07

அண்மைய கால இலங்கை கிரிக்கெட்டின் போக்கு அவ்வளவு ஆரோக்கியமானதாக இல்லை என்பதே உண்மை. தொடர்ச்சியாக பல மூத்த வீரர்கள் புறக்கணிக்கப்பட்டு வருகின்ற நிலையில் தொடர்ச்சியாக பலர் ஓய்வு பெற்றுக்கொண்டிருப்பதும் தொடர்ச்சியாகிவிட்டது.

ஒரு காலத்தில் உலக அளவில் இலங்கைக்கான அடையாளத்தை ஏற்படுத்தியதே இந்த கிரிக்கெட் தான் என்றால் மிகையல்ல. இன்றைய நிலையில் அதனுடைய தரம் மிகக்கீழான நிலையை அடைந்துள்ளது. இலங்கையின் பிரபலமான வீரர்கள் எல்லோரும் புறக்கணிக்கப்பட்டு வருவதுடன் இலங்கையில் எத்தனையோ உலகதரமான முன்னாள்  வீரர்கள் இருக்க வெளிநாட்டு பயிற்சியாளர்களை இலங்கையில் பணிக்கமர்த்ததுகின்ற அளவுக்கு இலங்கை கிரிக்கெட்டின் உயர்மட்டத்தில் பூசல்கள் உள்ளன என்பதை தெளிவாக அறிய முடிகிறது.

இலங்கையின் முன்னாள் வீரர்கள் சிலர் அவுஸ்ரேலியா, பங்களாதேஷ், இங்கிலாந்து என பயிற்சிக்காக சென்றுகொண்டிருக்கின்றனர். ஆனால் நமது நாட்டு கிரிக்கெட் அணி படுபாதாளத்தை நோக்கி நகர்ந்து கொண்டிருக்கின்றது. இது தெளிவான வகையில் உட்பூசல்களை டையாளம் காட்டுகின்றது.

இந்நிலையில், சர்வதேச கிரிக்கெட்டில் இருந்து ஓய்வு பெறுவது குறித்து ஆலோசித்து வருவதாக இலங்கை அணி வீரர் அஞ்சலோ மத்யூஸ் இலங்கை கிரிக்கெட் சபைக்கு தெரிவித்துள்ளமை கிரிக்கெட் ரசிகர்களை கவலைக்குள்ளாக்கியுள்ளது.

தற்போது இந்த விவகாரம் குறித்து பரிசீலித்து வருவதாகவும், எதிர்வரும் வாரங்களில் தனது முடிவை தெரிவிப்பதாகவும் 34 வயதான மத்யூஸ் தெரிவித்துள்ளார் என இலங்கை கிரிக்கெட் சபை வட்டார தகவல்கள் தெரிவிக்கின்றன.

இளம் வீரர்களுடன் கிரிக்கெட் அணியை கொண்டு செல்வதற்கு இலங்கை அணி நிர்வாகம் முடிவு செய்ததை அடுத்து அஞ்சலோ மத்யூஸ் வரையறுக்கப்பட்ட ஓவர்கள் கொண்ட தொடரில் உள்வாங்கப்படவில்லை.

2019 உலகக் கிண்ண கிரிக்கெட்டில் இலங்கையின் மிகச் சிறந்த வீரர்களில் ஒருவராக இருந்த அவர், 2018 ஆம் ஆண்டில் அவரது துடுப்பாட்ட சராசரியாக 52.50 ஆகவும், 2017 இல் 63.66 ஆகவும் இருந்தது.

இதேவேளை மத்யூஸின் பீல்டிங் மற்றும் உடற்பயிற்சி தரநிலைகள் 2020 ஆம் ஆண்டிலும் கணிசமாக முன்னேறியுள்ளன. இந்நிலையில் புதிய ஒப்பந்த முறைமை தொடர்பாக மத்யூஸ் மற்றும் பல மூத்த கிரிக்கெட் வீரர்கள் ஆட்சேபனை தெரிவித்துள்ளமை குறிப்பிடத்தக்கது.

மேலும் ஆரம்பத்தில் எதிர்ப்பு காணப்பட்ட போதும் கூட இந்திய அணியுடனான கிரிக்கெட் தொடருக்காகப் பெயரிடப்பட்டிருந்த 30 இலங்கை வீரர்களில் 29 பேர் தொடருக்கான ஒப்பந்தத்தில் கையொப்பமிட்டுள்ளதாக தெரிவிக்கப்பட்டுள்ள அதே நிலையில் எஞ்சலோ மெத்தியூஸ் தம்மை மறு அறிவிப்பு வரையில் எந்த தொடரிலும் இணைக்க வேண்டாம் என்று கோரி ஸ்ரீலங்கா கிரிக்கெட்டுக்கு கடிதம் அனுப்பிவைத்துள்ளமையும் குறிப்பிடத்தக்கது.

“நாட்டுக்காக தமிழ் – முஸ்லீம் – எதிரணி என அனைவருடனும் பேச்சு நடத்துவேன்.”  என நாளை தேசியப்பட்டியல் நாடாளுமன்ற உறுப்பினராகப் பதவியேற்கவுள்ள ஸ்ரீலங்கா பொதுஜன முன்னணியின் தேசிய அமைப்பாளர் தெரிவித்தார்.

சிங்களம், தமிழ், முஸ்லிம் என மூவின மக்களின் தேவைகளைக் கண்டறிந்து அவர்களைத் தேடிச் சென்று அவர்களின் குறைநிறைகளைக் கேட்டறிந்து சேவையாற்ற நான் தயாராக இருக்கின்றேன்.” எனவும் அவர் தெரிவித்துள்ளார்.

தேசியப்பட்டியல் நாடாளுமன்ற உறுப்பினராகப் பஸில் ராஜபக்‌சவின் பெயர் தேர்தல்கள் ஆணைக்குழுவினால் வர்த்தமானி மூலம் இன்று அறிவிக்கப்பட்டுள்ளது. அதன்பின்னரே அவர் மேற்கண்டவாறு கூறினார்.

அவர் மேலும் தெரிவித்ததாவது:-

“ஜனாதிபதியும் பிரதமரும் இந்த நாட்டை அபிவிருத்தியிலும் பொருளாதாரத்திலும் முன்னோக்கிச் செல்ல உழைக்கின்றார்கள். அவர்கள் இருவரினதும் கைகளைப் பலப்படுத்தி மக்களின் பக்கம் நின்று சேவையாற்ற நான் விரும்புகின்றேன்.

எனக்கு எந்த அமைச்சுப் பதவியை வழங்குவது என ஜனாதிபதியும் பிரதமருமே தீர்மானம் எடுப்பார்கள். எந்த அமைச்சுப் பதவியையும் ஏற்க நான் தயாராக இருக்கின்றேன்.

மக்களின் அமோக ஆதரவுடன் நாட்டின் ஆட்சியைத் தீர்மானித்த கட்சியே ஸ்ரீலங்கா பொதுஜன முன்னணி. எனவே, கட்சி பிளவுபட ஒருபோதும் இடமளியேன். கட்சியை மென்மேலும் வலுப்படுத்துவேன்.

நாட்டின் நல்லிணக்கத்துக்காகத் தமிழ்க் கட்சிகள், முஸ்லிம் கட்சிகள் உள்ளிட்ட ஆளும் – எதிரணியிலுள்ள அனைத்துக் கட்சிகளுடனும் நான் பேச்சு நடத்துவேன்” – என்றார்.

பஷில் ராஜபக்ஷ, தனக்காக பதவியை இராஜினாமா செய்த ஜயந்த கெட்டகொடவுக்கும் தனது நன்றியை தெரிவித்திருக்கின்றார்.

“பிரபாகரனை சுட்டுக்கொன்று நாயைபோல் இழுந்து வந்தது போல நடக்கும் என பகிரங்கமாக ஜனாதிபதி தரப்பினர் அச்சுறுத்துகின்றனர்.” என முன்னாள் நீதி அமைச்சரும் ஐக்கிய மக்கள் சக்தியின் நாடாளுமன்ற உறுப்பினருமான தலதா அத்துகோரல தெரிவித்தார்.

நாடாளுமன்றத்தில் நேற்று செவ்வாய்க்கிழமை உரையாற்றிய போதே அவர் இவ்வாறு குறிப்பிட்டுள்ளார்.

இதன்போது தொடர்ந்தும் உரையாற்றிய அவர்,

இப்போது வெள்ளை வானில் வந்து கடத்தும் சம்பவங்கள் இடம்பெறுவதில்லை என்பது உண்மைதான். ஆனால், தற்போதைய அரசில் வீட்டுக்கு நேரடியாகவே வந்து அடித்து, இழுத்துத் தூக்கிச் செல்லும் சம்பவங்களை நடக்கின்றன.

ஹரின் பெர்னாண்டோ நாடாளுமன்றத்தில் உரையாற்றிய வேளையில், பிரபாகரனை சுட்டுக்கொன்று நாயைபோல் இழுத்துவந்தது நினைவில் உள்ளதா என்று ஜனாதிபதி கேட்டார்.

இப்போது பிரபாகரனுக்கு நடந்ததுபோல் தான் நடக்குமென மேல்மாகாண பிரதி பொலிஸ்மா அதிபர் ஊடகவியலாளர் ஒருவரை பகிரங்கமாக மிரட்டுகின்றார். நாடு எங்கே செல்கின்றது. வெள்ளை வான் பற்றி பேசுகின்றனர், இதற்கு முன்னர் ஊடகவியாளர்களுக்கு நடந்தது மீண்டும் இடம்பெறப்போகின்றதா என கேள்வி எழுகின்றது.

இவர்களின் கடந்த ஆட்சியில் கொலை மிரட்டல்களினால் பல ஊடகவியலாளர்கள் நாட்டை விட்டு வெளியேறினர் .அவ்வாறானதொரு நிலைமை மீண்டும் ஏற்பட்டு விடுமோ என்ற அச்சம் ஏற்படுகின்றது.

காணமால் போனோர் குறித்த காரியாலயம் அவசியமான ஒன்றாகும், இவர்களுக்கு கொடுப்பனவுகளை அதிகரிப்பது குறித்து நாம் எதிர்ப்பை வெளிப்படுத்த மாட்டோம். ஆனால் இந்த காரியால தலைவர் சாலிய பீரிஸ் சட்டத்தரணிகள் சங்கத்தின் தலைவருக்கு போட்டியிட்ட வேளையில் இந்த ஆட்சியில் சிலர் அவரை அவமதித்தனர்.

வடக்கு கிழக்கில் மக்களை மாத்திரம் இலக்கு வைத்து இந்த காரியாலம் உருவாக்கப்படவில்லை. 1983ஆம் ஆண்டில் இருந்து தேடுவதற்கு இந்த காரியாலயம் உருவாக்கப்பட்டது என்றார்.

ஊடக சுதந்திரம் குறித்த சர்வதேச அமைப்பான எல்லைகளற்ற ஊடகவியலாளர்கள் அமைப்பு வெளியிட்டுள்ள 2021ற்கான பத்திரிகை சுதந்திரத்தை வேட்டையாடும் 37 உலக தலைவர்களின்  பெர்பட்டியலில் இலங்கை ஜனாதிபதி கோட்டாபாய ராஜபக்ஷவின் பெயரும் உள்ளடக்கப்பட்டிருந்தது.

இந்நிலையில் இன்று நாடாளுமன்றில் உரையாற்றிய அமைச்சர் பந்துல குணவர்த்தன “ஜனாதிபதியோ, பிரதமரோ அல்லது அமைச்சர்களோ எந்த ஊடகங்களையும் கட்டுப்படுத்தவில்லை எனவும்  இலங்கை அரசாங்கம் ஊடக சுதந்திரத்திற்கு பாதிப்பை ஏற்படுத்தும் வகையில், எந்தவொரு செயற்பாட்டையும் மேற்கொள்ளப் போவதில்லை எனவும் தெரிவித்துள்ளார்.

நாடாளுமன்றம் இன்று காலை 10 மணிக்கு நாடாளுமன்றம் கூடிய போது பொது மனுக்கள் சமர்ப்பிப்பு மற்றும் வாய்மூல விடைக்கான கேள்விநேரத்தை அடுத்து சபையில் உரையாற்றிய எதிர்க்கட்சித் தலைவர் சஜித் பிரேமதாஸ, இலங்கையின் பிரபலமான தனியார் தொலைக்காட்சியொன்றுக்கு அரசாங்கம் அச்சுறுத்தல் விடுக்கும்வகையில் செயற்படுவதாகக் குறிப்பிட்டார்.

நாட்டின் பிரபலமான சட்டத்தரணிகளுடன் கலந்தாலோசித்து, குறித்த ஊடக நிறுவனத்திற்கு எதிராக அரசாங்கம் நடவடிக்கை எடுக்கத் தீர்மானித்துள்ளதாகவும் இது ஊடக சுதந்திரத்தை மீறும் அடிப்படைவாதச் செயற்பாடாகும் என்றும் சபையில் அவர் சுட்டிக்காட்டினார்.

மேலும், இந்த விவாகரம் தொடர்பாக ஆளும் தரப்பு உறுப்பினர்கள் பதில் வழங்க வேண்டும் எனவும் எதிர்க்கட்சித் தலைவர் கேட்டுக் கொண்டார்.

இதனையடுத்து அமைச்சின் அறிவிப்பை வாசிக்க அமைச்சர் பந்துல குணவர்த்தன எழுந்தபோது, ஒழுங்குப் பிரச்சினையொன்றை எழுப்பிய எதிர்க்கட்சித் தலைவர் சஜித், தான் முன்வைத்த குறித்த குற்றச்சாட்டு தொடர்பாக அமைச்சர் பந்துல குணவர்த்தன உரிய பதிலை சபையில் உடனடியாக தெரிவிக்க வேண்டும் எனக் கேட்டுக் கொண்டார்.

இவர் மட்டுமன்றி, எதிரணியைச் சேர்ந்த உறுப்பினர்களும் அமைச்சரிடம் இதற்கு பதில் வழங்க வேண்டும் என சபையில் தொடர்ச்சியாக கோஷமெழுப்பியவாறு கேட்டுக் கொண்டனர்.

இந்த கோரிக்கைகளை அடுத்து உரையாற்றிய அமைச்சர் பந்துல, இலங்கையிலுள்ள எந்தவொரு ஊடக நிறுவனத்தையும் அச்சுறுத்த அரசாங்கம் நினைக்கவில்லை என்றும் பொய்யான கருத்துக்களை கூறி சபையின் நேரத்தை எதிரணியினர் வீணடிப்பதாகவும் குறிப்பிட்டார்.

அத்தோடு, ஊடகவியலாளர் ரிச்சட்டி சொய்சாவின் மரணத்திற்கு காரணமான தரப்பினர் இன்று ஊடக சுதந்திரம் குறித்து கருத்து வெளியிடுவதாகவும் தங்களின் அரசாங்கம் ஊடகங்களுக்கும் ஊடகவியலாளர்களுக்கும் முழுமையான ஒத்துழைப்பினையும் சுதந்திரத்தையும் தொடர்ச்சியாக வழங்குவதாகவும் தெரிவித்தார்.

அதேநேரம், நல்லாட்சிக் காலத்தில்தான் அரசியல் பழிவாங்கல்கள் அதிகம் இடம்பெற்றுள்ளதாகவும் தெரிவித்த அமைச்சர் பந்துல, எதிர்க்கட்சியினர் நாடாளுமன்றில் தொடர்ச்சியாக இவ்வாறு செயற்படுவதானது நாடாளுமன்றுக்கு அவமரியாதையை ஏற்படுத்தும் செயற்பாடாகும் என்றும் குறிப்பிட்டார்.

ஜனாதிபதியோ, பிரதமரோ அல்லது அமைச்சர்களோ ஊடகங்களை கட்டுப்படுத்துவோம் என எங்கும் கூறாத நிலையில், எதிரணியினர் சர்வதேசத்திற்கு பொய்யான கருத்தைக் கூறவே இவ்வாறு நடந்துக்கொள்கிறார்கள் என்றும் இது சர்வதேச சதியின் ஓர் அங்கம் என்றும் அவர் கருத்து வெளியிட்டார்.

அமைச்சர் இவ்வாறு கருத்து வெளியிட்டுக்கொண்டிருக்கும்போதே, எதிரணியைச் சேர்ந்த பல்வேறு உறுப்பினர்கள் ஒழுங்குப் பிரச்சினைகளை எழுப்பிக் கொண்டிருந்தனர்.

இவ்வாறு சபையில் சர்ச்சை நீடித்துக்கொண்டிருக்கும்போதே சபாநாயகரின் அறிவுறுத்தலையும் மீறி எதிரணியினர் அனைவரும் எழுந்து நின்று, ஊடக சுதந்திரத்தை பாதுகாக்க வேண்டும் என கோஷமெழுப்பினர்.

இதனையடுத்து ஆளும் தரப்பினரும் எழுந்து நின்று கூச்சலிட்டு, எதிரணியினருக்கு எதிர்ப்பினை வெளியிட்டமையால் நாடாளுமன்றில் இன்று சிறுது நேரம் குழப்பமான நிலைமை நீடித்தது.

“நாட்சம்பளமாக ஆயிரம் ரூபாயை அதிகரித்த கம்பனிகள் வேலை செய்யும் நாட்களை குறைத்து மலையக மக்களை ஏமாற்றியுள்ளன. ஆனால் இதனை அரசு கண்டுகொள்வதாயில்லை.” என தமிழ் முற்போக்கு கூட்டணியின் தலைவர் மனோ கணேசன் தெரிவித்துள்ளார்.

தமிழ் முற்போக்கு கூட்டணியின் தலைவர் மனோ கணேசன் தலைமையில் பிரதி தலைவர் ராதாகிருஷ்ணன், நாடாளுமன்ற உறுப்பினர் வேலுகுமார், உதயகுமார் பொது செயலாளர் சந்திரா சாப்டர் ஆகியோர் இந்திய தூதுவர் கோபால் பாக்லே, துணை தூதுவர் வினோத் ஜேகப், அரசியல் செயலாளர் பானு பிரகாஷ் உள்ளிட்ட இந்திய தரப்பை இந்திய இல்லத்தில் நேற்று சந்தித்தனர்.

இந்த சந்திப்பு தொடர்பாக முகப்புத்தகத்தில் வெளியிட்டுள்ள பதிவிலேயே கூட்டணியின் தலைவர் மனோ கணேசன் இவ்வாறு தெரிவித்துள்ளார்.

குறித்த பதிவில் மேலும் தெரிவித்துள்ள அவர்,

“இந்திய இலங்கை ஒப்பந்தத்தின் குழந்தைகள்தான் 13ஆம் மற்றும் 16ஆம் திருத்தம் என்பனவையாகும். இன்று இந்த இரண்டையும் இலங்கை அரசு கைவிட்டு விட்டது.

13ம் திருத்தம் மூலம் உருவாக்கப்பட்ட மாகாணசபை தேர்தல்களை இலங்கை அரசு ஒத்தி வைத்துவிட்டது. அதேவேளை மாகாணசபைகளுக்கு உரிய பாடசாலைகளையும் வைத்தியசாலைகளையும் மத்திய அரசின் நிர்வாகத்துக்கு உள்ளே சட்டவிரோதமாக சுவீகரித்து கொண்டுள்ளது.

16ம் திருத்தம் மூலமாகத்தான் தமிழ் மொழிக்கு நிர்வாக மொழி, கல்வி மொழி, மக்கள் சபை மொழி, சட்டவாக்க மொழி, நீதிமன்ற மொழி என்ற சட்ட அந்தஸ்துகள் கிடைத்தன. இவற்றுக்கும் இந்தியாத்தான் காரணமாக அமைந்தது.

ஆகவே 13ஐ பற்றி பேசும்போது, இந்திய அரசு 16 பற்றியும் இலங்கை அரசுடன் பேச வேண்டும். ஏனெனில் அதிகார பரவலாக்களை மட்டுமல்ல, இன்று மொழி உரிமையையும் இந்த அரசு பறித்துக்கொண்டு வருகிறது. நான் அமைச்சராக இருந்தபோது ஆரம்பித்த இரண்டாம் மொழி பயிற்றுனர்களுக்கு பயிற்சி அளித்து உருவாக்கும் திட்டத்தையும் இந்த அரசு நிறுத்தி விட்டது.

அதேபோல் இந்திய பிரதமர் எமது அழைப்பை ஏற்று மலையகம் வந்து வழங்கிய பத்தாயிரம் வீட்டு திட்டமும் இன்னமும் ஆரம்பிக்கப்படவில்லை. இலங்கை அரசு இதை தாமதம் செய்கிறது. இதுவும் இந்திய அரசுக்கும் புதிய கிராமங்கள், தோட்ட உட்கட்டமைப்பு அமைச்சுக்கும் நமது ஆட்சியில் செய்யப்பட்ட ஒப்பந்தத்தின் அடிப்படையில் ஆரம்பிக்கப்பட்ட திட்டமாகும்.

ஆகவே இலங்கை அரசு, இந்திய அரசுடன் உடன்பட்ட இந்த திட்டங்களை வலியுறுத்த இந்த அரசுக்கு முழுமையான உரிமைகள் உள்ளன. இதை இந்தியா செய்ய வேண்டும். அதேபோல் தோட்ட தொழிலாளர்களின் நாட் சம்பளம் இழுபறியில் இருக்கிறது. அரசு முழுவதுமாக  தொழிலாளர்களை கம்பனிகளின் கைகளில் ஒப்படைத்து விட்டு அமைதி காக்கிறது.

இதுவே ஏனைய துறை சார்ந்த பெரும்பான்மை இனத்தை சார்ந்த தொழிலாளர்கள் என்றால் அரசு அக்கறை காட்டாமல் இருக்குமா? நாட் சம்பளம் ஆயிரம் ரூபாய் என கூறிவிட்டு, வேலை செய்யும் நாட்களை தந்திரமாக கம்பனிகள் குறைத்து விட்டன. இதை அரசு கண்டுகொள்வது இல்லை.

அப்படியானால், இந்த மக்கள் வேறுநாட்டு பிரஜைகளா என கேட்கிறோம்? இந்த இந்திய வம்சாவளி தொழிலாள மக்கள் தொடர்பாக இந்திய அரசு கட்டாயமாக குரல் எழுப்ப வேண்டும். இந்த பிரச்சினைகள் தொடர்பான மேலதிக பேச்சுகளை நடத்த, தமிழ் முற்போக்கு கூட்டணி, பாரதம் சென்று இந்திய பிரதமர் நரேந்திர மோடி, தமிழக முதல்வர் மு.க.ஸ்டாலின் ஆகியோரை சந்திக்க விரும்புகிறது. இவற்றுக்கு கொரோனா நிலைமை சீரானதுடன் ஏற்பாடுகள் செய்துதர வேண்டும்.

சீனா இலங்கையில் வந்து நிலைகொண்டிருப்பது, இந்தியாவின் தேசிய பாதுகாப்பு பிரச்சினை என்பது மட்டுமல்ல, சீனா இலங்கையின் பல்மொழி, பன்மத, பல்லின அடிப்படையை ஏற்றுக்கொள்ள மறுப்பதாக நாம் சந்தேகம் கொள்கிறோம். ஆகவே தமிழர்களை சீனா இலங்கையர்களாக ஏற்க மறுக்கின்றதா..? என நாம் கேட்கிறோம்.

ஆகவேதான், இலங்கையில் சீனா நிலைப்பெறலை தமிழர் நாம் சந்தேகமாக பார்க்கிறோம் என்பதையும் இந்தியா புரிந்துக்கொள்ள வேண்டும்” என அவர் மேலும் தெரிவித்துள்ளார்.

“இனப்பிரிவினைகளை மறந்து எங்களுடன் இணைந்து செயலாற்ற உடன் வாருங்கள் என தேசிய நாட்டைப் பாதுகாக்கும் தேசிய அமைப்பு தமிழர்களுக்கு அழைப்பு விடுத்துள்ளது.

நாட்டின் பகுதிகளை வெளிநாடுகளுக்கு விற்கும் அரசாங்கத்தின் முயற்சிகளை முறியடிப்பதற்காக தம்முடன் இணைந்துகொள்ளும்படி  கொழும்பில் நேற்று நடைபெற்ற ஊடக சந்திப்பின் போது தமிழ் மக்களுக்கு அழைப்பு விடுத்துள்ளார் குறித்த அமைப்பின் தலைவரான எல்லே குணவங்ச தேரர்.

அவர் மேலும் தெரிவிக்கையில்,

இன ரீதியாக நாங்கள் பிரிந்திருந்தால் ஒருபோதும் எமக்கு சுதந்திரம் கிட்டாது. நாங்கள் பிரிந்திருக்கின்ற வரை சர்வதேச சக்திகளுக்கு எமது நாட்டிற்குள் பிரவேசித்து, நாட்டின் வளங்களைச் சூறையாடுவதற்கு சந்தர்ப்பமும் உருவாகும். மேற்குலக நாடுகளும், சக்திகளும் இலங்கையிலுள்ள எரிபொருள் வளங்களை கொள்ளையிடக் கங்கணம் கட்டித்திரிகின்றன.

பொஸ்பெயிட் உள்நாட்டு உர உற்பத்தியாலையை வைத்துக்கொண்டு உள்நாட்டில் உரப்பற்றாக்குறையை சொல்கின்றனர். இதனையிட்டுக் கவலையடைகிறேன். இப்போதாவது இந்த நாட்டை எமது கைகளுக்குப் பெற்றுக்கொள்ள வேண்டும். அரசியல்வாதிகளுக்கு நாட்டை ஒப்படைத்து, அழிவுகளே இன்றுவரை எஞ்சியிருக்கின்றன.

அவற்றை தொடர இடமளிக்கக்கூடாது. சுமார் 20 அரச நிறுவனங்களை இலங்கை அரசாங்கம் விற்பனை செய்யவுள்ளது.

யாழ்ப்பாணம் – காங்கேசன்துறையில் காணிகளை கொஞ்சம் கொஞ்சமாக வெளிநாடுகளுக்கு விற்பனை செய்யப் போகின்றார்கள். அதனால் தமிழ் மக்களும் எம்முடன் இப்போராட்டத்தில் இணைந்துகொள்ள வேண்டும் என அழைப்பு விடுக்கின்றேன். அண்மையில்கூட தமிழ் மக்கள் சிலர் என்னை சந்தித்ததோடு இலங்கையில் உள்ள மலே பிரஜைகளும் என்னை சந்தித்திருக்கின்றனர்.

முஸ்லிம் மக்களும் எம்முடன் இணைய வேண்டும். அரசியல்வாதிகள் மற்றும் இனவாதிகளுக்கு அப்பாற்சென்று மூன்றாவது தரப்பு சக்தியொன்றை உருவாக்கி அதனூடாக விடுதலைப் போராட்டத்தை நாங்கள் ஆரம்பிக்க வேண்டும். இலங்கை அரசாங்கம் தற்போது செயற்படும் விதத்தை நான் அனுமதிக்கமாட்டேன் என மேலும் தெரிவித்தார்.

“இராணுவத்தைத் தண்டிக்க இடமளிக்கமாட்டோம் என சிங்கள அரசியல்வாதிகள் கூறிக்கொண்டிருத்தால் தமிழர்களுக்கு எப்படி நீதி கிடைக்கும்..?”  என தமிழ்த் தேசிய மக்கள் முன்னணியின் தலைவர் கஜேந்திரகுமார் பொன்னம்பலம் தெரிவித்தார்.

இது தொடர்பாக அவர் மேலும் தெரிவித்ததாவது:-

“குற்றவியல் நடவடிக்கை முறைச் சட்டக்கோவை (திருத்த) சட்ட மூலம், சித்திரவதை மற்றும் வேறு கொடூரமான மனிதாபிமானமற்ற அல்லது கீழ்த்தரமாக நடத்துதல் அல்லது தண்டித்தல் என்பவற்றுக்கெதிரான சமவாயம் (திருத்தம்) சட்ட மூலத்தில் திருத்தங்களை செய்ய எடுக்கும் முயற்சியை நான் வரவேற்கின்றேன்.

அதேபோல் காணாமல் ஆக்கப்பட்டோருக்கான காரியாலயத்தை பொறுத்தவரை இந்தப் பிரேரணை வந்தபோது தற்போதைய அரசு மிக மோசமாக விமர்சித்தது. இந்தப் பிரேரணையை அரசு நிராகரிப்பதாக கூறினர். முன்னைய அரசும் பொறுப்புக்கூறல் விடயத்தில் இருந்து விடுபட இதனைப் பயன்படுத்திக்கொண்டனர்.

காணாமல் ஆக்கப்பட்டோருக்கான காரியாலயம் மிகவும் முக்கியமானதாகும். இதில் பாதிக்கப்பட்ட நபர்களுக்கே அதிக முக்கியத்துவம் கொடுக்க வேண்டும். ஆனால், பாதிக்கப்பட்ட தரப்பின் பக்கம் இருந்து இந்தச் செயற்பாடுகள் முன்னெடுக்கப்படவில்லை. இறுதியாக அவர்கள் வாக்குமூலம் கொடுப்பதை நிராகரிக்கும் நிலைமை உருவாகியது.

அதேபோல், இராணுவத்தைத் தண்டிக்க இடமளிக்கமாட்டோம் என சிங்கள அரசியல்வாதிகள் கூறிக்கொண்டிருந்தனர். அவ்வாறு இருந்தால் எவ்வாறு நியாயம் பெற்றுக் கொடுக்கப்படும்?

தமிழ் மக்கள் வலுக்கட்டாயமாகக் காணாமல் ஆக்கப்பட்டோருக்குத் தீர்வு கிடைக்கும் என எமது மக்களுக்கு நம்பிக்கை இல்லை” – என்றார்.