பொறுப்புக்கூறலை உறுதி செய்யவும் தண்டனைகளில் இருந்து விடுபடும் போக்கை முடிவிற்குக் கொண்டுவரவும் சர்வதேசப் பொறிமுறை அவசியம் என சிவில் சமூகப்பிரதிநிதிகள் தெரிவித்துள்ளனர்.
இலங்கைக்கு விஜயம் மேற்கொண்டு வந்துள்ள தெற்கு மற்றும் மத்திய ஆசிய விவகாரங்களுக்குப் பொறுப்பான அமெரிக்க இராஜாங்க உதவிச்செயலர் டொனால்ட் லூவிடம் இந்த விடயத்தை வலியுறுத்தியுள்ளனர்.
அதுமாத்திரமன்றி 13 ஆவது திருத்தத்தை முழுமையாக நடைமுறைப்படுத்துவதற்கும் வடக்கு கிழக்கு மாகாணங்களில் அதிகரித்துவரும் இராணுவமயமாக்கலை முடிவிற்குக் கொண்டுவர அமெரிக்க அழுத்தங்களை பிரயோகிக்க வேண்டும் என்றும் வலியறுத்தியுள்ளனர்.
மேலும் காணாமல்போனோர் பற்றிய அலுவலகம், இழப்பீட்டுக்கான அலுவலகம் போன்ற உள்ளகப் பொறிமுறைகளால் எவ்வித பலனும் கிட்டவில்லை என்றும் டொனால்ட் லூவிடம் அவர்கள் சுட்டிக்காட்டியுள்ளனர்.
இதேவேளை பயங்கரவாதத்தடைச் சட்டத்தின் பிரயோகம், உத்தேச புனர்வாழ்வுப் பணியகச் சட்டமூலம் என்பன குறித்தும் மாகாணசபைத் தேர்தல், பொதுத்தேர்தல் மற்றும் ஜனாதிபதித் தேர்தல் ஆகியவற்றை இயலுமானவரை விரைவாக நடத்தவேண்டியதன் அவசியம் குறித்தும் கலந்துரையாடியுள்ளனர்.
அத்தோடு மாகாணசபைத்தேர்தல், பொதுத்தேர்தல் மற்றும் ஜனாதிபதித்தேர்தல் ஆகியவற்றை இயலுமானவரை விரைவாக நடத்தவேண்டியதன் அவசியம் குறித்து சுட்டிக்காட்டிய சிவில் சமூகப்பிரதிநிதிகள், தற்போதைய ஜனாதிபதி மக்களால் தெரிவுசெய்யப்படவில்லை என்றும், எனவே மீண்டுமொரு மக்கள் புரட்சி வெடிக்கும் பட்சத்தில் நாட்டின் ஸ்திரத்தன்மை மேலும் பாதிப்படையும் என்றும் தெரிவித்துள்ளமை குறிப்பிடத்தக்கது.
