சட்டவிரோதமான முறையில் விவசாய நிலங்களை பாதுகாக்கும் வேலிகளுடன் இலங்கை மின்சார சபையின் மின்கம்பிகளை இணைத்ததன் மூலம் கடந்த வருடத்தில் மின்சாரம் தாக்கி மொத்தம் 50 காட்டு யானைகள் பலியாகியுள்ளதாக இலங்கை மின்சார சபையின் பிரதி பொது முகாமையாளர் (வணிகம் மற்றும் செயற்பாட்டு உத்தி) மற்றும் ஊடகப் பேச்சாளர் பொறி. கே.ஏ. நோயல் பிரியந்த தெரிவித்துள்ளார்.
இது தொடர்பில் அவர் விடுத்துள்ள ஊடக அறிக்கையில், கடந்த வருடத்தில் பல்வேறு மனித நடவடிக்கைகளினால் மொத்தம் 474 காட்டு யானைகள் பலியாகியுள்ளன.
எனவே, யானைகளைக் கொல்ல சட்டவிரோதமாக மின்சாரத்தைப் பயன்படுத்துபவர்களுக்கு எதிராக மின்சார சபை ஏற்கனவே சட்ட நடவடிக்கை எடுத்திருந்தது. நாட்டிலுள்ள யானைகளின் எண்ணிக்கையைப் பாதுகாக்க மக்கள் ஆதரவை வழங்குமாறு இலங்கை மின்சார சபை கோருகிறது.
இதன்படி, பயிர்ச்செய்கைகளைப் பாதுகாக்கும் வேலிகளுடன் மின்கம்பிகளை இணைப்பது தொடர்பான சம்பவங்கள் தொடர்பாக நேரடியாக முறைப்பாடு செய்ய 1987 என்ற அவசர இலக்கத்தை இலங்கை மின்சார சபை வழங்கியுள்ளதாகவும் அவர் தெரிவித்தார்.
