“தமிழரசு கட்சி தலைவர் காட்டிய கட்சி” என தமிழ்த் தேசியக் கூட்டமைப்பின் பாராளுமன்ற உறுப்பினர் இரா. சாணக்கியன் தெரிவித்துள்ளார்.
உள்ளூராட்சி சபை தேர்தல் – 2023 முல்லைத்தீவு – புதுக்குடியிருப்பு வேட்பாளர்கள் அறிமுகத்துடனுன் தேர்தல் பரப்புரை மக்கள் கூட்டம் நேற்று (19) இடம்பெற்றது.
இந்த பரப்புரை கூட்டத்தில் கலந்து கொண்டு உரையாற்றிய போதே தமிழ்த் தேசியக் கூட்டமைப்பின் பாராளுமன்ற உறுப்பினர் இரா. சாணக்கியன் இவ்வாறு கேள்வி எழுப்பியுள்ளார்.
இதன்போது அங்கு தொடர்ந்தும் கருத்து வெளியிட்ட அவர், “வீதியின் இரண்டு பக்கங்களிலும் மக்களை காணமுடியாத ஒரு நிலை காணப்படுகின்றது. நாம் பார்க்க வேண்டும் என்றால் இராணுவ முகாம்களைத்தான் பார்க்க வேண்டியுள்ளது.
வடக்கு கிழக்கினை பொறுத்தவரையில் மிகவும் முக்கியத்துவம் வாய்ந்த மாவட்டங்கள் என்றால் திருகோணமலை மாவட்டமும், முல்லைத்தீவு மாவட்டமும் தான்.
எமது தமிழ் மக்களின் அரசியல் அபிலாசைகளான இணைந்த வட, கிழக்கென்பது சாத்தியமாகுமாக இருந்தால், அது நிச்சயமாக சாத்தியமாகும். அப்படி சாத்தியமாக வேண்டுமாக இருந்தால் திருகோணமலை மாவட்டமும், முல்லைத்தீவு மாவட்டமும் தமிழர்களுடைய கைகளிலே மிகவும் பாதுகாப்பாக இருக்க வேண்டும்.
நடைபெறவுள்ள இந்த உள்ளுராட்சி மன்ற தேர்தலானது தமிழ் மக்களுக்கு மிகவும் முக்கியமானதொரு தேர்தல்.
நாங்கள் வீதி வீதியாக இறங்கி இராணுவமே வெளியேறு என கோசங்களை எழுப்புகின்றோம். அதேபோன்று இதனை பாராளுமன்றத்திலும் சொல்லும் ஒரே ஒரு கட்சி தமிழரசு கட்சி கடந்த நாடாளுமன்ற தேர்தலில் 14 ஆசனங்களிலிருந்து 10 ஆசனங்களுக்கு வாக்கு சரிவு வந்திருக்கின்ற காரணத்தினால், வடக்கு கிழக்கில் உள்ள மக்கள் இராணுவமே வெளியேறு என வீதியிலே சொன்னாலும் கூட, இது தமிழ் தேசிய கட்சிகளின் அரசியல்வாதிகள் தங்களுடைய தேர்தல் பரப்புரைக்காக சொல்லுகின்ற கோசமே தவிர இது மக்களுடைய அபிலாசை இல்லை என்ற சந்தேகம் சில வேளைகளில் ஏற்படுவதனை அவதானிக்க முடிகின்றது.
எங்களுக்கான வாக்கு வங்கியில் சரிவு ஏற்பட்டுள்ள காரணத்தினால் சர்வதேசத்துடன் பேசும் போது எங்களுடைய பலம் குறைந்துள்ளதாகவே காணக்கூடியதாக இருகின்றது.
இதன் காரணமாகவே நாம் சொல்கின்றோம் மக்கள் வீட்டு சின்னத்திற்கு வாக்களிக்க வேண்டும். இந்த சின்னம் தலைவர் காட்டிய சின்னம், உலக நாடுகளுக்கு நன்கு தெரிந்த சின்னம். ஆகவே, மக்கள் இந்த சின்னத்திற்கு வாக்களிக்க வேண்டும்.“ என தெரிவித்துள்ளார்.
யுத்தம் முடிந்த போதும் சரி அதற்கு பிற்பட்டபகுதியிலும் சரி இரா.சாணக்கியன் சிறீலங்கா சுதந்திரக் கட்சியின் தீவிர விசுவாசியாக உலா வந்தவர். திடீரென ஒரு மேடையில் இரா.சம்பந்தனுக்கு பொன்னாடை போர்த்தி தமிழரசுக் கட்சியில் இணைந்து கொண்ட இரா.சாணக்கியன் இன்று முல்லைத்தீவில் நின்று கொண்டு புலிகளின் தலைவர் வேலுப்பிள்ளை பிரபாகரன் தேர்ந்தெடுத்த கட்சி தங்களுடையது என பொருள்படும் வகையில் பேசியுள்ளார்.
சாணக்கியன் போல உசுப்பேற்றி வாக்கு சம்பாதிக்கும் அரசியல் தலைவர்களாலேயே வடக்கு இலங்கையும் – தென் இலங்கையும் இன்னமும் முரண்பட்டுக்கொண்டே இருக்கின்றன.
தலைவர் காட்டிய கட்சி என்ற கருத்தை இரா.சாணக்கியன் கிழக்கில் பேசமாட்டார். அங்கு முஸ்லிம்கள் இருப்பதால் பாராளுமன்ற தேர்தலில் அவர்களின் ஓட்டுக்கள் பெரும்பாலும் கிடைக்காது விட்டுவிடும் என்ற அச்சம் தான்.
உள்ளூராட்சி தேர்தலுக்கும் இவர்கள் பேசும் தமிழ்தேசியத்துக்கும் பெரிதாக தொடர்பு இல்லை என்பதை மக்கள் விளங்கிக்கொள்ள வேண்டும். பிரதேச சபைத் தேர்தல் முழுமையாக அபிவிருத்தியே முன்னிலைப்படுத்தப்பட வேண்டியது. இந்த தமிழ் தேசியவாதிகளின் சந்தர்ப்பவாத அரசியலால் உந்தப்பட்டு தமிழ் மக்கள் தமிழரசுக்கட்சி உருவான காலம் முதல் அதற்கும் அதன் கூட்டணிக்கும் தான் வாக்களித்து வந்திருக்கிறார்கள். விளைவு இன்னமும் நமது பகுதிகள் அபிவிருத்தியில் பின்தங்கிய நிலையில் தான் உள்ளன. வறுமை இன்னமும் அதிகமாகவுள்ளது. குன்றும் குழியுமான பாதைகள், அடிப்படை வசதிகளற்ற கிராமங்கள், சுய தொழில் உற்பத்திகள் விருத்தி செய்யப்படாத நிலை என இந்த தமிழ்தேசியவாதிகளை நம்பியதால் நமது மக்கள் இழந்தது அதிகம்.
இரா.சாணக்கியன் போன்ற சந்தர்ப்பவாத அரசியல் செய்வோரை ஒதுக்கிவிட்டு தமிழ் மக்கள் உள்ளூராட்சி சபைத் தேர்தலில் சரி மக்கள் பற்றி பேசும் – கற்ற – புதிய மாற்றத்தை பேசும் இளைஞர்களை தெரிவு செய்ய முன்வர வேண்டும்.
