ஒரு பொதுவான பொறிமுறை உருவாக்கப்பட வேண்டும். பெற்றோர் உரித்துடையோர் ஒரே நாளில் அவர்களது மத தலங்களிலும் அவர்கள் உயிரிழந்த இடங்களிலும் ஒன்று கூடி அவர்களை நினைவில் கொள்ளும் உரிமை அவர்களுக்கு உள்ளதென்பது உறுதிப்படுத்தப்பட வேண்டும்.

அன்பான உறவுகளே ஒரு இனத்தின் விடுதலை என்பது ஒரு சில சமர்களையோ சம்பவங்களையோஅடிப்படையாக கொண்டதல்ல. அது தேசவிடுதலையின் ஆன்மாவோடு தசாப்தங்கள் கடந்து பயணிக்க வேண்டியது.நாம் ஒரு திடகாத்திரமான போராட்ட வடிவமைப்பை கொண்டிருந்தவர்கள். அதற்காக அதிஉச்ச தியாகங்கள் செய்யப்பட்டிருக்கின்றன. 2009 பின்னரான எமது மக்களுக்கான அரசியல் சமூக விடிவிற்காக எந்தவொரு தத்ரூபமான வடிவங்களையும் நாம் கொண்டிருக்க முயற்சிக்காமையானது துரதிஸ்ட வசமானது.

கனதியான ஒரு போராட்டத்தின் பரிணாமத்தினை எமது மக்களின் நலன்சார்ந்து அதன் வழிவகைகளை கோட்பாட்டு ரீதியில் முயற்சிக்கவில்லை.   2001 தமிழினம் பலமடைந்திருந்த போது பல கசப்புணர்வுகளை தாண்டி ஒன்றினைந்திருந்த தமிழ் அரசியல் தரப்புக்கள். முள்ளிவாய்க்காலின் பின்னர் நாம் பலமிழந்த நிலையில் தமக்குள் தாமே சிதைவுற்று தமிழினத்தின் தேசிய பலத்திற்கு ஊறு விளைவித்தமையினை பேரவலத்தின் ஓலத்தில் இறந்துபோன ஆத்மாக்களும் நெஞ்சுரத்தோடு வீழ்ந்துபோன ஆன்மாக்களும் ஒருபோதும் மன்னிக்காது.

இலங்கைத்தீவில் நீடித்த பெரும்போர் ஆரம்பிக்கப்பட்ட பொழுதுகளில் அதன் காரண கர்த்தாக்களாகவோ அல்லது அந்த போரில் நேரில் சம்மந்தப்பட்ட தரப்புக்களாகவோ  நாங்கள் இருக்கவில்லை.ஆனால் முள்ளிவாய்காலில் இந்த போர் முடித்து வைக்கப்பட்டபோது அதன் பிரதான வகிபங்காளர்களாக இலங்கையின் தற்போதைய ஆட்சியாளர்களே போர்க்களத்தில் நின்றிருந்தனர்.

இந்த ஜதார்த்தத்தின் அடிப்படையில் போர் முடிவிற்கு பின்னர். இலங்கையின் பாதிக்கப்பட்டோருக்கான நீதி மீளிணக்கம் மற்றும் மீள் கட்டுமானம் சமூக பொருளாதார அபிவிருத்திஇனங்களுக்கிடையிலான சகவாழ்வு போன்ற இலக்குகளை எட்டுவதற்கானதும் ஏற்றுகொள்ளதக்கதும் ஜதார்த்தபூர்வமானதுமான  ஒரு செல்நெறிப்போக்கினை உருவாக்குவதற்கான ஏதுநிலைகளில் அதியுச்ச பொறுப்பும் அதிகாரமும் தற்போதைய ஜனாதிபதி கோட்டபாய ராஜபக்‌ஷ தலைமையிலான அரசாங்கத்திடம் உள்ளதென  நாங்கள் திடமாக நம்புகிறோம்.அந்த செல்நெறிப்போக்கினை கட்டி எழுப்புவதற்கான காத்திரமான பங்களிப்பையும் அனுசரணையையும் செய்ய வேண்டிய தார்மீக கடமை  இந்தியாவிற்கும் இலங்கை பிரச்சனைகளில் கரிசனையுள்ள சர்வதேச நாடுகளுக்கு உள்ளதென்பதை நாம் வலியுறுத்துகிறோம்.” என அந்த அறிக்கையில் குறிப்பிடப்பட்டுள்ளது.

மும்மொழிக் கொள்கையை பின்பற்றுமாறு நாட்டில் இயங்கும் ஒரு சீன நிறுவனத்திற்கு இலங்கைக்கான சீனத் தூதரகம் அறிவுறுத்தல் வழங்கியுள்ளது.

பெயர் பலகைகள் அமைக்கும் போது நாட்டின் உத்தியோகபூர்வ மொழிகளை புறக்கணிப்படுவதாக சமூக வலைத்தளங்களில் பல குற்றச்சாட்டுக்கள் முன்வைக்கப்பட்டன.

குறிப்பாக அண்மையில் சீன நிறுவனம் ஒன்று அமைத்துள்ள பெயர்பலகையில் தமிழ்மொழி இடம்பெறாதமையை கண்டித்து மட்டக்களப்பு மாவட்ட நாடாளுமன்ற உறுப்பினர் இரா. சாணக்கியன் டுவிட்டரில் பதிவொன்றினை பகிர்ந்திருந்தார்.

இந்நிலையில் இதற்கு பதிலளித்த இலங்கையில் உள்ள சீன தூதரகம், தமது நிறுவன பெயர்பலகையை மாற்றியமைக்குமாறு ஜே.வி. கட்டடத் தள நிறுவனதிற்கு அறிவுறுத்தல் வழங்கியுள்ளது.

அத்தோடு இலங்கையில் உள்ள மும்மொழிக்கொள்கையை சீனா மதிப்பதாகவும் அதனையே சீன நிறுவங்கள் பின்பற்ற வேண்டும் என்றும் கோரிக்கை விடுத்துள்ளது.

மேலும் சீன தேசிய அருங்காட்சியகத்தில் தமிழ்மொழி இணைக்கப்பட்டுள்ளமையையும் சுட்டிக்காட்டி சீன தூதரகம் டுவிட்டரில் பதிவிட்டுள்ளது.

முள்ளிவாய்க்கால்  12 ம் ஆண்டு நினைவேந்தலை கொவிட் 19 சுகாதார விதிகளை பின்பற்றி நினைவுகூர முடியும் எனவும் பயங்கரவாத நடவடிக்கைகளை தூண்டாத வகையிலும் கவனத்தில் கொண்டு நினைவேந்தலை மேற்கொள்ள வேண்டும் என திருத்திய கட்டளையை வெளியிட்டு முல்லைத்தீவு நீதிமன்றம் தீர்ப்பை வழங்கியுள்ளது. இந்த வழக்கின் மீதான ஒரு தெளிவான திருத்திய கட்டளை வழங்கப்படும் என மன்று தெரிவித்துள்ளது.

கடந்த 13 ஆம் திகதி முல்லைத்தீவு நீதவான் நீதிமன்றால் 27 பேருக்கு எதிராக முள்ளிவாய்க்கால் நினைவேந்தலை மேற்கொள்ள தடையுத்தரவு பிறப்பிக்கப்பட்டிருந்தது. முல்லைத்தீவு மாவட்டத்தின் 7 காவற்துறை பிரிவுகளால் 27 பேருக்கு எதிராக முள்ளிவாய்க்கால் நினைவேந்தலை மேற்கொள்ள தடைவிதிக்குமாறு கோரி முல்லைத்தீவு நீதிமன்றில் வழக்கு தாக்கல் செய்யபட்டு தடையுத்தரவு பெறப்படடிருந்தது.அத்தோடு இன்றும் பலருக்கு தடையுத்தரவு பெறுவதற்கு காவற்துறையினர் ஏற்பாடுகளை செய்திருந்தனர்

இந்நிலையில் இந்த வழக்கின் மீது இன்றையதினம் நகர்தல் பத்திரம் தாக்கல் செய்யப்பட்டு வழக்கு விசாரணைக்கு எடுத்துக்கொள்ளபட்ட போதே இந்த திருத்திய கட்டளையை ஆக்கி முல்லைத்தீவு நீதவான் நீதிமன்றம் தீர்ப்பளித்துள்ளது.

முல்லைத்தீவு நீதிமன்ற நீதிபதி ரி .சரவணராஜா முன்னிலையில்  இந்த வழக்கு விசாரணைகள் இன்று இடம்பெற்றது. இந்த வழக்கில் சிரேஸ்ட சட்டதரணி அன்ரன் புனிதநாயகம், நடராஜர் காண்டீபன், கனகரத்தினம் சுகாஸ், சுதர்சன், எஸ் தனஞ்சயன் உட்பட முல்லைத்தீவு நீதிமன்றின் ஏனைய சட்டதரணிகளும் முன்னிலையாகி தமது வாதங்களை முன்வைத்திருந்தனர்.

இதன் பின்னர் நீதிமன்று ஏற்கனவே வெளியிட்ட கட்டளை மீதான திருத்திய வெளியீட்டை இன்று வெளியீடுவதாக கட்டளையில் தெரிவித்துள்ளதோடு முள்ளிவாய்க்கால் நினைவேந்தலை சுகாதார விதிகளை கடைபிடித்து மேற்கொள்ளலாம் எனவும் பயங்கரவாத செயற்பாடுகளை தூண்டாத வண்ணம் மேற்கொள்ளவேண்டும் எனவும் நீதிமன்று கட்டளை ஆக்கியுள்ளது .

“பெருந்தோட்ட நிறுவனங்கள் 1,000 ரூபா சம்பள அதிகரிப்பை வழங்குவதற்கு அரசாங்கம் உத்தரவிட்டதை தொடர்ந்து, தொழிலாளர்கள் மீது பல்வேறு சுமைகளை சுமத்தி வருகின்றது.” என மலையக மக்கள் முன்னணி மலையக தொழிலாளர் முன்னணியின் தலைவரும் நுவரெலியா மாவட்ட நாடாளுமன்ற உறுப்பினருமான வேலுசாமி இராதாகிருஷ்ணன் தெரிவித்துள்ளார்.

இது தொடர்பாக தொழில் ஆணையாளர் பெருந்தோட்ட கம்பனிகளையும் தொழிற்சங்கங்களையும் அழைத்து பேச்சுவார்த்தை ஒன்றை முன்னெடுக்க நடவடிக்கை எடுக்க வேண்டும் என நாடாளுமன்ற உறுப்பினர் வேலுசாமி இராதாகிருஷ்ணன் தொழில் ஆணையாளருக்கு எழுதியுள்ள கடிதம் ஒன்றிலேயே குறிப்பிட்டுள்ளார்.

இந்த கடிதத்தில் மேலும் குறிப்பிடப்பட்டுள்ளதாவது,

“பெருந்தோட்ட நிறுவனங்கள் 1,000 ரூபா சம்பள அதிகரிப்பின் பின்பு தொழிலாளர்கள் மீது அவர்களுடைய தொழில் மற்றும் தொழிலாளர் உரிமைகள் தொடர்பாக மிகவும் கடுமையாக நடந்து கொள்கின்றார்கள்.

தொழிலாளர்களை அடிமைகளை நடத்துவது போல நடத்த முற்படுகின்றார்கள். ஒரு சில தோட்ட அதிகாரிகள் அடாவடித்தனமாகவும் தொழிலாளர்கள் தங்களுடைய அடிமைகள் எனவும் நினைத்து செயற்படுகின்றார்கள். இது தொடர்பாக தொழிலாளர்கள் தொடர்ந்தும் எங்களுடைய கவனத்திற்கு கொண்டு வந்துள்ளார்கள்.

எனவே, இந்த விடயம் தொடர்பாக தாங்களுடைய தலைமையில் கொழும்பில் பேச்சுவார்த்தை ஒன்றை ஏற்பாடு செய்து இந்த முரண்பாடுகளை சுமுகமாக தீர்த்துக் கொள்வதற்கு நடவடிக்கை எடுக்குமாறு தாங்களை கேட்டுக் கொள்வதுடன்.

மேற்குறித்த விடயம் தொடர்பாக உரிய நடவடிக்கை எடுக்க தவரும் பட்சத்தில் தொழிலாளர்கள் பொறுமை இழந்து அமைதியற்ற ஒரு நிலைமை ஏற்படலாம். எனவே, இது தொடர்பாக உடனடியாக நடவடிக்கை எடுக்க வேண்டும் எனவும் அவர் தெரிவித்துள்ளார்.

2009 ல் நடைபெற்ற இறுதி யுத்தத்தில் உயிரிழந்த உறவுகளை நினைவு கூரும் முகமாக ஒவ்வொரு வருடமும் மே மாதம் 12ஆம் திகதி முதல் 18ஆம் திகதி வரை தமிழ் இனப்படுகொலை வாரம் அனுஷ்டிக்கப்பட்டு வருகிறது அந்த வகையிலே இந்த வருடம் பல்வேறு தடைகளுக்கு மத்தியிலும் இந்த நினைவேந்தல் நிகழ்வுகள் நாட்டில் ஏற்பட்டுள்ள கொரோனா அச்சுறுத்தலுக்கு மத்தியிலும் மிக எளிமையான முறையில் இடம்பெற்று வருகின்றன.

அந்த வகையில் முல்லைத்தீவு மாவட்டத்தில் முள்ளிவாய்க்கால் நினைவேந்தல் வளாகத்தில் சுடர் ஏற்றுவதற்கு பலருக்கு தடை உத்தரவுகள் பெறப்பட்டு இருக்கின்ற நிலைமையிலும்  இன்று இந்த  இனப்படுகொலை வாரத்தின் ஆறாவது நாளில் முன்னாள் நாடாளுமன்ற உறுப்பினரும் வடக்கு மாகாண சபையின் முன்னாள் உறுப்பினருமாகிய எம்.கே சிவாஜிலிங்கம் அவர்கள் முள்ளிவாய்க்காலில் நினைவு தூபியில் சென்று சுடரேற்றி அஞ்சலி செலுத்தியுள்ளார்.

இறுதி யுத்தத்தில் படுகொலை செய்யப்பட்ட உறவுகளை நினைவுகூரும் முள்ளிவாய்க்கால் படுகொலையின் 12ஆம் ஆண்டு நினைவேந்தல் தமிழர்கள் வாழும் தேசமெங்கும் நாளை செவ்வாய்க்கிழமை அனுஷ்டிக்கப்படவுள்ளது.

இந்தநிலையில், முள்ளிவாய்க்கால் நினைவு முற்றத்தில் நினைவேந்தல் நிகழ்வுக்கு முல்லைத்தீவு நீதிவான் நீதிமன்றத்தால் விதிக்கப்பட்டுள்ள தடையுத்தரவை உடன் இரத்துச் செய்யுமாறு கோரி அதே நீதிமன்றத்தில் இன்று திங்கட்கிழமை நகர்த்தல் பத்திரம் தாக்கல் செய்யப்படவுள்ளது.

முள்ளிவாய்க்கால் மண்ணில் நினைவேந்தலில் கலந்துகொள்வதைத் தடுக்கும் வகையில் 27 பேருக்குத் தடையுத்தரவு பிறப்பிக்கப்பட்டதுடன், அவர்களுக்கு வழங்கப்பட்ட தடையுத்தரவில் அவர்களுடன் இணைந்து செயற்படுகின்றவர்களுக்கும் தடையுத்தரவு வழங்கப்படுகின்றது எனத் தெரிவிக்கப்பட்டுள்ளது. அத்துடன் இன்றும் 20 இற்கும் மேற்பட்டவர்களுக்குத் தடையுத்தரவு பெறுவதற்கான நடவடிக்கைகளை காவல்துறையினர் முன்னெடுத்துள்ளனர்.

இந்தத் தடையுத்தரவுகளை உடன் இரத்துச் செய்யுமாறும், நினைவேந்தல் செய்வதற்கு அனுமதிக்குமாறும் கோரியே முல்லைத்தீவு நீதிவான் நீதிமன்றத்தில் இன்று நகர்த்தல் பத்திரம் தாக்கல் செய்யப்படவுள்ளது.

யாழ்ப்பாணத்தில் முள்ளிவாய்க்கால் நினைவேந்தல் நிகழ்வுக்குத் தடையுத்தரவு பிறப்பிக்குமாறு தெரிவித்து யாழ். காவல்துறையினரால் நேற்று முன்தினம் சனிக்கிழமை தாக்கல் செய்யப்பட்ட வழக்கை யாழ். நீதிவான் நீதிமன்றம் தள்ளுபடி செய்தமையைச் சுட்டிக்காட்டி முல்லைத்தீவு நீதிவான் நீதிமன்றத்தில் நகர்த்தல் பத்திரம் தாக்கல் செய்யப்படவுள்ளது.

முன்னாள் வடக்குமாகாண சபை உறுப்பினர் சார்பில் சட்டதரணி தனஞ்சயன் தலைமையில் ஏனைய சட்டதரணிகளும் தமிழ் தேசிய மக்கள் முன்னணியின் சார்பிலும் சட்டதரணிகளான சுகாஸ் ,காண்டீபன் ஆகியோரும் மன்றில் முன்னிலையாகவுள்ளனர்.

சில நாட்களுக்கு முன்பு முள்ளிவாய்க்காலிலுள்ள நினைவுத்தூபி உடைக்கப்பட்டு மதகுருமாரால் கொண்டுவரப்பட்ட நினைவுக்கல்லும் அகற்றப்பட்டிருந்தமை குறிப்பிடத்தக்கது.

“விடுதலைப்புலிகளின் தலைவர் இந்த நாட்டில் செய்ய முடியாது போனதை ஆளும் தரப்பினர் செய்வார்களா..? இல்லையா..? என்பதை பொறுத்திருந்து பார்ப்போம்.” என ஐக்கிய மக்கள் சக்தியின்  நாடாளுமன்ற உறுப்பினர் நளின் பண்டார சவால் விடுத்துள்ளார்.

கொழும்பிலுள்ள எதிர்க்கட்சி தலைவர் அலுவலகத்தில் நேற்று ஞாயிற்றுக்கிழமை நடைபெற்ற ஊடகவியலாளர் சந்திப்பிலேயே அவர் மேற்கண்டவாறு தெரிவித்துள்ளார்.

அங்கு அவர் மேலும் கூறுகையில்,

துறைமுக நகர் சட்ட மூலம் நிறைவேற்றப்பட்டால் இலங்கைக்குள் இரு நாடுகள் இரு ஆட்சி என்ற நிலைமை தோற்றம் பெற்று விடும். எனவே இவ்வாறான நிலைமை தோற்றம் பெறாமலிருப்பதற்கு ஆளுந்தரப்பு நாடாளுமன்ற உறுப்பினர்கள் குறித்த சட்ட மூலத்திற்கு ஆதரவளிக்கக் கூடாது.

எனினும் பிரபாகரனால் செய்ய முடியாததை இந்த சட்ட மூலத்திற்கு ஆதரவளிப்பதன் மூலம் இவர்கள் செய்து விடுவார்களா என்பதை பொறுத்திருந்தே பார்க்க வேண்டும். அவ்வாறு செய்தால் அது நாட்டை காட்டிக் கொடுக்கும் செயலாகும் என மேலும் அவர் தெரிவித்தார்.