ஆப்கானிஸ்தானில் இடம்பெற்றதாகக் கூறப்படும் வாக்கு மோசடிகள் குறித்து நடத்தப்பட்ட விசாரணைகளைத் தொடர்ந்து அந்நாட்டு தேர்தல் அதிகாரிகள் நானூற்று நாற்பத்து ஏழு வாக்குச்சாவடிகளுக்கான முடிவுகளை ரத்து செய்துள்ளனர்.
கடந்த மாதத்தில் இடம்பெற்ற அதிபர் தேர்தல்களையடுத்து, நாட்டின் சுமார் 28 ஆயிரம் வாக்களிப்பு நிலையங்களில் பெருமளவிலான வாக்கு மோசடிகள் இடம்பெற்றுள்ளதாக இரண்டாயிரத்துக்கும் அதிகமான முறைப்பாடுகள் தேர்தல் ஆணையத்துக்கு கிடைத்துள்ளன.
இதுவரை எண்ணப்பட்டுள்ள மூன்றில் இரண்டு பங்கு வாக்குகளின்படி, அதிபர் ஹமீத் கர்சாய் 49 வீதத்தை எட்டிய வாக்கு வித்தியாசத்தில் முன்னிலையில் உள்ளார். அவருக்கு அடுத்தபடியாக, போட்டி வேட்பாளரான முன்னாள் வெளிவிவகார அமைச்சர் அப்துல்லா அப்துல்லா 32 வீதமான வாக்குகளைப் பெற்றுள்ளார்.
