நாரம்மலயில் துப்பாக்கிப் பிரயோகம் மேற்கொண்டு லொறி சாரதி ஒருவரை கொலை செய்தமைக்காக கைது செய்யப்பட்ட உப பொலிஸ் அத்தியட்சகர் எதிர்வரும் 23 ஆம் திகதி வரை விளக்கமறியலில் வைக்கப்பட்டுள்ளார்.
சந்தேகநபர் குருநாகல் நீதவான் நீதிமன்றத்தில் முன்னிலைப்படுத்தப்பட்ட போதே விளக்கமறியல் உத்தரவு பிறப்பிக்கப்பட்டுள்ளது.
சிவில் உடையிலிருந்த பொலிஸ் அதிகாரிகள் இருவர் லொறியொன்றை நிறுத்துமாறு நேற்று பிற்பகல் சமிக்ஞை செய்துள்ளனர்.
உத்தரவை மீறி பயணித்த அந்த லொறியை பின்தொடர்ந்த பொலிஸார், தம்பலஸ்ஸ பகுதியில் அதனை நிறுத்தியுள்ளனர்.
அத்துடன், லொறி சாரதியின் தலையில் கைத்துப்பாக்கியை வைத்தபோது அது இயங்கியுள்ளது. இதனையடுத்து, அலவ்வ பகுதியை சேர்ந்த 40 வயதான லொறி சாரதி அந்த இடத்திலேயே உயிரிழந்துள்ளார்.
இந்த சம்பவத்தினால் ஆத்திரமடைந்த பிரதேச மக்கள் நாரம்மல பொலிஸ் நிலையத்திற்கு முன்பாக நேற்றிரவு எதிர்ப்பில் ஈடுபட்டனர்.
இதனிடையே, அந்த பொலிஸ் உத்தியோகத்தர், கவனயீனமாக செயற்பட்டுள்ளதாக பொலிஸ் ஊடகப்பேச்சாளர் தெரிவித்தார்.
பொலிஸார் செயற்பட வேண்டிய முறை தொடர்பில் வழங்கப்பட்டுள்ள ஆலோசனைகளுக்கு முரணாக குறித்த பொலிஸ் உத்தியோகத்தர் செயற்பட்டுள்ளதாகவும் அவர் குறிப்பிட்டார்.
இதனிடையே, இது தொடர்பான விசாரணைகளுக்காக விசேட பொலிஸ் குழு நியமிக்கப்பட்டுள்ளதாக பதில் பொலிஸ்மா அதிபர் தெரிவித்தார்.