இந்தியா- இங்கிலாந்து அணிகளுக்கு இடையிலான 3-வது டெஸ்ட் லீட்ஸ் ஹெட்டிங்லே மைதானத்தில் நடைபெற்றது. முதல் இரண்டு டெஸ்ட் போட்டியில் , முதல் டெஸ்ட் மழையால் பாதிக்கப்பட்ட நிலையில், 2-வது டெஸ்டில் இந்தியா அசத்தல் வெற்றி பெற்றது.
இந்நிலையில் , 3-வது டெஸ்டில் விராட் கோலி நாணயச்சுழற்சியில் வென்று துடுப்பெடுத்தாட்டத்தை தேர்வு செய்தார்.
முதல் இனிங்சில் புதுப்பந்தில் ஆண்டர்சனின் பந்து வீச்சை தாக்குப்பிடிக்க முடியாமல் இந்தியா 21 ஓட்டங்களுக்குள் கே.எல். ராகுல், புஜாரா, விராட் கோலி ஆகியோரை இழந்தது. அதன்பின் ஆலி ராபின்சன், சாம் கர்ரன், ஓவார்டன் அடுத்தடுத்து விக்கெட்டுகளை கைப்பற்ற இந்தியா 78 ஓட்டங்களில் சுருண்டது.
தொடர்ந்து முதல் இனிங்சில் துடுப்பெடுத்தாடிய இங்கிலாந்து அணி 432 ஓட்டங்களைப் பெற்றுக் கொண்டது. அந்த அணி சார்பாக தலைவர் ரூட் சதமடித்து அசத்தியதுடன் ஏனைய வீரர்களும் நிதானமான ஆட்டத்தை வெளிப்படுத்தியிருந்தன்.
இனிங்ஸ் தோல்வியை தவிர்க்கும் நோக்குடன் 2-வது இன்னிங்சில் களமிறங்கிய இந்திய வீரர்கள் நிதானமான ஆட்டத்தை வெளிப்படுத்தினர். புஜாரா, ரோகித் சர்மா, விராட் கோலி ஆகியோர் சிறப்பான ஆட்டத்தை வெளிப்படுத்த, இந்தியா 215 ஓட்டங்கள் வரை 2 விக்கெட்டுகளை மட்டுமே இழந்திருந்தது. அதன்பின் 278 ஓட்டங்களுக்குள் முழு விக்கெட்டுக்களையுமே இழந்தது. முக்கியமாக கடைசி 8 விக்கெட்டுகளை 63 ஓட்டங்களுக்குள் இழந்து இனிங்ஸ் தோல்வியை சந்தித்தது இந்தியா.
2வது இன்னிங்சில் இங்கிலாந்து தரப்பில் ராபின்சன் 5 விக்கெட்டுகளை வீழ்த்தினார். ஓவர்டன் 3 விக்கெட் எடுத்தார்.
இந்த போட்டியில் இங்கிலாந்து அணி வெற்றி பெற்றதால் 5 போட்டி கொண்ட டெஸ்ட் தொடர் 1-1 என சமநிலையில் உள்ளது. 4வது போட்டி செப்டம்பர் 2ம் தேதி தொடங்க உள்ளது.
போட்டியில் இந்தியாவை இன்னிங்ஸ் வித்தியாசத்தில் வீழ்த்தி அபார வெற்றி பெற்றுள்ளது இங்கிலாந்து அணி. இந்த வெற்றியின் மூலம் இங்கிலாந்து டெஸ்ட் அணி தலைவராக அதிக போட்டிகளில் வெற்றி பெற்றவர் என்ற பெருமையை ஜோ ரூட் பெற்றுள்ளார். இந்த வெற்றி இங்கிலாந்து தலைவராக ஜோ ரூட்டுக்கு 27-வது வெற்றியாகும்.
