இலஞ்ச ஊழல் ஒழிப்பு ஆணைக்குழுவால் அமைச்சர் ஜோன்ஸ்டன் பெர்னாண்டோவுக்கு எதிராக தாக்கல் செய்யப்பட்டுள்ள வழக்கு விசாரணையினை இனிமேல் தொடர மாட்டோம் என கொழும்பு மேல் நீதிமன்றம் அறிவித்துள்ளது.
2010ஆம் ஆண்டு தொடக்கம் 2014ஆம் ஆண்டு வரையில் வர்த்தக அமைச்சராக செயற்பட்ட போது ச.தொ.ச நிறுவனத்தின் 153 ஊழியர்களை அவருடைய அரசியல் செயற்பாடுகளில் ஈடுபடுத்தியதோடு, அதனால் அரசாங்கத்திற்கு 4 கோடி ரூபா நஷ்டத்தை ஏற்படுத்தியதாகக் குறிப்பிட்டு நல்லாட்சி அரசாங்கத்தின் போது இலஞ்ச ஊழல் ஒழிப்பு ஆணைக்குழுவினால் கொழும்பு நீதவான் நீதிமன்றத்தில் வழக்கு தாக்கல் செய்யப்பட்டது.
இந் நிலையில் ஜோன்ஸ்டன் பெர்னாண்டோவுக்கு எதிராக தாக்கல் செய்யப்பட்டுள்ள வழக்கு முறையானது சட்டத்திற்கு முரணானது என கடந்த ஒக்டோபர் மாதம் தீர்பளித்த கொழும்பு மேல் நீதிமன்றம் குறித்த வழக்கை தள்ளுபடி செய்திருந்தமையும் குறிப்பிடத்தக்கது.
அண்மையில் முன்னாள் பாராளுமன்ற உறுப்பினரான ஜோசப்பரராசசிங்கம் என்பவருடைய கொலை வழக்கு தள்ளுபடி செய்யப்பட்டு பாராளுமன்ற உறுப்பினர் சந்திரகாந்தன் (பிள்ளையான்) விடுவிக்கப்பட்டமையும் நினைவிற்கொள்ளத்தக்கது.
