June

வடக்கு அரசியல் சூழலை பொருத்தவரையில் எந்தக்கட்சியும் யாருடனும் இணைந்து பயணிக்க முயற்சி செய்தது கிடையாது. அதிலும் தமிழ்த் தேசிய மக்கள் முன்னணி இன்னுமு் சற்று வித்தியாசமாக கட்சிக்குள்ளேயே இணைந்து செயற்பட முடியாதவர்களாக  கடிபட்டுக்கொண்டிருக்கின்றனர். கஜேந்திரர்களை யார் எதிர்த்தாலும் அவர்களுக்கு உடனடியாக ஒரு துரோகி பட்டத்தை கொடுத்து விடுகின்ற முனைப்பிலேயே அக்கட்சி தலைவர் உட்பட பலருடைய நகர்வுகள் அமைந்திருக்கும்.

அவர்களுடைய கட்சிக்குள் ஒற்றுமை இல்லை. புகைந்து கொண்டிருக்கும் யாழ்.மாநகர முதல்வர் மணிவண்ணன் தொடர்பான பிரச்சினைகளே இதற்கு தெளிவான எடுத்துக்காட்டு. இது தவிர கஜேந்திரர்களுடைய தேர்தல் மாவட்டமான யாழ்ப்பாணத்திலுள்ள தமிழர் அரசியல் தலைமைகளுடன் கூட இணைந்து செல்பவர்களாக அவர்கள் இல்லை. இந்த நிலையில் மலையகத்துக்கு திடீர் விஜயம் செய்திருந்த கஜேந்திரர்கள்  மலையக கட்சிகளுக்கும் – முஸ்லீம் கட்சிகளுக்கும் இணைந்து செயற்பட அழைப்பு விடுத்துள்ள வேடிக்கை நிகழ்ந்துள்ளது.

சரி செய்திக்கு வருவோம்..,

நுவரெலியா – மஸ்கெலியா பகுதியைச் சேர்ந்த 600 குடும்பங்களுக்கு இன்று நிவாரண உதவிகளை வழங்கிய தமிழ்த் தேசிய மக்கள் முன்னணியின் தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம், மலையக மற்றும் முஸ்லிம் தலைவர்கள் ஒரு பொது நிலைப்பாட்டுக்கு வரும் பட்சத்தில் அவர்களுடன் இணைந்து பயணிப்பதில் எவ்வித தயக்கமும் இல்லை என குறிப்பிட்டுள்ளார்.

இதன்போது கஜேந்திரகுமார் பொன்னம்பலம் மேலும் கூறியுள்ளதாவது,

“தமிழ் பேசும் மக்களைப் பிரதிநிதித்துவப்படுத்தும் கட்சிகள் அனைத்தும், ஒன்றிணைந்து செயற்படவேண்டும் என்பதே எமது எதிர்ப்பார்ப்பாகும். கடந்த 73 ஆண்டுகளாக வடக்கு- கிழக்கில் வாழும் தமிழ் மக்களுக்கு எதிராக  அடக்குமுறைகள் கட்டவிழ்த்து விடப்பட்டன.

அத்தகைய அடக்குமுறைகள் தற்போது  மலையக மக்கள் மற்றும் முஸ்லிம் மக்களுக்கு எதிராக முன்னெடுக்கப்பட்டு வருகின்றன.

எனவே  மலையக தலைமைகள் மற்றும் முஸ்லிம் அரசியல் தலைமைகள், இத்தகைய நிலைமைகளை உணர்ந்து தமிழ் பேசும் மக்களின் அரசியல் அபிலாசைகளை நிறைவேற்றிக்கொள்ளும் விதத்தில் தங்களின் நிலைப்பாட்டை மாற்றிக்கொண்டால் இணைந்து செயற்படுவதில் எந்த பிரச்சினையும் கிடையாது”  என அவர் குறிப்பிட்டுள்ளார்.

சுதந்திரத்துக்கு பின்னரான இலங்கையில் மலையக மக்களின் வாக்குரிமை பறிக்கப்பட்ட போது அரசுக்கு ஆதரவாக தயைசைத்தவர் கஜேந்திரகுமார் பொன்னம்பலத்தின் பாட்டனார் ஜி.ஜி.பொன்னம்பலமாவார் என்பது கூடுதல் தகவல்..!

நாட்டில் தற்போது மிகப்பெரும் பூதாகர பிரச்சினையாக உருமாறியுள்ளது எரிபொருட்களுக்கான விலைகள் உயர்த்தப்பட்டமையாகும். எதிர்க்கட்சிகளுடைய விமர்சனங்களுக்கு அப்பால் பெரமுன கூட்டணிக்குள் இது சலசலப்பை ஏற்படுத்தியுள்ளது. எரிபொருள் விலை அதிகரிப்புக்கும் ஜனாதிபதி மற்றும் பிரதமர் ஆகியோருக்கு தொடர்பில்லை என்றும் அது எரிசக்தி அமைச்சர் உதய கம்மன்பில அவர்களுடைய தன்னிச்சையான முடிவு எனவும் கூறப்பட்டுள்ள நிலையில் “மக்களை அசௌகரியத்திற்கு உட்படுத்தும் வகையில் எரிபொருள் விலைகளை உயர்த்திய அமைச்சர் உதய கம்மன்பில பதவி விலக வேண்டும்.” என பொதுஜன முன்னணியின் பொதுச் செயலாளர் சட்டத்தரணி சாகர காரியவசம் அறிக்கை ஒன்றை வெளியிட்டிருந்தார்.

இந்நிலையில் இந்த குற்றச்சாட்டுக்களுக்கு பதிலளிக்கும் வகையில் அமைச்சர் கம்மன்பில தனது கருத்துக்களை ஊடகங்களிடம் இன்று வெளியிட்டுள்ளார்.

அங்கு பேசிய அவர்,

எரிபொருட்களுக்கான விலை உயர்த்தப்படுவதற்கு பிரதமரும் நிதியமைச்சருமான மஹிந்த ராஜபக்சவின் எழுத்து மூல அனுமதி அவசியமானது என்பது கூட தெரியாத ஒருவரே பொதுஜன முன்னணியின் பொதுச் செயலாளராக கடமையாற்றி வருகின்றார் என அவர் சுட்டிக்காட்டியுள்ளார்.

பிரதமரின் புகைப்படத்தை தாங்கிய கடித தலைப்புடனான தாளில் எரிபொருள் விலை ஏற்றம் தொடர்பில் விமர்சனம் செய்தது மூலம் அவர் பிரதமர் மஹிந்த ராஜபக்சவையே விமர்சனம் செய்துள்ளதாக உதய கம்மன்பில தெரிவித்துள்ளார்.

ஜனாதிபதி கோட்டாபய ராஜபக்ச தலைமையில் கூடிய வாழ்க்கைச் செலவு குறித்த துணை அமைச்சுக் குழுவினாலேயே எரிபொருள் விலையேற்றம் பற்றிய இறுதித் தீர்மானம் எடுக்கப்பட்டது எனவும் அதனைகூட புரிந்து கொள்ள முடியாத ஒருவர் பொதுஜன முன்னணியின் முக்கிய பதவி வகித்து வருகின்றார் என அவர் குறிப்பிட்டுள்ளார்.

நாடாளுமன்ற உறுப்பினர் சாகர காரியவசம் இவ்வாறான கருத்து வெளியிட்டிருந்தால் அவருக்கு விசர் என்று அதை பொருட்படுத்தியிருக்க தேவையில்லை எனவும், கட்சியொன்றின் பொதுச் செயலாளர் சட்டத்தரணி இவ்வாறு கருத்து வெளியிடுவதனை உதாசீனம் செய்ய முடியாது எனவும் குறிப்பிட்டுள்ளார்.

ஜனாதிபதியும் பிரதமரும் எடுத்த தீர்மானத்தை ஊடகங்களின் முன்னிலையில் அறிவித்தனைத் தவிர வேறு எதனையும் தாம் செய்யவில்லை எனவும் ஜனாதிபதியும் பிரதமரையும் அசௌகரியத்திற்கு உட்படுத்த செயற்படும் அந்த மறைகரம் எது என்பது கண்டறியப்பட வேண்டுமெனவும் அவர் தெரிவித்துள்ளார்.

இந்த எரிபொருள் விலையேற்றம் பற்றிய அனைத்து குற்றச்சாட்டுக்களுக்கும் பதிலளிக்க தாம் தயார் எனவும், சாகர காரியவவசம் முடிந்தால் பகிரங்க விவாதம் ஒன்றுக்கு வர வேண்டும் எனவும் இதனை ஓர் சவாலாக விடுப்பதாகவும் அவர் குறிப்பிட்டுள்ளார்.

இந்த செயற்பாடுகளின் பின்னணியில் பசில் ராஜபக்ச செயற்படுகின்றாரா என ஊடகவியலளார்கள் கேள்வி எழுப்பிய போது, தமது பின்னணியில் பசில் இல்லை எனவும் சாகர பின்னணியில் பசில் இருக்கின்றாரா தெரியவில்லை அதனை ஆராய்ந்துதான் பார்க்க வேண்டுமெனவும் தெரிவித்துள்ளார்.

சாகர காரியவசம் தம்மை பதவி விலகுமாறு கோரியதன் மூலம் அவரது அறிவு மட்டத்தை நாட்டு பொதுமக்களுக்கு அம்பலப்படுத்தியுள்ளதாக உதய கம்மன்பில குற்றம் சுமத்தியுள்ளார்.

இந்த நிலையில் இது தொடர்பில் ஜனாதிபதி ஊடகப் பிரிவு வெளியிட்டுள்ள அறிக்கையில்  “எரிபொருள் விலையை அதிகரிக்க மேற்கொண்ட தீர்மானமானது தேசிய பொருளாதாரத்தை வலுப்படுத்துவதற்கான பொது வேலைத்திட்டம் எனவும்  ஜனாதிபதி தலைமையில் பிரதமர் மற்றும் விடயத்திற்கு பொறுப்பான அமைச்சரின் பங்கேற்பில் இடம்பெற்ற வாழ்க்கைச் செலவு குழுவில் இது தொடர்பாக அவதானம் செலுத்தப்பட்டதாகவும்  ஜனாதிபதியின் ஊடகப் பிரிவு குறிப்பிட்டுள்ளது.

அண்மைய நாட்களில்  இலங்கையில் வேகமாக பரவி வரும் கொரோனா காரணமாக முழுமையான இலங்கையும் ஏதோ ஒரு வகையில் முடங்கிப்போய் இருக்கின்றது. முக்கியமாக இந்த காலகட்டங்களில் பாடசாலைகள் நிறுத்தப்பட்டுள்ளமையானது இணைய வழிக் கல்விக்கான கதவுகளைத் திறந்து விட்டுள்ளது. பாடசாலை நடக்கிறதோ இல்லையோ அரசாங்கத்தால் அறிவிக்கப்படுகின்ற தரம் 5 பரீட்சை,  தரம் 11 பரீட்சை,  தரம்13 பரீட்சைகள் என அனைத்துமே தவறாத நேரத்தில் முறையாக நடத்தப்படும் என கல்வி அமைச்சு அறிவித்துள்ளது.

இணையம் மூலமாக கல்வி கற்றுக் கொள்ளுங்கள்,  தொலைக்காட்சி மூலமாக கல்வி கற்றுக் கொள்ளுங்கள்,  உங்களிடம் இணைய தொலைபேசி – தொலைக்காட்சி வசதி இல்லாவிடில் கல்வி அமைச்சுக்கு தெரியப்படுத்துங்கள் என்றெல்லாம் அரசு ஏதோ ஒரு வகையில் தன்னுடைய கல்வி சார்ந்த நகர்வுகளை முன்னெடுத்துக் கொண்டிருக்கின்றது. இலங்கை ஒரு இலவச கல்வி வழங்கும் நாடு என்கின்ற அடிப்படையில் தன்னுடைய கல்வி நடவடிக்கைகளை ஏதோ ஒரு வகை இலவசமாக கொடுப்பதற்கான நடவடிக்கைகளை முன்னெடுத்து கொண்டே இருக்கின்றது. ஆரோக்கியமானது தான்.

“நாட்டின் எதிர்கால சந்ததியினர் மற்றும் அவர்களை வழிகாட்டும் ஆசிரியர்களைப் பாதுகாப்பதற்கு அரசு எப்போதும் நடவடிக்கை மேற்கொள்ளும்.” என பிரதமர் மஹிந்த ராஜபக்ச தெரிவித்துள்ளார்.

பாடசாலைகளை மீள ஆரம்பித்தல் மற்றும் ஆசிரியர்கள் மற்றும் தகுதியுடைய மாணவர்களுக்குக் கொரோனாத் தடுப்பூசிகளை வழங்குவது தொடர்பில் இன்று அலரி மாளிகையில் நடைபெற்ற கலந்துரையாடலின்போதே மேற்கண்டவாறு கூறினார்.

பாடசாலைகள் கல்வி நடவடிக்கைகளுக்காக மீண்டும் திறக்கப்படும்போது நீண்ட காலமாக வீட்டில் இருக்கும் மாணவர்களின் நோய் நிலைமைகள் மற்றும் ஏனைய பிரச்சினைகள் தொடர்பில் கண்டறிய அவர்களை வைத்திய பரிசோதனைக்கு உட்படுத்துமாறு பிரதமர் மஹிந்த ராஜபக்ச, கல்வி அதிகாரிகளுக்கு ஆலோசனை வழங்கினார்.

பாடசாலைகளை மீளத் திறக்கும்போது ஏற்படக்கூடிய பிரச்சினைகளைத் தவிர்ப்பதற்கு தமது சங்கத்தின் ஆதரவை கல்வி வலய மட்டத்தில் பெற்றுக்கொடுக்க முடியும் என சிறுவர் மருத்துவர் சங்கத்தின் பிரதிநிதிகள் இதன்போது பிரதமரிடம் தெரிவித்தனர்.

அதற்கமைய நாடு முழுவதும் உள்ள 99 கல்வி வலயங்களுக்கும் தமது சங்கத்தின் சார்பில் பிரதிநிதிகளைப் பெயரிட்டு மேற்படி நடவடிக்கையை முறையாக முன்னெடுப்பதாக சங்கத்தின் பிரதிநிதிகள் குறிப்பிட்டனர்.

கொரோனாத் தொற்று கட்டுப்படுத்தப்பட்ட பின்னர் உடனடியாக கட்டம் கட்டமாக பாடசாலைகளை மீள ஆரம்பிப்பதற்கு முன் ஏற்பாடாக ஆசிரியர்களுக்கான தடுப்பூசிகளைப் பெற்றுக்கொள்ளும் நடவடிக்கையை சுகாதார அமைச்சின் ஊடாக நிறைவேற்றிக் கொள்ள முடியும் எனவும் பிரதமர் சுட்டிக்காட்டினார்.

பாடசாலைகளை மீண்டும் ஆரம்பிப்பதற்கான தடுப்பூசித் திட்டத்தில் தரம் 11 மற்றும் தரம் 13 மாணவர்களுக்கு முன்னுரிமை வழங்கப்பட வேண்டும் எனவும், 2 இலட்சத்து 79 ஆயிரம் ஆசிரியர்கள் மற்றும் 3 இலட்சம் கல்விசாரா ஊழியர்களுக்குத் தடுப்பூசி வழங்குவதன் முக்கியத்துவம் குறித்தும் கல்வி அமைச்சின் செயலாளர் கபில பெரேரா விளக்கினார்.

நாட்டின் எதிர்கால சந்ததியினர் மற்றும் அவர்களை வழிகாட்டும் ஆசிரியர்களைப் பாதுகாப்பதற்கு அரசு எப்போதும் நடவடிக்கை மேற்கொள்ளும் எனவும் பிரதமர் இதன்போது தெரிவித்தார்.

பாடசாலை ஆரம்பிக்கும்போது மாணவர்களும், ஆசிரியர்களும் பாதுகாப்பான முறையில் பாடசாலைகளுக்கு அனுமதிக்கப்படுவது தொடர்பான வேலைத்திட்டமொன்றை செயற்படுத்த வேண்டும் எனவும் பிரதமர் அறிவுறுத்தினார்.

அத்தோடு பாடசாலை மாணவர்களின் போக்குவரத்து நடவடிக்கையின்போது பின்பற்ற வேண்டிய சுகாதார நடைமுறைகள் தொடர்பில் விசேட கவனம் செலுத்துமாறும் அவர் கேட்டுக்கொண்டார்.

யாழ்ப்பாணத்தில் கொரோனா வைரஸ் தொற்றாளர்களின் எண்ணிக்கை அதிகரித்து வருகின்றமையினால், மக்கள் மிகவும் அவதானமாக செயற்பட வேண்டுமென மாவட்ட அரசாங்க அதிபர் க.மகேசன் தெரிவித்துள்ளார்.

இன்று (சனிக்கிழமை) யாழ்.மாவட்ட செயலகத்தில் நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும்போதே அவர் இவ்வாறு குறிப்பிட்டுள்ளார்.

குறித்த ஊடகவியலாளர் சந்திப்பில் க.மகேசன் மேலும் கூறியுள்ளதாவது,

யாழ்ப்பாணத்தில்  தற்பொழுது  கொரோனா தொற்று குறைந்த நிலைமை இல்லாது அதிகரித்த நிலையிலேயே காணப்படுகின்றது. நேற்று 139 பேருக்கும் இன்று காலை 19 பேருக்கும் வைரஸ் தொற்று உறுதி செய்யப்பட்டுள்ளது.

இதற்கமைய யாழில் இதுவரை 4 ஆயித்து 122 பேர் வைரஸ் தொற்றாளர்களாக அடையாளம் காணப்பட்டுள்ளதோடு, 53 இறப்புகள் பதிவு செய்யப்பட்டுள்ளன. மேலும் 2 ஆயிரத்து 42 குடும்பங்களைச் சேர்ந்த 5 ஆயிரத்து 712 பேர்  சுய தனிமைப்படுத்தப்பட்டுள்ளார்கள்

இதேவேளை நல்லூர் மற்றும் உடுவில் பிரதேச பிரிவுகளிலுள்ள இரு கிராம சேவகர்  பிரிவுகள் மாத்திரம் தற்பொழுது  தனிமைப்படுத்தப்பட்டுள்ளன. யாழ்ப்பாணத்தில் கொரோனா நிலைமை அதிகரித்துச் செல்லும் போக்கே  அதிகளவு காணப்படுகின்றது. ஆகவே பொதுமக்கள் மிகவும் அவதானமாக சுகாதார வழிமுறைகளை பின்பற்றி செயற்பட வேண்டும்” என அவர் குறிப்பிட்டுள்ளார்

சினிமாவுக்கு வழங்கப்படும் ஒஸ்கார் விருதை போல ஊடக, புகைப்பட கலைஞர்களுக்கு வழங்கப்படும் உலகின் மிக உயரிய விருதாக கருதப்படும் புலிட்சர் விருது, அமெரிக்கா ஊடகவியலாளர் ஜோசப் புலிட்சர் என்பவரின் பெயரில் 1912 ஆம் ஆண்டு முதல் ஊடகவியல், இணைய ஊடகம், இலக்கியம், இசையமைப்பு, நாடகம், ஆகிய துறைகளில் சிறந்து விளங்குவோருக்கு வழங்கப்படுகிறது. உலகின் தலைசிறந்த  விருதுகளுள் ஒன்றான இந்த விருது இவ்வருடம்  அமெரிக்க கறுப்பினத்தவர் ஜோர்ஜ் பிளொய்ட் கழுத்து நெரிக்கப்பட்டு கொல்லப்பட்ட நிகழ்வை உலகிற்கு அடையாளம் காட்டிய 18 வயது யுவதிக்கு 2021 ஆண்டுக்கான இவ்விருது வழங்கப்படவுள்ளது.

அமெரிக்காவின் மினசோட்டா மாகாணம், மினியாபொலிஸ் நகரில் கடந்த 2020 மே 25 ஆம் திகதி ஜோர்ஜ் பிளொய்ட் (46) என்ற கறுப்பினத்தவரை சந்தேகத்தின் அடிப்படையில் மடக்கிப் பிடித்த டெர்ரக் சாவின் (44) என்ற காவல்துறை அதிகாரி, அவரை மண்டியிடச் செய்து கழுத்தில் முழங்காலை வைத்து பலமாக அழுத்தினார். இதனால் மூச்சுத்திணறல் ஏற்பட்டு பிளொய்ட் உயிரிழந்தார்.

இந்த சம்பவத்தின் அமெரிக்காவின் பல இடங்களில் போராட்டம் வெடித்ததுடன், பல நாடுகளிலிருந்து கண்டனங்கள் வலுத்தன. சம்பவத்துடன் தொடர்புடைய காவல்துறை அதிகாரிக்கு எதிராக குற்றம் நிரூபிக்கப்பட்டு அவருக்கு தண்டனையும் வழங்கப்பட்டுள்ளது.

இந்த கொலை சம்பவத்தை அப்போது 17 வயது யுவதியான டார்னெல்லா ஃபிரேசியர் ஒளிப்பதிவு செய்திருந்தார். ஜோர்ஜ் பிளொய்டின் கொலை, வெளி உலகிற்கு தெரியவருவதற்கு அக்காணொளி மிக முக்கியமான காரணமானது.

உலகம் முழுவதும் பரவிய இந்த காணொளி, இந்த சம்பவத்திற்கு பல்வேறு நாட்டு மக்கள் தங்கள் கண்டனத்தை பதிவு செய்தனர்.

இந்நிலையில், இளம்பெண் டார்னெல்லா பிரேஸரை பாராட்டும் விதமாக அவருக்கு சிறப்பு புலிட்சர் விருது அறிவிக்கப்பட்டு உள்ளது.

முள்ளிவாய்க்கால் இனப்படுகொலைகளின் 12 வருடப்பூர்த்தியையொட்டி அமெரிக்க காங்கிஸ் கட்சியின் பிரதிநிதியான டெபோரா கே.ரோஸினால் ‘ பொறுப்புக்கூறலை நிலைநாட்டும் நோக்கிலான செயற்திறன்மிக்க சர்வதேசப் பொறிமுறை ‘ மற்றும் ‘ இலங்கையில் நிரந்தர அரசியல் தீர்வு ‘ ஆகிய தலைப்புக்களில் கடந்த மேமாதம் 18 ஆம் திகதி அமெரிக்கப் பிரதிநிதிகள் சபையில் தீர்மானமொன்று முன்வைக்கப்பட்டது .

இலங்கையில் போர் முடிவிற்குக் கொண்டுவரப்பட்டு 12 வருடங்கள் கடந்துள்ளமையையும் , இதன்போது முள்ளிவாய்க்காலில் இராணுவத்தினரால் பாரிய மனித உரிமை மீறல் நடவடிக்கைகள் மேற்கொள்ளப்பட்டமையையும் அந்தத் தீர்மானம் ஏற்றுக்கொண்டிருந்தது . அதேவேளை இலங்கைவாழ் தமிழர்கள் பல்லாயிரக்கணக்கான யிரிழப்புக்களுக்கும் காணாமலாக்கப்படல் சம்பவங்களுக்கும் இடப்பெயர்வுகளுக்கும் முகங்கொடுத்துள்ளனர் என்று அத்தீர்மானத்தில் குறிப்பிடப்பட்டுள்ளது .

“இலங்கை தொடர்பான விடயத்தைக் குறிப்பிட்டு அமெரிக்க காங்கிரஸ் தீர்மானம் நிறைவேற்றியமையால்தான் அமெரிக்க அதிகாரிகளைச் சந்தித்தோம். கண்டனங்களையும் தெரிவித்தோம். எமது இந்த நடவடிக்கை அவர்களின் மீதான தீர்மானத்தின் அச்சத்தால் எடுக்கப்பட்டது என்று எவரும் அர்த்தம் கற்பிக்கக் கூடாது. அது தவறு.”இவ்வாறு அமைச்சர் விமல் வீரவன்ச தெரிவித்தார்.

“அமெரிக்க காங்கிரஸ் கட்சியின் பிரதிநிதிகளின் இலங்கை மீதான தீர்மானம் தமிழீழ விடுதலைப் புலிகளுக்குப் புத்துயிர் ஊட்டும் வகையில் அமைந்துள்ளது. அப்பட்டமான பொய்க்குற்றச்சாட்டுக்கள் இந்தத் தீர்மானத்தில் உள்ளன. இந்தத் தீர்மானத்துக்கு இலங்கை அரசு வன்மையான கண்டனத்தைத் தெரிவித்துள்ளது.

தீர்மானம் தொடர்பான இலங்கை அரசின் நிலைப்பாடு வொஷிங்டனுக்குத் தெரிவிக்கப்பட்டுள்ளது. ஐ.நா. தீர்மானம் போல் இலங்கை அரசை அடிபணிய வைக்கும் நோக்கில் அமெரிக்க காங்கிரஸ் தீர்மானமும் தயாரிக்கப்பட்டுள்ளது. எனினும், இரு தீர்மானங்களையும் நாம் அடியோடு நிராகரிக்கின்றோம்.

அமெரிக்க காங்கிரஸ் தீர்மானம், இலங்கை மீதான தீர்மானம் என்றபடியாலேயே அமெரிக்க அதிகாரிகளை அரச தரப்பினர் நேரில் சந்தித்துப் பலத்த கண்டனங்களைத் தெரிவித்துள்ளனர். அச்சம் காரணமாகவே அரசு இந்த நடவடிக்கையை முன்னெடுத்தது என எவரும் அர்த்தம்கொள்ளக்கூடாது” – என்று பதிலளித்தார்.

ஒரு பக்கத்தில் இலங்கையில் விலையேற்றப்பிரச்சினைகள்,  மறுபக்கத்தில் தடுப்பூசிக்கான தட்டுப்பாடு, இதற்கிடையே பயணக்கட்டுப்பாடுகளால் மக்களிடையே அதிகரித்துள்ள வறுமை சார் பிரச்சினை என நாடு பல வழிகளில் பின்னடைவை சந்தித்துள்ளது. மேலும் இலங்கையில் உத்தியோகபூர்வமாக நான்கு பில்லியன் டொலர்கள் மட்டுமே கையிருப்பில் இருப்பதாக இலங்கை மத்திய வங்கியின் ஆய்வு திணைக்களத்தின் பணிப்பாளர் கலாநிதி சந்திரநாத் அமரசேகர அண்மையில் தெரிவித்திருந்தார்.

இவ்வாறான ஒரு நிலையிலேயே நாடாளுமன்ற உறுப்பினர்களுக்கு 227 அதிசொகுசு வாகனங்களை இறக்குமதி செய்வதற்காள நடவடிக்கைகளும் முன்னெடுக்கப்பட்டுள்ளன. இன்றைய நிலையில் இது தேவையில்லாத ஒன்று . எங்களுக்கு தெரிந்தவரை எந்த நாடாளுமன்ற உறுப்பினரும் ஏழ்மையில் வாடுவதாகவோ..? அல்லது வாகனங்களுக்கு கூட வசதியில்லாதவர்களாகவோ தெரியவில்லை. பெரும்பாலானவர்கள் ஆடம்பரமாகவும் செல்வ மிதப்பிலுமே திளைக்கின்றனர். இப்படியான நெருக்கடியான சூழலில் மக்கள் பணத்தை மக்களுக்கு செலவிடுவதே ஆக்கபூர்வமானதாக இருக்கும். இதுவே பலருடைய வேண்டுகோளாகவும் உள்ளது.

இப்படியான ஒரு நிலையில் நாடாளுமன்ற உறுப்பினர்களுக்கான  227 அதிசொகுசு வாகனங்களை இறக்குமதி செய்யும் விவகாரம் சர்ச்சைக்குரியதாக உருமாறியுள்ளது. இது தொடர்பில் ஏற்பட்டுள்ள அதிருப்திக்கு மத்தியில் இந்த விடயத்தில் மிகப்பெரும் ஓழல் நடந்துள்ளதாக குற்றஞ்சாட்டப்பட்டுள்ளது.

இந்த 227 வாகனங்களுக்குமான கொடுப்பனவாகிய 18 மில்லியன் அமெரிக்க டொலர்கள் தொடர்பிலான திறந்த கடன் பத்திரமானது வாகன இறக்குமதிக்கு அமைச்சரவை அங்கீகாரம் அளிக்க முன்னரே தயார் செய்யப்பட்டிருப்பதாக தெரிவிக்கப்பட்டுள்ளது.

ஜே.வி.பியின் தலைவரான அநுரகுமார திஸாநாயக்க கொழும்பில் நேற்று நடந்த ஊடக சந்திப்பில் இதனைத் தெரிவித்தார்.

இதற்கமைய கடந்த ஏப்ரல் 22ஆம் திகதி குறித்த கடன் பத்திரம் திறக்கப்பட்டிருக்கின்ற நிலையில், அமைச்சரவை அங்கீகாரமானது மே 18ஆம் திகதியே அளிக்கப்பட்டிருப்பதாக அவர் கூறுகின்றார்.

நாட்டில் பொருளாதார சரிவு, மக்களின் ஜீவநோபாய நெருக்கடிக்கு மத்தியில் அரசாங்கம் இவ்வாறு வாகன இறக்குமதியை செய்திருப்பதன் ஊடாக மிகப்பெரிய ஊழல் இடம்பெற்றிருப்பதாகவும் அவர் குற்றஞ்சாட்டினார்.